الليل... **
كان جالس وقام بعدما خلص كلامه وحط المسدس ع الطاوله قدام مشعل /هذا المسدس يا ولد عمي... انتقم من اللي ساعد على محاولة قتلك.. انا اعترفت لك بكل شي.. وبكل المشاكل اللي سببها لك اخوي علي..
مشعل كان يغلي لأنه عمره ما توقع ان عيال عمه يطلع منهم هالشيء مهما وصلت معهم الكراهيه،،كان مذهوول من حجم هالكراهيه!!
رفع ناظره له بنظرات ناريه واخذ المسدس و اتجه له،بسببه خربت حياته وانظلمت زوجته وافترقوا ،مسكه بياقة ثوبه ووضع المسدس برقبته/وش خلاك تعترف هالوقت؟ وش ناوي عليه؟ انطق
جابر وهو مستسلم له/تبت و ابي اتخلص من ذنوبي واريح بالي
مشعل وهو يشوف الحال الهزيل اللي عليها جابر /تغيرت وااجد يا جابر
جابر وهو يحس بخنقه/ماتغيرت ..هذا أنا لكن تايب
مشعل شك في حالته وفك ياقته/لا انت شكلك منت طبيعي جابر وش فيك وانا اخوك
جابر رفع راسه بعد هالكلمه من مشعل، وهو منقهر لظلمه له طول السنين/مشعل،انت تناديني اخوك بعد كل اللي سمعته مني اللحين!!
مشعل وهو شاك في حالته الصحيه/عفى الله عما سلف يا رجل.. انت ولد عمي والدم عمره مايصير ماء..ماراح اخليك مسخره قدام خلق الله دام انا صرت بخير وانت تبت لرب العالمين،لكن قول لي وش فيك ي جابر
جابر تنهد... ماقدر يقول له عن الايدز /مشعل انا ربي عاقبني بالدنيا قبل الآخره.. انا عندي "كانسر"..
مشعل انصدم ورحمه/وشو..!! الله يشفيك.. شد حيلك ياخوي واذا انت محتاج شي قولي
جابر باسه على راسه/انا مابي شي.. مابي منك غير تسامحني وبس.. وتدعيلي ربي يتوب علي
مشعل تعاطف معه وربت على كتفه/انا مسامحك دنيا وآخره.. عمي عنده خبر بمرضك؟
جابر هز راسه بالنفي/لا مابي اقوله.. بعدما صار متعلق في والامور صلحت بيننا..عسى ربي يقدرني واسعده قبل اموت
مشعل رحم حاله/الله يكون بعونك يا جابر..
جابر/مشعل.. ماقلت لي شلون عزيز، بشرني عن صحته
مشعل/فاق من غيبوبته ولله الحمد ..استرخى ورجع ينام.. مابعد تكلمت معه مجرد اني قعدت معه ربع ساعه ورجع ينام.. كان يحس بدوخه
جابر/الله يقومه بالسلامه.. عزيز رجال ونعم فيه.. ينحط ع الجرح ويبرى.. خلك معه دوم
مشعل ابتسم بوجهه/شرايك تعزمني ببيتكم ع قهوه.. من زمان عن عمي وعن سوالفك
جابر بابتسامه صادقه/حياك الله البيت بيتك..
/
/
/
/
/
/
/
/
/
واقفه عند بنتها بغرفتها وهي تُصِر عليها/اسسمعيني زين ولا ترفعين ضغطي بهالتكشيره ..ابيك تكشخين اللحين لازم تنزلين بعد نص ساعه تحت.خالد تووه واصل من لندن..وجاي مع خالتك يبي يشوفك،
زينه/يمه انا مابي اتزوج خالد.. افهموني
ام مشعل بإصرار/والله عااد الملكه صارت.. وانتي اللحين حلاله.. ماطلناه كثير.. اخلصي بسرعه ولا تكثرين حكي فاضي
زينه جلست وماقدرت تمنع نفسها من البكاء/يمماااه مابيه
ام مشعل بصراخ/لا تجننيني هذا ولد اختي مب حي الله، تجهزي له بس..
طلعت ام مشعل وتركت وراها بنتها تبكي قهر....
زينه وقفت قدام المرايه،تبي تحاول تجهز نفسها لكن ماقدرت.. كانت يدينها ترجف ماتبيه.حاولت تحرك يدها علشان تسوي شي.. لكنها نفسها مسدوده..
دخلت مشاعل بهاللحظات واستغربت انها للحين ماجهزت/زينه حبيبتي ليش للحين ماخلصتي؟
زينه جالسه ع كرسيها قدام المرايه وساكته وماترد عليها/..
مشاعل/خطيبك تحت.. يبي يشوفك..
زينه كانت ساكته ومو مستوعبه انه خلاص اقترانها بخالد صار شي واقع!!
مشاعل شافتها سرحانه وقرّبت منها و ربتت على كتفها/زينه
زينه استوعبت والتفتت عليها/همم
مشاعل بابتسامه/نحول تحت ينتظرك يا زينه
زينه قامت بهيئتها العاديه بدون أي رتوش.. لبسها كان بنجابي كعادتها التوب تفاحي والبنطلون فوشي وشال ازرق!! ،وشعرها كان مسدول بشكله الطبيعي وجه خالي من اي رتوش...
مشاعل مسكتها قبل تطلع/ززينه وين رايحه بدون تتزينين
زينه بفقدان امل/خلاص.. الكتاب انكتب.. و قبل يتزوجني بدون النظره الشرعيه.. يعني بيقبلني بأي شكل من الاشكال
مشاعل استغربت منطقها/بلا غباء
رن جوال زينه وكانت أمها وردت عليها/هلا يمه... ايه جاهزه انا نازله اللحين...
سكرت الجوال وطلعت ..
مشاعل تذكرت نفسها يوم عرفت ان اللي خاطبها بو مشعل مو مشعل ..حست بنيران تشتعل بصدرها ،طلعت بضيق..
،
،
،
كانت أمها جالسه وبحضور خالتها.. والخطيب العتيد "خالد"
ام خالد/كأن زينه تأخرت.. ؟
ام مشعل وهي تسب بنتها بداخلها/شوي وجايه.. يعني تعرفين البنات لازم ياخذون وقت وهم يتكشخون
خالد جالس ينتظر بلا مبالاه.. يناظر ساعته كل شوي بتملل...
ام خالد رفعت راسها وهي تسمع خطوات ع الدرج.. وتفاجأت بها/زينه!!
ام مشعل عصبت من تصرف بنتها وتوعدت فيها بداخلها/..
