وضاح:
زواج محمد ونهى ..ما كدرت احضره لان هو زواج اختي هم ..حضرت الحنه بس ..صبا راحت بالحنه لاهلها وبالليل بطريق رجعتنا قررت احجي وياها بعد اشهر زعل ...طبعا قبل ايام تصالحنا والصلح تم بليلة ولا اروع بس ومشكله صغيره ثارت بينها وبين امي بسبب اهمالها لاكلها خلتها تزعل وترجع تسكت واني مشمول بزعلها طبعا ..هي اذا تزعل ويه الهوا اكون اني وياه ...تحجي ويه امي واني قاطعتني ...بحفلة الحنه راسلتني برساله مو مهمة وجاوبتها بسرعه لان اعرفها اذا تاخرت تحسبها غير حسابات وتكعد تتحجج عليه ...
بالليل رجعت للبيت ونامت بغرفتها جوه ..نزلت البيت كله نايم وخطار بالحنه تارسين البيت ..شلون اطلعها هسه هاي واني ميت شوق الها ..دكيت على رقمها وجاوبتني مبين نايمه
-هاا وضاح
-يمج احد بالغرفه لو وحدج
-اي بنات خالاتك نايمات بالكاع ..وخالتك هم
-تعالي اريد احجي وياج
-انت وين
-هنا يم الدرج بس تعالي شويه
سديته وانتظرتها شويه وطلعت تتمايل بثوب بيتي قصير سيقانها البيض طالعات..بطنها الكبيره وشكلها يخبل مغريه حيل عصبت من شفتها
-ولج هاي شلابسه مو اكو خطار
-بس نسوان اخوانك ماكو وعفيه لا تكول بدليه اريد انام تعبانه واختنك من الهدوم الهوايه
-دتعاي صعدي فوك نامي
-وين؟؟ ..كالتها باستغراب شديد
-وين يعني بغرفتنا طبعا شعندج هنا بعد راح تخلصين شهرج الثامن وانت هنا
-وضاح اني ما اكدر اصعد الدرج
تقربت منها وابتسمت بعيوني وعضيت شفتي
-اشيلج اني!!
ضحكت وتتلفت بالمكان اخاف احد موجود
-امك ما تقبل
-شمدريها عود ننزل الصبح وهي ملتهيه بالعرس
-عفيه وضاح مو زين عليه
-وحق محمد ما اسوي شي بس اصعدي ارتاحي نامي فوك وانزلي شنو ناسيتني انت؟؟
-لا ما ناسيه واحد وكيح انت.. اخاف منك ما ناسيه ابد
-هههه ولج شمسويلج
-لا ابد سلامتك
كمشت راسها ومحجر الدرج
-شبيج حبيبي
-دايخه حيل الموسيقى وهوسة النسوان سطرتني
-ليش عيني انت ..روحي نامي ارتاحي بس ردت اشوفج واتطمن عليج .. والله ما رايد شي
تلفتت بالبيت وتقربت وحطت راسها على صدري واني ما اتحمل ابد هالقرب منها
-تعبانه هواي
-صبا ..هسه منو يتحرش ولج هو اني كوه كفيت عنج لا تشعليني
-نصعد فوك عفيه اني هم اريد انام زين
-هااا....مو ما تكدرين
-انت تساعدني
-اشيلج ههه؟؟
-لا بس اكمش ايدي وساعدني
-ههه ..صبا كاعده تلعبين باعصابي انت والله
-ديلا نصعد وضاح ضجت هواي ناس بالغرفه ما ماخذه راحتي وتعبانه ..اريد انام براحه
جرتني للدرج واني متردد ...خايف عليها حيل اخاف اصعدها ويصير الها شي شيخلصني من ام وضاح تهججني ..صعدنا بمهل وهي كل شويه تسند روحها على جسمي خبلتني فوك خبالي
وصلنا للغرفه وديتها للسرير تمددت وغطيتها وهي تدفر بالغطا وارجعه عليها
-وضاح حاره ما اريد عفيه
-تغطي تغطي يا بت ..حجيتها بضحك بلهجة الصعايده
ضحكت هي وتكشفت عناد بيه..شقاوة طفله يا ربي شلون اني وياها
-وضاح ليش ما تجي تنام
-لا اني حنام عالشازلون
باوعت عليه وابتسمت بخجل ..خدودها احمرت
-شبيج؟؟
-هيج تذكرت شغله
-اني هم ما ناسيها ..اولدي ونكملها
-لا عيني لا!!!
