زهرة

البارت ٢٥ ج ٢

صباح الانوار

زهرة
ج 25
الفصل الثاني ..

من الليل حضرنا كل شي ..

وجهزنا الجنط ..

وبدلت ..ولفيت دموع بالبطانيه ..

واجة علينا عمار اخذنه لاهل
امل .

صعدت بسيارة ..

اني والجهال ..كاعدين ليورة ..

و امل كعدت ليكدام ..

السلام عليكم
جاوب وعليكم السلام
وبس
وبقى يسولف ويا امل الظاهر يعرفها
زين ..

هناك واسمعه يكول ..
هي مزوجه ..

ركزت عليهم كالت اله اي،مزوجة ..

وهاي بتها ..

كلها رجلها وين ..

اندارت عليه كالت ميت ..

كال هااا الله يرحمه شلون مات وهي صغيرة

كالت مات بحادث ..

اني بس اباوع واخاف لا اجفص بحجايه ..
درت راسي ع الجام ..
وشفت طلع خارج بغداد

طريقهم خارجي ..

طلعنا  بغداد ..

كل شويه انزل الجامه واشتم هوى بارد
و ارجع اسدها ..
هوى البيت جان خانكني ..خنك .
افتح الجامه وارجع اسدها

لان الجو بدة يكسر وبي برودة ..

كعدت بظهر مقعد امل ..

وجنت كلما ارفع راسي اعاين عمار يعاين عليه ..

وارجع انزل راسي .لو التفت ..ع الجامه ..

ودموع بحظني كل شويه تهمش الجامه
وتلعب ..

بديت اضايق من نضراته
ولهيت روحي بالجهال ..

رند وحسام كل شويه يتناكرون ع الجامه ..
وافازع بيناتهم .
وهناك واشوف تكافشو ..وضل تبجي رند لان ياذيها ..اخوها ..
لو الكاه نابت سنونه باديها لو ملخ شعرها..
وامل تعيط وتهم عليهم تريد تضرب ..
واني واكعه بيها ..

مو سفرة زقنبوت طلعت ..
لحد ما جريت رند ع جامه وحسام ع جامه ..
وكعدت بالنص اني ..

دموع كامت تون ..ع هواستهم ..

ماعولت اسكت الكبار كامت تبجي ..

والا تكعد يم الجام ..

وهم ميدرون اني هم اريد اكعد واعاين ..

حالي من حالهم ..

كد ما بجت ..ذبت من راسها ..

ووصخت هدومي وهدومها
طريق الاكشر ..

كوة جريت الجنطه من جوة رجلي وبدلت الها الفوكانيات بس ..واخدتها مني امل
وهدئتها ..ونامت يمها ..
رجعت راسي ع الكشن ..وجتفت ايدي وغمضت عيوني ..

ماعرف ليش اجتي صورة كبالي ..
ابويه كاعد ليكدام ..وامي يمي ..
وابويه يحجي ويا السايق ..

ويرزل امي ..
حسيت دموعي نزلت مسحتها
وفتحت عيوني ..كون الكه ابوي كدامي ..
وابوس ايدة ورجله ..
واكوله راضية رجعني وياك لاي مكان
فتحتها
اخذت حسة

بين الطريق الخارجي ..

اخذ ع اليسار وطبينا بشارع شجبير  هم رئيسي ومشينا بي هوايه ..

واخذنا .ع اليمين ..

ووكف بينا السيارة ونزلنا ..

بدايه الشارع ..

انتبهت اكو ..بنايه كلش جبيرة ..

وعليها حرس ..

قريبه ع فرعهم ..

نزلو الجهال ونزلت وراهم ..

الجهال ركضو لبيت بابه رصاصي وواحهته جبيرة ..

جانت الباب مردودة ..

شو امل هم راحت طبت وباديها دموع
بقيت فرد اني واكفه
والولد عمار جان ينزل غراض من الصندوك
واني واكفه ..

كال اشيلهم واطببهم وياج
ترة بيت عمي نعمان اهل ..مو بس جيران ..

كتله لا شكرا هسة تجي ام رند ..

كال بكيفج ..

بس حبيت اكولج شغله ..

عيونج حلوة جنها مال بزونه ..

