طلعت جلنار من المطبخ بسرعة و لحقها رائد , و حطت السفره ع الطاولة و قعمزت تاكل بكل برود
رائد : نحكي معاكي انا !!
بحتت فيه جلنار ببرود و هي تقول " و متحكش !! يعني حد ضربك علي ايدك قالك احكي ؟ "
و كملت اكلها ولا كأن حد معصب جنبها
رائد : لو نكتشف انك دايره علاقه ..
هنا جلنار تنرفز بس مبانش علي وجهها , خبطت الكاشيك و حطاته ع الطاولة بقوه نين رائد ارتبك من ردة فعلها
برمت بجسمها وهي مقعمزه ع الكرسي عشان تقعد مقابلته و حطت رجل علي رجل و بحتت فيه ببتسامه عريضه مزيفة و قالت بهدوء اعصاب " و لو اكتشفت ان انا دايره علاقه ؟ شن تبي ادير ؟ حتطلقني ؟ "
ارتبك رائد و معرفش يرد شوي وقفت جلنار و حولت الابتسامة العريضه المستفزة و بحتت في عيونه و قالت " انت شن تبي مني بالضبط يا رائد ؟ "
وخر رائد خطوه لاورا وهو يبحت في عيون جلنار و هو يقول " مـ مفهمتش شن قصدك ؟ "
جلنار : بديت انحس انك قعدت متفاعل واجد مع حياتي الخاصه في الفتره الاخيرة , بديت تحبني مثلا و قررت انك تلعب دور الزوج فجأة ؟
رائد : لا مش هكي بس ..
قاطعاته جلنار وهي تقول : مفش بس , و متفكرش حتى مجرد التفكير لان انا مستحيل كون زوجه لك , و في الوقت المناسب حنتطلقو و كل واحد فينا يمشي طريقه
رائد : تمام , وانا هضا اللي انفكر فيه اصلا و مشفتكش ابدا ك زوجه
جلنار : تمام , انتمنى الشي هضا
رائد : انا اسف ان عصبت عليكِ , الفتره هذي ضط الشغل مخليني نتصرف بطريقه غريبه , بعدين انتي قلتي انعاملك كأخت او ك صديق و انا هضا اللي اندير فيه بس مش اكثر
جلنار : عموماً بالرغم من انا مش مضطره نشرحلك بس بما انك قلت ك صديق حنقولك , اللي كنت انكلم فيه هو اقرب حد ليا في المستشفى و اسمه قيس , طبيب و رئيس قسم الجراحة العامة عندنا و في نفس الوقت هوا صديقي من فتره طويله يعني تقدر تقول درسنا الجراحة و تخصصنا نساء ولاده مع بعضنا بس هوا بعد فتره انتقل للجراحة العامة , قيس و عادل هما اصدقائي الوحيدين في الحياة و معندش غيرهم
بحت فيها رائد بستغراب و قال " معندكش صحبات ؟ "
جلنار : للاسف انا انسانه ديما منبوذه حتى يوم تزوجت من شخص اول مره يعرفني مكانش متقبلني كزوجه , مفش حد متقبلني في حياته غير هضيما الاثنين عشانك هكي معندش ثقه في حد غيرهم , هما كل شي بالنسبة ليا
رائد : انا .. مكانش قصدي .. ان نفتحلك موضوع زي هضا .. انا بس خفت انك ..
جلنار : ان انا انكون انحب حد ؟ من اول يوم حكينا فيه قتلك انا وحده قلبها ميت , و عمري ما حنحب , لان منعرفش اصلا الناس كيف تحب , كل اللي نعرفه ان في ناس انحس بأن وجودهم مهم في حياتي مش اكثر
التفت جلنار و ركبت لداراها و خذت دوش و غيرت ملابسها و خذت مفاتيحها و شنطتها و موبايلها كالعادة و هي نازله من الدروج رن موبايلها , بحتت في الاسم لقاته ( اسماء ) .. فتحت علي طول و ردت ..
اسماء : دكتورة , في عندنا حالة غريبة
جلنار : شنو هي ؟
اسماء : انا و الدكتور عادل درنا عمليه لوحده و اثناء الولاده لبلاسنتا كانت لاصقه في جدار الرحم كأنها دايره جذور , معرفنش شن انديرولها
جلنار : عطيني عادل
و عطت اسماء الموبايل لعادل ..
