الجني اليهودي العاشق

البارت السابع والعشرون

الجني اليهودي العاشق

البارت السابع والعشرون

بارت مفاجئ ❤

راحوا ابو رباب وعاصف يركضون لبيت هاجر.. وام رباب والبنات هم راحن وراهم..

يدكون بالباب محد يفتحها..
بدوا الجيران يطلعون على صوت هاجر(ام حمودي).. طلعوا اثنين شباب جيرانهم بالمنطقة

فجأة صوت هاجر اختفى..
ماكو صياح.. ماكو عياط
شنو اللي صار..؟
وشنو اللي ديصير؟؟؟

عاصف ضرب الباب ما انفتحت.. عبر من على الحايط وفتحها لأهلها حتى يدخلون..
دخلوا عائلة رباب والشباب الاثنين  جيرانهم..

الكل ظلوا مصدومين.. 😳😳😳

لكوا هاجر تبجي وتعيط وأكو رجال يمها يحاول ينزعها ملابسها..
وحمودي ابنها محبوس بوحدة من الغرف.. قافلين عليه الباب.. وبس يضرب بالباب ويبجي..
الرجال اللي ديعتدي على هاجر ارتبك ما عرف شنو يسوي..
لازم مسدس بإيده..
وجه المسدس على أبورباب وعلى الجيران..
من الإرباك ما عرف شنو يسوي..
وهاجر تبجي وتحاول تستر جسمها وشعرها..
راحن عليها أم رباب وبناتها حاولن يغطنها

الكل يخافون يتقربون عليه لإن لازم مسدس..
بس ابو رباب ما اتحمل يشوف اخته شرفه بهيج موقف ويظل واكف ومكتف إيده..
اتقرب على الرجال حاول يضربه..
بس شلون...
الرجال شايل مسدس..!
بدوا يتعاركون هو وأبو رباب..
انضربت طلقة بالجو..
عاصف والجيران التموا على الرجال كلهم وأخذوا منه المسدس.. وحطوا بالغرفة.. الكل عبالهم حرامي..
واحد من الجيران : ام حمودي خيتي احجي باك شي منج اخذ شي من البيت؟
هاجر كامت تبجي..
ابو رباب : احجي شخذ منكم احجيلنا قبل ليجون الشرطة..
هاجر : هو ما جاي حتى يبوك.. هو جاي حتى..

ابو رباب : حتى شنو احجي..؟؟؟

هاجر : مااعرف اندكت الباب طلعنا اني وحمودي لإن الوقت متاخر اخاف اطلع وحدي.. بس فتحت الباب دفعني وحاول يدخلني جوة.. ظليت اصيح هو ما كدر يسيطر علية وعلى صياحي التهى يدخل حمودي بالغرفة ويحبسه(فدوة رباب روحي فتحيله الباب لحمودي وطلعي راح يتخبل وحده بالغرفة)..
ابو رباب : كملي..
ظليت اصيح انتوا حسيتوا بية وسمعتوا صوتي وجيتوا..  ما كدر يسكتني طلع المسدس وكلي اذا ما سكتي تنكتلين.. وطلب مني.. طلب..
ابو رباب : شطلب احجي
هاجر : طلب مني انزع ملابسي..(كامت تبجي)

عاصف ما اتحمل ضربه للرجال والجيران بعدوا عنه حتى ميرتكب جريمة بي..
أبو رباب راح وكف يمه وكله اليوم متبقى عايش يا نذل تعتدي على اختي..
واحد من الجيران : اهدأ ابو عاصف لتضيع نفسك من ورى واحد فاشل وما عنده غيره مثل هذا اتصلنا بالشرطة وهسة جايين..

الرجال كام يخاف..
شاف نفسه انكشف..
شاف الكل ضده..

الرجال : يا جماعة.. لا فدوة لتتصلون بالشرطة والله اني ماعلية.. ما إلي دخل رائد هو السبب..

الكل انصدموا بالكلام اللي ديسمعوا.. 😳😳

ابو رباب : رائد؟
الرجال : اي رائد.. هو اللي اتصل بية من رقم غريب.. وعرفت هو بالسجن.  طلب مني اسوي هالشي وينطيني مقابيله فلوس..

ابو رباب : وشنو هذا الشي؟

الرجال : طلب مني ادخل على مرته بالليل وأخليها تنزع ملابسها واصورها.. وكال.. كال اعتدي عليها وصورها عادي.. يمكن يريد يساومها بالفيديو والصور هذا اللي فهمته منه عرفت صايرة مشكلة جبيرة بينهم..

العالم كلها تخبلت من الكلام اللي ديسمعوا من الرجال..
معقولة..؟؟!!
معقولة اكو رجال هيج يسوي بزوجته؟ بعرضه؟ بشرفه؟؟؟؟!!

