تحت خط الصفر

١١

#تحت_خط_الصفر

#بارت ١١

#مريم_السعدي

يمان- نمل جسمي خجل كرهت نفسي معقوله هيج صارت كايلتله لابويه هيج بس اني سألتها اصعد؟
وكالت اصعد يله صعدت معقوله هيج تفرها!!

نزلت وي ابويه الضايج مني واني محترك حرك
مرت ابويه واكفه بالحولي رفعت راسها باوعت فكت عينها تتبشبش وي لمى  واسمع صوتهم

- موكتلج جان بايت عدها
- ياا عزه

ابويه صرخ
- بسسسسس فهيمممه بسج عاد بسج
خنست مرت ابويه

طلعنا للشغل وبقه ابويه  يحجي

- ابني انت متدري هالخمس سنين شون كضت شهور يم بيت جدها وكلما تجي تسمعها امك حجايه تسمها وتكولي خالي سكتهم تعبت

واتعارك  وميفيد ثاني يوم هم نفس الشي  من امك وخواتك تالي عجزت تعبتتت والبنيه انهزمت بروحها حدما تخرجت تروح وتجي بوجودي  لازم تعبت من الحجي

صار عرس ابن ابن عمي  ولحيت عليها تجي وجتي ولو تشوف العيون شون صارت عليها خواتك خواتك مرحموها مجموعين ويشيلون بغيبتها شبعت بجي وقهر لمن رجعنا اسمع ونتها بليل.

وانت مرتااح حضرتك هسه جاي تريدها
نصيت راسي كاره نفسي عالصار وكمل الوالد
ومع ذلك البنيه كمت دراسه واخذت الشهاده ودرست ماجستير ومن وكعت انت متركتك لخاطري وانت تجي تستغلها!!! ليش ومنو سمحلك ومنو كال اني اقبل

خاف عبالك هالخمس سنين متطلكت عدها امل بيك وعدك امل بيها لاابني لا جانت ملتهيه بالدراسه ومن رجعت بينت كتلك تحدد موعد تطلك لان جايي عدلها ومصارت كون دكتور مؤيد يريد يطلع للخارج يكمل دراسته سنتين

وهي  رفضت تطلع وياه وكلها اكمل وارجع اخطبج وهو عده علم بالسويته بيها لذلك السالفه مال طلاك نامت

لان اخر همها صرت انت وهسه جاي تكولي حاجيها تقبل بيك لاشون اسوي  هيج

سكتت صافن عليه حريك بصدري صار وعيوني جمر يطلع منها واذني هم

كال
- حضر نفسك الاحد نروح
هزيت راسي ساكت بالع الغصه

طلع والدي من يمي وارتجيت شسوي شون ارجعها اني الراحه اللي ارتاحيتها البارحه صارلي دهر  ممرتاحها   شون ماحس بيها بعد

واتذكر كلام والدي
يعني هاهي استسلم؟!

وكالعاده
اني الخسران
اخر واحد ممكن يحبني بدون مقابل غير ابويه هي
اخر شخص عدي بي ثقه حيروح من ايدي
استسلمت

اربع ايام راكد علي يروح ويجي عليه يكعد  يمنا بالحديقه اني وابويه.

جانت سوالفه تصنيف على وضعنا وعلى سياسيينا وجهاله وابنه الجبير وخالد يكعد يمنا

لحد اليوم خالد ممحتك بيه
احس بي هدأ بس من يتعصب محد يكدرله الا ينكتل وتحبسه امه ساعه اكثر يله يهدأ

جنت اقره بعيونه حاجته لابوه واتخيل لواني غركان ويوسف عايش شجان صار بي ولو وليد مكان مثال للاب الحنون

اسبوع مر مشايفها الليل يمر عليه مو ليل موت احمر. بس اتكلب

ساعه اتخيل دتحاجي بالتلفون
ساعه اتخيل يجيها متلهف يبوك كم دقيقه بالطرمه وياها

واكوم مثل المخبل افتح باب الطرمه وارفع راسي لطرمتها خاف بيها احد وارتاح من اسمع صرير الصراصر من كثر الهدوء

وارجع
نوبات احقد عليها ليش شكتني لابويه اخجل من يسألني

- خو مخابرتها يابه
- لاحجي متصلت

- ابني لتوكف حياتها متريدك
واموت قهر

واجه الاحد اللي ردته ميجي
اخر خيط تايخ  بيننا ينفل اليوم
لا راح اكدر اصعد فوك يمها بعد

ولاراح اكدر احل عليها
هالليله صعبه كانت بيها تذكرت كلشي بيننا واولهم عمتي لحددددددد لحد اليوم

مجنت الكه غلطه جنت الكه يمان الحاقد بله معنى واللي كان مفروض هي تحقد مو اني لان اخذت امها منها

طلعت الشمس واني صافن عالشباك
خايف اوكف هناك وتنزل دموعي يمكن اذب نفسي جوه السياره ولا هالضعف ارجع اضعفه.

