زهرة

البارت الأخير

زهرة
ج 33
الفصل الثاني،
الاخير

سوزان المندلاوي

من انا ؟

انا زهرة سُرق عطرها قبل ان تتفتح
تلاشت وريقاتها مع رياح الحياة
ذبُلت قبل ان تورد
تلاشت ولم يبقى منها سوى جذور بالية متشبثه بالارض
هذة الارض الملوثة بشرور البشر
ظلم خوف صعاب هي دورة حياة زهرة صغيرة لم ترتكب خطأ سوى انها خُلقت انثى
تتصارع مع كل شيد لتزهر من جديد تستعيد ماتبقى لها من وريقات بمساعدة من هم لم تخلى الحياة لأجلهم
........

توجهت اني والجهال لبيت عمي ابو منير ..

الطريق كله جنت خايفه ..لا اواجهه عمتي غنيه ..

والكاها نفس اسلوبها ..

منير/شبيج زهرة ..شو ساكته

ها مابية شي بس حايرة
منير/من شنو ..

كتله والله يامنير تعرف امك متحبني وهسة اطب عليها اني و3جهال ماعرف ردة فعلها شنو ..

كال زهرة لا تخافين امي تغيرت مو مثل الاول ..

واني ازوجت ..

هم صح ومرتك شنو ردة فعلها من تشوفني ..يمكم ..

اكيد تعرف جنت مرتك ..

منير/فقيرة هبة ..مثلج

ابتسمت ..للقدر ..مثلي ؟

اذآ مو فقر ..كول ضعيفه ومسلوبة الاردة مثلي
ومثل اغلب البنات ..
الي واجهو مثل حياتي

نواجهه الحياه بضعف ..
وخوف ..وسكوت ..

وصلنا ..لبيت عمي ..دخل السيارة للكراج ..

نزلت ..ونزلو الجهال ..

لزمتهم ..كتلهم ..ماما ..
هذا بيت عمي الي اريدة منكم ..بدون عراك وصوت عالي،و بدون وكاحه شاحجي تسون ..واضح كلامي لو لا ..

حسام /ماما يعني راح انسافر لو لا ..
رند/ ماما زهرة اخاف عمو منير يرجعنا لبيت جدو ..

كتلهم هم بيت جدكم وهم اهلكم مو اني ..
يعني اذا يوم من الايام لكيتهم ادزكم ..

حسام /ماروح وياهم واذا وديتيني انهزم ..
وجتف ايدة ماروح ماروح

منير طبب الغراض ..ورجع
يلا زهرة طبي للييت ..
انداريت عليه
كتله جايه جايه ..

حسام رند
ي نسافر واسجلكم مدرسه هم لا تخافون ماعوفكم بيوم

مسح دموعه حسام ..

ولزمتهم بايدي ومشيت ..
دخلت جوة اول ماطبيت .
تلكتني بنيه سمرة ..وعيونها ملونه.ناعمه ..ورشيقه
..ابتسمت الي ..
كالت شلونج زهرة وبوستني .

كالت شبيج معرفتيني اني هبة ..

رجعت بوستها كتلها ناسيه شكلج ..
اعذريني ..
لزمت الجهال فدوة ذولي جهالج ..

هزيت راسي اي ..

البيت جان فارغ من كل شي .
ماعدا الكاشي والحياطين بس ..

بعدها طلعت الي مرة لابسه اسود ..ركزت بملامحها هاي،غنيه ..

تقربت منها بوستها شلونج عمه ..

كالت هلا زهرة شلونج ..

وبعدها شفت عمي وابتهال ..
وبقيت كاعدة بيناتهم ..

الظاهر منير مفهمهم بأن زوجي طلع بثناء القصف واختفى ...
بين الكلام ..اسمع كلمه ذبي جهال رجلج ممجبورة تتحمليهم ..
؟؟؟؟؟؟
احسها مو كلمه احسها سيف ويذبحني ..

يمكن احبهم اكثر من دموع ..

يمكن اني جبتهم واولاد رحمي ..

اصعب شي هو ..
اتخلى عنهم ..
الا بحاله وحدة اسلمهم لاهلهم .
او لامهم وابوهم ..

