حكمـة ذئب

الحكمة الرابعة

اهلا حبايب ❤ شنو رأيكم بالرواية للان ولو انقطاع النت ماداينطيها حقها والتصويت قليل ..
(4)
#حكمـة_ذئب
#بقلم_شمس_السعدي

قد تظن أنك على  هامش الحياة بينما أنت شمس، تشرق بقلب أحدهم و لأجلك يبتسم..

اول مرة احس بالموت قريب عليه هيج .. وكأنه شريط حياتي مر گدامي .. كلشي ماشفت بس طفولتي ..
امي لمن تعوفني گبال التلفزيون وتگلي خلصي الكارتون ونرجع نكمل كتابة .. تنطيني وكت بين ماارتاح وهي تكمل شغلها ..
تطلع من الغرفة ويرجع ابوي تعبان ورغم تعبه ووگفتة من الصبح لليل بين الدوام وشغل الگاع ..
يدنگ راسه يبوس گصتي .. ويجيبلي وياه نستلة ..
هاي النستلة تخلي فرحة شكبرها بگلبي اگوم اگمز ..
وتدخل امي تعبانه من شغل البيت والمناگر المايخلص دوم اسمع عمة لميعة شلون تتعارك وياها ..
وامي ماتحجي بس توصيني مااطلع لان تخاف عليه منهن .. تالي عافتني وحدي وراحت .. خلتني للدنيا مثل التايهة ومااندل طريقي ..

من خربت ووگعت لمن جبت .. گلت هاي اني متت ورحت اشوف ابوي واخيرا راح ارتاح من هاي الدنيا البقيت بيها وحيدة .. شوية سمعت صوت جدي يأذن ويحجي .. فتحت عيني ولن شايل طفل بيده ويبوس بي وينده عليه انت اسمك حكمت ..
نزلت دموعي وصحت جدي حكمت هذا… .
ضحك والفرحة ماليه عينة .. شجرالج يرضوة اخذتي حيلي يبوي من خربتي .. بس الحمد والشكر اله دعواتي ماراحت ورجعتيلي سالمة انتي وحكمت ..

شو خلي اشوفة ..
هاج يبعد ابوج شوفيه .. بس الجدة گالت تريد تلفلفة بالگطن جيف ماكامل تخاف عليه .. اني راح وراجع مااتأخر ..
صحت وراه جدي وعمتي شجرالها .. صدگ عمي فارس
سكت وهز راسه .. لاتخافين يبنيتي عمج يرجع ان شاء الله مادام مامش خبر عنه معناها عايش ..

دعيت من كل گلبي يرجعلها سالم .. عمتي حمدية مثلي مكسور خاطرها من صغرها بس عمي فارس الي جبره صح مااعرف بالعلاقات والحياة الزوجية شني .. بس من عيونها عرفت گد حبها اله .. من تحجي بي عيونها تگوم تلمع ..

