روايــة #أصحاب_ونسايب
المقدمة 🌸
( صلاح و علي ) زوز خوت من عيلة مشهورة ف البلاد ، وارثين من بوهم أملاك و أراضي لا تعد ولا تحصى ، لما كبروا استثمروا رزقهم و زادو كبروه
___
الأب / صلاح : رجل غني و مغرور جداً ، متعقد و عصبي مع صغاره و مايوريش فيهم ف حبه ليهم و حنانه ، يحب يفرض رأيه عليهم و مايحبش من يكسرله كلمته
الأم / فايزة : طيبة و حنونة هلبا بس شخصيتها ضعيفة لدرجة ماتقدرش تواجه صلاح ولا تعارضه ف اي حاجة
فرح : الابنة الصغيرة عند صلاح ، عمرها 17 سنة تقرا ثالثة ثانوي
الأخ الكبير لفرح ؛ محمد / 32 سنة متزوج و عايش ف تركيا ، واخد شوية من طبع بوه ، يسمع ف كلامه في اي شي يقولهوله و مستحيل يعارضه
الأخ الأصغر لفرح ؛ عمر / 25 سنة ، يقرا ف جامعة ناصر - ف كلية اللغات ، عمر شخص متواضع و بشوش و ديما جوه مليح ، مستهتر و متأخر ف قرايته .. صديق فرح هلبا من اللي كانو صغار صندوق أسرارها عنده و صندوق أسراره عندها .. مش متفاهم مع بوه نهائي و ديما تصير بينهم شجارات عنيفة و عراك ، و اغلبها بسبب فرح لان صلاح يضغط و يعارك فيها في كل شي اديره و عمر مايرضاش فيها و يبدا يدافع عليها ...
_________
ساعة 07:30 ص
فرح في دارها واقفة ع المرآية تمشط في شعرها توتي في روحها للمدرسة
فايزة اتطقطق ع الباب : فرح نوضي وقت عليك ساعة 7 ونص
فرح : ايه يا ماما نايضة من بكري
فايزة فتحت الباب و استغربت ان فرح نايضة بروحها من غير ماتنوضها هي زي مامتعودة كل يوم
فرح تلفتت للباب و ابتسمت لأمها : صباح الخير
فايزة : صباح الخيرات ، منين جاتك نايضة بكري و واتية من توا
فرح قعمزت ع السرير تلبس في شخشيرها : ماهو اليوم بتخطم عليا ريحان بكري بنمشو على رجلينا مش حيرفعني عمر .. تفاهمت معاه من امس
فايزة : حي عليك كان يسمع بوك انك بتمشي معاها على رجليك يوريك
فرح طرمت شواربها : واك يا ماما صبح بالله عليك فكيني من النكد ، شبانيك هذا بيجيبلي الجلطة من الضغط اللي مدايرهولي
فايزة تنهدت : ماهو تعرفيه طبعه واعر و يخاف عليك من صغرك ولا جاك جديد توا ؟؟
فرح سكتت ، لبست شنطتها و نحت تليفونها من الشحن حطاته في جيبها و نزلت ، مشت جهة الباب تلبس في سبيدروها
فايزة جت وراها : خديتي فطورك ؟ هونا وتيتهولك و حطيته ع الطاولة في المطبخ
فرح : لالا عندي فلوس تو ناخد من المقصف
فايزة : مش عارفة شن عاجبك فيها ماكلة المقصف كله عفن مش زي ماكلة أمك نظيفة و مضمونة
فرح ضحكت : حرام عليك والله المرأة اللي فيه نظيفة و ماشاء الله عليها ، نفاصها فيهم بنة زايدة
فايزة كشرت وجهها : باهي به توا طلعلك المقصف ماكلته خير مني 😒
فرح : ماتزعليش يافوفو خليه تو نروح ناكله حاضر 😙
