شايف من يكلك رايح اتزوج؟
وتطفه الدنيا بيك ودمعتك تنوج
الكاع اتحسها مرجوحه اعله متن اعرج
واتكل الضيمك يسترسل
شايف من تعوفه وتكعد من النوم
ورمضان الحجي كاضيها بيك يصوم
من مابيك تحجي اشلون بيك اتكوم
ويراد الصوتك عكازة
....
///ضحية لمن لايرحم///
//بقلم زهراء الحسناوي//
السلام عليكم بنات اعتذر على اضطراري نشر البارتات ونزلت قبل شويه السبب بقصه راهب ابو غضب ف اتمنى تعذروني وتتفهمون وضعي وانشاءالله مااقصر لان فعلا مشتاقه التعليقاتكم الحلوة 😍
وهسه فجرو الروايه بالتصويت والتعليقات اذا عجبتكم 😁
.............
ام احمد..زينب يمه اذا خلصتي تمشيط كومي حشي علف للهايشه قبل لاتضلم الدنيه
زينب..خليت المشط بالكاع بقوة متعصبه من كلام امي
ادري بس اني بالحوش خو مابس اني؟
والله مساع كملت حلب الهوايش وطبيت سبحت
ترديني ارجع احش واني توني سبحانه؟
ام احمد..جا منو يروح يايمه؟
زينه اختج تدرين ابوج مايخليها تنزل للكأع العصر
ومريم هلحاطه الهدوم تغسل بيهن
زينب..نفخت خدي بملل كارها روحي بسبب تعب العيشه وصعوبتها
لميت شعري وهو مبلل لفيت حجابي وفريته على خشمي لان الجو شته وباردة كلش ومغيمه
نثت العصر خفيف وبطلت مبينه اليوم تغركنه واحنه بيتنه مفطر من كل كتر
بيوم التمطر نشبع ماي
بس الحلو بالموضوع اذا عطشت نص الليل ماتتعب وتروح تشرب لان الماي ينزل على وجهك من فطور الحيطان
رحت جبت عباتي اتحزمت بيها ماطالعه بس عيوني اخذت سترتي لبستها لان بردانه
رحت ل امي سالتها
يمه وين الباذورة احش بيها(المنجل اله يدويه تستخدم لحصد الزرع)
ام احمد..خليتها فوك الحايط لاتاخذها زينه
زينب .طلعت للحايط ادردم بكلبي كلت كون تذبحني بيها واخلص من هلعيشه
خلصن من عمري 17سنة ماشفت بيهن راحه ولاعشت حالي حال البنات البعمري بسبب الفقر والعوز
حتى اخوي احمد اكبر واحد بينه صار عمره ٢٠سنه ماشفته يوم لابس لبس مثل الشباب
دوم لبسه تعبان ومبهذل
عندي اخوات اثنين اصغر مني زينه عمرها ١٦عدها نقص بعقلها بين قوسين مجنونه لذالك امي اتخاف ادزها للكاع العصر اتكول اولاد الحرام اهواي وهي فهمها على كدها لايسوون بيها شي وتالي تتصخم وجوهنا والوادم ماترحم
يردون بس علج يعلجون بي من ياخذون حلاته يذبو وساعتها عدهم سالفه جديدة تصير ويضلون يعلجون بيها
مريم عمرها ١٢سنه طالبه صف سادس ابتدائي
وضاله بنفس الرحله
مرات امي تبسطها تريدها تقرة حتى تنجح
احمد مبطل نجح للثاني متوسط وبطل
واني بطلت بصف الثالث متوسط