خالد نزل الجوال من يده ووقف لها وهو معجبه تصرفها، وهي تنزل له بدون تتزين له، حس ان الموضوع في إن/
زينه بثقه عاليه/السلام عليكم
الكل/وعليكم السلام
ام خالد/ماشاء الله كبرتي يا زينه
زينه/هذي الطبيعه الناس تكبر ي خاله ماتصغر
ام خالد/هههه اجل نخليك انا وامك شوي رايحين نتقهوى بالبلكونه..
ام مشعل/يلا ام خالد
راحوا وتركوهم.. ،
زينه عصبت وهي تشوفهم تاركينها معه ناظرته بقرف وصدت تبي تمشي/..
خالد وهو يناظرها بنظرات عاديه وهو رافع حاجب مسك يدها/ووين ويين يا عسل
زينه سحبت يدها منه/فك يدي.. من متى المعرفه علشان تمسكني
خالد/انا متملك عليك.. شفيك متنرفزه كذا، اقعدي خلينا نتعرف ع بعض اكثر.. زواجنا قرّب حاب اعرف وين تبين نسافر وش تحبين وماتحبين.. وش احب وما احب
زينه خنقتها العبره ولمعت عينها وصدت عنه/..
خالد لاحظها مو طايقته وابتسم/انتي فيك شي،قولي، مو تجين بعد الزواج و..
زينه قاطعته/انا ما اعرفك علشان اكرهك او احبك.. انا بس ماني مرتاحه ومابي اتزوجك هذا رأيي واظن من حقي اني اقبل أو ارفض
خالد ابتسم بخبث/بس انا حاب اتزوجك،من وين الواحد يلاقي هالايام وحده بسيطه وبنت يثق فيها في بيته.
زينه قهرتها كلمة "بسيطه" من نبرته باين مستسهلها/واضح ان عندك مشكلة ثقه.
خالد/ما اخفيك انا عندي خبره و علاقات واعرف البنت من نظره وحده.. اعرف اذا هي خبيثه او نقيه
زينه انقهرت و رفعت ناظرها بوجهه/اخبثهم يبحث عن اطهرهن ..ما يجتمع المتضادين ابد يا خالد
خالد عقد حواجبه/الزمي حدودك
زينه وهي تناظره باحتقار/يعني تلعب بأعراض الناس طول عمرك ووقت الزواج ماتبي غير وحده ماحد لمسها قبلك..!! هذا مو عدل، ياخي اطلب شي من مستواك
قامت زينه بنرفزه ومشت.. *
خالد قام ومسكها من ذراعها/هييي وش قصدك؟
زينه وهي تناظره بقرف/يعني نجوم السماء اقرب لك مني.
سحبت يدها منه ومشت بسرعه.. وهي تكتم بكيتها..
،
خالد جلس وهو يفكر بكلامها وحاس بالاهانه و انه انداس له على طرف( بوريك يا زينه.. ان ماخليتك تتمنيني اتزوجك ماكون خالد)
/
/
/
/
/
/
كندا*
بالسياره.. كانوا راجعين من دار الرعايه الاجتماعيه..
زياد بعدم اقتناع/اللحين قولي لي انتي ليش قبلتي تربين هالبنت
لمياء وهي تحتضن البنت بحضنها وتتبسم بدمعه/لو رفيقك وثق فيك ووصاك على ولده بتخليه بالشارع وبتمشي
زياد/لمياء انا خايف عليك.. اخاف تنسين نفسك معها وتهملين نفسك.. اعرفك انا
لمياء/بالعكس بتكون دافع قوي.. ربي بيوفقني اذا انا احسنت تربية هاليتيمه.. مستحيل اخذل أماندا الله يرحمها
زياد وهو يناظر بالبنوته بابتسامه/شقراء بس عيونها تحسينها عسليه على اسود
لمياء باست البنوته/هذا احسن شي ههههه نسخة أمها سبحان الله
زياد/اللي سويتيه وانا اخوك كبير.. اسلم على يدك نفس وبتربين يتيمه ..الله يوفقك..انا اعتبريني ابوها
لمياء وهي تناظره بنص عين/لا عزيزي انت خالها ..انت راح تتزوج و يجونك اولاد
زياد/هههه وانتي مو ناويه تتزوجين يعني
لمياء بابتسامه باهته/زياد سووق وانت ساااكت
زياد/ايه صرفيني ههههههه
/
/
/
/
/
/
في جلسة تصوير خاصه..
جالسه لوجين وتعدل اولادها مع المصوره..كانت لابسه فستان ابيض قصير بدون اكمام ومصففه شعرها طبيعي ومن تحت مموج ..كان صاير طووويل حييل لين اسفل ظهرها وكثيف،ناويه تقصه بس بعدما تصور مع عيالها..
المصوره تعبت وهي تحاول تلتقط لهم صوره.. بس حركاتهم سريعه وخاصه نايف يحرك يدينه ورجلينه ويخرب كل شي.. صورت مع كل واحد لوحده بحضنها.. وبعدها صوره جماعيه هي واطفالها..
هدى وهي تحاول تعدل وضعيات الاطفال/هههه كيف بنثبت هالولد
وئام وهي تجلّس بنتها جنبها/أنا برأيي تنتظرون لين ينام ميشو لانه حركي
لوجين وهي تحمله وتحضنه/هذا ناايف مب ميشو.. هههه للحين ماتعرفين تفرقين بينهم
وئام ناظرتهم وهي محتاره/كيف اعرف افرق بينهم نسخة بعض ههههه الحمدلله ان ايمي غير عنهم
هدى ببتسامه/ابداً اللي كثير حركه ومزعج نايف واللي هادي و رزين مشعل
وئام/ههههه الله يعينكم عليه هالنايف،بيطلع عيونكم..
لوجين/الله يعين
وئام وهي تدقق في ملامحهم/الأولاد حييل يشبهون ابوهم صح؟
لوجين التفتت عليها مستغربه كيف عرفت/!!
وئام وهي تغمز لها بابتسامه/لا تنسين اني قد شفته انا وياكِ في الحديقه
لوجين تذكرت هذيك اللحظه وهذاك اليوم وحاولت تناساه وناظرت بنايف اللي بين يدينها وهي تشوف بعيونه مشعل نفس رسمة العين و الحواجب طبعت بوسه على عيونه وهمست له/احبك
كملوا جلسة التصوير بعد تعب..وانتهوا منها..