بنفس اليوم ..الي دنسافر ويا ..خابر كال مراح اطلع الفجر اكو ..مشاكل بطريق160

وبصراحه اخاف اطلع وحدي ..

بهاي الفترة جانو السواق يطلعون اكثر من سياق ..
مثل القطار يمشون واحد ورة الثاني ..
خوف من التسليب والقتل ..

دزنا لواحد يطلع من القامشلي ويدخل لسوريا
المنشأة..
واتحول النقاش من زهرة ..وين صفة بيها الدهر
الى شلون يطلعون ..

منير كال صدك هبه ..اكو غراص زهرة جيبها الها ..

انداريت عليه ياغراص ..

كال والله ماعرف بس امج ..كالت هاي غراصها من تشوفها وديها الها ..

امي ؟

اي امج ..

وبدا الصوت يعلى عمي يكول لا ناجلها
ومنير يكول ماكدر اجل ..بعت كل شي ..

ولازم نطلع
الي عرفته رجل ابتهال طالع قبلهم وحتى ماجر شقه للكل ..

اجتي ..هبه كالت هذني غراضج ..

اخذت العلاكه من اديها بدون مافتحها ..
وخليتها بصفي ..

كعدت بصفي غنيه ..

كالت ..ي وين صفى بيج الدهر وشعجب راح تسافرين .

والله عمه الدهر مصفى بعدة يغربل بيه ..
واسافر لان حالي من حال هالعالم..الوضع يخوف هنا ..
غنيه /ادري معقوله لا عيال ولا اهل ..يردوج
شمسويه بدنياج وهيج عابج ربج ..
ودارت وجهها ..

بالبدايه سكتت..بعدها
عمه ..تصدكين مسويت شي ..بس رحت بذنب غيري ..
تصدكين ..لو لا ..
اتمنى تسالين نفسج الاول ..
واني عن نفسي مسامحتج ..
بس اتمنى تسامحين نفسج الاول ..
ضلت تباوع عليه

غنيه /اها ..المهم ماعندي شي وياج ..اني بس الي جايه علمودة مزوج شيلي فكرة من راسج ..ابني ازوج بعد وميفيدج .مثل الاول

ضحكت مو هذا همي والله ولا اني طابه اخرب
ولا شي اريد اسافر واطلع من العراق بس
وصعبه اطلع وحدي ..
واطا الرحمه انشالت بقلبكم عادي ارجع لشقتي
وانسي اريد اجي وياكم
غنية ولا جاوبت ..
وكامت من يمي ..
جنت اجاوب ع كد السؤال بس لا اكثر ولا اقل ..
واحاول ..ابتعد عن كل شي شخصي
لان ابتهال وغنيه
عبالك نازله من المريخ ..
وخبلوني اسئلة
الظاهر امي مفهمتهم مزوجه واحد كلش غني وعبالهم تارك الي ورث ..

بعد كلام طويل قرر ..
منير نطلع ويا العالم من القامشلي ..

اصعب مايكون اواجهه مصير 3اطفال الى المجهول ..

بهاي الفترة هوايه حوادث سمعنا بطريق 160

الي يربط مابين سوريا والعراق،..

من تسليب وقتل ..

حتى الي مهزوم من الخوف والموت احتمال يواجهه الموت بالطريق ..

...

فرشو الي وللجهال  بلهول ..
لان البيت فارغ جان ع كد اشياء بسيطه مبقين ..

خليت راسي ع المخدة .
بقيت اتكلب بين للخوف
وبين كلام غنيه ..
ظنها اريد اخذ منير ..

صعبة ..

كمت عدلت نفسي جريت ..

العلاكه ..

فتحتها بطنها علاكه ثانيه ..

فتحتها ..

لكيت ..لعابه الي انطاها الي فارس اول وحدة ..

جريتها وبقيت ابتسم ..
اخذت هوى ترس ريتي ..

وكلبت بالباقي ..شفت المرايا مالتي ..
ام الوردة والمشط ..

استغربت ..شنو الي دازته الي وليش..

اذكرت الورقه الي انطاها الي فارس ..

جنت خالتها جوة بهدوم اللعابه ..