رفعت راسي عليه ..
وضليت اباوع
انتبهه على ملامحة اول مرة

عيونه كبار ..
وشعرة ..
بداخلي ابتسمت اله وكانما فارس الي ديحجي ويايه ..

جان ينطي من ملامحة
مدري شكد واحس هو مشغل السيارة ورايح
واني سارحه بخيالي ..

المشكله فارس دوم ع بالي بسبب هالانسان
عرفت الصح والخطا
بسببة درست ..
اكو كلمه دائما اسمعها انتي تصيرين شي حلو بالنهاية ..
الوحيد الي انطاني بدون مقابل
من جنت طفله بلا وعي وتفكير ..

مثل الام وتعلم ابنها يحبي ..يمشي
تاتي تاتي ..خطوة خطوة
هيج علمني ..

صعب نلكه مثله ..انسان يبث الامل داخل ارواحنا

دائما اذكرهه ..
اذا حي الله يوفقة
واذا ميت الله يرحمه ..

اسمع ام رند ..
ولج هاي بعدج بالباب ..
تعاي
وشالت غراض من الكاع ..
اخذت نفس طويل ..
وطبيت وياها ..

بدخلتي للبيت ..
تذكرت بيت عمي الجبير..

نفس الفصال بيت جبير ..وبي حوش ومنا ع اليمنى حديقة جبيرة وبيها كرويته خشب ..

حتى باب المطبخ نفس الفصال ..

الشبابيك ..

يعني امشي واعاين ..
عبالك ..بيت عمي ..

طبيت تلكتني مرة جبيرة حنطاويه ..

بوججها دك ..

ياهلا ياهلا
وبوستني،..

اني فرحت ..بيها ..
طبيت مطبخ جبير ..وبي 3نسوان
كعدات بالكاع ..

ينظفن خضرة ..
لبسهم ..و كعدتهم ذكرتني باهلي. 

ابتسمت وسلمت عليهم ..

وام رند بدت تعرفني
هاي امي
زهاي مرت اخويه
وهاي الثانيه هم مرت اخويه
وهاي اختي ..

واخذتني ..للاستقبال وكعدتني ..

وهاي الجهال تفوت جوكه وترجع جوكه
وياهم دموع شايلها
اشوف بس راسها يهتز وتضحك
ويا الرايح والجاي

وكعدت كبالي بنيه تطلع 11سنه اقل
لابسه دشداشة بيضه وبيها ورد بنفسجي كبار
وتعلج وطلع العلج
وترجع تعلج ..
تباوع عليه من فوك ليجوة ..
وعبالك ضرتها وترفعلي حاجب ..

ومدري تعوج بحلكها ..

كالت انتي مين بله وتلعب بشعرها ..

كتلها اني زهرة ..
وانتي شسمج

كالت عرفنا زهرة مين ..

كتلها شنو مين ..

كالت بيتكم وين ..وشعندج جايتنا ..

طبت ام رند ..
ولج ام اللسان شعندج هنا ..

كالت هاي بنت اخويه الجبير .
هاجر بس وكحة ..

كتله اي فدوة تخبل ..
امل كالت الها روحي لعبي ويا جهال
نفخت نفسها
اني جبيرة
مالعب بعد .

وباوعت الي وعوجت حلكها ومشت ..

كالت بدلي وامشي ويانا بالمطبخ ..

كتلها لا خليني بهدومي ..

كالت زهرة ..ولدنا معزولين عن النسوان يعني
لا تتقيدين
ولبسي دشداشة طويله ردن وذبي شال ع راسج

وتعاي

امي مسوية شلون باجة وكسور عظم تموت

كتلعا بس اريد اغسل حتى ابدل هدومي ..
اخذتني غسلت
وراها

اخذتني ..بغرفه ..صغيرة
بيها كنتور ..وتعلاكه ..

وفرش فوك الكنتور ..

كالت بدلي اهنا ..

طلعت صحتها كتلها فدوة
جيبي دموع ابدل الها زوعت بالطريق ..

كالت معليج بيها اني ابدل الها
بدلي انتي ..

طلعت ..

كلشي بهذا اللبيت يذكرني باهلي وعمامي
حتى الحايط .

مرات مكان عطر .لوحه ..

تعيد ذكريات مدفونه من سنين ..

بدلت دشداشة فانيله نيلي طوخ وبيها احمر بس ع الحاشيه ..
وذبيت شال ع راسي

وطلعت ..

