كذبتي الصادقة❤

٢٤

بارت قصير 😥

هذا اللي سمح بي وقتي بهاليوم متابعة ممتعه 

  صارت خطبة نور اخت منير ..صديقتنا واختنا وباعتبار بنت عمنا ..اخذنا بابا ورحنا لديالى مشية الزلم تجي لهناك وهو لازم متواجد ويه العمام وولدهم ..احنا كان موقفنا مضحك لان عمامنا الطرفين ..بس ميلنا اكثر لبيت جدو ابو شهاب ...بتنا يومين بديالى كان خميس وجمعه ..اني وصفا خطوة خطوة ويه نور رتبنا بيت جدو لان المشية ببيتهم وحضرنا كل شي من ضيافة وحلويات وعشا لان اتفقوا يبقوهم عالعشا ...تحضرنا وعمه اسراء نظفت حواجبها لنور شويه لان همه من النوع اللي حواجبهم معقودة من الوسط ..شالت الزايد بس ورتبتهم .. حلوة طلعت حيل بعد ما رتبوا وجهها ...ثاني يوم وبدت العالم تجي اقارب عمو شهاب وعمه ام منير ومن اقارب عمه رحاب هم اجوي ناس للخطبه..ناس اجتي من قبل الغدا يساعدون بالشغل هذوله الاقارب القريبين واكو للعصر يلا اجوي...همه حلو طبعهم وكلها تلتم بالفرح ...تغدينا وكاموا البنات لغرفة نور كلهن يرتبوها ويسوولها اجواء فرح ....كعدت بينهن اني ما اعرف اتصرف بهيج لمه بس صفا بدعت ...مكيجتها ويه عمه اسراء وتهلهل وكل شويه تسويلها فعالية لو تركص لو تهوس وامي تصور وتدز لصبا اللي تتحرمص عاللمه الحلوة ..

تونسنا بيومها كلش وصفا بطبعها المرح تكدر تسوي احلى اجواء حضورها مميز جدا..كانت لابسه فستان لون اخضر زمردي فاتح...مهدول من صفحة وعدل من الثانية بي طيات هوايه من جهة وحده..لايك الها حيل ..طويل ومشغول من كتفه لنهايته والطيات زايده جسمها جمال ومبينتها ارشق وهي اصلا جسمها قالب مصبوب يرهم الها الملابس ويكعدن وزايدة اناقتها ببروش من نفس اللون بتسريحة شعرها الاسود الفاحم المموج خليط الوان رائع كانت ويه بياض بشرتها المضوي ...اني اختاريت فستان نازك لونه وردي فاتح بسيط جدا تول جواه قماش لين مريح ...ما بي تفاصيل هواي والحجاب لونين اسود ووردي صفا سوته الي لفة حلوة من هاي مال اليوتيوب ومكيجت بس عيوني رسمة كحل بسيطه وخفيفة 

...العروس كانت طالعه تجنن بفستانها القصير الاحمر الناري اللون اللي اختاره الها خطيبها ...صارت الحفلة والخبصة ..كانت هي خطوبة وهي مهر بنفس اليوم ...اهل عمه رحاب حضورهم كان بقوة وذبوا لحم من الركص ..بناتهم كلهن نسخ منها ملامح خشنه وسمر وبينهن صفا تضوي بنصهن هم تركص وهي طويلة ولا بسه كعب ذبتهن صفحة..الخبلة كالت الا اكعدهن وصدك كعدتهن وهي وحدها تركص هي وصديقتهن هي ونور ..نور طايرة من الفرح بس طبعها الخجول ما يلائم شلتها ابدا !!

...العصر طلعوا العروس بالحديقة بعد ما لبست فستان ثاني طويل مستور وخلوا حجاب على شعرها لان هنا الحفل صار مختلط هم تونسنا لحد وقت الغروب ..لبسوها الذهب وقدموا الضيافه وبعدها قدموا جفافي المهر (توزيعات)اللي لفيناهم اني وصفا ونور ..مهرهم كان جبير وحضوره هواي ...كانت الحفلة كبالي ورجعت لذكريات قديمه حلوة ببالي مخزنه عن هيج اجواء ...منير وخطوبتنا واللمه اووف يا منير شكد سنين مرت وكأنك وياي كل تفصيل وكل لحظة حلوة انت بيها...ما كدرت ابقى بالمكان مشيت منهم وقصدت مكانا اني وهو المكان اللي شهد اول لقاء واول اعتراف منه الي ...بستان جده اللي انهجر بعد موته وكأنه كان الحياة بيها ومن غاب ماتت...اباوع اشجار المشمش كلها يابسة ومصمغه وقت الخريف والاوراق مفترشة ارضيته وهواها صارعبالك سم على عافيتي ..انهاريت وعيوني تغشى شوفها بدموعها ....ادور عليه محتاجه اله ...كعدت ابجي بقهر جوة عريشة العنب اللي لونها صا اصفر مثل حياتي ارتجيت على جذع نخلة بالممر الوسطي ...سمعت صوت من بعيد وقاص ووياه شباب يتمشون شايلين بنادق صيد والجلب مالته سابقهم طبعا وقاص ما يفوت هيج فرصة ..ظيالى والصيد والسباحة بالنهر ..كل اسبوع هو هنا ببيت جده اهل امه ..شافوني من مسافة قرببة ..مشيت وتركت المكان بسرعه واني امسح بوجهي تلاكيت ويه محمد اللي كان متوجه عليهم صرنا وجه لوجه..وكفت متفاجئه بي وهو مثلي ..محمد مغير تسريحة شعره وشكله كله مزين عادي وممشط حلو ومحدد سكسوكه ..طالع غير شخص