كلبت هدومها تحسست ..
حسيت اكو شي ..

طلعتها..

وكمت رحت قريب الحمام ..

لان اكو ضوة ..

فتحتها ..
غمضت عيوني ..

بديت اقرا الحروف  ودموعي تجري ..

شلونج يا احلى زهرة
مدام فتحتي الرساله معناها انتي تقرين
عفيه بالسباعيه ..عفيه ..

واحتمال نقراها سوة اني وياج وراسم قلب
وبداخله حرفي z
واحتمال عدنا جهال تلعب بنفس الدرب الي شفتج بي وانتي تتعاركين ويا الولد ..

واحتمال لا مجمعتنا الدنيا وفرقتنا .

بالحالتين اني احبج ..اول مرة دك قلبي هناك يم الساكيه ..تذكرين ..

شلون جنتي وشلون تغيرتي ..

انتي هيج زهرة من شفت عيونج عرفت ..

وراج مستقبل حلو ويجي يوم وتصيرين
انسانه ناجحة ومعروفه ..

الالم الي عندج يتحول عطاء ..وحب ..

واذا اختفيت من حياتج لا تنسيني بيوم ..

احبج زهرة
وراسم قلب جبير وسهم  وبي اسمي واسمه

......

نزلت الورقه واحس عيوني جمر من الدموع ..

بقيت ..ابجي بحركه ..

ماعرف ليش ..

وماعرف ليش مر كل شي عشته ويا بهاي اللحظه ..

احس واحد يكول خيرج شبيج ..

مسحت عيوني ..

وصميت الورقه ورة ظهري ..

ها منير ..

ماكو شي بس خايفه ..
اروح انام ..

دامشي جرني من ايدي شنو هاي ورة ظهرج

ماكو شي ..

جيبي شنو ..هاي ..

منير شبيك ماكو شي ..

جر الورقه مني ..

كتله عوفها لا تفتحها ..

هي شنو ؟
داكولك عوفها واذا فتحتها هسة اعوف البيت واطلع والله ..

جر ايدي وفتحها اخذيها ..

مراح اقراها اني ..

بس دام هيج دموعج ..هاي الرساله من انسان عزيز ..

اخذتها ورحت ..

ومنمت اكيد ..

لحد ما اجوي عليه كالو يلا حضري نفسج

بدلت الي وللجهال ..

وطلعنا ..للمكان المحدد جانت العالم ..

هوايه ..والمنشآت كلها انترست عالم ..

وجنت اركض ويا منير ..منا ومنا ..

لحد ما صعدنا كلنا
واخذنا اخر ..المقاعد..كعدنا بيها ..

اني والجهال من جهه وبصفي غنيه وعمي
ومنير وهبه كدامي
وابتهال وابنها ..

اباوع..المنشأة متروسه عالم صغار وكبار ..واطفال ..

طلعت بينا السيارة ..
والطريق جان بعييييد ومتعب حيل ..

والجهال خبلوني وبهذلوني ..

بالبجي وساعه يتعاركون ..
انام ونكعد وبعدها السيارة تمشي ..

جانت اكثر من سيارة طالعه ..

وكل واحد اله قصه وهم ..
كل واحد اله الف حكايه ..

لحد ماوصلنا لمنطقه ..نزلنا لمطعم ..

وجنت اشوف غنيه ..
كلما يتقرب مني منير تصيحه وتجرة ..مني،..

حتى من يريد يدفع فلوس تحجي ويا ..

اكلنا وكملنا ..

وطلعنا من جديد ..

الي اعرفه عود 17ساعه ..

بس الوكت صار اطول ..

عطلت السيارة ونزلنا كلنا ..

والجهال بدت تتناحس وتبجي ..

بليل وصلنا لمكان ..

السايق طفى الاضويه ..

داخل السيارة ..
وبقى يتصل بالموبايل ..

ويمشي بطيئ..

والشباب التمت كلها بمقدمه السيارة ..ويحجون

منير كدامي نايم ..

كعدته منير منير ..كوم

فز شكو .
كتله ماعرف بس روح شوف شكو ..

كام من مكانه ..

راح مدري شحجة ويا الولد ورجع ..

