روايــة #أصحاب_ونسايب
حــــلْـــــقـــةٌ إضَــــــــافــيــــةٌ 🌸
إسراء متحشمة : الحمد لله
خواته الزوز يتفرجو عليها 😒 و لما وصلت فيهم ناضو يسلمو .....
___________
وليد ف المحل يتعارك مع زبونة : يا اختي رابع مرة نقولك ماعندناش بدلة زي هادي ف المحل
الزبونة بتنصب عليهم : اني الصبح خديتها منكم ب300 و توا نبي نرجعها
وليد : البدلة هادي اول مرة نشوفها و تقوليلي ب300 !!
الزبونة : شني يعني نكذب ؟؟
وليد : لا اني اللي نكذب !! البدلة اللي جايبتيها مش شاريتها من عندنا شكلك غالطة ف المحل يا اما تفضلي طلعيلي وحدة زيها
الزبونة تلخبطت : لا مش غالطة و مش انت اللي بعتهالي الولد اللي معاك
وليد تلفت لمحمود : انت بايعهالها الصبح ؟
محمود : لالا اصلاً ماريتهاش بكل الزبونة اهيا الا توا ، وتلفت للزبونة : تكذبي عيني عينك !!
الزبونة تصيح : حسبي الله و نعم الوكيل فيكم
وليد تعفلق : ترا يا محمود رجع الكاميرا
محمود : هيا هي
الزبونة تعيط : تكّذبو ف الولاية يلي ماتتحشموش تبي تشوف الكاميرا !! ترضاها ف امك ولا اختك؟
وليد تكنطا : هي اطلعي من المحل معنديش وجيج للجو هوا
الزبونة طالعة : ان شاء الله ماتربحوا يا مخانب حسبي الله و نعم الوكيل فيكم
محمود : تطلعي ولا نحذفك باللي ف ايدي توا
الزبونة طلعت ..
وليد : شن هالشكالات الزفت و 300 ؟؟ نصب عيني عينك
محمود : كان زادت كلمتين راهو فكيتها ف وجهها
________
ساعة 10:30 م
خالد وصل للإستراحة بيزرد مع صحابه
خالد : شنو مكسدة الليلة امالا
علاء يشرب : ساعة تانية و يبدا الجو
خالد ضحك : اطلع طول
حمزة دايخ : جاي ايدك فاضية يامعلم ؟
خالد قعمز ع الكنبة : عابي عليك يا هومي
________
فرح متكية في سريرها فاتحة الفيس خشت عليها
فايزة : فرح ؟ خيرك رقدتي هني ؟ مش قلتلك ماتخشيش للدار
فرح تكح : علاش ! لقيتها مافيها شي
فايزة : قبل نبيك تباتي الليلة مع حناك لوطا باش حتى تزيد تتهوا الدار كويس
فرح : اهو قدامك مافيها شي ياسرها من امس تتهوا و انى تو نخلي الباب مفتوح لما بنرقد
فايزة مدتلها صونية فاكهة : ماترقديش لين تاكلي
فرح خدتها منها : باهي ....
________
وليد مقعمز يتعشىٰ مع امه و خواته
وليد : اني تو نسأل عليهم العيلة في شارعهم و نسأل ع الولد وين مايخدم
فتحية : به و كان عجبوك تو نردو عليهم حتى بعد اسبوع باش يجي بوه يدوي معاك و مع عمك
وليد : ان شاء الله
فتحية : الباين انهم ناس بلاد ماشاء الله عليهم
وصال : امه زي العسل تنحط ع الجرح يبرا .. لكن خواته يالطيييييف كيف يفنصو شكلهم مسمومات
إسراء : مش مدورتهم المهم أمهم باهية
فتحية : سريوه سلم بنتي اسمعي كلامي ردي بالك تردي كلمة على امه ، حتى تشوفي الغلط ابلعيه و اسكتي .. واسمعي كلامها كله حاضر و نعم .. خليك فالحة و ناشطة و كل عشية ديري حاجة حلوة و نزليها .. وكان بتطيبي الغدي ف حوشك ذوقيها ولا اعزميها عندك و مرة مرة انزلي ضميلها و حوسي عليها ، مسكينة بناتها متزوجات قاعدة هي و العزارة اكيد تبي من يعاونها
إسراء تسمع ف امها و ساكتة
وصال شهقت : هييييي 😧 هي كنة ولا شغالة !
