روايــة #أصحاب_ونسايب
الــحَـــلـــقـة الــسَــادســة عــشَـــرْ 🌸
عزو يضحك : منور والله
وليد : تي اسكت ياراجل هيثم انصاب
عزو انصدم : لا يا رااااجل !!!
وليد : لكن شكلها بسيطة جت ف ايده
عزو : جيبه لحوشي طول ماترفعاش لمصحة
وليد : علاش ؟
عزو : جارنا دكتور تو هو ينحيهاله ، فكك من وجيج المصحات
وليد : ماشي تشاو
عزو : اسسمع
وليد : نعم
عزو يضحك : روحتلك بِ الشيخ و صار اللي تبيه ياهومي
وليد فرح و ضحك : والله تستاهل بوسة من بين عيونك
__________________
خالد يعافر ف علاء : اطلقني يا علاء بنطلع
علاء شاده : تي قعمز ياراجل يقتلوك يتفركس عرس خوك
خالد يعيط : اما عرس و فاتحتي ماصارش منها
و تلفت يدور ف الشيخ : وين مشي !!
اكرم : شكله روح
خالد متعفلق
علي راعش : اني مش فاهم شي من شي يا صلاح
صلاح : بالك حد هارب من كتيبة و نقز هني و يلحقو فيه
علي : لالا نحسهم مخانب و لما لقو العرس خافو و ممكن شافهم حد بدو يرمو عليه
صاحب اكرم خش للخيمة : خلاص مشو
خالد يعيط : من هما اللي مشو ؟؟ شن اللي صار ؟؟
صاحب اكرم : زوز كانو يرمو علينا و هربو من ورا الحوازة
خالد دمه فار و طلع يجري
اكرم لحقه : تعالى يا خالد
( الناس بدو يطلعو و يروحو )
صلاح يوشوش ف محمد و متعفلق : مفيش غير الكلب عمر يديرها
محمد شبحله و سكت
_______________________
وفاء و البنات خشو من الجنان و قعمزو الداخل
ريحان : اشبح وصلو ولا لا
وفاء : نفكر ف محمد شن بيقول لما بيعرف
ريحان شبحتلها : سكي الأزرق
وفاء : ايه بندير روحي مانندري على شي
وصال : مش حاتحكيله ع اللي داره خالد ؟
وفاء : مش اليوم ، خلي يتم عرس اكرم قبل ، خير مايقتل خالد و نلقو روحنا نعزو ف مكان مانباركو
ريحان ضحكت و شبحت لوصال : حقا احكيلنا على هيثم و كيف بديتي تكلمي فيه
وصال كيف بتدوي ...
قاطعتها وفاء : راجي نجيب سفرة شاهي و بعدين احكي
وصال : به
ريحان : ماتعطليش
وفاء ناضت : خمسة دقايق ... ( و مشت للمطبخ )
ريحان شبحت لوصال : بالي مع فرح من بكري
وصال : و اني بالي مع خوي اكتر الحق ، ع الأقل فرح عارفينها وين
ريحان سكتت
وفاء من المطبخ : يابنااات ؛ عمر بعتلي مسج قال وصلو تونس
ريحان و وصال : الحمد لله
ريحان : هذا وين ارتحت
وصال : اللي داره عمر اليوم مايديره حد
ريحان : ايه ، يهبل ... تتمنيه اوخي كل احبيب
وصال شبحتلها و ضحكت
ريحان : خيرك ضحكتي ؟
وصال : لا شي 😃
ريحان : حتى وفاء موقفها حلو مع فرح ، مش اي كنة اديره و خصوصا ان راجلها مايندريش
وصال : بكل راجلها محرفه
ريحان : ايه مش زي عمر
وفاء من المطبخ : نسمع فيكم راهو تقرمو ف راااجلي !!!
ريحان و وصال ضحكو 😂
وفاء جت و جايبة السفرة : اهو جيتكم
وصال : كلام الحق وجاع 😃
وفاء ضحكت : صح
ريحان : هيا احكي ياوصال راني على نار
_____________________
سمية راعشة : كيف صاااار ؟؟
أمل : قالو كيف بيقرو فاتحة خالد صار الضرب و ماعرفوش مني
فايزة فرحت : الحمد لله
( كلهم شبحولها )
فايزة : قصدي الحمد لله ربي سلمهم
أماني : يعني ماتمتش فاتحة خالد ؟
أمل : ايه هكي قال
سمية : متأكدة يا أمل ماصارلهم شي ؟؟
أمل : ايه يا ماما ماتخافيش ، اكرم كان يكلم فيا و قال مروحين
سمية تبكي : والله عين و ضربتنا
فايزة تسكت فيها : اذكري ربي ، الحمد لله على سلامتهم المهم فاتحة اكرم تمت و يمشي العرس على خير
نورية : معليشي يافايزة فاتحة خالد خلوها ف العرس و خلاص الحمد لله على سلامتهم
سمية تبكي مازال راعشة
______________________
وليد شاد هيثم قدام الحوش : شوفلنا الطريق يا عزو
عزو : هيا هي ( و خش للحوش )
هيثم يضحك : تي اطلقني ياراجل هي ايدي مش رجلي
وليد متحشم : ياريتها جت فيا الزفت
هيثم : تي عادي ماتدور شي
عزو جاهم : هي خشو
( خشو هيثم و وليد للمربوعة و عزو طلع ينادي على جارهم الدكتور )
_______________________
وصال : و هادي القصة
وفاء و ريحان يضحكو بدموعهم : ههههههههههه 😂
وصال تضحك
وفاء : المهم حصلتيه
وصال : مازال مش مضمون
ريحان : مادام وصل ف غطي وجهك خلاص
وصال ضحكت : زعمااا ؟
وفاء : تبي نعطيك الطريقة اللي طيحت بيها محمد ؟
وصال تشوقت : شن هي ؟؟
ريحان تضحك : لا يا وفاء لوحي عليك هادي ديما بعفايسها
وصال : خززي 😂
وفاء ضحكت : امالا فوتي
وصال شرين تليفونها لقتها خالتها ، سكرت عليها و وقفت : خالتي وصلت .. هي بالسلامة
ريحان و وفاء وقفو يسلمو ...
