روايــة #أصحاب_ونسايب
الــحَـــلـــقـة الــسَــابعــة عــشَـــرْ 🌸
صلاح : خوتك ماقالوليش ف وقتها
محمد : ماهو عمر قالك و ماصدقتاش ؟؟ ولا توا بتطلع روحك برئ
صلاح ساكت و مصدوم
محمد شبح لوفاء : وتي الشناطي و توا بنطلع نحجز لتركيا ، فرح مش حاتروح و اني اللي بنخيلها عندي
صلاح طلع من الحوش حامق و ماشي لخوه علي
محمد : مدايرلي روحه متفاجأ و لما عمر دواله هزبه و قاله تتهم فيه على خاطر صاحبك
فايزة : ف اما مستشفى هو ؟
محمد : وين نندري على *****
وفاء فنصت فيه : محمد !
محمد : مازال قلبي مابردش نبي نقتلللله
__________________
08:30 ص
وليد خش للمطبخ لقي فتحية اتطيب ف القهوة
فتحية شبحتله
وليد ابتسم : صباح الفل يا ست الكل
فتحية ابتسمت : صباح الخير و الهني
وليد مبتسم : احسبيني معاك ف فنجان
فتحية : نحطلك تفطر ؟
وليد قعمز ع الطاولة : ايه عادي
فتحية مستغربة : منين جاتك تفطر ف الحوش ؟ قبل ديما مستعجل
وليد : اليوم جتني النية نفطر معاك
فتحية ضحكت : امالا نوّض وصال تفطر معانا
وليد : لالا خليها راقدة علاش انوض فيها من توا
( فتحية تحطله ف فطوره ع الطاولة )
وليد : شن اخبار اسراء
فتحية : كلمتني امس قالت عاجبها الجو و بتروح الاسبوع الجاي
وليد : باهي الحمد لله ، والله مخلية مكانها فاضي
فتحية عيونها دمعو : هيا اسكت ماصدقت بديت نتعود
وليد ضحك : اليوم جاي واحد بيخطب وصال
فتحية شبحتله : منو
وليد : واحد صاحبي
فتحية : و انت عاجبك ؟
وليد : اكيد ، امالا بنجيب واحد ماينفعش ؟
فتحية سكتت
وليد : ماشاء الله عليه الولد صاحبي هلبا و مستحيل نلقى زيه
فتحية : و منين يعرفها اختك ؟
وليد : هو ماقالش يعرفها ، قال شافها مرة معاي
فتحية : شن اسمه و من عيلة شكون ؟
وليد : تو بعدين تعرفي
فتحية : شن تو بعدين نعرف ؟ قولي من توا
وليد : من عيلة ( ....... )
فتحية : لقبهم غريب اول مرة نسمعه .. صعب
وليد : تعيشي و تسمعي .. امه جت ف العرس
فتحية : اما هي ؟
وليد : اسمها فوزية
فتحية : اه عرفتها ، ام هيثم ؟
وليد : ايوه بالزبط ، هو هيثم اصلا
فتحية : بتجي امه ولا هو بس اللي جاي ؟
وليد : هو و امه
فتحية استغربت : هكي طول طوول !!
وليد شبحلها : عادي شن فيها
فتحية : والله ماوقت خطابة و اني كيف طالعة من عرس ، ماعنديش خلوق
وليد : شن بيباتو عندك هما ؟؟ بيقعدو ساعة و تشاو
فتحية : انت علاش ماقلتليش من امس ؟ اليوم عندي طلعة
وليد : راجيهم لين يروحو و بعدين اطلعي
فتحية : افرض اختك ماتبيش ؟
وليد : لالا تو يعجبها
فتحية : ياسر العملة اللي دارتها المرة اللي فاتت ؛ الراجل روح مهزب و امبقع
وليد ضحك : تبي الحق ؟ يستاهلها كان
فتحية : عيب عليك
وليد : يا امي اني بروحي انصدمت لما ريته تي كبير عليها هلبا
فتحية : امه تبان باهية مش هداكا الكبر ماتوقعتش ولدها يكون كبير ، و لما هي دوتلي ماسألتهاش على عمره
وليد : باش ف الجديد تتعلمي
فتحية : شورها واخدة صغيرة
وليد سكت
فتحية : هكي زمان يعطو بكري بكري .. توصل البنت عمر الاربعطاش ولا الخمسطاش يسقدوها طول
وليد ياكل و يشبحلها
فتحية : زمان لما خدينا لخالك عمران ...
قاطعها وليد : يا امي ماتفتحيليش مواضيع مش وقتها توا
فتحية ضحكت : باهي و هذا اللي جاي قداش عمره
وليد : اكبر مني بعامين
فتحية : حتى هذا كبير عليها
وليد وقف : لالا ماشي حاله ، عادي
فتحية : ساعة قداش بيجو ؟
وليد : مش عارف ، مع العشيات اكيد
فتحية : و الراجل من بيقعمز بحداه و انت ف العشية تكون ف المحل ؟
وليد : تو نجي و نقول لمحمود يقعد ف مكاني
فتحية : و اني تو نقول لزينوبة تجي ، خير مانقعد بروحي
وليد : به .. هي ف أمان الله
فتحية : مربوحة
وليد و هو طالع : لو تبي حاجة اتصلي بيا
_______________________
علي ف المستشفى مع سمية
سمية تبكي : زعما علاش ضربه يا علي اكيد فيه سبب
علي متوتر : مش عارف ياسمية قالي اسأل ولدك الحرايمي
سمية شدت راسها و تبكي : حي علينا كان ماخانب منه فلوس
أماني واقفة بحداها : فلوس شني و هو ولدك مستحق ؟
علي : ماعتقدش
أمل متغششة : ان شاء الله ينوض منها
علي : محمد قال البنت عندنا و اخر مايفكر ياخدها
سمية انصدمت : شنووو ؟؟
أمل انصدمت : علااااش ؟؟
علي سكت
أماني وشوشت أمل : اكيد فرح ابصر شن كاذبة على خوها و خلاته يجيه زي الثور الهايج
أمل فنصت فيها : و بالك خوك اللي ملبز
أماني : الله اعلم
أمل : قلتي لأكرم ؟
أماني : خوك عريس و اليوم مسافر علاش نرعش فيه
أمل : تو يسمع ، الخبر هدا مايندسش اكيد شوية و بيهدو علينا العيلة
سمية تعيط : وووه علينا هادي كتيبة داروهالنا ف العرس يا علي
( سراج راجل أماني يشوف و ساكت )
علي : اسكتي حني ف المستشفى
أمل : كتيبة شني يا ماما
سمية تبكي : والله الا كتيبة ياعلي .. ماصارش من الفاتحة و توا الولد تعارك مع ولد عمه و ماصارش من عرسه والله الا كتيبة الله
علي : تي اسكتي يا مراة بلا عار و جهل
سمية : مافيش غيرها بنت ربيعة اديرها ، من زمان حاطة عينها على خالد و تبي تكره ليها
علي شبحلها
سمية : يا اما مرت ولدك وجهها نحس علينا .. من الاول مش مرتاحتلهم اني
علي تعفلق و ناض من بحداها : استغفر الله العظيم
سراج وشوش أماني : نوضي نروح بيك انتي و اختك مش لازم الزحمة
أماني : لالا مانقدرش
سراج فنص فيها : اطلعي قدامي
( طلعت أماني هي و أمل معاه )
بعد شوية خش صلاح متعفلق : علي !!