وتلفتت لإسراء تدويلها بصبعها : ماتسمعيش كلامها ؛ امك تبي اتطيحلك صحتك من صغرك .. هونا بناتها يديرو عليها بِ الدور انتي مادخلكش
فتحية كشخت عليها : نوضي من قدامي تحركي لسانك طوله عشرة ميترو مابعد اللي بيطيح فيك
وصال تاكل : مانيش نايضة جعانة
وليد يضحك : شعوبّا اعقل عاد
وصال : بكّل شي ينرفز ، جو كناين السبعينات انقرض راهو ، كناين توا يهتموا بروحهم و حياشهم و صغارهم و رجالتهم بس ، مش حتى حوش العيلة
إسراء تضحك : ألعبيلي بعقلي توا 😂 .. خليني مقتنعة بكلام امي خير
فتحية تنهدت : اييييه الله يرحم ايام كنت ساكنه مع المرحومة اللّاي .. مانخلي فيها تمس ف حاجة تطييب و ضمان و صابون كله بروحي و ماعمري جت بيني و بينها كلمة مع اني كنت نخدم و عندي وليد وقتها
وصال ضحكت : هذا علاش عماتي واخدين عليك الغلب و مقطرينلك التومة في عيونك 😂
فتحية : بتسكتي ولا انوضلك
إسراء و وليد يضحكو 😂
فتحية شبحت لوليد : غدوا نبيك ترفعني لحوش عمر صاحبك بنهوا على اخته
وليد : ان شاء الله
فتحية : والله وجعتني في وسط قليبي بنية زي الوردة المفتحة حست الموت ف صغرها
وليد سكت و اسراء تشوفله و مركزة معاه
وليد : يام مفكر نبدا نبني فوق
فتحية فرحت : الحمد لله طيب فيك
إسراء : شن طيب فيه حسستيني عمره أربعين
فتحية شبحت لوليد : قداش مازال ع الإفادة متعك ؟
وليد : الامتحانات النهائية الاسبوع الجاي و بالنسبة للإفادة مانعرفش بالك ثلاثة شهور تانيات على جوهم جماعة القسم مرات حتى ستة شهور
فتحية : باهي شن رايك نخطبلك و ندخلكم انت و اختك مع بعض
إسراء و وصال سكتو 😕
وليد : شن تخطبيلي و الشهادة مازال ماخديتهاش
وصال : شن اديريلهم مع بعضهم باش يطربقوهم بعين ؟؟!
فتحية ماردتش عليها و شبحت لوليد : عادي معش مازللها هلبا شهادتك و البنية قاعدة تقرا تكمل العام الجاي ، نخطبهالك مابين انت كملت البني
وليد شبحلها : من هي البنت ؟
فتحية مبتسمة : رنا بنت منصورة جارتنا ، ماشاء الله عليها نظافة و نشاطة و ادب
وصال : قصدك ام خشم مكعبر؟ لالا مش ماشية معاه
فتحية : انتي سكري فمك يابنت خيرلك
إسراء : خيرها والله الا قنينة ماشي حالها
وليد : لالا فيه وحدة ف بالي
إسراء نخصت وصال
فتحية : من هي ؟ بنت شكون ؟
وليد وقف : لما يجي الوقت تو تعرفيها مني .. وطلع من الدار
فتحية : غر تعالى نكلم فيك
إسراء : هرب 😂
وصال : زعما مني !
____
خش وليد لداره نحّا سوريته و تلوح على سريره فتح تليفونه و اتصل بفرح ..
فرح فتحت الخط : الو
وليد ابتسم : ياهلا
فرح : اهلين
وليد : كيف حالك توا ؟
فرح : بعد سمعت صوتك بديت احسن
وليد ضحك : الله ع الكلام محلاه
فرح ضحكت : نتعلم منك
وليد : كان ع الحال هذا حاتتعلمي هلبا .. من بكري نخمم شن صاير فيك
فرح : ماتخممش حالي احسن الحمد لله
وليد : الحمد لله
فرح : ماكنتش نتوقع انك حنون هلبا
وليد : شن تحسابيني مانحسش ؟
فرح تحشمت : لا مش قصدي .. لكن طبعك واعر و ديما متعفلق و وصال ديما تحكي عليك انك صعب معاهم
وليد يتقلب : فوتيها وصال توا .. فكينا من البصل و خلينا في العسل
فرح تحشمت وضحكت : .....
