زهرة

البارت العاشر الجزء الثاني

مسائكم جوري
الفصل الثاني

ج 10

اطلعج من كل شي اذاج ..

وعد مني ..
بس اريد اعرف ..تستمرين ويايه لو ابقة طول عمري بندم .
اخر مرة اسالج
تريديني لو لا ؟

شلون افهمه اني مداتقبله ..

شلون اكوله انت بنسبه الي كابوس وتحقق..

بس..بدت حياتي تتغير ..وياك ..

زهرة جاوبي ..تستمرين ويايه لو لا ..؟

كتلة ماعرف..
شنو متعرفين ..

اي
او
لا
منير ترة الصدك اني اكرهك ايي لا عبالك جبتني..قطع كلامي

هذا هو خلص ردج واضح نامي اني راح اطلع

وين تروح ..

كال افتر بسيارة ..شويه مخنوك ..

كتله مني مخنوك ..

وكف ..
ورفعت راسي عليه ..
كال لا من كل شي ..

ديطلع ..كتله اوكف .

احاجيك ..

حسيته انقهر مني ..

اندار عليه كولي ..

كتله ..منا وغاد اسمع كلامك والله ..
ابتسم الي وكرص خدي ..

كال حلوة براءتج ..
واتمنى يرجع الزمن بيه ..زهرة ..

ضليت اباوع عليه ..

كال اي ..كون يرجع بينا ..

جان تغيرت هوايه اشياء ..

شنو يتغير ..

كال اول شي ..

اخليج ادرسين ..وثاني شي احميج من الكل ..

و؟

سكت ..

كتلة والله عاد انا احلم ادرس والبس الصدريه النيلي ..واشتري قرطاس كوام ..

واخذ طاك وشريط ابيض واحمر ..

زهرة
شكد عمرج هسة ..

رفعت ايدي ..عشرتهن كتله قبل هواي جنت هالكد ..وبعد واحد ..

كال جنتي دعش هسة شكد ..

كتله والله ماعرف ..

بس عادي اكدر ادرس ..لان البارحه شفت بنات بالمدرسه شحلاتهن منير ..

مشيت وراهن ..
بس مدري شبيهن يمكن خافن مني وشردن ..

كام يضحك ..

وكعد ..بله شلون يخافن ..

وانا شمعرفني..

كال بله شكلتي لعقلج من مشيتي وحدج ..

كتله ردت ارد لاهلي والله لو لخالتي ..

ولج يا اهلج ويا خالتج ..

اهلج بعيدين منا حييل ..

وخالتج ..متندليها ابوية انتي ..

الشعب شكبرها ..
مو مثل قريتنا تسالين ويدلوج ..

كتله جا شلون ..

كال زهرة الله يرضى عليج لا طلعين ولا ترحين وحدج ..الدنيا تخوف كل شي يصير ..

تندعمين ..تنباكين..

يمه  ..دخيلك ربي ..لا عيني لا اروحن ولا اجي ..

كال هسة لا خليتيني اطلع ولا ابقى ..

امشي ناكل موطه ونجي ..
احنا جاين نتونس مو نكعد بلغرفه ..

كال ولبسي من هدوم ابتهال ..

خوش..

كتله خوش ..

فتحت الجنطه ..ادور بهدومها ..
خذيتهم وطبيت للحمام ..

واحجي ويا نفسي ..بعد سمعي كلامه لا تحبينه ميردج تحبينه بس سمعي كلامه

منا لحد ما نرجع لاهلنا ..

طلعت الهدوم ..

شنو هذا ياربي ..ثوب لا هو قصير ولا طويل ..
ذبيت هدومي ولبسته ..
اعاين ع روحي جني لابسة هدوم جاهل محلو

شلته ورجعته ..

هنوب طلعت قميص مدري شلونة وردي ووتنورة سودة ..
لبستهن عزة بعينج صبرية ..
اصلخي وطلعي هيج لازكات ع جسمي لزك ..
هي هاي هدوم بله

رجعت شمرتهن ..

كلبت بالجنطه

طلعت دشداشة قديفه فستقي تخبل بيها بصمه وردة من الطول لطول ذهبي ..