علي شبحله
سمية : ريت شن دار محمد لولدي يا صلااح ؟
صلاح فنص فيها : انتي اسكتي و ماتتدخليش
علي : علاش محمد ضربه ؟؟ شن بيناتهم ؟؟
صلاح متعفلق و يحكي لعلي ف اللي داره ولده ( ........ )
علي يسمعله و مصدوم
سمية تشوفله و تفنص
صلاح : هذا اللي منا و فينا هكي دار ، شن خلّا للبراني ؟؟
سمية مصدومة : لالالا ولدي مستحيل يدير ف بنت عمه هكي ، ولدي متربي و يخاف ربي
علي : شن تقول يا صلاح اتقي الله
صلاح حامق : شن يعني جاي نتبلىٰ عليه ؟؟؟ وصل ف شرف البنت يا علي ؟؟؟؟ اللي بينا تم و البنت ماتفكروش فيها نهائي
علي مازال مصدوم : تو ينوض و نسأله
صلاح يعيط : ان شاء الله يموت و يبيس ف مكانه كنت مدايره زي ولدي و أعز طلع واحد *****
سمية تعصبت : أخرتها بتحطو تهم لولدي يا صلاح باش تفسخو ؟؟ تقدرو تقولوها عربية
صلاح يدوي مسكر سنونه : انتي سكري فمك و ماتتدخليش ، لتاني مرة نقولهالك
علي شبحلها و تعفلق : انتي ماتتدخليش بين التريس خير مانمد ايدي عليك
سمية انصدمت و خافت
علي شبح لصلاح : والله يا صلاح لو طلع كلامك حق الا ما نتبرا منه الكلب و مامسامحه طول عمري
سمية تبكي : علي !!! هذا ولدك كيف تقول عليه هكي ؟؟
صلاح حامق : اني مانكذبش عليك و لما انضرب بالرصاص عمر ولدي هو اللي طلع ضاربه .. تقدر تقولي توا علاش خالد ماحكاش لحد ؟؟؟ و بكل وقاحة و صحة وجه جاي و لاحقني ف ألمانيا
علي مصدوم : و علاش فرح مادوتش ؟؟ ولا عمر ماجاش و قال !!!
صلاح : عمر قالي و اني ماصدقتاش نحسابه يتبلى عليه باش مانوافقش نزوجه فرح
علي مصدوم مش قادر يرد
طلع صلاح من المستشفى متعفلق و يتمتم بروحه
سمية تصيح : ريت صغار خوك يا علي ؟؟ ريت ماطلع منهم !! يبو يقتلو ولدك بأي طريقة و يتهمو فيه تهم اكبر من روسهم
علي شد ف الساس : صلاح مايكذبش ياسمية
سمية : قصدك صدقته انت ؟؟
علي شد قلبه : الله يسخطك ياخالد ، الله ياخده الكلب يبي يقتلني
سمية قربت منه : خيرك ياعلي ؟؟ هدي روحك
علي سكت و وجهه احمر مش قادر يوقف
سمية تعيط : شن فيك ياعلي ؟؟
علي فقد وعيه و طاح
______________________
فرح خشت على عمر ف الدار تنوض فيه
فرح : عمرررر ؟؟ نووض
عمر مسكر عيونه و راقد على بطنه : ايوه
فرح تحرك فيه من كتفه : تي نوض بسرعة
عمر فتح عيونه و شبحلها : خيرك شن فيه
فرح : محمد عرف و جاي هو و وفاء
عمر انخلع و ناض قعمز : شني ؟ شن عرف ؟
فرح : وفاء قالتله على كل شي
عمر يحك ف عيونه : باه شن قال
فرح : مشي ضرب خالد و خلاه ف العناية حالته خطيرة
عمر انصدم
فرح : تسمع فيا ؟؟
عمر جمع أفكاره و ضحك : صحة ليه ، و اخيراً صحى ضميره
فرح تشوفله و ساكتة
عمر : المفروض تفرحي يا ختشة ، خالد موضوعه تفجر
فرح ضحكت : ان شاء الله 😃
عمر وقف : امتى جاي ؟
فرح : مرات غدوا
عمر سكت و قعد يفكر
فرح : شن يصير توا ؟
عمر : خلي يجي بعدين ساهل ، موضوع خالد تشاو عليه يا فوفا افرحي
ركبت فرح فوق السرير و بدت تغني ف اغنية اللمبي : انا خلاص بكره براءة 💃😍
هنام و هصحى على روااااقة 💃 ... انااا خلاااص بكره برااااءة ... هنام و هصحى على روااااقة 💃
عمر يضحك 😂😂
فرح ترقص بكتافها و ايديها : ولاه ايييييه ولاه اااااه 💃 ... ولاه ايييييه 💃 ولاه ااااااه
عمر يضحك : من حقك 😂
فرح ترقص : اناااا خلااااااص بكره براااااءة 😍 هنام و هصحى على روااااقة 💃💃... و من بكره همشي ف اي طريق .. و براحتي و بكل جرااااءة 😍💃💃
فرح : ولاه ايييييه ولاه ااااه 💃 😍😍
عمر : خلاص اسكتي 😃
فرح ترقص : راجعة لبيتي و لسريري 😍 .. راجعة لِـ اوضتي و تشخيري 😂😍 ...
فرح علت صوتها : رااااجعة لبيتي و لسريرررري 😍 .. راااجعة لِـ اوضتي و تشخيرررري 💃
ولاااه ايييييه 💃😍 ولاه اااااه 💃
________________________
10:00 ص
ناضت وصال من النوم لقت فتحية مسكرة المكيف و فاتحة الرواشن و البيبان تهوي ف الحوش
مشتلها تتأفف و تصيح : تو مش حاسة بالصهد فاتحة علينا الدنيا ؟؟ ولا لازم تبينا انوضو نقطرو !!