_________
إسراء تغسل ف اماعين العشي و معاها وصال
وصال : زعما من هي البنت اللي يحبها
إسراء : قصدك قاعدة تفكري انتي ! واضحة فرح مافيش غيرها
وصال : ماحسيتش عليهم
إسراء : ياغبو نسيتي امس شن دار على خاطرها لما مرضت ؟ كان مش منه راهي ماتت و ماتنسيش لما ضرب الولد اللي عاكسها
وصال ساكتة
إسراء : هذا من غير اللي امزط
وصال : ان شاء الله تطلع حق فرح ع الأقل صاحبتي و نعرفها و اهم حاجة قنينة
إسراء : الفايدة في اليدين مش ف الزين
وصال ضحكت بصوت عالي : ههههههه ومن امتى اليدين يهموك ؟ كانك عصبنتي معناها بديتي فالحة و شفتي روحك 😂
إسراء : خزي ياكلبة
وصال : تو نسأله امالا ، اكيد مش حيكذب عليا لو فيه حاجة بينهم
اسراء : لا هو من ناحية الصراحة صريح ، قوي قلبك و اسأليه
___________
عمر يتكلم ف التليفون : خلاص عاد سرورتي بلا نكد مش ناقص
سرور تبكي : انت معش تحبني زي زمان متغير عليا هلبا
عمر : كان قلتلك مش حانقدر ناخدلك ايفون نطلع متغير معااك ؟؟ مالياش سنة واخدلك واحد .. وكل حاجة تطلبيها تتوفر عندك ف اقل من يومين الزح
سرور : نبي اللي نزل الاخير
عمر : تِ ماعنديش حقه اصبري عليا شوية
سرور : تو على اساس ماتقدرش تشريه ، شن معنى فرح عندها منه !!
عمر : لا اله الا الله ، فرح واخدهولها بوي تبيني نقوله خود حتى لحبيبتي ؟
سرور : مالياش علاقة اني نبيه في عيد ميلادي و نبيك تغلفه ف مكتبة الوفاق
عمر : آآآه ياصبر أيوب
((( جُــــووعْ الْـعــيْــن أَاكْـــبـــرْر مِـــــنْ جُـــووعْ الْــمَـــعــــدَةٌ مَـــــهـْـــــما تَــــاكِـــــل مَــــا تِـــشْـــبَــــعْ )))
_______
بعد مرور أسبوعين 🌹
فرح عندها الحصة الاخيرة فاضية مقعمزة ف ساحة المدرسة مع ريحان و وصال
وصال : و اخيراً جت العطلة فدينا من القراية النهارات كبدي طابت
ريحان : بالعكس كساد
فرح : اسمعو راهو بنتلاقو ف العطلة مش كل وحدة تشد رجلها
وصال : هما أسبوعين حسستيني شهور
ريحان : اني عادي بابا مايقوليش لا ع الطلوع
فرح : و اني بابا و ماما غدوا ماشيين لألمانيا و بيقعدوا ثلاثة أسابيع بناخد راحتي 💪😌
ريحان : علاش بيمشوا
فرح : بابا بيدير تشِك اب
وصال : يابختك الحصار بينفك من عليك اقنعيلنا سي السيد يرخي الأولى
فرح ضحكت : حاضر
( طلعت ابلتهم الأحياء للساحة ماشية لسيارتها )
ريحان تشوفلها : الله يرزيها في هالعباية و هي عابدة امها صيف و شتي
وصال شبحتلها : ماتقوليش تاخد ف معاش الزفت حالة
فرح ضحكت : حرام عليكم ماتندروش على ضروف الناس
ريحان : و النبي اسكتي التليفون اللي عندها كان شرت بِ حقه حوايج تبدل بيهم خيرلها
وصال : ناخدولها عباية ف عيد المعلم ؟
فرح و ريحان ضحكو 😂
ريحان : انتو العباية و اني الكندرة ، كندرتها قريب تفتح فمها من التشليك
وصال : ايه عادي
فرح : بالك تبو تاخدو حتى وشاح !
وصال : لالا هلبا عليها
( الجرس ضرب 🔔 )
ريحان : اسمعو اني بنوقف توا و شوفوني باهي!