كلت افيش هاي حلوة ..

لبستها ..
وجريت ربطة ..خضرة..

وسويتها ..

دخل ادلل روحي ..اليوم ..

كلبت طلعت .جريت الكحل ابو راس الذهبي .
وخليت بطن عيوني ..
واعاين ع نفسي

فدوة شجمال شحسن ..
والبگ بعيوني..

وخليت حمرة هاي الخضرة ..وتصير حمرة ..

يالله شكد حلوة طلعت ..

كملت وعدلت الجنطه وجريت العباه ..

بقت الجواريب مالبسهن يضوج منها وكال مال بكال ..

بس شلون اطلع ورجلي تبين ..

كلبت بس سود جايبة ..

شسويله لبستهم وطلعت ..
هذن ملابس مو السلابات الي جابهم من اخته
وفوكاها يعيب عليه ..

جان كاعد كبال.باب الحمام .

يعاين تلفزيون ..

باوع عليه ..

كال .شنو هاي ..

شنو ملابس،..

كال والله عبالي ملعب ..

شنو ..

هذا ملعب الشعب ..ويضحك ..اندليت خالتج

شبيك منير..

ولج شنو شبيه ..شنو حديقه المرآة الخضراء ..

امشي ذبيهم ..

لا ابد ولا اذبهم ..
ولج محلوات ..اخضر شنو..

اهوو مالبس هدوم اختك ..

مو حلوات ..

تقرب عليه مسح عيوني بايدة ..

كال هسة عرفت الفرعون المفقود وين

هيانه .اهنا

ويضحك ..من كل خاطرة ..

انغثيت صدك

شسوي يحجي .ويضحك عليه ..

كتله عمي هيج طلعه بلاها بس مغثه ماريد
لا اطلع ولا شي ..

واني هم بطلت ماريد اطلع ..

كال ضوجة والله ..

كتله خلي نرجع لاهلنا اني هم ضجت ..

بس محبوسة هنا ..

هناك اصعد وانزل وانزل واصعد ..
وعمه تتعارك ويايه ضجت رجعني ..

والله زهرة عليج سوالف متسولف شكال عقلج..

لمن طبيتي ع الزلم لو سالفه الشرطه الي صار اليوم مانسى طول عمري ..

سكتت وسكتت اني هم..

صار هدوء ..

اخذ حسرة ..

كال كل شي بالحياه درس زهرة اريدج تتعلمين ..
عالحياه شوفي رضيتي بيه لو لا اني ابقى وياج فترة ..

اريدج بيها تعرفين الحياه زين مو كلشي
ضدج
ولا كل شي وياج .

وشكد متقسى عليج الحياه يجي يوم وتفرج
وسكد ما تقسى تعلمج دروس بيها ..

جان يحجي واني فاتحه حلكي ومسنحة ع كلامه ..

كال شبيج..
كتله كمل كمل مابية ..

طلعت انت هم تعرف ترطن مثلهم ..

ولج شنو ارطن بله اني شحجي وياج هسة ..

بطلت طيرتي الحجي من راسي ..

لا عليك الله كمل كمل ..
فدوة لعينك احب احد يحجي وياي ..

كال وشتحبين بعد ..

صفنت واحس عمري كله محصور بطفولتي الي ماعشتها ..كتله والله هواي هنه .

منهم ..ادرس واتعلم..واعيش حال الوادم ..

واخوتي يعيشون بس مومثلي ..

تربع..واخذ جكارة وورىثها ..

ونفخ الدخان ليفوك ع السكف ..

كال اول مارجع .اطلع الج جنسيه .

وراها اسجلج ..بمحو الاميه ..

وبعدها ..راح ننقل للمدينه ..

وبعدها ..من اشوفج وعيتي ارجعج لاهلج ..

واطلع من خطيتج ..

واتمنى مقصرت وياج ..

لا شوفيني الاشيج واضوجج بس اني هذا طبعي ..

احب اشاقه وجنت احب اطلع لسانج

والي يشوف لسانج الاولي ميشوفج هسة ..

كتله كمل كمل ..

