من متى و الغصـن يختـار الطيـور..!!

7

‏وده يصاارحني و انا ودي أبـــوح
والكل ، منّا يذبح الخوف شوقھہ

الى متى يبقى الحياا مالک الروح
ۈالصمٺ يحرم كل ۈااحد حقوقھہ
..
،

الصباح..*
طلع من غرفته ومتجه للصاله،وينادي بصوته الضخم/يا ام مشعل
ام مشعل اقبلت بسرعه/سم سم يا فيصل
بومشعل جلس وارتاح/وين مشعل؟
ام مشعل/رجع متأخر البارح،
بو مشعل/وش أخرهم
ام مشعل/الظاهر ان لوجين انكسرت بقدمها
بو مشعل بدون اهتمام/طيب جيبي لي القهوه
ام مشعل/ابشر.
راحت ام مشعل.. ونزلت زينه بهاللحظات من فوق..
بو مشعل شافها وناداها /زززينه
زينه خافت من ابوها وهو عاقد حواجبه اتجهت له/لبيه يبه
بو مشعل وهو يناظرها بنص عين/وين رحتي البارح انتي ومرت اخوك
زينه حبت على راسه/رحنا نتمشى بمزارعنا،بس ضعنا
بو مشعل/مو من عوايدك تطلعين!!.. وش خلاك تطلعين امس
زينه/كنت ابي امشي لوجين بالمزارع لانها من جات عندنا ما تمشت وكذا
بو مشعل وهو عارف ان لوجين هي اللي طلبت انهم يروحون/هي اللي قالت لك تطلعون تمشون
زينه خافت يعاقبون،لوجين وهي مب ناقصه كراهيه منهم/لااا.. انا اللي قلت لها تروح معي
بومشعل ماصدقها ظل يخزها،بسكات/...
زينه ببتسامه/بروح بنفسسي اجيب قهوتك ..
راحت وتركته...
بو مشعل/الله يستر من بنت ماجد ..من بدايتها بدأت زينه تكذب علي!!..
/
/
/


الساعه12 الظهر.. ،
فتحت عيونها وهي ترمش بكسل،التفتت حولها،وناظرت الساعه جنبها،ارتاعت واستقعدت وهي مستغربه انها بالسرير وجاكيتها ع الكنبه هناك!!،بس بلبسها البارح،ابتسمت وهي تشوف مشعل نايم ع الارض ومتوسد مخده صغيره من الكنبه( مشعل مبين تعبان ومرهق من كثر السهر، وانا شكلي ماحسيت على نفسي من البنج ومشعل يشيلني لين هنا..!!)
راحت تتسحب وتاخذ عكازها اللي جابها لها مشعل علشان ماتثقل على قدمها..
راحت دورة المياه بهدوء علشان ما تزعجه/..
اخذت دوش على السريع ولبست روب الحمام وطلعت،اتجهت للمرايه ووقفت تنشف شعرها بالفوطه وتمشطه،راحت لدولابها واخذت بنطلون سكيني بني محروق وبلوزه كحليه.. وطلعت لها ملابس داخليه.. وبدأت تلبس..
،
بهالاثناء مشعل كان صاحي بس مسوي نفسه نايم ويتابع تحركاتها وقلبه معها،ما فوت لحظه ..وشاف كل شي بجسمها المتناسق مع طولها، بس ما ارتاح،لأن هالشي اتعبه كثير..غمض قهر وصد..
لوجين كانت تسكر بلوزتها ورشت من عطرها وحست فيه يتحرك وابتسمت،تظن انه ما بعد قام،اتجهت له بعكازها،
جلست عنده وهي تهمس/مشعل!! ..مشعل..
مشعل ماقدر يقاوم همسها فتح عيونه وناظرها/
لوجين ببتسامه/صباح الخير.
مشعل/صباح النور.. شلونك اليوم
لوجين كانت جالسه عنده ببتسامه/شوفت عينك عال العال
استقعد مشعل وعينه عليها وقرب منها/الحمدلله
لوجين خافت لانه مد يده تجاه صدرها،خافت/مشعل!
مشعل وهو يمسك ازرار بلوزتها ويسكرها/سكري هالزرين لا تخلين هذي فاتحه قدامي. ولا قدام احد.
لوجين استحت وحاولت تقوم/مانتبهت لها
مشعل شافها استحت ساعدها وقومها/لوجين؟
لوجين التفتت عليه وهي خجلانه وساكته/..