فرح و وصال : به
ريحان وقفت
وصال : حييي على امك 😵
فرح : قعمزي بسسسرعة 😦
ريحان خافت و تلفتتلهم : ووه عليا بالحق ؟؟؟؟
فرح و وصال طقو ايدهم و ضحكو 😂😂
ريحان ضحكت بصوت عالي : ياكلاااب 😂
___
درس وليد السيارة بعيد على باب المدرسة .. بخ من العطر متعه و لبس نظاراته ونزل وقف ف باب المدرسة يراجي ف وصال و فرح
بنات الثانوية كلهم يشوفوله وعيونهم قلوب
فرح و وصال لاهيين ياخدو في سيلفيات مع البنات لان اخر يوم امتحانات ..
ريحان جت عينها فيه : فرح ألحقي قبل ماياكلوه
فرح تلفتت : على مني تقصدي ؟
وصال شافاته : راجلك جي و يعرض ف روحه 😂
فرح شافاته لقاته متأنق .. عقدت حواجبها وتكنطت
ريحان : طالع صخصية 😂 ( شخصية )
فرح سلمت ع البنات و مشتله
وصال تسلم ع البنات وصلت ف ريحان : هي باي خلي نلحقها خير ماتولع فيه
ريحان تضحك : باي
فرح وقفت عليه : امتى جيت ؟
وليد : توا كيف وصلت
فرح قامت حاجبها : وعلاش نازل من السيارة يتهيألي نعرفو الطريق
وليد : مالقيتش وين ندرس درست بعيد قلت تو بتقعدو اتدورو
فرح : في اختراع اسمه تليفون ولا لازم تنزل و توري روحك
وليد ضحك : محلاك وانتي متعفلقة
فرح تلفتت اتدور ف وصال لقتها جاية : وينك انتي لتوا ؟؟
وصال : اهو جيت ، خيرك !
فرح : شي هي اطلعي ..
بقلم مسرة اسامة 🌹
___
قعدت فرح طول الطريق ساكتة و متكنطية ، وليد يناشب فيها من المرآية ماتبيش تعدل عليه
وصال : وليد حطني اني الاولى
وليد : بنحطك من غير ماتقولي
وصال ضحكت و تلفتت لفرح : خلاص عاد فكينا من النكد خلي الجو مليح
فرح : مليح اصلا
وصال : باهي بجوك زيدي اكذبي
درس وليد السيارة قدام الحوش و وصال نزلت
وليد يشوف لفرح من المرآية : تعالي القدام
فرح : مرتاحة هني
وليد : قلتلك تعالي اني
فرح : و اني قلتلك مرتاحة هني
وليد تلفتلها : بتجي بروحك و لا نتصرف ؟
فرح خافت ، نزلت و جت القدام
وليد ضحك : ناس ماتجيش الا بالعين الحمراء
( وطلع بالسيارة )
فرح : اهو جيت القدام هي شن الفرق توا ؟
وليد وقف السيارة ..
فرح : خيرك وقفت ؟
وليد شد ايدها و باسها
فرح قلبها دق
وليد يشوفلها : خليني نشبّع عيوني بِ شوفتك
فرح تلفتت للروشن : ياسر شبعتهم بِ بنات المدرسة 😒
وليد ضحك : نموت فيها الغيورة اني ياناس
فرح عيونها دمعو
وليد لفت وجهها ليه : علاش الدموع توا يا بيبي ؟
فرح تبكي : إنت قاصد انك تستفزني بالحركات هادي و اني مانتحملش
وليد : حركات شني ؟
فرح : مانسيتش البنت اللي خديت رقمها قدامي فِ الفورنو واليوم نازلي لبنات المدرسة ، والله اعلم ع الزبونات اللي يجوك ف المحل كيف شكلهم ،، و بنات اللغات خليهم بروحهم عاد
وليد : رقم شني ؟ ااه قصدك على حنان اللي تقرا معاي ؟ .. خديت منها الفيس متعها باش تبعتلي المحاضرات اللي ماحضرتهمش بس ، والله مارقمها واصلا البنت مخطوبة و خطيبها نعرفه
فرح سكتت 😒
وليد : تاريتك ياما شادة ف قلبك
فرح زعلانة ماتبيش ترد عليه
وليد يمسحلها ف دموعها : خلاص فروحتي مانتحملش نشوف دمعة وحدة نازلة على خدك
فرح نحت يده ومسحت دموعها بيدها و سكتت
وليد يشوفلها : اخر همي البنات عندي القمر هذا و نشوف لغيره ! تِ حتى عيب والله مافي وحدة تقدر تنافسك في جمالك بكل
فرح ضحكت و شبحتله : تنافسني ! تِ باهي باهي لخبطني توا
وليد ضحك : واخيراً ريت هالضحكة
فرح تشوف لعيونه و مبتسمة
وليد شد على ايدها : تحبيني بيبي
فرح قلبها يدق هزت راسها بمعنى اي
وليد : نبي نسمعها !