/
/
/
/
/
،،،
المستشفى*
عزيز كان مندهش من طول الفتره اللي غاب فيها عن الوعي وهو مو مصدق ان مشعل واقف قدامه بكامل صحته وعافيته،عزيز بصوت يرجف/مشعل انت كنت بين الحياة والموت ..نزفت كثير ،الحمدلله اللي نجاك
مشعل بابتسامه/والحمدلله اللي رجعك لنا، يا شيخ فوق السنه وانت ناايم ههههه
عزيز وهو توه يتذكرها،وكأنه يحاول يسترجع ذكرياته/لوجين زوجتك ..وش صار عليها؟ رحت لها؟،كلمتها؟ وش جابت انا كنت اذكر انها كانت حامل
مشعل تذكر بألم/لوجين بخير لا تخاف
عزيز ابتسم/كنت حااس انها بريئه و انك بتروح ترجعها
مشعل قاطعه/انا ولوجين افترقنا من زمان
عزيز انصدم، وخاف يكون السبب/ليشش؟ ..مشعل انت ماشفتها وقت ما وديتها المطار.. ماكانت تبي تتركك وتسافر الا لمن ألحيت وأصريت عليها.كنت خايف عمي يتهور ويقتلها بنفسه..وقتها بلغتني اني اقولك انها بتنتظرك لآخر العمر.. وانها ماكانت تبي تتركك وانت بهالحاله..
مشعل يحترق قلبه من طاريها لكن ما بيده حيله/اللي صار صار يا عزيز وانتهينا
عزيز/طيب للحين ما قلت لي وش جابت
مشعل بضيق/ما ادري
عزيز استغرب اكثر/وشووو.. شلون ماتدري
مشعل/لوجين في كندا حالياً ..واللي ماتعرفه انت ان ابوي بعدما اعطيته توكيل طلقها مني غيابي بدوون علمي ..وبعدها صار كل شي بسرعه و ضدي..و انتهينا..
عزيز حزّن من اللي صار/يعني ماتدري اذا جالك بنت أو ولد
مشعل بابتسامه باهته/لا ..لا تتضايق علشاني
عزيز سكت وهو حزين على حاله/..
مشعل حاول يغير جوه/يلا اليوم بنطلع... ورانا شغل واجد ..ايهه و نسيت اقولك زينه انخطبت وقريب زواجها
عزيز رفع راسه وناظره مو مصدق هالخبر/زينه بتتزوج!!
مشعل استغرب نبرته/ايه
عزيز امتلت عيونه دموع ورفع راسه مايبيها تنزل وينفضح قدام مشعل/انا ابي اروح الحمام..
مشعل وهو طالع/خذ راحتك، انا رايح اجهز اوراق خروجك
عزيز نزل من سريره واتجه لدورة المياه وسكرها.. وبكى براحه وصار يشهق وهو يحاول يسكت نفسه سكر فمه بيديه يحاول يسكت وما قدر حس بدوخه ورش على وجهه مويه.. راسه ماتحمل وهو توه صاحي من غيبوبه..
/
/
/
/
/
/
بالليل.. *
على سفرة العشاء
الجده وهي متأثره/ يا حبيبتي يا لمياء.. انتي كبرتي بعيني والله.. مع اني قبل كنت احسبك مثل روبي
روبين جاها احباط/وانا ايش بيا يا ستي؟!!
لمياء حاولت تكتم ضحكتها وما قدرت/هههههه
روبين مدت بوزها/شايفه يا ستي فرحتي العذال
الجده/انتي كذا ماراح تتغيرين.. حابه لو مره تسوين شي كويس من راسك مو انا اللي قلتلك سويه
لمياء/يا ستي روبي مجتهده في دراستها كثر خيرها
الجده/ايوه بس لو ما انتي معاها كان ايش راح تسوي.. لازم احد معاها يوريها الصح والغلط..
روبين اخذت على خاطرها بس ما بينت.. (معقوله انا كذا مالي شخصيه؟!!..)
الجده وهي،تلتفت على لمياء/شوفي يا بنتي انا راح اهتم في بنتك قد مافيني...انا اغلب وقتي جالسه وانتم دايما تدرسوا ومشغولين عني
لمياء فرررحت/اكيد يا جده ما استغني عنك.. ربي يجزاك كل خير..
روبين قامت وهي متضايقه وشايله صحنها معها/الحمدلله..
الجده/بدري..
روبين/معليش يا ستي شبعت.. وورايا مذاكره..
راحت روبين.. وتركتهم
لمياء التفتت على الجده بابتسامه صغيره/جده ما كأنك قسيتي عليها وكثرتي عتب
الجده/هههههههه لا تخافي عليها.. تعبت وانا اقول لها.. روبي تنسى بسرعه
لمياء/قولتك كذا
الجده/هههه ايوه لا تشيلي هم..
رن الجرس..
لمياء/من جاينا هالوقت
الجده بابتسامه/هذا مراد ابن فاديه.. قالت بترسل لنا لبنيه مكاويّه
لمياء/ي سلام حلويات شعبيه
الجده وهي قايمه/ايوه.. انا رايحه اشوفو.
،
،
،
،
،
بغرفتها، فكت شعرها من الربطه وتحط كريم مرطب بيدها وتستعد تنام لابسه بجامه بنطلونها زهر وتيشرتها ابيض وفي نصه صورة الارنب"باكس باني" ،
جهزت مخدتها واسترخت شوي.. ناظرت الساعه بتملل/باااقي وووقت . خليني اذاكر شوي بدال هالكسل، الدروس اذا تراكمت علي صدعت راسي ورسبت..
استقعدت روبي واخذت كتابها وملازمها، هنا بدأت تتثاوب من جديد/هالنووم هذا غبي.. اذا كنت اذاكر يجي و ان رحت بالسرير طار ..
سمعت صوت المطر برا.. اخذت شالها واوراقها واتجهت للشباك وفتحته تبي تستمتع بالجو وهي تذاكر..من قوّة الهواء طارت أوراقها اللي كانت بيدها حاولت تمسكها قبل تروح لكنها كانت بتسقط وطاح شالها تحت،عصبت روبين وقررت تنزل تاخذ شالها.. لأن الاوراق راحت فيها من المطر..
نزلت و طلعت من باب المطبخ اقرب لها ..تبللت من المطر قبل توصل لشالها.. مستحيل تفرط فيه "هذا الشال من أمها"
سمعت صوت خطوات وبغت تموت من الرعب المكان ظلااام داامس.. طلعت جوالها من جيبها وحاولت تشغل النور منه ولكنه طاح منها وتبلل( اخخ قهر خرب فووني)
لحظات وحست احد يمسكها بقوه ويثبتها ويصرخ فيها/theeeeef
روبين صرخت/ااااااااااا Noooo
سكر فمها بيد وكأنه عرف صوتها، طلع جواله بيده الثانيه وشغله وكشف عليها/روبي.. انا امي ارسلتني لكم بغرض لجدتك وانا حسبتك حرامي.. ماكنت اقصد
روبين كانت مبلووله ع الآخر وترجف من البرد والرعبه، عرفته لكنها دفعته عنها وهي مستحيه من هالموقف ومتكشفه بعد..حست بضيييق لانه شافها متكشفه هربت منه ودخلت البيت بدون كلمه..