مشعل/يلا انا بروح اغير ملابسي و اصلي الظهر بالغرفه الثانيه لانه فاتني،تبين اجيب لك غداك هنا.. والا تنزلين معي
لوجين وهي منحرجه منه/لا بنزل..
مشعل/اوكي اخلص واجيك علشان ننزل سوا
لوجين/طيب.
مشعل تركها وطلع...
لوجين جلست ع الكنبه و اخذت نفس عميق.. وهي تحاول تتحاشى مشاعرها...
/
/
/
/
في مكان ثاني...
وبالتحديد مديرية السجون..
من وراء القضبان جالس *علي* ..بهمومه ويفكر كيف كان غبي.. وبكل مرّه يفشل انه يوقف بوجه مشعل،..دووم يحط نفسه بمقارنه مع مشعل.. كارهه لدرجة وده يقتله!!
كلما يتذكر كيف يقدرونه الرجال.. وكيف هو مستلم شغل ابوه وانسان ناجح و له علاقاته ..*غيرة الرجال تقتل*
من وهو صغير بالمدرسه كان يقول له معلمه وسط الذلبه (انت طالب فاشل وفوق هذا مشاغب عمرك ماراح تصير ذكي وشاطر مثل ابن عمك مشعل) ..
والرجال كانوا يقولون له(دامك ولد عم مشعل ماعليك خوف)
و و.و...ولّد عنده كراهيه ومشاعر سلبيه تجاه مشعل.. وكان بيتزوج اخت مشعل علشان يعذبها ويقهر مشعل بس ماقدر ..وماتزوجها بسبب مشعل وبفضل مشعل بعد هو الآن مسجون..صرخ ووقف وهو مقهور/ما اقدر اصبر 4سنين هنا.. لازم ابرد قلبي لااازززم
واحد من ربعه جنبه اسمه سعيد/علي شفيك قمت تصارخ رووعتني
علي/قلبي ناره شابه يا سعيد وابي اطفيها
سعيد/وش بلاك يا رجال تعوذ من ابليس
علي/انا هنا بسبب مشعل.. وهو برا مبسوط وتزوج بعد..اذا ما انتقمت منه مانيب مرتاح
سعيد فكر بفكره/يا رجال انت بياع خمور وتستاهل اللي انت فيه
علي التفت على سعيد ومسكه من ياقته ورصه ع الجدار/اللي يسمعك يقول منت معي يا سعيدان.. انت مثلك مثلي ،الفرق اني ولد شيوخ وانت ولد رعيان
سعيد تفكك منه وهو يحت يدينه،ومقهور من غرور علي/الله يسامحك،مقبوله منك.. هذا وانا كنت ناوي اساعدك بانتقامك
علي خزه/كيف؟ وعلى اساس بتساعدني؟
سعيد/هههههه كم بتعطيني
علي/اللي تبي ..بس بالاول قل وش عندك
سعيد/فيه واحد من المسجونين هنا بيطلع من السجن قررريب،حول الشهر.،والاخو له سواابق، يعني مثلك خابر.. ومستعد يسوي أي شي علشان الفلوس،
علي وكأن الفكره اعجبته/يعني توقع لو اطلبه اي شي بيوافق
سعيد/انت بس شبعه فلوس.. وبتشوف كيف بيبرد لك قلبك..
علي ابتسم بخبث وكأنه يشووف مقتل مشعل قدام عينه/...
/
/
/
/
/
/
في غرفتها...
جالسه بعدما افطرت تحت.. شافت علب الأدويه حقتها ع الكومدينه،اخذت المهدئ تبعها وهي تتبسم (راح استغني عنك،ومن اليوم مالك وجود،راح اتحداك من فينا بيربح)
اتجهت لسلة الزباله القريبه منها ورمت العلبه ..

رجعت و اخذت جوالها وتتصل في أمها،. وتنتظرها ترد ..
ردت أمها بشكل رسمي،لانها ماتعر هالرقم/الوه
لوجين خنقتها العبره اول ماسمعت صوت أمها،وابتسمت/أمي أنا لوجين
ام احمد اجهشت بالبكاء/لولوااتي حبيبتي فينك من زماااان
لوجين تحاول تكتم بكيتها/اعذريني يا أمي لسه جايبه الجوال
ام احمد/هاه يا بنتي طمنيني عنك كيف احوالك.. وكيف بيعاملك جوزك
لوجين/تطمني يا أمي انا بخير وكمان مرتاحه هنا مشعل مو مقصر معايه..
