الجني اليهودي العاشق

البارت الخامس والعشرون

البارت الخامس والعشرون

الجني اليهودي العاشق

سوري ع تأخير.. مشغولة عذروني ❤

رائد وهاجر متفاجئين باللي فتح الباب..😳😳

هاجر : هاي شجابج؟؟ شلون جيتي؟؟

طلعت اللي فاتحة الباب هي رباب...

رباب : جيت وراج عمة.. لازم اشوف عمي.. عمي اللي رباني.. اللي طول عمري اعتبره ابوية الثاني.. اعتبره قدوتي بالحياة..  مثلي الأعلى.. عمي اللي دخل جني يهودي براسي.. عمي اللي حاول يخليني أحلم بي أحلام سخيفة في سبيل مشاعري تتغير إتجاهه.. في سبيل يتقربلي.. مو عمووو مو هاي جانت غايتك..

عمو رائد : رباب كافي سكتي شدتحجين انتي..؟؟!

الضابط : أخذوا راحتكم اني راح اطلع..  بس لتطولون واضح اكو مشاكل عائلية..

رائد مرتبك وميعرف شنو يكول...
رائد : رباب شدتحجين... هاجر.. هاجر حبيبتي لتصدكيها هاي مخبلة تحجي شيش بيش.. خلي تولي هالمجنونة.. انتي.. انتي مصدكتني إلي مو حبيبتي..

هاجر : طلكني..

رائد : اششش هاجر سكتي لتجيبين طاري هاي الكلمة بعد على لسانج..

رباب : شتتوقع لعد تبقى وياك بعد كل اللي عرفته عنك؟
رائد : انتي سكتي لتتدخلين والله والله اذا عرفت انتي إلج يد او حاجية لعمتج علية شي سيء يا رباب إلا أدمرج..

طبعاً هاجر واكفة وحيلها مهدود رجلها بالكوة شايلتها.. وبس دموعها تنزل..

هاجر : رباب ما إلها دخل.. رائد اني عرفت عنك كل شي..
رائد : شعرفتي فهميني لتخبليني هاجر.. معقولة انتي تتغيرين علية.. معقولة حب السنين يتغير أهون عليج تعوفيني وشوكت؟؟ وأني بأسوء حالاتي..؟؟؟

هاجر : وأني شلون لعد هنت عليك؟ شلون خنتني وية مية وحدة؟؟؟؟ وبنص بيتي هم جنت تخوني؟؟؟ بالتكية؟؟ بمكان عملك؟؟ بمكان صلاتك؟؟؟شلووون؟؟ تتزوح علية رائد؟؟ ومتعة..؟ تتزوح متعة؟؟! مو على أساس انت ضد زواج المتعة وتعتبره باطل.. احجي جاوبني لك طلعت انت باطل.. كل شي عرفت عليك.. فتحت كنتورك وشفت القرف مالتك.. شفت الأوساخ والجرائم اللي مرتكبها بحق العالم.. وبحق بنات العالم.. حسبي الله ونعم الوكيل عليك.. والنوب ما كفاك بنات العالم ردت تضحك على بنت اخوية هم مووو؟؟ وكل اللي شفته يهون بس من سمعت انت مدخل جن بحمودي ابنك اقسم بالله انقرفت منك لك انت أب انت؟؟ انت حيوان رائد.. لا والله ظلمت الحيوان لإن الحيوان شوية عنده حنية على أطفاله..

رائد انصدم من الكلام اللي سمعه من هاجر..

رائد : هاجر كافي شدتحجين وانتي تصدكين أني هيج.. تصدكين اني اسوي هيج اشياء..؟

هاجر : لك كافي ارحم نفسك بعدك عايش بدور البريئ؟؟ لك اني شفت كل شي بعيني.. محد حجالي.. الرامات اللي لكيتهن بكنتورك كلهن فتحتهن.. شفت فيديو فيديو ما فوتت واحد.. شفت صور وفيديوهات خلني اكره نفسي واكره اليوم اللي حبيتك بي.. معقولة اني متزوجة هالإنسان والله وسفة والله سفة انت هيج طلعت عمت عيني اللي جنت مأمنة بيك كل هالسنين وأني الماي ديمشي من جوايه..