خرب بيومج شكمل ..
كومي لا ادفرج ..

كومي ..

عبالك داحجي قصة ..

اي ولك عيني ..شنو هاي الاميه ..

هاي مدرسه الي بعمرج واكبر ..

عليك الله ..

زهرة لا كل شي تحلفيني بي ..

يعني داكولج اسجلج انتهت بعد ..

ضحكت اله ..

كال بس اريد منج شي واحد ..

من كال هاي الكلمه طب الخوف بداخلي والضحكه راحت ..

كتله ..وهم تقشمرني وتاذيني ..

كام ..
شمر النفاضه ..بالكاع ..
واتكسرت صارت وذر ..

كال كافي ..ليش دتحسسيني اني نذل

ومغتصب ..

ترة اني مادنيت الج ابد ..

اذا تعرفين ..

كمت..جمال سبب كل الي بينا ..

جان يقرا براسي واني مراهق مندفع
وانتي ..اشوفج بلا رقيب ..
ومن زمان ابالي ازوجج..

والله من جنا جهال ..

دكافي كل حجايه والثانيه تقشمرني ..

ترة هنا وحدنا وبيت اهلي هم

اكدر اسوي كل شي ..

والي يحلا الي ..

فهمتيني لو لا ..

زهرة ..

داصحح غلط ..افتهمي دخيل ربج ..

لا تعبيني اكثر من تعبي
..

بس انت اخذت مني كل شي حلو ..

شاخذت ..الي راح ..داصلحة ..

واحاول وياج ..
واذا تقصدين فارس شلون تريدين تزوجي فهميني

نهيت عليج لمصلحتج .هاي

ترة يومين ويرجعج لاهلج

ونفرض ستر عليج طول عمرج يعيرج ..بلي بي انتي ..

اني سترج وغطاج ابويه افتهمي كلامي

ابن عمج من لحمج ودمج..

مايهون عليه اذيتج

ولا اذيه ..عمي ..

افتهميني مرة وحدة ..

جمال اخذ نصيبه واني نصيبي انتي ..

جمال ؟

اذكر من جنت صغيرة ..

كالو جمال ..انكصت رجله ..

شلون ..

بعد م ة شالو واجوي لبغداد لان ابو هنا يشتغل ..

وجان يروح ويرجع ..للقريه ..

مرة من المرات ..سوو حادث ..

والدنيا انسبت بيهم ..

وكالو جمال كصو رجله ..

بيومها حسيت الي سوو بيه ..رب العالمين عاقبهم بي

وجنت انتظر عقوبه لمنير ..

كال..

زهرة كافي ..لوم وعتب  الي راح انسي وخلي نبدي حياه من اول وجديد ..

ويايه او بدوني ..ميهم ..
المهم ..

تعيشين ..الي تحبي والي تردي ..

لا تلومين نفسج بيوم السبب اهلنا
اني وانتي ..

واذا يوم من الايام ازوجت ..
وصارو عندي اطفال ماعيش بيت مشترك
لو اعرف اجدي ..

وماعيش اطفالي الي بي احنا ابد ..

انتي واني محد مرتاح بينا ..

كمت ابجي وشكد دموعي رخيصة ..

وع كل موقف تنزل ..

وع كل شي تنهز ..

حسيته ..جرني ..وخلاني بنص صدرة ..

صدرة جان دافي حيل ..وبي عطر طيب .

غمضت عيوني ..وزاد البجي ..

حسيت محتاجة احد ..
يعلمني يفهمني
ومرات يواسيني ..
محتاجة ..كل شي لان فاقدة كل شي
بحياتي ..

دفعته ..

وكتله راح انام منير ..

جريت الجنطه ..

وخليتها بنصنه ..

ونمت من الجهه الثانيه ..

جنت كل شويه اكوم ..للكاه ..
كاعد..
لو يدخن ..لو هيج سارح وأرجع

انام ..

واكعد ..شو نومتي طولت ..

ولا هنا اكو ديج يعوعي .ولا حس بشر ..
ماعرف شوكت كمت من نومي ..

وضليت كاعدة ..