بقيت نايمة من التعب والخوف الشفته .. ماحسيت الا بالجدة ومخليه حكمت بوسط الگطن .. جنت مااتقربله اخاف بعدة صغير اشوفة .. رغم كلهن يگللي عمرة جن تسع شهور مو سبيعي ..
وبالليل كله يبجي والجدة تجبرني اگوم ارضعة واني مااعرف .. والصدگ روحي تلعب من اخليه على صدري احس يوجعني .. مرات ابجي من اشوف حالتي واجت ايام اشمرة مااريده اگلهن .. وابجي اريد عمتي حمدية
جدي من يوم الجبت ماشفته جنهم عافوني هنا وراحوا
اربعين يوم واني ما عشت بيهن مرتاحة وعيني ماشافت النوم من البجي .. عمتي مااجت وجدي اجه واساني وبقى يحجي ويگلي كبرتي وابنج ماله احد غيرج .. حتى ماشفته  البنات والجدة متكفلات بي .. وحتى مااعرف منو يرضعة بس بعدين شفت سعدية ترضعة وي ابنها وهو تعود عليها ..
ضجت وحسيت بشعور غريب من شفتها حاضنته وتبتسم وهو على صدرها .. خفت تاخذه مني مثل ماالدنيا اخذت اهلي وحياتي .. صدري اصلا يوجعني جيف ماارضع .. گمت من مكاني وصحت .. انطينياه اني ارضعه .. ابتسمت وشالته خلته بحضني ..
اي هيج صيري سباعية .. هذا جبدة منج وسندج لاتهمليه .. علمتني شلون ارضعه وهو جان جوعان وماشبع من سعديه اول ماخليته على صدري رضع سريع اذاني حيل .. صحت وغمضت عيني بس تحملت الاجله لمن شفته شلون جوعان كسر خاطري .. كلشي مااشوف منه ملفلف بالگطن بس عيونة جانن وساع ومكحلات .. يشبهني كلش .. ضحكت وعيوني ماشلتها عنه ومن يومها هو صار دنيتي كلها ..
صرت اخاف عليه من الهوى ومااقبل احد يشيله غيري والجدة حسنة لان تغيرله الگطن وتبدله ..
بيومها جابتلي دجاج كاملة بالتشريب وگالت اشربي مايها بالاول وبعدها اكليها كلها .. انتي نفسه وترضعين وماي الدجاج يگوي عضامج ..
كم مرة ماگدرت اكل مالي نفس .. بس هي جبرتني وهددتني ماتنطيني حكمت ارضعه ..

بعد ماخلص اربعيني واني وحدي لاام لاعمة لااحد يمي . قرر جدي نرجع الحوشنا .. خفت بداخلي بس اشتاقيت الغرفة اهلي وعمتي المااعرف اخبارها ..
عمتي ماتعوفني لو ماصايبها شي واخاف جدي ضام عليه ويخاف لااضوج واني جايبه ..
لميت غراضي كلها والبنات بيومها يبجن لان راح اعوفهن واني هم تعودت عليهن شهور اني بنصهم ماحسسوني بشي ودللوني اكثر من عمامي واهلي ..
سعدية وصتني ازورهم جيف تعلقت بحكمت وتكول احسه صار حاله من حال كريم ابنها .. ووصتني اسلم على حمدية واوصللهم اخبارها ..
من طلعت اني وجدي حملونا بالغرض والحليب دبات والروبة والدجاج ووصتني اتغذى ..
رجعنا والطريق كله عيني ع الدرب .. كلشي مابي تگول صحراء مدري شلون عايشين هنا .. بس شكلهم مرتاحين ومتوالفين گلب على گلب ..

كلما يگرب الطريق الحوشنا گلبي ينقبض .. و اول ماوصلنا جدي موصيهم يحضرون ذبيحة الحكمت تنذبح بدخلتنا للحوش .. شفتهم ذبحوها واني غمضت عيوني وحضنت حكمت ..
فرحت من شفت عمتي حمدية گبالي .. ركضت الها حضنتني وتبجي .. واخذت مني حكمت وهي تصلي على النبي .. اتقربت عمتي لميعة واول ماشافته .. والله ورضوة العايبة صارت ام وكبرت..  بس شو جن هذا مو اسبيعي جبير ومربرب .. خزرتها عمتي سكتت ودخلت جدي وفرحته بينا سكتتهم كلهم ..
جانت بس العيون تحجي وتتحلف ومااعرف شناوين الي ولأبني .. ابني… مرات استغرب من اسمع هالكلمة وبعدها ابتسم احس عوضني عن كل الي راحوا وخاصه من اشوف ضحكته بوجهي ..
جدي صاح .. مهدي العصر تجيب الشيخ ونعقدلكم .. وانتن تطشن السالفة بالمنطقة والگرايب .. مرت مهدي جابت ولد ..

بعد مادروا برضاء حامل .. جدها طرش للعالم كلها بان ابوها مأمنها عند مهدي وطالب منه يتزوجها بعد ماانكسر بختها بموتت حسن .. وحتى يطمأن عليها .. فالناس كلها جانت عندها علم انهم متزوجين ..
بتول كل هاي الفترة جانت زعلانة ومارجعت الا لما سمعت برضاء رجعت .. دخلت وشافت الشيخ طلع منهم ومهدي خلص تزوج رضاء وصارت بذمته ..
تخبلت ودخلت على رضاء للغرفة موتتها لو ماحمدية تجرها منها .. ومهدي حضنها واخذها للغرفة. .