رائد : حبيبتي اني بشر والبشر يخطأ.. سامحيني
هاجر : لك شسامحك على وحدة اثنين صدوك تحجي انت.. طلكني بسرعة والنبي ثانية ما ابقى وياك بعد..
رباب : طلكها احسنلك يا حقير هم زين الله كشفك على حقيقتك.. إن ربك لبالمرصاد..

رائد : رباب انتي سكتي.. لتزيدين حطب على النار هاي بدال ما تهدأيها..
رباب : شهدأ منها..؟؟ ليش اكو وحدة عاقلة عرفت كل هذا عن زوجها وتبقى وياه بعد؟؟

رائد : لج كافي سكتي وطلعي وعوفينا وحدنا..

هاجر : لا رباب ممنوع تطلعين..خليها إبالك تحرم علية رائد إلى يوم الدين.. وتحلم بعد تنسد علينا باب وحدة..

رائد : رباب طلعي.. اذا ما طلعتي والله أدمرج..
هاجر : شحدك تتقربلها والله اكلك اكل بسنوني..

رائد : لا هي تعرف شلون ادمرها هي ذكية وتفتهم..
رباب : هو انتي دمرتني بعد.. ما خايفة شتريد تسوي سوي..

رائد : لتتحديني..
هاجر : ساحر ودجال الله ينتقم منك.. طلكني اذا انت رجال طلكني..
رائد : رجال وغصباً عليج لج الزمي حدودج.. ما اطلك وشتسوين سوي..

هاجر : غصباً عليك اطلك مو بكيفك..

رائد : كافي حجي رجعي للبيت اخذي فلوس وروحي ووكليلي محامي شاطر خلي يخلصني من هالسالفة.. مستحيل ابقى هنا.. ما اكدر ابقى اني بهذا المكان

رباب : شوف هذا كل عقله يحجي بابا احنه فرحنا من الله رماك هالرمية منو يوكلك محامي كل عقلك تحجي انت..؟؟!

رائد : بسيطة يا رباب والله ما افوتها إلج صبريلي.. واليوم إلا أدمرج
هاجر : كل شي متكدر تسويلها.. كتبك وخرابيطك كلهن بالبيت..

رائد : هههههه ليش عبالج اني أشتغل بس بالكتب.. اني حاكم جن واكدر ادمرج هسة إلج ولبنت اخوج..
رباب : طلع روحك من هالمكان لعد اذا انت هيج مقتدر.. يله عمة امشي حرامات وقتنا يضيع وية واحد فاشل وفاسق مثل هذا..

وصلن يم الباب ديطلعن..
رائد : رباب..
رباب اندارت..
رائد : والله إلا أدمرج واليوم راح تشوفين هالشي..
رباب صارت قوية اخذت عمتها و طلعت..

من طلعن الضابط صار مقابيلهن..
هاجر : ممكن اعرف شنو التهمة اللي انسجن زوجي بسببها؟
الضابط : والله حرامات هذا متزوج وعنده عائلة.. هيج بشر حتى حرام يشتم الهوى.. زوجج ساحر ودجال ومشعوذ جتنا عنهم إخبارية هو و مجموعة من أمثاله معتدين على بنية أثناء ما ديعالجوها ويطلعون منها جن والبنية صايرة سباعية وحاجية لأمها ورى ما طالعة.. وأمها ما ساكتة كالت لأهلها.. واهلها جوي للمركز اشتكوا..
رحنا داهمنا البيت ما لكينا بس واحد منهم وزوجج واثنين وياه ماكو..
اخذنا هذا صاحبه واعترف على كل شي ولحسن الحظ لكينا فيديو الإعتداء على البنية المسكينة معتدين عليها.. امها كاعدة بره متدري وهي نايمة وعلى اساس يقرون عليها  بعدين صحت وكامت تصيح و طلعت على امها..
احنه حتى البيت مالتكم راقبنا كلنا عسى ولعل يجي لبيته لإن صاحبه اعترف عليه وعالباقين..
ولكينا بلاوي عليهم من فيديوهات وأعمال تخريب وسحر وشعوذة وكله شغلهم بالسحر يكون وياه علاقات غير شرعية..
ما عدا لكينا تسجيل مكالمات إلهم يهددون بي البنات ينشرون فيديو لو صور وهذا يعتبر تهديد يعني هم جريمة ثانية..
وتسجيل فضحوا بي اكثر من وحدة اتصلوا على اهلها واكو على أزواجهن وارقامهن يمنه صارت وهالشي يعتبر تشهير وهاي هم جريمة..

