من متى و الغصـن يختـار الطيـور..!!

4

بدا وكأن فصل من حكايتنا ينتهي.. ولكن لا..
انها فقط البدايه لقصص متسلسله من قصص مجتمعيه ربما عشناها أو عاشها من نعرفهم.. أو قرأناها في الصحف..تمر بقلبين خلفهما قلوب!!
حب يقابله حقد.. !!
خوف يقابله قسوه..!!
شوق يقابله جفاء..!!
وهكذا تجري بنا الحياة بما لا نشتهي..!!
لوجين لن تسكت عند هذا الحد... بل اخذت على عاتقها الدفاع عن حقوقها و الا فإن دمار حياة من دمروها سيكون الحل العكسي لجنونها!!
مشعل بين نارين وتحدييّن ..تفرض عليه المواجهه لكن من سيواجه..... هذا ما سنعرفه في قادم الأحداث ..

/
/
/
*الأحداث السرديه;
صحى"مشعل" من بدري ع صوت المنبه ..واتجه لغرفتها اللي مقابله غرفته بنفس الجناح،كان قلقان طول الليل.. ماتهنى بنومه بعد اللي صار!!
فتح الباب ودخل يتطمن عليها بعد الضغوط اللي مرت عليها ليلة البارحه... جذبته ريحة عطرها اللي معبيه الغرفه،ألتفت باتجاه السرير وما لقاها فيه!!
خاف وتلفت وانتبه انها على الكنبه الطويله ونايمه بنصها بلبسها البارح.. وباين مو مرتاحه قرّب منها اكثر ووقف يتأمل ملامحها،يبي يساعدها ويحطها بسريرها بس خاف تصحي و تفهمه غلط وتهينه و كرامته ماتحمل فوق اللي البارحه..
ابتسم يداري خيبته وقرر يطلع بسرعه..*
،
،
،
،
على الفطور جالسين..
ام مشعل وريناد بنت منيره.. تركتها تنام عندهم..
مشعل اقبل عليهم وجلس/صبحك الله بالخير يمه
ام مشعل بابتسامه/صباح النوور يا عريس
ريناد/مبروك يا خالي
مشعل/الله يبارك فيك رنوده
ريناد/اصب لك حليب
مشعل/لا.. صبي قهوه
ريناد قامت وتصب له..
ام مشعل/كنت برسل فطورك للغرفه انت عريس المفروض ماتنزل
مشعل بهدوء/انا عندي شغل ضروري،لاتنسون ارسلوا الفطور للوجين
ام مشعل لوت بوزها/طيب
مشعل قام وطلع وهو مستعجل/... .
ام مشعل بحسره/قلبي عليك يا ولدي،فيه عريس يطلع من عند عروسه من الصبح للعمل!!..ياعزتي لك يا ولدي
ريناد ببراءه/انا بقوم اودي فطور العروسه.
ام مشعل/لااا اقعدي
ريناد/بس الخدامه عندها شغل بروح بدالها
ام مشعل/اللي يجوع ينزل ياكل بنفسه... كفايه سدت نفس ولدي عن الاكل وطلع ما كمل فطوره
ريناد سكتت وماعلقت وهي مستغربه!! ...
ام مشعل قامت واخذت قهوتها معها للحوش.. وجلست بالدكه علئ منظر يطل على مدرج الحقول...
ريناد قامت تبي تطلع من المطبخ تبي تروح لزينه.. وسمعت تلفون البيت يرن وراحت ترد/الوه
منيره بالتلفون/صباح الخير بنتي الحلووه
ريناد;/صباح النور يماما
منيره/حبيبتي افطرتوا
ريناد/ايوه افطرنا
منيره/عوافي طيب شفتي المعاريس؟!
ريناد/شفت خالي مشعل بس العروس للحين نايمه
منيره/من ودا لها الفطور
ريناد/محد ..خالي مشعل قال ارسلوا لها فطور بغرفتها.. بس جدتي شافته طلع و قالت لحد يودي لها فطور!!