واحد من الجيران ما اتحمل اللي ديسمعه ضربه للرجال وعاصف هم بدأ يضرب بي..

بهالأثناء..
اجه حماها لهاجر(ابو أحمد)..
دخل فجأة..
ابو رباب : هاي شجابك؟؟ شجابك بهالليل؟؟

الكل التفتت يشوفون منو اللي اجه..

ابو أحمد : انتوا شتسوون هنا شكو؟؟ ومنو هذا..؟

ابو رباب : هسة احجيلي انت شجابك ليش جاي بهالوقت؟

ابو احمد : وصلني مسج.. (روح شوف زوجة اخوك الشريفة شدتسوي ببيتها؟ شوف منو يمها بالبيت..) هيج مكتوب.. من قريته تخبلت.. شغلت سيارتي وجيت..

ابو رباب : شريفة وغصباً عليك وعلى عشيرتك..

واحد من الجيران : والكل تشهد على شرفها وعفتها وأخلاقها صارلنا سنين كلمة ما سمعنا عنها ولا شفنا منها شي مو زين وهسة اخوك النذل يريد يشوه سمعتها..

ابو أحمد : يا جماعة فهموني شنو اللي ديصير ترى اني ماادري بكل شي واخوية شبي؟ شنو دخله بالموضوع؟ وهذا الرجال منو؟

ابو رباب : هذا واحد نذل مثل اخوك.. رائد دازه حتى يصور اختي وينشر صورها ويعتدي عليها.. لو ما الله واحنا وهالناس الطيبة جان اختي شصاير بيها فهمني جان شصار بأختي؟؟

ابو أحمد : والله العظيم اني مااعرف بهذا اللي صار كله.. يعني معقولة رائد يسوي هيج بزوجته؟ لتخبلوني هاي مو أخلاق اخوية..

الرجال اللي اجه يعتدي على هاجر : اي اخوك هو اللي دزني عليها.. خابرني هو وبالسجن.. وحتى التسجيل موجود أني ما اشيل هالشيلة وحدي لازم اعترف.. وعلية وعلى أعدائي

اللي فهمنا من اللي سواه رائد راد يسوي هذا الشي بهاجر راد يساومها بالفيديو وصورها بدون ملابس في سبيل تتنازل عن حقوقها وعن البيت.. يعني هذا بمثابة تهديد إلها

حسبي الله ونعم الوكيل.. 💔

جوي الشرطة أخذوا الرجال اللي حاول يعتدي على هاجر..
ثاني يوم الصبح راح ابو رباب قدم بلاغ اشتكى على رائد..
والرجال اعترف انه رائد دزه على زوجته..
يعني راد يشوه سمعتها.. والدليل دز مسج لأخو حتى اخو يروح يشوفها بوضع مو اخلاقي وية رجال.. رادها تنفضح.. بس المرة شريفة ونظيفه الله نصرها عليه وفضحه إله للنذل اللي ميملك غيره ولا شرف..

ابو رباب من الصبح راح للمركز يقدم البلاغ..
وهاجر راحت بطريقها للمحكمة تريد تروح تقدم قضية خلع..(تخلع زوجها)..
بس بداخلها تكول حرامات أخلعه وأتنازل إله عن كل شي..  وذا خلعته وتنازلت معناها هو انتصر علية.. معناها اللي سواه بية من راد يفضحني كدام العالم ويبين للعالم كلها ولأخو اني مو شريفة تحقق.. لا.. لا والف لا.. لازم اروح على المحامية واقدم قضية طلاق مو خلع.. اني إنسانة شريفة غصباً عنه وبنفس الوقت اني إنسانة قوية لازم مثل هيج موقف ميهزني.. 💪
اتصلت على اخوها ابو رباب أخذت رأيه.. كال إلها ممنوع تتنازلين..
راحت على المحامية وشرحت إلها الموضوع بكل حذافيره..

بعد كم يوم صارت الجلسة مال الطلاق..
هاجر جتي على بالها فكرة..
هاي الفكرة ما كالتها لأحد بس كالتها للمحامية

راحت دتتطلك..
بالجلسة حبت تأذي لرائد وترد كرامتها.. وتذكرت اللي سواه بإبنها وبرباب.. هالشي خلاها تتجرأ وتخطي هالخطوة..

الخطوة هي..
كامت هاجر قدمت الرامات اللي بيهن سوالف رائد كلهن(الفيديوهات الغير أخلاقية).. نطتهن للقاضي..
هالشي يساعدها تتطلك منه لإن يعتبر خاين..
وبنفس الوقت قضية زنا...
وبنفس الوقت هم راح تكدر تحصل على الطلاق بدون مشاكل وتاخذ كل حقوقها..

