Jungkook Simon Chisun និង Annto រត់បែកញើសសស្រាក់ក្រោមកម្តៅថ្ងៃក្តៅស្ទើរបែកក្បាលដោយសារគ្រូវិន័យឱ្យ Riv និងគ្នីគ្នារត់មុនព្រោះខ្លាចពួកគេរត់ប៉ះគ្នាកើតរឿងម្តងទៀត ទម្រាំក្រុមទីមួយរត់ចប់គឺថ្ងៃខ្ពស់ទៅហើយ ដូច្នេះទើបកម្លោះបួននាក់នេះត្រូវមករត់ហាលថ្ងៃក្តៅក្បាលបែបនេះ
Annto ទាំងខ្ចិលទាំងហត់ រត់បណ្តើរត្អូញត្អែរបណ្តើរខុសពី Chisun ដែលមានកម្លាំងព្រឹសពេលឃើញសិស្សស្រីៗមកអង្គុយមើលពួកគេរត់ដូចដែលគិតទុក បន្តិចទៀតពួកនាងៗនឹងបានភ្លឺភ្នែកដោយសារសាច់ដុំកង់ៗរបស់គេមិនខាន
Taehyung អង្គុយនៅម្ខាងមើលមិត្តភក្តិរត់ដោយក្នុងដៃមានទឹកត្រជាក់ៗជាច្រើនដបដែលទើបនឹងទិញមកទុកឱ្យពួកគេផឹកពេលហត់ Chisun និង Annto ដែលរត់ប៉ាក់ខ្ញើចៗនោះមិនបានទាក់ទាញភ្នែករបស់គេដូច Simon និង Jungkook នោះទេ ពួកគេរត់លឿនដូចប្រណាំង តាមគ្នាស្អិតមិនឱ្យនរណាបានលើសមួយជំហានឡើយ ញើសក៏បែកសស្រាក់ ហូរតាមជើងសក់ ញើសស្រក់ពីថ្ងាស់ហូរទៅលើផ្ទៃមុខសម៉ដ្ឋរលោងរបស់កម្លោះដែលឈរឈ្មោះក្នុងចំណោមប្រុសស្អាតក្នុងសាលា ធ្វើឱ្យមើលទៅកាន់តែទាក់ទាញ ញ័រអស់បេះដូងក្រមុំៗដែលឈរមើល អ្នកខ្លះក៏យកទូរស័ព្ទមកថតសកម្មភាពរត់ដ៏ស្វាហាប់របស់ពួកគេ អ្នកខ្លះគឺយកកាមេរ៉ាមកផ្តិតយករូបភាពសាច់ដុំកង់ៗក្រោមអាវយឺតពណ៌សដែលទទឹកដោយញើសរបស់ពួកគេតែម្តង មិនងាយបានប្រុសស្អាតក្នុងសាលាមករត់បង្ហាញរាងឱ្យមើលបែបនេះទេ យូរៗមានម្តងត្រូវតែក្តោបក្តាប់រូបភាពទុក Upload តាម Social media ឱ្យណាណីម្តង
មិនយូរប៉ុន្មានគូរប្រណាំង Jungkook និង Simon ក៏រត់គ្រប់ 50 ជុំតំណាលគ្នា ម្នាក់ៗហត់គគូសដកដង្ហើមញាប់ៗស្ទើរតែដង្ហក់ តែប្រមុខ Fire Swan នៅតែមិនព្រមដកភ្នែកពី Jungkook រហូតដល់គេលើកជាយអាវមកជូតញើសលើមុខធ្វើឱ្យលេចចេញសាច់ដុំពោះកង់ៗរបស់គេដោយអចេតនា
Simon ដកភ្នែកចេញពីរាងកាយមាំទាំរបស់ Jungkook ហើយងាកមកមើលស្រីស្អាតដែលចាំយកចិត្តយកថ្លើម ឱ្យកន្សែងជូតមុខ ឱ្យទឹកត្រជាក់ៗផឹក
“ បង Simon ដោះវែនតាបែបនេះសង្ហាដល់ហើយ! ”
“ រាង Hot ខ្លាំងតែម្តង ”