_______________________
محمد و صلاح ف السيارة مروحين
صلاح : زيد عاودله الكلب
محمد : نتصل بيه من الظهر رقمه خارج التغطية
صلاح حامق : يكسر ف كلمتي المسخ !! باعت مردف يبو يقتلو النااااس !! تو نعرف كيف نربيه و نجيبه للطريق
محمد : تي من قالك هو يا بوي ؟ افرض حد تاني جاي لأكرم ولا خالد و قاصدهم
صلاح : هاك قلتها ، هو جاي لخالد .. شن معنى خلو فاتحة اكرم اتم و بدو فيها بالرصاص قبل فاتحة خالد
محمد سكت
صلاح يكشخ : ان شاء الله يطلع هو بس !! الحوش معاش يعتبه
محمد تعفلق : نهاره احرف كان هذا .. يحشم فينا قدام الناس يحسابنا نلعبو شرطة و خنابة
صلاح متعفلق : اخطم على امك جيبها
محمد : فوتها توا معاها خالاتي اكيد بيلصقو فيها
صلاح يكشخ : اخطم عليها و مادخلناش ف الباقي اللي عندها راجل يجيها
محمد : امالا كلمها و قلها تطلع تعرف تشحويرها
صلاح فتح تليفونه يتصل بفايزة ....
فايزة ردت : ايوا صلاح
صلاح : اطلعي حني وصلنا
فايزة : قصدك بنروح ؟ السهرية مازال مابدتش
صلاح يكشخ : اما سهرية و ولدك باعت مردف يبو يقتلو خالد
فايزة تلخبطت قدام النساوين و ناضت تتكلم بعيد
صلاح : هيا اطلعي
فايزة : باهي امالا خلي نقول لخواتي ينوضو
صلاح يكشخ : لا خواتك لا بناتك تطلعي بروحك ، و مانبيش نشوف وحدة معاك شن قالولك جايبهم و ناسيهم !!
فايزة : ماهو ...
قاطعها صلاح : اللي عندها تريس يجيها مانيش سواق بوهم
فايزة خافت : باهي حاضر
_____________________
07:30 م
ريحان وقفت : اني بنروح مانقدرش نعطل اكتر من هكي
وفاء وقفت : باهي من بيوصلك
ريحان تلبس ف وشاحها : تو نمشي جري جري
وفاء طلعت تسقد فيها : و اني بنركب لحوشي لين تجي ماما فايزة وخلاص ، نخاف نقعد بروحي
ريحان : لو اتصلت بيك فرح قوليلها تكلمني ولو سمعتي بأي حاجة قوليلي
وفاء : بإذن الله
ريحان : هي باي
وفاء تسكر الباب : سلامات ... ( و خشت تجري للحوش )
___________________
خالد مع اكرم ف السيارة مروحين
اكرم : احمد ربي ان ما مات حد و انت تخمملي ف الفاتحة
خالد متعفلق : نبي نعرف مني اللي دار هكي ضروري نوصل فيه
اكرم : بوي قال ممكن مخانب منقزين ، لوح عليك المشاكل و خلي العرس يمشي على خير
خالد سكت
اكرم : و انت عرسك مازال عليه ثلاثة شهور خليها الفاتحة ف العرس و خلاص مافرقتش
خالد دمه فاير : اني مانبيش نطول بيها لازم نعلق على فرح
اكرم شبحله : شني ؟؟ شن تعلق على فرح ؟
خالد : شي شي اوقفلي بننزل
اكرم : شكلها البنت ماتبيكش
خالد يعيط : فرح تبيني و تحبني زي ما اني نبيها و هيا اسكت معاش تزيد تفصلني
اكرم : معاش تكذب على روحك يا خالد اني كنت حاس بيها لكن توا تأكدت من كلامك
خالد يعيط : نزلني يا اكرم
اكرم وقف السيارة : برا كمل على رجليك
نزل خالد متغلل و متعفلق
( اكرم طلع بالسيارة و كمل طريقه لحوشهم )
___________________
08:00 م
خش صلاح للحوش يعيط : عمرررر
فايزة : بالشوية ياحاج
صلاح يكشخ : انتي اسكتي مانبيش نسمع حسك
محمد ساكت
صلاح يعيط : عمرررر ؟؟؟
سمعاته وفاء نزلت تجري
محمد ينادي : فرح ؟؟؟
فايزة ساكتة
وفاء : جيتو ؟؟ كيف كانت الفاتحة
صلاح عاقد حواجبه : وين عمر ؟
وفاء خافت : مانعرفش
محمد : وين فرح ؟
وفاء تلخبطت : مش ف حوش عمكم ؟
فايزة استغربت : ماهو خليناها هني
محمد و صلاح يشبحولها
وفاء ترعش : عمر رفعها من الظهر ، قالت بتطلع هي وياه و بعدين بتلحقكم
محمد : و علاش مامشيتيش معاهم ؟؟
وفاء : اها ؟ ماهو جتني المرأة
محمد : اما مراة ؟
وفاء فنصت فيه بمعنى اسكت قدام بوك
صلاح ساكت
محمد قرب من وفاء و وشوشها : اما مراة ؟؟
وفاء توشوش : متع الحلوى
محمد شبح لأمه : متأكدة فرح ماجتش يا امي
فايزة خافت : ايه ماجتش و هيا ماترعشونيش تربحو
صلاح : ترا اتصل بيها يا محمد
محمد فتح تليفونه يتصل بفرح ...