فايزة بتوشويش : باهي شن بنقول لبوك لو عرف انك ماشية بروحك
فرح : و منين حيعرف لو انتِي ماقلتيش؟ و انى مش اول ولا اخر بنت تمشي للمدرسة على رجليها ، خليني نشم الهواء
فايزة : ربي يستر ، شرينيلي لما توصلي
فرح : حاضر ياماما ماتخافيش
كيف بتطلع تلفتت لأمها : اها حقا نوضي عمر عنده جامعة اليوم راك تنسي
فايزة ضحكت : باهي حاضر وانتي قلبك ديما عليه ان شاء الله مانفقدكم
فرح : هي سلامات ريحان وصلت .. و باستها في خدها امواه 💋 و طلعت
فايزة : في حفظ الله
((ريحان صاحبة فرح من اللي هما صغار ، صديقة الطفولة و تسكن قريبة عليها ف شارعهم))
ريحان ابتسمت لفرح : اهلا صباح الورد
فرح : صباح الحب .. و سلموا على بعض بالبوس و الأحضان : مواه 💋 مواه 💋
فرح ضحكت : حي على ام الروج الفوشي اللي مدايرتيه نفس درجة الزمالطو زيادة
ريحان : ايه شن رايك يهبل اه هههه
فرح ضحكت : يقتل .. لكن ابلة ليلى الدراه تو بتديرلك العار عليه و بتبدا في العياط ع الصبح
ريحان : واخدة احتياطي تو نمسحه بالوايبس قبل مانخشو لان عبدو جايني توا بنشوفه 😍
فرح ضحكت : بجديات ؟؟
و شبحتهلها ع الجنب : وأنى نقوول علاش طارحة😂
ريحان ضحكت
فرح : به اسمعي انى تو نوقف نعسلك لكن ماتعطليش عشرة دقايق بس
ريحان : خليها ربع ساعة بليز فوفا مستاحشاته
فرح قرصتها من يدها : عينك ، عشرة دقايق بس سادك خير مايشدونا تأخير
ريحان : باهي حاضر 😙
______________
وليد / شاب بسيط و صديق عمر المقرب من ايام الثانوي - 25 سنة ، هو الأخ الكبير و الوحيد لخواته الزوز ،،
هو السند الوحيد لأمه و خواته و المسؤول عليهم بعد ماتوفى بوهم و خلاه يتحمل الخدمة و الصعوبات من صغره .. يقرا في كلية اللغات ف جامعة ناصر ، اخر سيمستر بحكم وقف قيده بعد ماتوفى بوه و قعد يصارع ف الدنيا
_____________
رن منبه وليد ، سكره و ناض خش للحمام دوش و لبس ، طلع من داره ماشي جهة الباب بيلبس كندرته جاته اخته الصغيرة قصيرونة اللي تقرا مع فرح ف نفس المدرسة بس وليد مايعرفش ان اخت عمر صاحبة وصال
وصال : صباح الخير ويلّا
وليد ضحك : صباح النور درية ، خيرك تأخير
وصال تاكل في بريوشة بِ المربى : ايه بالله عليك حطني ف المدرسة وقت عليا نضت متأخر على تشريينة الباص قلتله تو يوصلني خوي، ماسمعتش المنبه و ماما راقدة محنية
وليد ضحك : ماتعياش من الحنة امي خاطري نشوف ايديها مافيهمش حنة
وصال تلبس في سبيدروها : ايه حالة
وليد : هيا بسرعة مابين سخنت السيارة .. شبحلها ع الجنب و فنص فيها : دخلي قصتك 😠
وصال خافت و دخلت قصتها بصبعها : باهي طلعت بروحها
____
قعمز وليد في سيارته قدام الحوش يسخن فيها، فاتح الراديو على اغاني فيروز و يراجي في وصال ، فتح تليفونه و اتصل بعمر .....