-مو بكيفج حبيبتي ...ما اريد اضايقج بنومتج يلا نامي مرتاحه حتى تشوفين شكد اني خوش ولد واخاف عليج
بوست وجناتها وجبينها وغطيتها رغم اعتراضها ونضحك ..شكد حلو من نتصالح ..يكفي ضحكتها هاي وياي كل شي ما رايد
رجع وجهها غيم وسكتت وهي تباوع بوجهي ودمع انترست عينها
ودي اعيد من البداية وياها ونمحي هواي شغلات غلط صارت بحياتنا ...
-شبيج عيوني انت؟؟
اختنكت بعبرتها وانطتني ضهرها زعلانه
-غير افتهم شصار مو حلوين احنا تونا جنا حلوين
-روح وضاح
-ما اروح اكعدي احجي شكو
-تفض الشراكه ويه هاي ال... وتعال احجي
-والله يصير اللي تردينه بس هسه شويه مدا اكدر
-فلوس اخذهم من بابا
-ولج شلون تقبليها امد ايدي لابوج صبا ما اسويها
-اني اخذ منه دين لحد ما تكدر ترجعهم
-مو قضية فلوس
-اي صح ما تكدر تفاركها حقك!!!
كامت من الفراش بقوة وكمشت ضهرها بالم ويه وقوفها
-شبيج عمري !!
-ما بيه عوفني
راحت للباب تريد تفتحها وكفت مقابيلها ساد طريقها ..دنكت تبجي
-عيوني انت اصبريلي بس هالشهر وافك الشركه
-شنو؟؟؟
-مثل ما سمعتي وهي دا تساعدني بالمحل تعرف للشغل زين
-انت وين لكييتها هاي بيا شارع
-تعاي ارجعي وتمددي واسولف الج من الاول
باوعت بوجهي بعدم اقتناع ورجعت بثكل كعدت بالسرير ..عدلتها ومددت رجليها وغطيتها
-هااا شوكت تحجي
-طيف خياطه معروفة..وعرفتها قبل سنوات من كان زوجها عايش نافستني فتره بالشغل ووراها تعارفنا قبل لاتجين انت ..زوجها مات قبل خمس سنوات
-خمس سنوات تعرفها
-اكثر صبا خمس سنوات من مات زوجها اعرفها قبلها بهواي
-انت شنو يعني دنت نفسك على متزوجه..تره لعبت نفسي منك والله
-لا ابد مو هيج صبا طلعتيني فد مره خليني افهمج....مات زوجها وولدها جانوا بعمر صغير واهل زوجها تركوهم فد مره وساءت امورها
-وانت حنين هواي مووو؟؟
-ولج دسمعيني
-ما اريد اسمع
عاطت بوجهي
-تزوجتها منقطع على اثر مشاكل صارت الها ويه ناس وكان بمعرفة ابويه لان اجتي واستنجدت بينا ما عدها احد
-وانت صرت الاحد مووو؟؟ وتكول ليش ما تريديني ...شنو اللي سويته احبك لاجله هااا؟؟ضربك لو خيانتك ؟؟
-هسه شكو هالعصبيه وليش ترجفين هالرجفة دكافي ملازم ما نحجي و ما خنت اني .. اي وكفت وياها وتزوجنا فتره وانفصلنا ومن احتاجيت فلوس للسفر رحت الها تساعدني وما ترددت ابد ولا لحظه... ساعدتني هواي ومن زعلتي لكيت حضنها يلمني وهم رجعت وساعدتني ولج مشتريتني بكل شي وانت جنت بايعه حيل شتريدين؟؟؟كل افكاري بيج لساج تدورين حبج الضايع
-اسكت
-ليش اسكت كلامي كذب!!
-اي كذب وافتراء ..تدري زين اكرهه وتدري اكره الزلم كلهم من وره سوايته بيه
بجت بقهر بعد ما كالت كلامها والله تعبنا اثنينا من هالوضع
-هسه شلون نحلها
-طلكها وعوفها
-طلكتها صار كومه
-طلعها من المحل
-ولج الها نصه
-شكد حقير انت!!