وانتظر يكعد منير ..

اخاف اطلع صوت لا يحجي عليه ..

اخر شي الضوة طب للغرفه ..
وصارت صبح ..

ومدري هذا ديجهم وين وهيج ماسمعله
حس بس اسمع صوت هورن لو مشي رجلين برة ..
بس ماكو وادم تحجي مثلنا هناك
قبل لا يجهجر الفجر
تبدي الوادم تسولف وتحجي
والديج يكعدنا ..

شحلاتها هناك ..

هنا جنها موته وهدوء..

كمت اطكطك ..بالغرفه ..جان نومه خفيف..

حسيته كام .من فراشه ..

جر ساعه فوك راسه ..

كال ..شوكت كعدتي كتله والله من زمان كاعدة

وطكت رويحتي ..

كال يلا راح اكوم اسبح ..

وهسة يصعدلنا الريوك ..

اكو هيج بصفه ..

فدشي ..

جرة ..مدري شرطن وي العالم ..

كال زهرة ..
راح اسبح والريوك راح يصعد خوش ..
انتي من يدك الباب ..

شويه وفتحيها اخذي الاكل ..

اخذ هدومه والخاولي وطب ..

لملمت الغرفه وعدلتها وفتحت البردة

وطبلنا ضوة الله جانت خنكه ..

اندكت الباب ..

رحت ..صحت منو ..
يدك  ..

رديت منو .

فتحتها ..ومديت بس راسي
واحد ..واكف ..

كال كال خدمه الغرف مدام هذا الريوك ..

حاطه بميز ابو جروخ ..

ضليت اباوع عليه..

كال محتاجين شي مدام..
كتله والله مدري اوكف اسال منير ..يريد مدام لا

ومنير بالحمام انتظر هسة اشوفه ..

سديتها ..

دكيت الحمام ..

ها زهرة .
هذا ولد بالباب يكول محتاجين مدام ..

فتح الباب ..وطلع  راسه وبخار طلع منها ..

ولج يامدام ..

شمدريني واحد عبد يكول تريدون مدام ..

خفت اكول لا لا ترزلني ..

طلع منير ولف خاولي بس ..
ويمشي وينكط مي ..

غمضت عيوني بايدي ..

رجع مدري شاخذ من هدومه ..

وراح ..يمه جر ..
الميز ..

خله ايدة ع لحيته ويحرك بيها ..

ولج انتي مدام ..

كتله لا اني زهرة ..

خررب

ولج هذا مصري ..يشتغل هنا ..

ويصح للنسوام مدام افهمي
اروح الج فدوة ..

وعافني ويدردم

ربي جلطه جلطه .ثلاثيه رباعيه

حكمتك بعد ..

هو هذا الفالح بي بس ييرزل بيه ..

من اهمداك ..وغميته ..

طب ..

رحت اعاين ع الميز بيضات وطماطه وخيار ..

وجبنات خالين ..

طلع مبدل ..وكف يمشط شعرة ..

كال يلا نتريك ورانا طلعه ..

وبليل نرجع لو باجر الصبح ..

تريكنا وكملنا ..

وراها بدلت ..
وهم لبست من هدومي وهم حجة عليه

بس ..مادرت بال ..اله ..

وطلعنا بسيارة ..

الصبح ..
الشوراع رغم هي حلوة بس هوسه وبيها وادم هواي ..وسيارات هواي كبار وصغار ..
وجهال ..
وناس بطن ناس ..

وصلنا لمكان بي جامع جبير ..
وطبينا بكراج ..
ونزلنا ..

كال زهرة ..انتي زيارة قبل لو اول مرة ..هاي ..

كتله لا والله ماعرف اول مرة هاي ..

كال ولا ضريح ..

كتله والله ةلا جامع ..
كتله شحلاته هالجامع
ولج مو جامع هذا ..هذا الكاظم ..

وطبينا ..زرنا ..هناك جوة الهوى عذب وبي برودة ..

والحوش جبير وبي عالم هواي ..
ناس كاعدة تسولف وناس تصلي وناس تقرا كتب
وجهال تلعب ..