كعد ..

كتله شكو ..

ماكو شي زهرة ..

عليك الله..

ماكو شي شبيج نامي ..

رجعت ..
تجيتهري واباوع ع الجام

اكو شلون ..التلال .الناصية 
شفت ضوة ..يتوجهه علينا ..

مثل الايت ..

اكثر من واحد

ومن الجهتين ..

الظاهر السايق هم شاف ..

مشى بينا سريع ..

وهاي العالم كامت من نومه تصرخ ..

ع سرعه الي،مشى بيها ..
وتحجي ..شكو شكو ..

منير كال سلابه ..طلعو ..ابقو بمكانكم ..

هبه جلبت بايدة وتبجي لا تروح ابقى طاعد هنا

سدينا البردات ..وبقينا كلنا ندعي،..

لحد ما وصلنا قريب ع سيارة ثانيه ..
وصلنا لمنطقه مفتوحه كلها وبيها صبات ..
مال سيطرة ..

بلغو الحرس ..

الحرس....كالو مابدينا شي نامو هنا للصبح امان الكم ...والنا ...
والنا الله بس ..

شكد بينا ماعرف ..
بس عالم هوايه ...

بقينا بسيارة ننزل ع كد الحاجه بس ..

وطريق سوريا صار 3ايام ..

وخلصنا اكل وماكو مكان نشتري منه
والجهال ع فد بجيه ولا سكتت ..

الصبح طلع بينا ..

ووصلنا سوريا ..

الفجر ..

ادمرنا دمار ..

وغنيه بدت تحجي .تعصب ..
وعمي يسكت بيها
اما ..هبه وننير ..

الي يوجع منير عينه عليه ويسالني شتريدين محتاجه شي ..
لو يسولف ..

وهبه ..لازمته من ايدى مثل الي يخاف ينباك منه ..شي ..

مجلبه بي ..
يكوم تكوم ويا
يكعد تكعد ويا ..

يدير وجهه ..تلزمه ..
تحاجي ..
تشربه مي ..توكله ..

ماعرف اصحك لو ادنج ..لو اغلس،..

وصلنا وصعدنا تكسي ..
كلنا صعدتا واحد فوك الاخ ..
جانت..الشوراع والاماكن ذكرتني بغداد من شفتها اول مرة

قبل السقوط..

سقطت بغداد اول مرة بايد هولاكو ..

وهالمرة سقطت بايد الامريكان ..
والجاي الله اعلم شنو ..

الكل بسيارة جان فرحان ..ويباوع ع شوارعها ومحلاتها
الا اني جنت ابجي لان بغدادي اجمل
واحلى ..منها ...

اه والف اه لبغدادي ..
اشبهه بفتاه جميله ..
بيعت بسوق الجواري
بابخس الثمن
..
ماتت روحها ..
واصبحت جسد بلا روح ..

.......

رجل ابتهال ..ماجر شقه النا
شقه عبارة عن غرفتين نوم وهول وصحيات ومطبخ اول ماوصلنا
سبحنا واكلنا ونمنا ..

غرفه لابتهال ورجلها وغرفه لمنير ومرته
واحنا كلنا بالهول فرشنا ..

الظاهر منير حتى مجهزها .من فرش وغيرها ..

مرت ايام بينا هنا ..كاعدين

يوم بعد يوم للي يقربني من منير
نفسه هو الي يبعدني عنه ..

من جنت اشوف تعامل هبه وياه وخوفها عليه
حتى اذا يطلع

كمت اخاف اكعد كباله لو بصفه ..
واجنب الكلام ويا

خاصه من اشوف هو يبدي يسولف ويايه ويحجي ..

بهاي الفترة قدم النا منير ع الهجرة ..
وكل من اله قصه وحكايه
وقدمنا ع المساعدات

وبدت تساعدنا
اني ستر الله عندي كم قطعه ذهب ..

كمت ابيع واصرف منها ..

بدة الحال يضيق بيه ..

من كلام غنيه ..
وخوف هبه ..والجهال وهوستهم ..
من اسمع يعيطون ويحجون عليهم ..
ويتعاركون ويا جهال ابتهال ..