شفت روجه جهال هيييييي هااااا هووووو

عبالك عروس وطالعه ..

وبينهم دموع ..

اخذتها منهم ..
كامت تصرخ

خفت عليها ..لا توكع لو يصير شي

لمه الجهال بالمناسبة ..

اخاف منها ..

رحت للمطبخ وكعدت ..
جانو يسولفون ويضحكون واني متكترة وكاعدة
وبحضني دموع ..تلوب احاول اهزها وانومها

كالت ام امل ..

ياحلوة بس هالبنيه عندج
باوعت ع امل ..

كالت امل اي يمه بس هاي ورجلها مات ..

امها ..ياااا عيني بعدها شابه وترملت ..

مكرودة ..وشلون مات

امل ..اندعم ..
ام امل ..يامكرود وشدعمه ..

كالت امل ..ديعبر واندعم ..

امها ..يا ..مايشوف ..الي جاي يسوق
كون فعصه لوري ..وانمرد

وصارله شكد ميت

امل ..سنه ..

دارت وجهها عليه ..
بخزرة شو محزنانه ...

ضحكت امل يمه شجلبتي بيها
هوة سنه وذبت الاسود ..

كالت شو ابوج صارله 20سنه ميت ماذبيته

اني بس اباوع ع امل وامها ..
مثل اطرش بزفه ..

وابتسم ..

نامت بحضني ..دموع ..

وبقو يسولفون وكل شويه امها راجعه عليه

تسال شي ..

وامل اجاوب عني

الا ان طكت امها كالت شبيج مطيورة انتي مجاةب هي ..

امل كالت مو تستحي ..

اندرات عليه لا يمه لا تستحين مثل اهلج احنا

صدك اهلج مين ..

دخلت رند ..وكامت تسالها ع اخوها وزواجه

امها من سمعت هيج انفتحت

تحجي ع جنتها الجديدة

تكولها ..مشايفه ابد ..

اخذ الها ذهب تريد بعد اجيب الها هدوم تعيب

وحدة مدري من ياخيسة جابها الي ..
وهذا اخوج ..وتفر باديها طاير بيها طير
عبالك ..ست الحسن والدلال يمه ..

وهي ..لو ذبين عليها عكال تطلع زلمه ..

تخزي ..

ومبين راح ..تفحط روحي ..

فد انا امج يا امل والله اذا ماتويها توي

واخليها تمشي ع صراط ..

امل كالت يمه بعدها باولها شبيج

كالت بصوت ناصي اسكتي حتى ذني المهمودات لا تطلع عيونهم ..ع جناينها الي بلبيت ..

شو من يمي خفت ..

وكامو يصبون

صح اني مو نحسخ بالاكل بس الباجة
ماحبها ابد..

صبو النا بالمطبخ ..ذبيت بصفي،دموع
كالو ناخذها للغرفه كتلهم لا هنا تنام يمي ..
خلو كدامي،

صواني وبيها ..ثريد وعليها راس الخروف وكراعين ..

والصينيه الي كبالي بيها مخ ..وللسان ..

وخضرة وطرشي وبصل ..
وللبن انترست السفرة ..

كعدت بصفي امل
وصاحو الجهال ..

وكلها كعدت تاكل ..

وكل شويه تكولي امها متاكلين شبيج مستحية ..

واخذ طرف من الخبزة واطله
كوة

وتكفخ بخشمي ريحتها ..وزفرة المخ

كوة اكلت لكمتين
و

وكمت سفرة دايمه عاشت الايادي ..

وين
شبعت

ام رند خاف متحبيها

كتلها احبها بس الطريق گلب معدتي ..

رحت غسلت ..

ورجعت يمهم يحجون ع تحضيرات الحنه

هناك وطب رجال علينا عدلت كعدتي ..
ونفسي ..

كامت عليه ام رند ..

رحت عليه .هلهلت بعلو حسها .وبوسته ..وحضنته

وهو هم ..بوسها

ويسال شلونج وشخبارج ونعمان شو مو وياج ..

وليش تكطعين هالكد
ويبوس ويشم بجهالها

اندار عليه

كال السلام عليكم

جاةبته وعليكم السلام .

ام رند كالت اخوية ..الصغير .غالب..

وهاي جيراني ..ام موع

كال اهلا وسهلا

وراح ..