الحجي خضير .. صاح بيها . اسمعي يبتول صبرت عليج هواي مو عساس رحتي من شهور وگلتي ماارجع  بعد هسا عرفتي عندج حوش ورجل .. لو طرشتلج خالتج واجيتي راكضه .. منا وجاي اهي مرتة مثل ماانت مرته وانت يمهدي تعدل بينهم وتفهم مرتك تعگل وتستجن وتحافظ على بيتها ..

رادت تحجي سحبها مهدي ودخلها للغرفة .. جان ضعيف گدامها حبها من الصغير الى ان حصل عليها وهي تعرف هالشي وتدلل عليه .. كم مرة راد يرجعها وراح يتوسل بيها بس هي ماقبلت وخيرته لو يخليلها حوش ويعوف اهلة لو ماترجع  ..
بس من رجعت رضاء وابنها ركضت لميعة الجيرانهم وخابرتها ووصتها تجي الرجلها لايروح منها..

بتول جانت تبجي وتدفع بي وهو من اشتياقه يحضنها
ويبوس بيها بكل مكان .. وحلف مايوصل الرضاء ولايتقرب الها .. وانها مرته وحبيبته وماتاخذ وحدة مكانها .. هدأها وهي حلفت انه تحطم حياة رضوة وتخليها تهج من البيت ..

مهدي جان يسوي كلشي حتى يرضيها وبيومها دخل عليها هي بدل رضاء .. وكأن هذا اليوم يوم زواجه من بتول بعد اشهر من الفراگ .. وماطلعوا الا وي اذان المغرب راحت حمت الحمام وسبحت هي ومهدي وطلعت تتمختر وتحاول تغيظ برضاء .. والثانية اصلا ماببالها مهدي او بتول .. جان فكرها يم لعباتها مثل ماتسميها ..
وحمدية تضحك عليها ..
- ولج كبرتي وصرتي ام وانتي بعدج تتصرفين مثل الجهال ..
- ياعمة هو اني شلحگت بعدني ماشبعت لعب لسا من اشوف كارتون گلبي يطير من الفرحة ..
- يعمة شنسوي هذا قدرج ومكتوبلج .. اريدج تصيرين سباعية وتاخذين حگج اليوم اني يمج باجر موش هنا . مهدي صار رجلج مثل ماهو رجلها حافظي عليه لاتخليه يوم يعوفج ..
- مااا خلي يعوفني مااريدة اصلا اخاف منه ومااحبه
- ولج ويامن احجي اليوم ابوي عايش ومساندج انتي وابنج باجر مني الج ..
بجى حكمت گمزت اله وعافت عمتها تحجي وحدها ..
لليل دخلت بتول مبدلة ومتمكيجة وتضحك بحقد ..
- هااا يالعايبة لاعبالج مهدي يعاين عليج .. اصلا مهدي مايشوف غيري ولاتحلمين بي وهالتشوفين هالليلة يمي وكل ليلة .

ردت حمدية .. لابيض الله وجهج .. جاي تتفاخرين نسيتي حجاية ابوي وشگال .. لاتتباهين اذا مو اليوم باجر ولاتنسين رضوة حلوة وصغيرة ويجي يوم تحلى بعينه بعد ماياخذج الكبر ..
- عمة شو جن عاجبج تخربين بيتي مثل ماخرب بيتج ورجلج گرطتي مدري هج منج وشافله ايرانيه وعافج

حمدية تخبلت من كلامها شالت يمها طاسة ماي وشمرتها بيها وخربت وجهة بالماي .. عافتها وطلعت وهي تحجي وتهدد ..