“ ហាសហា! អរគុណ! ” ស្នាមញញឹមប្រហារបេះដូងក្រមុំៗលេចឡើងលើមុខរបស់ Simon មុននឹងទទួលកន្សែងនិងដបទឹកដើរសម្តៅទៅ Taehyung ដែលអង្គុយចាំនៅម្ខាង
“ ហត់ខ្លាំងទេ? ” កម្លោះតូចសួរព្រមទាំងហុចវែនតាឱ្យម្ចាស់ខ្លួនវិញ
“ តិចតួច! ”
“ មានមនុស្សស្រីចាំយកទឹកត្រជាក់ៗឱ្យបែបនេះ យើងថាឯងមិនហត់ទេ ” Taehyung និយាយញ៉ោះហើយទើបម្ចាស់វែនតាដាក់បង្គុយអង្គុយជិត
“ ហេតុអីទិញទឹកមកច្រើនម្លេះ? ”
“ ប្រាកដជាទិញមកឱ្យពួកឯងផឹកហើយ Jungkook ផង ”
“ មើលទៅគេរឹងមាំយ៉ាងនេះបែបមិនត្រូវការឯងមើលថែទេដឹង? ” Simon ក្រេបទឹកយឺតៗ ភ្នែកសម្លឹងទៅ Jungkook ដែលដើរចូលមកពីចម្ងាយទើប Taehyung ងាកមើលតាមដែរ រាងកាយមាំមួនរបស់គេលេចឡើងពេលដោះឯកសណ្ឋានសាលាចេញធ្វើឱ្យ Taehyung ក៏ដូចជាមិនសូវស្ងប់ចិត្តដែរ រាងកាយបែបនេះលុះត្រាតែមនុស្សដែលឧស្សាហ៍ហាត់ប្រាណធ្ងន់ៗហើយញឹកញាប់ប៉ុណ្ណោះទើបអាចយកបាន តែ Jungkook តែងតែបង្ហាញថាខ្លួនឯងទន់ខ្សោយ សូម្បីតែត្រូវគេវាយក៏មិនចេះវាយតបត រហូតត្រូវឱ្យអ្នកដទៃការពារ ចម្ងល់នោះគឺ គេបានរូបរាងមាំមួនដូចខ្លារខិននេះមកពីណា?
“ ឯងអាចយល់ច្រឡំលើគេក៏ថាបាន ” Tae បោសវាសគំនិតសង្ស័យទាំងអស់ចោល គេជឿជាក់ថា Jungkook គឺស្អាតស្អំ គេអាចមើលឃើញភាពសាមញ្ញនិងប្រាកដប្រជាក្នុងកែវភ្នែក Jungkook ដូច្នេះទើបគេជឿលើ Jungkook ហើយក៏ជឿលើខ្លួនឯងដូចគ្នា
“ បើឯងនៅតែយល់ថាយើងជាមិត្ត ព្យាយាមនៅឱ្យឆ្ងាយពីគេទៅ ព្រោះគេមកជាមួយបំណងមិនល្អ ” Simon ដាស់តឿនតាមអ្វីដែលគេអាចធ្វើបាន ទោះវាយគេឱ្យឆ្លើយមួយពាន់ដងទៀតក៏គេនៅតែឆ្លើយថាក្មេងម្នាក់នេះមិនស្មោះត្រង់ដដែល ជ្រុលជាគេត្រូវមើលថែ Taehyung ហើយ គេនឹងមើលថែរហូតដល់ទីបញ្ចប់
“ យើងជាមិត្តនឹងគ្នាពិតមែន តែឯងមិនអាចបង្ខំឱ្យខ្ញុំស្អប់ឬស្រឡាញ់អ្វីតាមឯងបានទាំងអស់ទេ ”
“ យើងនិយាយថាបើឯងនៅទុុកយើងជាមិត្ត ” Simon សង្កត់ធ្ងន់ត្រង់ពាក្យថាមិត្ត ធ្វើឱ្យអ្នកម្ខាងទៀតនៅស្ងៀម ពួកគេជាមិត្តស្លាប់រស់ រួមសុខ រួមទុក្ខ ជាមួយគ្នាតាំងពី Fire Swan មានមេដឹកនាំចាស់រហូតដល់ផ្លាស់ប្តូរអ្នកដឹកនាំដូចពេលនេះ បើឱ្យទុកគ្នាចោលគេធ្វើមិនបាន