مراد ضل واقف وهو يطالع في مقفاها وهي رايحه شعرها المبلول وريحة عطرها اللي بالمكان سحرته فيها اكثر من قبل "شاف الشال مكانها نزل واخذه بسعاده ومشي..
/
/
/
/
،
يومين.. *
وصل ظرف كبير ابيض للبيت..
الشغّاله هي اللي فتحت الباب وكأنها كانت تنتظره.. تلفتت يمين ويسار.. واخذته للمطبخ وغلت مويه ومررته من فوقها تحاول تفتح الظرف بدون يبين عليه انه انفتح ..وفعلاً فتحت الظرف وتفرجت بسرعه ع الصور واخذت ثنتين منها ع السريع ..وخبتها ورجعت الظرف مثلما كان..
،
،
من جهتها ، لمياء كانت مو مرتاحه من فتره وتفكر بالكلام اللي قالته للكادي.. رحمة مشعل مهما كان (هالعقاب قاسي..انا عارفه لوجين غرورها بيتعبها.. وهو رجل صاحب مبدأ مستحيل يخلف وعده لها.. لكن مسألة الاولاد حرام تنتخبى عنه.... كيف أوصل لمشعل... من جد شغله صعبه.. ضميري مو مرتاح لين اصلح اللي سويته)..
رن جوالها وردت بعد كذا رنه/هلا روبي... انا مابعد رحت للحين انتظرك عند المكان ..طيييب،
مراد وقف قريب من كراسيهم وكان متعمد لمياء تشوفه.. شغل الدباب وانتظر شوي ومشي/...
لمياء انتبهت له و عطول تذكرت عُمر وتنهدت، لكن لفت نظرها الشال اللي لافه حول عنقه( منيين حصل عليه.. شال روبي مسويته خالتي ام روبي لها..!!... معقووله روبي تسوي شي من وراايا ؟!!!)
اقبلت روبين وهي مستعجله/اتأخرت عليك لمو
لمياء وهي تخزها/لا ..تأخرتي ع الحبيب
روبين ببرائه/ههههه طيب خيرها بغيرها اقابله بعدين
لمياء توسعت عيونها/ياااماااا تحت السواهي دواااهي
روبين تمازحها وماتدري بالسالفه/المهم جدتي لا تعرف بموضوع الحبيب حقي... امشي خلينا هالمره نركب باص
لمياء راحت تركب معها وهي مصدومه منها/...
،
،
،
،
،
،
نرجع للسعوديه**
الليله الكل طالع معزوم في بيت احد اعيان القريه.. ومحد فيه غير "زينه" جالسه بالبيت هي تكره العزايم الرسميه الممله .. جالسه بالصاله و تشوف فيلم كوميدي لعبله كامل.. تعشق هالممثله.. روحها تنحب..
سمعت صوت الجرس يرن واستغربت اهلها مالهم غير ربع ساعه من راحوا مايمديهم يرجعون..
نادت الشغاله تفتحه/يا عايشاااا روحي افتحي الباااب
الشغاله/تيب تيييب
،
بعد لحظات ..
زينه/مين عند الباب ي عايشاا
خالد من وراها/هذا أنا..
زينه ألتفتت ووقفت وهي مستنكره وجوده هنا/نعم !! وش جابك ببيت مافيه احد
خالد وهو يقرّب منها/زوجتي هنا وهذا يكفيني
زينه/زوجتك تلقاها بلندن مو هنا.. استحاااله اقبل بواحد يفتخر انه متعدد علاقات وله خبره بعد.. ياااع
خالد ابتسم بخبث وهو مازال يقرب منها/اذا صرتي صاحبة علاقات قبل الزواج بتتزوجيني غصب
زينه خافت من كلامه وهي تبعد عنه/حقييير.. اطلع برااااا
خالد قرب منها وقرب يلمسها/راح اكسر غرورك اللحين وبعدها بشوف شلون تفتخرين بنفسك قدامي
زينه ابعد عنه اكثر واتجهت للباب الجانبي/واطي وتفكيرك واطي وزباله
خالد وهو يلاحقها/هههههه محد هنا ينقذك مني الليله..
زينه راحت لمكان باب ما يعرفه خالد..وتنادي/الحقوووونييي.. عااايششاااا نادي عظيم الدين بسرررعه
عايشا سمعتها وجات ركض لكن خالد ضربها وطاحت/..
زينه فتحت الباب وطلعت تنادي بصراخ وبكى/عظييييييم تعاااال
خالد لحقها ووقف يناظر فيها/وبعدين معك. ما يأستي.. ترى بتموتين من البرد
زينه ضعفت وبهالظلام ووحيده/اهون علي اموت ولا تلمسني يا قذر
،
،
من جهه ثانيه في الملحق.. سمع صوتها تتكلم وتبكي ظن انه يحلم.. هذا صوتها الحزين اللي يذوبه.. تذكر ضحتها البرييه وكيف كانوا يلعبون سوى وهم صغار.. ماكان يفكر فيها بأي شي كانت تجمعهم البراءه والشقاوه..
طلع برا يشوف وش صاير ..
شاف شيء اشبه بالخيال.. هذي زينه . صحيح من زماااان ما شافها بس يعرفها ..لكن من هذا اللي يسحبها معها بهالطريقه "شكلي احلم بكابوس او الغيبوبه اثرت في راسي.. غمض عيونه.. وسمع صرختها..
ماقدر يوقف مكانه. اتجه لها ركض و بيده اقوى لكمه بوجه خالد وضرب متواصل/ي حيوان وش جايبك لهالبيت
زينه وقفت مو مصدقه ان هذا "عزيز"..صاير انحف من قبل!
عزيز ألتفت عليها وهو يتفقدها وسحبها ودخلها داخل/زينه سوالك شي هالواطي
زينه هزت راسها بالنفي وعينها عليه/لأ.. بس كان بيسوي لولاك
عزيز تذكر نفسه و صد بوجهه عنها وعطاها قفاه/هالحرامي من وين دخل؟
زينه قلبها يحس براحه دام عزيز جنبها وطيب وبخير/هذا اللي يبي يتزوجني ي عزيز
عزيز بنفاذ اعصاب/وشووو.. هالخبل هذاا.. ليش توافقين عليه.. هذا رخمه مب كفو.. اللي سواه فيك مايسويه رجل
زينه تستغل الفرصه بما انه معطيها قفاه وتناظر فيه/الحمدلله على سلامتك عزيز
عزيز بردت اعصابه من نبرة صوتها الهاديه بعد الصراخ/الله يسلمك [خجل من تواجده ]. انا طالع
زينه خافت/وش بتسوي في خالد
عزيز كان بيمشي ورجع/بتصرف فيه.. لا تشيلين همّه..بس بالله كيف بتتزوجينه هذا
زينه باصرار/افضل الموت على اني اتزوجه بعد اللي سواه الليله..