من الصبح ابويه صاح  يوعيني عباله نايم  مديت راسي من غرفتي سكت وهز راسه بصوت مغثوث ورزن
- يله ابني حضر روحك دنروح

بدلت واكلب بالبناطير خطيه مها  صارت من تكوي هدومها تكوي هدومي ولمحت قميص الحابته قبل ست سنين

رغم صار هواي بس موديله مبطل وعبالك كبران جسمي تربع عليه لبسته. واتذكر فرحتها بيوم ميلادي. واتذكر غدري الها.

بلكن الله وتفهم هالشفره  وتتردد  بالطلاك
احاجيها قبل لاطلك
اي بس كلمتين اكولها

شكولها؟
شكول
شون ااثر بيها

كعدت على طرف جربايتي صافن
اريد شي حلو جمعنا ملكيت مشافت مني غير جفاف حتى من جنت اقترب منها ارضاء رغباتي لاحجيت كلمه حلوه لاغزل ياكون الوكت يرجع

طلعت اسوق وابويه بصفي كلمه منطق
- حجي وينها هي لعد

- وي عمها تنتظر يم المحكمه ابني بابته بيت جدها جانت

سكتت
وصلنا شفت سيارتها
نزلت وابويه ورايه

مدري ليش جاي
يمكن يخاف لااكلب عليهم

شفتها جانت ناطيه ضهرها علينا وعمها يحاجيها اشرلها بركبته علينا التفتت تقربت من ابويه باست  راسه
وباوعتلي

واني كل تفصيل بيها تأملته خاف اكو شي بلبسها يبينلي فد شفره تبين انه هي هم تريد توصل رساله
وملكيت

باوعت للقميص وباوعتلي تصافح عمها ويايه وكعدنا ننتظر المحامي تمنيت الوكت يطول

كعدت وابويه اشرلها
- كعدي خالو

كعدت ببعد كرسيين عننا طفله جانت كاعده بالنص مقابله مال ابوها وياها اتصور عدها

باوعتلها تبتسم شاورتها والطفله ضحكت وفكت عينها كلها صرخت اجه باباا

وراحت تركض
باوعت لسنا باوعتلي ونصت راسها ابويه وعمي يحجون

بقيت اتأمل ملامحها الحنينه وهي وجهه تعاين كبل متريد تلتفت

كتفت ايدي 
ماعرف ليش ردت اكولها

- سنا اني آسف

التفتت متفاجأه فكت كل عينها ووغرغرت رأساً رجف حنكي واصطك

وانتبهت
ميلت راسي بتوسل

بقت عيونها بوجهي
- عفيه سنا لتعو..

وفززني الصوت
- السلام عليكم حجيي

- اهلا اهلا استاذ رياض
- يله يابه تفضلو

وكفت سنا وتسالمت وي المحامي وتسالم ويايه رديت بإرتباك عيوني عليها  وعليه

طببونا  للقاضي  واني خطواتي ثكلت واصطكت سنوني تلجم حلكي واريد بس تباوعلي ماكو كامت متباوع

حجه المحاكي وي القاضي والتفت علينا كال تفضل استاذ يمان

خطيت خطوه وقع ما وقع اريد اوقع ايدي ترتعش
كال

- بيك شي استاذ والتفت لسنا
سنا تقدمت كال
شبي باوعتلها ارتعش

كالت
- يمان فدوه خل نفضها
لالا كل الكدرت اسوي هزيت راسي بالرفض
غمضت ودارت وجهه فركته

المحامي كال سياده القاضي بس دقيقه
وباوعلنا

استاذ يمان وكت ماكو كوه سويناها دون محضر اجتماعي

باوعتله وباوعت لسنا زادت رعشه ايدي وصكه فكي
وسنا دايره وجهه ومغطيته طلعت بعصبيه بره طلعت وراها  بثكل