وفاء ترعش خايفة
محمد : خارج الخدمة
فايزة بدت تبكي : حيييي علياااا .. كان مادارو حادث و ماتو يا صلاح !!
صلاح : شنو ؟
محمد : معاش تفاولي يا امي
وفاء : بعيد السو عليهم
فايزة تبكي : دبرو كيف توصلو فيهم يا محمد
محمد : تو نتصل بِ عز الدين بالك كلمه
صلاح : عندك رقمه ؟
محمد : تو نشوفه ممكن مخزن
و فتح تليفونه يتصل ....
عزو فتح الخط : الو
محمد : السلام عليكم
عزو : و عليكم السلام ، من معاي ؟
محمد : اني محمد خو عمر
عزو : اه اهلين
محمد : ماكلمكش عمر ؟ نتصل بيه مازال ماحصلتاش
عزو تلخبط : لا والله ماكلمنيش
محمد انشغل و خاف : استغفر الله العظيم زعما وين مشي
عزو : ان شاء الله خير ، اني تو نشوف الشباب لو تلاقى معاهم
محمد : به و بالله عليك كلمني لو سمعت عليه حاجة
عزو : حاضر بإذن الله
محمد : صحيت بارك الله فيك ( و سكر الخط )
صلاح : شن قالك ؟
محمد : مايندريش عليه
فايزة قعمزت تبكي : اطلع و دور على خوتك يامحمد ... اكيد صايرة معاهم حاجة
وفاء قربت منها : اهدي يا ماما اكيد مافيهم شي
صلاح قعمز يخمم
محمد سكت
وفاء فتحت تليفونها و بعتت مسج لعمر ( اعطي علم لِـ اماليك من بكري يدورو فيكم )
فايزة تبكي : اه يابنيتي وينك
وفاء شبحت لمحمد : كيف كانت الفاتحة
محمد شبحلها و تعفلق تاني : الكلب بعت مردف يصلو ف الرصاص و ماصارش منها
وفاء تفاجأت : شنووو ؟؟
صلاح : تو نوريه المسخ يا اني يا هو .. غر يروح بس
وفاء : قصدك فاتحة فرح ماصارش منها ؟؟
محمد : ماصارش منها ، العرس تفركس و الشيخ هرب و الناس روحو
وفاء فرحت و ضحكت
صلاح فنص فيها : خيرك تضحكي ؟
وفاء خافت : لا مانضحكش تفاجأت بس .. خسااااارة 🌚
محمد ساكت و حامق من خوه
فايزة تبكي : هادي نية بنتي .. من الاول مش راضية و انت اللي فرضت عليها ياصلاح
صلاح ساكت
فايزة تبكي : اه يابنيتي وينك .. كان ما مُتي قبل ماتسمعي الخبر
وصل مسج لمحمد من عمر 📩
وفاء لما سمعت المسج غمضت عيونها
محمد فتحه ( اني و فرح في تونس و اعلى مافي خيلكم اركبوه )
محمد قري المسج تفاجأ ؛ سخن و وقف يعيط : حييي على امه الكلللب
صلاح انخلع : خيرك
فايزة شبحتله : شن فيه ؟؟؟
محمد : عمر هرّب فرح لتونس
صلاح انصدم : شنوووو
فايزة فرحت : يانهاري مبروووك الحمد لله ياربي
صلاح يكشخ : الله يرزيني فيه هالبلوة بيجيبلي الجلطة ف عقاب عمري
محمد متعفلق : شن بنقولو للناس بس ... و يتصل بعمر ..
وفاء شادة ضحكتها
فايزة : الحمد لله ياربي الحمد لله اللي نفدتي بجلدك يابنيتي .. ديما النية الصافية تغلب
محمد متعفلق : مايردش الكلللب
صلاح حامق : لازم يروح بيها خير مانلحقه
محمد كيف طالع من الحوش ..
وفاء شبحتله : وين يامحمد
محمد : بنجيب ولدك وين بنطير يعني ؟ ..