ام احمد/اكيد يا بنتي
لوجين/ايوه يا حبيبتي بشريني كيفو ميدو وبابا
ام احمد/بخير كلنا بخير ..بس انتي صارحيني كيف زوجك معاكي..
لوجين تعذبها هالكلمه، وترددت في/ماما أنا ومشعل مو متزوجين بالشكل اللي انتي فاهمتيه،مشعل انسان متفهم
ام احمد استغربت/طيب لين متى يا بنتي،وكيف مشعل هذا يرضى بهالشي
لوجين وهي تفكر بمشعل وتصرفاته/مشعل غير عنهم كلهم،
ام احمد/دام انه مشعل بنظرك غير عنهم ،اكيد بتغيرين رايك تجاه علاقتك فيه
لوجين وهي تحاول تغير الموضوع/أمي حابه اكلم احمد هو عندك؟
ام احمد/ايوه اتهرربي هههههه
لوجين وهي تتذكر زوجة مشعل وتغلي من داخلها، وبدأت تكلمها بكل شي وعن حقيقة زواجها الشكلي من زوجها لأنها أمها وبتتفهم كل شي وبتحفظ سرّها.... ،
/
/
/
/
/
بمقر عمله ..،
جالس ويتابع عمله كالعاده.. لحظات ودخل عمر/السلام عليكم
مشعل وقف له وسلم/وعلييييكم السلام.. هلاا والله..
عمر/شلونك يالعريس
مشعل ببتسامه/تمااام،انت شلوونك بشرني عن الرياض وعن اخوك
عمر/بخير ابشرك،
مشعل/ززين هاه تمت الخطبه اللي سعت فيها اختك،نقدر نقول مبروك
عمر بضيق/ما تم شي
مشعل/ليييش؟
عمر/شفت العروس بالنظره ووافقت عليها وهي،بعد وارسلت لهم هدايا ومبالغ ع حسب عاداتهم، مشت الامور ..لكن بعد كل شي قدمته لهم ..فلسوني،وبالاخير نبي مهر 100الف.. هذا غير اللي بدفعه ليلة الدخله!!
مشعل/اعوذ بالله زواج هذا والا بيعه
عمر/والله هذا اللي قلته ودامكم هذا تصرفكم.. االوجه من الوجه ابيض وحلال عليكم الهدايا اللي اعطيتها لكم..و تركتهم ومشيت
مشعل/معليه وانا اخوك،كل تأخيره فيها خيره
عمر/ياخي ع كثر ما اخطب ما يتم زواحي،لازم يطلع لي شي ينكد علي.. هذي رابع مره.. انا تعقدت شكلي بهون من ملاحقة العرس..
مشعل/ههههههههه
عمر/ايهه اضحك شعليك متزووج،بشرني كيف امورك
مشعل اتسعت ابتسامته/تمام ولله الحمد
عمر/من ابتسامتك واضح انك مرتاح
مشعل/مرتاح.. لكن يبي لي وقت علشان تستقر حياتي الجديده
عمر/ليه؟ فيه مشاكل!
مشعل/يعني مثلك عارف بيئتنا تختلف عن بيئة زوجتي وكثير تحتج ع اللي صاير..الظاهر يبي لها وقت تتعود
عمر/الله يعينك شكلها بتتعبك
مشعل/هالشي انفرض عليها يعني صعب انها تتأقلم بسهوله
عمر/بيني وبينك.. انا توقعت ان بنت عمك ماتتحمل الوضع وتنحاش والا تنتحر.. بس طلعت غلطان... احس فيه إن بالموضوع،
مشعل استغرب/وش إن هذي يعني
عمر ببتسامه/جايز البنت استلطفتك والا حبتك!!
مشعل ما رد واخذ سماعة مكتبه/نسينا نقهويك... يا قاسم ارسل لنا قهوه..
عمر/هههه تصرفني هاااه... افلللقني ان ما كان انت اللي حبيتها مب هي ههههه
مشعل وهو يخفي احراجه/اللحين لقيت لك سالفه هااه
عمر/ايهه ههههههه
/
/
/
/
*ببيت منيره،
ابو ميعاد بزجر/منيييره قلت لك لا تفتحين هالموضوع معي ثاني مرّه..انا عطيت الناس كلمه ومستحيل اتراجع عنها
منيره انقهرت/وانت عاادي تضحي ببنتك.. علشان كلمتك!!