عمر كان راقد فتح عين وحدة يشوف من اللي يتصل بيه ع الصبح
عمر فتح الخط : ها ويلّا .. ( ويلّا دلع اسم وليد صاحبه )
وليد يضحك : تي قول صباح الخير ياراجل تقول بايت معاك
عمر ضحك : صباح الخير ، شن الجو ؟
وليد : تمام ، شن نخطم عليك ؟ وقت على البرزنتيشن
عمر : لالا فوتني ماعنديش جهد اليوم الكورة تعبتني امس ، تو نخشله في قروب غدوا
وليد : مية مية نتكالموا بعدين هي تشاو
عمر : تشاو .. و رجع رقد
____
وصال ركبت السيارة و مشو
وصال : بسرعة يا وليد عندي تطبيق الحصة الاولى وقت عليا
وليد : تِ شن تبيني نطير اصبري دقيقتين و توصلي
وصال تتأفف وقت عليها
وليد حط يده في جيبه طلع فلوس و مدهملها : هاك اشري بيهم فطورك
وصال 😍: صحيت
وليد : سلمك
درس وليد السيارة قدام المدرسة و قال لوصال : تو نجيك بعدين ماتروحيش بروحك بما ان الباص مش حيجيك
وصال : اوكى
نزلت وصال من السيارة و تلاقت مع فرح و ريحان قدام باب المدرسة قعدوا يسلموا على بعض : اهلا صباح النور 😍 امواه 💋 امواه 💋 شن جوكم ؟؟ قريتوا ؟؟
وليد جت عينه في عين فرح و سرح فيها لين السيارة اللي ورآه بدت تكلكس ..
شبح يمين و يسار و أشر لأخته بصبعه و فنص فيها ( خشي للمدرسة )
خشت وصال هي و ريحان و فرح للمدرسة
__
طلع وليد بالسيارة ... خدي قهوته من الفرناج كالعادة و كمل طريقه لجامعة ناصر
_____________
فايزة واقفة في المطبخ توتي في الفطور خش عليها صلاح
صلاح : صباح الخير
فايزة : صباح النور ، نهارك مبروك هي دقيقتين بس و نطفي ع الشاهي
صلاح قعمز ع الطاولة بحداها : وين عمر ؟ مشي للجامعة ؟
فايزة : لالا قال تاعب من الكورة ماباش ينوض
صلاح : امالا من اللي وصل فرح للمدرسة ؟
فايزة ارتبكت : اها ؟ اه ناض وصلها و رجع رقد
صلاح : في مكان ماينوض يخدم على عمره مش عمره 25 و قاعد ماد طوله بالك عابي عليا تي والله ماني عاطيه قرش و خليه يكون نفسه بنفسه
فايزة : غر استهدى بالله يا صلاح الولد قاعد يقرا تو ان شاء الله يتخرج و يخدم و يكون نفسه بنفسه
و مدتله الطاسة : هاك تفضل الشاهي و ابدا افطر
صلاح خداها منها : هاتي بسم الله
( و بدو يفطرو )
____
عمر فاق من النوم و نزل من فوق .. وقف في باب المطبخ
عمر بحواجبه : صباح الخير
فايزة ابتسمت : صباح الخيرات ، قعمز أفطر معانا
عمر : باهي هي ديرلي اي حاجة .. و قعمز معاهم
صلاح : قولي ياولد مازال ماتبيش تخدم اوو؟؟
عمر كشر وجهه : بوي صبح بالله عليك فكنا منها الدسكة اهيا
صلاح كشخ عليه : احترم نفسك و ادوي باهي ياولد خيرلك
فايزة ترطب في الجو : هدي روحك يا صلاح عمر مش قصده
و تلفتت لعمر و وشوشتله : أفطر وانت ساكت بلا مشاكل ع الصبح
صلاح : لازم تخدم وتعتمد على روحك من توا و ان شاء الله تلحق تكون نفسك ، الوضع في البلاد مايطمنش
عمر : تِ عادي يابوي لو مالحقتش خيرك موجود
صلاح عقد حواجبه : زيك زي خوك محمد تخدم و تكون نفسك بتعبك ، اللي يتعب و يشقىٰ مش زي اللي يكبر و يلقىٰ ..
