بلاسنتا || الإصدار القديم

Chapter 19

طلعت جلنار من غرفتها و لقت البيت مليان ناس غريبين متعرفش منهم حد غير والدة رائد

مكانتش عارفة كيف لازم تتصرف او شن لازم ادير لان جلنار انفصلت عن الناس من فترة طويلة و مكانتش اتقبل في حد خاطي الناس اللي اتقابل معاهم في المستشفى طبعاً , بس مكانش عندها اي خبرة في الوسط الاجتماعي او عن اداب الوسط هضا ان شن كان المفروض انها تقول او كيف تتصرف او شنو الكلمات المناسبة الي لازم تقولها و في حالة جلنار اللي كانت تعاني من مرض اللامفرداتية فمن المستحيل ان تعرف تتصرف بنفسها بدون ما تكون دارسه الموقف سابقاً او عندها خبرة فيه

وقفت جنبها مرات خوها منال وهي تقول بوجه ملوي " حتى في عزا باتك تتصرفي بالبرود هضا ؟ انتي انسانه اساساً , نبي نسئلك انتي اتحسي هكي طبيعي زي البشر ؟ انا بس نبي نعرف الملاح علي وجهك هذينا ميتغيرنش ليش ؟ "

حركت جلنار عيونها وهي حاسه بثقل في جفونها و حطتهن علي منال بدون ما ترد عليها

كملت منال وهي تقول " ربي يرزقني ببرودك يا شيخه ! "

ارتسمت علي جلنار ابتسامة جانبية حزينة خفيفة وهي تقول بصوت تعبان و مكتوم " ربي ميوريشي لكي حبيبتي "

وفي اللحظة هذي جت عين ام رائد في عين جلنار و كلمتها عشان تعزيها و تسلم عليها وهي تقول " وين كنتي ؟ معقوله من بدري و الناس اتدور عليكي "

جلنار " كنت في المستشفى و موبايلي كان خارج التغطيه لعند ما جا رائد خذاني "

بدت الناس اتعرف علي جلنار و تسلم عليها و تعزيها و كانوا الناس يحكوا من ورا ظهرها عن برودها و انها مكانتش تبكي علي بوها بينما الناس الغريبين يحظنوا فيها وهم يبكو بس جلنار مكانتش قادره اتفاعل معاهم

كانت منال مرات خوها قصي حامل في الشهر الرابع و لاحظت جلنار ان هي تمشي بصعوبة او بالاحرى مكانتش قادرة تمشي كأنه عندها التهابات و كانت تلمس في كتوفها و تفرك فيهن و من خبرة جلنار مع المرضى عرفت من لغة الجسد متاع منال ان كتوفها يوجعن فيها و قعمزت منال بصعوبة جنب وحده من صحباتها و كانت تبحت في جلنار و نحكي , و بالنسبة لجلنار كان واضح جداً انهن يحكن عليها بكل وقاحه عيني عينك , بس جلنار مكانش عندها جهد حتى انها اتفكر فيهن او تعطيهن اي قيمة

لان جلنار شاردة في عالم اخر , في دوامة اخرى لعند ما طلعها من الدوامه صوت عياط منال اللي كانت تنزف و طاحت اغمى عليها في الارض و اول ما شافتها جلنار وقفت بسرعة وبعدت الصبايا من عليها و حاولت تسعفها بأسعافات اوليه و كلمت رائد يجهز سيارته عشان ينقلوها ع المستشفى بسرعة بينما جلنار كانت تحاول اتوقفلها النزيف و كان قصي و ام منال معاهم في السيارة