“ ... ”
“ បងប្រុស!!! ” Jungkook យកអាវដៃវែងឯកសណ្ឋានសាលាមកពាក់ដូចសព្វដងហើយទើបលើកដៃជ្រោងសក់បន្តិចមុននឹងដើរមករក Taehyung
“ ផឹកទឹកសិនទៅ ”
“ បាទ ” Jungkook ទទួលដបទឹកមកបើកផឹក ហើយឆ្លៀតមើលទៅ Chisun និង Annto ដែលទើបនឹងរត់ហើយក៏ត្រូវស្រីៗចោមរោមដូចស្រមោចរោមស្ករព្រមទាំងហុចទឹកហុចកន្សែងឆ្វេងស្តាំ តែ Chisun បែរជាដោះអាវមកជូតញើសលើមុខទៅវិញ ធ្វើឱ្យស្រីៗនៅជុំវិញនោះស្ទើរឈាមច្រមុះជាមួយរាងសម្បូរបែបនិងសាច់ដុំកង់ៗរបស់គេ
“ បង Chisun សាច់ដុំមាំដល់ហើយ! ”
“ មាំបែបនេះស្រឡាញ់បងទេ? ”
“ ឆ្គួត ប្រាកដជាស្រឡាញ់ ស្រឡាញ់ពេញបេះដូងតែម្តង ” Chisun សើចក្អាកក្អាយជាមួយពួកនាងៗ ខណៈពេល Annto ហត់ស្ទើរធ្លាក់អណ្តាត ដាក់បង្គុយសម្រាកជិតស្រីៗដែលមកមើលគេរត់
“ ហត់ដល់ហើយ ចង់សន្លប់ ” អ្នកកម្លោះងាកមើលស្រីស្អាតជិតខ្លួនព្រមទាំងរអ៊ូរទាំរង៉ូវៗទាំងខ្ចិលច្រអូស
“ សន្លប់លើទ្រូង Noona ហ្មងមក ” ស្រីស្អាតនិយាយលេងផងមែនផងទើបអាល្អិត Annto ប្រញាប់ឆ្លៀតឱកាសផ្តួលក្បាលទៅលើទ្រូងមូលក្លំរបស់នាងតែម្តង
“ ខ្ញុំសន្លប់ហើយ Noona ”
“ Jungkook យ៉ាងម៉េចដែរ? ស្រួលខ្លួនទេ? ” Taehyung ក្រោយពីស្ងាត់មួយសន្ទុះទើបនឹកឃើញសួរនាំតាមមារយាទ ក៏ឃើញហើយថាគេមិនសូវជាហត់តែដូចសប្បាយនឹងការរត់ចម្ងាយនេះណាស់
“ ដើម្បីបងខ្ញុំមិនហត់ទេ ”
“ ... ” Simon បែរសម្លឹងមើលទៅកន្លែងផ្សេងទាំងត្រចៀកនៅលួចស្តាប់ ថ្ងៃនេះគេអាចសម្គាល់ដឹងយ៉ាងច្បាស់ថា Jungkook មកស្និទ្ធស្នាលជាមួយពួកគេក្រោមបំណងអ្វីមួយដែលគេមិនអាចស្មានត្រូវ តែថ្ងៃណាមួយគេនឹងបកអាក្រាតមុខមាត់ពិតរបស់អាក្មេងនេះឱ្យគ្រប់គ្នាបានដឹងមិនខាន
“ យល់ថាឯងរត់ជំនួសខ្ញុំ ល្ងាចនេះខ្ញុំប៉ាវពួកឯងញ៉ាំ Ramen Free free នៅហាងម៉ាក់ខ្ញុំចុះ ”
“ ពិតមែន? យេ! ខ្ញុំអាចជួបម៉ាក់បងហើយ! ” Jungkook លោតកញ្ជ្រោលទាំងរំភើបជាមួយស្នាមញញឹមដូចទន្សាយរបស់គេ
“ រំភើបអីដល់ម្លឹង? ” Tae គ្រវីក្បាលអស់សំណើចមុននឹងត្រូវ Simon បន្ថែម
“ សម្តែងសម! ”
.........