ومن خلال هذا صاحبه خلينا يتصل بواحد من جماعتهم وميكله اني بالسجن جبنا بمكان احنه وخلينا يتصل برائد وجماعته وسوينه إلهم كمين ولزمناهم..
اختي نصيحة اطلكي منه حرامات تبقين على ذمة هالحيوان...

رجعن للبيت..
ابو رباب : هاي شنو رباب وين جنتي؟
ام رباب : انتي مو بغرفتج هاي شنو شجابج وية عمتج؟
رباب خافت من اهلها لزمت إيد عمتها تستنجد بيها.. لزمت إيدها حيل (دتوصل إلها فكرة عمة طلعيني من هالموقف.. نقذيني)..
هاجر : اني اخذتها وياية.
ابو رباب : وين اخذتيها وياج؟
هاجر : لمركز الشرطة.. اتصلت بيها قبل لا اروح ونزلت واخذتها وياية.. ماكدرت اروح وحدي
ابو رباب : مو جان المفروض تتصلين بينا لو تجين تاخذين رأيي..
هاجر : كلت اكيد متقبل.. اخوية هسة اني بيا حال وانت هيج دتعاتب بية..

ام رباب : خلص ابو عاصف اللي صار صار.. وهي راحت وية عمتها مو وية احد غريب..

ابو رباب : احجولنا شسويتوا..؟ وشنو التهمة اللي لازمي لرائد بسببها؟؟
هاجر : معتدين على بنية أثناء ما ديعالجوها والبنية اهلها مشتكين ومن رايحين لبيت صديقه لرائد بنفس المكان اللي معتدين بي على البنية لاكين الشرطة فيديوهات وأعمال وهواي أدلة عليهم..
هاجر حجت كل الموضوع لأخوها..

بقن بس هاجر ورباب..
هاجر : رباب اني غطيت عليج وضميت على اخوية انتي جيتي وحدج لإن ادري بيج كلبج محروك وتردين تبردي من تشوفين رائد بهذا الحال.. بس هالشي اللي سويتي خطأ.. ميصير تطلعين وحدج بدون علم اهلج.. هالمرة سويتيها بس بعد متنعاد
رباب : اكيد عمة اني هذا مو طبعي.. بس ردت اروح اشوفه ردت اشوف موقفه من ينفضح كدامج.. وشوية يله ارتاحيت..

صار العصر..
هاجر بقت يم بيت ابو رباب..
موبايل هاجر ديرن..
اتصل بيها اخو رائد وكاللها اتصلوا بينا جماعة وكالوا رائد بالسجن ليش ما اتصلتي انتي ليش ما حجيتي.. وكال إلها اني هسة جاي عليج للبيت اخذ منج فلوس حتى اروح اوكل إله محامي..
ابو رباب يحجي وية هاجر :
ابو رباب : روحي جيبي فلوس وتعالي رجعنا هنا لبيتي واتصلي بي لحماج كوليله خلي يجي لهنا.. اريد اكعد واحجي وياه..  وانتي ممنوع تطلعين وتحجين أي شي خليني اني اطلع واحلها وياه.. وبنفس الوقت حتى احدد موعد طلاقج...

راحت هاجر جابت الفلوس ورجعت.. إجه حماها بس الإجتماع وياه جان مغلق محد عرف شنو ابو رباب حجه وية حماها لهاجر..

بعد ما طلع حماها ابو رباب إجه يحجي وية هاجر..
ابو رباب : كتله يحدد موعد حتى يطلكج وعود حماج يتصل بيج ينطيج خبر..

فات يومين وحماها ما متصل..
ابو رباب : ما اتصل حماج؟
هاجر : لا.. شو لا حس ولا خبر..
ابو رباب : اتصليلي عليه..
ابو رباب : الوو اهلا بيك ابو احمد اغاتي شلونك.. شو ما اتصلت ولا كلت..
ابو احمد : رائد ما قبل يطلك.. يكول إلا تتنازلي عن حقوقها كلهن وعن البيت ذاك الوكت يله اطلكها..
ابو رباب : هاا يصير خير.. مع السلامة..