فتحية : الناس يقولو صباح الخير يا مامااا .. نهارك مبروك يا مامااا .. تبي نعاونك ف حااااجة ؟؟؟ فطرتي ولا نديرلك فطورك ؟؟؟ مش انتي نايضة زي البومة مكشخة
وصال : ماهو تعرفيني مانتحملش النو و نكرهها الحركة هادي .. كان مش الضي عاملها لازم انتي تشدي التوكة ؟
فتحية : توكة شني
وصال : شي شي ... ( و خشت للحمام )
فتحية : لازم نربيها هالفرخة قبل ماتاخد و اتضحك عليا الناس ، يقولو فتحية ماتعرفش تربي
_____________________
هيثم مقعمز يفطر مع امه فوزية
فوزية : مش كان خليتنا مشينا بعد ماحتى بريت و ايدك ولت احسن ؟
هيثم : ايدي أمورها تمام ، و اني مانبيش نطول بيه الموضوع نبي نتمه توا
فوزية : والله متشوقة نشوفها هاللي خلاتك تغير رايك و تتزوج
هيثم ابتسم : حاتعجبك
فوزية : ان شاء الله ، ياسر الغوريلات اللي عندي
هيثم يضحك : كان يسمعوك يكرهوك 😂
فوزية : يمشو يملحو
هيثم : انتي ريتيها ف عرس أختهم ولا ؟
فوزية : والله ماعاد نتذكر ياوليدي عيلتهم معبية بنات
هيثم سكت
فوزية : توا قولي امتى بترجع لخدمتك ؟ ليك ثلاثة ايام اجازة
هيثم : من غدوا ان شاء الله
فوزية : ماعرفتوش مني اللي ضربك ؟
هيثم : مش قتلك ف عركة يا امي ؟ واحد قعد يطول ف لسانه على وليد تلاقينا عليه و ربيناه ، و صاحب اللي تعاركنا معاه قعد يرمي علينا من بعيد
فوزية : و صاحبك وليد هذا شوره ديما بمشاكله
هيثم : اه يعني تبيني نتفرج عليه و هو ف عركة ؟
فوزية سكتت
هيثم وقف : نجيك مع الستة نلقاك واتية
فوزية : ان شاء الله
هيثم : بوي وين ؟
فوزية : طلع بكري قال عنده شغل
________________________
طلعت وصال من الحمام و خشت للمطبخ
جتها فتحية : افطري بسرعة و ضمي معاي الحوش
وصال : باهي غر نفتح عيوني
فتحية : اليوم جايينك خطاب
وصال شبحتلها و ضحكت بصوت عالي : المرة هادي كيف منظره ان شاء الله ؟ مسقم زي القريسيني اوه !!
فتحية فنصت فيها : اللسان هذا يبي القصان من منبته
وصال تضحك : حظك يا فتوحة عندك بنت حرفة شن بنديرلك 😂
فتحية : اني مانتسهوكش ، ضمي الحوش بسرعة و وتي روحك بكري
وصال : فوتيه الموضوع اني مش طالعة لحد
فتحية : بتطلعي بالسيف عليك ، الناس جايين مانقعدش نتحمر و نتصفر قدامهم اهو قلتلك
وصال : من هما ؟ عيلة مني ؟
فتحية : وليد جايبه
وصال ضحكت : بدي يجيبلي ف عرسان ؟ اصلي الويلّا هذا 😂
فتحية ضربتها على كتفها : تحشمي يرزيني فيك
وصال تحك ف مكان الخبطة و تضحك : شن اسمه و ولد مني ؟
فتحية : قال صاحبه
وصال ركزت معاها : ولد مني ؟ .. تقول ف عقلها ( يارب هيثم )
فتحية : ممكن يخدم معاه ( ولد ....... ) " قالت اللقب غلط لانها ماحفظاتاش "
وصال سكتت تقول ف عقلها ( واك مش هو )
فتحية : المهم خفي روحك و راك اتديري العار متع المرة اللي فاتت
وصال : لالا مانيش طالعة لحد ماعنديش خلوق
فتحية تكشخ : والله نوريك كان اديريها يا وصال و خوك يفرمك .. تحشمي فيه قدام صاحبه
وصال تصيح : مش بالسيف عاد
فتحية : اطلعي شوفيه و بعدين ساهل بالك يعجبك
وصال : هاه المرة هادي يطلع ف عمر جدي اووه
فتحية ضحكت : لالا قال مش كبير
وصال طلعت من المطبخ و ماردتش عليها
_____________________
03:00 م
محمد خش للحوش ، لقي العيلة مقعمزين
صلاح : وين كنت ؟
محمد : مشيت حجزت تذاكر
وفاء : امتى ؟ صار من غدوا ؟
محمد : ايه
وفاء : ساعة قداش ؟
محمد : ساعة ثمانية ، و من تونس طول لتركيا ف نفس اليوم
وفاء : تعب
فايزة ساكتة
محمد شبح لبوه : بنقولك خبر
صلاح شبحله : الكلب مات اوه ؟
محمد : عمي علي جاته جلطة ع القلب
صلاح انصدم
فايزة و وفاء شهقو : هيييييه
_____________________
05:00 م
وصال كملت ضمان الحوش و متكية ف دارها فاتحة الفيس
خش عليها وليد : وصال
وصال شبحتله : نعم
وليد : خيرك مش موتية روحك ؟
وصال قعمزت : كيف منظره اللي جاي ؟
وليد ضحك : منظره زي الناس
وصال : قصدي زي اللي فات ؟
وليد : لالا
وصال : منين يعرفني هو ؟
وليد : قال شايفك معاي
وصال : امتى صار ؟؟
وليد : مش عارف ماسألتاش
وصال سكتت
وليد : هيا نوضي ، و تحصلي و اتديري العار نعلقك ف الترية
وصال : باهي 😒
وليد : ف الاول بيحط امه و بيمشي ، و لما بيروح بيها بيخش شوية باش تشوفيه
وصال ساكتة
طلع وليد من الدار و سكر الباب وراه
وقفت وصال قدام الدولاب تشوف شن تلبس و تدوي بروحها : ايييييه بالله ع الوقت قداش يجري ، يوم اللي اسراء تفكر شن بتلبس اني كنت نقترح عليها ؛ و توا هي تزوجت و مشت على حالها و قعدت بروحي ... زعما نلبس قفطان على قولتها ؟؟؟ .. لالا ، هي كانت تحبه و تعرفه هذا علاش طلعت طارحة لِـ اماليه ، و اني مانعرفاش و بنطلع نشوفه يعني لازم نلبس حاجة محترمة
طلعت سروال ابيض و بلوزة لونها وردي هادي 🌸 كمامها جوبير ، و وقفت قدام المرآية تستشور ف شعرها
خشت عليها زينوبة : وصااال
وصال شبحتلها : نعم
زينوبة : خفي روحك وقت
وصال : امتى ما نوتي روحي تو نطلع راهو فوق من نفسي ماعنديش ليهم نية
زينوبة : بالك يعجبك
وصال : لالا ماظنيتش
زينوبة : ديري شوية مكياج لوجهك ماتطلعيش هكي
وصال ضحكت : الا الحاجة هادي ماتوصيش عليها 😃
زينوبة : عارفاتك ، قريب تاكليه
وصال ضحكت و تلفتت تكمل ف شعرها
_____________________
بعد مرور ساعة 🌹
هيثم يسوق ف السيارة ماشي لأمه ، فتح تليفونه و اتصل بوصال ...
