سحر الياسمين

صدفه غريبة

(3)

وظلت سحر وية ياسمين خطوة خطوة تعلمها ع كولشي وياسمين تستمع الها زين حتى تتعلم بسرعه وتثبت لمديرها انوهي كد المسؤولية

مرت الايام وصارو سحر وياسمين صديقات كولش وعلاقتهم حلوة وولدت سحر ولد سمته*كرم* وياسمين عرفت طباع ايمن وتعودت عليها مرة عصبي ومرة هادي صارت تعرفه كولش زين

بيوم من الايام كانت اكو خطوبة صديقة ياسمين المقربه* ريم *علاقتهم قوية كولش كانت تعرفها من الكلية ودائما زيارات بينهم ،ياسمين جهزت اغراضها وراحت لبيت ريم لان ريم ماعدها اخت وتعتبر ياسمين اختها واكثر ،غرفه ريم كانت هوسه بنات عم ريم وصديقاتها وياسمين تريد تكمل تبديلها وتحط اللمسات الاخيرة لنفسها بس ماكومجال كالت لريم:اكولج ماكو مكان هنا وين اروح

ريم:روحي للغرفه كبال غرفتي ماكو احد

ياسمين :اكيد ماكو احد مو اروح واتفشل

ريم: اي اكيد هي مالـ.... وقاطعتهم بنت عم ريم تسآلها ع شغله وراحت ياسمين بدون متسمع لريم

دخلت للغرفه شافتها ظلمه فتحت الضوه وحطت الصندوق الي بي مستلزماتها ع الكومدي ووكف كدام المرايا تعدل شعرها وتلبس القلاده *كانت لابسه فستان كحلي وبي خيوط ذهبي قصير للركبه وضيق الاكتاف مبينه والاكمام ع الايد وشعرها مسويته ستريت وشايلته بطريقه انيقه والباقي مفتوح *

هو كان طالع من حمام الغرفه وشافها كدامه ظل هادئ ومعرف شيسوي بس ظل صافن عليها هي مكانت منتبهه ودتلبس التراجي لبست وحدة والثانية دتلبسها بس وكعت من ايدها راحت تاخذها ووكفت تفاجئت معرفت شتسوي كالت:استاذ ايـمن!!!

هو تفاجئ هاي ياسمين شدسوي هنا وبغرفتي وطالعه اميرة تخبل :انتي شدسوي هنا شلون ادخلين هيج

ياسمين وهي مرتبكه وتكول بداخلها شنوهاالموقف السخيف وفوكاها وية استاذ ايمن : استاذ اني ماادري ريم صديقتي وكلتلي دخلي لهاالغرفه ماادري هي غرفه حضرتك