( و طلع و قربع الباب )
صلاح ضغطه راكب ؛ يفتح ف بطمة سوريته : بنقتله الكلب .. غر نشوفه بس
وفاء قربت منه تنحيله ف زبون البدلة : هدي روحك يا بابا ماتزعلش ، المهم طلعو مافيهم شي و اتطمنا عليهم
صلاح متغلل : اسكتي يا وفاء ماتحرقيليش دمي
وفاء : تو نديرلك ليمونادا تروقك
( خشت للمطبخ تضحك ، و فتحت تليفونها تتصل بريحان )
___________________
وليد و هيثم ف حوش عز الدين
عزو : شن حاس روحك توا
هيثم متكّي : ع الكيف
وليد ضحك
عزو : ابصر شن صار مع عمر
وليد شبحله : ماكلمكش ؟
عزو : لالا
هيثم ساكت
وليد شرين تليفونه لقاها وصال ..
فتح الخط : ايوا
وصال : ماتقوليش وينك نتصل بيك من الظهر تسكر عليا ؟
وليد : شوية و مروح تو نحكيلك
وصال : علاش شن صار
وليد : هي تشاو .. ( و سكر الخط )
وصال تكنطت : مفلحه ف هالحركة
عزو شرين تليفونه لقاه رقم من تونس : هذا اكيد عمر
وليد و هيثم شبحوله
هيثم : ماتدويله شي عليا
عزو : عارف ايه
و فتح الخط : ايوه
عمر : الو
عزو : الحمد لله ع السلامة
عمر واقف ف البلكونة : اه عزو الله يسلمك ، طمني شن صار
عزو فتح السبيكر : شن تتوقع انت ؟
عمر : تي قول يا راجل ماتشحطنيش
( فرح جت من وراه و هو مايندريش ، تسمع ف صوت عزو واضح من التليفون )
عزو يضحك : خششناها بعضها و هربنا الشيخ
( فرح تفاجأت و فنصت مركزة مع الكلام )
عمر فرح و ضحك : والله الا عارفكم تريس و اتديروها يا هكي الصحبة يا بلاش
وليد علّا صوته : مش وليد اللي ينغلب و مايوفيش بوعده
( فرح سمعت صوته قلبها دق بسرعة و خنقتها العبرة )
عمر : والله الا حبي راك يا ويلّا
وليد : نشوفوك على خير ان شاء الله
( فرح عيونها دمعو )
عمر : ان شاء الله ، سلملي على هيثم و قوله منور والله ماننساهالك
هيثم علّا صوته : النور نورك عمور ، نبو خدمة زي هادي حني
عمر ضحك : والله عجز اللسان عن الشكر .. تريس و ينشَد بيكم الظهر
عزو : امتى متوكلين لتركيا ؟
وليد سكت
عمر : الصبح بكري ان شاء الله مع السبعة
عزو : توصلو بالسلامة
عمر : الله يسلمك .. نتلاقو ع الخير
ردو عليه : ان شاء الله
سكر عمر الخط و تلفت
لقي فرح وراه ؛ تفاجأ : فرح !
فرح عيونها مدمعات : اللي سمعته حق ولا نحلم ؟
عمر ضحك
فرح ضبطاته و تبكي : مش مصدقة مش مصدقة ياعمر .. الحمد لله افتكيت من خالد
عمر مضبطتها : مبروك
فرح تبكي : مش عارفة كيف بنشكرك والله ماعارفة
عمر : المفروض تشكري وليد مش اني
فرح سكتت و شبحتله
عمر : اتصلي بيه و اشكريه ع اللي داره ، لان لولاه راهو تمت الفاتحة و لقينا روحنا نفكرو ف الطلاق
فرح دموعها ينزلو لا إراديا
عمر يشوفلها : باهي شن رايك نطلعو و نغيرو جونا ؟؟ الخبر الحلو هذا يبي احتفالية
فرح ضحكت : ايه ياريت
عمر : هي وتي روحك و انزلي ، تلقيني لوطا نراجي فيك
فرح تمسح ف دموعها : به
____________________
وليد ساكت و سارح يفكر ف فرح
عزو شبحله : وين وصلت
وليد شبحله و وقف
عزو : وين ؟
وليد : بنروح هو هداكا
هيثم ناض و وقف : حطني ف طريقك
عزو شده : وين طالع والله ماصارت
هيثم : بنروح وين طالع يعني
وليد : اقعد ارتاح الليلة و غدوا روح
هيثم : لالا نرتاح ف فراشي بس
عزو : والله مايصير هكي
هيثم : منور هلبا عزو .. بارك الله فيك
عزو : و فيك بارك الله
وليد : موقفكم معاي اليوم مستحيل ننساه و مهما نشكركم شوية فيكم
عزو : شكر شني ياراجل بلا طروح
هيثم ضحك و سكت
وليد شبحله : والله متحشم منك هلبااا يا هيما مش قادر نحط عيني ف عينك
هيثم : ماتخافش جايك الدور
عزو شبحله : كيف ؟
وليد : روحي ترخصلك
هيثم : ليا عندك موضوع
وليد : اتدلل يا هيما و ماتخممش
هيثم : فوتلي هاليومين نرتاح فيهم و نقولك
عزو : شن صاير معاك ؟؟
وليد : شن فيه ؟ ان شاء الله خير ؟
هيثم ضحك : خيرك خفت ؟ مافيه شي اتطمن
وليد سكت
هيثم : شوفلنا الطريق يا عزو
عزو : والله مايصير هكي ، نفضيلك فراشي ياهيثم و ترتاح فيه
هيثم : اصلي والله منور
وليد : هيا شوفلنا الطريق يا عز الدين
( و طلعو من الحوش )
_______________________
09:30 م
خش وليد للحوش ينحي ف سبيدروه
جاته وصال توشوش : وينك لتوااا
وليد : كان يوم طويل
وصال استغربت : كيف طويل ؟
وليد : اني جعان بري حطيلي ناكل
وصال تشوفله و مستغربة فيه .. تقول ف عقلها ( خيره جوه مليح !! الصبح ماكانش هكي !!! )
وليد : نكلم فيك خيرك متنحة ؟
وصال : اها ؟ باهي حاضر
وليد خش لداره ..