“ ម៉ាក់ ” Tae ទម្លាក់កាតាបរៀនចុះរត់ទៅរកម្តាយដែលកំពុងដាំស៊ុប Ramen នៅផ្ទះបាយក្នុងហាង
“ បាននាំបីនាក់ទៀតមកឬអត់? ” អ្នកជាម្តាយងាកមកមើលកូនប្រុសដែលអោបចង្កេះគាត់ពីក្រោយខ្នង
“ បាទនាំ... នាំលើសមកម្នាក់ទៀតផង Annto វាសប្បាយចិត្តស្ទើរហោះទៅហើយ ដែលម៉ាក់ហៅវាមកញ៉ាំ free free បែបនេះ ” Tae សើចចេញធ្មេញទាំងអស់ទើបអ្នកម៉ាក់សើចតាម
“ អាល្អិត ធ្វើដូចមិនធ្លាប់មកញ៉ាំចឹង ហើយមុខនិងក្បាលទៅត្រូវនឹងស្អីមកហា៎ស? ” អ្នកស្រីគីមអង្អែលថ្ងាស់កូនត្រង់របួសដែលបិទបង់ពណ៌ស មិនប្រាប់ក៏អាចទាយដឹងថាបីនាក់ទៀតក៏មានសភាពមិនខុសពីកូនប្រុសរបស់គាត់ដែរ
“ មានរឿងតិចតួច តែមិនអីទេ! ”
“ អ្នកម៉ាក់បាទ...! ” Annto ស្រែកបង្អូសសម្លេងវែងដូចផ្លូវ តាំងពីទ្វារចូលរហូតដល់ក្នុងផ្ទះបាយ ជាមួយដំណើរទ្រេតទ្រោត ធ្វើឱ្យ Taehyung ពេបមាត់ខ្នាញ់ នេះមករំអួយដាក់ម៉ាក់គេទៀតហើយ Annto ពូកែយកចិត្តយកថ្លើមសម្បើមណាស់ទើបម៉ាក់គេស្រឡាញ់អាល្អិតនេះខ្លាំង គេក៏ធ្លាប់គិតដែរថាគេជាកូនបង្កើតឬអាល្អិត Annto ជាកូនបង្កើតឱ្យប្រាកដទៅ
“ Annto ជាំមុខអស់ហើយ ចាំម៉ាក់ស្អំឱ្យ! ” អ្នកស្រីគីម សើចបណ្តើរអង្អែលក្បាលក្មេងដែលរត់ចូលមកអោបបណ្តើរ មើលធំប៉ុណ្ណាទៅហើយនៅមកធ្វើចរិតគួរឱ្យស្រឡាញ់បែបនេះទៀត
“ ឈឺខ្លាំងដល់ហើយ តែវាមិនស្មើឈឺចិត្តដែលនឹកអ្នកម៉ាក់ទេ! ”
“ នេះទៅរៀននិយាយផ្អែមបែបនេះពីណាមក? ”
“ Annto វារៀនតាម Chisun នឹងហើយអ្នកម៉ាក់ ” Taehyung និយាយនាំសើច អាល្អិត Annto ក៏បើកភ្នែកភ្លឺសៗមើល
“ រួចហើយ តោះនាំគ្នាទៅញ៉ាំទៅ! ”
អ្នកស្រីគីម Taehyung និង Annto ជួយគ្នាលើកចាន Ramen ចេញទៅក្រៅដោយមានកម្លោះៗបីនាក់អង្គុយចាំស្រាប់
“ សួស្តីអ្នកម៉ាក់! ” Chisun និង Simon ក្រោកឈរឡើងអោនក្បាលចុះព្រមគ្នា ទើបអ្នកម៉ាក់សើចហើយបក់ដៃប្រាប់ឱ្យងើបមុខឡើងអង្គុយចុះទៅ
“ សួស្តីអ្នកមីង ” Jungkook ក្រោកឈរក្រោយគេនិយាយគួរសមតាមមារយាទក្មេងធ្លាប់ទទួលបានការអប់រំ
“ ក្មួយជាមិត្តថ្មីរបស់ Tae មែនទេ? ” អ្នកស្រីគីម សួរពេល កម្លោះ Fire Swan ទាំងបួន នាំគ្នាក្រោកទៅរកទូរទឹកកកអស់ ដើម្បីយកភេសជ្ជៈខ្លះមកទុកផឹក
“ បាទ! ”
“ មីងផ្ញើ Tae ផងណា គេមិនសូវមានមិត្តភក្តិ មីងសុំតែម្យ៉ាងទេ កុំធ្វើបាបគេទាំងកាយទាំងចិត្ត ” ស្ត្រីវ័យចំណាស់ខ្ទង់សែសិបក្រាស់តែរូបសម្រស់នៅតែស្រស់ស្អាតនិងរាងកាយមាំមួនរហ័សរហួន សើចញឹមៗធ្វើឱ្យអ្នកម្ខាងទៀតហាក់ភ្លឹក ហេតុអីគាត់និយាយបែបនេះ? ឬគាត់តែងតែនិយាយបែបនេះដាក់មិត្តភក្តិគ្រប់គ្នាដែល Taehyung នាំមកលេងផ្ទះ?