فرح متحشمة و مبتسمة : نحبك
وليد باس كف ايدها : اخيراً سمعتها .. ديما نتجدا و نعيط هدا وين حنيتي عليا و قلتيها
فرح ضحكت
وليد حط ايدها على خده : و اني نموت فيك يا عمري
فرح جبدت يدها : خلاص هيا نبي نروح
وليد : لازم تفسدي اللقطة ؟
فرح ضحكت : ياسرنا شوية تانية نلقو روحنا دايبين
وليد واسه تقعميزته : رسمي ، باهي اللي فيقتيني
طلع وليد بالسيارة .... و فتح أغنية أحمد المصلاوي - آخيراً قالها و علّا الصوت
آخيرا قالها .. قال احبك قالهاااا .. و انا قلبي قلبي قلبي قلبي نبضه توقف بعدهااا 💓 آخيرا قالها قال احبك قالهاااا 💓 و انا قلبي قلبي قللللبي توقف بعدهااا .. من فديت انا العيون قال احبك و بجنون 💓 ودي اطير ودي اعيش ف الدنيا بقربهااا ... واحد احبه من زمان و مايحس احبه كان و انا كنت اعاني من زمان اتاني حس بوقتها اخيراً قالهاااا قال احبك قالهااا 💖
(( وليد فرحان و رايق يغني مع الاغنية ،، و فرح تضحك و تصور فيه فيديو ❤️ ))
الفرحة يمه لقيتها ، صعب جدا وصفها ، هو قلبي و هو نبضه و احلى نبضة قلبي يدقها 💓 الفرحة يمه لقيتهااا قال احبك قالهاا .. الفرحة يمه لقيتها صعب جدا وصفها هو قلبي و هو نبضه و احلى نبضة قلبي يدقها 💓 اي صحيح اني هويت حتى اسمي اني نسيت ، لما قال لي تعال احضني بوقتها ادري مايكفي الكلام جنن احساس الغرام واني مغرم اني احبه اني عاشق يحبني قالهاا واخيراً قالها قال احبك قالهااا ❤️
قال احبك قالهااا واني قلبي قلبي قلبي قلبي نبضه توقف بعدها 💓 اخيراً قالها قال احبك قالهااا 💖
_________
بعد شوية درس وليد قدام حوش فرح
وليد : فوفا
فرح تاخد في شنطتها : نعم
وليد : اليوم بندوي مع عمر معش نقدر ندس عليه اكتر من هكي
فرح خافت : لالا مازال
وليد : لآمتى بتقعدي تأجلي ؟
فرح : تو يجي الوقت ماتخافش
وليد : باهي و خلاص
فرح كيف بتنزل : كلمني لما توصل للحوش
وليد : حاضر
فرح : هي باي
وليد : سلام
خشت فرح للحوش بعدها وليد طلع بالسيارة
____
خشت فرح لأمها ف دارها لقتها توتي في الشنطة : مازال بكري خيرك مستعجلة عليها
فايزة تستف ف حوايجها : لا وين هو هداكا باش كل مانتفكر حاجة نحطها
فرح : اه به
فايزة : ردي بالك ع الحوش و قبل ماترقدي انتي و خوك تفقدو البيبان و الرواشن
فرح : ولا يهمك
فايزة : و راكم ترقدو و تخلو الغاز مفتوح ولا الدفايات مفتوحات تصير ماصة لا قدر الله تمشو فيها
فرح : باهي ماما حاضر
فايزة : و الكانون لوحته ريحي روحك منه
فرح ضحكت : توبة ماعاد نعاودها 😂
فايزة : تو مش كان قعدتو عند حناك خيرلكم ؟ حتى باش نكون متطمنة اكتر
فرح : لالا فكيني من الدوشة حوشها ديما مليان هني أريح و أهدا ، و مانرتاحش الا في فراشي
خش عليهم صلاح : جايين حوش علي بعدين بيسلمو ... وقعمز يطلع في الجوازات و في حاجاته المهمة
فايزة : مرحبتين بيهم
فرح شقلبت عيونها : توا علاش جايين مش تلاقيتو لما جتهم أماني زايرة !
