صفا:
ما اعرف شسوي وره ما عيطت ولطمت وروحي صعدت للسما ورجعت الي ...ليش هيج سوه بيه ..كال احبج وسمعها الي وخلاني متامله ويعوف تالي ويخطب ...اسبوع اني ما طالعه من غرفتي وفراشي مل مني ومن دمعي ..ودي اطلع واروح لبيتهم واعيط عليه اضربه ..بس كرامتي المجروحه اضعف من ان اوكف خلتني اني اعترف اله بحبي واعترف بتعلقي وتالي هاي جزاتي ..غبيه ويني وين الحب ليش هيج اذيت نفسي ...امي اللي دوم استهزأ بنصايحها وما اسمعهن احدى نصائحها اجتي فت وياي تعرف اذا انكسر قلبي مستحيل اتحمل ..شكد ادعي القوة هسه احس روحي ماتت ...
نهى تطل كل شويه عليه وتحاول تحجي وياي بس ما الي خلك حتى احجي من القهر تمرضت وحلكي كله تقرح الاكل صار عليه بالكوه ...وحجي نهائي ماكو وصخونه ليل نهار ...بابا خطيه يحير شيجيب ادوية وشغلات تخفف عني ..انقذتني نهى لما مخبرته اني مقهورة على صديقتي الميتة يكعد ساعات يواسيني على صديقة هو ما يعرفها ...كان ما يفارقني مرات اكعد بالليل الكي واكف فوك راسي يقيس حرارتي
مر الاسبوعين هيج ...شلت موبايلي واتصلت بصبا اعرف اكثر اخبار ما حجت عن الخطبه ولا كالت شي سألتنها عن العرس جاوبتني عرس وسام ما محدديه وعرس دنيا ويه نهى صار ...اريد اسألها وكرامتي ما ترضى..كنت شويه مستعيدة قوتي وتوني يلا صحيت ...سديته منها بعد ما بجيت شويه
الايام اللي بعدها التهينا بتجهيزات عرس نهى ..اني لهيت نفسي بالاهتمام بروحي وخاصه الفتره الفاتت بسبب القهر والمرض ضعفت فاستمريت بنظام معين للاكل ورياضه وغيرها ..نهى سوت جلسات عنايه بالبشرة بمركز تجميل لوجهها وصار الي واهس رحت اني هم وصرفت مبلغ مو قليل لهاي المسائل ...ردت انهزم من واقعي ونجحت اتجاوز ازمه ولو بشوية تعديلات تعزز الثقة بالنفس وتزيدها ...
كل شي اوك رجعت اداوم ورجعت لحياتي ما قبل دخول قاتلي الها ...لاغاضته اني اعرف شسوي ..نشرت فيديو طلعنا بي اني والشلة اللي حرمني حتى اماشيهم ..رحنا بيها لبابل سفرة للاثار ...صورت كل خطوة ونشرتها لكروب العائلة ...كل شويه واباوع لموبايلي اكول مراح يتحمل ..بس خابت امالي وتراجعت حالتي بعدها ..ما اهمه اني ولا بعمره حبني ..
قررت بعد خلص وقاص ماكو ينشطب من قاموسي لا اعرفه ولا يعرفني ..وفعلا طبقت ...تقريبا شهر بعدها اتصلت بيه حماتها لنهى ...اني شفتها بس بحفلة خطوبتهم وبعد ما تقابلنا ...بعد السلام والكلام ...صدمتني بكلام ..تريدني لحماها وساعه تحجي وترغبني ..رجل ما نكول عنه شاب لان كان ثلاثيني مطلق عمره بين ٣٤و٣٦ ...رفضت مباشرة لان فعلا مو وقتها ومو وقت افكر بزواج لان اعرف نفسي ما راح اتوفق بي حاليا والموضوع ككل اجلته لوقت اخر لحد ما اتناسى اثار هالمستبد الاهوج..بين ما نسولف هي بقت تحاول تقنعني واني رفضت بس كالت حتتصل بعد وافكر وتسالني هاي المره شاربه نفط يمكن🙄🙄
.. دزت صوره وصور جهاله الاثنين ...انبهرت بصراحه بي وبالمكان حواليه ..عبالك تعرف دائما الشكل يجذبني ويبهرني اني اخرب واتكهرب 🤭🤭وهذا احدى عجائب الدنيا..