هاجر رغم اللي صار بيها بس بقت قوية..
ما انهزت ولا شعراية بيها..
ومشت على مبدأ اللي باعني أبيعه..
شلون ما هو باع حب سنين وخاني وغدرني اني اسوي بي الأكبر وافضحه..
هاجر ردت كرامتها..
دموعها بعينها وتبجي بس الله نطاها قوة وصبر.. وما تراجعت..
بعدها تحبه.. بس اللي سواه بيها خلاها تكره الحب..

هاجر اطلكت.. اتحررت من
وقررت من تطلع من المحكمة تنسى هي بيوم من الأيام حبته..
تنسى تزوجت واحد مثله.. (حيوان بشري)..

هاجر كدرت تنتقم لنفسها ولإبنها ولرباب..
وعدتها لرباب وما خلفت بوعدها..

بس هذا مو كل شي رادته هاجر يصير..
هاجر فكرت بشي ثاني للإنتقام..
حبت تنتقم منه بطريقتها الخاصة..
وهالمرة رباب ساعدتها بهذا الشي..

الانتقام الثاني..
قررت هاجر تفتح الصفحة مال رائد على الفيس.. وطلبت من رباب تساعدها
هي جانت تعرف الباسوورد مالتها..
مسوي روحه هو بريء وما عنده شي كدامها ناطيها الباسوورد مالت الفيس(حتى يبعد الشكوك والشبهات عن نفسه).. ويخليها تثق بي ثقة عالية..
وعنده صفحات ثانية متعرفهن هي.. يشتغل بيهن شغل الشعوذة والإستخارة على الفيس(الصفحات اللي مرة رباب من فتحت جهازه كشفتهن)..

نشرت هاجر على صفحته الشخصية فيديوهات(اختارت كم فيديو لرائد ومجموعة من البنات.. اخذتهن من الرامات مالته.. اقتطعت اجزاء من الفيديو (ما نشرت الفيديوهات بكل تفاصيلهن).. لإن بعضهن خادش للحياء.. حتى هي تستحي تتفرج عليهن كاملات.. اقتطعت من كل فيديو أجزاء.. وبدت تنشرهن..
(لكن قبل النشر طلبت من رباب تنزل برنامج وتسوي تغويش على وجوه البنات حتى متفضحهن.. وحاولت جهد الأمكان تبين رائد اكثر شي بالفيديو.. رائد هو هدفها مو غيره)..

رائد جان ضايف هواي عالم على الصفحة مالته.. جيران وأصدقاء وأهل ومعارف وأصدقاء العمل..
يعني الكل شافوا هاي الفيديوهات..
الكل عرفوا رائد على حقيقته..
هي تنشر وتتابع التعليقات وتبجي..
تشوف الكل مستغربين بالتعليقات..
وقسم من العالم ما صدكوا كالوا هاي الفيديوهات مفبركة ويجوظ الصفحة متهكرة وواحد هيج دينشر بصفحة أبو حمودي.. ابو حمودي ذهب.. والعيبة ابد متطلع منه(هاجر تقرا هالكلام وتضحك وتكول اني هم جنت شايفته ذهب.. بس للآسف طلع مغشوش)..

الناس إلهم الظاهر.. ميعرفون إنه ما خفي كان أعظم..

بنفس الوقت هاجر حست بروحها قوية..
كالت مثل ما هو خان العشرة أني هم ما راح اراعيها..
وحتى ما راعت هو أبو ابنها.. ولا فكرت بإبنها لإن اللي سواه بيها مو قليل.. حبت تنتقم لذاتها
وقررت تفكر بروحها وبس..
وتكول مثل ما هو راد يفضحني ويشهر بية وبسمعتي اني فضحته.. تغديت بي قبل ليتعشى بية.. 💪

النار اللي بداخلها بعدها مشتعلة.. ممكن تكون هدأت العاصفة اللي بداخلها حالياً.. بس ممكن تتندم بعدين على اللي سوته.. الله اعلم

فعلاً هاجر إمرأة قوية..
إمرأة عظيمة..
إمرأة شجاعة..
ما ظلت تبجي ونصبت فاتحة ومناحة وظلت تلطم لإن خانها جويسم.. 😅
ولا ظلت تنشر بوستات(منشورات) على الفيس على (خيانة الزوج والحبيب) وثبرت العالم وياها بمنشوراتها.. 😒
ما جانت محتاجة تعليق (الله يصبرج).. ولا محتاجة تسمع (الله يعينج).. لإن هي تعرف بالله موجود.. تعرف بربها ما راح يتركها وحدها..
القوة اللي صارت إلها استمدتها من رب العالمين.. اللي هو خير معين وخير قريب بمثل هيج حالات ومواقف.. ربها أقرب إلها من اي بشر.. وأقرب إلها حتى من نفسها..
وكما قال تعالى في قرآنه الكريم (( ونحن أقرب إليه من حبل الوريد))
صدق ربي في ما قال..