التفتت حمدية ودمها فاير من حجي بتول.. وحلفت الا تخلي مهدي ياخذ رضاء وتكسر خشمها ..
باوعت الرضاء شلون تلعب وي ابنها وماهمها حجي بتول وماسمعت يمكن الي صار كله ..
فار دمها اكثر .. وگامتلها .. كرصتها ولج اني اتمالخ علمودج وانتي حايرة تلعبين وهي الفرخ وماهامج الحجي..
- اخ عمة شبيج واني شعليه شسوي ..
- تخلين مهيدي يجيج للغرفة ..
- ماا اكرهة نسيتي شلون ضربني هو وعمي مايحبوني .
- باقي يثولة هيج لمن تبقين انتي وابنج بالشارع ..
گامت حمدية وتحجي بينها وبين روحها وتندب حظها الي خله بتول وغيرها يتشمتن بيها ..

رضاء .. عمتي ادري بيها تخاف عليه وتريد صالحي بس اني مااريد اتزوج ولااريد رجال بحياتي .. عندي حكمت يكبر ويدير باله عليه ويحميني .. من زمان جنت اتمنى عندي اخو يخاف عليه ومثل ماانحرمت من اخوي الله عوضني بحكمت الي صار كلشي بحياتي ..
جدي جان طاير بي .. اول مايدخل البيت يجي عليه بالغرفة يلاعبه ويشوفه يالله يرتاح ويغسل ..

الناس كلها بدأت تبارك وتجي .. عمي هادي ضاج لان تسمى الطفل بأسم حكمت .. جان يشوف حسن بي ويجي ياخذه العمتي بثينة رغم باردة واخاف عليه
مااطلعة ابد من الغرفة .
بس مااگدر احجي من ياخذه عمي هادي لان اله حق بي هو وعمة بثينة الي كلما يگلها عمي هذا ابن حسن .
تگول وينة حسن لسا مااجة.  شوكت يعرس واشوف جهاله..
يوم نحسها زينة وهادئة ويوم تتسودن علينا وتريد حسن .. عمتي لميعة تقرأ براس عمي حتى يتزوج ويشوفلة مرة تراعيه .. بس هو مايقبل لان يحبها وهم جهاله گالولة لو تزوجت نروح وي امي وماتشوفنا بعد
بس عمتي مابطلت زن وجنها ناوية تزوجه وحدة منهم
حسب ماسمعت من عمتي حمدية يوم تعاركت وياها وگاللتلها .. لو تموتين ماازوجن اخوي وحدة من طينتج تنگطن سم وحقد وعلمتي بناتج مثلج ..

مرت الايام وگمت الزم نوبة بالبيت رغم عمتي ماتقبل وتگلي خليج يم ابنج ومعليج بشي .. بس مااحب المشاكل ومالي خلگها .. بتول محاربتني رغم ماواصلة يم رجلها ولااريده .. ووداد وسداد زاد حقدهن عليه .
وكلما يشوفني يصيحلي العايبة ..
بس من جدي هنا مايتنفسن ولايفكن حلگهن ..
الشتا هالسنة بارد كلش واجت بردات العجوز مثل مايسموها حتى نفط صار غالي وشح بسبب وضع البلد.. يعني مو دايما نفتح صوبه مخلين النفطات لليل وبالنهار بس الجولة بالمطبخ تنفتح .. خفت على حكمت جيف غرفة اهلي على الساحة ويدخللها الهوا من كل كتر ..
ابد ماجنت اطلعة برة اخاف عليه .. فأخلي عمتي يمة لو اني .. بس مرة شفت عمتي لميعة طلعت من الغرفة ركضت اعاين عليه قربت اذاني يم خشمة اشوفه يتنفس لو لا .. وجان مابي شي ..
خفت عليه مدري ليش .. وصارن يحاربني بي . يغافلني ويدخلن للغرفة ومن يشوفني يطلعون بسرعة وجنهن خايفات يخلني اخاف واروح اشوفة ماادري ليش يسون هيج .. ويستغلن السالفة لما عمتي تروح للسوگ لو للحمام لو تطبخ . من سولفتلها گالت يردن يرهبنج ويهججنج .. انتي ابقي يم ابنج ومعليج بالشغل اني بمكانج واريد اشوف منو منهن تفك حلگها ..