..ابيض وجهه دائري بحمار ..ضخم جسمه متساوي ..كانوا اكثر من صوره وحده بالزي العربي ووحده بقاط ووحده يلاعب جهال لابس ملابس اعتياديه تونز وجينز ...وضحكته مبينته شخص مرح عكس اول صورتين ..سيارته راقيه كلش ما اعرف للسيارات بس علامتها هيج مستطيل طولي بي صليب يمكن بحثت بالنت اسمها لينكولن ههه وين اني ووين هذول ههه اصلا ما افكر بالزواج بس الفضول بعد ... شايفين الفراغ بالحياة اني هاي بعد وقاص ما عندي شي وصور صارت بايدي شسوي باوعت قابل اغمض هههه
..ركزت بكل تفاصيل الصور ودققت حتى على اسنانه..هذا يريد يخطبني ويشوفه وقاص وياي وينجلط هههه ادري ينجلط ..اوكفي صفا وين رحتي عيب اصلا تفكرين هيج اني اذا اتزوج شخص اتزوجه لشخصه مو حتى اغيض بي شخص ما يسوى اصلا ومنو يكول يهتم ...شمرت موبايلي بعصبية طز حلو وعنده فلوس واخلاقه عكس هالشي شصخم بي ... وقاص سوالي احسن درس بهالمسالة الشكل بعمره ما كان كافي ياما شكلهم حلو واطباعهم زفت
..ما اجازف ابدا اني...رديت عليها ما هامني الله يحفظه لاولاده وفعلا كان هذا دعائي اله ما افيده ولا يفيدني وين اروح للجنوب هو اني بغداد وما كدرت اتأقلم الا بعد مده ..صح احب الريف واحب القرى والاماكن المفتوحة بفعل سكني بقريه اكثر من عشر سنوات وكانت الاجمل بطفولتي ومراهقتي وشبابي ..بس هسه تعودت اني مو من النوع سهل التأقلم يحتاج الي وقت ....
سديته منها وفكرت بالموضوع جديا اذا اريد اقهره لوقاص اخذ هذا الرجل لان هو موازي اله بالشخصيه واحلى شكلا وحتى احسن يمكن لان ميسور ماديا بس تبقى حياتي وياه شلون تصير
اتصالها الثاني كان وره يومين وهم نفس الكلام عادته وكالت لايكين لبعض اول ما شفتج كلت انت وياه متوالمين ..تعذرتها بان هو مطلق وعنده اطفال واني ما اكدر اتزوج بعيد عن اهلي ردت بسرعه عنده بيت ببغداد ويكعدني بي ...منين ما اجي تطلع الي ..بالاخير كالت حوصل اله كلامج وصدمتني بكلامها
-صفا هو شافج تره وكال اللي تريده يصير واني حاضر
-توترت حيل وارتبكت... يعني وين شافني؟؟
-قبل اسبوع شافج بكليتج ويعرف كل شي عنج وكلش مقتنع
-شنو؟؟
-هو جاي لكليتج وشايفج
-ام نمير رجاءا ما اتفقنا احنا هيج
-هو ما ضايقج كال اشوفها من بعيد ورجع مصمم ورادنا نجي لاهلج بس اني كلت اله ننطيها علم ..نهى الله يسلمها نحجي وياها ما قبلت اصلا تكول الج ورفضت من يمها بحجة اهلكم ما ينطوه
-اي فعلا ما ينطون واني ما وافقت تره
-براحتج مو غصب هي بس دا اكول الج..عالعموم تسلمين ..اعوفج هسه اخاف شغلتج مع السلامه حبيبتي
-مع السلامه ام نمير واني اسفه اخاف ضايقتج
-لا والله انت هواي ابسط بالتعامل من اختج ليش ميته عليج اني ومتمنيتج والله اله ..رادت تكتلني وزكحت عليه هههه
-تعرفيها لاختي تسوكها بتبنها هههه
-اي ادري هي على نياتها ما تقصد تزجر بس اني لحيت وياها مو شوي هواي لحيت خبلتها ..يلا حبيبتي مع السلامه يا وردة