ومن اسمع غنيه تحجي ع المصرف من الولد ماكو ..
وتسمعني حجي ..
اني عاله عليهم ..

جنت بين فترة وفترة انطيها مصرف بدون علم منير ..
واطلع واسوك الهم ..

وتاخذة مني في سبيل تسكت ..

حتى ذهبي ..بقى كم قطعه ..

وبديت ..اختنك واتوتر ..
اخاف من الفقر ..

هنا شغل ممنوع   ..

كاعدين ناكل ونشرب
وننتظر رحمه الله

صح نطلع ونطب بس ماكو استقرار

كلنا ضايعين ..

شقه صغيرة ..
وهبه تركض وراه منير ..

حتى مرات ..يتعارك وياها ..

جنت اعرف تخاف مني ..
احساس،مكروة من احس نفسي ..اني سبب قلقها وخوفها ..

بس المشكله مو هنا

المشكله ..
من اي فرصه تصير او نكعد وحدنا

اسمع من كلمه احبج ..
زهرة ..

مرة من المرات جنت مخنوكه ..حيل

طلعت ..مقابيل البيت اكو فلكه
الفلكه بيها حديقه ..

اخذت الجهال ورحتا كعدنا بيها
يلعبون ..

اجه منير يمي ..

كعد ع الصبه ..

كال مضل شي ونسافر ونستقر زهرة ..

الحياه هنا هوسه صح ..

بس كل تعب وراه فرج ..
تفرج لا تخافين ..

كتله مخايفه ..وجودك بحياتي كافي ..
ضحك ..

اول مرة اسمع منج شي يسر الخاطر ..

تدرين ..
مو مهم عندي ..تحبيني لو لا
المهن انتي كبالي ومامن عليج ..

هذا يكفي ..

منير
عيون منير كولي ..

هبه

شبيها هبة ..

تحبك ..

منير/اعرف ..بس اني ماحبها ..

دام تعرف خطيه ..مالها ذنب بشي ..
اعرف والله انتي واني وهي مالنا ذنب..
بس اني احبج ..

وتالي منير ...

منير/ نزوج ..

صعبه والله ..

كام وكف كبالي ..يعني هم متريديني .مو ..

كتله لا يختلف الوضع هسة ..
مو هيج ..
لعد ؟

ماريد اظلم غيري بيوم ..

زهرة مالج شغل انتي ..اني ارتب وضعي ..
هبه جانت فقيرة حيل يعني ياذوها غنيه وابتهال وهي تسكت وتضحك الهم
وتشتغل ..
وتحب منير هوايه ..

توكله ..اطب اتسبحه ..
حتى هاي الكرزان والحب شمس قمر ..

هي تفلسه اله ..

مثل الطفل المدلل ..اتعامله ..

وهو يعاملها برود ..
......

الوضع بالعراق نسمع اخبارة من سيئ الى اسوء

جان منير بين فترة وفترة ينزل لبغداد

يستلم الايجار ويرجع ..

وعرفو اهلي اني سافرت ويا ..

مسمعت منهم اي اعتراض ..

مرة من المرات ..

من راح وصيته يمر لبيت للحجي عسا ولعل بين شي ..

وهالمرة من راح ..

اجه كال جاين ع امل و نعمان

والظاهر دازيهم لشقتي القديمه ..

وماكو احد بيها ..

وتاركين الي عنوان ورقم ..

اتصلنا اني ومنير بالرقم طلعو ..
اهل ..نعمان ..

بدة التهديد منهم انتي بايكه الجهال ..
وانتي بايكه فلوس ابنا ..
ووينه هو هسة ..

وغيرها من الكلام ..

منير فهمهم بالوضع الي صار
وكلهم ..
تعالو اخذو الاطفال ..

حجايه منا ومنا ..

ثبتوا يجون ياخذوهم ع الحدود ..

احساس مر جان اطفالي ويسلبون مني ..

اذكر لليوم ..بجيهم عليه ..

والتواسيل ..ماعوفهم ابقى وياهم ..

حتى كامو يفزون من نومهم ..
رغم حسام جبير ورند هم ..

بس ..صرت الهم اني ام ..
وهم صار اطفالي ..