عمر : باهي ان شاء الله .. يقول ف عقله ( الله يرحمك يا جدي كان مش منك راهو ماعنده شي )
بعدين قال : غر ناخد الشهادة تو نخدم معاش مازالي الا سيمستر بس
صلاح : ان شاء الله على خير
عمر بإستهزاء : توا قولي يابوي تبينا نخدموا و نكونوا نفسنا بتعبنا امالا العز و الخير اللي عندك لمني مخليه ؟
صلاح فنص فيه : بلا قلة ادب ياولد
عمر يضحك : آسف مش قصدي ، باهي حتى فرح بتاخد شهادتها و تخدم على روحها ؟؟
صلاح : و من اللي قالك بتكمل قرايتها ؟ .. تكمل ثالثة ثانوي هالعام و تم ، تقعمز فالحوش لين يجيها نصيبها ، مانرخيش بنتي للجامعات
فايزة و عمر انصدموا 😳
فايزة : صلي ع النبي يا حاج والله ماصارت ، البنت شاطرة و من الأوائل و حلمها تقرا طب و تكون دكتورة ...
قاطعها صلاح : لا دكتورة لا ممرضة ، نطلقها في الجامعة و الوقت مايطمنش ؟ البنت قنينة و العين عليها ، تقعمز تونسك لين يجيها نصيبها و بعدين لو راجلها وافق تكمل قرايتها هو حر
عمر تعفلق و لوح الخبزة من يده : شن تقول ياراجل ؟
صلاح : اللي سمعته
عمر : فرح متفوقة ولازم تكمل قرايتها ومستحيل نوافق على كلامك .. وبلا جو جهل و تخلف متع الصعايدة ، كان ع الحجاب ! تو تتحجب ،، تتخرج وبعدين اعطيها ، ولو تسمع كلامك هذا الما تمرض بالفراش
صلاح تعفلق من كلام عمر : انى اللي عندي قلته و اول ماتكمل هالعام بنعطيها اصلاً عمك علي طالبها لولده من وقت كانوا صغار و انى مانلقىٰ خير من ولدنا
فايزة : اكرم ولا خالد ؟ لكن اكرم خاطب ! اكيد خالد
عمر سخن و ناض وقف : امالا ناوي بتعطيها لخالد الهرواك ؟ تِ والله ماهو واخدها هالهرواك اهوا ، مانحباش و مش خاشلي راص حتى القبلة مايعرفهاش وين .. و هي مستحيل ترضىٰ بيه ، و قرايتها حتكملها و توصل للي تبيه و اللي عندي قلته ..
و طلع من المطبخ متعفلق و والع هلبا من كلام بوه و طبعه المتعقد .. ركب لداره و قربع الباب
صلاح يكشخ : ريتيه هالكلب كيف يكسر في كلمتي تو هي بنتي ولا بنته ؟ شن دخله فيها ؟
فايزة : ماك عارفه مايرضىٰ في اخته دقة الشوكة و عنده أغلى من عيونه ومن صغرهم وهما صحاب و اكتر من خوت
صلاح تلفتلها و يكلم فيها بصبعه و يكشخ : هذا كله من ربايتك فيهم ، مدلعتيهم و مخليتيهم مدايرين مايبو .. فسدتيلهم طباعهم
فايزة زعلت : انا يا صلاح ؟ توا طلع الحق عليا ؟
صلاح عاقد حواجبه و عيونه غضب : هالكلب بيكسر كلمتي !! عقاب الوقت يجي يحاسب فيا !! ....
قاطعاته فايزة : صلي ع النبي يا صلوحة هاك اشرب امية و ارتاح تو يرتفعلك الضغط مش كويس ليك
يـتـبـــع ... 💗
رأيكم ؟؟ هذه تكون اول رواية ليا
Masarra Osama ✨