شي جبير وحلو حيل جنت لازمه منير مثل الي يخاف يضيع هيج مجلبه بي جلب ..

واخذني وطببني ..

وجان يشرح هذا ضريح الناس تجي تزور

ونسبه للرسول وهو امام ..

وفترينا ..داير مداير وجان منير شيسوي اسةي يبوس ابوس يدعي ادعي ..

الا ان كال روحي مناك صلي واني منا ..

تقربت منه كتله ماعرف اصلي ..

كال اكعدي هنا وهسة جايج ..

كعدني بمكان يم الباب
والباب تخبل وبيها ريحة ترد الروح ..

ضلت عيوني تفرفر فوك وجوة ربي شنو هالامكان الي يرد الروح

من هوى طيب و ريحة طيبه ..

واضويه ..

وكفن نسوان ..
يصلن

اني اعرف حركات الصلاة بس ماعرف اقرا ..

كمت وياهم ..

كامن كمت سجدن سجدت ..
وجنت اكول ..بسم الله بسم للله واحرك بشفتي ..مثلهم ..
ومن اسجد ارفع راسي اشوف شيسون ..

لحد ماكملن ..

وكامو يدعون كمت ادعي وياهم ..

بعدها راحن وضليت كاعدة الا ان اجه منير وطلعني برة بالحوش

كعدنا ع السجاد الاحمر الي يخبل ..

وكعد يحجيلي قصه الامام عليه السلام ..

وكال الا اعلمج ع الصلاة ..

وضلينا كاعدين ..هواي وهو بسولف واني بس اسمع اله ..

والعالم كامت تزيد ..

وتجي بخشمي ريحه الاكل ...

كال كومي نسوك ونتغدنا ..

كمت ويا مثل الطفل مجلبه بي ..

امشي واعاين

ناس تصب دولمه ..
والي ياكل عروك ..

وناس تسولف وتضحك والي تصلي ..

لحد ما طلعنا من المكان ..

وراها اخذني بسوك جبير ..وهوسه بهوسه والوادم تصرخ ..
ع هدومها وبضاغتهم دخت بي حيل وين ميكوف اكوله امشي..
كد مااعاين ع العالم والغراض ادوخ ..

اخذلي دشاديش 2و شحاطه وربطات ..كلة ع ذوقه واني بس اعاين ..

وراها طببني بمكان ..هيج محصور وبي جوة محلات كومه ..

طبينا محل ..
اني من الفرة اول ماطبينا ..كعدت ع الكرسي ..

وضل منير يطلعلي بالهدوم واكوله لا مو حلوات
والرجال يطلعلي هدوم ..
بس مدري شلونهم مايلبسن ابد ..
كتله فدوة لعينك شنو هالهدوم المصخمه والملطمه..
لا هي مال زلم ولا هي مال نسوان

ماعندك كودري قديفه ..فالينه ..
امهات الزخم ..

الرجال ضل يباوع عليه ..

ومنير ..

كله معليك بيها ..

اخذ كم قطعه وطلع ..

كتله ماالبسهن والله ..هالخرگ ذني ..
جر ايدي وعصرها امشي ..

رد النوب اخذلي حذاء وجنطه
فد ذني فرحت بيهن حيل ..

حلوات ..امهات القوبجة ..وبيهن خط ذهبي ..

والجنطه تموت ..

كلت الم بيهم غراضي ..
كلما اطلع ..
واروح بيهم لامي ..

وتشوف الي عندي ..

لا يمه ماروح هنوب تاخذهم مني ..

خليهم ع گردي ..واخذ مدري المن غراض

تالي متت من الفر وبطني ماعت جوع ..

طبينا مطعم  ...

ونزل مرك وتمن ..ودجاج ..وزلاطه

ومن هاي الابطاله السود ..

يخبل طعمهن بس تخلي العيون ادمع
لان جنت ازقه فرد زقه ..

كعدت اكل ..

منير كال بلا لكمه العباه اكلي براحتج
محد يباوع عليج زهرة ..

وهذا اسمه ببسي مو فد شربه تشربي

لا تختنكين ..
اكلي بهداوة والله محد ورانا ..

