روايــة #أصحاب_ونسايب
حـــلْـــقــة إضــــافـــيــة 🌸
ركب وليد لسيارة هيثم ساكت و متضايق .. مهموم و خانقاته العبرة بس يكابر قدام صحابه باش مايشفقوش عليه و يحسوه مكسور ..
____
عمر يدور بالسيارة ف الشوارع و يتكلم مع سرور ف التليفون
سرور : و فرح شن صاير فيها
عمر : فرح لو تعزيها تقبل العزي .. لتوا مستاجع عليها اول مرة نشوفها بالحالة هادي
سرور : يارووحي عليهم ، لازم ادير موقف ياعموري ماتخليش اختك تاخد ولد عمك بالغصب تبدا كأنها محكوم عليها إعدام
عمر : تي والله ماهو راي ظفرها لو كان نهربها برا البلاد
سرور سكتت
عمر : و الخرا هداكا روحه مش وقت مرواحه الزفت
سرور : محمد روح ؟
عمر : ايه ... هي سكري عزو خش عليا انتظار شكله لقي وليد
سرور : اوكى ، كلمني لما تروح
عمر : ان شاء الله .. و فتح الخط على عزو : ها شن صار
عزو : لقيناه و توا ماشيين لحوش هيثم ف عين زارة
عمر : هاني جاي .. و سكر الخط
_________________
خالد واقف ف بلكونة داره يدخن
طقت سمية عليه : خلودااا
خالد : خشي يام
سمية خشت : خيرك ماتعشيتش
خالد : ماعنديش نية
سمية ضحكت : خناق العرسان ؟
خالد ضحك ، طفي دخانه و خش بحداها : بالعكس الشهية بتنفتح
سمية : نجيلي هالضحكة والله كنت مخليلي مكانك ف الحوش
خالد ابتسم و قعمز ع السرير
سمية : ماكلمتكش فرح ؟
خالد : لالا ، حرجانة شكلها
سمية : معناها لازم ترضيها
خالد : كيف ؟
سمية : فايزة بتديرلها حفلة نجاحها ، خودلها هدية و برا باركلها
خالد سكت
سمية : شن رايك تاخدلها دبلة و حديدة ذهب باش تتسمىٰ خطيبتك رسمي
خالد : لالا شن دبلة .. يقول ف عقله ( باش تلوحها على وجهي )
سمية : امالا تو نفكرلك
خالد : لالا خليها عليا اني .. و شرين تليفونه لقاها سرور داره سايلنت
سمية ضحكت ( تحسابها فرح ) : شكلها حن قلبها عليك
خالد ضحك
سمية : سلملي عليها .. و طلعت من الدار
خالد فتح الخط : الو
سرور : .........
___________________
وفاء خشت على فرح ف دار عمر لقتها متكية
وفاء : فرح ؟
فرح شبحتلها
وفاء قربت منها و قعمزت بحداها : كيف حالك توا
فرح متنكدة : شوفت عينك
وفاء : كلمتيه ؟
فرح هزت راسها : لتوا رقمه مسكر
وفاء : خسارة هو جي متأخر ياريت سبق خالد
فرح : خالد طلع موضوعه قديم و اني مانندريش
وفاء : جديات ؟
فرح : و حتى محمد يعرف و مش مقايل
وفاء تفاجأت : والله حتى اني ماعندي علم
فرح سكتت
وفاء : ماعرفتش علاش بوك ماوافقش عليه مع ان وليد علم و أخلاق تربية و قايم حوشه و امه و خواته و متحمل المسؤوليات
فرح : و اهم من هكي انه راجل و يخاف ربي مش زي ال .... مش عارفة شن بيقول فمي عليه
وفاء : ومافهمتش علاش حتى محمد مش راضي ، لتوا قاعد متعفلق ماقدرتش انناقشه خفته ينط فيا
فرح : عقلية مادية بعيد عليك
وفاء : كيف مادية ؟
فرح : بابا قالي بتحشميني قدام الناس يقولو صلاح عطي بنته لواحد ماعنده شي
وفاء مصدومة 😳😳
فرح : و قالي لو مازال ندوي مع وليد بيغضب عليا و بيطلق ماما
وفاء : احلفي 😳 .. خيره هذا ؟
فرح تبكي : بالله عليك معاش تزيدي تقهريني
وفاء سكتت
فرح : حتى راجلك نفس العقلية
وفاء : لالا مش زيه
فرح : مش حتعرفيه اكثر مني
وفاء : تو ندوي معاه
فرح : ماتعبيش روحك راسه كاسح زي صبة العرص
وفاء وقفت : صوت سنودي ناض خلي نمشي نشوفه و انتي حاولي ترقدي واضح عليك الإرهاق
فرح شدتها من يدها : وفاء خليك معاي ماتروحيش لحوشك
وفاء : وين بنقعد حوشي اللي فوق فاضي
فرح : فرشوه و اقعدوا فيه بالله عليك
وفاء سكتت
فرح : نترجا فيك ، الفترة هادي محتاجاتك معاي مانبيش نقعد بروحي
وفاء : باهي ان شاء الله ، غدوا تو نقول لمحمد
فرح مسحت دمعتها و سكتت
وفاء : تصبحي على خير
فرح : و انتي بخير ، سكري الضي وراك
___________________
