زهرة

بارت ٢٩ ج٢

صباح الخير

زهرة
ج 29

عروس العراق
سرقت
وتعرت من جمالها  ..

وباتت ..منهوبة ومسلوبه ..

تصبح على سرقات ..

وتمسي على اطلاقات نارية ..

وشوارعها تحكي الف حكايه ورواية ..

ماذا الذي سقط ..
هل هو التمثال ..

ام

سقطتت اقنعه .البشر ..

لحد ماصار كدامي مجموعه ..

شايلين اسلاحه رشاشات ..
وسدو الطريق بالعرض بالسيارة ..

وكفت اني والجهال داير مدايري ..
ترجف ..
ودموع خانكه ركبتي باديها

واسمع صوتهم بهمس وخوف ..

زهرة راح نموت..

مكدرت اسوي شي ..بس عيوني جمدن من الي داشوفه..

العالم الي بصفي كامت
تركض ..

اني هم ركضت ركضت ..وطبيت بفرع ..

بالركن مالته ..

واحد يركض ..وجان يضربني وهو ميدري ..

وكعت ع وجهي چفي وجوايه. صارت دموع ..

جنجي وحلكي دك الكاع ..

كمت بسرعه جريت دموع ..تبجي .

ورند هم وكعتها ويايه ..

كومتهم ..كلبت دموع ..مابيها شي
ورند رجلها مچروخة ..

صرت بعيدة ع الرمي ..

اندار ع جهه الشارع مسافه احنا مشيناها ..

جريتهم ..ومشيت ..

احس ايدي الثانيه فارغه ..

اباوع ..بس رند

عطت ولج اخوج وين ..

اندارت كالت ماعرف ..
اندار يعدها العالم ..

كتلهم مشفتو ولد هالطول ..

محد يجاوبني اصلا ..

رجعت ..

وين اروح وين الكاه هسة

يمه حسام بس لا صار بي شي

لا لا مابي شي ..

انداريت ع بنات شيرجعهم ويايه وهالدك مستمر ...
اعاين منا منا ..

فات شاب كتله فدوى ابني بقى براس الدرب
روح جيبه ..لابس بلوزة رصاصي وهالطول واشر بايدي

كال وين اروح مدشوفين غدو دم .

واحد بايك حصه الثاني ..

وعافني ومشى ..

اكو ع  الرصيف  ليفوك ع الجهه الثاني هيكل مال مبردة ..مزنجر ..

رحت يمه ..

طببت الجهال بي ..رند متحركين لو تنكلب الدنيا ..

الا اني اجي ..فدوة لعينكم ..استرو عليه بس اعدي هالنهار ..

حضنت دموع وهزت راسها اي ..

ذبيت عباتي فوك الهيكل ..

ومشيت بسرعه ..

واصيح حسام ..ولك حسام ..وينك

وكلما امشي اسمع صوت الرمي ..

كمت اضرب ع وجهي يمه الولد راح عمت عينج زهرة

احجي ويا روحي مثل المخبله ..

شكول لامه وشكول لابو وصلت ..للشارع ..

براس الشارع اكو تيل ..

اشوف جاهل كاعد وخال ايدة ع راسه ..

مشيت سريع يمه ..

صحت حسام ..بعلو صوتي

رفع راسه ..

ولج ييييمه ..ولج زهرة ..

ويصيح ..عتيته من هدومه ..

وهي جرة وهي ركضه ..

لحد ماوصلت ..للبنات ..

جريت العباه ..

احس نفسي انكطع ..

شفتهم وطلعتهم ..

اخذتهم ومشيت ..

وطبيت بفرع ثاني وثالث هيج افتر

لحد ما راحت رجلي

كعدت ع الرصيف وكعدو يمي يتباجون ع اهلهم ...

اباوع رجلي ..تك شحاطه والجواريب مسلوته ..

هدومي كلها ترابه ..

ودموع بحصني وتاشر ع وجهي نم نم ..