وصال كملت شعرها و لبسها ، واقفة تمكيج ، سمعت تليفونها يشرين مشت تشوف فيه ، لقاته هيثم
فتحت الخط : الو
هيثم : هلا بالغلا
وصال : اهلين بيك
هيثم : كيف الحال ؟
وصال : الحمد لله ، كيف حالك انت اليوم ؟
هيثم : كويس تمام
وصال : شكلك مهناش
هيثم : ايه ف السيارة
وصال سكتت
هيثم : و انتي وين ؟
وصال : ف الحوش
هيثم : خيرك مهبية ؟ بحداك حد ؟
وصال : لالا بروحي
هيثم : شن عندك بتديري توا ؟
وصال : جايينا ناس
هيثم : و خيرك مش عاجبك ؟ ماتحبيش الناس و الزحمة !
وصال : لا مش هكي ، غر اللي جايين مش وقتهم بس
هيثم : كيف مش وقتهم
وصال : اللي جايين يبو يخطبو و اني ماعنديش نية فيهم ولا عندي خلوق نطلعلهم
هيثم ضحك يقول ف عقله ( شكلها ماتندريش )
وصال : الو ؟
هيثم : علاش ماعندكش نية تطلعي ، المفروض تكوني فرحانة ، جايك عريس
وصال سكتت تقول ف عقلها ( ف مكان مايتعفلق و يقولي ماتوافقيش لكن شكله دوته فاضية يا وصال )
هيثم : الوو ؟ وين مشيتي !
وصال : ايوا معاك
هيثم : امالا سكري توا مانعطلكش على العريس اكيد قريب يوصل
وصال تكنطت : شورك ماصدقت انت
هيثم : شنو ؟
وصال : شي شي
هيثم شاد ضحكته : سلميلي عليه
وصال : سلمك يوصل ، بالك تطلع تعرفه اصلاً
هيثم : كيف نعرفه ؟
وصال : لان وليد قال صاحبه ، بالك يطلع من نفس قروبكم
هيثم : اه مليح بكل ، انتي اطلعي شوفيه و قوليلي عليه بعدين ، لو طلعت نعرفه تو نقولك رايي فيه لان مهما كان انتي غالية عليا و نتمنالك احسن واحد
وصال تعفلقت و تنتش ف لسانها
هيثم : الووو ؟ 😃
وصال : هي تشاو
هيثم : خيرك تعفلقتي ؟
وصال شادة اعصابها بالسيف : ماتعفلقتش غر ندير ف الزمالطو و مش لاهية بيك
هيثم : اااه باهي مليح ، مدابيك لونه احمر ولا وردي شعشوعي يبدا ف ايدياتك البيض شي شي ماتفهم شي .. دوخيه المحروس
وصال متكنطية : هيا تشاوات
هيثم : سلام ( و سكر الخط و هو يضحك )
وصال حمقت ؛ لوحت التليفون ع السرير بِ غُل و قالت : كلهم كلاااااب حيوااااناااات خززززي ، يمشي يملح الحقير طلع زيهم المعفن .. كان مازال رديت عليه ولا كلمته
_______________________
وليد ف المطبخ مع فتحية و زينوبة
فتحية : لما يجي الراجل انت دخل السفرة فكنا منها
وليد فاتح الفيس : به
زينوبة توتي ف الحلو : وليد عندك صورته ؟
وليد شبحلها : خاطرك تشوفيه ؟
زينوبة : ايه
وليد فتح على صورته و ورهولها
زينوبة : ماشاء الله عليه
وليد : عجبك ؟
زينوبة : قنين ، لكن وصال احلى
فتحية : اكيد بنتي احلى امالا شني
وليد ضحك و سكر التليفون
خشت وصال : امتى جايين الدراهات
وليد يشوفلها
زينوبة : اكيد على خشة
وليد : دراهات و هكي لابسة ! امالا كان عاجبينك شن بتلبسي ؟
وصال تشوف لروحها : خيرني ؟
وليد : لما الولد بيجي بتمسحي وجهك و بتغيري البلوزة
وصال : علاش ؟
وليد فنص فيها : ايديها شفافات
وصال شقلبت عيونها : هذا كان طلعتله
وليد علّا صوته : يجيب ربي و ماتطلعيش بس الا ما تباتي ف الجنان
وصال : عادي اصلاً نحب نرقد ف الجنان ، تو نفرش سلتة و نمد رجيلاتي و نرقد
وليد تعفلق منها : وصااال !!
زينوبة : هيا ياسرو بلا عار ، الناس قريب يوصلو
فتحية : حالة تقولي عليهم على روس بعضهم
وصال ضحكت و شبحت لوليد : لكن والله غالي عليا هلبا يا ويلاّ مانرضى فيك حاجة
وليد ضحك
( الحوش شرين 🔔 )
وليد وقف : من بيفتح ؟
فتحية : تو نفتحو اني و خالتك
وصال ساكتة
طلعو زينوبة و فتحية من المطبخ
وليد شبح لوصال : زي ماوصيتك ياوصال ، المنظر هذا ماتطلعيش بيه
وصال تتأفف : باهي فهمت قداش مرة بتعاود ؟
وليد سكت
وصال : حقا سمعت بخالد ؟
وليد : من خالد ؟
وصال : خالد خالد 😉
وليد عقد حواجبه : خيره
وصال : محمد خو فرح سمع باللي صار و مشي عطاه طريحة موت رقده ف العناية
وليد تفاجأ : بالله عليك !
وصال : و حق الله 😃
وليد فرح : يستاهل الكلب ان شاء الله ماينوض
وصال : و عرسها ماصارش منه لان بوها سمع و قال خلاص اللي بينا تم على اساس
وليد فرحان يضحك من عيونه
وصال : و اخيراً
وليد : و انتي من قالك
وصال : ريحان تجيبلي ف الأخبار من فرح و وفاء مرت محمد
وليد : و انتي ماكلمتيهاش بكل ؟
وصال : مكالمة وحدة بس بعد ماسافرت
وليد سكت
خشت زينوبة : هيا وصال تعالي سلمي
وصال شبحتلها : غر يسخن مكانها المراة
زينوبة : السفرة تو نرفعها اني خير مانلقو روحنا مدخلين المراة اتدوش
وليد ضحك 😂
وصال : لقيتو فاش تعششو 😒
زينوبة : هيا اطلعي
وصال : نخش للحمام و نلحقك
زينوبة : وقته توااا !!!!