منيره عقدت حواجبها/حبيبتي رنوده ..روحي لزينه وخبريها وخليها تجهزلك فطور ووديه للعروس فاااهمه... ولا تخلين جدتك تدري
ريناد/طيب يمه
منيره/شاااطره بنتي يلا سكري التلفون وسوي اللي قلتلك باي
ريناد/طيب.. باي
/
/
/
/
/
الساعه10
فزت من نومها وهي خايفه.. سمعت صوت طرقات باب الغرفه، بلعت ريقها من الخوف و اتجهت للباب/مين
ريناد بصوتها الطفولي/انا ريناد
لوجين فتحت الباب بعدما ارتاحت للصوت/..!!
ريناد شايله بيدينها صينيه كبيره ووقفت ببتسامه خجوله/صباح الخير
لوجين رحمتها واخذت الصينيه منها/صباح النور.. تفضلي ريناد
ريناد ببرائه وهي مستحيه/لا بروح علشان جدتي،مابيها تعرف اني جيتك
لوجين ابتسمت ع برائتها/ليه ما تبينها تعرف يا حلوه
ريناد/لانها منعت الخدم يجيبون لك الفطور.. وماما كلمتني وقالت لي اصحي زينه خالتي تجهز لك الفطور وانا اجيبه لك
لوجين بخاطرها( من هاللحين يا أم مشعل.. بتبدأين حربك، معليه كلها أيام واطلع من هالسجن)
ريناد/يلا مع السلامه
لوجين ببتسامه/شكرا حبيبتي وقولي لماما وخاله زينه بعد شكرا
ريناد/عفواً
طلعت ريناد..
جلست لوجين وهي تناظر صحن الفطور ..جوعانه بس مالها نفس تاكل شي.. تبي تتخلص من هالورطه اللي هي فيها
مستحيل تستسلم لهالواقع اللي حطوها فيه،تذكرت جوالها وانقهرت لأنها مالقته بأغراضها اللي جابوها!! (فين الاقي تليفون اللحين.. يالله ،ايش الناس المتخلفين هدوول)
،
سمعت صوت تحت وراحت تطل من الشباك واستغربت ان مجموعه يتهاوشون برا ومعاهم اسلحه!!!
امتلأ قلبها رعب ودخلت بسرعه/وكمان اسلحه ..احنا فين مو معقووله اللي حاصل هنا!!
سمعت صوت اطلاق رصاص وخااافت اكثر واتجهت للشباك مرّه ثانيه.. وتفاجأت بمشعل واقف قبالهم ومعاه مسدس ويطلق النار بالهواء علشان يفرقهم/مشعل!!
الكل التفت له وتركوا بعض..
مشعل بصوت عالي/وش اللي صااير هنا..انتم جاين تطلبون الصلح عند الشيخ والا تذابحون عند قصره!!
واحد من المتخاصمين/المعذره يا شيخ هالعوال فشلونا
مشعل بحكمه/العوال ع قولتك مالهم ذنب اذا مالقوا من يوجههم ويعلمهم الصح من الغلط...
الكل ساكت
مشعل/يلا تفضلوا المجلس عند ابوي خلونا نشوف وش مشكلتكم...
الكل دخل......

،
لوجين بعدما سمعت وشافت اللي صار استغربت/القريه هذي مافيها قانون وشرطه والا ايش!!
انا لازم اطلع من هنا.. بس بالأول القى تليفون.
صوت الباب ينطق!!
لوجين عقدت حواجبها/يا ساتر بعد لا يكون ام مشعل
فتحت الباب،بسكات وصدت وهي عابسه/..
ام احمد دخلت والدمعه بعينها/لولو قلبي. لا تعاقبيني بذنب ماسويته يا بنتي،
لوجين ما ردت عليها،وقلبها محروق تبي تحضن أمها/..
ام احمد/لا تصيرين قاسيه علي يا بنتي.. انا مربيتك بالحب،انتي بنتي و عمري وحلم حياتي..
لوجين ما قدرت تصد عن أمها مهما كان*امها حبيبتها* نزلت دمعاتها بسرعه واتجهت لأمها وضمتها بسكات/..
ام احمد ضمتها وهي تبكي/نسيت اقولك مبروك
لوجين بقهر/يمه لا تباركين لي انا مابي هالزواج..