مديت ايدي ع حلكي ..وجعني

هاي شفتي من جوة ..مشكوكه ..

ذبيت تك الشحاطه ..

وطلعت من الجنطه نعال ..اجلكم الله ..

ولبسته ..

جريت الجهال كدامي ودموع بحضني ..

لا تخافون ماعوفكم ابد احسبوني امكم بين ما امكم تجي .

حضنوني ..

يمه يارويحتي شتتحملين بعد. .

طفل بلايه امه يتيهه ..

واحسهم مثل اليتامه من تون ..

اخذت الجنطه الي بظهر رند ..

ستر الله خليت غراضنه كلها بجنط الظهر ..

وله ع هالركضه والهبطه جان ضيعنا الاول والتالي ..

جنت تارسه بطلين مي ..

وخاله بيها خبزات ..واصابع كعك ..

طلعت المي ..مضمضت حلكي من التراب والدم
وذبيته متروس ..دم كمت احرك بسنوني لا واحد بيهم مكسور ماكو شي للحمدلله

طلعت الهم خبزة وقسمتها وانطيتهم ..مي وخبز ..

اعاين الدرب فارغ ولا بشر بي ..

كتلهم كومو ..

امشو ..

اذكر مشينا من درب لدرب ..

مدري كم منطقه عبرت ..بحيث هاي رجولي غدن خيوط من كثر المشي ..

ودموع نامت ع جتفي خدر كمت ولا احس بي ..
وكل شويه اذبها ع ايد ..
ماعرف كون عندي اربع ايدنات حتى اسيطر بلزمتهم ..

جريت هدوم ..رند عكدتها باخوها

وعكدتهم بهدومي ..

هاي اذكر امي جانت هيج تربطنا ..وتسوينه قطار
من تطلع بسوك وتنجبر تاخذنا ..

ضياع ..
ربي شصار بحالنا ..شو البيوت مهجورة
اعاين ..عبالك وادم مابيها ..

والشوارع ..تخوف تحصر القلب ..

حتى الدنيا دم ..

لجمني گلبي ..

احس بغداد ضاعت ..

مثل ماضعت اني ..

عالم تهوس وعالم تفرهد وعالم تريد دم ..

وكانما ..جانو ينتظروها واجتهم ..

وانتي زهرة من ياعالم ..

اني ..من عالم المنسي ..الضايع ..

اني ..اي اني

وين رايحه ..اندار الجهال وياي يمشون

وهل جهال وين احگول بيهم ..

ويا درب اگصد وياباب ادك ..

هناك ويصيحون تعبنا اكعدهم ..

انطيهم مي ولكمه ونمشي ..

اسمع صوت سيارة ورايه ..

انداريت سيارة تكسي ابيض وبرتقالي ..

مشت تعدتنا ..

ورجع وكف ..

نزل الجامه ووكف ..

كال وين رايحه اختي ..

اباوع عليه ..

بروحي كلت لو هدف لو نجف ويا ..

كتله فدوة تكدر توديني للعلاوي ..

كال شسوين بيها ..

كتله اروح لاهلي ..

كال ..ماكو ولا سيارة وين تكدرين ترحين ..

زين شوكت يفتحوها ..

كال والله مدري ..

تريدين اوصلج لمكان .اني عابر ذاك الصوب ..

كتله فدوة للشعب ..

كال هسة تخوف ..

كال وين ماوصل اذبج ..

اي فدوة لعينك ..

صعدت وصعدت الجهال ..

بعدني ماكاعدة ..كال .شطلعج باالوضعيه ..

ماعرف شحجي وشكول .

كتله ..
انجبرت والله ..

كال الله يستر عليج ..

مشة بينا مسافه ..

طويله ..

الجهال نامو ..

واني هم من التعب كمت اغفي

واهناك وافز ..

فلوسي وذهبي ..بوكتها ..خليتهم بعلاكه ..