عادل : دكتورة ؟
جلنار: عطيني تشخيص الحالة
عادل : لبلاسنتا لاصقه في العضله و معرفنش انفكوها و خفت نضغط عليها بالقوة يصير نزيف حادو تموت الحاله بين يديا لان في عندها اصلا نزيف خفيف و خفته يزيد
جلنار : الوضع خطير متلعبش فيه و اول حاجه قولي هي عندها نزيف ضعيف ولا متوسط ؟
عادل : ضعيف عندها و معرفنش انوقفوه فبالتالي الشي الوحيد ان قاعدين نعطو فيها في دم للتعويض
جلنار : هذي لازم تبي استأصال للرحم بما ان في نزيف , والا حيتحول النزيف الى حاد و تموت الحاله
عادل : يعني انديرلها عمليه اتسأصال ؟
جلنار : اها , و كلما اسرعت كلما احسن لان ممكن جسمها ميتحملش النزيف و خلي عينك علي ضغط الدم متاعها عشان مينخفضش ويوقفلك القلب , انا جايه في الطريق عموما و لو في حاجه بلغي علي طول
عادل : تمام
سكرت جلنار الخط و طلعت من الحوش و ركبت سيارتها وعدت للمستشفى
و بعد وصلت للمستشفى غيرت ملابسها لملابس العمليات و لبست فوقه البالطو عشان تكون مستعده
نادتها فاطمة من بعيد " دكتورة استني !! "
التفتت جلنار علي فاطمه و عدتلها " شن في ؟ "
فاطمة : دكتورة شوفي الحالة هذي نقلوها لنا قسم الاعصاب
بحتت جلنار في تشخيص الحاله و قالت بتفاجئ " سرطان في الرحم ؟ "
فاطمة : حتى انا تفاجئت صراحة , مكتوب ان عندها ورم عصبي في الرحم
خذت جلنار اوراق التشخيص و كلمت الطاقم عشان يجتمعو في القسم متاعهم
حطت جلنار التشخيص ع الطاولة و قعمزت ع الكرسي و استنت الطاقم يجتمع و قعمزو كلهم
جلنار : في عندنا حاله فريده من نوعها و يمكن حتكون اول مره اتمر عليكم
اسماء : صراحه مشفتش اغرب من الحاله اللي شفناها اليوم
جلنار : لا هذي اغرب
عادل : شنو هي ؟
جلنار : لما المرأة الحامل يكون عندها الاعراض التاليه
- نزيف - الشعور بألم في منطقة الحوض غير معروف المصدر- الخمول الشديد - إفرازات لزجة ذات رائحة كريهة - و احيانا يكون في تورم وانتفاخ الكاحل والساق
اسماء : الم مش معروف في الحوض و نزيف و افرازات لزجة ؟ اول مره نسمع بالاعراض هذينا !
محمد : حتى انا
عزيز : خاصة قصة الافرازات معمرهش مرت عليا في اي اعراض من قبل
قيس وهو واقف عن الباب : نقدر انجاوب انا ؟
التفتو كلهم علي قيس
عادل : دكتور قيس ؟ شن ادير هنا
جلنار : انا كلمته
عادل : اهاا
جلنار : تفضل يا دكتور
قعمز قيس في الكرسي اللي جنب جلنار و قال : عندها سرطان الرحم
تفاجؤ الاربعه و قالت اسماء بصدمة " سرطان في الرحم ؟ "
محمد : معقول ؟
عزيز : هو في حاجه زي هكي اساساً ؟
اسماء : اول مره نسمع عن سرطان يجي في الرحم !!
