زهرة

البارت الواحد والعشرون الجزء الثاني

صباح الورد

زهرة
ج 21
الفصل الثاني

وصلنا للمستشفى بسرعه جان الدرب فارغ ..
مابي احد ..
وكف السيارة ..

ونزل قبلي اجوي اثنين خلوني بكرسي متحرك

ونعمان وياهم ..
كال زهرة راح اروح اجيب غراض من البيت
واجيج ..

درت وجهي ويمشون بيه ولازمه بطني
وين رايح لا تعوفني ..

مسمعت منه ولا جواب واختفى
بقيت اتلفت واحجي وياهم ..
اوكفو عفيه اوكف

عطت بي اوووكف ..

وكفو ..
اندار ..ردهه جبيرة ..والكاع مرمر بيضة حتى اني ابين منها
وع جهه ..استعلامات ..

لزمت بطني مغصتني حييل  اخ يمه

وين موديني ماريد ..اجيب بطلت ..

ومشيت ليبرة اريد اطلع ..

جرتني وحدة وين رايحه ..تعاي سجلي اسمج
وهويتج وهويه زوجج
وفلوس ..

كتلها اشوف نعمان وينه ..هو عندة كل شي ..
بقيت واكفه

راح الالم واختفى ..ماعرف ليش باللحظه

اريد امي ابويه اخواني خواتي

ماعرف ليش دموعي تجري عشرة عشرة ..

واعاين بالوجوة مضيعه احد

اوصل للباب واىجع وين اروح ماندل ياربي
شراح يسون بيه هنا وحدي ..
راح يموتوني ..
ولج يمه وينج وعيوني ادور والتلفت ..

ياربي وين اروح ..

وابجي وحدة جبيرة بالعمر وكفت يمي شبيج بنتي

انداريت عليها اريد اشبكها ..

كتلها اهلي ذبوني وراحو
والرجال يريد مني اوراق ..
(المستشفى اهلي )ميقبلون يدخلوني اجيب ..

كالت امج ابوج ..وين ..

صفنت عليها ..ماعرف،شكول الها ..

لزمني الم نزلني للكاع ..

ونزل مني بوري مي ..

ولج ييييمه لحكيلي يووم
واعض حيل بزيج دشداشتي
فدواتك ربي الحگوني .. ..

كامت تصيح الله اكبر ماكو رحمه بكلوبكم
رجلها راح يجيب اوراقها ويجي ..

تعالو راح تجيب هنا تعالو ..

اجة رجال ..كومني ..
ماداتحمل الالم ..ولا داتحمل الانتظار ..

عيون ع برة ..
راحت هي والرجال مدري شحجو ..ورة شويه

واجتني وحدة ..طويلة ورفيعه وجها كله نمش ..

كومتني صاحت البنات بسرعه السديه راح تجيب
بهل الدقايق محسيت شلون شلوني ..

ودخلوني لصاله الولادة ..

رغم اني بجر بس ولادتي مطولت ..

وبسرعه جبت ..

اريد اخذ نفس ..واسال شجبت عفيه اشوف شجبت ..

وحدة كالت بنيه بنيه جبتي ..

احساس غرررريب ..فرحة لهففه خوف ..
اشتياق ضياع الم ..
وطن ..ماعرف ..

اباوع قطعه حمرة ..فاتت من يمي ..
ويدخلون بخشمها ماعرف حلكها صوندات
عفيه شبيها ..

كالت وين اهدومها ..
بقيت صافنه عليها ..

كالت شبيج هدوم الطفل وين ..

كتلها هسة يجيبوها ..

كالت شنو يعني برة واكفين ..

تعبانه مابيه احجي وعيني ع بنتي ..

اخذوها ..من يمي ..

عفيه وين اخذتوها ..

كالت يمه شبيح خوما الطفله تبقى مصلخة هدوم حضينه ..
كماط .هدوم الج هاي هدومج انعدمت ...شبيج انتي ..

جتي ام وحهه المنمش كالت ..

كالت ..عوفيها هسة اجيب للها ..

