الجني اليهودي العاشق
البارت الثاني عشر
باوع عليه الجني الوسيم بس..
بس النظرة هالمرة مختلفة..
هاي شبي ليش هيج ديباوع..؟ 🤔
حسيت نظرته هالمرة إعجاب..
حسيته معجب بية..
يباوعلي بطريقة مختلفة..
يباوع على جسمي..
وتحديداً يباوع على رجلي..
اني جنت لابسة فستان قصير..
عينه رادت تاكلها لرجلي..
حسيت بحرارة صارت على رجلي وخدرت.. رجلي صار بيها خدر مو طبيعي..
وهو مستمر يباوع..
اني خفت منه بهاللحظة..
الفستان من جوة تحرك..
اني جفلت..
تخبلت..
هاي شلون الفستان تحرك..
اني ما حركته..
الفستان رجع تحرك من جوة مرة ثانية..
لزمته لفستاني بسرعة ونزلته..
باوعت عليه للجني..
حسيته ضاج..
كتله شبيك..؟
ما جاوبني..
رجع الفستان تحرك..
رجعت نزلته وصحت بصوت عالي لاااااا شنو هاي شديصير..؟؟ شبيك..؟ شدسوي..؟ شتريد تسويلي..؟
كال شبيج..؟ ليش متريدين اشوف جسمج؟
كتله هالشي ميصير.. بأي حق انت تشوف جسمي..
كال بس اني..
اني احبج..
اني هنا ارتبكت أول مرة بحياتي أسمع هاي الكلمة.. احبج
جنت اتمنى اسمعها قبل..
بس..
بس لحظة اللي سمعتها سمعتها من جني..!
كتله وذا تحبني معناها عادي تشوف جسمي..؟
ما جاوبني..
حسيته زعل..
وأختفى بعد ما شفته..
رحت لبيت عمتي يم عمو رائد..
بدينا جلسة جديدة وبنهاية الجلسة عمو رائد طلب مني طلب..!!
بس هو بخلال هاي الجلسة ما مبين عليه زعلان منه.. جان كولش طبيعي ومبتسم..
رجعت لبيتنا رحت كعدت يم اهلي..
اكو شي بداخلي ما مرتاح..
حسيت نفسي تعبانة..
كلت ليش ما اكوم اتوضى وأصلي وبعدها أقرأ قرآن..
كمت توضيت..
دصلي..
هو واكف كدامي..
هالمرة ضهر على طوله واكف..
زين شبي واكف هيج كدامي شنو ميريدني أصلي..؟!
اني اصلي وهو يكلي : احبج..
على طول ما اني اصلي هو يردد هاي الكلمة..
احبج.. احبج.. احبج..
كملت صلاتي..
رحت جبت القرآن الكريم حتى اقرا..
كعدت على قنفة التخم وبديت اقرأ قرآن..
حسيت بوجوده كاعد يمي..
بديت أقرأ قرآن بس..
بس الصوت مو صوتي..
هاي شنو...
صوتي تغير..
حسيت اللي ديقرا القرآن هو..
الجني اليهودي هو اللي ديقرا..
مو أني..!!
استمريت بالقراءة..
كمت كلما اوصل لكلمة "اليهود" اتوقف تلقائياً..
عيوني تكوم تلمع من أشوف كلمة "اليهود"..
أفرح هواية..
زين ليش دفرح من اوصل هالكلمة..؟!!
ومن اوصلها أظل ارددها اكثر من مرة..!
ورى ما تكمل الآية اللي بيها كلمة اليهود مباشرةً أصدق..(صدق الله العظيم)
وأنتقل لسورة ثانية هم مذكورة بيها كلمة اليهود..
وهم ارجع أصدق من اوصلها وأنتقل لسورة ثانية..
ومجرد افتح القرآن الكي السورة اللي اريدها.. والآية اللي مكتوب بيها هالكلمة..
يعني ديصير شي وياية لو اسمع عنه ما اصدكه.. كولش خفت..
بس مستمرة ومتواصلة بالقراءة..
والصوت مو صوتي..
أحكام القرآن الكريم كلهن دطبقهن : الإدغام.. الإقلاب.. الإظهار.. الخ..
وعدد مرات ذكر كلمة اليهود في القرآن الكريم اتذكر كان ثمان مرات..
وكلمة "اليهود" شيء قليل أمام الكلمة الثانية اللي جانت تستوقفني واستمريت ارددها حتى وأني نايمة..
الكلمة هي موسى..
النبي موسى (عليه السلام)..
ذكر النبي موسى "عليه السلام" في القرآن الكريم "مئة وست وثلاثون مرة" في "أربع وثلاثين سورة" في القرآن الكريم..
كلمة موسى شرحته لصدري من قريتها..
حسيتها احلى كلمة بالكون..
أحلى إسم بالكون..
واظل صافنة على كلمة "موسى" وأحس اكو إبتسامة بوجهي..
عيوني لمعتها بدت تزداد اتجاه هالكلمة..
سديت القرآن وصدقت..
ظليت أردد "يا موسى" "يا موسى"
تقريباً نصف ساعة أني بقيت على هاي الحالة..
أردد "يا موسى" "يا موسى"
وتصير عندي حركة بجسمي..
أني وارددها اتحرك للأمام وللخلف بحركة خفيفة..
شلون واحد ينود..
ازدادت الحركة عندي كمت اتحرك للأمام وللخلف بسرعة..
حسيت نفسي دخت..
صحيت من اللي اني دسوي..
صحيت من اللي ديصير..
صفنت على روحي..
كلت هاي شبية..؟ ليش هيج دسوي..؟!!
وراها مرت أيام كمت صبح وليل أرددها الكلمة نفسها..