ابو ميعاد وهو متضايق من نفسه/انتي ماتفهمين وش صاير معي.. غصب عني مو بكيفي
منيره/طيب فهمني ،كيف مو بكيفك تزوج بنتك بهالسن!!
ابو ميعاد ماقدر يقول لها تركها وطلع/...
منيره انقهرت من سلبيته وقررت مايصير لبنتها مثل اللي صار لها مهما كان، اخذت نفسها وبنتها وولدها الصغير وطلعت..
/
/
/
/
/
/
القصر..
نازله لوجين بعد إلحاح من زينه..
لوجين وهي زهقانه من تسحيب رجلها/ززينه انتي كذا ورطتيني تعبت وانا امشي
زينه/يختي احسن لك تغيرين جو بدال هالغرفه.. خلينا نسولف تحت وننبسط
لوجين/شرط تساعديني انتي ارجع للغرفه مره ثانيه مو تخليني
زينه/ولا يهمك..
..
في الصاله جالسه ام مشعل ..وتشرب قهوتها ..وتطالع التلفزيون.. وسمعت اصوات البنات جايات..
زينه اقبلت ومعها لوجين/السلام عليكم
ام مشعل بدون نفس/وعلييكم..
زينه/لوجين ارتاحي هنا.. خليني اصب الشاهي
لوجين جلست وريحت/مشكوره..
زينه/يماه وين ابوي
ام مشعل/شدراني وين يروح
زينه وهي تغمز للوجين يعني اسمعي/يماه اانتبهي،حركات ابوي هالايام ماتطمن اخاف يروح يتزوج عليك والا شي
ام مشعل بغرور/خليه يتزوج.. مرده لي.. بعدين ما عاد له حيله يتزوج... خليني ساكته بس
لوجين كاتمه ضحكته/...
زينه وهي كاتمه ضحكتها/شلون يعني ما فيه حيله يتزوج
ام مشعل،تتذكر وش قالت،والتفت عليها/وانتي شدخلك
زينه/ههههههههه
ام مشعل/بنات اخر زمن..
*رن الجرس*
لوجين تحاول ماتضحك/..
زينه/بقوم افتح الباب..
ام مشعل/يكون ازين..
راحت زينه..
لوجين خافت من نظرات ام مشعل/..
ام مشعل/شلون قدمك اللحين
لوجين استغرربت سؤالها/الحمدلله
ام مشعل/توجعك باللحيل
لوجين/يعني
ام مشعل/المفروض ما تضغطين عليها واجد،بس وين نروح من زينه..
لوجين مسسستغررربه من كلامها!!!
لحظات ودخلت زينه ومعها منيره وعيالها/السلام عليكم
ام مشعل خافت وفزت واقفه/وعليكم السلام ،منيره وش فيك،وجهك اصفر
منيره اتجهت لأمها وانهارت بكاء/.
لوجين وزينه/!!!!
ميعاد مو فاهمه شي،وماسكه اخوها الصغير/..
زينه/ميعاد اخذي اخوك وروحي للحوش وبنلحقكم/.
ميعاد ببراءه،وحزن على دموع أمها/طيب.
منيره بصوت باكي/يمااه مسفر ناوي يزوج بنتي وهي بهالعمر،مدري وش اسوي علشان امنعه
زينه عصبت/حقييير
لوجين ماقدرت تسكت/كيف يزوج طفله صغيره!!
ام مشعل وهي تحاول تهديها/يا بنتي اهدي.. وبنحاول نلاقي لنا حل لهالمصيبه
منيره/يمااه اللي صار لي مستحييل اسمح لأحد يكرره مع بنتي لو على جثتي..
لوجين مستغربه،وتهمس لزينه/ايش صار لها.. لا تقولي اتزوجت وهي قد بنتها
زينه هزت راسها بالإيجاب/ايه وبعد شوي اقولك قصتها
لوجين حززززنت منها..وفزت واقفه وراحت بعيد عنهم واتصلت/..
/
/
/
في مكتبه*
رن جواله وهو يسولف مع مندوب شركة. التوزيع.. وعطاها مشغول.. ،ورن مره ثانيه..
مشعل حس ان في مشكله/عن اذنك اخوي ارد ع التلفون
المندوب/خذ راحتك،انا ماشي ونكمل بكرا
طلع المندوب..
