سحر الياسمين

حقيقة صادمة

ريم انصدمت وجسمها كام يرجف : ياسمين كعدي يااسمين
ريم كامت تحجي بصوت عالي ومرعوبه: ياربي شسوي لج ياسمين الله يخليج
كامت بسرعه وسمعت صوت تليفون ياسمين كان قريب عليها شافت الاسم من بعيد لكته ايمن
راحت بسرعه وجاوبته وبصوت يرجف: ايمن الحكلي ياسمين مغمى عليها

ايمن فز من مكانه وكام بسرعه كان بالكوفي
كام يحجي بخوف: شكو شبيها ياسمين احجي
ريم كامت تنزل دموعها: ماادري ماادري الله يخليك تعال
ايمن مات خوف عليها وكلبه يدك الف نبض بالدقيقه شنو صار بيها بالكوه ركب السياره جسمه يرجف وساق بكل سرعته بس يريد يوصل ويشوفها يطمن عليها بعده مصارلهم اسبوع متزوجين

ريم راحت بسرعه لامها نزلت حاولت تبين طبيعيه لان البيت متروس ناس وحفله شتكول الهم اغمى عليها! تخربطت العروس
ريم بصوت متوتر وتحاول تبين طبيعيه : ماما تعالي اريدج بشغله
امها كانت ملتهيه تحجي ويه وحده اقاربها واستأذنت منها وراحت ويه ريم

احلام: شبيج ريم شكلج مو طبيعي
ريم وهي تمشي بسرعه وتجر بأمها: ياسمين مغمى عليها فوق ومدتكعد
احلام بقلق: شنو شبيها ليش هيج
ريم: ماادري مااعرف الله يخليج يلا بسرعه
فتحو الباب مال الجناح
وراحو للغرفه لكو ياسمين بالكع حاولو يكعدوها
ريم : خلي نشيلها نحطها ع الفراش