فايزة : يتفضلو مرحبتين بيهم في اي وقت ، في مكان ماتفرحي بيهم و تستقبليهم احلى استقبال
فرح قامت حواجبها : علاش عندنا مناسبة ؟
فايزة : مرت عمك حرجانة منك لأنك مامشيتيش معاي لما جتهم أماني
فرح : بالله عليك فكيني من العادات المتخلفة ، معقولة البنت جاية لحوش اماليها ملبسينها صُدرة و جايبينها عيلة راجلها ؟؟؟ تِ شن هالتخلف !! قصدي راهو هذا حوشها اللي حلت فيه عيونها و كبرت فيه و هادو عيلتها مش ناس ماتعرفهمش و ماشية باش تتعرف عليهم .. تلبس حتى بيجامة تمشيلهم بيها
فايزة : اسكتي انتي شن فهمك ف الحاجات هادي
فرح : شي لله العجب !!
صلاح تلفت : فرح
فرح شبحتله : نعم
صلاح : ماتطلعيش من الحوش الا و معاك خوك و مفيش بيتان برا الا كانش حوش حناك
فرح : باهي
صلاح : المصروف كله عند عمر و كان تبي شي قوليله هو
فرح : عارفة اي
صلاح : و ماتدخلي حد للحوش لا هادي صاحبتي ولا هادي جارتي سمعتي ولا ؟؟
فرح : باهي حافظة الدرس ، لكن ريحان تعرفها انت و ديما تجيني و نمشيلها مافيها شي لو جتني
فايزة : اي ريحان ماشاء الله عليها
صلاح : به ريحان بس .. و جو طلوع المحلات و التنسريف انسيه حتى هو مش كان بنسافر بتاخدي راحتك .. تو نوصي عمر
فرح تكنطت : اربطني بِ سلاسل و خلاص
فايزة فنصت فيها : بري أطفي ع الطنجرة حسها شيطت
فرح طلعت من الدار
صلاح : مطول لسانها هالبنت لمن طالعة ؟؟
_____
فرح ف المطبخ تدوي بروحها : مصدق روحه هلبا هذا ،، تِ اني نراجي فيه بالساعة و الدقيقة يسافر باش نتنفس
___________
ساعة 07:30 م
صلاح و فايزة مقعمزين يهدرزو مع علي و سمية في الصالون ، و فرح في المطبخ اتطيب ف القهوة، خش عليها خالد لقاها واقفة ع الغاز تتكلم ف التليفون و عاطية بظهرها ، وقف يتفرج عليها و هي ماتندريش ..
فرح تضحك ف التليفون : هههههه تعرفي عسل معسلللل
ريحان تضحك : كان مش مني راهو ماتكلميش فيه توا .. نبي حق تعبي
فرح : حاضر من عيوني ، اسمعي تعالي باتي عندي غدوا
ريحان : عادي تو نشوف بابا و نقولك
فرح : مايقول شي بنراجيك
ريحان : ان شاء الله
فرح : تو نكلم وصال تجي حتى هي
ريحان : ماظنيتش يخليها وليد
فرح : اني تو نقنعه
ريحان : به مليح بكل كان هدا
تلفتت فرح لقت خالد واقف : هي سكري توا بعدين نهدرزو
ريحان : اوك باي ، و سكرت الخط
خالد : مساء الخيرات
فرح : اهلين
خالد : شن الأمور
فرح عطاته بظهرها و توتي ف السفرة : الحمد لله
خالد : كيف حالك توا احسن ؟
فرح : شوفت عينك ف خيار الخير
خالد قرب منها من غير ماتحس بيه و شدها من خصرها ..