سديته منها بعد ما امتصيت غضبها بسياسة ..اول وتالي هي حماتها لنهى الغبية واخاف تعاديها ما اريد اسبب الها اي اذى بهذا الموضوع خاصه اعرف نهى كوة دا تمشي امورها ويه محمد ..اصلا تتشكى لامي دوم من جرأته الغير معهودة بالنسبه الها وامي تدافع عنه اني مكتفيه بتقييم مسبق اله ..شاب حب وحده ووفى بوعده الها واخذها كلش كافي ينال اعجابي هيج ..يا ترى اقاربه الشيخ الجنوبي هم مثله ...بس والله صاك ..عمي هي كوه اني صاكه اجيب صكوك فديتني وفديت طولي ربي يخليني الي ويمو....لا لا اقصد يحفظ القاهريني ..حتى بدعائي عليه ادعيله ...اووف يا كسرة الروح حبيبي مقص 😍😍
باوعت بالمرايا على شكلي اتامله ..ليش راح خطب غيري شاف بيها وخطبها قابل احلى من هالخلقه والله مال اوافق واحرك روحك ادري بداخلك ميت عليه بس شلون وكبريائك كال لا ..اوف كله مني الا اتجاوز عليه بس هو يستاهل يريد يخنكني واني ما انخنك ... نبته بريه ما تنبت الا بارادتها هذا وصفي دوم اللي اوصف نفسي بي...
بقيت اتأمل هواي وافكاري تودي وتجيب ..فاتت نهى كبل تذكرت وخزرتها سالتني شبيج ما رديت عليها ..ما اريد الموضوع ينعلن ولا اكول خابروني وهيج وتفاصيل ..سكتت عنها ولو بودي اكسر راسها بس اكول كافي عليها ضغط محمد وعرسها القريب اللي تبين بدت تتقبل فكرته وتستعد اله
مرت ايام وطلعنا اني وياها وام محمد للسوك وانصدمت بهذا الرجل كان حاضر ..مدري شجاني تخردلت رغم اني واثقة من نفسي بس جيته كانت معروفة جدا ..عيونه مثل عيون الصقور ما فارقتني ..كان لونهم بنية فاتحه بلمحة عصبية ..الشكل بالواقع احلى من الصور واكول عن نفسي ضخمه هذا احلى واضخم ..ما حجى شي ويانا بس ويه زوجة اخوه وهي منطلقه وتضحك وكل شويه تندار تاشرلي عود شوفيه
...بينها وبين نهى نظرات الرهن والتحدي وبيني وبين هالغريب نظرات خجل وتوتر واضحه مقابل نظرة رجل واثق جاي لغرض محدد واداه بكل ثبات وقوة ..خلاني اضم روحي وره كشن السياره واسكت ..حضوره قوي وصوته الجهوري يخلي الوحده تضيع صوتها ...نزلنا للسوك من سيارته مبتعدين صرنا قرب محلات جدي لان نهى مخليه ملابس يم وضاح ..كنت اسرعهم اريد انهزم من عيونه وقابلتني عيون ثانيه بنظره مشابهة ..ما اعرف شسوي ..بين هذا وهذا الغاضب اللي تقدم النا بثقة ووكف وخلاني بضهره
وقاص :يا هلا ابو غيث..حياك تفضل
كان يكول اله تفضل بس ملامحه تطرد ههه
ابو غيث :لا تسلم ابو سعد ..وصلت ام نمير والبنات وكلت انزل اسلم
شنو ابو سعد عووع بطلت ولا اتزوج بعد اذا ابني اسمه سعد 😭😭
-حياك الله يا هلا بيك ...اليوم باقي
حلو الظاهر يعرفون بعض يعني ضربة وقاص بالصميم اخذ من الشله مالته يبووو عليك يا مسكين
-اي باقي ..جمعتنا يم عابد ان شاء الله باجر مو ما تجي ..مسكوف يم الشط وراها طلعة گنيص (رحلة صيد) باطراف بغداد
-اووف مو جانت على ذاك الصوب وجهتنا
-لا الوضع مو تمام يكول ابو محمد ويخاف عالشباب اهل المدينه ما يروحون اذا هناك ..مو ما تجي ازعل والله
-لا ما افوتها كبلكم تلكوني اني وعمار ولاكي هههه...