ام احمد تمسح على راس بنتها/هذا نصيبك يا بنتي لازم ترضين فيه.. بعدين انا سمعت من ابوك ان مشعل انسان ممتاز والكل هنا يحترمه ويقدره
لوجين بعدم رضا/هذا ما يعنيني.. انا مالي دخل اذا يحبونه او لا، انا حياتي بتدمر هنا والسبب هالزواج
ام احمد وهي تمسح دموعها وتقوم/ما باليد حيله يا قلب امك...
لوجين/ماما وين رايحه؟!
ام احمد/بعد ساعه طيارتنا لجده
لوجين وهي تترجاها بنظراتها/بتخلوني هنا لحالي!!
ام احمد/لولو يا حبيبتي لا تزيدينها علي انا بالزور اقنعت ابوكِ اني اجي اودعك.. يلا يا حبيبتي فمان الله
طلعت ام احمد...
وجلست لوجين تبكي بصمت محبطه وكارهه الدنيا/..
/
/
/
/
/
الليل*
رجع متأخر للجناح وقلبه مهموم من اللي صار. .. وقف يناظر باب غرفتها بحسره... وقرر يدخل غرفته اللي مقابله غرفتها ويرتاح..
.
لوجين كانت جالسه على طرف الكنبه وكأنها تنتظر أحد، سمعت صوت عند باب غرفتها وعرفت ان مشعل وصل وطلعت له بسرعه.. وشافت ضوء غرفته مضوي وعرفت انه وصل... فكرت قبل تروح وترددت.. ، بس بالاخير قررت انها تروح له تكلمه بموضوعها المهم..
اتجهت لباب غرفته وطقتها..وفتحته،تفاجأت فيه بالبرمودا الفضفاض لين الركبه،وصدره عريان صدت عنه/اسسفه مالي داعي دخلت بدون استأذن
مشعل والتيشرت كان بيده لبسه بسرعه/لا عادي تعالي لبست،
لوجين التفتت عليه بهدوء،خجوله/
مشعل ببتسامه باهته/توقعتك نمتي،بس شكل فكرك مشغول بشي مزعجك،
لوجين ترتاح لهدوءه/اكيد ماراح اكون مرتاحه..
مشعل/تعالي اجلسي هنا و قولي اللي بخاطرك،انا بسمعك
لوجين استغربت كيف عرف انها مزعوجه وودها تحكي/ماني قادره انام..
مشعل/ليش.. في احد اليوم ازعجك؟
لوجين تبي تبدأ بالمهم وتنسى استلطافها له/مشعل انا ما اعرف كيف اقول مقدمات وصف حكي.. انا ابي اعرف شي واحد وبسرعه جاوبني لين متى بتخليني؟
مشعل/مافهمت
لوجين/مشعل لا تستهبل انت تعرف انو انا وانت مانصلح لبعض..أنا لي حياتي الخاصه اللي تختلف عنكم هنا. و اللي عرفته عنك انك انسان متعلم ومثقف،ماترضا لنفسك وحده صرّحت لك وقالت انها ماتبيك.
مشعل بهدوءه المعتاد،رغم انه يغلي/وش تبين توصلين له من بعد هالديباجه
لوجين/كل شي واضح.. زواجنا مُدبر وبدون رغبتنا لا انا ولا انت،عشان كذا خلينا ناخذها من قاصرها وننفصل واتركني اشوف مستقبلي
مشعل عصب بس ما بين،ماقدر يتكلم/...
لوجين/اظنك اقتنعت صح؟
مشعل رفع عيونه وحطها بعيونها وطول بالنظرات/..
لوجين بلعت ريقها من الخحل وهو يطالعها بهالطريقه،قامت وهي مرتبكه/مو مشكله فكر بكلامي وبكرا رد علي. عن اذنك.
مشعل ناداها وهي مقفيه/ لوجين
لوجين خاافت والتفتت عليه وماقدرت تتكلم ضلت واقفه/
مشعل حس بيأس لأن كلامها واضح/تصبحين على خير
طلعت لوجين وقلبها مليان أسئله/..
مشعل شافها طلعت و رفس الطاوله اللي قدامه وطاحت على جنبها ،صحيح هادي طباع،لكن هالهدوء الخارجي يغطي براكين داخله،عودته الأيام كيف يكون رجل يوزن كل تصرفاته،ويتحكم بأعصابه مع الناس/..