وصال لحقاته : حقا شن اللي صار ؟ امبكري قلتلي تو نحكيلك
وليد : حطيلي عشاي ف المطبخ و تو نجي نحكيلك
وصال : به ... ( و مشت للمطبخ )
___________________
محمد خش للحوش و شاد سند
صلاح مازال حامق : اتصل بيه و قوله يروح خير مانمشيله غدوا يا محمد
محمد مد سند لوفاء : اركبي انتي
وفاء خدت ولدها و ركبت ..
صلاح يكشخ : سمعتني شن قتلك ؟؟
محمد : ايه سمعتك يا بوي حاضر .. غر انت ماتدوي شي قدام حوش عمي خير مايسمعو العيلة و يشهدرو بينا قدام الناس
صلاح متعفلق : الله يرزيني فيه هالكلب .. يضحك عليا الناس المسخ ؟؟ يلعب بالرصاص !!
خبط ايديه على بعض : غر نشوفه بس ؛ بنفرمه فرم
( محمد ركب لحوشه و ماقالش ولا كلمة )
فايزة : نوض ارتاح ف فراشك يا حاج
صلاح شبحلها : و انتي فرحانة توااا !! من زيك عاااد ؟! تقولي من يضغضغ فيك
فايزة : اني مش راضية من لما عرفت بفرح ماتبيش و خلاص انهيه موضوع خالد
صلاح يكشخ و يحرك ف صبعه : تروح من هني بندير العرس على طول و بنفتك من وجاع الراس
فايزة تعصبت : والله ما صارت
صلاح فنص فيها : بالك بتكسري كلمتي ؟!
فايزة : الا بنتي ايوه ، اني معاش قادرة نتحمل فيها اكثر .. نراجيها لين تموت باش انت ترضى ؟؟
صلاح يشوفلها و عاقد حواجبه
فايزة : تبي اتطلقني يا صلاح ؟؟ اني مستعدة نتطلق باش بنتي تكون متهنية عادي ، و مستعدة نعطيها روحي و نموت ف مكانها الف موتة باش هي مايصيرلها شي
صلاح وقف ، ضرب الطاولة برجله و ركب لداره
( فايزة تشوفله و قلبها يدق خايفة )
________________________
علي : الله غالب ربك مش رايد اليوم
سمية : ياحشمتنا قدام الناس يا علي
علي : اسكتي و معاش تدوي هكي ، بري خشي للنساوين و معاش توضحيلهم انك راعشة خلي العرس يمشي على خير
سمية سكتت
علي : الفاتحة نديروها ف العرس عادي مفيش فرق
سمية : على قولتك ، المهم ماصارلهم شي و روحولي هما الزوز لا سو لا سوية
علي : فايزة قاعدة هني ؟
سمية : لالا روح بيها صلاح من بكري
علي : كان ماحرجوا ؛ حتى هو روح و ماقال شي
سمية : ان شاء الله يتملي هالعرس على خير ، والله من اللي سمعت و قلبي على نار
_______________________
وصال شهقت : هييييييه ... قصدك قلبت الفاتحة ؟
وليد ياكل : اييييه
وصال ضحكت و ضبطاته : والله ماك عادي بكل ، يافرحتها
وليد : كلامك متع الصبح هو اللي خلاني نتحرك ، كان هدا لا مشيت لا درت حاجة
وصال فرحانة : الحمد لله ، طلعت فيا فايدة
وليد ضحك
وصال : باهي اللي مانصابش حد منكم كان هدا انفضحتوا
وليد ياكل : هيثم انصاب مسكين
وصال انصدمت و قلبها دق بسرعة : شنووووو
وليد شبحلها : جاته ف الريش
وصال عيونها تعبو دموع و ترعش : ك ك كيف ؟؟
وليد يشوفلها
وصال ترعش : كيف جاته ف الريش
وليد : جت ف ايده و مشينا لحوش عز الدين نحاهاله جارهم و روحت بيه
وصال تشوفله و ترعش
وليد مستغرب : خيرك تخزرطتي ؟
وصال ضبطاته تاني : الحمد لله على سلامتك قريب مشيت فيها
وليد : اهو ماصارلي شي الحمد لله
وصال خشت تجري لدارها
سكرت الباب و فتحت تليفونها تتصل بهيثم ...
( هيثم شاف تليفونه لقاها وصال ، ماباش يرد لأن بحداه عيلته لايدين بيه )
وصال تبكي : وينك ماتردش !!! .. و عاودت تتصل تاني ...
هيثم شاف التليفون ؛ سكر عليها
وصال ترعش و تبكي : علاش ماتردش ياهيثم وينك !!