بقت تحجي ..هي وصاحبتها..

اسمعها تكول .صغيرة ..حتى رحمها صغير وانفطر ..

ولج بس لا بزرة ححرام ..هالطفله ..

وطلعوني ..

بغرفه وحدي ..

وطبت ام النمش ..كالت ..هاي دشداشه مني ..

لبستني ورتبتني ..

وضربتني ابر ..كالت فهميني فلمج شنو
وحدج ماكو احد ..وياج
ترة انتي جبتي بضمان العالم ..
دفعولج فلوس ومطلعين الا عقد زواجج
وغراضج جيبيها ..

والله لو يدري المدير يحرك المستشفى ع روسنا ..

كتلها هسة يجي ..

كالت هو منو شو الحرس تكول ذبها واحد بسيارة وراح
المهم ارتاحي ..

دقايق ..
وطبو جايبين طفلة ..

وخلوها بكاروك يمي ..

اريد اكوم الها مابيه حيل وبعدها بطني توجعني
ومضايقه بكعدتي ..
وحجي السستر خبلني ..
وماكو احد اجة ..لا نعمان ولا مرته ولا الحجي ..

معقوله صار بي شي ..

وكل شويه اسمع حجي من وحدة ..
تدخل عليه ..

الطفله ..نايمه ماسمعت الها صوت ابد ..

كمت ع كيف اباوع عليها ..

وجهها ..احمر ..شك عيونها جبير
شفايف حمر ..خشمها نقطه جنها ملاك ..
خليت  ايدي ع صدرها ..
اتنفس ..

شلتها بين ايدي ..دموعي كامت تجري وحدها

ابجي بشهكه وصوت عالي حضنتها ..

اول مرة من زمن طووويل حسيت بامان ..

ماعرف منو محتاج منو اني احتاج حضنها
لو هي..
ريحتها  ونفسها ..وطراوة جلدها
خلت ايدي ترجف من اتلمسها ..

بقيت صافنه عليها مدري شكثر ..

الا ان حسيت وحدة طبت ..
كالت هاج .
اباوع باديها لفه ..عروك وبيها خضرة وانطتني وياها شربت ..
جنت ميته جوع واحس روحي سايحة ..
اخذتها من اديها ..
واخذت الطفله مني ..
كعدت ع حافه الجربايه وكمت اكل بسرعه من جوعي. .

كالت عيني ..
انتي لا اكو احد راح يجي ويبين ..ولازم انطلع بيان ولادة للطفله وتحتاج اوراق ثبوتيه
وسالفتج طويله خلص الليل وطلع الصبح ومبين احد من اهلج ..
بلعت اللكمه كتلها هسة يجون ..

ياريت طلعين ..وهاي هدومج بعلاكه خليتهم الج

بعد كم ساعه يجي المدير لو شافج يكلب الدنيا علينا
وتنلاص عليج وعلينا

كتلها وين اروح اخاف اتيهم ..

كالت ماعرف ..رجاءا لميت الج هدوم. .من الي جابن وجيبتج و مقصرت وياج ..

لازم ترحين منا ..ترة براسي والله هاي مو مستشفى حكومي وعادي
اهلي وكل شي بفلوس ..

اهلج روحي الهم ..

كتلها ماندل اروح الهم ..صفنت عليه شنو السالفه ..

كملي لكمتج ورضعي الصغيرة
كاعدة تباعين عليها ..

اكلت بسرعه ..بس جنت بعدني جوعانه
ومحستها سندت روحي ..

وبديت ارضعها .جانت تاخذ شويه وتغفى..
من التعب اني هم كمت اغفي ..
خليتها ..بمكانها ..ولفيتها بطانيه صغيرة ..

ورحت للمكاني بس خليت راسي نمت ..

مدري شكد .واحسها تكعدتي كومي اطلعي راح تجي الدمتورة تفتر
عفيه لا توكعين بطلابه
واني غايتي اساعدح ..

