ايمن سد الورقه وظل صافن معقوله الي قراه يريد يستوعب المكتوب بيها مثل الواحد جته ضربه على راسه كعد ع القنفه يريد يفكر يريد حل عقله مشوش حس نفسه ضايع شراح يسوي شلون راح يتصرف هالموضوع مو سهل هالشغله هاي مو هينه ابد لازم محد يعرف بهذا الشي
لزم الورقه وشكها حتى محد يشوفها ويقراها وراح ذبها
هسه شراح يسوي صفن على الباب مال الغرفه
اذا هو حالته هيج ياسمين شلون حالتها شلون راح يتعايشون ويكملون حياتهم وكأنو شي مصار صارت ثغره بينهم وثغره كبيره
طب للغرفه شافها نايمه اخذ السويچ وطلع من البيت يريد يبتعد حتى يفكر بس الف فكره براسه
يعوفها ! يطلكها وهم مصارلهم اسبوع متزوجين
زين شلون تكمل حياتها وتعيشها هم طلاك وهم هاي سالفه استغفرالله
يكمل وياها زين شلون كل ميشوفها راح يذكر شلون يتغاضه عن هيج موضوع ام ساف... واب مجهول استغفرالله ياربي البنيه شنو ذنبها زين واني شنو ذنبي
وكف السياره وظل كاعد بيها الرساله شلون وصلت الها منين جتي اكيد خالتي اكو غيرها هي زوجته اخذ تليفونه واتصل على خالته يريد يفهم منها
حنان كانت بغرفتها كاعده تفكر شنو صار هناك اكيد قرت الرساله اني ليش هيج استعجلت وانطيتها الها ياربي شسوي
دك تليفونها شافت الاسم فزت اكيد عرفو وله ليش ديتصل فتحت الخط وكانت متوتره
حنان: الو ايمن
ايمن جر نفس قوي: خاله ليش هيج سويتي
حنان بقلق: عرفت السالفه مو
ايمن: اي عرفت اني قريتها ومدااصدك ولا دااكدر استوعب خاله انتي متأكده من هالشي؟؟!
حنان بحسره: المرحوم طلب مني هالشي كانت وصيته راد هو يحجي الها ومكدر وكتبلها هالرسالة علمود تعرف
ايمن بعتاب: ملكيتي غير هاليوم تنطيها الها اليوم سبعه وفرحانه وباجر دنريد نسافر ليش هيج خاله مكدرتي تصبرين خربتي كولشي
حنان بندم: يمه والله ممتقصده ادري استعجلت بس كلت بعد وين اكدر اشوفها ماعندي الجرأه اسويها لكيتها وحدها وانطيتها الظرف مفكرت شراح يصير
ايمن: شيفيد الحجي بعد شيفيد مدااعرف شراح اسوي خاله مااريد اي مخلوق يعرف فهمتيني حتى بينج وبين نفسج متحجي تنسين كلشي
حنان: يمه بدون متكول على كص ركبتي مااحجي بس فكر بهالمسكينه هي شنو ذنب هي صارت ضحيه هي الي عاشت يتيمه واهلها موجودين مالها ذنب لتكسرها
ايمن: ادري والله ادري بس صعب صعب كل مااتذكر الموضوع عقلي يوكف
حنان: بالبدايه صعبه كون وياها والله هي متستاهل
ايمن: ليش ادافعين هيج عليها اذا هيج تخافين عليها وتحبيها ليش انطيتي الظرف لو خليتينه على عمانه هوايه احسن
حنان بقهر : والله حقك والله متندمه واستعجلت بس كانت وصيه المرحوم اذا موهسه ف بعدين راح تعرف
ايمن : الله كريم الله كريم اني راح اروح
حنان: لتقسه عليها يمه
ايمن: مع سلامه خاله وسد التليفون
