أجنحة بلا ريش

الجزء 13

ﺍﻟﺤﺼﻞ ﺍﻧﻮ ﺍﻟﻨﺎﺱ ﺑﺪﻭ ﻳﺠﻮ . ﻭﺭﺟﺎﻝ ﻭﺣﺮﻳﻢ . ﻭﺍﺣﺪﻳﻦ ﺑﺠﻮﻧﻲ ﻓﻲ ﺍﻟﺼﺎﻟﻮﻥ ﻭﺍﻟﺤﺮﻳﻢ ﺑﺪﺧﻠﻦ ﺟﻮﺓ .

ﻭﺍﻧﺎ ﺑﻘﻴﺖ ﺑﺴﺘﻘﺒﻞ ﻓﻲ ﺍﻟﻨﺎﺱ ﻭﻋﻴﻨﻲ ﺯﺍﻳﻐﺔ ﻋﻠﻰ ﺍﻟﺒﺎﺏ .. ﻭﺍﻟﺤﺮﻳﻢ ﺍﻟﺪﺍﺧﻼﺕ .

ﺷﻔﺖ ﻟﻴﻚ ﻧﺎﺩﻳﺔ ﻭﺍﻣﻬﺎ ﺟﻦ ﺩﺍﺧﻼﺕ ﺍﻟﺒﻴﺖ . ﻣﻊ ﺷﻠﺔ ﺑﺘﺎﻋﺔ ﺣﺮﻳﻢ . ﻭﺍﻟﻠﻪ ﻭﻛﺖ ﺷﻔﺘﻬﺎ ﻣﺎﻋﺎﺭﻑ ﺍﻟﺤﺼﻞ

ﻋﻠﻲ ﺷﻨﻮ . ﻻﻧﻮ ﺍﺣﺴﺎﺱ ﻣﺎﺑﺘﻮﺻﻒ .. ﻧﺎﺩﻳﺔ ﺗﻘﺮﻳﺒﺎ ﻛﻤﻠﺖ ﺍﻟﻌﺪﺓ ﻟﻴﻬﺎ ﺍﺳﺒﻮﻉ ﻭﻻ ﺣﺎﺟﺔ .. ﻋﻠﻰ ﺣﺴﺐ

ﺣﺴﺎﺑﺘﻲ .. ﻳﻌﻨﻲ ﺍﻧﺎ ﺑﻘﻴﺖ ﻓﻲ ﻛﻒ ﻋﻔﺮﻳﺖ .. ﻭﺗﺎﻧﻲ ﻣﺎﺑﻘﺪﺭ ﺍﺭﺟﻌﻬﺎ ﺍﻻ ﺑﻲ ﻋﻘﺪ ﺟﺪﻳﺪ .. ﺑﺲ ﺍﻫﻮ

ﺍﻟﻤﺤﺎﻭﻻﺕ ﺍﻟﻴﺎﺳﺔ .. ﻭﺍﻟﻠﻪ ﻣﺎﻋﻨﺪﻱ ﻭﺷﻲ ﺍﻗﺎﺑﻠﻬﺎ ﺑﻴﻬﻮ .. ﺍﺧﻮﻱ ﻭﺳﺦ ﻭﺷﻲ .. ﺍﻟﻠﻪ ﻳﺴﺎﻣﺤﻮ ..

ﻭﻫﺴﻲ ﻣﺎﻓﻲ ﻃﺮﻳﻘﺔ ﺍﻗﺎﺑﻠﻬﺎ ﺍﺗﻜﻠﻢ ﻣﻌﺎﻫﺎ .. ﺟﻮﺓ ﺷﻠﺔ ﺑﺘﺎﻋﺔ ﺣﺮﻳﻢ .. ﻭﻛﻠﻬﻢ ﻋﺎﺭﻓﻴﻨﻲ ﻃﻠﻘﺘﻬﺎ ..

ﻭﺍﻟﺼﺎﻟﻮﻥ ﻣﻼﻥ ﺭﺟﺎﻝ .. ﺍﻟﻤﻬﻢ .. ﻋﻤﻠﺖ ﻓﻴﻬﺎ ﻣﺎ ﻣﻬﺘﻢ ﺑﺎﻟﻤﻮﺿﻮﻉ .. ﻭﻛﻞ ﻣﺮﺓ ﺑﺪﺧﻞ ﺍﺟﻴﺐ ﺣﺎﺟﺔ

ﻟﻠﻀﻴﻮﻑ ﻣﻮﻳﺔ ﻋﺼﻴﺮ .. ﻛﺪﺍ ﻳﻌﻨﻲ . ﻭﻣﺎﺷﺎﻳﻔﻬﺎ ﻣﺎﻋﺎﺭﻑ ﻗﺎﻋﺪﺓ ﻭﻳﻦ .. ﻗﻤﺖ ﻧﺎﺩﻳﺖ ﺳﺎﺭﺓ .. ﺟﺎﺗﻨﻲ

ﻗﻠﺖ ﻟﻴﻬﺎ ﻧﺎﺩﻳﺔ ﻣﻌﺎﻙ ؟؟

ﻗﺎﻟﺖ ﻟﻲ ﺍﻳﻮﻩ ﺟﻮﺓ ..

ﻗﻠﺖ ﻟﻴﻬﺎ ﻗﻮﻟﻲ ﻟﻴﻬﺎ ﺷﻤﺲ ﺍﻟﺪﻳﻦ ﻋﺎﻳﺰ ﻳﺘﻜﻠﻢ ﻣﻌﺎﻙ ﺿﺮﻭﺭﻱ .. ﺳﺎﺭﺓ ﻗﺎﻟﺖ ﻟﻲ ﺗﺘﻜﻠﻢ ﻣﻌﺎﻫﺎ ﻣﺘﻴﻦ؟؟

ﻋﺎﻳﻦ ﺍﻟﻨﺎﺱ ﺩﻳﻞ ﻣﺰﺣﻮﻣﻴﻦ ﻛﻴﻒ . ﺍﻟﻨﺎﺱ ﻓﻲ ﺷﻨﻮ ﻭﺍﻧﺖ ﻓﻲ ﺷﻨﻮﻳﺎﺷﻤﺲ ﺍﻟﺪﻳﻦ ؟ ..