( شرين تليفونها لقتها ريحان تتصل )
فتحت الخط : الو
ريحان تصيح : سمعتي شن صاااار ؟؟
وصال تبكي : سمعت
ريحان تضحك : من قالك ؟
وصال : وليد و صحابه هما اللي مشو و هكي دارو
ريحان تضحك : هههههههه صحة ليهم
وصال تبكي
ريحان حست بيها : خيرك ؟
وصال تبكي : هيثم جت فيه رصاصة يا ريحان
ريحان انخلعت : اهااا ؟؟ وين جاته !!
وصال : ف ايده
ريحان : الحمد لله على سلامته
وصال مازال تبكي
ريحان : باهي اللي جت ف ايده مش ف صدره كان هدا ايبس ف مكانه
وصال عيطت عليها : معاش تفاولي عليه
ريحان : باهي شن قلت اني
وصال تبكي : نتصل بيه مايردش يا ريحان .. زعما شن صاير فيه
ريحان : اصبري شوية بالك معاه امه و بوه ولا خوته
وصال سكتت و تبكي بلا صوت
ريحان : الحمد لله ان الفاتحة ماصارش منها و الله فرحت هلبا ، كان ماما مش ف العدة و عندنا الماشي و الجاي راهو قلبت الدنيا زغاريط
وصال مازال تبكي
ريحان ضحكت : خلاص عاد ، اكيد حاله كويس و روح للحوش كان هدا خوك مايخليشي
وصال : ايه قالي روح
ريحان : خلاص امالا ، بري اغسلي وجهك و راجيه لين هو يكلمك خير مايزبطك خوك و تبدا ليلتك جميلة جداً
وصال : باهي
ريحان : هي سلام
(سكرت وصال الخط )
_____________________
12:00 ص
فرح راقدة ف فراشها ؛ شادة تليفونها و فاتحة على رقم وليد ع الفايبر ، مترددة تتصل ولا لا
وليد مقعمز ف الجنان و يدخن ؛ شاف لتليفونه يشرين ؛ لقاه مكتوب فروحتي ، قلبه دق بسرعة
طفي دخانه و فتح الخط : الو
فرح مترددة : وليد
وليد سكت
فرح عيونها مدمعات : شكرًا هلبا ع اللي درته اليوم
وليد تنهد : اني لما نوعد نوفي ، و لما نعطي كلمة نكون قدها مش زي هلبا ناس
فرح بدت تبكي
وليد سكر عيونه و سكت ( مازال واجعه خاطره منها )
فرح سكتت
وليد : ربي يوفقك ف حياتك الجديدة
فرح انصدمت : شنو ؟
وليد : انتي سافرتي و موضوع ولد عمك فركسناه ، ربي يسهلك ف تركيا و تشوفي حياتك
فرح شدت بكيتها : وانت ؟؟
وليد : و اني تو نحاول نتأقلم مع وضعي الجديد
فرح مصدومة : وليد كيف تقولي كلام زي هذا ؟
وليد : موضوعنا انتهي من يوم مابيتيش تنزليلي يافرح ، و حتى لما مشيت و طلبتك من بوك ردني بإهانة ياريت حتى بأسلوب لبق .. يعني حني مستحيل نكونو لبعض لاني مش من المستوى اللي يبيه بوك
فرح تبكي : اني مش حاناخد حد غيرك ولا نقدر نحب غيرك
وليد : تو تلقي غيري و تنسيني ، ماك طلعتي مش واثقة فيا اول مابعتولك سكرينات مزيفة ، و اتصلتي تهزبي بدون ما تتأكدي
فرح : الغيرة عمتلي عيوني
وليد سكت
فرح مازال تبكي
وليد : تو تتعودي ع الوضع الجديد و تتأقلمي
فرح علت صوتها : يعني انت تقدر تنساني ياوليد ؟
وليد يغيظ فيها : مرات
فرح تعصبت : لا يا وليد انت متاعي اني و بس و لو تاخد وحدة تانية نقتلها و نقتل روحي
وليد ضحك : هيا بطلي عاد
فرح مازال تبكي
وليد : ياسر من الدموع ، مازال مايبوش يجفو ؟
فرح تبكي
خش عليها عمر : خيرك تبكي ؟
فرح سكرت الخط و شبحتله : نبي نروح لِـ ليبيا
( وليد سكر تليفونه ، و ولع دخانه )
عمر ضحك : تبيهم يزوجوكم هاليومين مع اكرم امالا
فرح تبكي
عمر قرب منها : ياسري يا فرح واصبري شوية ، الصبر مفتاح الفرج
فرح تنهدت : يااارب صبرني
عمر : حني مش حانروحو لين موضوع خالد يلتقاله حل و ينتهي بكل
فرح هزت راسها : ان شاء الله
_______________
فتحية طلعت للجنان : وليد ؟
وليد شبحلها : نعم يام
فتحية : نوض ارتاح و ياسرك من التعب و السهور
وليد طفي دخانه : حاضر اهو نايض
فتحية تشوفله : شن حالك ؟
وليد استغرب : كويس ، شوفت عينك
فتحية : لا يا وليدي قصدي شن حالك من داخلك
وليد ابتسم : الحمد لله
فتحية : والله كان تسمع كلامي يا ولدي و ادير اللي نبيه
وليد علّا صوته : هيا فكينا منها السيرة هادي .. ولا تبينا نتزاعلو ؟
فتحية : باهي حاضر
باسها وليد من راسها و خش هو وياها
_____________________
وصال متكية ف سريرها و تخمم ف هيثم
خش هيثم لداره و قعمز ع السرير ، فتح تليفونه و اتصل بيها
فتحت وصال الخط بسرعة : وينك ؟؟
هيثم : قاعد
وصال بدت تبكي
هيثم استغرب : خيرك ؟ شن فيه !