“ បា-បាទ! ”
“ អ្នកម៉ាក់នាំ Jungkook និយាយពីអី? មើលមុខគេស្លេកអស់ហើយ ” Tae និងគ្នីគ្នាអង្គុយចុះហើយហុចទឹកដោះគោចេកឱ្យ Jungkook ព្រោះឃើញថាគេឧស្សាហ៍ផឹក
“ មនុស្សបើគ្មានអ្វីលាក់បាំង និយាយបន្តិចបន្តួចមិនចាំបាច់ភ័យដល់ស្លេកមុខទេ ” Simon ដែលដើរមកដល់ក្រោយគេដាក់បង្គុយជិត Taehyung មុននឹងនិយាយដៀមដាមទើប Jungkook ងាកមើលមុខ Tae ដែលអង្គុយនៅកណ្តាលទាំងទឹកមុខអន់ចិត្ត
“ នៅមើលមុខគ្នាធ្វើអី? នាំគ្នាញ៉ាំទៅ ត្រជាក់អស់ហើយ ” អ្នកស្រីគីមដែលមាន Annto និង Chisun អង្គុយអមសងខាងប្រញាប់ចូលខ្លួនទៅបំបែកបរិយាកាសយ៉ាប់យ៉ឺនរបស់ក្មេងៗដែលទាស់សម្តីគ្នាជារឿងធម្មតាទៅហើយ ថ្ងៃខ្លះ Annto និង Chisun វ៉ៃបោចសក់ក្បាលគ្នានឹងមុខគាត់ក៏មាន តែមិនដល់ប្រាំនាទីក៏ត្រូវគ្នាវិញហើយស្អិតរមួតដូចស្ករតាំងម៉ែ
“ Taehyung បងញ៉ាំឱ្យច្រើនទៅឆាប់ជា ” Jungkook ចាប់សាច់ពីចានខ្លួនឯងដាក់ចូលចាន Taehyung មួយដុំហើយមួយដុំទៀតរហូតដល់គេឃាត់
“ បានហើយ ប្រយ័ត្នអស់ខានញ៉ាំខ្លួនឯង ”
“ បាទ! ”
“ មែនហើយ Tae ឯងញ៉ាំសាច់ឱ្យច្រើនទៅឆាប់ធំ នឹងអាលវ៉ៃមនុស្សបោកប្រាស់ ” Simon ចាប់សាច់ដាក់ចាន Tae ស្ទើរតែអស់ពីចានធ្វើឱ្យអាល្អិតពីរនាក់ទៀតអង្គុយឆ្ងល់ឡើងឈឺខួរ ថ្ងៃនេះ Simon ដើរទៅជាន់ពែសំណែនរបស់គេឬយ៉ាងម៉េច ទើបធ្វើខ្លួនប្លែកៗបែបនេះ
“ អរគុណ! ” Taehyung សើចដាក់ Simon ទាំងប្លែកក្នុងចិត្តដឹងថាគេចម្លែក តែប្រហែលជាគេក្តៅខ្លួនដោយសាររត់ឆ្ងាយពេកទេដឹងទើបក្លាយជាបែបនេះ
“ អ្នកម៉ាក់ពូកែធ្វើ Ramen ឆ្ងាញ់ដល់ហើយ អនាគតប្រពន្ធខ្ញុំបើមិនចេះធ្វើម្ហូបដូចអ្នកម៉ាក់ទេខ្ញុំមិនយកដាច់ខាត ” Chisun សរសើរទាំងមីនៅពេញមាត់ ធ្វើឱ្យសម្លេងដែលនិយាយចេញមកទៅជាក្រឡុលៗពិបាកស្តាប់ ធ្វើឱ្យគ្រប់គ្នាអស់សំណើច
“ ចាំម៉ាក់ជួយណែនាំឱ្យ ”
To be continue......