عزيز استانس/انا لازم اتصل في مشعل ..لازم يكون عنده خبر باللي صار عن اذنك
طلع وسكر الباب.. *
زينه نست اللي سواه خالد فيها.. وجلست تفكر بعزيز.. هذا كان اقرب شخص لها،لين تحجبت عنه بعد ثالث متوسط بحكم البيت الواحد تأخرت لحد ما تغطت منه...الليله بس ارتاحت.. شعور غريب خلاها تنسى هم كان جاثم على صدرها..
،
،
،
،
،
،
،
مشعل وهو يناطر خالد المربوط ع الارض باحتقار/عمررري ماتخيلتك بهالوساخه،شلون تتجرأ؟!!
خالد بوقاحه/زوجتي واجيها متى مابغيت
مشعل ماقدر يتحمل قلت ادبه/تفووه عليك انت لو حاس ان اللي سويته صح كان جيتها وحنا موجودين مو تنتظر لين يفضي البيت وتجيها مثل الحراميه، اسمع يابن الناس..مثل ما دخلنا بالمعروف نطلع بالمعروف..
خالد ناظره بتحدي/مو أنا اللي يغصبوني الناس اطلق زوجتي
مشعل حس ان هالكلام موجه له....فك رباط خالد ووقفه وضربه كف/انت اللحين بتطلق اختي غصصب عنك..
خالد/اقوول بس روح وراك.. زينه زوجتي ومحد له الحق يخليني اطلقها غصب
مشعل/ومن قال انها بتقبل فيك عقب اللي سويته
خالد/مب لازم تقبل فيني اهم شي اني زوجها،وباخذها معي وهي حماره بعد، القانون معي..
عزيز ماقدر يمسك نفسه هجم عليه ودمعه ينزل/كللللب.. لا تسبها يا وصخ..
خالد وهو يدافع عن نفسه ويضرب عزيز/ما استغرب بعد لو كان بينك وبينها علاقه.. انا ماني مغفل وافهمها وهي طايره.
عزيز جن جنونه وضربه بقوه/زينه اشرف واطهر منك،لا تحاول تلطخ سمعتها يا حيوااان
مشعل ابعد عزيز عن خالد/يا رجال اهدأ انت للحين تعبان
خالد تركهم وطلع مايبي كلام واجد...
عزيز وهو يتنفس بسرعه وكأنه كان يركض،تكلم بدون ما يحس/شوف يا مشعل.. هالآدمي ماراح يتزوج زينه الا اذا كنت انا ميت.. والله مايطولها وانا عايش والله
مشعل استغرب انفعاله وحاول يهديه/تعوذ من الشيطان
عزيز حاول يهدي.. وتذكر كلامه/اعوذ بالله من الشيطان
مشعل ابتسم وهو يشوف عزيز يتصدد عنه/وش صاير لك ي ولد
عزيز انحرج من نفسه/انا اسف يا مشعل بس انت عارف ان زينه...
مشعل قاطعه/تهمك لدرجة تنزل دموعك علشانها..؟!
عزيز ناظر فيه وصد ماقدر يرد/...
مشعل رفع حاجب ونزل الثاني وهدوء غاضب/ليه ي عزيز
عزيز خاف منه/أ..
مشعل قاطعه مره ثانيه/البنت قدامك طول السنين ليه ماخطبتها من زمان ياخي.. والا قلت لي اخطبها لك.
عزيز هنا انهد حيله/ي مشعل كيف الصبي يخطب بنت معزبه، انت عارف عمي
مشعل بابتسامه ماكره/اذا طلعت برا هالبيت واستقليت بنفسك وسويت اللي بقولك عليه ساعتها بيتغير الوضع..
عزيز/يعني انت موافق
مشعل/ي غبي انت بالنسبه لي ثقه يعني بزوجك اختي وانا مطمن... لكن بالاول انت سافر لجده باقرب رحله .. ثم انا بتصرف مع خالد وانقذ اختي منه..
عزيز/وش معنى جده؟
مشعل وهو يتذكر زوجة ابوه/حاب اني انقل الفرع الرئيسي للمؤسسه هناك وادير شغلي من هناك واخلي البقيه فروع لنا
عزيز/الظاهر صاير تطورات كبيره بغيابي
مشعل/كثييير... بعدين اقولك... يلا انا رايح لابوي.. سلام
عزيز براحه/سلام ياخوي..
/
/
/
/
/
/
/
/
في بيت ثاني بنفس هالمحافظه*
اصواتهم عاليه وهواشهم..!!
هنادي /انت غشاااش
جابر وهو يضحك/ماتعرفين تلعبين وتقولين غشاش سلامات
هنادي باحبااط/اصلاً اللعبه ما تنلعب كذا
جابر/اجل كيف يالذكيه..
هنادي وهي تخزه/انت تسرق الحبوب وانا ما احس
جابر/شلون اسرق وانتي تناظرين فيني.. هنادي بلا لعب بزران..
هنادي/طيب لا تتعدا الخط بالمضرب
جابر/ماتعديته
هنادي/شووف شووف تعديته
بو علي جاهم بعدما سمع اصواتهم ازعجته/وش فييكم.. كل هالازعاج والصراخ وانتم تلعبون "كيرم"
هنادي وهي تمد بوزها مثل الاطفال/عمو ..شوف جابر يغش
بو علي جلس ويناظر فيهم بابتسامه/افااا ي جااابر... عاد تغش في الكيرم...هههه
جابر/ابوي لا تصدقها هذي كذابه
هنادي شهقت/انت الكذاب
جابر/كذابه
هنادي/كذاب
بو علي صرخ/بسسسسسسسس.. عورتوا ررااسي.. اجل شلون اذا جونا بزارينكم
جابر سكت محروق قلبه من هالنقطه.. ضاق صدره بعد اتساعه/..
هنادي حست بوجعه وناظرت فيه بابتسامه علشان يبتسم/.
جابر ابتسم لعيونها اللي تفتح نفسه للحياه والتفت لأبوه/اسفين يبه.. ماقصدنا نزعجك.. تحمسنا باللعب شوي
هنادي قامت/ايوه يا عمو ..انا وجابر بنطلع نتمشى شوي بالحوش وبنرجع ننام.. انت ارتاح.
بو علي بابتسامه/الله يصلحكم بس.. تصبحون ع خير
الكل/وانت من اهله..