وصال : خفت علييك 😢
هيثم ضحك : ماتخافيش ، اني كويس الحمد لله
وصال : الحمد لله على سلامتك
هيثم : الله يسلمك
وصال : كيف حاله الجرح ؟
هيثم اتكّا ف فراشه : باهي ، نحس ف وجاع لكن على خاطر الويلّا كله يهون
وصال مازال تبكي
هيثم : لــ هالدرجة نهمك و خايفة عليا ؟
وصال شدت بكيتها : كان مانخافش عليك على من بنخاف ؟
هيثم سكت و تفاجأ
وصال : لما وليد قالي قريب متت من الخوف
هيثم : بعيد السو عليك ياعمري
وصال سكتت و قلبها دق بسرعة
هيثم : اهدي و ارخي روحك
وصال سكتت
هيثم : وصال ؟
وصال : نعم
هيثم : نبي نتلاقى معاك
وصال تلخبطت : كيف ؟
هيثم : مش عارف كيف ، نفوت غدوا و نقولك كيف
وصال مترددة
هيثم : وصال ؟
وصال : نعم هيما ( زلقت ف الدوة )
هيثم ضحك
وصال تحشمت
هيثم : عاوديها
وصال ضحكت
هيثم : قتلك عاوديها
وصال متحشمة : انت لازم ترتاح و ترقد توا مش لازم تسهر
هيثم ضحك : اهربي به
وصال ضحكت
هيثم : تو نكلمك الصبح اول مانوض
وصال : اوكى ، تصبح على الف خير
هيثم : و انتي بخير يا نور عيني
وصال قلبها يدق : باي ... ( و سكرت الخط )
( هيثم سكر تليفونه و غمض عيونه )
وصال فتحت على رقم انتصار بنت خالتها و اتصلت بيها ...
____________________
10:00 ص
( وصلو فرح و عمر لتركيا ، خدو تاكسي و مشو لحوش خوهم محمد )
__________
صلاح مقعمز ع الفطور مع العيلة و يخمم
فايزة : اني تو نقول مشت مع خوها باش تشري بتاتها و خلاص
وفاء : ايه يا ماما احسن حاجة ممكن تقوليها لان كلهم حايزبطو بعدين
محمد ساكت
صلاح ناض و طلع من الحوش
وفاء شبحت لمحمد : محمد !
محمد شبحلها
وفاء : باش ترفعني للمزين بعدين ، عندنا النجمة اليوم
محمد يشبحلها هي و فايزة : جوكم مليح انتو ؟ ماكأناش صايرة حاجة !
فايزة ضحكت
_______________
هيثم راقد ف فراشه ، سمع تليفونه يشرين
فتح عين وحدة يشوف من اللي يتصل لقاها وصال
ابتسم و فتح الخط : الو
وصال : صباح النور
هيثم : صباح العسل
وصال ضحكت و تحشمت
هيثم : وين النشاط هذا كله
وصال : نايضة من بكري ، غير مابيتش انوضك قلت اكيد تبي ترتاح
هيثم يتكسل : ساعة قداش توا ؟
وصال : قريب الحداش
هيثم يتألم من ايده : خداني النوم مفروض نايض من بكري
وصال : كيف حال ايدك اليوم
هيثم : باهي نحس فيها احسن
وصال : المفروض تمشي تكشف ع الجرح ماتهملاش
هيثم : اكيد ايه ، تو نمشي بعد الظهر
وصال : باهي كويس
هيثم : ...
____________________
بعد مرور يومان 🌹
01:30 ص
وفاء واقفة ع المرآية تفك ف التسريحة
محمد : كيف كان جو العرس
وفاء : مش عادي
محمد : ليك هلبا ع الأعراس عاد اكيد هيجتي
وفاء شبحتله : لا وين نهيج ؟ برستيجي مايسمحليش
محمد ضحك : مش منك عاد ، من القفطان اللي لابستيه يا برنسيستي
وفاء : تعرف لفتت النظر ف الصالة ، لما نخطم كلهم يشوفولي و اللي ماتعرفنيش تسأل ف امك عليا
محمد : و انتي عاد يا ارض اشتدي ما حدا قدي
وفاء ضحكت و خشت للحمام
محمد سكت و فتح تليفونه ع النت
( فجأة تليفون وفاء شرين ع الفايبر )
محمد شبحله و شافه ؛ لقاها فرح تفاجأ
فتح الخط بسرعة و ماقالش ولا كلمة
فرح : الو وفاء ؟
محمد ساكت
فرح : وين حاطة الحديد البخاري مالقيناشي اني و عمر
محمد تعفلق ، سكر عليها الخط و فتح ع المحادثة .. لقي كلامهم و عرف انهم متفاهمين ع السفر و وفاء عندها علم
قعد ينادي : وفاااااااء
وفاء من الحمام : دقيقة بس
محمد متعفلق : تعالي توااا
وفاء بهد شوية طلعت : نعم
محمد يتكلم مسكر سنونه : فرح و عمر ف تركيا و ماتقوليش ؟؟
وفاء خافت : امتى صار ؟؟
محمد حامق : ماتحاوليش تنكري يا وفااء
وفاء خايفة ترعش
محمد يعيط : كيف اتدسي عليا ؟؟ كيييييف !!!
