روايــة #أصحاب_ونسايب
الــحــلــقــة الــثــالـثـة عَـــشَـــرْ 🌸
اسراء : قصدك فرح ؟
وصال : ايه ، امس هدرزت مع ريحان ......
( فتحية تسمع فيهم من برا و هما مايندروش )
__________
تليفون ريحان يشرين و هي راقدة ماتسمعش فيه
فرح تتأفف : نوضي ياريحان سكري عليا البلي نبي نرتاح ماصدقت عيني غفت
ريحان تتكسل : همممممم
شافت تليفونها : هادي ماما ، و ردت : الو
هدى تبكي : تعاليلي يا ريحان بسرعة
ريحان انخلعت و ناضت وقفت : شن فيه خيرك ؟؟
هدى تبكي و تتكلم داهشة : بوك يا ريحان بوووك تعالي الحقيني ف المستشفى اجري يا تلحقي يا ماتلحقيش
ريحان سكرت عليها و تعيط : لا يا ربي لااا
فرخ مخلوعة : خيرك شن فيه ؟؟؟!
لبست ريحان عبايتها و وشاحها و طلعت تجري من الدار تعيط : ووه عليا بابااا
فرح لحقتها مخلوعة : تعالي فهميني خيره بوك ؟؟
طلعت فايزة من الدار : بسم الله خيركم شن فيه
ريحان تبكي : بابا طاح على ماما شوره بيموت ووه عليا نبي نمشيلها
فرح شدت وجهها : عمي عبد الرزاق ؟؟! 😱
فايزة رعشت : يا لطيف يالطيف
ريحان تبكي : نبي نطللللع 😭
فايزة : راجي ماتطلعيش بروحك تو انوض عمر يرفعك .. و خشت لعمر ف الدار
نزلت ريحان تجري و تبكي : كان لحقني باهي كان هذا بنمشي على رجليا
نزلت وفاء من حوشها تجري : خيركم تعيطو ع الصبح ؟
فرح : بو ريحان مرض فجأة
وفاء تفاجأت : الله ؟
نزلت فرح ورا ريحان : راجي ماتطلعيش بروحك
ريحان تبكي و عقلها مش معاها : بنمشي معاش قادرة نصبر
فرح شدتها : والله ماك طالعة بروحك راجي
ريحان وقفت و مازال تبكي : باهي
فرح و هي راكبة : راجيني نلبس حوايجي بنمشي معاك .. و ركبت
ريحان فتحت تليفونها تتصل بأختها ريان لقتها خارج التغطية .. سكرت التليفون
عمر نزل يجري : هيا اطلعي
ريحان طلعت معاه و ركبو للسيارة ..
عمر : وين فرح
ريحان : اطلع بسرعة فرح بتعطلني ؛ بابا بيموت نبي نلحق نشوفه بسرررعة
عمر طلع بالسيارة و مشو
_____
فرح نزلت للجنان لقتهم مهناش ، خشت للحوش
وفاء : خيرك وليتي ؟
فرح : مالحقتش عليهم
وفاء شادة تليفونها : تو نتصل بمحمد يجي يرفعك
فايزة راعشة : اتصلي بسرعة ياناري عليها انخلعت من نومها .. كان مايموت عبد الرزاق و تقعد بروحها هي و امها ياكبدي
فرح : ماما ياريت تدعيله بدل ماتفاولي
وفاء شادة التليفون تتصل بمحمد : موعرها الخلعة
محمد فتح الخط : الو
وفاء : ايوا محمد .....
______
وليد مقعمز مع امه و خواته يفطرو و ساكت ماياكلش
فتحية تشوفله و ساكتة
اسراء شبحتله : ترا نشوف ايدك
وليد : مافيها ماتشوفي
فتحية : كملو اللي ف ايديكم بسرعة بنمشو لحوش حناكم
وصال : علاش ؟
فتحية : بنغسلو البساطات و بنديرو الحلاوات متع السهرية
وصال : نغسلوهم ف الجنان علاش التيرو توا
وليد شبحلها : باش يتفرجو عليك السطاويه ؟
وصال : نسيتهم 😏
اسراء : اصلاً البساطات رفعناهم غادي من اول امس
فتحية شبحت لوليد : وليد !
وليد شبحلها
فتحية مبتسمة : مادامك قاعد تكمل ف حويشك ؛ شن رايك نخطبلك ؟
اسراء و وصال شبحوا لبعضهم و ركزو معاه
وليد : تخطبيلي ؟
فتحية : ايه ؛ والله رنا ماشاء الله عليها أخلاق و ...
قاطعها وليد : لالا نحيه الموضوع من راسك
فتحية : علاش ؟ نبي نزوجك و نفرح بيك و نشوف صغارك
وليد : معاش تفتحيهولي الموضوع هذا
فتحية تعفلقت : انت منكد على روحك و هي تشري و تبتت و فرحانة مع خطيبها
وليد تعفلق منها شاد اعصابه بالسيف
فتحية : لي امس بس شاريلها سيارة اخر موديل و بتسافر معاه لألمانيا و انت اقعد مقهور
وليد دمه فار ، وقف و جبد مفرش الطاولة جاب الفطور كله ع اللوطّا و الماعين تكسرو
خواته شهقو : هييييييييه 😱
فتحية : ليه عليك يا وليد ؟ تكسر و تخبط و تشلى و هي فايتاتك
طلع وليد من الحوش وقربع الباب
فتحية تكشخ : ريتوووه ؟؟ بدي معاش يحترم فيا .. كله منها قلباته علينا .. هدا ماخداهاش هكي خلاته امالا كان خداها كيف !!!
اسراء شبحت لامها : علاش تفكري فيه ف اللي صار توا ؟ كيف بدي ينسىٰ و يتغير جوه لازم تنكدي عليه ؟!!
وصال تشوف للماعين : علاش هكي يدير ؟ كل مرة مكسر حاجة و حني نجو نلمو ، هذا يعاقب فينا شكله 😭
فتحية تكشخ : تو نوريه ، نقعد وراه وراه لين رنا ناخدهاله ...
_____________