فرح نطت و عيطت : ااااه
خالد نحّا يده : خيرك
فرح تعفلقت : حركاتك السخيفة هادي ياسر منها كانك متعود ع السراكة اني لا .. فهمت !! ولا نزيد نعلي صوتي باش يجي بابا يربيك
خالد : باهي نقصي صوتك بلا فضايح ، اني خطيبك مش براني
فرح حطت البكرج ع الرخامة : انت اكيد مش طبيعي ، اني نكرهك و مانحبكش ، نشوف فيك زي الشيطان
خالد : اااه بديتي تغلطي راهو
فرح بعصبية : انت واحد تافه و حقير .. دير قدر لروحك راهو بيني و بينك عشرة سنين مش شوية ماكش صغير باش نهزبك كل مرة ، افهم النهارات
خالد بِ برود : انتي خطيبتي و حبيبتي و زوجتي المستقبلية مش حَ ياخدك حد غيري طول ماعيني حية
فرح دمها يغلي : الموت أهون عليا من إني نتصبح في وجهك طول عمري
خالد قرب منها : حَ نخليك تحبيني 😉
فرح دفاته : اطلع من قدام وجهي 😤
خالد ضحك و طلع
فرح : شن هذا ؟!!! حتى كان حيط راهو تقشر من الفهم
__
علي : حني مدابينا ندخلّو أكرم و خالد مع بعضهم و نديرو العرس في الصيف ، و زي ماتعرفو أكرم ليه سنة خاطب و لتوا ماحددناش موعد عرسه قلت احسن شي نزوجهم مع بعض
صلاح : ان شاء الله مايصير الا الخير ، خلي البنت تكمل هالعام و نديرو فضانية و بعدها على طول العرس
علي : علاش مانتفاهموش توا على كل شي حني عيلة وحدة و مش لازم الفضانية
صلاح : البنت هي ليكم ، خلي كل شي ف وقته يا علي ماتستعجلش
علي : باهي اللي تشوفه
فايزة ساكتة تفكر ف رفض بنتها و شن بيصير فيها ..
سمية مبتسمة : والله ماتفكري يا فايزة ، خلودا حوشه كامل مكمل ماناقصاته حويجة ناقصاته فروحة بس .. و بإذن الله حيعيشها احلى عيشة و مايبخل عليها في حاجة
فايزة بإبتسامة مجاملة : اي ماشاء الله عليه ، الله يبارك ان شاء الله مايصير الا الخير
خش خالد قعمز معاهم ..
علي تلفتله : تهنىٰ ياخالد خلاص عمك عطاهالك
خالد يشوفلهم و ساكت
صلاح يضحك : عند كلمتي يا علي عيب عاد
خشت فرح شادة سفرة القهوة وكلهم سكتو و شبحولها
فرح : خيركم سكتو !
علي : حطي هني بنتي
فرح ضحكتله و ضيفاته : تفضل عمي
خالد يشوف ويضحك
______
وليد في الطريق رافع امه و خواته لعرس قريبتهم
إسراء : وليد اوقفلي على محل مواد زينة نبي شخشير لحمي
وليد : تبي شخشير عظامي مش لحمي
وصال تضحك 😂
إسراء : غر و راس امك أوقف شخشيري تشرك نشته بظفري
فتحية : اوقفلها معليشي
وليد تعفلق : نكره امه الجو اللي اديرو فيه المفروض تاخدو حاجتكم من قبلها بيوم مش نبدا نوقف بيكم ف الطريق و عباياتكم يبقصو زي التريات
إسراء : تِ تشرك مني و اني نلبس في العباية شن بنديرله
وليد : حطي رجليك تحت الطاولة من بيشوفك
وصال : خلاص عاد انزل اشريلها و ريحنا
وليد وقّف السيارة بِ غُل و نزل
إسراء تصيح : جيبه كامل و لونه شفاف مش اسود
وليد ولالها فتح عليها الباب و يدوي مسكر سنونه : سكري فمك ياحيوانة ولا نروح بيك توا 😡
إسراء خافت و سكتت 😐 ، وليد شاف لوصال جبدلها وشاحها من على شعرها و نزله على وجهها : وانتي غطي خليقتك الناس يتفرجو عليك .. و سكر عليهم الباب و خش للمحل
وصال تكنطت : اووف هيجلي شعري 😓
فتحية تلفتتلهم : تستاهلو مايجيكم ، اللي يديره فيكم شوية
إسراء : ان شاء الله غر يجيبه باهي بس
فتحية : اللي يجيبه ارضي بيه
طلع وليد من المحل و ركب السيارة .. لوح على إسراء شكارة الشخشير : هاك و اخر مرة اديروهالي الحركة اهيا ،، و طلع بالسيارة بسرعة
وصال : وووه الزمالطو تعكرش ف ظفري
إسراء تشوف ف الشخشير : هيييي هذا شنوو !