مشعل قام وابعد،شوي ورد عليها/نعم
لوجين بالجوال وباين معصبه/ليش تعطيني مشغول وتقفل بوجهي
مشعل عصب منها/عندي شغل مو فاضي لك
لوجين انجرحت/مشكور.. ادري ماني مهمه عندك بس اتصلت علشان اختك
مشعل/وش سوتلك زينه؟
لوجين/انت شبلاك علي.. ليش اظن اني دايم بتشكى من احد!!
مشعل/طيب قوولي بسرعه وش عندك
لوجين بجديّه/اختك منيره جايه من بيت زوجها وزعلانه..
مشعل،عصب/وش مزعلها فيه؟!
لوجين/الأخ زوجها ناوي يزوج ميعاد ومنيره رافضه هالشي.. تعاال قبل لا يصير في اختك شي..
مشعل سكت وهو يتذكر يومه صغير دموع منيره،ليلة زواجها وهي تترجآ أبوها وتبوس رجليه ما يرجعها لزوجها .....وسنين حرمانها من الطفوله وتذكر يومه يواسيها ببتساماته ودموعه وهي تبوس راسه وتقوله بعيون دامعه( حبيبي مشعل أنت احسن من ابوي،الله لا يحرمني منك يا خوي ليتك كبير،كان بتساعدني)
مشعل لمعة عيونه وهو ساكت/...
لوجين بالجوال وتلّح عليه/مشعل انت لازم تسوي شي علشان منيره وبنتها ..اكيد ما راح تتركهم،صح؟
مشعل/انا جاي بعدين
لوجين/بسرعه مشعل
مشعل/اوكي.. اخلص كم شغله واجي
مشعل سكر الجوال والتفت وتفاجأ براشد قدام وجهه/انت
راشد بدون مقدمات/جاي بموضوع بنت اخوي ميعاد.. سمعت من اخوي مسفر ان ام ميعاد تركت البيت وجاتكم..
مشعل وهو عاقد حواجبه/طيّب . وبعدين
راشد/انا اعرف ليش مسفر بيسوي ببنته كذا
مشعل باهتمام/تعال واجلس هنا وتكلم..
وجلس راشد وحكى كل اللي يعرفه...
/
/
/
/
في الليل.. ،
كان مسفر عند ابو مشعل ويشتكيه/يرضيك يا عمي اللي سوته منيره!!
ابو مشعل/لا ابد ما يرضيني، مالها حق تترك بيت زوجها بدون سبب،او تعارض كلامه
مسفر/اجل خلها ترجع معي للبيت
ابو مشعل قام وهو يتكي على عصاته وراح/اللحين اناديها لك ومحد بيكسر كلامي
مسفر جلس مسترخي و انبسسط ان مشكلته انحلت بهالسهوله/
مشعل بهاللحظات دخل ومعه راشد اخو مسفر /السلام عليكم
مسفر خااف/راااشد وش جابك؟!
راشد/جاي اوقف هالمهزله
مسفر يغمز له يسكت/وش تقول انت مافي شي.. الليله عشاكم عندي
مشعل عدل وقفته وهو ويخزه/انت وش فيك؟
مسفر بلع ريقه/ولا شي
مشعل/صحيح اللي سمعته انك بتزوج ريناد بهالسن؟
مسفر/هذي بنتي وانا حر فيها
راشد عصّب/انت مازوجتها لمصلحتها انت زوجتها علشانك منت كفو ترد ديونك.. رحت تعطيها لرجال متزوج علشان ديونك المتعثره عنده!!
مسفر/راااشد احترم نفسك
راشد/انت ما احترمت رجولتك قدام الرجال،لازم احد يوقفك عن اللي بتسويه والا بتصير مسخره،معطي بنته الصغيره بدل دين!!
راشد هجم عليه بيضربه
مشعل وقف بينهم وصرخ فيهم/ابعد انت وياه.. احترموني ع الاقل واقفين قدامي وتتهاوشون مثل العيال الصغار!!
راشد/مشعل، وانا اخوك تصرف..
مشعل/مسفر، من اليوم وطالع ريناد بحمايتي ،يا ويلك ان فكرت فيها تسديد دين او تزويجها قبل تكبر وتصير حالها حال العروس البالغه الفاهمه..
مسفر/بس انا اعطيت للرجال كلمه
مشعل/خايف على كلمتك لا تنكسر.. ومنت خايف على مستقبل بنتك لا ينهدم!!.. أي أب انت
مسفر تفشل وسكت..