شفتها واكفه بم ابويه وابويه رفع راسه مغضب
وكفت عمها نتر

هذا موحجي ابو  يماننن سوي جاره لابنك خمس سنين بيت وقف خومابيت وقف

وتقدم  ابويه بعصبيه عليه
نتر

- بابا فضها
واهز راسي بلا

- يمااان ... لتصخم وجهي كدام عمها
اباوعلها ناطيه ضهرها الي وعمها يخزر بيه

شصار بهالست شهور اللي احس روحي تطلع هسه اذا نطقت
شسويتيلي
شنطيتيتي
ليش هالاحساس ينعاد من جديد عليه واحس اخر امل بالحياه يضيع

تقرب ابويه دار وجهه عليه
- بابا ركزز كلمه اشمرها دنرووح

كدرت انطق
- مرتي

نتر من بين سنونه
- لك باباااا يييزي هزيت راسي لا
دارت وجهه بعصبيه وجهه احمر دفعتني بقوه من ضهري على صفحه

ونترت
يمانننن هسه حنطب ننهي كلشي وكأنما  اليوم تزووجت اللي ردتها وعفتني بنص الاكرههم ويكرهوني يضحكون عللليه. فاااهم

تحجي وعيونها دم ووجهه هم
بجت وترجف تردد

- اني من وراك اشكال حجي طلع عليه اشكال على تربيتي حجو محد رحم بيييه وانت عايش مرتاح اريد اخلص اريد ارتاح انسان يقدرني انت غدرت بيه لو اموت مااابقى وياك

من شفت دموعها وحمار وجهه انهاريت واتنفس بصعوبه هزيت راسي

- شتردين اسوي بس لتبحين

غمضت ونصت
- ها سنا لتنزل دموعج من ورايه

هزت راسها مغمضه كالت
- يله نطب

هزيت راسي وطبت كدامي طبيت وراها ونطقت اليمين مثل   مكالو وعيوني بعيونها رفعت راسها بشموخ تعاينني وكأنما ثار الامس يناخذ اليوم
وكأنه
اليوم غدرت بيها

ارتاحت ملامحها بس نزلت دمعتها واني نفسي كبس ضلوعي على صدري.

انتهى كلشي وطلعت تركض تمسح بدموعها وعمها وراها التفت على بابا كال

حجي كملها المعامله رحمه على روح اخيتك راحت اختفت
وابويه يصيح

- يمان بابا يمان
واني مااسمع
الا هزني يله باوعتله

كال
- هاهي امشي

- يابه راحت تبجي
سكت ونصه جرني

- حجي راحت تبجي
- اي ابني

- ليش بجت غير تريدني
التفت  كال
- خلص كلشي ابني مترهمون سوه بعد

- بشر ميغلط حجي؟!! ... احجي بتوسل
هز راسه
- مااكدر اعينك عين روحك بهاي

وصلنا للسياره وهو ساق للشغل تركني وراح وحدي
واني تفكيري وكف يم دمعه عينها النزلت مكدرت انسى عدي امل والله عدي

ليش استسلم ماكدر اعيش  دونها
يومين مرت واني مراحت ثانيه من تفكيري

اروح واجي للشغل وعيوني على بابها ابويه من يشوفني التفت يستغفر واكعد عدل

اكلي قل عناد كمت اعاند علاجي مااخذه المن اخذه بعد

ومر اسبوع
والدي كان بوكتها فاتح مشروع جديد حدايق ومطعم وخلاني اشراف عليه بس حتى التهي

رغم وجود مايكفي من العمال اللي يفوقوني بالخبره
بس وكفت

الحدايق كانت عالشط وكلما اسمع صوت المي الصبح جسمي يقشعر والتفت اعاين من بعيد

عشر ايام وكمل المطعم  بيوم الكمل رجعت للوالد بالشغل بواهس مكطوع

وهو يشجع ويثني تكول اني السويته

هالفتره اخو تماضر دز مفتاح الشقه لان اخو كاعد عن العمل هو اللي يصرف عليه وعلى عائلته وامه ومهدد لو تطلعون من البيت لو ترجعوله الشقه ورجعوها لان حتى طعن ببيعتها هو وصار خلل بالبيعه بالضريبه وطبك ويايه