وصال فنصت فيها : خالتي !!
( طلعت زينوبة و مطلعة سفرة العصير )
وصال حطت تليفونها ع الرخامة و مشت للحمام
و وليد قعمز عَ الطاولة و فتح النت
________________________
فوزية : عندي ثلااثة وليدات و أربعة بنيات
فتحية مبتسمة : ماشاء الله ربي يخليهملك
فوزية : سلمك و يخليلك صغيويرتك ، و اني فاضلي هذا اخر العنقود قلت نبي نزوجه و نفرح بيه
فتحية مبتسمة : حتى اني هادي بنيتي اخر العنقود
فوزية : سلمها ربي يحفظها
فتحية : سلمك و يخليك
فوزية : ولدي لما قالي عليها فرحت هلبا قلت اخيراً بنفرح بيه لان سلامته كان رافض انه يتزوج لكن بعد شاف بنيتك غير رايه
فتحية ضحكت و تحشمت
فوزية : هو و وليد صحاب هلبا
فتحية : اي قالي والله قعد يشكرلي و يمدحلي فيه ، عاجبه هلبا
فوزية مبتسمة : هما صحاب من زمان
( فتحية استغربت تحسابه يخدم معاه )
خشت زينوبة شادة السفرة و طبست اتضيف ف فوزية : تفضلي
فوزية خدت منها : سلمك يزيد فضلك
فتحية : و وليدك شن يخدم هو
فوزية : ............
( و استمرت ف الهدرزة على ولدها )
________________
وليد مقعمز ف المطبخ سمع تليفون وصال يشرين ناض يشوف فيه .. لقاه مكتوب ( اللهم اجعله من نصيبي )
عقد حواجبه و فتح الخط
هيثم : الو
وليد انصدم من الصوت و قعد ساكت
هيثم : الووو ، وصال ؟
سكر عليه وليد الخط و داره سايلنت
( قعد هيثم يعاود )
وليد ماباش يرد عليه و قعمز يفكر
________________
خشت وصال للصالون : السلام عليكم
فوزية : و عليكم السلام
وصال قربت منها تسلم : كيف حالك ؟ .. تقول ف عقلها ( شايفتها المراة هادي )
فوزية وقفت تسلم عليها : الحمد لله ، كيف حالك انتي
وصال مبتسمة : الحمد لله ، انستينا
فوزية مبتسمة : الله يآنسك حبيبتي
قعمزت وصال ع الكرسي قدامها و دارت رجل على رجل
فوزية قعمزت ف مكانها و قعدت تشوفلها و مركزة عليها
فتحية تعض ف فمها و تفنص ف وصال
وصال فهمتها و واست تقعميزتها : احم احم
زينوبة بإبتسامة : هادي بنيتنا
فوزية تشبحلها و مبتسمة : ماشاء الله عليها حويتة
وصال ضحكت تقول ف عقلها ( لا قريشة 🐋)
_________________
07:00 م
زينوبة جت لوصال : اسمعي وليد قالي الولد قريب يوصل
وصال توشوش : حي ع النفخ
زينوبة فنصت فيها : اسكتي تو امه تسمعك
وصال : بيخش هني مع امه ؟
زينوبة : لالا تو نقوللهم يطلعو يقعمزو ف وسط الحوش باش هو يخش هني
وصال : به
زينوبة : هيا نوضي
وصال : اهو لاحقاتك
( ناضت وصال لدارها غيرت لبستها ، لبست سروال بيج مع بلوزة حمرا و وشاح حرير بربري و مسحت مكياجها و مشت للمطبخ )
لقت وليد مقعمز : شن رايك ف هادي
وليد يشوفلها و عاقد حواجبه
وصال : نغيرها ؟
وليد قرب منها و دار التليفون قدام وجهها : هذا شن يدير عندك ؟؟
وصال شافت المكالمة انصدمت و قلبها دق بسرعة
وليد يدوي مسكر سنونه : تكللللمي
وصال ترعش : مش ليا
وليد : كيف مش ليك ؟؟؟ امالا تليفون مني هذا ؟؟
وصال : تليفوني لكن الرقم لإنتصار
وليد : كيف لإنتصار ؟
وصال ترعش : لما كانت عندنا ف العرس تليفونها يستاكا ، ركبت شفرتها عندي و بدت تتكلم من تليفوني ، شكله عاود و يبيها لان الشفرة قاعدة فيه
وليد : هذا هيثم صاحبي و ماهي عندها واحد تكلم فيه
وصال تشبحله : حيييي شكلها تخون فيه 🌚
وليد : وصاااال 😡
وصال خافت و عيونها دمعو : باهي علاش انت كنت تحب اخت صاحبك ؟؟
وليد تعفلق ؛ غمض عيونه و خبط يده ع الرخامة : يلعن *****
وصال تبكي خايفة يضربها
خشت زينوبة : وليد
وليد شبحلها
زينوبة : الحوش يشرين
حط وليد تليفون وصال ع الرخامة و طلع
وصال مشت تشرب ف امية و ترعش : ياربي استر .. ان شاء الله يمشي يومي على خير .. اه ياغيبتك يا اسراء
زينوبة تشوفلها : خيرك ؟؟
وصال ترعش : شي شي
__________
فتح وليد الباب لهيثم
هيثم مبتسم و شاد ورد
وليد يشوفله : تفضل خونا ؟ من تبي ؟
هيثم ضحك : باعتيني ليكم ناس
وليد ضحك : ماعرفتكش خيرك نظيف ؟
هيثم : مبرد *****
وليد يضحك : تفضل
_____
وصال ف المطبخ اتدور ف مكانها و ترعش
خش وليد : اطلعي
وصال خايفة : و و و وليد
وليد فنص فيها : اللي جي توا بتاخديه و رجلك فوق رقبتك
وصال انصدمت : شنوو ؟؟
وليد : اللي سمعتيه
وصال كيف بتبكي : بتعيشني ف نفس اللي عاشاته فرح ؟!!