/
/
/
/
رجعت غرفتها وهي تحاول ماتفكر فيه،وتبعد شكله عن مخيلتها.. راحت سريرها ورمت نفسها عليه وتنفست بعمق وهي تمتم/لازم اطلع من هالمكان بأي وسيله والا بيضيع مستقبلي وانا محبوسه هنا.
/
/
/
/


يوم جديد.. في جده..
لمياء اليوم تنتظر تشوف اليوم اعز صاحباتها لبست وتجهزت ..
صوت طرقات باب واخوها زياد يناديها/لمياااء عجلي شوي،شكلك نمتي!!
لمياء طلعت وهي تتبسم وجاهزه/شفيييك طاير،هذا انا خلصت..
زياد/والله ظنيتك نسيتي نفسك ونمتي
لمياء/انا ما تأخرت حبيبي بس انت اللي مستعجل تبي تطمن على الحبيبه هاااه
زياد ببتسامه/وماني مرتااح لين اخطبها الليله قبل بكرا
لمياء/ههههه تطمن وارتاح لوجين تحبك،ولمحت لها ع الخطبه وفهمت انها موافقه
زياد بقمة سعادته/الله يبشرك بالخير.. يلا مشينا.. امي تقول انهم وصلوا البارح
لمياء/يلا مشينا سيد زياد
/
/
/
/
/
نعود الى الجنوب..
العصر كان فيه استقبال للنساء. . لمباركة العروس..
كالعاده.. الصاله تحت امتلأت تقريباً..والكل يتطلع يشوف صاحبة الاستقبال..
زينه نازله من فوق وهي خايفه من أمها..
ام مشعل همست لها/وين لوجين لييه ماتنزل؟
زينه وهي تهمس لأمها/راافضه تنزل
ام مشعل عصبت واخذت زينه على جنب بحيث مايسمعونها النسوان/مو بكيفها غصب عنها راح تنزل،مفكره الدنيا على كيفها!!
زينه/يمه ما اقدر اغصبها..
ام مشعل/انا بروح لها وبغصبها تجي،ما عاد الا هي يا بنت الحجازيه بتفشليني
زينه/انا اقول خلينا نتعذر عنها ونقول تعبانه،انتي عارفه ظروف زواج البنت
ام مشعل ما سمعتها ،راحت تصعد فوق..
/
/
بغرفتها كانت لوجين واقفه عند شباكها و من طرف الستاره تتفرج في الجو..تبي تغير نفسيتها/..
لحظات وانفتح الباب وكأنه صار انفجار/وينك يا بنت الحجازيه
لوجين التفتت عليها وهي تلوي بوزها/ياربي ماني ناقصتهاا
ام مشعل شافتها واتجهت لها،وعيونها ترسل شرارات الغضب/ليش ماتنزلين لاستقبال المباركين لك يا بعدي!!
لوجين ببرود/مزاااج
ام مشعل/لو مافي تحت نسوان ينتظروني كان عرفت كيف اربيك
لوجين/انتوا وش مشكلتك معي انتي وزوجك.. كل كلمه والثانيه بنربيك!!..وش شايفين علي ؟..فهميني
ام مشعل بإزدراء/ماعليك شرهه انتي وأمك..

من السلالم.. اقبل مشعل وسمعهم.. واتجه لغرفة لوجين.. *

لوجين وهي مقهوره/احترمي نفسك.. انا للحين اعاملك بحكم سنك واحتراما لمن رباني.. لكن ان تطاولتي ثاني مره على أمي برد عليك وما راح اسكت.
ام مشعل/ناس ماتستحي كيف بتربي
لوجين/ياررربي صبررني
مشعل دخل بهاللحظات وهو منحرج من أمه;/وش صاير
ام مشعل/شايف هالقليلة الادب اقولها تنزل تستقبل النسوان اللي جايين يباركون ورافضه تبي تكسرنا قدامهم
لوجين ملت منها ولاحظت انه واضح من ام مشعل مصره على الشر/انتي ماخليتي كلمه سيئه ما قلتيها بحقي وبحق أمي وانا ساكته لك علشان كبر سنك.. ومع ذلك تنعتيني بقليلة الأدب، واضح انك مو ناويه تفهمين.