فتحية تلفتت : خيرك
إسراء : جايبلي الغليض متع العزايز ، ولي رده مش هذا اللي نبيه
وليد تلفتلها : تتمهتكي عليا قصدك ؟ والله ماني مولي ولاني راده تبي تلبسيه ألبسي ماتبيش اقعدي بِ المشرك ، و بتزيدي كلمة تانية للحوش طول
إسراء تتأفف 😤
وصال تضحك عليها : ياناااري 😂
وليد شبحلها ف المرآية : شن رايك حتى انتي تسايريها ؟
وصال خافت و سكتت 😐
_________
ساعة 01:30 ص
فرح اتصلت بوليد سكر عليها و بعتلها مسج (معاي عمر و الولاد توا بيبي اول مانروح نتصل بيك)
فرح تكنطت 😏 رقدت في فراشها و دارت السماعات تسمع ف اغاني تراجي فيه يتصل بيها
_________
وليد معكس في جنان حوشه مع عمر و عزو و هيثم
عمر : حشوهاله بـ15 ونص الزنيلّو
عزو ياكل في سمينسة ويلوح ف القشور : ههههههه مسكين ديما متلقي ، مش وقت شري سيارات كان يفهم
وليد تلفت لعزو : خير **** فتحتلي شارع بالقشور ياراجل من بيكنس وراك
هيثم يدخن و يضحك : مادورش ياويلّا يرفعه الريح
وليد : غدوا وين بتتفرجو ع الكورة
هيثم : ف الظهرة زي كل مرة
عمر : لالا تعالو عندي ف الحوش
عزو يلوح ف القشور من فمه : عادي ايه اهم شي نبو عشي بس
وليد ضحك : وين ماتمشي بطنك خالعاتك الزح
وصال ف الصالون واقفة ع الكنبة تبيّت على صحاب خوها من فتحات البرسيان متع الروشن و منسجمة معاهم آخر انسجام ....
فجأة خشت عليها إسراء وفتحت الضي
وصال نخلعت و نقزت : خلعتينيييييي أطفي الضي بسرعة
إسراء ضحكت وطفت الضي : كان يورقلك وليد يفرمك
وصال جتها تحرك ف ايديها : حييي يا إسراء كان تشوفيييه ااه قلبي تفترش
إسراء : مني ؟؟؟
وصال : اكتشفت بيلّو جديد من صحاب خوك اححح غير منين يلقى فيهم بس
إسراء خبطتها على كتفها : حولي خلي نتفرج حتى اني ...
ركبت إسراء ع الكنبة هي و وصال يتفرجو عليهم
وصال توشوش : شوفيه اللي لابس كبوط اسود ... شعره يهبل كيف ناعم
إسراء توشوش : تاريتني دجاجة مريشة قدامه لا قوة إلا بالله .. يتهيألي شايفاته مرة مع وليد
وصال سارحة فيه و دايبة : عليَّ بهِ
إسراء ضحكت و ضربتها بمرفقها : شن رايك في بسبوسة ؟ يقولو مفعولها ممتاز
وصال تحك ف مكان الخبطة وتشوفله : نديرهاله بجميع أنواعها غر كيف بنجيبوه تاني باش ياكلها
إسراء : اممم تو نفكرلك
عمر و عزو وقفو ..
عمر : اني بنروح خلاص هو هداكا
وليد : خيركم الثالثة باللوز
عزو : خليها غدوا عند عمر
هيثم وقف ، ينعس هلبا و قام ايديه يتكسل : هي نشوفوك ويلّا .. نتلاقو غدوا
وصال : هذا شنووو هذا منووو !! الله ع الطول و الجسم غر شوفيه راسم الستة باينات من سوريته .. يهبل يا إسراء ووه عليا سخطة
إسراء : هذا كان توقفي بحداه يغطيك و ممكن يعفس عليك و مايشوفكش
وصال : ضروري تعزريني يعني 😭
ضحكت اسراء بالصوت و هيثم قام عينه ف الروشن حس بصوت و حركة
وصال خافت نزلّت إسراء من راسها و دارو وضع انبطاح : حي على امنا مشينا فيها إعدام 😑
اسراء : اطلعي بسرعة ،، و طلعو يجرو لدارهم
يـتـبـــع ... 💗
مسرة اسامة ✨