مرت الايام ونتصل ونخابر شوكت يجون ياخوهم بس يوم يجر يوم .وماكو شي من عمامهم..
ولا اجوي بعد ولا تصلو ..
ولا بينو نعمان وامل ..

اسوء قرار اخذته امل هو ..ترك اطفالها ..
مهما يكون ..اني مو امهم ..
ويشهد الله عليه مقصرت بشي وياهم ابد ...
اقصر ع نفسي في سبيلهم ..

لوما امل ونعمان ماعرف جان شنو مصيري،..

يمكن مثل خالتي

ويمكن مجهول ..

ويمكن بشارع ..

مستحيل ارد جميلهم ..بترك اطفالهم ..

عرفت حال العراق انتهى ..

وجهالهم ايتام ..مثل باقي الايتام الي ترسوا العراق ..

ومسؤوليتي اضاعفت من الكل اتخلى عنهم ..

وعرفت رسالتي وحدة بس ..
هي ..اطفالي ..

اكون الهم الام والسند لحياتهم ...

ووعدت نفسي اضحي بكل شي في سبيلهم ..

مرت سنه ..

ع سفري ..والفلوس خلصت ..

والوضع اختنك بينا حيل ..

وانتقلنا من مكان لمكان ..
اكبر ..وجنت عايشه ع المساعدات ..
والايجار يدفعه منير ..

وغنيه بدت متسكت ..وتحجي ..

وبهاي الفترة كمت اتصل باهلي ومن اتصل لحد ماسدة امي تشكي بحالهم ..
وتريد مني فلوس ادز الها ومتعرف

حالي من حالها واتعس بعد ..
ويا 3اطفال وكل شي يردون مني ..

من اكل وشرب وملابس .وغيرها ..

بديت اختنك حيل.

ودومي متوترة ولازمه الجهال وكاعدة بمكان ..

ورجعت غنيه لنفس الاسلوب العياط والصياح والعصبيه ..

ومشاكل بينها وبين عمي ..
ويا منير ..

وتكوله رجعها اشمرها ابتلينا بيها ..
لحد ما فديوم عاط بيها وكال راح ازوجها
وارجعها لذمتي محد اله دخل بيها ..

محد يحجي افتهمتو ..لو لا

عم الهدوء بكل البيت ..

واباوع ع هبه وجهها كام يكلب الوان ..
وغنيه رادت تحجي عاط بيها
ليش تخليني اخذها وارجع لبغداد ومتشوفيني بعد طول عمرج ..

عساني مامتت ..محد اله دخل بيه وبيها
صار شكد اسمع واسكت ..
حجايه ماسمع ..وكل شي ديصير اعرف بي بس اني مغلس وساكت والوضع مو مال مشاكل بس انتي ميفرق شي وياج نگ نگ
موتيني ..لو باقي بغداد وكاتليني ولا عيشتي هنا ..

غنيه / يجي ابوك واعرف شلون يصرف وياك
خبلتك ..هالبنيه ..مبقت عقل براسك

مو زوجتك تاج راسها ..

متكول شنو ذنبها ..وياك
هبة كامت تبجي ..

اسكتي يمه ..كله من وراج طلكتها وكسرتها اسكتي
بسسسس ماسمع حجي بعد ..

خلص ..

عافنه وطلع ..

اخذت الجهال ..

وكعدت ..برة بالطرمه ..

واسمعها تحجي ..غنيه ..

وقررت ارجع ومابقى اتحمل هذا الوضع ..

صعبة عليه ..شلون اقبلها وارضاها ع نفسي

ادمر غيري رغم حبه وتمسكه بيه صعب ..

طلعت يمي هبه ..

كعدت ..

كالت زهرة ..
نعم هبه ..تعاي هنا كعدي .. ..
اجتي قريب مني ..

هبه / اني ماكرهج ابد ..وبنفس الوكت ..داموت والله وكامت تبجي بجي هستيري بحيث  تشهنك وصوتها يكطع

اني احبه ووعيت عليه ..
لزمت ايدي ابوس ايدج لا تاخذي مني

اذا ازوجج معناها يعوفني واني ارجع لاهلي،..