ابو رباب كال هذا الكلام لهاجر..
هاجر : اني راجعة لبيتي وما قصرتوا وياية الله يوفقكم..
ابو رباب : وين رايحة شنو تردين تظلين وحدج بالبيت؟؟
هاجر : يمعود ابو عاصف اني قابل صغيرة وشو ما شاء الله ابني بطولي.. وانتوا يمي حايط على حايط اذا كلاص ينكسر ببيتنا تسمعون..

طلعت هاجر وصلت يم الباب..
رباب راحت عليها..
رباب : عمة.. انتظري لترحين..
هاجر : ها رباب شبيج..
رباب : عمة شبيج شنو هالهدوء اللي نزل عليج فجاة؟؟ شبيج شنو تردين تسوين؟ اكو شي ببالج؟؟
هاجر : إن شاء الله يصير شي تفرحين انتي بي.. مع السلامة
هاجر رجعت فتحت الباب..
هاجر : رباب.. رباب انتي بنتي واعتبرج قطعة من كلبي.. واللي سواه بيج رائد لا والله ما افوته إله وإلا انتقم منه وهذا وعد.. وتعرفين عمتج اذا وعدت شنو...

صار وقت المغرب..
رباب بدت تدوخ.. بشرتها صارت صفرة.. شاحبة..
اهلها بدوا يحسون تغيير بملامحها.. البنية بشرتها كامت تتغير كل شوية دتصير شكل..

ابو رباب : بنتي شبيج دتحسين بشي؟
رباب تباوع ومتحجي بس صافنة..
وتصيح دايخة.. دايخة..
ابوها جاب البخور يريد يبخرلها..
راحت غيرت ملابسها.. لبست نفس الدشداشة القصيرة اللي كل مرة تلبسها بوقت البخور..
من لبستها حست نار واشتعلت بيها..

بدت تنزل من على الدرج وتردد : يا هشيم
وية كل درجة تردد : يا هشيم

نزلت على ابوها لكته لازم ورقة بإيده..
رباب : بابا هاي شنو الورقة..
ابو رباب : بنتي هاي الورقة بيها دعاء بعد البخور اريدج تقري
رباب : اوك بابا..
بدت رباب تبخر نفسها..
أثناء ما رباب تبخر نفسها جسمها كله يكوم يوجعها بحيث من الألم مرات تبجي..
والألم متمركز برجلها اكثر شي.. ومرات إيدها هم تكوم تموتها من الوجع..
رباب بدت تبخر روحها..
بس لو ما تبخر احسن..
حالتها اليوم غريبة..
بدت هي وتبخر تردد يا موسى يا كليم الله أدركني يا كليم الله
يا هشيم.. يا هشيم..
بأثناء ما دتبخر بس تباوع على رجلها.. تحس عيونها رجعت تغيرت صارت مو عيونها.. نظرة عيونها تخوف..
مو نظرة بنت لجسمها ابد.. نظرتها شهوانية إتجاه رجلها..
حست عيونها بدت توسع..
تباوع على المكان بإستغراب.. عبالك اول مرة تشوفه.. وترجع تباوع على رجلها..
فجأة..
سمعت صوت بالمكان..
رباب.. رباب.. حبيبتي تسمعيني..
رباب كامت تتلفت..
رباب : اي اي اسمعك وينك.. ما دشوفك..
الصوت : رباب طلعي.. طلعي بره.. روحي فتحي الباب..
رباب : وين اروح؟؟
الصوت : طلعي للشارع.. طلعي فتحي الباب.. طلعي تحرري من اهلج.. طلعي.. طلعي.. طلعي..
رباب لا إرادي كامت تمشي..
تنفذ اللي ديكوله إلها الصوت لا إرادي..
طلعت رباب وصلت يم الباب فتحتها تريد تطلع بهذا وضعها (دشداشه قصيرة مينطلع بيها للشارع وشعرها مفتوح)
فتحت رباب الباب.. بهذا شكلها..
تريد تطلع..
تفاجأت... 😳😳😳
اكو شاب طويل وحلو ومرتب جان يريد يدك الباب مالتهم..
تفاجأ برباب وتفاجأت بي.. 😳😳
الشاب : سلام عليكم
رباب بغير عالم بعدها.. مو بوعيها ابد..