وليد شاد ضحكته : تحركي قدامي
شدت وصال بكيتها و طلعت
_____
هيثم مقعمز ف الصالون و متوتر
خشت وصال مع وليد منزلة عيونها : السلام عليكم
هيثم ضحك : و عليكم السلام
وصال سمعت صوته انصدمت و قامت عينها فيه
هيثم مبتسم
وصال شهقت : هييييييييه 😵
هيثم و وليد ضحكو : هههههههه
وليد : يوم تاني بتموتي بيها الشهقة 😂
وصال شبحت لوليد : هذا شن يدير هني ؟
وليد : جاي يخطب فيك
هيثم : آنستكم 😃
وليد شبحله و ضحك : الله يآنسك
وصال مازال مصدومة و مش فاهمة شي
( وليد شرين تليفونه لقاها زينوبة ، سكر عليها و طلعلها )
هيثم يشوف لوصال و يضحك : شن رايك ف المفاجأة يا نصيبي
وصال عيونها دمعو : قلبي قريب وقف
هيثم : سلامتك حبيبتي
وصال ترعش و قلبها يدق بسرعة
هيثم : غر قعمزي و انتي مش قادرة توقفي
وصال متوترة : ايه صح
هيثم يضحك : المرة هادي مافيهاش كيف بنقيمك شدي روحك
وصال ضحكت : مانسيتهاش ؟
هيثم جبدها من يدها و قعمزها : كيف ننسىٰ ؟ لليوم و هديكا اللحظة بين عيوني
وصال وجهها انحمر و تحشمت
____
زينوبة : راجي القهوة اتطيب باش ترفعها
وليد : باهي علاش مناديتيني خليتيها طابت قبل
زينوبة : خلي الناس يدوو كلمتين
وليد فنص فيها : اه فهمتك
كيف بيمشي زينوبة شداته : والله ماك طالعها لين ترفع السفرة
وليد : المراة وين مقعمزة ؟
زينوبة : ف دار التقعميز
____
وصال : علاش ماقلتليش ؟
هيثم : قلت ندوي مع خوك طول احسن
يحرك ف حواجبه : باش نحطك ف الامر الواقع😎
وصال : عندك علم ان عرف توا اني ندوي معاك
هيثم : باهي مليح
وصال استغربت : كيف مليح
هيثم : ترا نشوف الزمالطو !!
وصال ضحكت : حرقتلي دمي هلبا امبكري
هيثم : عارف ، لما زبطت انك ماتندريش قلت نتسهوك عليك شوية
وصال قامت حواجبها : قصدك بعد كل اللي قلتهولي شوية !!
هيثم ضحك و شد ايدها
وصال تلخبطت و ناضت وقفت
هيثم : وين ماشية ؟
وصال وجهها احمر : افرض وليد خش و شافك
هيثم : عادي و كان هدا ؟
وصال : لا انت شكلك بايعها اليوم
هيثم : اني جيت خطبت و بتولي حلالي خلاص
وصال ضحكت : و كان مانوافقش عليك ؟
هيثم بصوت واطي : نجيك سكران قدام الحوش و ندير العار متع ويلّا
وصال ضحكت و فنصت فيه : حي كان يسمعك
هيثم وقف بحداها مدلها الورد : تفضلي ياوردة
وصال ابتسمت : شكرًا هلبا
هيثم يشوفلها و عيونه قلوب
وصال تحشمت
هيثم : خيرك سكتي
وصال تشوفله فوق : تصدق متحشمة من طولي بحداك
هيثم : احلى حاجة فيك انك كلك على بعضك طشة
وصال استغربت : قصدك ماتحبش الطول ؟
هيثم : عادي ماندورش فيه
وصال قامت حواجبها و سكتت
هيثم غمزها : ال FBI اللي عندك موصلّك المعلومة غلط 😉
وصال انصدمت : اها ؟
هيثم ضحك
وصال : نهار ابيض ماتفوتك حاجة
هيثم : اكيد
وصال : ترا نشوف ايدك
هيثم رابطها : شن بتشوفي فيها ماتبانش
وصال : سلامتك
هيثم قرب منها : الله يسلمك
وصال بعدت و فنصت فيه : زي اللي استانست
هيثم : تي ارخي روحك عاد
وليد خش و مدخل القهوة
هيثم كح ، و وصال تأدبت 😌
وليد يشوفلهم : منسجمين ماشاء الله
وصال تحشمت : نستأذن ( طلعت بسرعة و شادة الورد )
هيثم ضحك
_________________
روحو صلاح و فايزة و محمد للحوش
وفاء : شن صار فيه ؟؟ كيف حاله !
محمد : حالته تحسنت شوية و بدي يتكلم
وفاء : الحمد لله
صلاح ساكت و متغشش على خوه
فايزة : هذا عمايل ولده الله غالب
محمد : ان شاء الله ربي يشفيه عمي والله مايستاهل
وفاء : و خالد كيف حاله ؟
محمد : مانندريش عليه
وفاء خافت : حي كان مايموت يامحمد
محمد : ان شاء الله
وفاء : معاش تقول هكي !! تبيه يموت باش انت تنحبس و نتشردو اني و ولدك ؟؟ تبي تكون قاتل رقبة ؟؟
محمد سكت
فايزة ركبت لدارها و ماقالت ولا كلمة
محمد شبح لبوه : بوي اني غدوا مسافر
صلاح هز راسه : مش وقت سفرك
محمد : اني نمشي و عمر يروح
صلاح سكت و ركب لداره
وفاء : ربي يستر
محمد سكت
وفاء : زعما بعد اللي صار بوك يوافق على وليد !
محمد شبحلها : شني ؟
وفاء : قصدي لو رجع وليد و خطب فرح بوك يوافق عليه
محمد : مش عارف
وفاء : اسأله غدوا
محمد : شن نسأله ! خيرك ؟
وفاء : انت أساله و خلاص شن بتخسر
محمد سكت و شرين تليفونه
فتح الخط : الو
عزو : السلام عليكم
محمد : و عليكم السلام ، اهلين عز الدين
عزو : قاعد ف الحوش انت ؟
محمد : ايه ف الحوش
عزو : باهي ربع ساعة و نجيك بنعطيك سيارة عمر
محمد انصدم : ان شاء الله عندك !!
عزو كح : الو
محمد فهمه : اوكى تعالى
عزو : سلام ( و سكر الخط )
وفاء : خيرك
محمد : طلعت السيارة متع عمر عند عز الدين و مرزرزين
وفاء سكتت 🌚
___________________
01:00 ص
وصال مقعمزة ف فراشها تتفرج ع الورد .. اتصل بيها هيثم
فتحت الخط : الو
هيثم : اه يا نصيبي
وصال ضحكت : اهلين هيما
هيثم : اهلين بيك ، شن اتديري ؟
وصال : نتفرج على ورداتك
هيثم : ان شاء الله عجبوك
وصال : اكيد كلك ذوق
هيثم : خيرك منعتي امبكري
وصال : وليد خش شن مازال بندير
هيثم : ماسمعتش شروطك 😃
وصال ضحكت : سمعني انت شروطك توا و بعدين اني نسمعك شروطي
هيثم : عادي به
وصال واست مخدتها و اتكت : هي أبدا
هيثم : بتلبسي خمار
وصال عيطت : اهااا !!!