جابر اتجه لهنادي ومسك يدها وباسها/احبك
هنادي ابتسمت مجامله،وسكتت لانها ماتحبه،مجرد شفقه/اوكي نطلع نتمشى؟
جابر بابتسامه/يلا
/
/
/
/
/
/
/
/
اليوم الثاني
كندا* *
في احد مكتبات تورنتو..
لوجين تبحث عن كتاب يفيدها بمذاكرتها.. وتدوره بين الكتب..
لمياء ودها تفاتحها بالموضوع ومو عارفه/لوجين
لوجين وهي تفتح كتاب ضخم/نعم
لمياء/انا حاسه بالذنب يا لوجين
لوجين استغربت والتفتت عليها/ذنب!!
لمياء/لوجي حبيبتي انتي عارفه اني كذبت ع الكادي ومشعل.. مقدر اسامح نفسي..
لوجين يبعثرها طاريه ولكن تتماسك من برا لو هي من داخل ميته عليه/والله ع بالي عندك موضوع مهم
لمياء/وهو موضوع مهم بعد.. لوجين انتي لازم تتصلين في مشعل وتقولين له يجي حالاً..او ع الاقل تقولين له عن وجود عياله
لوجين يغيضها هالموضوع وتحاول تلهي نفسها بأي شي/الظاهر اليوم حرارتك مرتفعه،صايره تهذين
لمياء عصبت من برودها/لوجين اذا ما اتصلتي بمشعل راح ازعل منك
لوجين سكرت الكتاب اللي بيدها والتفتت عليها بعصبيه مكبوته/انتي انجنيتي تزعلين مني علشان هالـ..
لمياء قاطعتها/لا تسبين ابو عيالك.. ولا تنسين انك بيوم من الايام حبيتيه..
لوجين بضيق/غلطة عمري
لمياء/المهم ..اللي تسوينه بمشعل حرام مايجوز نخبي عنه خبر عياله.. . اتصلي فيه ولا تترددين.. طلعي اللحين رقمه
لوجين وهي تتخيل صورته تنهدت/رقمه مو معي.. كان مسجل بجوالي القديم
لمياء/طيب تعرفين رقم بيتهم؟
لوجين حاولت تتذكر/ايهه كان سهل الحفظ.
لمياء بحماس/طلعي جوالك و اتصلي بسرعه... اللحين عندهم المغرب
لوجين بعد تردد طلعت جوالها/اوكي.. ولو اني اشوف انها صعبه علي..
لمياء ربتت على كتفها/حاولي علشاني..
لوجين دقت الرقم وانتظرت احد يرد...
لحظات وردت مشاعل/هلا
لوجين استغربت الصوت/السلام عليكم
مشاعل بالجوال/وعليكم السلام..
لوجين/مين انتي؟
مشاعل/اظن انتي المتصله ،انتي اللي مين
لوجين/انا لوجين..
مشاعل سكتت شوي،تغااار من طاريها وكلام زينه عن حب مشعل لها/...
لوجين وهي شاكه/الووه فينك مين انتي ..
مشاعل بصوت وااثق/انا زوجة مشعل الجديده
لوجين انصدمت/ايشش؟!.. انتي كذابه
مشاعل بمكر/وليش اكذب ..اذا حابه اعطيك ام مشعل تقولك او اتصلي بمشعل بعد..
لوجين بدأ تنفسها يضطرب وسكرت الجوال وطلعت من المكتبه وهي تكتم بكيتها...انصدمت صدمة عمرها.. ماكانت ابداً تتوقع ان مشعل يبدلها بوحده ثانيه.. والا علشان عرف انه مافيه عيب ويقدر ينجب تزوج غيرها.. كانت تبي تبكي بس تبي مكان يصد عن الناس وتبكي فيه براحتها
لمياء لحقتها ويادووب مسكتها/لووجييين.. وقفي ..لوووجي
لوجين ما وقفت كانت تمشي بسرعه وتمثل الشموخ/...
لمياء مسكتها ووقفتها بقوه/انتي وش فيك.. ليش سكرتي الخط فجأه وطلعتي ايش صاير..
لوجين نزلت من عينها دمعه حاااره ومسحتها بسرعه/تدرين من اللي كانت معي ع الخط ..
لمياء/مين؟!
لوجين بقهر وغيره دفينه/زوجة مشعل...
لمياء انصدمت/زوجة. مشعل؟!!!!
لوجين بمشاعر غيره متأججه/هذا اللي انتي كنتي خايفه ع مشاعره ما استنى كثير وتزوج بسرعه ..اكرهه اكرهه
لمياء ضمتها وهي تحاول تهديها/لوجين اهدي خلاص
لوجين والدموع مغرقه وجهها/ماني مصدقه ان مشعل تزوج غيري ي لمياء.. احس نفسي مخنوقه بموت قهر بمووت يالمياء
لمياء وهي تربت على ظهرها/بسم الله عليك.. كله بسببي انا اسفه اني قلت لك اتصلي فيه.. ياليتني ماقلت لك
لوجين وهي تمسح دموعها الغزيره وتمثل الشموخ/بالعكس.. انا ارتحت اللحين ..ع الاقل الاقي سبب امحيه من تفكيري.. ..المفروض افهم انه مايبيني دامه عاهدني انه يتركني هنا ولا عاد يشوفني ولا يشوف عياله.. كان يبيها من الله.
لمياء/متأكده انك قادره تنسينه،النسيان ما يحتاج سبب
لوجين وهي تحاول تهدأ/اللحين ما يستحق مني شفقه ولا راح اندم بيوم اني انفصلت عنه وحرمته من اولاده
لمياء/وش قصدك
لوجين بحقد/مشعل بالنسبه لي مات
لمياء خافت من نبرتها/وش بتسوين
لوجين بحزم/من هنا و رايح ،راح اسد كل الطرق اللي ممكن توصله لي او لأولادي
لمياء سكتت ماتبي تزيدها...
لوجين مشت و بذهنها خيال مشعل يبتسم لغيرها ويضم غيرها ويحب غيرها...خيالات تزيد من نارها..
،
،
،
،
،
،
،
،
بعد كم يوم ع الاحداث السابقه
بو مشعل وهو معصب/وليش انا توني ادري هااااه
مشعل/ابوي انتظرت لين اتفاهم مع خالد وانهي الموضوع معه مابي اضيق صدرك
ام مشعل بضيق/ماني مصدقه ان خالد سوى كذا.. سوود الله وجهه
بو مشعل عصب عليها/مايجي وراء اهلك خير
ام مشعل انقهرت/دام كذا ليش خذيتني من اهلي هاااه..والا ناسي انك تزوجت علشان تكثر الاولاد و انااا الوحيده اللي جابت لك الولد..