-لو ما مريضه افرك حلكج والله وابقيها واركعي راسج بالف حايط
-انت ما هامك غير شهواتك تهمك صبا يهمك طفل
-ولج لو ما هامني غير شهواتي ما ابقى عليج صبا ..غيرج تتمنى رضاي
-روح للي ترضيك لعد وعوفني
كعدت تبجي واني اكرض بروحي
-صباوي كافي عاد
-لا تحجي وياي انت شجان ببالك تكسرني هو اصلا اني مكسورة تره ما عندي احد حتى اللي جنت احسبه ابويه طلعت يتيمة من اجيت يمكم لا عندي اب ولا سند اذا نسيت اني مو ناسية كسرتني فوك كسرتي انت وهسه وبعد تتشفى
-ما فكرت هيج اني وكافي عاد شرحت الج الظروف كلها وانت هم جنت سبب جنت بازمة مالية وازمة اكبر من عفتيني اني بشر افهمي راح اغلط واصلا هي سدت نقص عندي بفترة انعدام الثقة بيناتنا
-اي وكلت اتزوجها ونوحد شغلنا واخذ فليساتها مو صح شكد خبيث انت
-اني ما كنت اريد اشاركها ..تزوجتها منقطع بفتره من الفترات ..وراها احتاجيتها وتشاركنا المحل صبا ...ما عندي شي وياها هسه وداعت ابني مدري بنتي اللي ببطنج
-ليش ما تطردها
-تدللين اطردها
-جيب موبايلك
استغربت طلبها بس اذا هذا شي يساعد انطيته الها
-شتسوين بي
-اشوف رسائلها
-هههه تره ما ترسل بطلت وهااا اريد احجي وياج شغله نسيت الموبايل متعمد
-شنو
-اي حتى تشوفيها
-ليش هيج
-شسويلج وانت تخبلتي عليه
-وهسه
-تره ما راسله شي وافتحيهن نفسهن
راحت للرسائل مالتها القديمه فعلا هي ما رسلت شي بعد ...خزرتني
-شكو محتفظ بصورها لساك اذا مو ببالك
-لان مو ببالي عندي الاصل شلي بالصور اذا اريد
ضربتني ببطني بعكس ايدها شلعت معدتي
-بعد لا هيج تسوي
-فدوة للتغار ..نامي حبيبتي نامي وين اكدر اشوف غيرج اني
باوعت الي بنظراتها البريئة دموعها اللي بللت طرق رمشها الناعس ...يالله بنيه ما تكبر تبقى نفس النظره الطفولية ..بوستها بلطف وانسحبت من يمها لان ما اتحمل اكثر بديت احس بروحي راح افقد..علمتني عالصيام حلوتي
وكفت اروح انام بغير مكان صاحت ورايه
-وين تروح
-انام هنا
-لا تعال يمي
-حبيبي اخاف اضايقج
-لا تعال
سوت الي مكان يمها كعدت عالطرف هي تدنت قريب مني وحاوطت بطني بايدها وضمت راسها بصدري ونامت عليه...بقيت ساكت ما اتحرك وهي تتكلب بحضني ...تمددت وجريتها الي قوي وغفينا بصلح بعد زعل طال هوايه
قررت خلص بعد هالمره تكون اخيره ...واخذها لحظني وارتاح بعد ..بنتنا ومستقبلنا الجاي اريده مثل ما رسمته بخيالي اول ما شفتها ..قررت افصل شراكتي حتى لو اضطر ابيع المحل .عرضت هالشي على اهلي ورفضوا المحل ينباع..بدوا يساعدوني اضافه لمحمد هم ساعدني بمبلغ جبير ...
مرت ايام ودبرت الفلوس وسددت طيف وبقت امور متعلقه ..اشترت هي محل بالسوك وبدت تنقل باغراضها...لحد الان صبا وهي ما التقن ...بيوم اللي دا تنقل اغراضها تفاجأت بامي وصبا جايات للسوك يجهزن للطفل لان قربت عمليتها ...بيومها فرحت بيهن وطلعنا وجهزنا اني وهمه ...اشترينا كل الشغلات المتعلقه بطلعة صبا ...بوقتها كنا نريد نعوض صبا عن ايام سبقت ما اشترينا بيها شي ...جهزت الها ولبنتها جهاز كامل وامي ساعدتني بمبلغ ...صبا ما كان عدها علم بس حسيتها فرحت حيل..اخذتها لصايغ واشتريت الها محبس وكلادة وتراجي وامي اخذت لبنتها هم قطعة ذهب ...