ﻗﻠﺘﺎ ﻟﻴﻬﺎ ﺑﺲ ﺍﻧﺘﻲ ﻗﻮﻟﻲ ﻟﻴﻬﺎ .. ﺍﻥ ﺷﺎﺀ ﺍﻟﻠﻪ ﺗﺠﻴﻨﻲ ﺭﺍﺟﻌﺔ ﺑﻌﺪﻳﻦ .. ﺍﻭ ﺍﻣﺸﻲ ﻟﻴﻬﺎ ﻓﻲ ﺍﻟﺒﻴﺖ .. ﺍﻭ

ﺧﻠﻴﻬﺎ ﺗﺴﻤﺢ ﻟﻲ ﺍﺗﺼﻞ ﻋﻠﻴﻬﺎ ﻻﻧﻬﺎ ﻣﺎﻧﻌﺎﻧﻲ ﻣﻦ ﺍﻻﺗﺼﺎﻝ ..

ﻗﺎﻟﺖ ﻟﻲ ﺧﻼﺹ ﻛﻮﻳﺲ ﺑﻜﻠﻤﻬﺎ ..

ﻭﺍﻧﺎ ﺑﻘﻴﺖ ﺑﺴﺘﻘﺒﻞ ﻓﻲ ﺍﻟﻨﺎﺱ .. ﻭﺍﻱ ﺷﻠﺔ ﺗﺠﻲ ﻣﻔﺮﻭﺽ ﻋﻠﻲ ﻓﺮﺽ ﺍﺣﻜﻲ ﻟﻴﻬﻢ ﺍﻟﻘﺼﺔ ﺍﻟﺤﺼﻠﺖ ..

ﻭﺯﻭﺭﺕ ﻛﻞ ﺍﻟﻤﻌﻠﻮﻣﺎﺕ .. ﺑﺲ ﺻﺎﻟﺢ ﺍﺧﻮﻱ ﻭﻗﻊ ﻣﻦ ﺭﺍﺱ ﺍﻟﺼﺎﻟﻮﻥ .. ﻭﺍﻟﻨﺎﺱ ﻓﻲ ﻋﻴﻮﻧﻬﻢ ﺍﻟﻒ

ﺳﺆﺍﻝ .. ﺑﺲ ﻓﻲ ﻭﺍﺣﺪ ﻗﺎﻝ ﻟﻲ .. ﻃﻴﺐ ﻳﺎ ﺷﻤﺲ ﺍﻟﺪﻳﻦ .. ﻧﺤﻦ ﺷﻔﻨﺎ ﻋﺮﺑﻴﺔ ﺍﻟﺸﺮﻃﺔ ﻗﺪﺍﻡ ﺑﻴﺘﻜﻢ .

ﻓﻲ ﻧﻔﺲ ﻭﻛﺖ ﺍﻟﻮﻗﻌﺔ ﺩﻱ .. ﻗﻠﺖ ﻟﻴﻬﻮ ﺍﻳﻮﺓ ﺩﻩ ﺿﺎﺑﻂ ﺻﺎﺣﺐ ﺍﺑﻮﻱ .. ﻛﺎﻥ ﻋﻨﺪﻭ ﻣﻬﻤﺔ ﻭﺟﺎ ﻏﺎﺷﻴﻨﺎ

.. ﻗﺎﻝ ﻟﻲ ﻏﺮﻳﺒﺔ . ﻳﻐﺸﺎﻛﻢ ﺍﻟﺴﺎﻋﺔ 11 ﻭﻧﺺ ﺑﺎﻟﻠﻴﻞ .. ﻗﻠﺖ ﻟﻴﻬﻮ ﺩﻩ ﺍﻟﺤﺼﻞ .. ﺍﻟﻤﻬﻢ ﺍﺻﻠﻬﻢ ﺑﺘﺎﻋﻴﻦ

ﺷﻤﺎﺭﺍﺕ .. ﻭﺍﻧﺎ ﺣﺎﻭﻟﺖ ﺍﺧﺘﺼﺮﻫﻢ .. ﻭﺑﺎﻟﻲ ﻛﻠﻮ ﻓﻲ ﻣﺮﺳﺎﻟﻲ ﺍﻟﺮﺳﻠﺖ ﻟﻴﻬﻮ ﺳﺎﺭﺓ ..

ﺍﻫﺎ ﻳﺎﺯﻭﻝ ﺑﻌﺪ ﺍﻟﻨﺎﺱ ﻛﻠﻬﺎ ﻓﺎﺗﺖ .. ﻭﺍﻟﺒﻴﺖ ﺑﻘﻰ ﻫﺎﺩﻱ ﺷﻮﻳﺔ .. ﺟﺎﺗﻨﻲ ﺳﺎﺭﺓ ﻓﻲ ﺍﻟﺼﺎﻟﻮﻥ .. ﻭﻗﺎﻟﺖ

ﻟﻲ ﺗﻌﺎﻝ ﺍﻗﻌﺪ ﺍﻗﻮﻝ ﻟﻴﻚ ..

ﺍﻭﻝ ﺣﺎﺟﺔ ﻳﺎﺷﻤﺲ ﺍﻟﺪﻳﻦ.. ﺍﻧﺎ ﺍﺗﻜﻠﻤﺖ ﻣﻊ ﻧﺎﺩﻳﺔ .. ﻭﻗﻠﺖ ﻟﻴﻬﺎ ﺷﻤﺲ ﺍﻟﺪﻳﻦ ﻋﺎﻳﺰ ﻳﺘﻜﻠﻢ ﻣﻌﺎﻙ .. ﺍﻣﺎ

ﺗﺠﻴﻬﻮ ﻫﻨﺎ ﺑﻌﺪﻳﻦ . ﺍﻭ ﺗﻔﺘﺤﻲ ﻟﻴﻬﻮ ﻃﺮﻳﻖ ﻳﺠﻴﻜﻢ ﻓﻲ ﺍﻟﺒﻴﺖ . ﺍﻭ ﺗﺨﻠﻴﻬﻮ ﻳﺘﺼﻞ ﻋﻠﻴﻚ .. ﻗﺎﻣﺖ ﻧﺎﺩﻳﺔ

ﻗﺎﻟﺖ ﻟﻲ .. ﻭﻻﻭﺍﺣﺪﺓ ﻓﻲ ﺩﻳﻞ .. ﻳﺎﺳﺎﺭﺓ ﺍﻧﺎ ﻗﺒﻞ ﻛﺪﺍ ﻗﻠﺖ ﻟﻴﻚ ﺻﻔﺤﺔ ﺷﻤﺲ ﺍﻟﺪﻳﻦ ﺩﻱ ﺍﻧﺎ ﻃﻮﻳﺘﺎ ..