بومشعل، نقطة الاولاد تعصبه/اسكتي ولا كلمه
ام مشعل/كلمة الحق تزعلك صح..
بو مشعل/روحي بيت اهلك وانتي طالق
مشعل اول واحد انصدم من هالقرار/يبه لا
ام مشعل قلبها ذاب من اهانات زوجها وهذا الطلاق الثاني منه زاد ضغطها وهي تمتم/خلاص هذي آخرتها يا مشعل.. انا تحملت ابوك كثير..خلّه معاد ابيه.. لكن بيتذكرني اذا طاح ومالقى من يسنده ..
اغمي عليها..
مشعل شال أمه من الارض وهو مقهور من اللي قاعد يصير له ويصير ببيت اهله/يمممه اصحي يممه.. قوومي تكفيين
طلع مشعل برا ركض للسياره وهو يشيل أمه على يدينه ويخفي انكساره.. لازم يكون قوي مهما صار..
،
،
،
بالبيت مشاعل كانت تسمع اللي صار وهي ع الدرج ويدينها ع الدرابزين.. نزلت بسرعه علشان تهدي بومشعل وتخليه بصفها،اتجهت له وجلست عنده/حبيبي فيصل وش فيك زعلان وضايق صدرك
بومشعل يدوخ منها/ضيقت صدري هالمشاكل.. وبعد طلقت ام مشعل وقلت لها تطلع من البيت،اخاف اني تسرعت
مشاعل اسعدها هالخبر طبعاً/ولا تشيل بخاطرك حبيبي انا موجوده جنبك، انا حبيبتك
بو مشعل راح وطي من غنجها/الله يطعني عنش
مشاعل سلهمت بعيونها وباسته ع خده/حبيبي ممكن اطلب منك طلب
بو مشعل/انتي تأمرين مو تطلبين.. قوولي
مشاعل/حابه اروح السوق
بو مشعل/روحي.. السايق موجود
مشاعل بخبث/لا انا حابه تكون انت معي اخاف من السايق
بو مشعل باعتراض/لا لا.. انا ماحب الاسواق وزحمتها ..
مشاعل/طيب خل مشعل يوديني
بو مشعل يغار من ولده اذا ذكرته مشاعل،بس يحاول يستغفر ربه/ابشري ..راح اقوله.. بس يمكن مايوافق
مشاعل/لا ..تككفى انت خليك مُصر عليه.. انت ابوه ..ولازم يسمع كلامك... انا ماني حابه اروح مشاوير طويله مع سايق
بو مشعل تعود ع دلعها وما كان يمنعها من شي.. هي مسيطره على جوارحه/ابشري يصير لك مشعل سايق بعد كم عندي قطوه ..بس خلي مشوار السوق الاسبوع الجاي
مشاعل انبسسسطت وطبعت بوسه ع خده/مو مشكله... ماني مستعجله عليه..
،
،
،
،
،
في فندق ..
استراحت ام مشعل ودمعها على خدها. وساكته..
مشعل يناظرها بحزن عمره ماشاف امه منكسره بهالشكل/يممه تكلمي خوفتيني عليك
ام مشعل/وش تبيني اقول يا مشعل.. وانا اشوف ربي يعاقبني ع اللي سويته
مشعل خاف/وش سويتي يممه
ام مشعل/اللي سويته في زوجتك مو شويه.. انا خربت لها بيتها.. وهذا انا اليوم اطلع من بيتي ذليله
مشعل سكت ماعنده تعليق...
ام مشعل/اخخ لو اقدر اوصل للوجين واعتذر منها، انت مو تقول حامل ..اكيد اللي ولدت من زمان.. والولد صار عمره قريب السنه
مشعل هالنقطه تثير اشجانه/صعب يممه صعب..
ام مشعل/ليش صعب يعني.. اذا هي محتاجه اعتذار راح ابوس لها راسها بعد
مشعل فتح ازرار ثوبه من فوق بضيق/حاولت قبلك..لكنها غيرت كل عناوينها اللي اعرفها وعمي ماجد قطع صلته فيني..
ام مشعل/ماتنلام لوجين ..اللي صار لها عندنا مو شويه، طيب وش ناوي تسوي انت.. بتسكت وزوجته وولدك بعيدين عنك
مشعل ابتسم بفقدان امل/مابيدي اسوي شي.. لوجين والولد مو بحاجتي ابداً، استودعتهم الله الذي لا تضيع ودائعه
ام مشعل ربتت على كتفه وضمته/حبيب أمك انت.. ياما زعلتك.. وظلمت اختك زينه
مشعل نزل راسه بحضنها/دعواتك يمه.. محتاجين توفيق من ربي..
ام مشعل/طول عمري.. وقلبي وعقلي راضين عليك يا حبيبي.. وش صار بقضية اختك
مشعل/توصلت لاتفاق مع ابو خالد و غصب ولده يطلق زينه طبعاً بعدما عرف بسوايا ولده
ام مشعل بامتعاض/انصدمت بهالخالد هذا...
مشعل/ماعليه يا أمي.. هي مرحله وعدت.. ارتاحي بس
،
،
،
،
،
،
،
،
،
*كندا... "
مرت أيام طويله.. وقربت اجازة الكريسماس.. الجده وروبين مقررين يسافرون للسعوديه يقضون الاجازه هناك ..لمياء قررت تسافر معهم اشتاقت لأبوها وأمها..
رن جرس الباب..
روبين كانت بتروح تفتح/هذي اكيد لوجين جايه تودعنا
الجده/لا هذي فاديه.. خليكي تضبي الشنط انا رايحه افتح لها الباب
روبين ترتبك من طاريها بعد هذاك الموقف البايخ مع ولدها.. قامت تكمل ترتيب الشنط وهي تتخيله هذيك الليله وهو ماسكها ومثبتها بكل قوه.. كرهت هذلك الموقف...لانها ياااما ابعدت عنه وتحاشت التواصل معه مهما كانت الاهميه.. ماتبي اي احتكاك مع اي رجل غير اللي بيتقدم لها من الباب وبيطلبها بالحلال.. غير كذا ماراح يغريها احد.. هنا تذكرت مراد وهو يقولها احبك وناوي اتقدم واخطبك... قهرها بهذاك التصرف.. وهي بعد تصرفها كان غبي وهي تعطيه كف.. وتخلي سعود يضربه...
ماتدري ليه جالسه تتذكر مراد وتفكر فيه اللحين..
خاولت تبعد خياله عنها/ولو ولووو مسستحيل.. هذا ترركي
صوت يناديها من وراها/أم التركي تحت تسأل عنك
روبي ألتفتت عليها/ستي!!
الجده وهي تناظرها بنص عين/ايوه ستك..