ام مشعل/شاايف شاايف
مشعل اخذ أمه وطلعها برا،بهدوء.. وصرّفها/يمه انزلي لضيوفك.. مايصير تخلينهم لحالهم..
ام مشعل/وهالكلبه هذي ليش ماتغصبها تجي
مشعل،انقهر من هالكلمه/يمه ليش كذا.. ترضين احد يقولي "كلب"!!
ام مشعل/محشووم يا ولدي وش هالكلام
مشعل بيقنعها/طيب هذي صارت زوووجتي فاهمه يالغاليه ،اللي يسبها كأنه يسبني أنا.. والا تبين تقهريني يمه.دامها كلبه فأنا طبيعي بكون كلب.. لانها زوجتي..
ام مشعل/محشوووم يا ولدي..لا حشى ما أرضى عليك
مشعل باس يدينها وراسها/انا طالبك لا تحارشينها،ولا تسبينها ترى كأنك تسبيني،بعدين خليها تتقبل هالوضع .انتي عارفه الظرووف اللي خلتها تقعد هنا..
ام مشعل وكأنها هدأت/طيب مثلما تبي انا نازله للنسوان..

/
/
/
جده..*
بصدمه وقف زياد/معقوله يا خالتي كل هذا يصير للوجين وانا ما اعرف
ام احمد بقلّة حيله/يا ولدي هذا نصيبها ايش نسوي
لمياء انقهرت/عمري ماتخيلت ان لوجين بتتزوج بهذي الطريقه الغريبه
زياد قلبه محروق وما قدر يجلس طلع برا وهو مقهور...
ام احمد/ي زيااااد وقف.. فين رااايح
لمياء/اتركيه يا خاله اللي فيه مكفيه..
ام احمد/ايش فيه زياد
لمياء/فاتح ابوي وامي بخطبة لوجين وكانوا مخططين هالاسبوع يجوا يخطبوا بس مثلما قلتي نصيب..
ام احمد بحسره/النصيب لازم يصيب مهما كان..
لمياء بحالة صدمه وتفكر بأخوها،كيف بيتقبل هالخبر/
/
/
/
/
/
عند لوجين... اللي جالسه على اعصابها وتغلي من تصرف أم مشعل المُستفزه...
دخل مشعل وسكر الباب..
لوجين وقفت و التفتت عليه وهي معصبه/عاجبك تصرف أمك
مشعل اقترب منها لين وقف عندها ويحاول يهديها/انا اعتذر نيابه عن أمي،امسحيها بوجهي هالمره..
لوجين عطته ظهرها بإعتراض/والمره الجايه امسحها بوجه مين؟هاااه!!..انا اصلاً ماني عارفه وش مجلسني هنا للحين!!
مشعل/لانك صرتي زوجتي
لوجين لفت عليه وهي تستنكر كلامه/نعم نعم!!
مشعل بهدوء مايبي فضايح تشهدها الناس اللي تحت،مسك كفها اليمين/اقصد الكل يعرف انك زوجتي..وما يدري وش حقيقة اللي بيني وبينك.
لوجين ناظرت في يده اللي تمسك يدها وسحبتها منه بهدوء،وهي ساكته، وتناظر فيه مستغربه/
مشعل وعينه تغزو عينها/طلبتك،لا تاخذيني بجريرة غيري انتي عارفه انه مالي ذنب باللي سواه ابوي، انزلي لهم تحت بس جاملي شوي،وأمي اعتبريها مقام أمك.. وش ماتقول عديه لها،..
لوجين مستغربه اسلوبه وكلماته المنتقاه بعنايه ونظراته اللي تسيطر عليها وهدووءه/..
مشعل وعيونه تستنطقها/هاه وش قلتي؟
لوجين بلعة ريقها وهي تراقب حركاته وسكناته/طيب.
مشعل من فرحته باسها على جبينها/مشكوره يا بنت عمي، بيض الله وجهك..يلا اخليك علشان تجهزين وتنزلين.
قفى من عندها وانسحب بهدوء وسكر الباب وهو يبتسم لها/..