من رجعنا للمحل شافت طيف وتنرفزت وزعلت جديد ...رجعنا للبيت وهم ابتعدت وبجت وهالمره ما كدرت اتقرب ولا احجي وياها ...حقها بالزعل .. وليوم ولادة بنتي بعد ما حجت وياي ...بيوم ولادتها الكل حظور ابوها وامها واهلي كلهم ...دخلوها للعمليه مع خطورة على حياتها بسبب النزف ومرضها اللي تشافت منه لكن تبقى بي تبعات ومحاذير ..
ما اوصف حالي شلونه من قبل يوم ما نايم قلق وتوتر اقل من ساعه وزهت دنياي جديد بولادة النور بحياتنا .....نسخة فهاوة ونظيرتها ...ربي يحبني وراد بهاي تكون هدايتي وانطاني هالهبة الحلوة ..اول ما شفتها كلت الهم اسميها نور ...وسميناها نور لان فعلا كانت تشع حلاوة ونور وجهها وردي يخبل ...
ما اسولف عن امي وفرحتها بحيث من الفرح ..لفت نور وعافتنا ننتظر بصبا تطلع من العملية وهي اخذت البنية وكبل عدل للبيت خوف عليها من المرض والحسد ومدري سوالف نسوان ..عمتي ايدتها وراحت نور وياها وبقت صبا النا اني وامها
فاقت تسال على بنتها واحنا نضحك فشلانين من سالفة امي ...والغريب ابد ما تضايقت بالعكس كالت احسن شي سويتوه ...بتنا ليلتنا بالمستشفى بين سوالفي وياها وبين تعارف جديد وحب توه بدا ..طلع علينا الفجر واني وهي كاعدين ونسولف ...احساس الحب حلو بشرط يكون حب صادق ما بي اي كذب ...هواي كابرنا وهواي كذبنا مشاعرنا وبالاخير وصلنا لقناعة الحب هو اصدق كذبه يعيشها بشر واجملهن...
طلعنا والفرح ويانا مرافق النا ...صبا الي ونور لامي هههه...البنت وامها صارن دلوعات بيتنا ...صبا توها بدت تتعافى من اللي صار كله ...بذلت كل طاقاتي لاسعادها وبدت تبادلني مشاعري واخيرا ..
مرت الايام بين الشدة والرخاء وبين القسوة والحنين وبدينا صفحة جديده بحياتنا وطوينا زمن لن يعود ...
.....
محمد:
اول مشاكلنا اني ونهى كانت اهلي ..امي وبعض اخواتي ..ما حبوا طبعها الهادئ ولا استوعبوا هالهدوء وظنوه تكبر وعلو ..شكد حاولت اصلح بينهم ما كدرت .....اول مره بسبب خطبة ابو غيث اللي ما تمت بسبب وقاص اللي وكف اله وفهمه وكال بنت عمي ورايدها الي ولغى كل شي من يمه
...بيومها رجعت لكيت ام نمير يمنا وهي ونهى متواجهات ودافعتها لنهى ..امي ما كانت راضيه واحتجت واني طردت اختي لخاطرها ...ما قبلنا على تصرف اختي ..وكل اهلي وياي كانوا ..نهى ورغم كل اللي سويته متصله بوقاص اللي بدوره رزلني باتصال قبل لا افوت للبيت بلا ما افهم السبب وبعدني ما واصل البيت ابوها اتصل يفتهم مني شصاير ببيتي ..تفاجات بسرعة اطلاع اهلها على موضوعنا ولو بس ابوها ارضى لكن ابن عمها ..هيج بده الزعل ولا هي تتنازل ولا اني اللي اتنازل ...اسبوع افوت واطلع ولا كلمه تحجي وياي ...مللتني واحنا بعدنا عرسان ..عيطت صيحت وتزاعلنا اكثر ..امي انتبهت وكامت بالطالعه والنازله تحجي عليه مو هاي اللي اختاريتها مو هاي اللي ركضت وراها ...اي احبها وهسه وبعد مية سنة ابقى احبها ...