وتعرفين المطلكه شنو يمنا ..بالقريه ..

ابوس ايدج ..

جريت ايدي ..هبه ..والله ماعندي شي،وياه

هبة/ اعرف واشوف نضراته عبالج ماحس،..

احس بكل شي ..

حتى من يتقرب الي ..احس يريدج اكثر مني ..

كامت تضرب ع رجلها اني شسوي بعد اله كولي الي ..شسوي ..والله ..والله
والقران ..وحق الله فوكانه ..

ممقصرة ويا احبه والله مستعدة اموت ولا يعوفني ..

اخذت حسرة ..

الي تريدي شنو ..

الي اريدة بس لا تزوجون ..الله يخليج ..

اني عفت الكل علمودة ..ابويه مقبل بزواجنه

وانكتلت من وراه ..

ومن سافرنا ..اهلي مقبلو وعفت الكل ورايه ..

ارحميني الله يرحمج ..

انتي بنت عمي مو غريبه ..وعشتي الي عشته
ويا ..

شفتي شكد حباب ..

وشفتي شكد كريم ..

وحبيتي اكيد ..

ومن طلكج ..
تندمتي وشفتي حالج وين صفة

هبه اني مو مثلج ..

كالت اعرف ..والله وحجت بصوت ناصي،..

عمه غنيه مشوفتني امر وساكته علمودة

حتى ملابس ابتهال اني اغسلها بايدي
هي ورجلها وجهالها ..

لا تحرمني منه ..

اذا ازوجج اني انتهي ..

لو ميحبج اكول ..عادي يرجع الي بس

اذا صار الج بعد ماشوفه ..

وحضنتي بكل براءة وبوستني ..

وطبت ..

مراح احجي شي ..

بس اريد ..امراة غيري توصف احساسي

بالحظتها ..

بين حب بريئ

وحبه الي ..

هنا اني استسلمت لقدري ..

وقررت اشيل منير من حياتي ..

ماكدر ..اكسرها كدامي
ماكدر ادوس عليها في سبيل ..
غلطه منه ..

ماكدر صعب ..
رغم ..هو ..وجودى بحياتي جان الامان ..

بس ..صعبه ..عليه ..

قرارين ..متندمت عليهم ..

احتفاظي بدموع ..

ورفضي ..لمنير ..

.....
اعذار باعذار ..بعدت منير عني ..

بعد سنتين ..طلع اللجوء النا

الكل انقبل ماعدا ابتهال وعائلتها انرفضو ..

وبدت حياه جديدة

حياه الغربه ..

والاعتماد ع النفس

السنين الي مضت صنعت مني انسانه قويه

اواجهه الحياه بكل قوة
انكسر اوكع وارجع اوكف واكمل حياتي بقوة ..
هذفي واحد ..اطفالي
كسرت ظهري عليهم ..كسسسر

خيمه فوك راسهم ..

رحله طويله ..يصعب شرحها باسطر قليله ..

درسو اطفالي ..
وكل واحد منهم ..شهادة
حسام شاب ..

رند دموع ماعادو اطفال ..

تلونت حياتي بيهم ..

ماتندمت ع احتظاني لرند و وحسام ابد ..

حنينين عليه يحبوني
اسمع العالم تمدح بتربيتي ..
تمدح باخلاقهم..
دخلتهم للبيت ..كعدتنا اكلنا شربنا
هاي حياتي ..
وماكو اجمل منها حياه ..

......
ضعف حرمان ..انكسار خوف ..
فقر ضياع ..
الطفله الصغيرة الي واجهت ..كل المصاعب ..
بسكوتها ..
انتفضت ..داخل نفسها ..
وانتفاضتها ..
جانت ..
الحياه والامل ..
رغم الصعوب الي مريت بيها ..

صنعت مني انسانه واجهت الكل ..
واجهت ..الغربه
واجهت العادات والتقاليد

واجهت 3اطفال بغربه ..
وربتهم تربيه صالحه ..
و درست ..وتخرجت ..واشتغلت ..