حرك السياره وظل يفكر شنو القرار الي لازم يتخذه هي صدك مالها ذنب وطول الفتره الي عرفها بيها مطلع منها شي موزين لو شاف عليها شي
لازم يتخذ القرار الصح وميتراجع عنه
دك تليفونه شاف المتصل ريم ماادري ليش اجاه شعور واحساس يخوف بس لا صار شي بعد
فتح الاتصال : ها ريم شكو
ريم بعياط وبجي: ياسمين انتحرت تعال بسرعه الله يخليك
وكع الجهاز من ايده وكلبه كام يدك سريع وجسمه يرجف شنو انتحرت راح تروح منه بعده ملحك يشبع منها ملحك يعيش حياته وياها ساق بكل سرعته حتى يوصل للبيت
نزل بسرعه وصعد فوق لكه امه واخته يمها ع الفراش ويبجون
ايمن: شبيها راح عليها يريد يكعدها : ياسمين ياسمين كعدي لج كعدي لتموتيني
ريم وهي تبجي: لكيت الادويه يم الفراش مدتكعد مدتكعد
شالها ايمن وكال لريم: روحي فتحي باب السياره بسرعه
نزل وهو شايلها حاس روحه راح تطلع من مكانها وقلبه راح يوكف شايلها مثل جثه مدتتحرك ومدتحس بشي حطها بالسياره وصعدت اخته وياها وراحو لاقرب مستشفى
دخلو للطوارئ واجه الدكتور وطلب منهم يبقون بره
ايمن الافكار تودي وتجيبه ميريد يخسرها يمكن هو اتخذ قرار غلط وصار هالشي حتى يصحح من قراره ويتراجع
طلع الدكتور وره نص ساعه راح عليه ايمن بسرعه
ايمن: شصار دكتور
الدكتور: الحمدلله لحكنه عليها ماخذه كميه ادويه مختلفه وهوايه سوينالها غسيل معده وحطينالها مغذي وراح اكتبلها على مجموعه مقويات
بس اريد اسألك شوصلها هيج تره هالحاله ميصير ينسكت عنها هذا انتحار
ايمن توتر شيكوله: دكتور ماكوشي شويه مشاكل
دكتور: المشاكل تخليها تريد تنتحر اعرضها لدكتور نفسي اذا تريد
ايمن تعصب ولزم الدكتور من ياخته : انت ليش متسكت شكو تدخل اذا احد يريد دكتور نفسي فهو انت ودفعه
الدكتور ضاج من تصرفه ووخر من يمه وراح
ديدخل للغرفه طلعت الممرضه
الممرضه: من يخلص المغذي تكدر اطلعها بس راح تحس بدوخه وتعب هاليومين
ايمن: اوك
دخل للغرفه لكاها نايمه وشعرها منثور حوليها ووجها اصفر تعبان ذبلانه وايدها مشدود بيها المغذي
بس رغم هالشي محتفظه بجمالها وخدودها الوردية
ريم كعدت ع الكرسي: بلكت شويه وتكعد شسوه هيج بيها مدااعرف شكالت الها خاله
ايمن اندار عليها: وانتي شمعرفج خاله حجت وياها
ريم بتوتر: مو خاله طلبت مني تحجي ويه ياسمين ف اخذت ياسمين فوق علمود تبدل فستانها وخاله تكدر تحجي وياها
ايمن: عاشت ايدج يعني كله من وراج
ريم: ليش شكو شنو صار خاله شكالت الها
ايمن بكذب: ماكوشي بس ضوجتها على سالفه زوجها كامت تحجي بي وياسمين تعرفيها متتحمل الحجي بهذا الموضوع
ريم: وهيج يصير بيها
ايمن: اي متعرفين صديقتج قابل نسيتي من توفه شلون ظلت تكابر وتبين نفسها ممهتمه وهي بداخلها مكسوره ومقهوره
ريم بقهر: اي والله صدك سوده عليه شصار بيها بوقتها
ايمن: اي ف خلص وسدي الموضوع ولتفتحي ابد كدامها بعد
ريم: اوك مااحجي بعد بي