مشعل جلس وبهدوءه/وبالنسبه لديونك بسددها عنك.. وبعد كذا بتتعامل معي أنا وبتسددها لي.. فاااهم..
راشد استااانس انه انقذ البنت الصغيره وعقل اخوه/..
مسفر/انت كذا تفضلت علي يا مشعل
مشعل/ما بيننا فضل.. وبعدين انا ما تنازلت عن الفلوس.. بتسددها بالتقسيط المريح.. اهم شي. ابي منك ماتفرط في عيالك علشان مصالحك... الأب لازم يكون مصدر راحه وأمان للعايله مب قلق ورعب..
بهاللحظات دخل ابو مشعل ومعصب وما شاف مشعل اللي جالس بالطرف/البنت عصت كلامي..
مشعل ببتسامه/لا تخاف يبه حلينا المشكله..
بو مشعل/كيف
مشعل وهو يلمح لمسفر/مسفر قرر بنفسه يعتذر لمنيره بنفسه ويردها للبيت
مسفر/انا اخطيت بحقها ويمكن ثقلت عليها بالكلام وزعلت مني.. لكن اوعدك معاد ازعلها
بو مشعل انبسط/ايهه كذا خلوكم مع بعض.. وحلوا مشاكلكم بدون هواش
مشعل/تطمن يبه ما راح يعيدها.. وان عادها يعرف وش بيصير
مسفر/ما راح تنعاد اوعدكم
مشعل/اجل خلونا نتعشا سوا. الليله وبعدها اخذها معك
مسفر/تم
مشعل وهو يغمز لمسفر/انا رايح اقولهم انكم بتتعشون معنا عن اذنكم..
بو مشعل/ارسل لنا شاهي
مشعل/ابشر يبه.
/
/
/
/
/
الكل تعشا ..وجلس يشرب شاهي... ومشعل قال لمنيره عن كل الكلام اللي دار بينهم.. ومن سعادتها قالت للبنات ولأمها..
ام مشعل/فديت ولدي الشيخ.. مايحلها غيره
منيره/الله لا يحرمني منه
لوجين سمعت كل اللي صار ومتعجبه وكل يوم يزيد اعجابها فيه عن قبل، ..
منيره /انا طالعه مسفر ينتظرنا برا.. زينه نادي ريناد واخوها
زينه/ابشري
راحت منيره وراح الكل لغرفته ..
/
/
/
/
بغرفتها جالسه ع طرف السرير بعدما بدلت ملابسها، اخذت ادويتها وجلست تتصفح كتاب اخذته من مكتبة مشعل تحت..وتفكر في كلامها لها اليوم بالجوال وهو يقولها( ماني فاضيلك)..انقهرت وسكرت الكتاب من عصبيتها.. وتذكرت حركاته وهو ما يلمسها ويطاوعها،بكلامها وكأنه يسايرها.. وحتى لمن دعته للغرفه رفض!!،حركت رجليها من عصبيتها وتألمت/آي..
دخل مشعل بهاللحظات، ومعه مفرش ومخده/مساء الخير
لوجين بعصبيه/خييير خييير وش جابك لغرفتي
مشعل/هي بعد غرفتي
لوجين/برااا..
مشعل وهو يفرش فراشه قريب من السرير/معليه مضطره تتحمليني،كم يوم علبال ما تطيب رجلك.. وبعدين مابيهم يلاحظون ان كل واحد مننا بغرفه ..هالشي مو زين لك ترى
لوجين بداخلها الف استفهام والف تناقض تحبه بس ما تقدر تبين له.. وهالشي متعبها.. خصوصا بعدما عرفت كل شي وعرفت عن زواجه السابق،سكتت وقررت تحط راسها ع المخذه وهي تناظر فيه.. وهو يغمض عينه وينام..
سوت نفسها نايمه..
مشعل التفت عليها ولقاها مغمضه عيونها.. تأملها شوي وصد وهو يحاول ما يبين حبه لها وهي صدته من البدايه،خاف تصده مره ثانيه..!!
لوجين بهاللحظات فتحت عيونها وناظرته وهي مو مرتاحه بقربه وبعده في نفس الوقت ماعاد تتحمل تكبت اعجابها،تنهدت وحاولت تنام... ولسان حالها...

[‏وده يصاارحني و انا ودي أبـــوح
والكل ، منّا يذبح الخوف شوقھہ

الى متى يبقى الحياا مالک الروح
ۈالصمٺ يحرم كل ۈااحد حقوقھہ]



يتبع..