هيثم ضحك
وصال : بجديات ؟؟
هيثم : لالا انبصر عليك
وصال : ووه عليا قريب متت
هيثم : علاش ؟ الخمار سترة مليح
وصال : تي يغم القلب
هيثم : امالا علاش لبستيه يوم البيتزا 😏 ؟؟؟
وصال انصدمت و فنصت 😧
( هيثم يكح )
وصال تمروح على وجهها من الحشمة
هيثم ضحك : خلينا نبدو بقرايتك اول شي ، انتي شن تبي تقري ؟
وصال خدت نفس : نبي نقرا في معهد الشموخ متع البصريات
هيثم : به .. اني مش حانخليك توقفي قرايتك لكن هل تقدري توفقي بين حوشك و قرايتك ؟
وصال : عادي ايه
هيثم : مليح
وصال : امالا العرس قريب ؟
هيثم : اني مدابيا حتى الشهر الجاي لكن اكيد حنعطيك وقت
وصال : قداش وقت
هيثم : قداش تبي انتي
وصال : حتى سنة
هيثم : لا خليها سنتين !!
وصال ضحكت : شن تحسابه ساهل ؟؟ نبي وقت باش نوتي روحي و ندير كل شي براحتي و باش حتى نتعرفو على بعضنا اكثر
هيثم : تي انتي متعرفة عليا قبل ماحتى نعرفك
وصال تلخبطت : ايه به كمل شروطك
هيثم : و تاني شرط بتلبسي عباية
وصال قامت حواجبها و عوجت فمها
هيثم : زي لبستك متع اليوم ماتحلميش تطلعي بيها
وصال : هيثم !!!
هيثم : نعم ياعيون هيثم
وصال : فكنا منه الجو اهوا
هيثم : شوفي ؛ اللبس الكاجول نخليك تلبسيه من حوش لحوش لكن جو الأماكن العامة بتلبسي عباية
وصال : اه به هكي عادي
هيثم : و المكياج بتنقصي منه
وصال : ماطلعتش امكيجة اليوم
هيثم : و الكحل اللي ف الجفن من داخل شني ؟؟
وصال انصدمت : ماشاااااء الله 😟
هيثم : شن تحسابيني مانشوفش !
وصال : طلعت احرف من وليد
هيثم : و ولاد شارعكم معاش تدوي معاهم
وصال تحشمت : ضروري تفكرني يعني ؟؟
هيثم ضحك : محلاك وانتي بالخيار يومها .. تقول عليك هاربة من برنامج التفاح الأخضر
وصال ضحكت
_______________________
11:30 ص
فايزة مقعمزة تبكي : الحوش فضي عليا يا صلاح
صلاح مقعمز معاها و ساكت متغشش
فايزة : صغاري و كنتي و حفيدي ، كلهم سافرو و خلونا بروحنا
صلاح : تو يروحو ، بعدين نتصل بعمر و نخليه يروح بفرح معاه
فايزة : البنت قاعدة خايفة منك مش حتروح
صلاح : اني مش حنعطيها لخالد علاش بتخاف ؟
فايزة شبحتله : يعني لو خطبها حد تاني عادي تعطيها ؟
صلاح شبحلها : كيف ؟
فايزة : نقصد لو وليد خطبها تاني تعطيهاله
صلاح : اني عند كلمتي لما نقول لا يعني لا
فايزة سكتت و اتضايقت
صلاح : الصبح سألني محمد و توا انتي شن قصتكم ؟؟
فايزة : البنت ماتبيش غيره يا صلاح و انت ريت كيف كانت حالتها
صلاح : اكيد سفرتها لتركيا غيرتها ، تو تروح و تلقي جوها ع الكيف
________________________
سمية مقعمزة تبكي ف حوشها و لايدين بيها العيلة
أمل متغششة : يا ربي فرج علينا
أماني ساكتة
نورية : و خوك توا كيف حاله يا أمل
أمل شبحتلها : اليوم طلعوه من العناية و حاله احسن الحمد لله
نورية : الحمد لله
أماني بدت تبكي : اني بالي مع بابا اكثر خايفة عليه هلبا
فاطمة : ربي يطمنكم عليه ، ادعوله انتو بس
____________________
02:30 م
خش وليد للحوش و مدخل شكاير
جاته وصال : من بكري نراجي فيك
وليد : خيرك شن فيه !
وصال : نبيك ترفعني لريحان
وليد : باهي خيرك متصربعة
وصال : لا شي
وليد ضحك : مش منك عاد من نصيبك
وصال وجهها انحمر و تحشمت
_______________
05:30 م
فرح و عمر ف التاكسي ماشيين للمطار باش يستقبلو محمد و وفاء
فرح تتفرج ع الطريق و ساكتة ، وقفو ف زحمة مدرسة ثانوية ؛ قعدت تتفرج عليهم و خانقتها العبرة ، تفكرت وليد لما كان يروح بيها
(( بــلادك بــعــيــدة و مــســكنــك مــطّــوح ، قـلـة حــبــيّــب يــوصــلــك و يــروح 💔 ))
______________
درس وليد قدام حوش ريحان : ساعة قداش نجيك
وصال : تو نتصل بيك
وليد : به
نزلت وصال و شرينت ع الحوش
طلعتلها ريحان تجري و فتحت الباب
وصال و هي خاشة : شن الجو
ريحان عيطت : أأأأأأأأأ😆 و اخيراً شددددددت
وصال تندب ف وجهها : اسكتي وليد سمعك
ريحان تضحك بصوت عالي : عادي خلي يسمع
وليد هز راسه و طلع بالسيارة ...
خطم من قدام حوش فرح ؛ وقف يشوف لروشن دارها ..