-ههه عمار منريده اهم شي لاكي غير نديح
كنت واكفه وراه واتحرمص صيد وطلعة بر اووف شكد حلو اجلب بايده اكوله وياك اروحن ابن عمي ..تذكرت زعلي عليه وانهضمت ..عابت شكو خطبت جنت اريده ياخذني برحلة من رحلاته هذني ويعلمني ارمي ببندقية الصيد ولو هو اني اعرف ...
..طلعت من وره ضهره مبتعدة عن ظله ما حاجتي بعد بهالظل وصاحبه تركني ...تلكاني ذاك بنظراته اللي اكلتني ...وراها انتبه لوقاص اللي بيناتنا مثل السد صار ..انتبه اله منزعج وعصبي كاله كلام كلنا فهمنا مغزاه
-مبروك وقاص كالوا خاطب
-لا منو كال !!
عيوني شلتها اله بدهشة وهو يحجي بثقه ودي اضربه على قهري طول الفترة الفاتت واطلع ناري بي
-مدري الفيس وكالوا خاطب وصلت اخبار
-لا لا خطبة ولا شي .. الشباب بخوالي وسوالفهم تعرفها !!
كان حديثهم بدا يتوتر وهذاك ترخص بعد ما وجه نظره اخيرة لام نمير
-اترخص اني عندي شغل هاي وصلتهم ..ام نمير محتاجين شي
-سلامتك ابو غيث اريدك سالم
لفت عباتها ومشت لمحل وضاح وتبعتها نهى واني وراهن بس ايده كمشت كفي اخرتني عنهم ..شوي وهمس بعصبيه واحنا ماشين
-انت وتالي وياج
جربتها قوي منه ..لساني متشوشة شيريد مو خطب شكو بعد
كلت اللي بداخلي بصوت يرجف
-خطبت انت شكو هالحركات
باوع باطراف عيونه للناس حوالينا نظرته المعتاده يرصد بيها المحيطين
-امشي لمحلي نتفاهم
-وعلى شنو نتفاهم
-ما خطبت اني وامشي مو مال وكفه وسوالف بباب المحل
-واني انخطبت واشرت اله للي مشى اشعله اكثر ..و
مشيت لمحل وضاح بهمة وهو وراي اخر كلماته كانت
-صفا بالليل نتفاهم ردي علي..
ما جاوبته فتت لمحل وضاح وراهم وانصدمت بشريكته اللي امي ونهى شافوها قبل ايام واجني يلطمن ....
ضيقت عيوني من شفتها ووجهت نظرات السخط لوضاح اللي يحاول يكون طبيعي بوجودنا ووجودها ..عرفنا عليها اسمها طيف ..اللهي ياخذج ربنا وتشيلين اسمج بحق تجوبين الارض برداء ابيض 🙌
بقيت اشتعل بمكاني عبالك ضرتي كاعده كبالي ..كامت دا تشتغل يم مكينة لابسه بنطرون ضيق وقميص قصير مو طويل نص ردن وردانه بيهن فتحات تهوية كل ما تشيل ايديها ينرفع وعود هي محجبة ما تحملت اكثر ..ابو قياسات ما مهتم ..طبعا شابع بيها ... كمت من مكاني يمها عود دا اتفرج عالمكاين وسويت نفسي ما شفتها طخيتها بكتفي كومتها بالكاع هي وكعبها السن اللي كوه كادرة تمشي بي كومتها ..