وفاء خايفة تبكي : باهي بالشوية
( سند ناض من نومه يبكي )
محمد : وفااااء !! ماتخلينيش نفقد اعصابي و ندير شي مايعجبكش تكلللمي
وفاء ترعش و تبكي : سمعت بعمر بيهربها اعطيته مفتاح حوشنا اللي غادي يقعدو
محمد دمه فار : و انتي شن ليك علاااقة ؟؟ هي اختك ولا اختي ؟؟
وفاء سكتت
محمد : كيف تخليه يهربها و عرسها قريب كيييف ؟؟؟؟
وفاء : ماهو ...
قاطعها محمد : معناها عندك علم باللي داره ف الفاتحة و ساكتة على اساس ماتندريش ؟؟
وفاء : لا والله لا و حتى عمر مايندريش و مش هو اللي دار هكي
محمد متعفلق : يلعن **** انتي شن ليك علاقة ؟؟؟ شن دخلك ؟؟؟؟!!!
وفاء : ماهو لو تعرف بخالد شن مداير لأختك راهو انت اللي هربتها
محمد فنص فيها : شنو ؟؟
وفاء : ........
______________________
صلاح متكي ف فراشه : ماكلمتكش بنتك ؟
فايزة : كلمني عمر الصبح و قال حالهم باهي
صلاح : اهو عرس اكرم تَم و بنفضى بيهم
فايزة سكتت
صلاح : غدوا بنحجز طيارة و بنمشيلهم ف تونس بندورهم مكان مكان
فايزة ضحكت ، غطت كتفها و رقدت
_____________________
محمد نزل من حوشه منزل دبوس ؛ والع هلبا و مايشوف في شي قدامه .. ولع سيارته و طار بيها لخالد
بعد خمسة دقايق وصل لحوش عمه
نزل من سيارته و اتصل بخالد ...
خالد فتح الخط : ايوا محمد
محمد : انزلي اني لوطا
خالد : ان شاء الله خير
محمد حامق : خير خير .. غر انزل
خالد : ماشي اوكى .. و سكر الخط
محمد ينتش ف لسانه من الغل : انزلي ياكلب انزل
بعد شوية خالد فتح الحوش و طلع
محمد قرب منه و ضربه براسه على خشمه
خالد داخ : خيرك ؟
محمد ضربه بوكس طيحه و بدي يضرب فيه بالدبوس : يا كلب يا حيوواااان ... يا ****
خالد وجهه دم : خيرك شن فيه ؟؟
محمد متعفلق : تمس اختي يا **** ؟؟؟ روحك زنت و تبي تموت ؟؟ (( و وقف يضرب فيه على جنابه تيروات و يضرب فيه بالدبوس ف كل مكان ف جسمه ))
خالد طايح يتألم و ساكت
محمد يضرب فيه : و تبي تتزوجها يا ***** اها ؟؟؟ يلعن ***** (( و ضربه على راسه بالقوة ))
خالد فقد الوعي و راسه كله دم
طلعو الجيران يجرو : ان شاء الله خير ؟؟ شن فيه ؟؟
طلع علي يجري : شن فيه خيركم ؟؟
شاف خالد طايح رعش : بسم الله الرحمن الرحيم
شبح لمحمد : خيركم يامحمد شن جاكم ؟؟ علاش ضربته
محمد والع : اسأل ولدك الكلب الحرايمي
علي متحشم قدام الجيران و متفركس : شن تقول يا محمد ؟؟ اني مش فاهم شي
محمد : البنت و عندنا و اخر مايفكر انه ياخدها
علي راعش واقف على ولده و يكلم فيه : خالد ؟؟؟ خالد !!!
محمد ركب سيارته و طلع بيها يجري 🔥
( الجيران يتفرجو )
علي يعيط : تتفرجوا عليه ؟؟ ركبوه معاي للسيارة
_________________
08:00 ص
فايزة : خليته ف العناية يامحمد ؟؟؟
محمد حامق : ان شاء الله يموت الكلب .. المفروض ضربته بالمقرون ف راسه مش عارف كيف ماخطرش عليا
صلاح مصدوم : متأكد يا محمد هكي دار ؟؟
محمد متعفلق : انت مسافر و ماتندريش على صغارك شن صاير معاهم
فايزة تبكي : هذا المفروض تقتلوه تقتلوووه
وفاء ساكتة
صلاح : خوتك ماقالوليش ف وقتها
محمد : ماهو عمر قالك و ماصدقتاش ؟؟ ولا توا بتطلع روحك برئ
صلاح ساكت و مصدوم
محمد شبح لوفاء : وتي الشناطي و توا بنطلع نحجز لتركيا ، فرح مش حاتروح و اني اللي بنخيلها عندي
صلاح طلع من الحوش حامق و ماشي لخوه علي
________________
يـتـبـــع ... 💗
Masarra Osama ✨