بحت عادل في قيس و قال " هذينا مش نفس الاعراض اللي جن لحالة انت درتلها العملية و توفت بين يديك هي و الجنين لانك مقدرتش تلحقهم ؟ "
بحتو محمد و عزيز و اسماء في قيس اللي نزل عيونه لوطه و تنهد و كأنه تذكر ذكريات مكانش المفروض يتذكرهن
بحتت جلنار في قيس و قالت بنبرة جدية " دكتور قيس مش وقت الذكريات اللي قاعد تتذكر فيهن , نبو طريقة نقدرو ننقذو بيها المريضه و الجنين بدون ما تصير و فاة المره هذي , لان الوضع خطير و السرطان ينتشر بسرعة في جسمها "
اسماء : دكتورة ممكن سؤال ؟
جلنار : تفضلي
اسماء : شن سبب الاصابة بالمرض هضا ؟ يعني كيف يجي النوع هضا من السرطان
جلنار : مش تأكده صراحة , قيس درس الموضوع هذا اكثر مني لان استلم حاله زيها من قبل
قيس : ممكن ينتقل عن طريق فيروس الورم الحليمي او أن يكون للعائلة تاريخ سابق مع أورام الرحم او التعرض لمرض الكلاميديا او الحمل المبكر أي قبل ما يكون عمر الفتاة 17 سنة فالشي هضا يساهم بشكل أو بآخر في تكوين الخلايا السرطانية او لتدخين و وسائل منع الحمل المعتمدة على الهرمونات على مدار سنوات طويلة , او إصابة جهاز المناعة بالضعف ..
جلنار : و برايك شن نقدرو انديرو عشان نقدرو ننقذو الحاله !
قيس : جلنار ممكن اتجي معايا لحظة ؟
خذا قيس جلنار علي جنب عشان يحكي معاها
جلنار : خير ؟
قيس : ممكن نفهم انتي شن اللي قاعده اديري فيه ؟
جلنار : مفهمتش شن درت ؟
قيس : انتي معندكش احساس ؟
جلنار : لا للاسف , بس برضو مفهمتش قصدك ..
كانن ملامح قيس باين عليهن التعب و الارتباك و التوتر و الخوف
بعدين بحت قيس في جلنار و قاللها بنبرة ممزوجه بالعصبية و الانزعاج " جلنار الحاله اللي حاولت ننقذها ماتت علي يدي هي و جنينها !! و توا جايه تسئلي فيا قدامهم كلهم شنو الحل و انتي عارفه ان انا مقدرتش ننقذ الحاله متاعي و ماتت !!؟ "
جلنار : لما تمر عليك حاجة معرفتهش او معرفتش اتشخصها او جديده عليك او حتى شخصتها غلط , شنو اول حاجه مفروضه علي الطبيب ان هو يديرها ؟
قيس : ....
جلنار : تقرا عليها يا قيس , تقرا و تدرسها بضمير عشان مطيحش في نفس الخطأ , وانا مطلبتش منك الشي هضا او سألتك قدامهم عشان نحرجك و نفتحلك جرح واجعك ! انا درتها لاني نبيك اتصلح غلطتك , لو قدرت تنقذ الحاله هذي حتردلك ثقتك في نفسك من جديد و حتبطل تحلم بالمراه اللي ماتت بين يديك و تأنيب الضمير اللي انت فيه ! ولأنها ماتت بين يديك انت حتكون اكثر حذر و جديه من غيرك عشان الغلطه محدش يكررها
بعدين سكتت جلنار شويه وقالت " قيس .. جا الوقت اللي لازم اتخطى فيه الموضوع هضا .. و ترد قيس متاع زمان "
بحت قيس في الارض و انسند بكتفه ع الساس و تنهد تنهيده طالعه من وسط قلب و قال " مش عارف , انا خايف .. "
ابتسمت جلنار ابتسامة خفيفة و قالت بنبرة هادية " انا جنبك متخافش "
بحت فيها قيس وهو حاسس ان قلبه يدق بعنف قريب يطلع من مكانه " عادي نحظنك كـ لحضات انسانيه ؟ "
جلنار : طبعاً لا , غير انك عارف ان انا اكثر وحده معندهش الانسانيه هذي , هيا امشي قدامي
قيس : بس ...
لجنار بتفنيصه " قدامي "
مشى قيس و جلنار و ردو للقسم و بدو يدرسو في الحاله كويس مع بعضهم ك طاقم و يدورو في حل عشان يقدرو ينقذو بيه المريضه هذي بدون ما تموت هي و طفلها
و بذلو مجهود جماعي و مر يومين وهم يدرسو في الحاله و ققرو موعد العملية
قالت اسماء وهي ماشيه في الممر مع قيس " بس يادكتور مش كان استنينا شويه "
قيس : مكانش ينفع نستنو اكثر من هكي لان السرطان ينتشر بسرعه و لو مستعجلنش يمكن يوصل في الجنين
طلبت اسماء و قيس قهوة للطاقم كله قبل العملية عشان يكونو مصحصحين
جلنار وهي تشرب في القهوة و تقرا " جهزتو المريضه ؟ تكلمتو معاها ؟ "
قيس : قاعدين يجهزو فيها
جلنار : هيا ..