(( مــريــض قــلــب مــانـي مــريــض وجــيــعـه ، عـلى عــيــون غــالـي نــهــونــي عــلى تــتــبــيــعـه 💔 ))
__________________
فرح متوترة : مش قادرة نشوفه
عمر يضحك : شن بيديرلك ؟
فرح : مش حايديرلي شي لكن هكي قلبي يدق بسرعة
عمر شافهم : اهما وصلو
فرح تلفتت : وينهم ؟
عمر يأشر : هونا قدامك سند الكلب يضحك
فرخ شافاته ضحكت : ديما فاتح فمه .. استاحشته المعفن
محمد شافهم ضحكلهم
فرح شبحت لعمر : وووه عليا شافني
عمر شبحلها : خيرك فرح ؟
فرح : شي شي فوتني و خلاص
قربو منهم محمد و وفاء يسلمو
وفاء تسلم على فرح و مضبطتها : خليتي مكانك اخي عليييييك
فرح تضحك : عرفو قيمتي ولا مازال ؟
وفاء ضحكت
عمر يسلم على محمد : الحمد لله ع السلامة
محمد : الله يسلمك .. و مدله سند
عمر خداه منه و يبوس فيه : تعالى هني يا امسخ
محمد شبح لفرح : تعالي
فرح قربت منه و ضبطاته : الحمد لله ع السلامة
محمد : الله يسلمك
فرح سكتت
محمد : علاش ماحكيتيليش ؟
فرح شبحت لعمر
محمد : علاش ماقلتيليش يافرح ؟؟
عمر : خافت تزوجوها ليه
محمد شبحلها : بعقلك انتي ؟؟
فرح ساكتة
وفاء : خلونا نروحو و بعدين هدرزو ... رجليا مش قادرة نوقف 😫
عمر ضحك : هيا اطلعو
______________________
ريحان صفقت : يعني قريب الفضانية 👏
وصال ضحكت : لالا بعد شهر مرات ، ماما قالت اني كيف طالعة من عرس تبي شوية وقت
ريحان : ايه عندها الحق
وصال : تعرفي مش مصدقة يا ريحان ، لما خشيت و ريته قلبي حسيته شرين ف رجليا
ريحان ضحكت : محلاها المفاجأة
وصال : احلى مفاجأة ف عمري
ريحان : به تفاهمتو على شروط بعضكم ؟
وصال : شروطه ماشي حالهم نقدر عليهم و اني ماعندي مانشرط عليه الا القراية و ماقال عليها شي
ريحان : به مليح بكل
وصال : و الماكلة حافظة جدوله 😂
ريحان ضحكت : تعالي معاي للمطبخ نديرو شاهي و احكيلي بالتفصيل
وصال وقفت : به
ريحان ناضت و تنهدت : ااااه ياغيبتك يا فروحة
______________________
09:00 م
فرح تبكي : والله مانى مروحة خليه لين يعرف قيمتي
محمد : اني مانبيكش تروحي اصلاً ، لكن هو قال خلوها تروح و مش حانزوجها لخالد
فرح تبكي : لالا مانضمناش و هو ماهو ناض زي الجن اكيد مش حايخليني ف حالي
عمر : يبيني نقتله امالا
وفاء : لالا يافرح والله كان تشوفي بوك لما سمع شن دار
فرح شبحتلها : شن دار ؟
وفاء : مشي لعمك و تعارك معاه
عمر : قصدك عمي سمع ؟؟
وفاء : ايه .. المسكين انجلط
عمر انصدم : والله جديات ؟
فرح انصدمت و عيطت : ماتقوليهاااااش
وفاء : والله هذا اللي صار
عمر تأثر : مسكين والله وجعني
محمد : كله من الحيوان اللي عنده هو اللي جلطه ماهو كان يعرف يربي راهو مش هذا حاله
وفاء : حرام عليك يا محمد معاش تتشمت
محمد : مانتشمتش لكن هذا الحق
عمر ساكت و مصدوم
فرح : المهم اني مش مروحة لين يوافق ع اللي نبيه يصير
محمد سكت
وفاء شافت لعمر : وين سرحت يا عمر
عمر شبحلها : نفكر ف عمي ، وجعني مسكين
وفاء : الله غالب ، ربي يشفيه
عمر : ان شاء الله
محمد : تو انت صايرلك من المرواح ولا بتقعد ؟
عمر : ايه بنروح مانقدرش نخليهم بروحهم
محمد : به كويس لان بوك يبي حد معاه هاليومين
عمر : تو غدوا نحجز
_____________________
بعد مرور أسبوعين 🌹
04:30 م
عمر طالع بسيارته ماشي للمحل و يشرب ف قهوته
فتح تليفونه يتصل بوليد ...
وليد فتح الخط : اه عمور
عمر : ها برو وين ؟
وليد : كيف ماشي للمحل
عمر : باهي دورني فالليل
وليد : ان شاء الله به
كيف عمر بيسكر الخط تفرفش و تبزعت منه القهوة ؛ تعفلق و قعد لاهي بيها ..
فجأة خبطت فيه السيارة اللي وراه
عمر : يلعن ***** .. و نزل من السيارة ماشي للي خبطه .. و طق ع المرش
ريحان فتحت الروشن : عمر !! سامحني
عمر تفاجأ : ريحان !!
ريحان : كنت لاهية ف الراديو و انت وقفت فجأة
عمر ضحك : تي عادي ماتدوري شي ، شن أمورك
ريحان : الحمد لله تمام كيف حالك انت ؟ وشن جو فرح
عمر : كويس تمام ، فرح نسألك انتي عليها ممكن تعرفي أخبارها اكتر مني
ريحان ضحكت : غر شوف السيارة لو انضرت هلبا !!
عمر : تي فوتيها عادي
ريحان : كيف حال العويلة ؟
عمر : كويسين تمام
ريحان : شن صار ف ولد عمك ؟؟
عمر : ناض منها زي البلي
ريحان سكتت
عمر : و عمي تبرا منه
ريحان ضحكت : باهي بنفتحو هدرزة ف نص الطريق ؟؟
عمر : تبيني نركب بحداك و نهدرزو ؟ عادي ره
ريحان تحشمت و تلخبطت
عمر ضحك : اهو مقهى وراك شن رايك نعزمك
ريحان تشوف للمكان : مش عارفة ! خاطرك ف هدرزة انت ؟
عمر : ياريت ، ليك وحشة والله
ريحان تلخبطت
عمر كح : لو ماعندك شي
ريحان : لا ماعندي شي ، كنت نوصل ف خالتي لحوشها و مروحة
عمر : امالا درسي كويس و انزلي
ريحان : به
مشي عمر يدرس ف سيارته
بعد شوية نزلو و خشو للكافي و قعمزو
ريحان : مش ماشي للمحل امالا ؟
عمر ضحك : تصدقي ريتك نسيته
ريحان ضحكت : ههههههه
عمر : شن تبي تاخدي
ريحان : عادي اي حاجة
جاهم القرسون و وقف بحدا ريحان و ابتسملها : شن تحبي تاخدي
عمر تعفلق و فنص فيه : و انت شن دخلك فيها شن تحب !!
القرسون انصدم : عفوا !!!
عمر : لا عفوا لا شكرًا !! شن مش مالي عينك باش ماتسألنيش اني ؟؟؟؟
ريحان انحرجت : عمر خيرك ؟؟
عمر وقف : هي نوضي
القرسون يشوف و مصدوم : اني فاش غلطت
ريحان وقفت : عمر !!
عمر جبدها من يدها و طلع
يـتـبـــع ... 💗
Masarra Osama ✨