ﺍﻧﺎ ﻗﻌﺪﺗﻲ ﻣﻊ ﺷﻤﺲ ﺍﻟﺪﻳﻦ ﺑﺘﺠﻴﺐ ﺿﺮﺭ ﺍﻛﺘﺮ .. ﺍﻧﺘﻲ ﻣﺎﻋﺎﺭﻓﺔ ﺷﻲ ﺳﺎﻱ .. ﻗﻠﺖ ﻟﻴﻬﺎ ﻃﻴﺐ ﺍﺣﻜﻲ ﻟﻲ

ﻳﺎﻧﺎﺩﻳﺔ ..

ﻗﺎﻟﺖ ﻟﻲ ﺍﻧﺎ ﻣﺎ ﺣﻜﻴﺖ ﻟﻲ ﺍﻣﻲ ﻭﺍﺑﻮﻱ .. ﺍﺟﻲ ﺍﺣﻜﻲ ﻟﻴﻚ ﺍﻧﺘﻲ؟؟ ﻣﺴﺘﺤﻴﻞ .. ﺑﺲ ﺍﻧﺎ ﻃﺎﻟﺒﺔ ﻣﻨﻚ ﻳﺎ

ﺳﺎﺭﺓ ﻛﻠﻤﻲ ﺍﺧﻮﻙ .. ﻗﻮﻟﻲ ﻟﻴﻬﻮ .. ﻧﺎﺩﻳﺔ ﻗﺎﻟﺖ ﻟﻴﻚ ﻻﺯﻡ ﺗﻨﺴﺎﻧﻲ ..ﻭﺗﻤﺴﺤﻨﻲ ﻣﻦ ﺫﺍﻛﺮﺗﻚ ..

ﻻﻧﻮ ﺍﻧﺎ ﺍﺑﻮﻱ ﻋﺸﺎﻥ ﻳﻨﺘﻘﻢ ﻣﻨﻲ .. ﻻﻧﻮ ﻗﺎﻝ ﻣﺎﻛﻠﻤﺘﻮ ﺑﻲ ﺳﺒﺒﻲ . ﻭﺍﺗﻄﻠﻘﺖ ﺳﺎﻛﺖ ﻃﻐﻰ ﻣﻨﻲ ..

ﻋﺸﺎﻥ ﻛﺪﺍ . ﺭﺳﻞ ﻟﻲ ﻭﺩ ﻋﻤﺘﻲ ﺍﻟﻔﻲ ﺍﻟﺴﻌﻮﺩﻳﺔ .. ﻭﻗﺎﻝ ﻟﻴﻬﻮ ﺍﻧﺖ ﺍﻟﺒﺖ ﺩﻱ ﺩﺍﻳﺮﻫﺎ ﺑﻌﺪ ﻛﺪﻱ ؟؟

ﻗﺎﻝ ﻟﻴﻬﻮ ﺍﻳﻮﺓ ﺩﺍﻳﺮﻫﺎ .. ﻗﺎﻝ ﻟﻴﻬﻮ ﻣﺒﺮﻭﻙ .. ﺑﺪﻭﻥ ﻣﺎﻳﺸﺎﻭﺭﻧﻲ .. ﻭﺍﻧﺎ ﻣﺎ ﻣﻤﻜﻦ ﺍﻛﺴﺮ ﻛﻠﻤﺔ ﺍﺑﻮﻱ .

... ﻓﻲ ﺍﻟﻨﻬﺎﻳﺔ ﻭﺩ ﻋﻤﺘﻲ ﻭﻣﺎﺧﺴﺮﺍﻧﺔ ﺣﺎﺟﺔ . ﻛﻔﺎﻳﺔ ﺍﻧﻮ ﺍﺑﻮﻱ ﻳﻜﻮﻥ ﺭﺍﺿﻲ ﻋﻨﻲ .. ﻭﺷﻤﺲ ﺍﻟﺪﻳﻦ ﺍﻥ

ﺷﺎﺀ ﺍﻟﻠﻪ ﺭﺑﻨﺎ ﻳﻘﺴﻢ ﻟﻴﻬﻮ ﺍﻧﺴﺎﻧﺔ ﺍﻓﻀﻞ ﻣﻨﻲ .. ﺑﺲ ﺍﻧﺎ ﻭﺍﻟﻠﻪ ﻳﺎ ﺳﺎﺭﺓ ﻣﺎﺣﺒﻴﺖ ﺯﻭﻝ ﺯﻱ ﺷﻤﺲ ﺍﻟﺪﻳﻦ

.. ﻭﻻ ﻳﻤﻜﻦ ﺍﺣﺐ ﺯﻭﻝ ﺗﺎﻧﻲ .. ﻳﺎﻫﻮ ﺍﻟﺰﻭﺍﺝ ﻭﺑﻨﺘﺰﻭﺝ .. ﻟﻜﻦ ﺣﻴﺎﺗﻲ ﺍﺗﻮﻗﻔﺖ ﻣﻦ ﻳﻮﻡ ﻓﺎﺭﻗﺖ ﺷﻤﺲ

ﺍﻟﺪﻳﻦ .. ﻭﺍﻟﻠﻪ ﻣﺎﻓﺎﺭﻗﺘﻮ ﺑﻲ ﻳﺪﻱ .. ﻛﺎﻥ ﻏﺼﺒﺎ" ﻋﻨﻲ ﺭﺑﻨﺎ ﻳﺸﻬﺪ .. ﻭﻗﻌﺪﺕ ﺗﺒﻜﻲ ﻟﻲ .. ﻗﻠﺖ ﻟﻴﻬﺎ

ﺧﻼﺹ ﻳﺎﺳﺎﺭﺓ ﻣﺎﺗﺒﻜﻲ ..ﺍﻧﺎ ﺑﻮﺭﻳﻬﻮ ﻭﺍﻟﻠﻪ .. ﻭﻫﻮ ﻻﺯﻡ ﻳﻘﺪﺭ ﻣﻮﻗﻔﻚ .. ﻛﻞ ﺷﻲ ﺑﺎﻣﺮ ﺍﻟﻠﻪ .. ﻋﺎﺩ ﺍﻧﺘﻲ

ﺗﺴﻮﻱ ﺷﻨﻮ؟

.