كالت هذا العريس،..

كل شي هنا يوجع لقائهم ..

سوللفهم ..
حجيهم ..
لمتهم ..توجع ..

تمنيت ارجع للبيت المحبوسة بي ولا اعيش هالاحاسيس المضاربه
الاب
الام
الاخ
الزوج
العائله
تهت

بين حزن وفرح ..

مر اليوم ..هوسه يمهم وهوسه الفرح سريعه تمر ..

والوكت كله دموع يمي خالتها بس صعب تلزم طفل بهوسه جهال

جانت توها تمشي ..

وتزحف وياهو الفات تريد تروح عليه ..

بدت العالم تجي ..ولبس وشعر ومكياج ..

واني بعدني لابسه الدشداشة ..وكاعدة. .

هناك ونزلت ام رند

اباعها مو هي ..

من مكياج ولبس ومسرحه شعرها

جانت لابس هاشمي اسود وبي ذهبي

ولابسه ذهب ..وشحاطه عاليه

ولا عرفتها كد ماحلوة طالعه ..

كالت زهرة شو مبدلتي ..

كتلها خليني هيج اريح الي ..

كالت لا كومي بدلي عيب عالم جايه
وهنا كلها شيوخ ونسوانهم ..

كتلها والله مجايبه شي ..
كالت مو كتلج جيبي كتلها مبالي هيج ..

جرتني امشي ..

خليت دموع يم حسام

وكتله ضل كاعد هنا هسة اجي ..

وصعدتني فوك

دورت بجنطتها ..طلعت كلابيه ..لونها وردي طوخ ..وبيها شغل ..وخرز فضي،..

كالت ذني من الكويت لبسيهم

كتلها لا

كالت دلبسي عليج الله ..

وهسة اجيج

والله شفتها حلوة ومستورة

لبستها ..

وطبت سوت شعري ولفته بلورات ..

وخلت الي،ضلال فوك عيوني ..وحمرة ..ورديه ازبري ..

ورتبتني ..

ونزلت ..

وياهم ..

رحت للمطبخ
ادور ع حسام ماكو ..

طلعت ..للصاله ماكو

صحت امل .
بين الهوسه ..كالت شعليهم لا تخافين ..

كلبي لعب ..وبعد شويه اتخبل كمت ادور غرفه غرفه ..

ذبيت شال ع راسي

وطلعت اسال الجهال ..

كالو برة

فتحت بابهم ..

ادور يمنا يسرى ماكو

يمه بنيتي وينها ..

كمت اصيح حسام حسسسام دموووع ..

اعاين من بعيد حسام يمشي ورجال ..شايل دموع

رحت ركض عليهم ..

وصلت قريب عمار ..

جريتها من ايدة ..

وبقيت اخنزر عليه

وارجف هاي شجابها يمك ..

وين جنت ماخذها
باستغراب ..جاوب

شفتهم برة
واخذتها اشتري الها لا تخافين ..
كتله ..متلزمها ولا طخها زين ..
معليك بينا ..

عفته وجريت حسام ..وطبيت ..جوة .

قلبي بي نار ..من شفتها بايدة ..
بدت الحفله و
خلصت الحفله واني اركض ورة دموع
من مكان لمكان ..
قرقزتني ..وخبلتني ..

التجربة الي عشتها ..خلت خوف بروحي
ع بنتي ..
وهي عمرها سنه ..بس اخاف عليها ..

هذا فكري،ميهدا لحظه من الافكار السودة
ويخلي كل شي صعب عشته كدامي ..

حتى من نمنا ..

مكدرت انام ..

وجنت كلما اغفى اكعد اتلمسها واغطيها ..

وارجع ..احط راسي ..

هنا الشي  الحلو .الي شفته
ذكرني باهلي ..

وحتى قبل لا يطر الفجر

عوعى الديج ..

بحيث منايمه وكمت من الفراش كلي نشاط
كون اؤوح لمطبخنا ..واعجن

واصعد بالسطح اوجر الخشب واخبز ..

واشم ريحه الزرع ..

والورد ..
والريحان الي توة ينبع ..

وشجر البرتقال ..

وصح ..سمعت طكطكه وصوت برة الغرفه

عرفت .مثل اهلي يكعدون من الفجريه ..

وتمنيت اطلع وياهم ..