مر شهر وعمتي لميعة گامت تهلهل بالبيت وجانت دورة سنة حسن باقيلها كم يوم وابوي هم بعدة .. واحنة كلنا لابسين اسود وماسمعنا صوت الهلاهل من يوم خطبتي من حسن.. عمتي جانت يمي من سمعت گمزت من مكانها .. طلعنا لان عمتي لميعة وبتول بساحة الحوش جانن طالعات . ويضحكن ويتباشرن بحمل بتول ..

ردت عمتي عليهن .. وشبيجن تهلهلن وسنة اخوي وابن اخوي ماطالعة بعدهي .. شني اول طفل وفرحانة لو عاجر ومامصدجة ..
ردت عمتي لميعة .. ومن عقدتوا البنت اخوج العايبة ماگلتي عيب وسنة اخوي ماطالعة ..
- لمييييعة گصري الشر وبطلي ..
- وان ماگصرت يحمدية شتسوين ؟؟
- تعرفين شسوي لجن اني بنت ابوي وترباته ..
- شفنا ترباتج ابوج شني من تربات حسن ورضوة ضحكن بصوت عالي ودخلن ..
عمتي رادت تروح وراها لزمتها .. عمة عليج العباس عوفيهن ذني يشرن المشاكل شراية ..
- بعدي عني شني خايفة منهن .. لو نسن هن گاعدات ب حوش وخير ابوي .. والزوم يعرفن حدهن لا بالعباس اخلي ابوي يعرفهن ترباته شلون تكون ..
جانت تصيح وتحجي بصوت عالي حتى تسمعهن .. 
وهن يضحكن .. ماتگول عايشين ببيت واحد واهل
مر الاشهر وبتول حايرة بروحها وحملها هالمرة صعب ..
وعمتي بثينة شوية صارت احسن لان عمي ماخله دكتور مااخذها اله واهلي الحرب والهوسة ومافاد ..
بس جانت هادية مو مثل قبل .. ومرات تگوم تصب غدا لو تگعد يمنا .. بس مو دووم زينة ..
الذيب مالي بدا يكبر ويدنفش .. نساني الدنيا كلها .
واليحجي مااهتم رغم العايبة صار اسمي بالحوش بسببهن حتى رزاق ابن مهدي اول مانطق  صاحلي آيبة مايگدر يلفضها .. جدي حنيتة ماتغيرت ابد ويمكن زادت عليه وعلى ابني ..
طلعت دورت سنة ابوي ورحنا كلنا زرناه وزرت حسن واخذتلة حكمت يشوفه.. 
صح گدام الناس هو ابن مهدي بس بالحقيقة هو ابن حسن .. والزوم يشوفه ادري الميت روحه تحس لان روح ابوي مافارگتني ابد ..
عمتي حمدية ماگطعت الامل ابد وكل مرة تكتب رسالة وتضمها مرات تگول خليه مفقود لو متأسر وعندي امل يرجعلي بيوم .. ولايجيبوه ملفوف الي ..
غيابه صار مواساة الها واملها بيوم يرجع .. ويمكن هذا الي مخليها دوم ناطرة ع الشباك ..
مرت سنتين ع الحرب والوضع صار يخوف اكثر واكثر
الناس عبالها شهر شهرين وتخلص بس طولت كلش جدي يكول هالحرب ماتخلص الا اذا كلت الاخضر واليابس ..
وي ولادة بتول الي جابت ولد وجانت فرحانة بي وطايرة من الفرح وسمته بشار .. من فرحتها ..
مهدي من حبه للولد حار شسوالها وصاغلها بتوت ووعدها كلما يجيه ولد يجيبلها مثلهن ..
بس بنفس السنة طلبوا مواليد مهدي واضطر يروح لايعتبروه هارب من الجيش او فراري ..
تخبلت بتول وامه الي گالتلة ماتروح هم يرجعوك ملفوف مثل حسن .. اخذ مرتك واولادك وروح الخوالك هناك ..
بس جدي ماقبل وگاله الي يهرب من خدمة وطنه خلي يلبس جفيه على راسه ويگعد يم النسوان ..
تسودنت بتول وگلبتها مناحة .. واتهمتني امه اني الفگرته مثل مافگرت حسن وموته وموتت ابوي وراه .. وجن الاعمار بيدي مو بيد الله..