استلمت المفتاح جرأه ومقاومه اروح اشوفها مااكدر
بالتالي بعتها وكتله رجع فلوسها

بيومها احوص لكيت  حجه اخابرها بيها وهي الفلوس وصلتلج

وفعلا وره ال١٢ دكيت عليها والصدمه
لكيته مشغول

ورجعت دكيت هم مشغول
غير تخبلت
غير تهسترت
مثل المخبل افتر وادك وطلع مشغول

ساعه ١٢ ونص دتحاجي
شديحجون
شيكول الها
يكوللها شي اني مكدرت احجي راح تحبه راح تنساني

نسيت كوني اذيتها غدرت  بيها  نسيت كوني طلكتها

ومثل المحاس على روحي جسمي اخذني العدها عقلي وكفففففف لو مو ابويه بوجهي لو شو منو اليوم احرك التلفون عليها

طلعت ركض وانفتحت باب غرفه مها بيدها هدومها لمحتني اركض لحكتني

يمان عزه بعينك يماااان وين وين

ولا هتميت ومن السياج عبرت عليها وفتحت باب المطبخ مقفول دكيت وصيحت سناااا سنااا افتحي تحاجي  مووو

شفت وحده لابسه اسود تلبس بحجابها طلعت ولنها ببيتها صيحت

- شتريد انتت شرايد

- صيحي سسسنا
وشكل حلكي شكل حضي القندره شكل اصطك

وهي تصيح شتريد منها ووكف عصب فكي طلعت سنا وتقدمت الها والتلفون بيدي كوه كلتها

ووووووويامن وبلعت ريك بقوه وصرخت بعلو صوتي اريد تطلع الكلمه

تحجييييييين.

صفنت عليه وجهه مال نوم

وببيتها تدفع بيه واني لزمت سنا من فكها ارتعش وهي وجهه بيدي شعرها ينهز وي كل ضغطه ونفره

وويامن تتتتتحجييين
ااحجي

لعابي( عفوا) طلع بغزاره من بين شفتي كون ممسيطر على اعصابي وهي صافنه بوجهي وعلى شفتي

صرخت
ااااحجي

مداحجي والله
ممممممممشغول مشغول مشغول مشغول وضربت الفون براسي

همست ولزمت ايدي  بيدها الاثنين رغم ضغطه ايدي القويه الحتكسر فكها بكل هدوء  لزمتني وتحجي بهدددوء

- يمان اني حاظرتك من احظرك يطلع مشغول

هدات رأساً
دكمه وطفتها غمضت وحيلي انهد وجع بكل جسمي صار فكي وايدي العاصر بيها فكها نزلت ونصه راسي من وحده فك حبل الدمار من فكي واسناني

طلعت كلينكس من جيبها ومسحت طرف شفتها واني منصي حيلي مهدود واتنفس مثل النقطع نفسه

-أهدأ يمان

- سسسنا
- ها عيني ليش تأذيني وتأذي روحك
- سنا بس انتي تعرفيييلي

باوعتلها لزمت وجهي

- ليش تأذيني
- اني ااااذيك ؟!!

احجي واعتعت وهي بكل هدوء تهديني
- ااي انتي ترديني اااموت

- لا يمان اريدك تعيش واريد اني هم اعيش
- اريد وياج

- انتهت بيننا يمان اني بت خالك و بس ومن تحتاجني هاي اني بصفكم

- اني ككككل لحضه بحاجتج
واندكت الباب قوي
ادري بي ابويه
وادري راح بيعصب باوعتلها شي بيه رجع ليوره

و كأنما عمتي الكدامي

- لتكوليله

مثل قبل
من اخبث ويجي ابويه معصب واتوسل بعمتي لتكوليله
وسوت نفس مسوت عمتي

غمضت ولزمت وجهي بيدها الاثنين

- لتخاف اكوله اجه يشوفني الدوه وحتى بيبي متتدخل
تقدمت فتحت الباب لابويه وابويه فاير

حجت وياه وهدأ

طلعت تركت البيت وطبيت لغرفتي حتى لطم لطمت
شسووي
شوون اعيييش

وين اروح  لو وياج لو بلاها عيشه الله الله شكبره يدري شديصير بيه

مجرد احساس انها تحاجي وكف عقلي تتزوج تطلع روحي

من يومها خططت وقررت سنا زواجها ميتم وان كرهتني

راح اخليها تحبني

مراح اتنازل عنها ابددد

.....
يتبع

.

م