وكونت بيت واسرة ..
شكد اذتني الحياه وشكد داست عليه
من العراق الى مكان استقراري ..
بس تعلمت شي واحد ..ماندب حظي واسكت
تعلمت ..
اعيش بامل غدا اجمل ..
وبقيت اردد كلمات فارس
اني راح استقر راح اعيش حياه افضل
حياه اني استحقها ..

راح ..اسامح الكل ..

واسامح نفسي ع غبائي وقله وعيي سابقا ..

تجي ايام اكرهه نفسي ..ع اشياء سويتها واتمنى اشيلها من كل حياتي وذاكرتي ..

لكن لولا وجود هاي الاشياء السيئة
مجان اني هسة ..
انسانه قويه بوجود الله معي اولا ونفسي ثانيه ..

مرات اضعف داخل نفسي واحتاج انسان يشاركني حياتي
احتاج انسان اشكي اله
اتشاقه اسولف .ويا ..
عن كل شي الحلو والمر ..

اعيش علاقه زوجيه مستقلة ..
اجرب اكون زوجه واحب وانحب ..
هناك ..
وافز ..
ع روحي واحس العمر مضى زمابقى منه شي
واصحى ع ..وجود اطفالي ..حوالية
هوايه تقدمو الي للزواج
بس جنت ارفض ..ومنير قبلي يرفض
علاقتي بي غريبه .ماعاد ..يطلب الزواج مني يعرف زوجته وام اولادة تحبه. وصعب يقهرها ..
وبنفس الوكت ..يحبني ..

ولا اني ..اريد اتزوج ..

رضيت بكل اختيار من رب العالمين ..

......

اهل زهرة / بين فترة وفترة اتصل بيهم .امي مريضه اخواني كل واحد بهمه
واحد منهم باحد الدول الاوربيه ..
اخواتي ازوجو اساعد امي بفلوس ..علاقتي بيهم طيبه ..مهما يكون هاي امي ..
يمكن دعاء واحد منها بطيب خاطر رجع البسمه لحياتي

امل ونعمان / مفقودين

اهل حسام ورند / دائما ع تواصل وياهم
عن طريق النت ..

الحجي / اخر شي سمعته عنه ..مات ..باحد الدول العربيه ..

عمار/ مجهول

فارس/ وجود فارس بالجزء للثاني من القصه
طلب من زهرة ..
اذا عايش تتمنى اله كل الخير بحياته ..
وتقدم اله الشكر ..
واذا ميت ..تدعي بللرحمه ..والغفران ..
فارس اختفى ..هو واهله ومحد يعرف عنه شي ..
اصرت زهرة وجودة ..لان هو سبب الاول والاخير بتغير زهرة ..
زرع بيها الامل ...

منير/جزء لا يتجزء من حياه زهرة

لليوم موجود بحياتي ..يروح ويرجع نطلع ونطب ..وناكل ونشرب سوة ..

صار عندة اطفال اثنين ..من هبه ..

الاسبوع كله اطفاله  يمي ..

اني ربيتهم ..اله ..

اقرب انسان الي هو ..

ماعرف شنو بالنسبه الي ..الاطفال يحسبو اب الهم ..
واني احسبه العمر الراح والجاي هو ..

بعد هاي السنين الطويله ..
وتضحيات منير الي ..وكل الي صار ..

اتضح عندي شي ..
منير لليوم يشعر بذنب ..اتجاهي ..

والي بداخلة عطف اكثر من الحب ..

ولو كان حب ..
حب طاهر اتجرد ..من  كل شهوة ..
حب الروح ..

غفرت كل ذنب سواه الي ..

غفرت ..كل اساءة ..

ونسيت كل شي ...
سامحت الكل ..
ومن سامحت ..صرت قويه ..
لا الصوت العالي ..
ولا المشاكل تبرز القوة
السلام ..والتسامح داخل النفس هي
اكبر قوى
النهايه ..

متابعيني الاعزاء
انتهت قصه زهرة  اتمنى ان تكون القصه راقت لكم ولم تكن مصدر للملل او الحزن .شكرا لحسن المتابعه ولتعليقاتكم الجميله ودعمكم المتواصل احبكم دمتم في حفظ الله ورعايته
اختكم سوزان المندلاوي
#شهرزاد