ﺩﻩ ﻛﻞ ﺍﻟﺤﺼﻞ ﻳﺎﺷﻤﺴﻲ ﺍﺧﻮﻱ . ﺍﻫﺎ ﺭﺍﻳﻚ ﺷﻨﻮ؟ ﻭﺑﺘﺘﺼﺮﻑ ﻛﻴﻒ؟

ﺍﻧﺎ ﻗﻠﺖ ﻟﻴﻬﺎ ﻻﻻ ﻳﺎﺳﺎﺭﺓ .. ﺩﻩ ﻛﻼﻡ ﻣﺎﻳﻨﻔﻊ .. ﻻﺯﻡ ﻧﺎﺩﻳﺔ ﺗﺴﻤﻌﻨﻲ ﻭﺑﻌﺪﻳﻦ ﺗﻘﺮﺭ .. ﻗﺎﻟﺖ ﻟﻲ ﺗﻘﺮﺭ

ﺷﻨﻮ ﻳﺎ ﺍﻧﺖ؟ .. ﺍﻟﻘﺮﺍﺭ ﺍﺧﺪﻭ ﺍﺑﻮﻫﺎ ﻭﺍﻧﺘﻬﻰ ..

ﻗﻠﺖ ﻟﻴﻬﺎ ﺍﻧﺎ ﻣﺎﻣﻤﻜﻦ ﺍﺳﻤﺢ ﻟﻲ ﻧﺎﺩﻳﺔ ﺗﻜﻮﻥ ﻟﻲ ﺍﻧﺴﺎﻥ ﺗﺎﻧﻲ ﻏﻴﺮﻱ .. ﻧﺎﺩﻳﺔ ﺍﻧﺎ ﻣﺎﻋﺮﻓﺖ ﻗﻴﻤﺘﻬﺎ

ﺍﻟﺤﻘﻴﻘﻴﺔ ﺍﻻ ﻟﻤﻦ ﻣﺸﺖ ﻣﻨﻲ .. ﺍﻧﺎ ﻣﺴﺘﺤﻴﻞ ﺍﺳﻴﺒﻬﺎ .. ﻳﺎﺳﺎﺭﺓ ﻓﻲ ﻛﻼﻡ ﻣﻬﻢ ﺍﻧﺎ ﻋﺎﻳﺰ ﺍﻗﻮﻟﻮ ﻟﻴﻚ ..

ﻋﻠﻴﻚ ﺍﻟﻠﻪ ﻟﻮ ﺍﻧﺘﻲ ﺍﺧﺘﻲ ﺑﺎﻟﺠﺪ ﺗﺴﺎﻋﺪﻳﻨﻲ ﻓﻴﻬﻮ ..

ﻳﺎﺳﺎﺭﺓ ﻳﺎ ﺍﺧﺘﻲ .. ﺍﻧﺎ ﺍﺗﻌﻠﻤﺖ ﻣﻦ ﺍﻟﺤﻴﺎﺓ ﺣﺎﺟﺎﺕ ﻛﺘﻴﺮﺓ .. ﻭﻛﻞ ﻳﻮﻡ ﺍﻟﺤﻴﺎﺓ ﺑﺘﺪﻳﻨﻲ ﺩﺭﺱ .. ﻭﺍﻟﺪﺭﺱ

ﺍﻻﺧﻴﺮ ﺍﻻﺗﻌﻠﻤﺘﻮ .. ﺍﻧﻮ ﻛﻞ ﺍﻟﻐﻠﻂ ﺑﺤﺼﻞ ﻟﻤﺎ ﺗﻨﻌﺪﻡ ﺍﻟﺼﺮﺍﺣﺔ ﺑﻴﻦ ﺍﻟﻨﺎﺱ .. ﻭﻳﻨﻌﺪﻡ ﺍﻻﻋﺘﺮﺍﻑ ﺑﺎﻟﺨﻄﺄ .

ﻭﺍﻟﻨﺎﺱ ﺗﺘﺴﺘﺮ ﺧﻮﻑ ﻣﻦ ﺍﻟﻤﺠﺘﻤﻊ ,,

ﺍﻧﺘﻲ ﻳﺎﺳﺎﺭﺓ ﻋﺎﺭﻓﺔ ﺍﻧﻮ ﺻﺎﻟﺢ ﺍﺧﻮﻱ ﺍﺗﺤﺮﺵ ﺑﻲ ﻧﺎﺩﻳﺔ .. ﻭﺩﻩ ﺳﺒﺐ ﻃﻼﻗﻬﺎ .. ﺳﺎﺭﺓ ﻗﺎﻟﺖ ﻟﻲ

ﻣﺴﺘﺤﻴﻞ ..

ﻗﻠﺘﺎ ﻟﻴﻬﺎ ﻃﻴﺐ ﺍﻧﺎ ﺍﺛﺒﺖ ﻟﻴﻚ ,, ﺍﻭﻻ ﻓﻲ ﻳﻮﻡ ﻛﺪﺍ ﺣﺼﻞ ﻛﺪﺍ .. ﻭﺫﻛﺮﺕ ﻟﻴﻬﺎ ﻛﻞ ﺍﻟﺤﻮﺍﺩﺙ ﺍﻟﺸﻜﻜﺘﻨﻲ ..

ﻟﻐﺎﻳﺔ ﺧﻮﻑ ﻧﺎﺩﻳﺔ ﻭﺍﺭﺗﺒﺎﻛﻬﺎ ﻭﺑﻠﻌﺔ ﺭﻳﻘﻬﺎ ﻭﺍﻧﻬﺎ ﺧﺎﻳﻔﺎﻧﻲ ﺍﻛﺘﺸﻒ ﺟﺮﺍﻳﻢ ﺍﺧﻮﻱ .. ﻛﻠﻬﺎ ﺣﻜﻴﺘﻬﺎ ﻟﻴﻬﺎ ..

ﻭﻛﻠﻤﺘﻬﺎ ﺑﻲ ﻛﻼﻡ ﺍﺏ ﺭﺍﺳﻴﻦ . ﻭ ﻗﺮﻳﺘﻠﻴﻬﺎ ﺍﻟﺮﺳﺎﻟﺔ ﺍﻟﻔﻲ ﺗﻠﻔﻮﻥ ﺻﺎﻟﺢ ..

ﻭﻗﻠﺖ ﻟﻴﻬﺎ ﻳﺎﺳﺎﺭﺓ ﺍﻧﺘﻲ ﻣﺎ ﺍﻟﻀﺤﻴﺔ ﺍﻻﻭﻟﻰ ﻟﻲ ﺻﺎﻟﺢ ..