اووه ما شفتج واعذريني ومن هالسوالف ...هي تباوع الي بخزر وساكته ..ام نمير تأشر الي بابهامهاok ونهى مفتحه عيونها وتنتظر التالي ...كامت تنظف بملابسها من تراب الارضيه واني مبتسمه بانتصار فوكاها وبس تباوع تجاهي اسوي نفسي كاتلني القهر والذنب هو لو بيدي اذبحها بس ما كدرت
...وضاح يضم بضحكته ابو قياسات والله لا اكول لمرته واشعلها عليه ...مرتاح وهو يتفرج عالسفاله وقلة الادب بسيطه ..طلعنا من المحل وهي تخاف تفوت من يمي بعد طخت عدها هههه بس تدرون بعد فترة هلكد طالت كلش ارتاحيت بهالقدر من الانتقام وباقي انتقامي من وقاص اني اله ابو خشم ..الغرور والتسلط والكبرياء اخليهم يطلعون من عيونه بسيطه ....ولد رحيبه مكيفين واحد يخطب واحد ابو المتع دصبروا لعد
رجعنا للبيت واتصل وقاص ما رديت وانطيته حظر ان خاطب وان لا بعد ما يهمني مرضي ووكعتي والقهر اللي اكلته قسى روحي عليه وخلاني ابعد اكثر ...الحب من طرف واحد اهون من حب بهالطريقه عالاقل الواحد يتعذب بلا ما يدري الحجر بي ..مو يدري ويتعمد اذية المحب..رفضت احجي وياه وهو مثل كل مره ما يتعب نفسه يريد مره يوضح ويشرح مو يعتذر واني اضل مرات اقدم قرابين الطاعه والولاء لفخامة شخصه وسموه العالي...
مرت فتره وصار عرس نهى وكان جميل جدا تفاصيله تقسمت علينا والفرح مشاركه ..فرحتنا بيهاما تنوصف واخيرا لكت السعادة وطريقها ...بيومها كنت لابسه فستان طويل احمر مثل مال نانسي باغنية ما تجي هنا وانا اقولك ..مال ملكة البطيخ هههه بس اكيد اني مو نانسي الضعيفه انا هيفا انا هههه
..المهم ..هذا الفستان غير هواي شغلات بالقاسي وقاص ...واولها بنهاية الحفلة بالليل ..وقاصوه اتصل يغرد مثل سابق عهده واني اضحك من كل قلبي على حركة دمه بس اني اللي اتأذى خلي يجرب احساسي ...ونهيت اتصالي وياه بان يتحكم بخطيبته وبلبسها وماله حكم بعد عليه لان اني بدوري راح انخطب بعد اسبوع ...
هههه نفسها لعبته القديمه تحققت واذا هو يكول كذب وردت اغيضج وضل يبرر ويشرح .....اني خطبتي حقيقية وابو غيث داز خبر ونسوان لامي يطلبني اله ....الموضوع وصل لوقاص مثل ما سمعتوه هسه امه سمعت واعترضت وكالت ابني رايدها ...عمي تفاجأ لان ما يدري شكو ...
صبا تكلي اخذي الغريب وماما تكلي اني ما الي دخل اختاري انت ....وبابا يكول رأيها هو الاول وهو الماشي ...اني بكل هالسوالف صافنه منو اللي دز لوقاص صوري بالفستان ..اني هالمره ما تصورت وكنت حريصه محد يصورني غير ماما واخواتي...منو منهن 🤔
قبل يوم من المهلة بان نرد خبر لاهل ابو غيث ...اتصلت نهى تبجي متعاركه ويه ام نمير وتكله لبابا اريد ارجع ما ابقى يمهم ...بابا رزلها باعتبارها عروس عيب ترجع ومن هالمسائل وخاصه بعد ما عرف محمد ما اله يد بكل المسأله ونهى واخته متعاركات بينهن ...وخربت الخطبه كلها وتفركشت وما فهمنا السبب ..اني فهمت السبب وكلش زين اصلا اعرفه بس غلست كلش 🤭🤭
يا الله هالثنائي يذكروني بيهم مو بيدي اروح اروح وارجع عليهم 😂😂