ساعات اشك بروحي واگول معقولة اني فگر صدگ راحت امي بالاول وعافتني ودور حسن وابوي وهسا مهدي .. بس اني مااحب مهدي شلي غرض بروحته ..

راح مهدي للجيش .. وحياتي انكلبت جحيم .. كل يوم يسمعني حجي ويعاركني ومرة منهن بتول سحلتني من شعري .. وعمتي حمدية بالكوة اخذتني من ايدها ..
جدي من سمع تسودن وگالها روحي لهلج من يرجع رجلج تعاي خربتي راحة بيتي .. وعمتي لميعة ماقبلت
- هذا بيت رجلها يمي مثل ماهو بيت رضوة واذا طلعت احنه هم مانبقى هنا ..
- ولج ماتسكتين انتي هي كل البلاوي منج لو ماتزنين براسها ماسوت هيج .. اني ماطردتها بس خلها تروح الاهلها ترتاح بين مايرجع رجلها ..
- هاي اذا رجع مو انت وديتة للموت بيدك ارتاح .. صاحت بتول ..
استغفر جدي وگام طلع .. البيت صار نكد وجدي مايجي للبيت بس بالليل ويطلب الاكل للگاع ..

عمتي حمدية گامت تعلمني الخياط وصرت فنانة بي حتى اهي تعجبت ..
واول مابديت اخيط الابني .. خيطتله بجايم وگلبيات بس عمتي تطرزهن لان بعدني ماضابطته ..
جنت مادوم اصلي وماالتزم .. هسا اتجهت الربي وگمت ماافوت فرض .. ودوم اگعد وي جدي بالليل واسأله ويجاوبني بأمور الدين لان هو دارس ويعرف ..
وحكمت صار عمرة سنتين وصار يمشي بحيث يتلگى جدي للباب ويصيحله ابه .. گد مامتعود عليه ..
يحبه ويلاعبه وصار مايفارگه ..

ببداية سنة اثنين وثمانين .. جابو مهدي متصوب وهنا انگلب البيت وحلفت عمتي لميعة اذا راح بعد تكتل روحها وراه .. اصابته جانت جبيرة وجان داخل فترة بالمستشفى ومايگدر يمشي ويتحرك الا واحد يسندة لو بالكرسي ..
بس جان متغير حيل ويصفن هواي . يعني هادي مو مثل قبل بس يصيح ويتعصب ..
بقى فترة طويلة يتعالج وبعدها گام يمشي بالعكاز ..
وشوية شوية رجعت عافيته .. بعد ماراح للجيش عفوه لان جان يتعالج ولان شغل الگاع مو زين عليه .. فتحله  جدي بسوگ المخضر محل يبيع بيه من محصولنا طول السنة ..
تحسنت احواله واشترى سيارة رغم جدي دوم يشكي من الخسارة .. بس مرتة وامة جان الذهب يكثر ماينگص عندهن ..
الى ان تعارك جدي وياه بيوم وعرف بي ياخذ نص الوارد بجيبه.. سحب المحل منه وتعارك وياه الى ان اجه واعتذر من جدي وجدي طيب بسرعه سامحة وصار يتابعه ويحاسبه بورقة وقلم كل يوم بيومة ..

حكمت كبر گبال عيني وصار يلعب گدامي جان من يشوفني يحضني ويشمني بكل مكان صار سبب فرحتي وبسمتي هو .. جدي يسميه الذيب وهو يفرح ويگلي صيحيلي الذيب انه جدي يسميني الذيب..
اضحك من يحجيها .. وانت تعرف شني الذيب ..
- اي اعرف جدي گالي .. الذيب كلها تهابه وتخاف منه نشمي وحنين على اهل بيته وعياله  بس گاسي على العدو واليغدر بي ..
فرحتي تزيد من اسمع سوالفة .. اني احس روحي كبرت اكثر من عمري .. صرت فاهمة واحسب حساب للكلمة واسمع كلام عمتي وجدي المالي غيرهم ..
جنت مرتاحة كلما كبر ابني واشوفه يفتهم گمت اعلمة القراية والكتابه من صغرة واحفظه قرآن وجدي دوم هم ياخذه للجامع ويعلمة وهو ذكي .. تذكرت كلمة الجدة حسنة من تگول السبيعي يطلع فطن ونبه. .