روبين/ايش جابك يا ستي.. فين خاله فاديه
الجده/الخاله فاديه.. موجوده بس هي ارسلت لي بطلب وبصراحه انا موافقه.. وفرحت بيه.. بس ماراح اقرر حتى اسمع رايك..
روبين استغربت/رأيي بأيش؟!!
الجده/فاديه طالبتك لولدها مراد..وتتمنى هالخطبه تتم قبل نسافر للسعوديه...
روبين تفاجأت/مراد خطبني رسمي ؟
الجده/ليش قد خطبك قبل كذا
روبين ترددت/لا..
الجده/هاااه ايش رايك.. موافقه والا نمشيهم
روبين/تمشينهم فين يا ستي.. هم بيشتغلوا عندك
الجده تمازحها بطويقه جديه/اللي ماتبغينه نطرده يا روح ستك انتي.. هاه نطردهم
روبين وهي خايفه من تهور جدتها/لا يا ستي.. بليز.. بلا حركاتك دحين..
روبين/معناته موافقه يا لمياء..
لمياء كانت تسمعهم وراء الباب و دخلت وهي تزغرد/كللللللووووشششش
روبين سكرت فمها/اششش فضحتينا العالم تحت
الجده طلعت/انا رايحه ابشرهم،
لمياء نغزتها/كنت حاااسه من بعدما اعطيتيه شال أمك انك تحبينه
روبين شهقت/شال أمي
لمياء/ايووه شفته مره لابسه..
روبين سكتت وهي تتوعد/..
لمياء/انا رايحه جدتك تناديني..
طلعت لمياء بسرعه..
روبين اتجهت للشباك وتناظر بالمكان اللي شافت فيه مراد هذيك الليله... وقت ماطاحت اوراقها وشالها وابتلت بالمطر. .. ضلّت تتبسم وتحمد ربها ان مراد ماخيب أملها. .وتقدم لها بالطريقه اللي كانت تتمناها..
صوت طق عالباب..
روبين بسعاده وو وجهها للنافذه وظهرها للباب/لمياء بلا استهبال.. يعنني اتيكيت اللحين
دخل مراد وهو يناظر المكان بنظره بانوراميه ووقفت انظاره عليها وهي توقف عند النافذه.. تنهد واتجه لها ووقف بنص الغرفه/مساء الخير
روبين ما استوعبت/مساء النـ... <<<استوعبت والتفتت
روبين ألتفتت عليه وهي متفاجاه تماماً/مراد!!
مراد مو مصدق انه يشوفها بدوون حواجز وغطاء ناظر شفايفها الصغار وانفها وتقاسيم ملامحها وجسمها،هي تعجبه من قبل لا يشوف شكلها.. واللحين زاد التعلق/احبك
روبين غطت وجهها بيدها وصدت/اطلع برااا
مراد وهو يقرب منها بهدوء/روبي بلييز خلاص انتهت اللعبه انتي اللحين خطيبتي وانتي موافقه.. وهذي نظره شرعيه.. جدتك هي اللي طلبت مني اجي واشوفك..
روبين وهي تتصنع الهدوء اخذت شالها ولفته على راسها بسرعه/خلاص روح
مراد/انتي كذا خليتيني اتمنى اني مادخلت وشفتك
روبين عصبت من هالجمله،نست نفسها والتفتت عليه بغبائها/ايش قصدك سيد مراد افندي.. ماعجبتك؟... مامليت عينك؟..وإلا ايش بالضبط هااه اتكلم قول..
مراد تصنم وهو يشوف شراستها ع الطبيعه بدون نقاب و حجاب/متى تبين الزواج؟
روبين انخرست من المفاجأه/..
/
/
/
/
/
/
كان يسلم على ابوه ويبي يطلع/انت طلبتني يبه؟
بو مشعل/ايهه
مشعل/ آمرني
بومشعل/مشاعل حابه تروح السوق ابيك انت توديها
مشعل استغرب/وليه ماتروح مع السايق هي وزينه
بو مشعل/ماتحب تروح مع سواقين.. بعدين انت سو اللي قلت لك وبس.. اللحين بتنزل وودها المكان اللي هي تبيه
مشعل حاس ان مشاعل مدبره له شيء علشان كذا ماراح يترك لها فرصه/طيب يبه خلها تنزل..
اتجه مشعل لسيارته واتصل في زينه بسرعه/الوه زينه
زينه بالجوال/هلا اخوي
مشعل/اللحين تلبسين عباتك وتنزلين لي تحت انا انتظرك بالسياره
زينه خافت/مشعل وش صاير
مشعل/حاب اسويلك مفاجأه بسرعه تعاالي ولا تكثرين حكي
زينه/طيب طيب ثوااني وانزل
بهاللحظات وصلت مشاعل وفتحت الباب وعطرها يسبقها ركبت والتفتت تناظر فيه/مساء الخير
مشعل وهو صاد بوجهه عنها ومتأذي من العطر/هلا
مشاعل وهي تشوف يده على الدركسيون وساعته وكبكات كمّه/عاش من شافك
مشعل كان لابس نظارات سوداء والتفت عليها/مو كأن عطرك مبالغ فيه
مشاعل وهي ترمش بدلع/وش رايك فيه
مشعل وهو يخزها ماقدر يقول رايه/...
مشاعل مدة يدها وسحبت النظارات من عيونه بنعومه/الشمس غابت حبيبي شيلها
مشعل استنكر هالكلمه وكان بيرد عليها.. لكن زينه اقبلت وانبسسط/
زينه ركبت/الله طالعين مشوااار
مشعل وهو يحرك السياره ويمشي/ايه حبيبت اخوها... كنت بطلعك مشوار لحالك بس في ناس دخيله خربتها
مشاعل انقهرت وولعت غضضب/وقف
مشعل/ولووو اخت مشاعل.. اخاف،ابوي يزعل لاني ما وديتك..
زينه/الله لا يحرمني منك يا اغلى اخ
مشعل التفت على زينه/وش حابه تسمعين
زينه فهمت قصد مشعل/فهد الشهراني
مشعل ابتسم وشغل فهد الشهراني..
مشاعل صارت كتلة نار من الغيض.. وتفكر شلوون توقعه.. (بسييطه ..محد يقدر يقاوم مشاعل وراح تشوف يا مشعل)...
،
،
،
،
في الطائره المتوجهه للسعوديه.
الطائره ظلام والكل نايم..
كانت ...تناظر صور لوجين وأولادها لأنها اخذت منها نسخ عن طريق الخادمه بعدما اعطتها فلوس../تعبت لين قدر اوصل لك.. سامحيني يا لوجين لكن كنت مضطره...
.
.
.
يتبع... ،