وطلعي ايدج واكلي ..

زهرة دخيل ربج راح تموتيني

شويه رحمي حالي ..

اكلت مثل ما كال ..

بهداوة ..وطلعت حلكي من جوة العباه ..

بس بقيت
اخلي اللكمه بحلكي واعاين يمنه يسرى

اشوف العالم تاكل ولا يمها ...
فد اني اخاف ومستحيه ..

كملنا وطلعنا من المطعم للفندق ..

جنت كلش تعبانه من الفرة الي فتريتها والدوخه ..

رجعت ردت انام ..

منير كال زهرة نرجع ..
يادوب ..

ارتاح اايوم

وباجر وراي دوام ..
كتله بكيفك ..

طلعنا من بغداد ..ورجعنا ..

الطريق كله نمت من التعب ..

حسيت كال طبينا ..

للبيت زهرة كومي يلا ..

فتحت عيوني ..

راسي مصدع ..نزلت من السيارة .

ونزلت الغراض وياي وطبيت ..
وورايه منير اول ماطبيت ..
تلكانه عمي سلمنا عليه ..

ولكيت عمة غنية واكفة تسوي عشا ..

سلمت عليها ماردتني ..
وراح منير بوسها ..

كالت ذبي عباتج وسوي عشا ..

رجعت للهم والكراب ..

ذبيت عباتي ..ووكفت اسوي ..

جسمي متكسر وراسي يوجعني ..

ودايخة وهناك اسمع حسهم يسولفون ..

كملت ..
ووديته الهم ..

كتلها عمه راح اطب اغسل تردين شي ..
مجاوبتني ابد ..

عفتهم وصعدت لغرفتي ..

فتحت الكنتور اشوف ..

الهدوم مرعبله ..

جريتهن ..
يمه عزة ..ذني املخات ..
اكلب بيهن ..

مكصصه ..وخربانات ..
كلهم ..

ياربي منو هيج مسوي بيهم ..
واكلب بيهم ..
تكلب كلهن تلفانات ..
هناك وصعد منير ..

كال ليش متعشيتي ..

انداريت علية كتله عاين وشوف الهدوم ..

كال شنو هاي كتله الهدوم .ملخةمالتي ..

كال شوفي هدومي ..

فتحت الكنتور ..ع ترتيب ايدي مابيهم شي ..
فتح الباب صاح يووم ..ييييييمه ...

وكفت جوة جاةبته ..

كلها منو صاعد لغرفتي ..

كالت محد وكامت تصعد الدردج..
وصلت للغرفة ..

شكو ..
كلها شوفي ..وياشر ع هدومي ..

كالت طبعا شتترجى  منها طبعا تملخ هدومها
وراح اذبها براسي مو ..

هاي ام دروب ام مشاكل ..

كول اني مسويتها كول ..

وبري ساحتها وطلعني اني ..

لا صعدنا ولا وصلنا ..لغرفتها المعفنه ..

هي تصيح وهو يصيح ..

منير من يعصب يكسر ..

وكف كبال المرايا وضربها سواها وصلتين ..

سكتت غنيه وحارت بدم ايدة ..

وضلت ..تعقم بيها ..
وتدعي عليه ..
الله لا يوفقج ولا يردج .
مهمودة ..
عساج لا صحيتي ..

وهو يستغفر..
لفو ايدة ..ونزلت ..
ضل يتعذر مني وكال والله يازهرة لو اعرفج قويه من باجر اخذج لغير بيت ..ووحدنا بس اخاف عليج ..

زهرة اتحملي لخاطر الله ..
مدة ويتغير كل شي ..
وهاي افلوس الج ..
شيعجبج وصي ..اخوي ياسر ..
شتعتازين وصي ..

ثاني يوم التحق منير ..
وبدت معاناه جديدة ويا غنيه ..
شدت ويايه شدة ..
لا تخليني اكل وضم الاكل عليه 
حتى من اسبح تبقيني اخر وحدة ويفرغ المي عليه اسبح بمي بارد ..
مرتين امي تجي..تكعد يمنا ..
وتبقى تشكه مني ..