بس بقيت بمكاني واتخيل ..
نفسي وياهم واضحك ..

واسولف ..
واطب ..بالديوان واشوف ابويه يلف جكارته

ويكولي بويه زهرة خدريلي قوري جاي ..

وهنا الجهال تركض وراي ..يطلبون اكل ..
وهاي امي ترزل بيه ..

اخ ياذكريات ..
مين اطب الج .والكاه بيج راحه بال ..

حسرة وتجر،حسرة ..واليوم يكضي ..

والعمر يكضي بتعب ..

ونفز بتالي العمر ..وارواحنا مشيبه ..

مابين ..نحن للي راح وخوف من الجاي ..

كل شي كذب بكذب مر بحياتي ..

والصح الوحيد دموع ..

وفارس بس ..

اما منير جان شاغل ..ثلثين الوكت ..

احساس صعب اوصفه ..

شنو هو بنسبة الي
تمسكه الي ..وخدمته لاهلي ..

وسؤاله الدائم عني ..

خلق جوايه احساس غريب ..

ماعرف افسرة ..

وتركته ..وحدة يتفسر ..
بس الي اعرفه احتاجه ..
بحياتي ..

......

كوة كعدت ام رند ..

ولكتني كاعدة ..

طلعنا يم اهلها ..
وصح توقعي امها كاعدة من وكت ..

والجناين جانت تخبز..ومحضرين كل شي ..

كعدنا تريكنا ..وسوالف وضحك

واكيد اني ماخذة جانب الصمت ..

مو ماعرف احجي،..

جنت استحي ..

يمكن هاي الميزة المحلوة اخذتها من امي ..

بس امي حتى الي يدوس بطنها تضحك اله ..

صعب اسولف واحجي وان حجيت ع كد السؤال ..

نفس تقاليد اعراسنا تنذبح الذبايح وتتركب للمعازيم ..

بيومها جان البيت ملغوم هوسة ..

ودموع موتتني ..بالبجي ..

حتى فكرت اعوف كل شي وارجع ..

بين مكانها متغير وممتعلمه ع هوسه
وبين
ذبيني اكمز ويا الجهال ..

كل شويه اخذها واطلع بالطرمه افتر بيها
وارجع

تسكت ..

واطب وترجع تبجي
حتى اهلها كالو الله يساعدج مرمرتج

ويكولون ذبيها ..ويا جهال اتحجج
متعلمه عليه ..
ولو هي وياهم تنسى كل شي

بس ..خالتها بحضني وتلعب كدامي

العرس جان العصر ..

بعد الغدة ..بدت النسوان تتحضر للزفه
حتى يجيبوها ..لهنا ..

واني وياهم مثل الروجه مال شط
كمت اروح منا واجي منا

لحد ماشفت نفسي ..مبدله

ولابسة هاشمي مال ام رند ..الاسود ..

صح هي اترس مني بس جان كلش حلو عليه ..

كلش حبيته ..

وهم لفيت شعري ..
وخليت فوك عيوني كحل اسود وحمرة حمرا .

وهي لبست ..هيج ثوب جنه بدله
وبي ذيل طويل وراها ..
والاغلب لابسات ثوب لو هاشمي ..

لبسنا فوكهن عبي

ولبست دموع فستان وكالون ابوها جايبهم

وطلعتا ..

هوسه زلم ونسوان ..

بين الهوسه احس واحد واكف يمي

كال تصعدين ويايه

انداؤيت علية ..
هذا عمار يمكن اوصل اقل من جتفه ..

كتله اكيد لا ..

ابتسم كال اكيد اي

لان الحجي وصاني بيج ..وردة

كتله زهرة ..

كال المهم اثنينهم ..نبات ..وبيهم عطر مثل عطرج .

كتله اني اصعد ويا ام رند ..ماصعد وياك ..

كال ام رند وياي ..

وصاح عليها ..

كالت يلا امشي نصعد ..

دنروح ..اشرت الها تعاي،..

كالت شكو ..كتلها ماصعد ويا ..

كالت ليش شسوة ..
كتلها ماسوة شي

بس شجابه ..

اشرت الي ..هذا بيتهم وهذاك بيت اهل الحجي

عمار ابن اخو للحجي وبنفس الوكت رجل خالته ..

كتلها هاي شلون

كالت ولج اثنين اخوان ماخذين اثنين خوات ..
خوما جفصتي بشي ..