ﻗﺒﻠﻴﻚ ﺻﺎﻟﺢ ﺍﺗﺤﺮﺵ ﺑﻲ ﺯﻭﺟﺘﻲ .. ﻭﺍﻧﺎ ﺣﺎﺳﺲ ﺑﺎﻟﻐﻞ ﻭﺍﻟﺪﻣﺎﺭ ﻭﺍﻟﻠﻪ .. ﻟﻜﻦ ﺍﻟﺤﻤﺪ ﻟﻠﻪ ﻋﻠﻰ ﻛﻞ ﺣﺎﻝ

.. ﻋﺰﺍﻱ ﺍﻟﻮﺣﻴﺪ ﺍﻧﻮ ﺍﺧﻮﻱ ﻣﺎﻃﺒﻴﻌﻲ .. ﻟﻮ ﻛﺎﻥ ﻃﺒﻴﻌﻲ ﻋﻤﻞ ﻛﺪﺍ ﺍﻧﺎ ﺑﺮﺍﻱ ﻛﻨﺖ ﺑﻘﺘﻠﻮ .. ﻭﺯﻱ

ﻣﺎﺑﻘﻮﻟﻮ ﺍﻟﺴﻜﺮﺍﻥ ﻓﻲ ﺫﻣﺔ ﺍﻟﻮﺍﻋﻲ .. ﻭﺩﻩ ﻗﺪﺭﻧﺎ ﻛﺪﻱ ﻧﻌﻤﻞ ﺷﻨﻮ؟

ﺳﺎﺭﺓ ﺩﻱ ﺗﺎﻧﻲ ﻗﻌﺪﺕ ﺗﺒﻜﻲ ﺑﻲ ﺣﺮﻗﺔ ﺷﺪﻳﺪﺓ .. ﻭﺗﻘﻮﻝ ﻭﺍﻓﻀﻴﺤﺘﻨﺎ ﻳﺎ ﺷﻤﺲ ﺍﻟﺪﻳﻦ .. ﺗﺎﻧﻲ ﻧﺤﻦ

ﻧﻮﺍﺟﻪ ﻧﺎﺩﻳﺔ ﻛﻴﻒ ﺑﻌﺪ ﺍﻟﻤﺼﻴﺒﺔ ﺩﻱ ؟؟ ﻭﺍﻧﺎ ﺍﺗﻮﻧﺲ ﻣﻌﺎﻫﺎ ﺯﻱ ﺍﻟﻤﺎﺣﺼﻞ ﺷﻲ .. ﻭﻫﻲ ﺗﻀﺤﻚ ﻣﻌﺎﻱ

ﻛﺎﻧﻮ ﻣﺎﻓﻲ ﺣﺎﺟﺔ .. ﻳﺤﻠﻴﻠﻚ ﻳﺎﻧﺎﺩﻳﺔ ....

ﺍﻧﺎﻗﻠﺘﺎ ﻟﻴﻬﺎ ﻳﺎﺳﺎﺭﺓ ﺩﻩ ﻣﺎﻭﻛﺖ ﺑﻜﺎ .. ﻧﺤﻦ ﻻﺯﻡ ﻧﺤﺼﻞ ﻧﺎﺩﻳﺔ ﻗﺒﻞ ﻣﺎﺗﻀﻴﻊ ﻣﻨﻨﺎ ..

ﺳﺎﺭﺓ ﻗﺎﻟﺖ ﻟﻲ ﻭﺍﻟﻠﻪ ﺍﻧﺎ ﺑﺤﺎﻭﻝ ﺍﻟﻤﺴﺘﺤﻴﻞ ﻳﺎ ﺷﻤﺲ ﺍﻟﺪﻳﻦ ﺍﺧﻮﻱ .. ﺑﺲ ﻣﺎﺑﻀﻤﻦ ﻟﻴﻚ ﺍﻟﺒﺤﺼﻞ ﺷﻨﻮ

..

ﻫﻨﺎ ﺍﻣﻲ ﺩﺧﻠﺖ .. ﻗﺎﻟﺖ ﻣﺎﻟﻜﻢ ﻳﺎ ﺍﻭﻻﺩ؟ .. ﺍﻫﺎ ﺗﺎﻧﻲ ﻓﻲ ﺷﻨﻮ؟ ﻧﻌﻞ ﻣﺎ ﻓﻲ ﻛﺎﺭﺛﺔ ﺟﺪﻳﺪﺓ ﺍﻧﺎ ﻣﺎﻧﻲ

ﻋﺎﺭﻓﺎﻫﺎ .. ﻗﻠﺘﺎ ﻟﻴﻬﺎ ﺍﻳﻮﺓ ﻓﻲ ﻳﺎ ﺍﻣــﻲ .. ﺍﻗﻌﺪﻱ ﻧﺤﻜﻲ ﻟﻴﻚ .. ﻭﺣﻜﻴﻨﺎ ﻟﻴﻬﺎ .. ﺍﻣﻲ ﺩﻱ ﻗﻌﺪﺕ ﺗﺒﻜﻲ

ﻭﺗﻠﻒ ﺑﺎﻟﺼﺎﻟﻮﻥ ﻭﺗﻀﺮﺏ ﻓﻲ ﺧﺪﻭﺩﻫﺎ ﺯﻱ ﺍﻟﻤﺠﻨﻮﻧﺔ .. ﻭﺗﺴﻮﻱ ﻭﺍﺳﺠﻢ ﺭﻣﺎﺩﻙ ﻳﺎﻣﺮﻳﻢ .. ﻭﺍﻋﻴﺒﺔ ﺟﻨﺎﻙ

ﻳﺎﻣﺮﻳﻢ .. ﺍﻧﺎ ﻳﺎﺭﺑﻲ ﺑﻜﻮﻥ ﺳﻮﻳﺖ ﺷﻨﻮ ﻓﻲ ﺍﻟﺪﻧﻴﺎ ﺩﻱ ؟؟ ﺩﻩ ﻭﺍﻟﻠﻪ ﻳﺎ ﻭﻟﻴﺪﺍﺗﻲ ﻋﻘﺎﺏ ﺭﺑﺎﻧﻲ ﻣﻦ ﺍﻟﻠﻪ ..

ﺍﻧﺎ ﻗﻠﺖ ﻟﻴﻬﺎ ﻣﺎﺗﻘﻮﻟﻲ ﻛﺪﻱ ﻳﺎ ﺍﻣﻲ .. ﺩﻩ ﺍﻣﺘﺤﺎﻥ ﻣﻦ ﺭﺑﻨﺎ ﻋﺸﺎﻥ ﻳﺸﻮﻓﻨﺎ ﺑﻨﺼﺒﺮ ﻭﻻﻻ .. ﻭﺍﻧﺎ ﺻﺎﺑﺮ

..ﻣﺎ ﺑﻘﻮﻝ ﺍﻻ ﻣﺎﺭﻳﻀﻲ ﺍﻟﻠﻪ ﺍﻟﺤﻤﺪ ﻟﻠﻪ ﻋﻠﻰ ﻛﻞ ﺣﺎﻝ ..