مرت ايام وهي ما تقبل تميل ولا تتراجع تعبت من الفراق وهي بجانبي واني ما حصلتها الا بعد تعب ...فتت بيوم تعبان كان موسم عيد وازدحام عندي ما كعدت من الصبح لحد الليل ...لكيتها محضره الي الحمام وملابسي ..الغرفة تلمع وهي عروس كعادتها ...الشعر واللبس دومها انيقه بنزاكتها وترتيبها تجبرني على محبتها ...قررت خلص بعد اليوم ماكو بعد لازم اسكنها حضني
...سبحت وارتاحيت وتعشينا ويه الاهل ..علاقتها بدنيا حلوة بنات عم وصديقات ..ضحكهن وسوالفهن توصلنا للهول امي وابوي ارتاحوا من عرك الجناين ومشاكلهن الما تخلص ابد نسوان اخواني شوفنهم الويل بالكيد والتسقيط ...صعدت نهى قبلي واني بقيت كاعد جوه ويه والدي ..حيدر سبقني واني ضليت ..والدي ما يفوته شي اندار عليه وحاجاني بهدوء
-كوم بويه بعدك عريس ..تره العمر خلصان واذا كل زعلة تطول هالكثر ما تخلص ...ولك كوم شعندك يم الشايب والعجوز ..يضحك ويأشر لامي المو راضيه بكلامه
-شبينا وما يكعد يمنا
محمد:انتو الخير والبركه يابه
-دكوم يابه اصعد لمرتك لا تضل وره السوالف تره تعيش متعلل وما تشوف راحه ...مرتك بنت اوادم وخوش بنيه عليش زعلان ..اختك اللي تعدت عليها
الام:اي اني هم ما رضيت على ام نمير بس مرتك ما تحجي وياي ...شوف محمد اني ما يفيدني هيج تتزعل وتجر بنفسها ...فهمها طبعنا زين وعلمها
الاب:يا مره خلي ابنج مرتاح بعدهم عرسان لا تطفريها للبنية منج ..كل ولدج انت اختاريتي نسوانهم شحصلنا ..بس هالبنوات حيدر ومحمد اختاروهن وشوفيهن شلون متراهمات
الام:ياااا غير عود هنه بنات عم لازم يتصافن
الاب:اي ام نزار واختها هم اخوات شنو شفنا منهن
سكتت امي واشرلي الي اصعد ...صعدت لكيتها نايمه ..مثل عادتها تنام بملابس مغريه حيل كوه دا اصبر روحي عنها...هالمره اطلت النظر لضهرها الصافي اللي تتوسطه ثلاث شامات يطيرن العقل ....كعدت خلفها وتلمست نعومه بشرتها بهدوء ...مررت شفافي بشاماتها ..وهي انزعجت وبدت تتحرك وصحت ..حاولت تتعدل بنومتها ما قبلت ..ثبتتها بحضني وبوست خدها وطرف رقبتها ....
-محمد !!
-اششش حبيبته وعمره انت
-اممم
-ما مقتنعه؟؟؟
-ما ادري مو شغلة قناعه ...صار اسبوعين وانت ما تحجي وياي شعجب اليوم
-اشتاقيت وما اكدر اتحمل اكثر
-اي وكل مره هيج احنا تزعل شهر وترجع ترضيني لان اشتاقيت ؟؟
درتها لجهتي وتقابلت عيوني وعيونها الحلوة...ساكتين اثنينا ما نحجي تالي ردت افهمها
-تره والله مشتاق من زمان اني بس انت حجر
-يعني منو المفروض يبادر
-انت!!
-صدك تحجي ليش منو اللي زعل ومشى ما يحاجيني
-هم انت
-ليش كله ترجعه عليه ..تره الزعل حقي
-ادري واختي تخاربت وياها لاجلج ليش اني هم انشمل
-اني ما زعلت منك انت زعلان وما تحجي وياي
-انييي!!! ما زعلان ابد
-منو الزعلان هسه؟؟
-محد زعلان وتعالي يمي راح توكعين من السرير اذا تضلين هيج تتسحبين
-محمد لا تلعب باعصابي
-هههه
-لا تضحك..لا تضحك !!!!!
جريتها لحضني ولفيت ايديه ورجليه حواليها وابوس بيها وهي اخيرا ضحكت..ما سمحت الها بالعتب ولا اني اعتب عليها ...تراضينا بليلتها ورجعت ايامنا الحلوة اللي ما تخلى من المشاكل بينها وبين امي .. ضغطت علينا هواي وصبرنا هواي ..نهى صبورة وتحملت وياي ..