الشاب صافن عليها وهي عينها على الشارع..
الشاب لوح (اشر) إلها ا بإيده مقابيل وجهها..

رباب بهاللحظة صحت..
ظلت صافنة عليه..
رجعت انتبهت على روحها عزززة هاي شبية هاي وين اني شلابسة خرررب شطلعني بالباب بهاللبس..
الشاب : أعتقد سلمت شنو متردين تردين؟ شبيج؟
رباب رجعت خطوات ليورى ووكفت نص جسمها دخلتها ورى الباب..
الشاب حس بيها مرتبكة..
رباب : هاا العفو اهلا اهلا تفضل..
الشاب : عاصف موجود؟
رباب : هااا ماادري
الشاب : انتي شتقربيله؟
رباب : المن؟
الشاب : غير لعاصف شبيج هههه شو احسج مو طبيعية
رباب : هاا مو.. مو جنت نايمة وسمعت الباب تندك و طلعت افتحها
الشاب : بس أني بعدني حتى ما لحكت ادكها للباب وانتي طلعتي..
رباب : هاا.. مو اني سمعت صوت الباب لعد وطلعت.. لعد يجوز ديتهيألي.. (ابتسمت)
الشاب : ما كلتيلي شتصيرين من عاصف؟
رباب : أني اخته..
الشاب : صدوك والله.. أول مرة اعرف بعاصف عنده اخت.. ما شاء الله
رباب : دقائق هسة اشوفه موجود لولا..

دخلت رباب تسأل اهلها على عاصف وينه..
عاصف : ها رباب شبيج..
رباب : اكو ولد بالباب يصيحك..

ابو رباب : بابا وين جنتي؟
رباب : ها ماادري..  بابا احس جسمي كله كام يوجعني..

بهالأثناء دخلت اختها أرباب وزوجها..
سلموا وكعدوا..

بس رباب تحس نفسها ابد مو طبيعية..
رجعت تنظر بهاي النظرات للكل..
النظرات اللي تحسها مو نظراتها..
أبوها نوعاً ما انتبه عليها..

ابو رباب : رباب تعالي..
راحت رباب ورى ابوها تشوفه شيريد..
ابو رباب : هاج اقري هذا الدعاء نسيت انطي إلج (ينطيها الورقة)

رباب تدخل وحدها بغرفة أمها وأبوها حتى تقرا الدعاء..
تبدي رباب تقرا بالدعاء بس.. بس عيونها تغوش.. هاي شنو شبيها.. بدت تعرك عرك مو طبيعي.. داخت..
فجأة رباب توكع الورقة من إيدها..
وتباوع على الزاوية مال الغرفة..
شافته..
شافته للجني..
بس هاي شنو... 😳
شنو هالشوفه.. هذا شبي؟؟ ليش هيج ديصير..
رباب تظل تباوع عليه ومصدومة وخايفة..
رباب : شبيك؟؟ ليش هيج دتباوع عليه..؟
الجني : بعد ممنوع تقرين هذا الدعاء.. عصبتيني من سمعتج تقري..
رباب تعانده وترجع  تشيل الورقة وتقرا بالدعاء..
الجني بدأ يتعصب اكثر..
رباب تتوقف عن القراءة..
ترفع عينها تباوع على الزاوية حتى تشوفه..
بنفس اللحظة تكوم تصرخ وتبجي..
وتصيح لا لااااا لاااا يارب ما دتحمل اللي دشوفه ما دتحمل المنظر..

يجون اهلها يدخلون للغرفة لإن الصياح مالتها وصل يمهم..
ابو رباب : شبيج شبيج يابه
رباب : بابا عيونه عيونه.. لااا لا لا دخيلك لااا
ابو رباب : شبيها عيونه شبيج شكو احجي
رباب : بابا عيونه دتطلع عيونه طلعت من مكانها ما دتحمل المنظر.. طلعن عيونه ودينزل بس الدم من مكانهن بابا بابا عيونه دتنقلع..

ظلت رباب تصرخ وتبجي وحاطة إيدها على عيونها تخاف ترفع إيدها وتشوفه بهذا المنظر المرعب..
فجأة..
رباب هدأت.. سكتت.. بس.. بس هاي شنو شبيها رباب؟
شو لا حس ولا نفس..
#بقلمي #زهراء_الزهيري