عمتي مابطلت انتظار رغم مر على الحرب ست سنوات وهسا احنه دخلنا بسنه الستة والثمانين .. الحرب جنها ماراح تخلص والوضع زاد ماينقص حتى المحصول بدأ يقل والناس خافت ..
كلشي بحياتي بدأ يتصلح ..  الا بيوم كلشي خرب من گال جدي انتي بعد بلغتي وابنج كبر وراح يدخل مدرسة ولازمة جنسية خو مايبقى هيج حجيت وي مهدي وراح تعقدون محكمة ومناك تسون جنسية حكمت .. وبنفس اليوم عمتي گالتلي حضري روحج بعد ماتعقدون ابوي گال المهدي يدخل عليج لين سألني شو ماصار عندكم شي ويوم گلتلة مايوصلج تسودن وتعارك وياه وگاله تخاف من مرتك وامك وانت مو رجال ..
مهدي تخبل وگاله هي ماتقبل لون تقبل من باجر اتگربلها ..
تسودنت من سمعت عمتي وكلامها .. صح جانت تريدني قبل اخليه يوصلي .. بس من گالها عمة مااريد احد يدري اني راح اخش على رضوة.. ضاجت منه وگالتلي اذا ماتردين روحي احجي وي ابوي مامجبورة انتي ..

وصدگ حجيت وي جدي بس ماسمعني وگال اعرف هو مو الرجل اليصونج جيف يمشي ورى حجي امه ومرته لجن اني عندي غايه من هذا الشي اسمعي كلامي يبعد جدج وانتي تفلحين ..
ماحجيت وسكتت .. استسلمت وبعد ماعقدنا خيطتلي عمتي ثوب وگالتلي البسيه .. سبحت وسرحت شعري ..
اخذت عمتي حكمت يمها بيومها وبيدها رتبت الغرفة وعدلتها لجن مالي نفس اني ..

دخل بخفية وجن خايف احد يشوفة .. من شافني صفن .. جان يباوع متفاجئ .. انتي شوكت كبرتي وصرتي مرة هيج ..
سحبني للجرباية خفت منه . بقى يتلمس بوجهي وشعري تذكرت حسن والي سواه بيه ..
دفعته من غير ماادري .. هو تسودن .
ليش تدفعيني ولج ماعاجبج .. لو مااسوي مثل مايسوي حسن .. صار يعيرني بحسن وبلي صار .. گنفصت يم الكنتور ابجي .. لبس دشداشتة ..
اني اعلمج .. راح ورجع . اسمعي ولج اذا گلتي الجدي لو العمي ماتگربلي اذبحج ..
طلع واني بقيت بمكاني گاعدة ادري ماراح تخلص وراح يجي كل يوم . 

