روايــة #أصحاب_ونسايب
الـــحَــلْـــقَــة الـــعـٓشـــرون 🌸
(( الأخيرة ❤️))
فيه حلقة إضافية تتبع الحلقة 19 اقروها قبل هادي 🌹
وصال تشوف لروحها ف المرآية : تي طلعت نهبللل يا ريحان
ريحان ضحكت : شوقتينيييي
وصال ضحكت : خلاص هي سكري .. نتلاقو ف الصالة
ريحان : ماشي باي
وصال : سلام ..( وسكرت الخط )
جتها فرح : شن رايك ف شعري ؟
وصال تشوفلها : حلو
فرح : انتي احلى 😘
وصال قعمزت ع الكرسي : لكن علاش روجك هادي
فرح : قفطاني ازرق مانبيش نديرله روج احمر
وصال : هكي احلى صح
فرح قعمزت بحداها : تعرفي تغيرتي هلباا .. هيثم الا ما يهبل فيك الليلة
وصال : قلبي يدق من توا .. مش مصدقة
فرح : تتفكري لما طيحتي تليفونه ؟
وصال ضحكت : لتوا يذل فيا بيها ، يقولي ايدين مرخيات
فرح ضحكت : هيا نوضي كان بتلبسي وقت عليك
وصال : و انتي بتروحي ؟
فرح : وين نروح و اني كاذبة على بابا
وصال : شن كاذبة عليه
فرح : على اساس عند وفاء باش نطلع معاها تحجز حاجات السبوع
وصال : يعني بتروحي لحوش محمد ؟
فرح : ايه
وصال : وين بتلبسي ؟
فرح : جبت معاي حاجاتي .. شوية و نلبس
وصال : كان ما محمد يفرمط فيك
فرح : لالا وفاء تهني
وصال : باهي امالا كلمي وليد يجينا الستة و نص
فرح فتحت تليفونها : خلينا ناخدو سيلفيات قبل
وصال قربت منها : هي
______________________
عمر خش لأمه ف دار المعيشة : خيرك مقعمزة بروحك ؟
فايزة تتفرج ع التلفزيون : بوك طلع من بكري قال عنده جنازة
عمر : امالا ماكش ماشية للعرس
فايزة : لالا
عمر : علاش ؟
فايزة : كان بنمشي بوك بيعرف و بيحرم اختك من المشي
عمر سكت
فايزة : وين طالع انت ؟
عمر : عندي مشوار و بعدين ماشي للعريس لانه صاحبي حتى هو
فايزة وقفت : باهي امالا حطني ف طريقك عند خالتك
____________________
07:00 م
فرح تلّبس ف وصال في الكاب : ردي بالك اتطيحي و انتي طالعة
وصال : ماتخافيش
فرح تلفتت تلبس ف عبايتها : شحورناه اكيد تكنطا
وصال : انتي معاي مش حايتعفلق
فرح ضحكت و شدت وصال من يدها تمشي فيها للباب بالشوية
وصال : شنطتي و حاجاتي وين ؟
فرح : حطهم وليد ف السيارة
وصال : به خلي تليفوني عندك يا فوفا خير مايريح
فرح : حاضر
و فتحت باب المزين : وليد ؟
نزل وليد من السيارة و فنص فيها : غطي وجهك و اركبي
فرح : باهي
وليد شد وصال من ايدها يركب فيها ف السيارة
وصال : اطلقني تو نركب بروحي
وليد رخاها : ردي بالك بالكعب
وصال علت صوتها : راهو يتلبز الفيلو .. قيمه كويس
وليد شد ذيل الفيلو : باهي غر اسكتي بس
ركبت فرح ف السيارة من قدام جنب وليد
وصال قعمزت ف الكرسي من تالي : راك تسكر الباب عليه
وليد يساوي في الفيلو : مرتاحة هكي ؟
وصال : تمام ايه
سكر وليد الباب عليها و ركب
فرح تلفتت لوصال و فتحت تليفونها ع الكاميرا : ترا قيمي الكاب شوية نبي ناخدلك لقطة بالفلاش
وصال قامت الكاب من وجهها و ابتسمت
فرح صورتها : تهبلي مش عادية جت
طلع وليد بالسيارة
وصال : ابعتيهملي الصور كلهم ع الفايبر
فرح : اكيد
و تلفتت تصور هي و وليد ف سيلفيات
وليد يسوق و يضحك
فرح فتحت المسجل : خلاص خليك لاهي ف الطريق توا
وليد قرب منها و وشوشها : شن رايك نحطوها ف الصالة و نطلعو
فرح ضحكت و شبحتله : خاطرك فيها ؟
وليد : هلبا
وصال : هيييه نسمع فيكم
فرح تضحك
وليد : يالطيف شورك كاسرة وذنك هني
وصال : امالا ماكش ماشي لصاحبك ؟؟؟
وليد : بنحطكم و بنمشيله
وصال : علاش لابس دجاكة زرقاء مش بدلة ؟
وليد سكت
وصال : ماتقوليش مش حاتدخلني !!
وليد : اسألي الحكومة
وصال ضحكت : علاش بتحرميني من زفتي معاه يا فرح
فرح : ولا تفكري انه يخش للصالة .. ياسر خش ف حفلة اسراء
وليد شبحلها : هديكا الليلة وين كنتي وقتها
فرح سكتت و دارت روحها لاهية ف التليفون
وليد : نكلم فيك !
وصال ساكتة
فرح : ف الحوش
وليد : و فالليل وين مشيتي ؟
فرح علت صوت المسجل : خلينا نهيجو بوصال توا