وخيطتهم ويا البطانه مال هدومي ..

بحيث ولا يبينن ..

واني مامنه عليهم كل شويه واتحسسهم ..

بمكانهم ..

غفيت

هناك واحس راسي انردم بالكشن ..

فتحت عيوني ..

هذا يرجع بگ..

يابه شكو ..

امريكان سادين الشارع ..

مديت راسي اشوف دبابه بنص الشارع ..

وهيج يضرب علينا ضوة ..

والرجال مثل المخبل كام يرجع ..

واستدار وطلع ..

وكف كال نزلي ..

هالحجي الدنيا بدت تغورب ..

باوعت عليه وين انزل

وديني للشعب وشكد متريد انطيك ..

كال ياشعب ..اني هم راجع لخوالي..هنا بيوتهم

نزلي رحمة لاهلج وين احير بيج ..

فدوة لعينك ..اخويه

ابد

كال تنزلين لو انزلج اني ..

جريت الجهال ونزلت ..

وشحط السيارة وراح

واحد يباوع بوجهه الثاني

لو باقية بلبيت ارحم الي من الحال ..

نزلني بمكان..
ع شارع محلات مسدودة

اخدت صوبهم ..

وطبيت بفرع .

عسا ماتكتر باي مكان ..

جنت امشي وابجي .

وبگلبي انادي الله ..يطلعني من هالورطه الي ورطت حالي بيها

دائما ..بكل شي ماعندي خيار

واحس نفسي انجبر بالشي الي اسوي ..

بكل حياتي ..

لو باقيه بالبيت يمكن احسن

بس ماعرف شنو حالي ..اذا طبو الحراميه ..

وهسة ضايعه بدرب ..

شوارع هالمنطقه يختلف عن شوارع الي كعدت بيها بيت الحجي

هنا اكصف وبيوتها قديمه حيل ..

تعبت بعد مابيه امشي ..

كعدت بوحدة من الدرابين ع الرصيف ..

وجريت جنطه ..

طلعت منها دشداشتين فرشتهم ..

جانت الكاع ثلج ..

لليوم احس برودتها ..

وهليت الجهال عليها ..

وماعرف،شلون راح اوصل لاهلي لخالتي لاي ديرة بيها اهلي ..

حسام /زهرة وبن راح نروح ..

إنداريت عليه ..مادري

حسام / واهلي وينهم ..

هم مادري

رند ..رجعينا لبيتنا ..

كتلهم ..شيرجعنا بعد ..اصبرو ..

اسمع طكة باب ..

اندار بيت قديم جبيؤ وبابه مزنجرة ..

طلع منها رجال جبير ..بالعمر ..
باوع علينا ..

كال السلام عليكم ..

كمت كتله وعليكم السلام ..

وكف بصوب حايطهم ودك الجدر . ..

بي اكل ..

الظاهر ينطيها للحيوانات ..

وطب زلج بابه ..

رجعت كعدت ..

حضنت حسام لان جان هوايه يون ع اهله ..

وكمت العب بشعرة ..

هناك وردت انفتحت الباب ..

واجه الرجال وكف يمي ..

كال شعدج هنا كاعدة ..

كمت عمي ..هسة اكوم ..يلا رند حسام ..لمو الغراض ..

يلا دنرةح ..

تقرب مني بينت ملامحة الي كلها تجاعيد وعيونه الصغار وخشمه جبير ..

بس وحهه كله حنينه

دشداشته الرصاصي وفوكاها السترة القديمه ..

ماعرف ذكرتني،بابوبه ..

كال بنيتي انتي اني مجاي اكولج

روحي جاي اكولج شمكعدج اهنا ودنيا دتظلم ووياج جهال ..

متخافين من جلب يطلع الكم .

حشاج واحد ..انكس من الجلب ياذيكم ..

انتي مين ..

كلمه بنيتي هيج هزت روحي هز ..