وره شهرين من زواجنا حملت وحملها صعب وهي ضعيفه ..تبهذلنا لدرجة دراستها كوه كملتها لهذيج السنه ..ضغط علينا من كل جانب ...امي تريد منها شغل وهي تعبانه واني دا اشوفها ما تكدر ...بديت اتحير بينهن ام وزوجة ما متفاهمات..وصرت افكر بالطلعه من البيت وابوي رغم واكف وياي بس من وصلت لهنا حسيته انقهر وسحب نفسه شكد كان يحاول ويه امي ويضغط عليها هسه ترك كل شي
...نهى ما فاتحتها بالموضوع ما اريد املها بشي ما تام ...ضميت عنها لحد ما دبرت قطعه بصف اهلي ووالدي ساعدني بشراؤها..
امي من عرفت زعلت زعل ثكيل وتمرضت ..ما كدرت اعوفها هيج وبنفس الوقت اخويه الجبير طلع من البيت ...كنت حاير وما اعرف شسوي ..نزلت الها احاجيها اخواتي موجودات كلهن زعلانات لزعلها ...ما قبلت تحاجيني
صعدت مهموم للغرفه كانت نهى كاعده ترتب بملابسنا ...شافتني واجتي بابتسامتها الهادئة ..كعدت يمي وتسولف شافتني ضايج ومقهور بقت تلح تريد تعرف السبب
-نهى اني اشتريت هالقطعه اللي براس فرعنا
-صدك والله ..كالتها بفرح وعيونها تلمع
-اي نهى وامي من سمعت تمرضت
-يااا يعني على هاي من هذا ما تحجي وياي صارلها ايام
-وانت ما سألتيها
-لا تعودت هي دومها هيج وياي..محمد انت على هاي ضايج
-اي نهى انت تشوفين المساله ما تحتاج اضوج عليها
-لا ابدا تعال وياي
..
نزلنا من غرفتنا لغرفة امي ودخلت نهى واني دخلت وراها كعدت يم امي واخواتي هي اجتي عليها وهي متمدده بفراشها ودنكت عليها بوستها
-ها عمه شلون صرتي هسه
-الحمد لله ..جاوبتها بامتعاض
-تروحين طبيب ناخذج اني ومحمد ..
-لا ما اريد
-اسويلج شي تاكليه عاجبج شي
-لا سلامتج
-اكوم اسويلج شوربه خفيفه تاكلينها
كامت من الغرفه وامي شويه خفت عصبيتها ..رجعت وره فتره شايله شوربه وكعدت توكلها وتسولف وياها احاديث عامه ...عفناهم يسولفون
متناقشات بموضوع الطلعه من البيت ونهى مطمنتها ان احنا ما مفكرين اصلا نطلع ...والقطعه ضمان لمستقبلنا ...بيومها امي ارتاحت واني ارتاحيت من كثر الزعل وهذاك موقف نهى لهسه ببالي ..ذكاء تعاملها ويه امي خلاها تغير هواي من نظرتها الها ..امها وابوها كانوا خير ناس ودوم ناصحين ما يخربون ..وبالاخير هي لو ما هالمشاكل اللي ما الها معني عيشتنا ولا اروع ومرتاحين كلش بحياتنا...