وتخلي امي ترزلني اسبوعين شفت المر والمرار بيهن..

تضم الفواكه وطلعلي الخبز اليابس ..
تحطه كدامي ..
مرات ابتهال تاخد وتحطهن الي بغرفتي
ومن تنام اوصي ياسر يجيب الي لكمه
اكلها ..

بهاي الفترة ..
من تنام غنيه العورة

تصعد يمي ابتهال ونسولف ..

هيج نضل ساعة اكثر الا ان انام اني يلا تنزل ..

من يمي ..خطيه تنقهر علي ..

جانت ..هم تعرف ترطن مثلهم ..
وحجيها حلو ..

وتجيب الي ..كتب بيها صور واكعد اكلب بيهن ..

مرات تسوي شعري ضفاير .

ومرات تحطلي حمرة وكحله ..
كلش حبيتها ..
يوم بعد يوم انسى اهلي ..
واعيش واتعايش وياهم ..

....

بعد اسبوعين نزل منير ..

نزل جايب ومحمل الي غراض اشكال
من هذا البطل الاسود
وموز
ونساتل ماشايفتهم بعمري كله..
وملابس ..
اتنغص لاخوتي اضم منهم ..ومن تمر امي انطيها الهم

ضل هيج يروح اكل المر
يجي اكل العسل ..

بقينا مدة ..ع هالحال وطلع الي جنسيه .

وهويه ..
كال صرتي فرد من المجتمع
من ننقل اسجلج بالمحو ..

طول هاي الفترة ابد ولا ادنى الي بيوم

جان ينزل ..يكضيها يسولف ويشاقه وياي ..ويعلمني
ومرات يجيب ورقه وقلم ويدرسني

لو ياخذني ونطلع برة القريه للولايه ..

نسوك ونتعشى ونرجع ..

مرات ياخذتي لاهلي بعد ماشالو للبيت الجديد ..

نبقى يمهم ساعه ونرد ..

بقيت انام بالكاع وهو ع الجربايه
مدري شكد مرن شهور ..
احس الحقد الي بداخلي بدة ينطفي..
بس مانسيت الي صار 
وبديت اركز ع تفاصيله
ضحكته
عيونه ..
سمارة ..
كلامه
كمت اصفن بي .ومن يروح اختنك ومرات ابجي ..
ومن يجي عندي عيد ..
حتى لاهلي ماريد اروح ..
ورغم نغصه غنيه بس جان مدللني ..
مثل الطفل ..
ويخاف عليه ..

فديوم جانت دنيا لليل ..

كمت ماكو مي ..
نزلت جوة داترسها ..

سمعت عمه غنيه و منير يسولفون ..

كلها هانت هالشهر ادزها لاهلها واطلكها ..
لا ضلين تنكين يامي ..

كتلج راح اطلكها ..
هذا هو 6اشهر ..وخلصن ..

عفتهم ورجعت .
بيومها مدري شنو احساسي جان ..
قهر خيبه ..

عرفت هذا الانسان لو شيسوي يبقى هو هو ..

والي بي اني حرمان ..

وهو عوضني بي ..

صعد ..سويت روحي نايمه ..

ويوم ورة يوم اخاف الايام تمر

لا يرجعني لاهلي
ولامي ..والتكفخ مالتها ..

وعلمني هوايه دروس ..صرت اقوى وافهم من الاول ..بهواي ..
هاي الفترة احس روحي فارغة
وهواي جان يسالني شبيح اجاوب ماكو شي ..
حتى ويا غنيه ماعاد اهتم لشي ..
وبديت الم بغراضي واكترهن ع جهه بالكنتور
انتظر يوم طردتي منا ..
الي جنت اتمناها ..اول ماطبيت
اليوم ماريد اطلع ..
منها ..

صار عرس اخويه  ...الجبير
وابوي سوة عرس الكل تحجي بي ..

بيومها ابتهال انطتني فستان اسود وبي خيوط فضيه ..كلش حلو ..جان ..
نص ردن .ومن جوة كلوش ....

ورتبت حواجبي ووجهي ومكيجت الي وسوت شعري ..