كتله ياعمي سالفتي سالفه. .وطكت الدمعه بعيوني

هناك واسمع ابو جعفر شدسوي ..

كلها تعاي،شوفي هالشوفه حجيه ..

اجتي،وجنها بطريق من تشمي ..
وكفت كالت ذولي،منو ..

كلها علمي علمج..

ولج عيني منومتهم بهالبرد وبالكاع ..
كومي،يمه كمي،اهلج وين ..

اني ابجي وع بجيي الجهال بجت ..

تعاي طبي يمنا .

كتلها لا يمه .هسة ارتاح واروح ..

وين ترحين ..

هيج كوة لازمه روحي،..

بجيتي ..

كتلها والله يايمه ماعرف،ماعرف ..

رند كالت .امي وابويه راحو لبيت جدي ومارجعو بعد ..
وطبو علينا حراميه وانهزمنا.

جرتها حضنتها يمه سودة عليه ..

تعاي يايمه تعالي ..

هيج قلبي استسلم ..
وجؤيت الغراض والجهال وطبيت بيتهم ..

شيصير يصير ..

اخذت حسرة ..ودهلت

اول ماطبيت .

بوجهي هول جبير وغراضه كلها قديمه ..

والتخم خالين عليه جراجف بيض..

كعدت اني والجهال ..

بنص الهول صوبه علاء الدين ..

وعليها كتلي،مي ..يفور تارس الهول هوى رطب ودافي ..

خالين ..شمعتين ولاله ..ع الرازونه مال كهرباء ..

هيج اتفقدت الغرفه بعيوني شبر شبر ..
لوحه.شلال ..ومنا ايه قران

وساعه،
والبردات ابيض وبيها ورد ماروني ..من ذني القديمات حيل..

كعدو كدامي ..

جوعانين مو ؟

كتلهم لا ..

كال الرجال ..ام جعفر اخذيهم يغسلون
..

اخذتني،..ومشت اني والجهال ..

ممر ..طويل ومنا غرفتين ..مسدودات ..

وهذا درج بناء ..وع تيغه مالته شمعه ..

وكباله مغسله وحمام ..

طببت الجهال واحد واحد
للحمام وبعدها يغسلون ..

كملت الهم انتظروتي اطب ..

طبيت ..حمام ..من الجص ..

وبالنص بوري، نحاسي لونه وطشت مي ..ونيجانه زركه ..

ورازونه خالي بيها ليف ..وصابون ..
ومرايا ..

اعاين الشال مكلوب ..حلكي من جوة مشكك ..

حالي  حال ميسولف،

غسلت ايدي ورجلي وجهي وحلكي من التراب

ونفضت هدومي وطلعت ..

الجهال ماكو ..

اسمع صوتهم بالهولؤ..

رحت شفت كاعدين ياكلون ..كلمن كدامه كاسه ..والحجيه ..خاله صينيه بيها جدريه

واولهم دموع ..كاعدة تاكل .

كعدت ..

داحجي ..

الرجال كال لاتحجين تعبانين وجوعانين ارتاحي وهذا بيت ابوج جدج ..

من كال جدج كشت روحي،..

كتله ابويه وربي ينطيك عمر بكد ترابه ..

ماعرف،شلون اشكر منكم ..

المراه ..يايمه خوما تكاطعت الدنيا ..

ع بختج ..

وفتحت قبق،الجدر ..وكامت اتصب الي ..

وخلتها كدامي بالكاع .

جانت شوربه عدس صفرة ..

بس مو جنها شوربه كد ماطيبه تخبل ..

كملت الكاسه بدقايق،اني والجهال

وردت صبت النا ..

بدون ميسالون اني منو ووين اهلي ..

وهذا قلبي جن قالب ثلج ونزل عليهر..

كملت الاكل ..

كامت هي ويا ..

فرشو جودليات ..
كمت وياهم افرش ..

كال الرجلل نامي ..والصبح الله كريم

وللحكاية بقيه