ﺍﻟﻮﺍﻟﺪﺓ ﻗﺎﻟﺖ ﻟﻲ ﺍﺑﻮﻙ ﺿﺮﺏ ﻗﺎﻝ ﺗﺠﻲ .. ﺍﺭﺟﻊ ﻟﻴﻬﻮ ﺑﺎﻟﺘﻔﻮﻥ ﺷﻮﻓﻮ ﻣﺎﻟﻮ ؟ ﺍﻧﺎ ﻗﻠﺒﻲ ﻣﻮ ﻣﻄﻤﻦ ..

ﻗﻤﺖ ﺳﺮﻳﻊ ﺿﺮﺑﺖ ﻟﻲ ﺍﺑﻮﻱ .. ﺍﻟﻜﻼﻡ ﺩﻩ ﺑﻴﻦ ﺍﻟﻤﻐﺮﺏ ﻭﺍﻟﻌﺸﺎﺀ .. ﺍﺑﻮﻱ ﻗﺎﻝ ﻟﻲ ﺗﻌﺎﻝ ﻳﺎﺷﻤﺲ ﺍﻟﺪﻳﻦ

ﺍﺧﻮﻙ ﺩﻩ ﺑﻘﻰ ﻓﻲ ﺍﻟﺮﻣﻖ ﺍﻻﺧﻴﺮ .. ﺑﺲ ﻣﺎ ﺗﻘﻮﻝ ﻻﻣﻚ ﺍﻱ ﺣﺎﺟﺔ .. ﺗﻌﺎﻝ ﺑﺲ ﺍﻧﺖ ﻭﺟﻴﺐ ﻣﻌﺎﻙ ﺍﻟﻄﻴﺐ

..

ﻗﻠﺘﺎ ﻟﻴﻬﻮ ﺍﻟﻄﻴﺐ ﻣﺎﻓﻲ.. ﺍﻧﺘﻈﺮﻭ ﻳﺠﻲ .. ﻭﻻ ﺍﺟﻲ ﺑﺮﺍﻱ ؟ .. ﻗﺎﻝ ﻟﻲ ﺗﻌﺎﻝ ﺑﺲ ﻭﺻﻲ ﻟﻴﻬﻮ ﺳﺎﺭﺓ ﻟﻤﻦ

ﻳﺠﻲ ﻳﺠﻴﻨﺎ ﺳﺮﻳﻊ .. ﺍﺑﻮﻱ ﻛﺎﻥ ﺻﻮﺗﻮ ﺧﺎﻳﻒ ﻭﻣﻨﺰﻋﺞ ..

ﺍﻧﺎ ﻗﻠﺘﺎ ﻟﻲ ﺍﻣﻲ ﺍﺑﻮﻱ ﺩﻩ ﺷﻜﻠﻮ ﺩﺍﻳﺮ ﻳﺠﻲ ﻫﻨﺎ .. ﻳﺎ ﺍﻣﻲ .. ﺍﻧﺎ ﻻﺯﻡ ﺍﻣﺸﻲ ﺍﺳﺪ ﻟﻴﻬﻮ ﻫﻨﺎﻙ ..

ﺍﻟﻈﺎﻫﺮ ﺻﺎﻟﺢ ﺣﺎﻟﺘﻮ ﺍﺗﺤﺴﻨﺖ .. ﺧﻠﻲ ﺍﻟﻄﻴﺐ ﻟﻤﻦ ﻳﺠﻲ ﻳﻠﺤﻘﻨﻲ ﻫﻨﺎﻙ ﻋﺸﺎﻥ ﻳﺮﻓﻘﻨﻲ ..

ﻭﺍﻧﺘﻲ ﻳﺎﺳﺎﺭﺓ ﻋﻠﻴﻚ ﺍﻟﻠﻪ ﻓﻲ ﺑﺎﻗﻲ ﺍﻟﻠﻴﻞ ﺩﻩ ﺣﺎﻭﻟﻲ ﺍﻣﺸﻲ ﻟﻲ ﻧﺎﺩﻳﺔ ﻭﺍﺣﻜﻲ ﻟﻴﻬﺎ ﻛﻞ ﺣﺎﺟﺔ .. ﺳﺎﺭﺓ

ﺯﻭﻟﺔ ﺍﺻﻴﻠﺔ ﻭﺑﺘﻤﺴﻚ ﺍﻻﺳﺮﺍﺭ .. ﻭﻛﺖ ﺗﻌﺮﻑ ﺍﻟﺤﺼﻞ ﻋﻠﻴﻚ ﺍﻧﺘﻲ .. ﺑﺘﺨﻔﻔﻲ ﻋﻠﻴﻬﺎ ﺍﺣﺴﺎﺱ ﺍﻟﺤﺮﻗﺔ

ﺍﻟﺤﺎﺳﺎﻫﻮ .. ﻭﻟﻤﺎ ﺗﻌﺮﻑ ﺍﻧﻲ ﺍﻧﺎ ﻋﺎﺭﻑ ﻛﻞ ﺣﺎﺟﺔ ﺍﻟﺨﻮﻑ ﺍﻟﺠﻮﺍﻫﺎ ﺑﺮﻭﺡ .. ﻭﻣﺎﺗﺠﻲ ﻣﻨﻬﺎ ﺍﻻ ﺗﻘﻨﻌﻴﻬﺎ

ﻟﻲ .. ﻭﺍﻟﻠﻪ ﻳﻜﻮﻥ ﺟﻤﻴﻞ ﻣﺎ ﺃﻧﺴﺎﻫﻮ ﻟﻴﻚ ﻃﻮﻝ ﻋﻤﺮﻱ .. ﺍﻧﺎ ﻟﻮ ﻧﺎﺩﻳﺔ ﺍﺩﺗﻨﻲ ﻓﺮﺻﺔ ﺍﺗﻜﻠﻢ ﻣﻌﺎﻫﺎ ..

ﺑﻌﺮﻑ ﺍﻗﻨﻌﻬﺎ . ﻟﻜﻦ ﻗﻔﻠﺖ ﻟﻲ ﻛﻞ ﺍﻟﺪﺭﻭﺏ .. ﻭﻃﻠﻌﺖ ﻋﻠﻰ ﺍﻟﻤﺴﺘﺸﻔﻰ.. ﻭﻟﺴﺎﻥ ﺣﺎﻟﻲ ﺟﻮﺍﻱ

ﻳﻘﻮﻝ .....