تنفس قيس بعمق شويه قالتله جلنار " كلنا جنبك و انا اولهم , وانا متأكده ان مع بعضنا نقدرو انديروها "
قيس : ان شاء الله
في مكان اخر ..
في ايد كان واضح انها ايد طبيب لانها كانت لابسه البلطو متاع الاطباء و الايد هذي مدت ابرة في مادة لوحده من الممرضات
و الممرضه مدت ايدها و خذتها و قالت " ولا يهمك يا دكتور , اعتبر الموضوع تم "
عند جلنار ..
لبست جلنار ملابس العمليه وهي متحمسه و بقوة عشان تنقذ المريضه المصابة بالسرطان و تنقذ معاها قيس
خش الطاقم بالكامل ع العملية و معاهم قيس
بحتت جلنار في خديجة و قالتلها " كوني مطنه , حنبذلو كل جهدنا في انك تكوني انتي و الجنين بخير "
ردت عليها خديجه بصوت حزين و فاقد الامل " دكتورة نبيكي توعديني بشي واحد رجاءً "
جلنار : شنو هو ؟
خديجة : لو صار فيا حاجه في العملية .. انا مسامحتكم بس لو سمحتي حاولي تنقذي بنتي و حطيها في دار الايتام او اي مكان اخر بعيد عن اعمامها ارجوكِ , لان اعمامها يا اما حيقتلوها او حيخلوها في تركينه معزوقه نين اتعفن و تموت , ارجوكي انقذي بنتي , انا مقلتلهمش ان انا حامل ببنت , وهما يسحابوه ولد .. اعمامها قاسيين و مش حيرحموها و حتعذب واجد في حياتها بدوني , اوعديني انك مش حتعطيها لاعمامها لو صارت فيا حاجه
جلنار : ليش وين هلك ؟ البنت معندهش حد غير اعمامها ؟
خديجة : هلي متوفيين و انا معندش حد , بنتي باتها مقتول , واحد من خوته قتله
جلنار : لا حول ولا قوة الا بالله العظيم !!
امسكت خديجة في يد جلنار و قالت " اوعديني ربي يخليك و خليني نتطمن علي بنتي .."
جلنار : حاضر وعد بس ان شاء الله مش حيصير الا كل خر و ان شاء الله حتنوضي بالسلامة و تربي بنتي و تاخذي بالك منها بنفسك
و بعد كلام جلنار مع المريضه بدو العملية و ولعة الاشارة الحمرة اللي فوق قيم العمليات واللي اتدل ان في عمليه الان
كانت بداية العملية صعبة واجد و كانو يشتغلو بالبطيء عشان يحاولو يوصلو في الورم و يقصوه و استمرت العمليه ثلاث ساعات و مزالت ما كملتش و بعد فتره اجتازو مرحله الخطر و بانت الابتسامة في عيونهم و انهم الجهد اللي بذلو مراحش في الفراغ
جلنار : لقيت الاخير ..
و قصت جلنار الخلايا الاخيرة للورم و نظفتهن و قالت " كملت جهزي الحقنه .. " و طلبت منهم يحقنو المريضه و يستعدو لستخراج الجنين
جلنار : انتبهو خلو عيونكم علي نبض القلب و ضغط الدم ..
و بينما كانت جلنار تحاول اتطلع الجنين صارت حاجه محدش كان متوقعها
بدا الجهاز متاع ضغط الدم يصفر بسبب ارتفاع ضغط الدم بشكل حاد بدا يصير نزيف خفيف و بدن اجراءات الطوارء
جلنار : بسرعة هاتو المناديل ( مناديل طبية خاصة ) و اعلقو دم زياده بسرعه
اسماء : دكتورة !!
بحتت جلنار في اسماء بسرعة و قالتلها " عطيها methyldopa بسرعة !! "
كانت اسماء تجهز في الحقنة بسرعة بينما قيس و جلنار يحاولو يسعفو الحاله و ينقصو من النزيف
قيس : جلنار !! ضغط الاكسجين بدا ينخفض عند الجنين !!! لازم انطلعوه بسرعه قبل ما يصيرله اختناق !!