كتلها ابد والله ..

كالت امشي ويانه ..

مشيت وصعدنا ..وياه جان مشغل اغنيه بعلو حسها ولك لاله ولك لاله ايد بايد يمشي وغيري يبرارة ولك لاله
وام رند والجهال تهوس

ودموع صفك ..

وكلما يصير يمنا العريس هاي الجهال تكمز وام رند تاشر باديها الهم ..
وعمار يدك هورن ..
مسافه صغيرة ووصلنا الهم ..
نزلنا ..
نزلت وبايدي ..بنتي،..

انتجى ع السبارة ..وسد الباب،..
كال انتظرج ..
تطلعين ..وابتسم الي،..
عفته ومشيت ..

طبينا للبيت صغير ..

وهناك كامن يهوسن النسوان ..

بس اؤيد اشوف العروس صدك محلوة ..

والله هناك وبينت الي جنها كمر بيضه ..ومربربه ..وشعرها ..اصفر ..

كلش حلوة ..

وام امل ..تعيب عليها ..
جنها عمتي غنيه ..

وطبت ام امل دك وتدبج وتهوس

والهم ..

اخذتاهم وطلعنا ..

ورجعنا فريناهك وزفه ومزيقه
بهاي الهوسه صدك عشت الفرح

ونسيت الاول والتالي،..
وعيوتي وكلبي ..وكل شي بيه يضحك

ودموع بحضني تركص وصفك ..

بس هذا عمار نغصني ..عينه ولا نزلت مني دقيقه

احس يريد ياكلني بيهم..

وصلنا للبيت ..

وبدت الحفله الثانيه والعشا
والهوسه مال زلم برة
وجايبين مطرب ..
ونسوان وجهال ..
واكثر من مرة تسال عليه عبالهم ممزوجه ..
ويخطبوني ..
وام رند تكواهم ارمله ..
والي تريدني لحماها والي،سمعت ارمله بطلت

.........
وخلصت الحفله ..وهلكنا تعب،..
ونمنا دنرجع ثاني يوم الصبح  .
ورجعنا ثاني يوم ..

ورجعنا ..عمار ..
الطريق كله يسولف ويوجهه الي اساله

عن داراستي وشعجب يم ام رند ..
جنت اجاوب ..ومرات اجاوب عني،
ام رند ..

ونزل جاب لدموع والجهال حلويات ..
وحلف الا ننزل ونتغدى بالطريق ..

حاولنا ويا ..

بس اصر ننزل ..

ونزلنا بمطعم ..
وكعدنا اكلنا ..

نزل كل شي ع ميز من كباب وكص،ودجاج ..

هم رغم الحصار والجوع بس جانو اغنياء الحجي واهله ..كلهم ..
هم تجار ..وعدهم ..عمارات وبيوت بغداد وغيرها .من المحافظات ..

ناكل ويلمح الي بالكلام عجبج اكلهم
تحتاجين شي،..

اني اجاوبه بحديه لا ..

بس طول ماكاعدة اذكر طلعني،ويا منير وشلون جنت اكل ..وخجلانه من الناس،..

كل شي تغير هسة ..

واتمنى بنتي متعيش الي عشته بيوم ..

كملنا وكمنا نغسل

دنغسل كالت ام رند ..

هذا عمار لح هوايه جنه عينه منج ..زهرة

تحذري منه ..

كتلها والله مامنطيته وجهه ابد

كالت داكولج اني وانتي تحذري،..

دشوفي مخله،شي ماسواه ..

وكامت تضحك ..عفيه رياجيل بسرعه يتقشمرون ومن نوكع بديهم هم يقشمرونا

وتضحك ..

طلعنا بعد حتى بوجهه ماشفت ..
لحد ماوصلنا البيت ..

نزلت ..ونزلنا غراضنا ..

كال بلا زحمه اريد احجي وياج ..

كتله ..خير

صاحتني ام رند

وعفته وطبيت جوة ...