انتقمت هاجر للمرة الثانية..
وظلت تنتظر الإنتقام الثالث.. بس هالمرة تنتظره من "ربها"..
هاجر عدها إيمان بالعدالة الآلهية..
راح تبقى تنتظر العدالة من ربها..
تنتظر ربها ينتقم من اللي ظلمها.. وظلم هواي غيرها..
            بسم الله الرحمن الرحيم

((وما كان الله ليظلمهم ولكن كانوا أنفسهم يظلمون)).. صدق الله العظيم.. ❤

(سورة العنكبوت الآية (40))..

من ظلم نفسه فهو لغيره أظلم..

بعد كم يوم مرن ..
ابو رباب طلب من هاجر تجيب حمودي ابنها وتجي تسكن يمهم.. لإن بعد ميأمن يتركها وحدها بالبيت من بعد الموقف اللي صار..

هي رفضت..
لكن الكل قنعوها.. وبينوا إلها انه البيت بيتها قبل ليكون بيتهم.. وكالولها حتى نطمن عليج اكثر بوسطنا.. ❤

فاتت أيام..
ابو رباب رجع مرة للبيت فرحان..
ام رباب : خير يا طير اشوفك اليوم فرحان وتضحك.. الله يديمها

ابو رباب : هاجر خيتي انطيني البشارة..
هاجر : خير ابو عاصف كول..
ابو رباب : صادفت اليوم واحد من جماعتنا الضباط اللي بالمركز وحجالي على رائد..

هاجر : شبي النذل..؟

ابو رباب : كال التهم اللي متقدمه ضده كثرن هواي صارن ولو الف كفالة ميطلع.. تهم النصب والاحتيال على العالم.. وتهم التحرش بالبنات..
وهالشي كله مثبت بالفيديوهات اللي لكوها ببيت صاحبه.. واللي قدمتيهن انتي للحاكم من اطلكتي.. وتهمة الزنا.. ما عدا الشكاوي اللي قدموهن أهالي هواي بنات ضده.. وطلع كله شغله غير قانوني.. تخيلي على كل تهمة كم سنة راح ينسجن؟؟ واحسبي
يعني راح يظل عايش بالسجن.. هو هذا قدره وقدر كل واحد إبن حرام مثله.. خلي نايم بالسجن نوم الظالم عبادة..
إنسان مادي.. إنسان إشترى الدنيا ومغرياتها وفضلها على الآخرة..
مشى ورى شهواته ونزواته.. 👎👎
عباله الدنيا راح اتدوم إله..
ميدري الدنيا دواره.. تظلم تنظلم..
ميعرف لكل ظالم نهاية..
هو هذا اللي يزرع ظلم شينتظر يكون الحصاد؟؟
ومثل ما قال إمامي علي (عليه السلام)..
إذا دعتك قدرتك على ظلم الناس فتذكر قدرة الله عليك)..
صدق إمامي في ما قال.. ❤

هاي كانت نهاية رائد..☝️☝️
هاي نهايته.. ونهاية كل ظالم
ظلم.. افترى.. كذب.. خدع..شوه سمعة غيره.. تبلى على العالم.. طعن بالشرف.. دمر حياة شخص.. فرق شخصين عن بعض.. 💔

عبالهم الدنيا اتدوم.. قرروا يمشون بهالطريق ويستمرون.. حتى ما فكروا يتوبون ويرجعون لربهم عسى ولعل ربنا يغفر إلهم جزء من ذنوبهم..

هيج ناس نهايتهم الخزي والفضيحة بالدنيا..
(يا ظالم هل تعلم إن عاقبة الظلم وخيمة في الدنيا قبل الآخرة..؟؟!)..
ونار جهنم بالآخرة..
هذا كان نصيبه ونصيب كل ظالم إن شاء الله..

ايها الظالمون إن كنتم تظنون إنكم ستنجون من محاكم الدنيا فأعلموا إن هناك محكمة لا تقبل فيها رشوة ولا واسطة.. محكمة شعارها :
((ولا يظلم ربك أحداً)).. (الكهف الآية 49)❤

زين رباب بهاي الأيام اللي فاتت شلونها؟؟
شلون حالتها؟؟
هم دتشوف الجني صاحبها لولا..؟؟؟ 🤔

كاعدين كل العائلة بالهول ما عدا رباب..
فجأة العائلة كلها تسمع صوت... 😳😳😳
#بقلمي #زهراء_الزهيري