لوجين فاقت لنفسها شوي،وحاولت تبعد الوساوس من راسها( شلون وافقت!!!) اتجهت للحمام، وغسلت وجهها وهي تناظر وجهها، ماتبي مشعل يأثر فيها خايفه من نفسها كثير/لازم ألقى تليفون بأقرب فرصه.. لازم ..الوقت مو من صالحي..ما راح أخلي أحد يأثر فيني ويمنعني<<<قصدها مشعل
/
/
/
/
/
/
/
الكل تحت ينتظر..ويسأل وين العروس؟!!
سلمى/زينه وين مرت اخوك مو مبينه
زينه وهي متوتره/بـ.. بتجي
سلمى/صاير شي؟!
زينه/وش ممكن يصير يعني.. عروس لازم تستحي وتتردد في مقابل الناس بعد الزواج
سلمى ماصدقت بس سكتت/ ..
،
ام مشعل جالسه وتغلي من غضبها،وهي تتوعد لوجين،بداخلها( هييين يا بنت الحجازيه..بتكسرين كلمتي!!! ان ما وريتك).

لحظات ونزلت"لوجين" وهي تناظر فيهم وحاسه ودها تستفرغ،من كثر ما تجامل.. ولأنها ما أكلت شي من صبح...،
الكل ألتفت لها ويتهامسون!!..
زينه فرحت انها نزلت وجنبتها عناء الاعتذار وثرثرة النساء.. ام مشعل تناظرها بنظرات المنتصر !! لكن ناقده على فستانها،..وهي تسمع همس الحريم!!
،
لوجين كانت لابسه فستان أزرق ناعم واكمامه طويله دانتيلا و مسكر لين نص رقبتها الطويله بالدانتيلا..ماسك على جسمها.. و لكنه فوق الركبه!! ولابسه شراب شفاااف طووويل لأفخاذها.. ورافعه شعرها بشكل حلو ونازله على رقبتها خصلات ..
زينه اتجهت لها وهي تبتسم لها بإمتنان،وهمست لها/مشكوره انك جيتي
لوجين ماردت عليها/...
زينه التفتت على النسوان/وهذي عروستنا وصلت..
لوجين بدون نفس/السلام عليكم.
الكل وقف يسلم..
انتهت لوجين من السلام.. وراحت تجلس بصدر المجلس..
وبعد الضيافه والمجاملات.. قاموا الحريم وطلعوا...
،
زينه راحت وجلست جنب لوجين وهي خجلانه من تصرفات أهلها معها/شلونك لوجين
لوجين ما ألتفتت عليها/بخيرر..
قامت تبي تروح لغرفتها.. وتلفتت تبي تلمح تلفون.. تبي تتصل منه..
زينه قامت ولحقتها/لوجين وقفي تكفين.. انا مالي دخل باللي سووه
لوجين ما التفتت عليها وهي مخنوقه من الكل/حصل خير..
زينه/بس شكلك زعلانه
لوجين التفتت عليها وهي تتبسم بسخريه/برأيك وش المفروض تكون نفسيتي يعني؟!!هاااه.. اجاملك وما كأن شي صار!!
زينه/لوجين انا وخواتي مالنا دخل..بعد حنا ننظلم منهم
لوجين/انتي وخواتك بكييفكم هذا ابوكم.. لكن انا اللي صدق ماله دخل فيني!! طوول عمري عايشه مبسوطه مع اهلي لين طلعتوا لنا فجأه..
زينه سكتت متفشله/..
لوجين مشت وتركتها/..

وصلت للدرج تبي تصعد وتلاقي أم مشعل قدامها وتخزها/بسم الله..
ام مشعل عصبت منها/لو انك تعرفين الله ما طلعتي للناس بهاللبس..
لوجين ماتبي تطول معها/اوكي انا ماعرف الل،بس انتي اللي تعرفينه ،يلا اتركيني اروح لغرفتي..
ام مشعل/انتي تضحكين علي والا تاخذيني على قد عقلي.
لوجين وهي تضغط على جبينها من العصبيه/يا معييين الصابرين.. يا ستي ابعدي عن طريقي انتي كبيرة سن ما يصلح أغلط عليك
ام مشعل خزتها بإحتقار/ماباقي الا السلق يغلطون علي!!