ﺭﻭﺣﻲ ﺍﻟﺒﺎﻛﻴﻪ ﻓﻮﻗﺎ ﻭﻣﻦ ﺟﻔﺎﻫﺎ ﺟﺮﻳﺤﺔ .

ﻣﺎﻭﺟﺪﺕ ﺩﻗﺎﻳﻖ ﻓﻲ ﻟﻘــﺎﻫﺎ ﻣـــــﺮﻳﺤﻪ.

ﺯﻭﻟﺘﻲ ﺍﻟﻐﺮﺭﺩﺕ ﻟﻴﻬﺎ ﺍﻟﻘﻮﺍﻓﻲ ﺻﺮﻳﺤﻪ .

ﻓﻲ ﺍﻟﻠﻮﻥ ﻭﺍﻟﺪﻭﺍﺧﻞ ﺯﻱ ﻓﺘﻴﻞ ﺍﻟﺮﻳﺤﻪ .

.

ﻗﻠﺒﻚ ﻣﻦ ﻛﻮﺍﺭﻳﻚ ﺍﺷﺘﻴﺎﻗﻲ ﻣﺼـــﻔّﺢ.

ﺃﺻﺒﻊ ﺭﻳﺪﻱ . ﻣﻦ ﺩﻕ ﺑﺎﺑﻮ ﻛـﻠّﺄ ﻭﻧﻔّﺢ.

ﻣﻜﺘﻮﺏ ﺷﻮﻗﻲ ﻟﻴﻚ . ﺍﻟﺒﻲ ﻭﺣﻴﺤﻲ ﻣﻠﻔّﺢ .

ﺍﻣـﻮﺍﺝ ﺍﻏـــﺘﺮﺍﺭﻙ ﺩﻓﻔــﺮﻧﻮ ﻭﻃﻔّﺢ ..

.

ﻭﺻﻠﺖ ﺍﻟﻤﺴﺘﺸﻔﻰ ﻭﺍﻧﺎ ﻣﺎﺣﺎﺳﻲ ﺑﺎﻟﺸﺎﺭﻉ ﻭﺍﻟﻠﻪ .. ﻣﺎﻋﺎﺭﻑ ﺍﻫﻢ ﺑﺸﻨﻮ ﻭﻻﺷﻨﻮ ؟ ﺑﻲ ﻣﻮﺿﻮﻉ ﻧﺎﺩﻳﺔ

ﺍﻟﺒﻘﺖ ﻓﻮﻕ ﻗﻴﻒ ﺍﻟﻀﻴﺎﻉ ﻣﻦ ﺣﻴﺎﺗﻲ ﺍﻟﻰ ﺍﻻﺑﺪ .. ﻭﻻ ﺍﻫﻢ ﺑﻲ ﺻﺎﻟﺢ ﺍﻟﺒﻘﻰ ﻋﻠﻰ ﺷﻔﻴﺮ ﺍﻟﻤﻮﺕ ..

ﻳﺎﺭﺏ ﻟﻄﻔﻚ ..

ﻟﻘﻴﺖ ﺍﺑﻮﻱ ﺧﺎﺗﻲ ﻟﻲ ﻭﺭﻗﺔ ﻣﻤﻀﻴﺔ ﻣﻦ ﻃﺒﻴﺐ ﺑﺎﻻﺫﻥ ﺑﺎﻟﺪﺧﻮﻝ ﻻﻧﻮ ﺍﻟﻮﺍﻃﺔ ﻟﻴﻠﺖ ﺷﺪﻳﺪ ..

ﺩﺧﻠﺖ ﻟﻘﻴﺖ ﺍﺑﻮﻱ ﻗﺎﻋﺪ ﺑﻲ ﻗﺪﺍﻡ ﺍﻟﻌﻨﺎﻳﺔ ﻣﺘﻤﺤﻦ .. ﻗﻠﺖ ﻟﻴﻬﻮ ﻓﻲ ﺷﻨﻮ ﻳﺎ ﺍﺑﻮﻱ ﺍﻟﺤﺎﺻﻞ ﺷﻨﻮ؟ ..

ﺻﺎﻟﺢ ﺣﺎﻟﺘﻮ ﻛﻴﻒ؟ ..

ﻗﺎﻝ ﻟﻲ .. ﻗﺒﻴﻞ ﻭﻛﺖ ﺿﺮﺑﺖ ﻟﻴﻜﻢ ﺩﻩ ﻛﺎﻥ ﺗﻌﺐ ﺷﺪﻳﺪ ..

ﻭﺣﺼﻠﺖ ﻟﻴﻬﻮ ﻣﻀﺎﻋﻔﺎﺕ .. ﻭﺿﺮﺑﺎﺕ ﺍﻟﻘﻠﺐ ﻭﺻﻠﺖ 200 ﺿﺮﺑﺔ ﻓﻲ ﺍﻟﺪﻗﻴﻘﺔ .. ﻭﺍﻟﺠﺴﻢ ﺭﺍﻓﺾ

ﺍﻻﺳﺘﺠﺎﺑﺔ ﻟﻲ ﺍﻱ ﻋﻼﺝ .. ﻭﻓﻲ ﻣﺸﻜﻠﺔ ﻓﻲ ﺍﻟﺪﻡ ﻣﺎﻋﺮﻓﻮﻫﺎ ﺷﻨﻮ؟ ﻣﺮﺍﺕ ﻳﻘﻮﻟﻮ ﺟﻠﻄﺎﺕ ﻣﺘﻔﺮﻗﺔ

.. ﻣﺮﺍﺕ ﻳﻘﻮﻟﻮ ﺷﻨﻮ ﻣﺎﻋﺎﺭﻑ .. ﺍﻟﺪﻛﺘﻮﺭ ﻗﺎﻝ ﺍﻟﺠﻠﻄﺎﺕ ﺩﻱ ﻣﻦ ﺍﺛﺮ ﺍﻟﻤﺨﺪﺭ . ﻟﻜﻦ ﻫﺴﻲ ﺍﻟﺪﻛﺘﻮﺭ ﺟﺎ