مهدي من شافها وشاف حسنها خشت بعقلها بس اكو شي بداخله يرفضها ويمكن حبه البتول او خوفه من زعلها .. الليل كله يفكر من شاف جسمها وصفاء بشرتها لو شعرها البني النازل الاكتافها ..
ابتسم ومرته بحضنه .. افكار هواي جانت بباله واولهن الحصول عليها لان يعتبرها المفتاح الي راح يفتحله ابواب نعيم جده .. وخاصة رضاء غاليه عندة كلش ..
فصار يقرب حكمت اله ويخليه يلعب وي اولاده رغم بتول مانعتهم .. حكمت فرح لان جان يتصور ابوه مايحبه مثل اخوته لهذا التجأ الجده يدور حنان الابو الماحصل عليه من مهدي ..
بس بقى شي بينهم مسبب مشاكل لرضاء وهو هاجس حسن بكل لحظة يعايرها بي .. ومنهن بيوم الي حكمت اخذ جنطة امه مال المدرسة يلعب بيها وفرغ الغراض البيها .. رضاء جانت صافنة عليهن وناسيتهن اصلا بعد كل ذيج السنين من جان حسن يشتريلها حلويات وقراصات وهي تضمهن بجنطتها ..
بس من دخل مهدي حتى يحجي وياها ويحاسبها ع الي صار بامه .. شافها تلم بهدايا حسن ..
- شني ذني سألها ؟؟
ردت عليه بأرتباك .. ذني غراض قديمات ضامتهن مالتي وحكمت موگعهن ..
- هاااا وشعندج ضامتهن خاف حسن جايبهن ..
- لا مو حسن بابا ..
- خوش يرضوة .. اسمعي ولج الي صار بأمي اليوم بسببج اني احاسبج عليه .. اليوم اجيج بالليل حضري روحج ..
اني سمعت هيج گال .. تسودنت ..
لا حباب والله مالي شغل اني ..
عقج حاجبه .. هيج گربي الج مخوفج .. لجن راح اخلي هالگرب هو حسابي الج ..
ضحك بمكر وطلع ..

نيمت حكمت ونمت لان ماخذت حجيه صدگ .. لليل كلش سمعت صوت الباب نفتح .. فزيت من نومي والكاه گبالي .. يهمس نزليه جوة وتعاي ..
ردت احجي عصر ايدي. گمت فرشت بالكاع وشلت حكمت .. درت وجهي وشفته نازع دشدشاته ومتمدد على الجرباية .. بقيت واكفه ومااعرف شسوي ..
صاح بيه بهمس .. تعاي بسرعه فضيني .. تقربت سحبني حيل وجان يتعامل وياي بقسوة مااگدر احجي خاف ابني يگعد ويشوفني بهيج منظر وهو هم ساد حلگي خاف احد يسمعه وتعرف بتول اهو يجي يمي ..
گام من يمي وهو يضحك وجن ياخذ حگة مني وثاره ..
تلفلفت بخوف .. واسمعه يكول ..
مااريدج تحبلين احسبي حسابج افتهمتي .. هزيت راسي وسكتت .. طلع مني بسرعه .. ومابقت بس دموعي تواسيني ..
اتذكر شلون يتلمس بيه وتلعب روحي جن واحد جوعان وانطوه قطعه لحم ..او يمكن لان بتول حامل وتعبانه يجي يعوض نقصه بيه ..
ثاني يوم لليل هم اجه وجن يستمتع بعذابي .. صرت اكره الليل وسواده .. من اصير بحضنه ينسى روحه ويگلي مااگدر اهدج اكو شي يجيبني الج .. بس من يكمل يستهزأ بيه ويهيني . ومايوم مر ماذكرني بحسن وعملته وياي ..
الى ان بيوم مليت من حالتي .. ماخليته يتگرب الي وگتله اني مو بايرة تجيني بنصاص اليالي وتروح جنك حرامي .. اذا اجيت بعد اصرخ والم العالم عليك ..
بيومها حكمت يم جدي نايم .. صار يضربني واني ادفع بي .. وراد ياخذني بالگوة .. وماادري بروحي وصحت خلي شيصير يصير المهم تدري مرته واخلص منه..
بس صوتي اختلط بأصوات ثانيه .. سمعنا صياح وهوسة بالحوش .. لبس بسرعه واخذ دشداشته وطلع
اني بقيت جامدة من الخوف مااعرف ليش هاي الاصوات نفسها من جابو حسن للحوش ..
طلعت بسكته والاصوات تتعالى خفت على حكمت ..
جدي اسمعه يصيح صوتجن مااهيسة كافي ..
فتحت الباب ..
واشوف عمي هادي يبجي وعمي صالح حاضنه يواسيه وعماتي دخلن الغرفتة ..
عيوني تعاين بالاوجوه بس عيون بتول تعاين بيه وتريد تاكلني ..
#بقلمي_الكاتبة_شمس
يتبع……