ومر اليوم بين سبح وترتيب لان تعبانين ..
ومرت  ايام والحجي ماكو بس الي اعرفه موجود ..
ورة يومين
اندكت الباب واني بالطرمه
رحت حجيت من ورة الباب
صحت منو

كال اني عمار
كتله شتريد
كال افتحي احاجيج
الحجي داز غراض.
فتحتها ..شويه ..
وبس عيوني مبينه ..
اول مافتحتها

وعيوني بينت منهم كال بضحكه صدقه لهل عيون ..
هي ركعه
باب وهي ركضة بتك نعال

وهي ..لبدة ..جوة بالغرفه ..

عفيه حظ لام زلم ع بابي
ولا واحد حضيت بي حظ

هنوب طلعلي هالمعزه شيريد مني ..

والله لو الحجي،يدؤي لا يحركنا ..
حرك ..
دوم اسمع منه انتي مالتي وبس ..

بهاي الاربعة ايام اتصلت بمنير ..
وكتله اعرف ابويه ميت ..وليش مكتلي

كال صعبه ماكدر اكولج زهرة صعبه عليه وعليج
بس امانه الله ورسوله اهلج ماقصر وياهم ..
وشبيج افكر اخذ اختج لاخوي بس تكبر بعد ..
وحجيت ويا ع وليد ..

يعني جان اتصللي بي اغلبه ع اهلي،..نسولف،..

الي افتهمته منه مشاكل ويا خطيبته واصلا يكول ماؤيد ازوج بس امي تلح ..بزواجي ..

قبل لا اسدة ..

كال زهرة اني تعبت وعيني ع تليفون ..

اني حبيتج من اول يوم
بس حبي الج بغباء وشهوة مراهق جانت ..
وغلطت ..

بس مدتطلع من بالي .وصدك تعبت
اتمنى ارتاح
كولي الي تريدي ..
اذا انتي مرتاحه ومستقرة بحياتج. .

الف عافيه عليج واطلع منها نهائي

واذا بيج امل ترجعين الي كولي ..

واخذج انتي وبنتج ونعيش حياتنا ..

بس انطيني كلام جدي ..

كال احس بيج ممرتاحه
واني سبب كل شي انطيني فرصه ..
صغيرة ..اصحح كل غلط مر بحياتي ..
وحياتج وسببه اني ..

كتله ..هسة ..
قاطعني

كال اخذي كل الوكت ماريد جواب هسة ..

وسديته منه ..
واني بين نارين نار الحجي
ونار كلامه
شكد مابتعد ارجع اله ..ليش ؟
وهو المسبب الرئيسي لكل شي ..

والمن اعوف .الحجي وهيج اجازي احسانه بغلط مني،..لا ..زهرة عقلي،
.ومنو يكول الحجي يعوفني
واحتمال ياخذ مني دموع ..

واني اموت اذا اخذها مني ..

ومنو يكول الحجي يعوف منير بحاله ..

مثل منير ركض ورة فارس ..
ومعافه ..
ولليوم عندي احساس هو سبب السجن لاحد من عائلته او هو ..

بهاي الفترة جنت  اتحضر للامتحانات مال ثالث تركت بسبب دموع وولادتي بس هالسنه اكيد ادرس وامتحن ..
ماريد شي يشغلني ..
ماعرف شفكر وشسوي ..

خامس يوم ..
الظهريه اجه يمنا عمار ..

بحجة الحجي دازة ..

اكيد طلع اله نعمان وسولف وياه ..
وطب جوة من طب هو
رحت اني لبيت .ام رند ..
وبقيت كاعدة ..

يمهم ..

رجع نعمان ..
ورجعت للبيت اني ..

جنت حيل مركزة بدراسه والكه صعوبه بالانكليزي ..

وانتظر الحجي يجي حتى ..

يشوفلي حل بي ..

واجه الحجي،بليل
مثل المخبل من طب .ماخلة شي ماكسرة ..
كال اني كتلج مطلعين لو مكلت ..

كتلج ماريد احد يشوفج لو لا ..
احجي احجي ويا حايط اني جاوبيني،..
كتله مسويت شي غلط ..
ابالي،عرف امي جايتني،..لو عرف بمنير
وحلت كتلتج يازهرة

كمت ارجف ..اريد حجايه تطلع مني ماكدر
عاط بيه .رجليج اكسرهم ..
.جفلت ..

ع صوته اجوي ..نعمان ومرته ..
وصريخ دموع ..ترس البيت ..

كتله كلت ..شصار والله مسويت شي ..

كال عمار سال عنج ..وطلبج مني،..

وللحكايه بقيه ..