ارتاحينا وحمل نهى غير هواي بحياتنا ..دنيا وحيدر فاجأوا الكل بقرار الطلعة وامي شكد حاولت وياهم ما كدرت تثنيهم وطلعوا الكل وبقينا احنا وياهم ...مو اني اللي انقهرت لحال امي ..نهى اكثر تاثرت وياها ..امي انكسرت وتمرضت من صدك هالمره ما تكدر تمشي صارت ..صح الكل يجون ويشوفوها ويداروها بس كلهم بعيدين وهنا ام نمير طوال هالاشهر مانعها اني تفوت للبيت ..شافت امها وكعت واجتي ومنو اول من استقبلها ؟؟؟..نهى بطيبتها اللي ما انعرفت عند بشر ..كل يوم تطلع بشي اروع وتسعدني وتحببني بيها اكثر ...اكتسبت الاحترام باسلوبها وفرضت نفسها عالكل وصارت هي الاول والتالي بالنسبه لامي وصارت الاعز من بين بناتها واولادها وزوجاتهم...حياة كاملة وعمر ابتدى بخطأ والذكي اللي يكدر يصلح الخطأ وما يبني فوك اساس رخو بنيان سرعان ما ينهدم ..نهى اسست بيتها من داخل بيتنا وبدت بعلاقات طيبه ومراضاة وكل ما اسألها تكول ربك ما يوفقنا اذا نقطع ارحامنا ...فعلا تربيتها مختلفه ..رباية بيبيتها ام شهاب المره العطوف اللي بسمتها ما تفارق ثغرها ...ولحد يومنا هذا نهى ما تتصرف شي ان ما كانت ماخذه رأيها بي
وقاص:
بعد كل شي ...اخذت الاهل ورحت لبيت عمي ابو مهدي..ردت موافقتها ..كنت متصورها ما ترفضني هي تحبني وتريدني ..تأكدت كلش منها
قبل اسبوعين كنت لاغي خطبتها لصاحبي وباسلوب اقرب بالنهوة ولو هي ما تشتغل عدنا هالسوالف بس نهيت عليها كدام ابو غيث حتى اكطع كل امل اله بيها ..ضام هواي بروحي الها ..كعدنا وكانوا ويانا صبا ووضاح وبنتهم نواره اللي بعدها باللفة
بعد السلام فتحنا الموضوع والكل استبشر ..امها وشهاب ما معترضين وكالوا ناخذ رأيها ... ثواني وطلعت هي واكفه وتصيح بوجهي ما اريدك لو تبقى اخر واحد بالدنيا ما اخذك ..كلمات هواي ما حفظت منها شي تعابير وجهي كعادتها عكس دواخلي ادعيت التجاهل وعدم الاهتمام وكمت طلعت ...عفتها خلفي منهارة وامي تتعارك وياها ...
الصوت العالي والتجاوز ...ما احب هالنسخ من النساء وربي جعل نصيبي اثنين منهن امي وحبيبتي ...طلعت واني افور بغضبي ما متعود هيج شي اني ما انزل روحي لاحد غير ربي الخلقني انزلها لمره ...كلبي احسه يريد يطلع من مكانه ..شتريد يعني اتوسلها هسه
مشيت لسيارتي صعدت وسديت بابي عليه ...بنات مهدي طيحن حظنا ...اخويه صاير لعبه بايدهن ....بس هو عالاقل مرتاح وراضي اني ما ارضى ولا راح اقبل تتحكم بيه مره
عفت اهلي وطلعت ....دكوا عليه ما رديت بوجهي طلعت لبيت جدي بديالى ارتاح منها ومن تفكيري
كضيت نهاري سبح بالنهر رغم برد الماي ومو وقت سباحه بس ما فرقت وياي اريد عصبيتي تخف واعصابي تبرد ...ابن خالي عمار مكابل الجرف وكاعد يخاف عليه لا يصير بيه شي ..عرف ضايج واكيد وضاح مخابره...
طلعت قرب المغرب لبيت جدي ...هو يمشي ويحجي عليه ...اريد بس انام هلكت روحي تعب ...فتت لغرفتي اللي مخصصتها الي جدتي اريد انام وارتاح ..فاتت وراي الحجية جدتي ..ام امي عمرها نهاية الثمانينات.. قويه حيل وحكيمة بنت شيخ واخوها شيخ ..كانت مسؤوله عني وتقريبا ربيت عدها اني وعمار ابن خالي ..البيت كله ماشي بحسها ..كعدت يمي وطبطبت على ضهري
-هاا يمه ارتاحيت
باوعت الها بتعب ومددت بالفراش هي كملت كلامها
-ضحكت وضربتني بخفة على ضهري ولك وقاص واكع انت ..يبيبي صار عمر منتظرة اشوف شراح تختار وشفتها الف الحمد لله الله نطاني عمر وعافية لهاليوم
-اي وشتكولين
-اتذكرت سالفتك اني الما اخذ وحده وكحه گويه ولك هاي اوكحهن ههه
