بلاسنتا
{ الفصل التاسع و الثلاثين }
جلنار " الشرطة معانا مباشر ع الخط عن طريق جهاز التنصت "
فتح فؤاد عيونه من الصدمه وهو يقول " شنو ؟؟؟؟؟؟؟ "
جلنار " اي كلمه من اللي قلتهن لك مفهمتهش ؟ "
مد فؤاد يديه في لحظه و حاول يخنق جلنار بس الشرطه فتحت الباب و مسكاته و قيس مسكتش و ضربه بقبضه يده علي وجهه و دفه بالقوه و كان فؤاد حيطيح ع الأرض بس الشرطي مسكه و سنده
بحت احمد في قيس وهو يحاول يهدي فيه " قيس !! اهدى ميصر شي هكي , خلاص هوا توا في ايد القانون و حياخذ جزائه "
كان قيس متنرفز و عطى نظره مليانه حقد و كره لفؤاد وهو يقوله بنبرة تهديد " تعرف قسم بالله لو مره ثانيه تحاول اتقرب منها ولا تلمس شعره وحده منها محدش حيخلصك من بين يديا تفهم ؟؟؟؟؟ "
طلعت الشرطه فؤاد برا المستشفى و من المستشفى لقسم الشرطه بينما دكتورتنا جلنار ابتسمت ابتسامة انتصار وهي تحس انها خذت حقها و حق امها و حق المرضى متاعينها اللي تعذبوا علي يد فؤاد و ان فؤاد حتنسحب منه رخصته و معش حيقدر انه يكون طبيب مره ثانية
و بعد انحلت القصه اللي كانت مكركبه حياة جلنار تقدم قيس لخطبتها من خوتها و طبعاً خوتها المره هذي حطوها حريتها في اختيار الزوج المناسب و وافقوا علي قيس و قعد قيس نسيبهم و دارو حفلة خطبه كبيرة
و اما سولي تقدم رائد لخطبتها و بعد محاولات رائد في تصليح قلبها اللي كسره قررت سولي انها توافق بس برضوا مزالت تعذب فيه و مسامحتش كلياً
اما فؤاد قعد ست شهور بس ايده طايله و طلع بواسطه بعد دفع الكفاله
- عودة للحاضر / بعد ست اشهر -
كانت جلنار اتفكر و هي اتمشى في حديقه بيتهم الواسعه وهي تبحت في القمر لمعلق في السماء و النجوم المحيطه بيه و تأمل فيها مع نسمات الريح البارده اللي تمر عليها و تلمس في خدها
تنهدت جلنار تنهيده عميقه وهي تفكر في حياتها و كيف ان فجأه كل شي انقلب فيها و تغير و كأنها عاشت حياة جديده مكانتش تخطر علي بالها انها حتمر عليها يوماً ما
جا صوت من وراها وهو يقول " في من تفكري ؟ حبيب القلب ؟ "
التفتت جلنار وراها بفزعه وهي تقول " منال ؟ "
منال " فجعتك ؟ "
جلنار " لا بس .... كنت سارحه شويه "
ابتسمت منال وهي تقول " ما قلتها حتى انا , سارحه تفكري فيه اكيد "
وطت جلنار عيونها في الأرض و ابتسمت ابتسامه خجوله وهي ترفع في راسها ببطىء و قالت " تقدري تقولي .... يعني .... نوعاً ما ..... "
منال " ايوه ؟! "
جلنار " يعني ... تقدري انقول ان كنت انفكر في المستقبل "
منال " معاه ؟ "
جلنار " هوا يعني انتي مصره تحطيه في النص في كلتى الأحوال ؟ "
منال " يعني المستقبل اكيد مش حتعيشيه بروحك يعني , و بالتالي اكيد هوا من ظمن خطط المستقبل "
ضحكت جلنار ضحكه خفيفه وهي تقول " اكيد "
منال " جيت انقولك العشاء جاهز تعالي كولي معانا "
جلنار "جايه "