وهي هم رتبت روحها ..

اعراسنا الزلم وحد والنسوان وحد ..

اجه علينا منير ..جان لابس ..دشداشة ..
وذاب عكال ع راسه ..وسلاحة ..بلحزام ..

جنت جوة بغرفه ابتهال ..
كال يلا ..دنروح ..
كمت ..

ضل صافن عليه ..
وابتسم الي ابتسامه باردة ..
كال زهرة ..

راح جيين العين لروحج والله ..

بويه لا تلبسين هيج لا يطكوج بعين

طالعه جنج اجنبيه ..

الله يحفظج ويرضى عليج  لا تزعين العباه ..
ومسد ع راسي،..

جان ودي اكوله مالك شغل انت مو راح ترجعني  بس سكتت ولفيت الربطه والعباه وطلعت ..

صح عرس وبي فرح بس مامرتاحه ابد

واحس بفراغ جبير
كل شوي اندار عليه اعاين وارجع اباع من الجامه ..

مثل البساط السحري وراح ينسحب مني منير ..

صح هو حقير بس هسة ماعاد مثل الاول ..

ولا اني مثل الاول

هوايه ايام ازعل ويصالحني ويتوسل بيه ..
ارضى
حسيت اني وياه بشر
وانسانه ..
وهذا الاحساس مفتقدته بعمري كلة ..

بس الي بيه مو حب لا ..
لليوم اذكر فارس واحن اله ..
الي بيه ..
حرمان ..

وصلنا ..طبينا ..

كال لفي روحج ..زين ..
حتى وجهج ضمي ..

غنيه كالت اي مو ماخذ ست الحسن وتخاف عليها ..

مجاوبها ..
ططبنا بنص الكراج ..
ووصلني لحد المطبخ ..
وراح للزلم..

هوسة والعروس كاعدة واذكر روحي من جنت نفس كعدتها بس هاي تضحك ..

واني لا جانت الدمعه بعيوني وضلت لليوم بعيوني ..

هوسة جهال وعالم ..تركص والي تهلهل
والي ..تهوس ..
والاكل والدوخه ..

كتلها يمه راح اطب جوة دخت ..جرتني ولج خاف حبلى ..

باوعت عليها ومجاوبت شي ..

طبيت للغرفه ..

الغرفه تصير ع الحديقه ..
وبالحديقه الزلم ..

فتحت البردة شويه واعاين ..
اشوف ..يركصون ..
جوبي ..

ومنهم منير .جان اول واحد وبايدة سبحة ..

ويدبج برجله ..خلص الجوبي ..
وكت العشا ..

ضليت افر بعيوني لمحت ..واحد ..

داير نص وجهه ..بس شكله مو غريب عليه.
هذا فارس ..ي فارس ..
سديت البردة ..
وكمت اروح وارجع ..
وارجع اشوفه ..
واسدها ..
اي فارس ..بقيت اعاين عليه ..
واريد اكوله اني هنا .

بس ماكدرت وخفت ..

رجعت ذاكرتي كلها هناك ..
لايام روحه البستان ..
وكلامه والرساله الي لليوم ضامتها ..
ياربي شسوي ..

اطلع احاجي واكوله راح اطلك ..
لو شسوي ..

بقيت ع حطتي وكلبي يرجف رجف

تالي كلت ..لا بعد يرهم الي ولا ارهم اله .
كلمن دربه وحد ..

وانا ابقى حايرة بنص الدرب ..

فتحت الشباك ..اخر مرة .وفتحته بكبرة حتى اشوفه .وكلت اطلع يم النسوان بعد ..

كمت احجي ..وين راح .وينه ..

ياربي ادور ماكو ..
الزم متكترة تاكل ..

ضليت ادور بعيوني ..

بله وين راح فارس..
اوف ياربي ..
وينه ..

معقوله راح ..

هسة ياربي ماريد منك شي فد اشوفه اخر مرة ..بعد ..
واشبع شوف منه ..

اسمع احد ورايه ..
كال ..
تردين تشوفي ..مو ..
اندار هذا منير وبايدة اكل ..
الحكايه بقيه
شهرزاد