روايــة #أصحاب_ونسايب
الــحَـــلـــقـة الــتَــاسـعــة عــشَـــرْ 🌸
و مـاقـبْـل الأَخــيــرَة ‼️
فجأة لمحت رنا بنت جيرانهم راكبة معاه بروحها
عقدت حواجبها و تكنطت : هادي شن اتدير معاه !! ... هذا علاش ماتصلش بيا ف الليل !!!!
وليد يشوفلها من السيارة و يغيظ فيها ؛ حركلها صوابعه بمعنى هاي
فرح دمها فار و مشتلهم ...
وليد ضحك
رنا كيف نازلة : اهلين فرح 😏
فرح متكنطية مابتش ترد عليها
رنا شبحت لوليد : مش نازل انت ؟
فرح : بري ف حالك انتي شن تبي فيه
رنا شبحتلها : نسأل عادي ، خيرك انتي
فرح : بري تسقدي هي
رنا تعفلقت
وليد يضحك : امتى تبيني نجيك يا رنا
فرح فنصت فيه و دمها يغلي
رنا فرحت و صدقت روحها : تو نكلمك
وليد : اوكى
فرح شادة اعصابها بالسيف .. شدت عصاة السيلفي ف غُل تبي تضربها بيها
رنا و هي ماشية تشوف لفرح بنظرة شماتة
فرح وقفت على وليد من الروشن : علاش انت جايبها 😡
وليد : نعم !
فرح : سمعتني شن قلت
وليد : بصفتك مني باش تبيني نجاوبك ؟
فرح قامت حاجبها : بصفتي فرح و لما نسألك تجاوب
وليد سكت و قال ف عقله ( بتردهالي زي لما عاركتها ع الحجاب )
فرح : هييه نكلم فيك
وليد بإستفزاز : رنا تهمني و اكيد بنوصلها و نروح بيها .. نخاف عليها من الخطف
فرح عقدت حواجبها و سكتت
وليد : وصلت المعلومة ؟
فرح ساكتة تقول ف عقلها ( تي على من يكذب و هو لتوا مانسانيش ... قعدت تشوفله و ساكتة ؛ تفكر : لالا شكلها الدوة بجديات !! ... حي عليا حيه كان حق ! )
وليد : شكلها ماوصلتش !
فرح مشت و ماردتش عليه
وليد يشوفلها و يضحك ..
فرح خشت بعدها طلع وليد بالسيارة
____
فرح دمها يغلي : يغيظ فيا بيها ؟؟ تو يشوف كان ماخليتاش يجيني و يتجداني
( و قعمزت ف الطاولة )
ريحان وشوشتها : خيرك ؟
فرح متكنطية : علاش عازمينها السوسة هادي
ريحان شبحت لرنا : مش اني عزمتها شكلها اسراء
فرح سكتت و تسحن في روحها
رنا تشوف لفرح و تبتسملها
فرح شقلبت عيونها و فتحت تليفونها
انتصار : وين التورتة ؟؟
خولة : شوية و يجيبوها
رنا : عزمتو صاحباتكم متع المدرسة ؟
فرح تتكلم من راس خشمها و عيونها ف التليفون : اكيد عزمناهم ، تنعزمي انتي و هما لا ؟ تي حتى عيب 😏
البنات ضحكو 😂
رنا انحرجت 😒
ريحان تضحك : اهما وصلو
____________________
وصال : هي وينه المحل ؟ مانبيش نعطل
اسراء : خايفة منه ؟ الفاتحة بعد يومين خلاص ضمنتيه
وصال ضحكت : تي نفاخ .. لما ينوض عليه البوري شن يحزه
اسراء : شن رايك نخشو لِـ موزارت
وصال علّت صوتها : لالا اما موزارت هذا مش وقته
اسراء : ناخدو كيكة ع السريع و نطلعو .. نحس ف روحي بيصيرلي هبوط نبي حاجة حلوة
وصال شبحتلها : فكينا مانعرفش نسوق
اسراء رخت الستيرسو : اه يا وصال معاش قادرة
وصال خافت : باهي بري .. غر شدي روحك بس
اسراء شادة ضحكتها : وينه هو ؟ قريب نوصلوه ؟
وصال : مازال القدام
اسراء سكتت
وصال فتحت تليفونها تتصل بهيثم ...
اسراء شبحتلها : ف من تكلمي
وصال : هيثم ، بنقوله طلعت خير مايعرف بعدين و يديرلي دعكة باهية
هيثم فتح الخط : اه نصيبي ؟
وصال : اهلين حبيبي
هيثم : هلا بالعروسة
وصال ضحكت
هيثم : شكلك طالعة
وصال : ايه ، بنكلمك امبكري مشي ..
قاطعها هيثم : باهي مليح استمتعي بوقتك
وصال استغربت : شني ؟؟
اسراء تقول ف عقلها ( حيي كان مايفرمط فينا و يحرق الفيلم )
هيثم : لا شي ، انتي طالعة قتلك استمتعي بوقتك يعني غيري جوك
وصال سكتت مستغربة
هيثم : الو ؟؟
وصال : باهي سلام
هيثم : لما تروحي اعطيني علم
وصال : حاضر
هيثم : تشاو ( و سكر الخط )
اسراء : شن قالك ؟
وصال مصدومة : قالي استمتعي بوقتك ، اول مرة يقولها
اسراء ضحكت ، دارت تشريينة لريحان و درست السيارة
وصال : امالا خلينا نديروها طلعة مليحة
اسراء : باهي هيا انزلي
وصال : كان يندري عليا طارحة 😂
اسراء ضحكت : اصلاً كانك لبستي عباية راهو ماخليتكش تطلعي بيها
( و نزلو من السيارة )
_______