حاولت جلنار اطلع البيبي بس فجأة و بشكل غير متوقع انفصلت لبلاسنتا و صار نزيف حاد للمريضه و معش عرفو يوقفوه
كانت جلنار تعيط وهي تحاول تسد و توقف النزيف و كانو الممرضين يجارو يجبو في دم و يعلقو فيه بسرعه و يحطو فيه للمريضه عشان يلحقو و قيس يحاول يسد النزيف مع جلنار بس مفيش فايده و بسبب النزيف فجأة نزل ضغط الدم و صار هبوط حاد في لحظه و الجهاز يصفر
جلنار وهي تعيط " قيس !!!!!! المرا حتموت !!!! " و كان الدم يجي علي ملابسهم لعند ما تعبت بالدم
بدن دموع جلنار ينزلن وهي تعيط " القلب وقف !!!!!! القلب !!! "
حاولت جلنار بسرعة ادير للقلب انعاش بجهاز الصدمة الكربائية و هي تبكي و تعيط و مصدومه من الموقف و قيس يحاول يوقف النزيف , ومكانش في فايده من ايقاف النزيف ولا حتى من جهاز الانعاش فعزقت جلنار الجهاز علي جنب و حاولت اديرلها انعاش طبيعي عن طريق الضغط علي منطقة القلب بيديها
وقف قيس بعد تأكد ان الحاله توفت وقعد يبحت في جلنار اللي حالتها كانت خارجه عن السيطره وهي تحاول مزالت انها تنقذها و هي تبكي , كانت عيونه خايفه علي جلنار اكثر من خوفها علي قيس نفسه , لان قيس كان عارف ان الشي هضا حيسببلها صدمة نفسيه و خاصه ان المريضه مماتتش بسبب السرطان بس بسبب انفاصل في لبلاسنتا
موقفتش جلنار بكا وهي تضغط علي قلب المريضه , كل شي وقف , الممرضين و الاطباء في العملية و الاجهزة وقفت و كلهم قعدو يبحتو في جلنار اللي مزالت تحاول لعند اخر لحظه وهي دموعها الساخنة ينزلن
حاول قيس يحكي بنبرة صوت متألمه و هو ينادي فيها " جلنار !!"
بس جلنار مكانتش تسمع ولا تشوف في حد
رد قيس و كلمها وهو يقول " جلنار المريضة توفت وقفي ! "
عيطت جلنار بصوت عالي وهي معصبه و تقول " قيس متوقفش هكي تعال ساعدني !!! المريضه لازم تعيش !!! "
نزلت دمعه من عيون قيس وهو مش متحمل يشوف المنظر اللي قدامه اكثر من هكي و مسك يديها من معصمها بالقوة وهو يوقف فيها ويقوللها " جلنار المريضه توفت , اللي اديري فيه بدون فايده "
حاولت جلنار تبعد قيس بالقوة من قدامها بس القبضه متاع قيس كانت قوية وهو يحاول يوقفها وهي تعيط " قيس بعد !!!! "
بحت قيس في عيونها اللي كانن يعبرن عن الالم و كانن متورمات من لبكاء , دموع جلنار اللي قعدن دايرات خط علي وجهها من سخونتهن , كان واضح ان جلنار اتألم و قلبها مكسور كأن اللي توفت امها مش مريضتها
بحتت جلنار في عيون قيس و قالت بصوت متقطع و باكي " قيس ... مقدرتش ننقذها .. ماتت بسبب انفصال لبلاسنتا .. "
قالت الكلمة الاخيرة و مسكتها العبره وهي تبكي من اعماق قلبها مع شهقاتها الخفيفة اللي كانت تقطع القلب
كان وضع جلنار مأساه محدش يقدر يوصفها بشويه كلمات , لدرجه ان قيس ممسكش نفسه و نزلن دموعه معاها
حطت الممرضة الفوطه البيضه علي المريضه المتوفيه وهي تغطي فيها و انهارت جلنار و طلعت تجري لمكتبها
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو لقيت 40 تعليق و 30 تصويت = انزل الفصل التاسع بكرا