"يا موسى"
كمت أحب اقرأ قرآن في سبيل حتى اوصل لكلمة "موسى"
عشقت النبي موسى..
صرت أقرأ عليه هواية بالنت..
حفظت قصته..
حبيت حتى المعجزات اللي الله نطاها إله..
أدركني يا كليم الله..
هاي الجملة..👆👆
كمت من اوكع بمشكلة أو اخاف من شي ارددها..
أدركني يا كليم الله..
بس..
بس اكو شي بداخلي قهرني حيل..
جنت عارفة بي.. حاسة بي بس..
بس مو بيدي اللي ديصير..
حسيت هذا الجني اليهودي يريد يبعدني عن ديانتي..💔
يريد يبعدني عن الإسلام.. 😥
ديني اللي احبه.. ❤
وبشعور لا إرادي ومن دون تحكم انجريت وياه..
مو كادرة اكول إله "لا"..
اخاف حتى انطق كلمة "لا"..
لإن اخاف منه من يتعصب..
شكله يتحول يصير مرعب من يكون عصبي..😥
أني وكاعدة بيني وبين روحي أردد يا موسى.
كاعدة يم اهلي أرددها..
حتى بالحمام أردد "يا موسى"
ينشرح صدري من أردد هالكلمة..
اني متعودة من احجي وية أحد احلف والنبي محمد..
بس..
بس ما دكدر انطقها بعد..
كل شي اكول إلا اكول كلمة "محمد"..
احسه ميقبل من انطقها..
يتعصب..
عيونه تصير ابد مو حلوة ويصير بيهن نوع من الدم هذا الدم يضهر كدامي..
أني انرعب..
ما أتحمل اشوف هيج منظر..
ظليت مستمرة بهذا الإتجاه..
استمريت وياه..
بدون تردد..
بدون نقاش..
مرت أيام..
واني ما رايحة لبيت عمتي هاجر ولا شايفه عمي رائد..
بالليل..
حطيت راسي على المخدة تذكرت شي..
تذكرت الطلب اللي طلبه مني عمو رائد..
كمت بسرعة شغلت الضوء..
رحت طلعت الورقة اللي نطانياها عمو رائد حتى أقراها..
طلب عمو رائد هو..👇👇
أردد كلمات قبل لا أنام..
كتبلي مجموعة من الكلمات والحروف وطلب مني ارددهن قبل النوم..
هاي الحروف والكلمات جداً مبهمة.. ما اعرف بأي لغة.. مصطلحات أول مرة أشوفها.. أول مرة أقراها..
وطلب مني عمي من اصحى احجيله شنو شفت بالحلم..
كعدت الصبح..
جسمي عركان..
أحس بدوخة راسي يوجعني..
جسمي يوم بعد يوم كام يضعف..
كمت أذبل.. حتى لون بشرتي كام يتغير..
تعبانة..
أربعة وعشرين ساعة اريد بس انام..
مالي قابلية اتحرك..
رحت لبيت عمتي يم عمو رائد..
كتله عمو دقرا بالورقة مثل ما طلبت مني كل يوم اقراها وأنام بس مستغربة من شي..
كال من شنو مستغربة..
كتله نفس الحلم تكرر..
واكو شي ثاني هم مستغربة منه بالحلم..
كال شنو هذا الشي..؟؟؟
كتله دحلم بيك.. بكل حلم عمو انت تجيني.. كمت أحلم بيك حتى من انام الضهر..
عمو رائد إبتسم..
بصراحة استغربت إبتسامته..!
ليش هيج فرحان..؟
زين اني ليش دحلم بي..؟؟!
سألني سؤال عمو رائد بس..
بس استحيت اجاوبه..
كلي هم الجني اليهودي يجيج بالحلم ويكون رومانسي وياج؟؟
اني خجلت..
بس..
بس اني ما حلمت بي ابد..
كتله عمو أني ما حلمت بي ابد..
أحلامي كلها بيك..
أشوفك بس إلك..
كال زين نفس السؤال اللي على الجني عكسي عليه..
عزززة اني هنا حيل خجلت..
كتله لااا..
كلت بداخلي (بس.. بس اني مرات احلم بعمو رائد زوجي.. متزوجين اني وياه)..
بس استحيت احجي..
كرر السؤال عليه..
وأني بقيت مصرة على جوابي..
حتى ليسألني عمو رائد عن التفاصيل لإن استحي احجي..
هو ماكو شي بالحلم صار يخجل..
الشي الوحيد اللي صار انه اني وعمو رائد متزوجين..
بس إسم..
لكن ابد متقربلي بالحلم ولا حتى كلمني كلام رومانسي..
بس إسم ارتباط بيناتنا..
رجعت للبيت..
كعدت اقرأ قرآن..
وهم الصوت مو صوتي..
اقرأ بصوت يختلف عن صوتي..
صوته..
صوت الجني اليهودي..
الجني اليهودي حببني بالقرآن هواية..
وحتى جنت أكو سور بالقرآن الكريم ما اعرف المعاني والشرح مالتهن هو شرحهن إلي..
جان كولش فاهم..
ومتعمق بالدين الإسلامي حتى اكثر مني..
ومتعمق بالقرآن..
بس ليش يريدني اقرأ قرآن..؟
شنو السبب..؟؟
صار الليل..
صعدت لغرفتي حتى انام..
لبست دشداشه قصيرة مال نوم وحليت شعري ونمت..
كلت هالمرة ما راح أردد الكلمات اللي نطانياهن عمو رائد..
نمت ما رددتهن..
كعدت الصبح..
فتحت عيني..
تفاجأت بشي صار كدامي..
تفاجأت الباب مال غرفتي مفتوحة..
وعمو رائد واكف بالباب ويباوع علية..
#بقلمي #زهراء_الزهيري