كمت ابجي كعدت بصفي ولزمت ايدي كالت اني ماعرف شنو ضروفج بس ربج حنن قلبي عليج بس والله مابيدي شي
لو حكومي ابقيج شهر ..
بس هنا ماكدر ..كل يوم محسوب ..

مدت ايديها بجيبها  هاج فلوس روحي لاهلج

كتلها ماكدر ..
رجلج ؟
ماندلهم ..

صدك جذب ..ياعيني وين اوديج ..

شنو هاي الطفله..لقيطه ..
ابوها وين ..

بجي عمة عيوني وكامن يغوشن ..
كامت تلم بغراضي ..
وتكول لازم تفرغيها ..
كمت وانتجي بالغراض كوة اوكف ..
كمت اردد بداخلي يارب افرجها يارب
ارحمني وين اروح بشارع

يارب ..

بين مدتحجي،ويايه ..

اندكت الباب .انفتحت نعمان..

يايمه يابويه نص حيلي وكع ..

من شفته

وضحكت ..نشك حلكي كتلها هياته اجه

مو كتلج يجون ..
شفتي ..كتلج هسة يجون

نعمان ديطلعوني وين صرت

كمت افتر
كتله جبت بنيه تخبل ..

جان جايب وياه بطانيه لفلفني بيها

وشفته خله فلوس بايد المراه
وطلعتا ..

قبل لا اطلع تشكرت منها وشلت بنيتي ومشيت ..

كتله وين صرت ..

وطلعت الها بيان ..
اوكف شسميتها ..

جان يمشي وامشي وراه

كال امشي زهرة ..

طلعنا من المستشفى ..

وصعدتي بسيارة ..

باوع ع الطفله ..

كال ..زهرة ..الحجي من صارت عندج ولادة كال روح اسمرها يم اي مستشفى ..

وسويت الي رادة. .

ذبيتج ورجعت ..
بس ماعرف شلون سقت ورجعت ..

للبيت ..طبيت امل تسال عليج الجهال يسالون ..

اريد ارجع انام ماكدر ..

لا اني ولا امل اكلنا الندم اكل ..

صارلج شكد يمنا نعرفج انتي شنو..

واعرف مالج احد ..

ووكعتي بايد ذيابه ..

بس هالطفله مالها ذنب ..
اباوع ع اطفالي واذكرج ..واكول هاي دنيا وادور لا باجر الله يعابيني بيهم ..

اجيتج ع مسؤلتي وماعرف وين اوديج
الحجي ميريدج بعد ..

كتله ليش اني شسويت ..

كال سويتي وله لا حياتهم تختلف عنا وهو راعي لكمتي وين اوديج ..

مشى بينا ..

كتله لخالتي ..

كال بس سؤال ..هسة لو جلب اجيبه واربي هم ميهلي اذبه

اهلج من ياطينه فهمني ..

من يامله ..

واحد انكس من الثاني اهلج شمروج ع نهلة

نهلة باعتج

الحجي ذبج ..

منو الج ..عمام خوال ..

باعي فكرنا اني وامل ناخذج لبيتنا ..
وراضي الحجي ..انتي
وهاي تدبر ونعيش ..

كتله اسميها دموع ..

شنو ؟

دموع ..اسمها..لان شفت ضيم ماشيفه بشر ..

ذل ..بقهر باخوف والم ..ودموووع ..

ترست حياتي ..

نعمان ماعندي احد ..احسبني ..من الشارع ..

وين ماتوديني وديني ..

كامت تبجي بحضني حسيتها حست بكسرتي
وحست شلون الدنيا ..

داستني ..وجنت عليه وعليها ..

من اول يوم اتبرى منها الكل ..
درت وجهي للجامه
وحضنتها ..وتلمست وجهها اني يمج
قويه بيج ..
يكولون البنيه تعين امها عينيني يايمه ..
وماخلي الي جرة علية يجرى عليج ..
هدئت 

كمت اهز بيها

اهز بيج يايمه اهز بيج
اغفي عيونج لو اغفي دنيتا
الي مارحمت بيه ولا بيج ..

وللحكايه بقيه
شهرزاد

بارت صغير ..
🌼