-جدة رفضتني
-يا جدة خل ترفضك هو انت من يجرعك
كعدت وعدلت دشداشتي بعصبيه
-شبيه جده ..هااا شبيه
-ولك مرمرتها للبنيه وبعدك ما متزوجها ..اي سالفة الخطبة الوهمية ما مرت بجيسك ..كلت الك ما تمشي وياها
-جدة شوريني
-اثكل ..الثكل زين
-خايف تروح من ايدي
-ما تروح المهرة ما تدور غير خيالها
ابتهجت بكلام جدتي وتأكيدها الي بنجاح خطتنا اني وياها بصيدها للعنيدة وترويضها
-جدة تظنيها تقبل
-تقبل بس اصبر انت
-رفضتني اليوم
-اكسر واجبر انت
-يعني
-حاجيها اليوم وباجر ازعل عليها هه
-راح تكرهني
-ابد ما كارهتك هي بس تتغلى ..انت هم شوفها غلاتها
-جدة ما اريدها وهي هيج ..طبعها ما يناسبني
-يتغير بس اعرف شلون تغيره انت..وانت هم لازم تتغير
-شبيه اني
-بيك هواي يول خبلتها بعنادك كلت الك لا تجذب وتحرك رويحتها يالاغم جان هسه ماخذها انت
-شسويلها يوميه سالفه ...اخرها هذا الواطي اللي مسميه صاحب طلع يريدها
-الغيرة مو هيج هذا خبال
-اي من توصل لهنا اني ما اتحمل بعد احسها ارض وبأسمي يصير احد يطردوه من ارضه ويسكت
-خلص خلها تمر فتره وارجع اطلبها
-ابد لو اموت بعد ما اسويها
-يول لا تعاند
-اذل روحي ..شوفي وضاح شصار بي
-شصايرله اخوك ومرته عين الله عليهم خاف على رويحتك اذا راحت من ايدك شتسوي عود
-ما اخليها تروح
-تضل تعارك
-ما ادري جده كل شي ما ادري حرت وياها
-خليها لوكتها ..انت وهي بعدكم مو فيد زواج بعدكم
-ههه شنو جنج شايفتني صغير يجده
-اي وما عارف تتصرف ..البنية تربت هيج ما تجي انت بعمرها هذا تتزكح عليها والبسي وروحي وتعالي ..انطيها وكت وسمعها بلا ما تجرحها
-وصوتها العالي وتجاوزها
-هاي انت متحسس وتخاف تطلع نسخة امك ههه
-غير امي بنتج
-امك سباعية وذيبه ما ترضى بالعوجه وما يعجبها الا اللي يمشي عدل وما يمييل ...لا تضل شايل بخاطرك منها
-اني ما سويت اللي سواه وضاح وهيج تسوي وياي وهاي اني كملت قانون ونجحت اكثر من باقي اخواني هي السبب بابعادي .... امي ما عرفت تحتوينا بسبب عصبيتها وتسرعها ما اريد اطفالي يتأذون مثلي
-ههه تتذكر اول مره شفتها شجيت كتلي
-شوكت نسيت اني!!
-كلت شفت الكمر كاعد بكاع النقيب ههه
-اي وثاني مره ضربتني بطابوكه فجت راسي ....هههه والله ذكريات ..تدرين جده ما تعرفني ابد
-اي ما تتوقع هذاك اللي جان مخبل يلح وياها نفسه الزلمه اللي هسه يضوجها ورايدها بنفس الوكت
-تدرين مره هي كاعده تقرا يمكن صف ثالث متوسط بكاع بيت ابو شهاب فتت وشمرت عليها حمامه ميته ...بيومها رادت تموت من الخوف هههه بعد ما شفتها بالچول(البر) ابد جده اذا هسه اذكرها اتوقعها تبطل زواج
-اي يجوز
-جانت تخاف من شكلي ووجهي اللي تشوه
-ميخالف ماضي مر وقدر راد يصير
-هالنوب هي صارت الا تكعد بالمكانات اللي احبها
-باكت مكان بقلبك من هذيج مو؟؟
-لا والله ابد جنت اتهزم منها واخاف تعرفني شافتني بأسوأ ايام ..كله من وراها لبنتج
-كافي سدها لهالسيرة
-ليش تخافين احجي عليها
-كافي وقاص امك هاي
-تدرين شكد جنت اضوج من صبا اختها من عاشت بيناتنا وعرفتها ...تغيرت نظرتي الها والايام خلتني التقي بيها وخدمني نسيانها لوغاص المخبل ...جانت العرب كلها تصيح وغاص وهي عبالها هذا اسمي...حبيتها جده وكلت الها احبج شتريد اكثر
-مكلف نفسك والله كايل الها احبج ..وقاص كلت الك ان شيعت هيج على روحك وكلت خاطب ما تكسبها تخسر اكثر
-والحل
-اصبر وضل متاني تجيك دام هي تحبك..انت تدريها تحبك
-اي متاكد منها تحبني ولازم ترجع الي.....