لوجين استغربت الكلمه/تكلمي بكلام أفهمه
ام مشعل/اكيد ماتعرفين كلام العرب.. كله من خوالك.. الله يسامح ماجد اللي ترك بنات جماعته وراح ياخذ وحده ما يندرى عنها
زينه راحت لأمها/يمه بسك خلااص ابعدي عن لوجين
ام مشعل/ماني مبعده عنها.. من عرفناها ماعرفنا الراحه
لوجين انقهرت اكثر،..مشت وتركتها بهاللحظه،...
زينه حزنت من لوجين/الله يسامحك يمه كثرتي عليها
ام مشعل بلا مبالاة/قلعتها خليها تعرف قدرها،
زينه/هذي زوجة ولدك،المفروض تكون محل احترامك
ام مشعل/واذا زوجة ولدي..خير ياطير مب ام عياله.. اميره الله يرحمها احسن منها قعدت 3سنين وماحملت.. اخوك عقيييم انتي ماتفهمين.اللي تزوجوا معه اولادهم هالسنه يدرسون ..
زينه انصدمت من كلام امها الجارح/يمه حبيبتي لا يسمعك اخوي ويموت قهر.
ام مشعل تركتها ومشت.. بلا مبالاة/حسرتي ع ولدي بس
،
مشعل كان بيدخل وسمع كلام أمه بالاخير وسالفة اميره.. وخباها في قلبه،..بعد لحظات دخل وهو مبتسم وكأنه ما سمع شي،مايبي اخته الحبيبه زينه تتضايق عليه/السلام عليكم
زينه بلعة عبرتها ومسحت دموعها بسرعه وابتسمت/وعليكم السلام.. هلا بالغالي
مشعل/شكل الناس راحوا
زينه/من مده..
مشعل/لوجين بغرفتها؟
زينه ترددت/لا..
مشعل/وينها.. ؟
زينه/راحت للبلكون اللي تطل ع المزرعه..
مشعل عرف/امك ضايقتها صح؟
زينه وهي مقهوره/انت عارف أمك.. ماقصرت فيها.. ومع ذلك لوجين مسكت اعصابها وما سبتها..،
مشعل كبت غضبه مهما كان مستحيل يزعل أمه،ترك زينه ومشى/انا رايح للوجين
زينه/مشعل
مشعل التفت عليها/لوجين ما أكلت شي من صبح..
مشعل/فهمت
،
،
،
،
عند البلكون..
واقفه متكتفه بيدها وهي سرحانه والهواء البارد يداعب وجهها ويحرك خصلات شعرها..تحاول تفضي راسها من كل شي مزعجها هاليومين تعرضت لما يكفي من ضغوطات..
نزلت دمعتها وهي تتذكر أهلها بعيدين عنها.. ،
وقف بجنبها/انا كنت اوقف هنا كلما ضاق صدري ..واجلس بالساعات..اناظر في العصافير وهي تطير وتجلس ع الغصن اللي تحب واحسدها على حريتها،واتسأل ياترى هالاغصان مبسوطه؟..ولما اسمع تغريد هالعاصفير اقول اكيد الاغصان مبسوطه وهي تسمع هالألحان.. حتى لو ان الطيور تضايقها وتبني اعشاشها فوقها..!!
احيان مافينا نغير شي عن حاله.. ومع ذالك مع الأيام نتأقلم ويصير جزء مننا.. ما نقدر نستغني عنه
لوجين ألتفتت عليه وهي مستغربه هالفلسفه والكلام اللي اعجبها،ظلت تناظر فيه بإستفهام ،خصوصا انه ما يناظر فيها كان يناظر المزارع.. مثلما كانت هي تناظر/..!!
مشعل ألتفت عليها ببتسامه/انا من صباح ما اكلت شي، شرايك تجين معي نروح نغير جو ونتعشى برا.. ؟!
لوجين للحين مستغربه/!!
مشعل ببشاشه/اذا موافقه روحي غيري ملابسك انا رايح للسياره انتظرك اذا ماجيتي بعد ربع ساعه بعتبرك رافضه العرض.. وراح امشي،وبكون عاذرك ماراح ازعل منك.
راح مشعل وتركها...
،
،
،
،
،
،
يتبع...