.. ﻗﺎﻝ ﻟﻲ ﻫﺪﺃ ﺷﻮﻳﺔ .. ﻭﻗﺎﻝ ﺑﺘﻜﻮﻥ ﺩﻱ ﺟﻠﻄﺔ ﺳﺪﺕ ﻣﻨﻔﺬ ﺍﺳﺎﺳﻲ ﻓﻲ ﻣﺮﻛﺰ ﺍﻟﻤﺦ .. ﻟﻜﻦ ﻣﺮﺕ

..ﻭﻏﺎﻳﺘﻮ ﺍﻟﺒﻘﻮﻟﻮﻫﻮ ﻛﺘﻴﺮ.. ﻭﺍﻧﺎ ﻣﺎ ﻣﻄﻤﻦ .. ﻗﻌﺪﻧﺎ ﺍﻧﺎ ﻭﺍﺑﻮﻱ . ﻣﺮﺓ ﻧﺘﻮﻧﺲ ﻭﻣﺮﺓ ﻧﺪﻋﻲ .. ﺍﻟﻠﻪ

ﻳﻠﻌﻦ ﺍﻟﺒﻨﻘﻮ ﻭﻳﻠﻌﻦ ﻧﺎﺳﻮ .. ﺍﻧﺎ ﻏﺎﻳﺘﻮ ﺗﺎﻧﻲ ﻛﺎﻥ ﺟﺎﺑﻮ ﻟﻲ ﺳﻴﺮﺓ ﺍﻟﻤﺼﻴﺒﺔ ﺩﻩ ﺳﺎﻱ .. ﺑﺴﺘﻔﺮﻍ ﺍﻭ

ﺑﺘﺠﻴﻨﻲ ﺣﺎﻟﺔ ﻫﺴﺘﻴﺮﻳﺔ ..

ﺍﻫﺎ ﺳﺎﻫﺮﻧﺎ .. ﻭﺍﻟﻠﻪ ﺍﻟﻴﻮﻡ ﺩﺍﻙ .. ﻛﻞ ﺳﺎﻋﺔ ﻳﻤﺸﻲ ﻭﺍﺣﺪ ﻓﻴﻨﺎ ﻳﻘﻴﻒ ﺟﻢ ﺑﺎﺏ ﺍﻟﻌﻨﺎﻳﺔ .. ﻋﺸﺎﻥ ﻳﺴﺄﻝ .

ﻗﺎﻟﻮ ﻋﺎﺩﻱ ﻭﻟﺴﻪ ﻓﻲ ﻏﻴﺒﻮﺑﺔ ﻛﺎﻣﻠﺔ . ﻭﺍﻟﻨﺰﻳﻒ ﻭﻗﻒ .. ﺑﺲ ﺍﻟﻤﺨﺎﻃﺮ ﻛﺘﻴﺮﺓ .. ﻓﻲ ﺗﻬﺸﻢ ﻓﻲ ﻓﻘﺮﺍﺕ

ﻣﻦ ﺍﻟﺴﻠﺴﻠﺔ ﺍﻟﻔﻘﺮﻳﺔ . ﻭﺃﺛﺮﺕ ﻋﻠﻰ ﺍﻟﻌﺼﺐ ﺍﻟﻤﺮﻛﺰﻱ . ﻏﺎﻳﺘﻮ ﺟﻨﺲ ﺣﺎﺟﺎﺕ ﺍﻧﺎ ﺍﻭﻝ ﻣﺮﺓ ﺍﺳﻤﻊ ﺑﻴﻬﺎ

.. ﻭﻃﺒﻌﺎ ﻛﻞ ﻣﺮﺓ ﺍﻟﺪﻛﺘﻮﺭ ﺑﻘﻮﻝ ﺩﻋﻮﺍﺗﻜﻢ ﻳﺎﺟﻤﺎﻋﺔ.. ﺑﺲ ﻧﻨﺘﻈﺮ ﺭﺣﻤﺔ ﺭﺑﻨﺎ .. ﻭﺷﻜﻠﻮ ﻗﻨﻌﺎﻥ ﻣﻦ ﺻﺎﻟﺢ

ﻛﻠﻮ ﻛﻠﻮ ..

ﻏﺎﻳﺘﻮ ﻓﻲ ﺍﺧﺮ ﺍﻟﻠﻴﻞ ﻛﺪﻱ .. ﺍﻧﺎ ﺿﺮﺑﺖ ﻟﻲ ﺳﺎﺭﺓ .. ﺩﺍﻳﺮ ﺍﺷﻮﻓﺎ ﻋﻤﻠﺖ ﺷﻨﻮ . ﺟﺮﺳﻬﺎ ﺷﻐﺎﻝ ﻭﻫﻲ

ﻣﺎﺑﺘﺮﺩ .. ﺿﺮﺑﺖ ﻟﻠﻄﻴﺐ .. ﻗﻠﺘﻠﻴﻬﻮ ﺍﻧﺖ ﻭﻳﻦ ﻳﺎﺯﻭﻝ ؟

ﻗﺎﻝ ﻟﻲ ﺍﻧﺎ ﻓﻲ ﺍﻟﺒﻴﺖ ﻋﻴﺎﻥ ﺷﻮﻳﺔ .. ﻋﻨﺪﻱ ﺣﻤﻰ ﻭﻭﺻﺪﺍﻉ ﻏﺮﻳﺐ ﻣﺎﻗﺪﺭﺕ ﺍﺟﻲ . ﺻﺎﻟﺢ ﻛﻴﻒ؟

ﻗﻠﺖ ﻟﻴﻬﻮ ﻛﻮﻳﺲ ﺯﻱ ﻣﺎﻫﻮ ﻣﺎﻓﻲ ﺟﺪﻳﺪ. ﺳﺄﻟﺘﻮ ﻗﻠﺘﻠﻴﻬﻮ . ﺳﺎﺭﺓ ﺩﻱ ﻭﻳﻦ ﺍﻧﺎ ﺑﻀﺮﺏ ﻟﻴﻬﺎ ﻣﺎﺑﺘﺮﺩ ..

ﻗﺎﻝ ﻟﻲ .. ﻗﺎﻝ ﻟﻲ ﻗﺒﻴﻞ ﻧﺎﻣﺖ .. ﺩﺧﻠﻨﺎ ﺍﻧﺎ ﻭﻫﻦ ﺳﻮﺓ .. ﺍﻇﻨﻬﻦ ﻣﺸﻦ ﻟﻲ ﻧﺎﺱ ﻧﺎﺩﻳﺔ ﻣﺸﺖ ﻣﻌﺎﻫﺎ

ﺳﻨﺎﺀ ..

ﻗﻠﺒﻲ ﻗﺎﻝ ