روايــة #أصحاب_ونسايب
الحَـــلْـــقـــة الأٌولــــى 🌸
فيه مقدمة قبل الحلقة الأولى اقريها باش تفهمي الرواية 💗
فايزة زعلت : انا يا صلاح ؟ توا طلع الحق عليا ؟
صلاح عاقد حواجبه و عيونه غضب : هالكلب بيكسر كلمتي !! عقاب الوقت يجي يحاسب فيا !! .... قاطعاته فايزة : صلي ع النبي يا صلوحة هاك اشرب امية و ارتاح تو يرتفعلك الضغط مش كويس ليك
___________
فرح مقعمزة في الفصل عندها تطبيق أحياء
ريحان توشوش لفرح : فوفا السؤال الأول علل شن جوابه ؟؟
فرح لاهية تجاوب مش فاضية بيها
ريحان تهمسلها : هيييي نكلم فيك
فرح : دقيقة بس نكمل و نسميلك
الابلة سمعتهم يتكلموا : ريحان نوضي لآخر مقعد تحركي 😠 ولا هاتي ورقتك جاي
ريحان خافت و ناضت قعمزت في اخر مقعد بروحها و فرح اتضايقت ان حولتها من جنبها
____________
وليد وصل للجامعة ..
درس سيارته في البركيدجو .. و خش للقسم ..
بعد ساعة كمل البرزنتيشن و نزل .. تلاقى مع صاحبه عزو اللي كان يقرا اقتصاد و تخرج بس جاي يهيج في شارع الظل لانه مايخدمش
عزو : ها ويلا شن صار معاك ؟
وليد : مشت الأمور ... و دارله إشارة اللايك بيده 👍
عزو : هانية ان شاء الله ؟
وليد : بإذن الله
ولع وليد دخانه و بدي يهدرز مع عزو و باقي القروب
______________
11:00 ص
عمر قاعد في داره متكنطي من بوه ، جاه اشعار من الفايبر خدي تليفونه و فتح يشوف فيه لقاه من حبيبته سرور :
💌 : حبيبي فايق ؟ صباح الورد
عمر ابتسم .. تلوح على فراشه و اتصل بيها صبح عليها و غيرتله جوه ....
بعد ماسكر حط تليفونه في الشحن و ناض طلع حوايجه من الدولاب و خش لحمام داره يدوش ..
______
فايزة : شنو ياحاج صارلك من المشي لعزومة الغدي و الفاتحة اليوم ؟
صلاح : ان شاء الله ، قولي لعمر يوصلني قرب ساعة 12 مانبيش نمشي بسيارتي مانلقاش وين ندرس ، و العزومة بكري مرات من الزحمة مانلحقش
فايزة : باهي حاضر تو نقوله
_____________
ساعة 11:30 ص
طلع عمر من الحمام لبس حوايجه و طلع من داره نزل لوطا وقف على مرآية المدخل يواسي في شعره بيطلع عنده موعد مع سرور ..
جاته فايزة : نجي وليدي ياربي 😍 هات خشيم 💋
عمر يضحك : سلمك يام
فايزة : شن بنقولك يا عمورا بوك عنده فاتحة و عزومة غدي متع ولد فتحي صاحبه باش توصله
عمر قام حاجبه : كان يعيط و يسب و توا يبيني نوصله !! اما شيابين اخر وقت ههههه
فايزة ضرباته على كتفه : تحشم هذا بوك عيب عليك ، اسمع رد بالك تفتحله موضوع اختك فرح بالك ينسىٰ
عمر يواسي ف شعره : باهي اصلاً حتى انا ماخاطريش ندوي فيه الموضوع
فايزة : ايواه فكنا منه
عمر تلفتلها : باهي يمشي مع عمي علي اكيد ماشي حتى هو ، انى عندي ماندير و السريع توا اكيد زحمة مش حانلحق نروح بفرح
فايزة : تربح ارفعه تو كان بنقوله انك ماتبيش بيزيد ينكد عليك و هو على سبلة ، و اصلاً بيروح مع عمك علي ، ارفعه و خلاص تو تلحق على اختك مازال على وقت مرواحها
عمر : باهي قوليله يطلعلي اهو في القراج نسخن في السيارة
______________
فرح و ريحان و وصال مع بعض في الإستراحة يفطرو و يهدرزو :
ريحان تبكي : خسارة ماجاوبتش والله قريت امس و سهرت عليها المادة لكن الأسئلة صعبة يعطيها دي
فرح تسكت فيها و تمسحلها في دموعها : خلاص عاد بطلي بكي تو نقولولها تعاودلنا تطبيق تعويضي ، امسحي دموعك مش امتحان هو
وصال : ايه صح الأسئلة صعبة كانت ، قعدتلي نقطة في علل خسارة
فرح تغيرلها في جوها : حقا شن قالك عبدو اليوم امتى بيجيب امه ؟
ريحان ضحكت و مسحت دموعها : قالي بعد الامتحانات النهائية لان مايبيش يشوش عليا و انى شهادة ، و شوفو شن عطاني 😍 سلسلة فضة فيها اسمي و اسمه
فرح و وصال : وااااو تهبل
وصال : تبيديها بالهناء يارب
فرح : ذوووق هالعبدو هذا يعيش و يجيبلك يارب عقبال الدبلة 💍
ريحان ضحكت : الله يسلمكم ربي يسمع منك فوفا
وصال : نستأذن يابنات حميدا يتصل خلي نلحق ندوي كلمتين قبل ما الجرس يضرب
فرح : ردي بالك تشوفك ابلة ليلى الشومة
وصال : عييب ماتوصيش 😉 مدايرة سماعات تحت الوشاح و شادة كتابي ع اساس نراجع ههههه
ريحان و فرح يضحكو
ريحان : والله ماك ساهلة
( ومشت وصال في اخر الساحة و قعدو ريحان و فرح يهدرزو مع بعض بروحهم )
فرح : تعرفي متضايقة هلبا من ولد عمي دراه الكبد هوا
ريحان : قصدك خالد ؟
فرح : وهو فيه غيره مدرهلي كبدي
ريحان : خيره ؟
فرح : كل مانتلاقو مانرتاحش بكل من حركاته السخيفة
ريحان قامت حاجبها : خيره المسخ شن دارلك ؟؟
فرح : من لما كنا صغار و هو حاط عينه عليا و كل مايلقاني بروحي في الجنان ولا في المطبخ يجي يتلصق و يحدفلي في الكلام المعسل اللي مانحباش
ريحان : زي شنو ترا ؟
فرح : زي مرة جونا هو و بوه و خوه و هلبا رجالة لما بابا دار عملية ع الغدة ، نوتي في القهوة في المطبخ خش لقاني كيف بنحط الحلويات ف السفرة قالي الحلو يحط ف الحلو ؟ هلبا علينا
ريحان تضحك : ههههههه حي عليه
فرح : و مرة لقاني لابسة سروال احمر مع بلوزتي السوداء قالي اذا كان سروال احمر بس هكي درتي فيا امالا كان قفطان كيف
ريحان انصدمت : لالالا هذا يبي الرباية حرشي عمر خلي يربيه
فرح عيونها دمعوا : قريب نموت منه سخيف هلبا خايفة يديرلي حاجة ، و راهو هلبا هلبا كلام و مواقف
ريحان : لازم تحكي لخوك تخافيه يتمادىٰ
فرح دمعتها نزلت : كان نقول لعمر حيقتله مش حيراجي .. لأنه مايحباش من يومه و ماعنداش ليه خلوق و نخاف يبدا يكذب عليه يقوله اختك هي اللي تجيني لأنه حقير و يقولها ، وتوا عرس اخته بيبدا كان نلقى مانمشيش الا للصالة بس باش مانشوفاش
ريحان : باهي بالك يحبك بجديات و يبيك
فرح : اني مانبيشي .. راهو نسونجي و متع بنات لين خلاص غر كان تخشي ع الانستا متعه بس تتفرجي ع العار ، تبيني نرضى بيه ؟
ريحان : ماينفعش صار
فرح : تو نديرلك سكرينات و تفرجي
ريحان : نحسابه مقوم زي خوه
فرح : تي فرق كبير بينه و بين خوه ، اكرم كويس مش زي هذا البناوتي المخمج
ريحان ضحكت : هههههه
فرح : اني نبي ناخد راجل و يخاف ربي و مايديرش ف الحرام مش واحد ملبز و خامر زي هذا
ريحان : وااك يا فرح موضوع لازم مانديرو حل .. سخيف الزفت
فرح : اااه الصبر و خلاص .. نفرح لما يسافر باش مانشوفش خليقته
ريحان : شن يخدم هو ؟
فرح : فاتح مكتب سفر و سياحة و خاش و طالع مع بوه ف هلبا حاجات
ريحان : ماشاء الله
فرح : شن فايدة الفلوس و هو ماينفعش
و هنا الجرس ضرب و بدت ابلة ليلى تنادي ع البنات : هيااا انتِ وياها لفصلك
فرح وقفت مسحت دمعتها وقالت : هيا نوضي فكينا منها بدت تعيط
ريحان مدتلها يدها : وقفيني
______________
عمر في السيارة مع بوه في طريق السريع
عمر متعفلق : شن هالزحمة اهيا امتى بنوصلوا النهار الاحرف
صلاح : وسع بالك تو تمشي الطريق
عمر يقول في عقله ( ماك مش قادر تدوي لانه مشوارك كان مشواري انى راهو قلبت الدنيا )
صلاح : حطني في العزومة و تو نروح مع عمك علي
عمر بإستهزاء و مجاملة : عادي يابوي كان تبيني نجيك ماعندي شي انى ره
صلاح : لالا شكراً تو نروح مع عمك .. أهي بدت تتحرك الزحمة
______________
وليد ركب سيارته في الجامعة مع ساعة 1 الا ربع مروح ،، تليفونه يشرين ...
وليد فتح الخط : الو
فتحية : ايوا وليد كيف حالك؟
وليد : تمام يا امي صحة الحنة
فتحية ضحكت : سلمك
وليد : تبي حاجة ؟
فتحية : اسمع بنقولك جيب معاك سمدينة و انت جاي بندير بسبوسة وجيب حتى طماطم و خيار للسلاطة و مشروب للغذي
وليد : باهي حاضر، تبي شي تاني ؟
فتحية : ايه راك تنسىٰ اختك روح بيها
وليد : ايه عارف مش ناسيها
فتحية : باه هي امالا في أمان الله
وليد : سلام
وكيف وليد بيسكر الخط خش عليه عمر انتظار فتح وليد الخط على طول
وليد : اه عمور
عمر : اها ويلا شجو ؟
وليد : مليح
عمر : شن صار فيك مشت الأمور ؟
وليد : ايه مشت مليح الحمد لله
عمر : باهي افتكيت منها ، اسمع بنطلبك في طلب ان شاء الله ماتردنيش
وليد : اطلب و تدلل يا سي
عمر ضحك : شن هالأدب يامان ماعرفتكش
وليد يضحك : مبردك النم تي قول شن تبي
عمر : تعرف ليا قريب ساعتين عالق في زحمة السريع مانلحقش نروح بأختي من المدرسة نبيك تروح بيها .. هي في نفس مدرسة اختك
وليد : غالي و الطلب رخيص يامان
عمر : منور والله يا ويلا
وليد : باهي كيف بنعرف شكلها ؟
عمر : تقرا مع وصال و صاحبتها هي
وليد استغرب : اول مرة نعرف ان أختي و اختك صاحبات
عمر ضحك : ايه ريتها كيف
وليد ضحك : ماشي هي مية مية
عمر : سلامات نتلاقو بعدين
وليد : ان شاء الله .. و سكر الخط
____________
عمر بعت رسالة لفرح ( انا مش حنقدر نجيك روحي مع صاحبتك وصال ، كلمت خوها و عنده علم )
فرح حست التليفون هز طلعاته من جيبها بالدرقة و قرت الرسالة ... هنا فرح تعرف ان وليد خو وصال و صاحب عمر بس وليد مايعرفش انها أخت عمر
ريحان غمزتها و ضحكت : شنو بدينا نحبو بالدرقة؟
فرح ضحكت : لالا تعرفيني مش جوي الكلام هذا خليني مركزة في قرايتي نبي نجيب معدل في التسعينات باش يقبلوني ف الطب
ريحان : تِ باهي و انتِ ردك واتي
فرح : ايه امالا شني قرايتي اهم شي
ريحان : امالا مني اللي بعتلك مسج ؟
فرح : هذا عمر قالي روحي مع وصال لانه مش حايقدر يجيني
ريحان : ايوا حني بنركبوا مع الطرف متع الصبح 😉😁
فرح : وأنى شن دخلي بيه طرف ولا طرفين 😏
ريحان : ووك قداش قلبك بارد
_____________
عمر تهنىٰ على مرواحة اخته لأنها حتروح مع صاحبه الأنتيم و يثق فيه ثقة عمياء و ماشي بيشوف حبيبته في مطعم صحة و هنا
_____________
01:30 م
جي وقت المرواح و درس وليد قدام المدرسة يراجي في وصال
الجرس ضرب و بنات الثانوية بدو يطلعوا
وصال : هيا فرح وليد جي
فرح : هيا هي دقيقة بس نربط سبيدروي الخيط انفتح
وصال : اهو نراجي فيك
فرح : اما هي سيارة خوك ؟
وصال : هديكا السنتافي البيضاء مقابلة الباب
فرح و وصال طلعوا للسيارة
وصال ركبت من قدام : شج ؟
وليد : مليح شن جوك انتِي ؟
وصال : تمام
ركبت فرح من تالي : السلام عليكم
وليد متحشم مش قادر يتلفتلها : و عليكم السلام
تلفتت وصال لفرح : حقا بعد غدوا عيد ميلادي باش تجي عاد مدايرة حفلة
فرح ابتسمت : كل سنة وانتي طيبة ، ان شاء الله بابا يوافق والله نتمنى
وصال تضحك : وانتي طيبة حبيبتي ، لالا لازم يوافق لو كان نترجاه انى
وليد يسمع فيهم و ساكت .. حرك المرآية بيعدلها جت عينه ...
يـتـبـــع ... 💗
Masarra Osama ✨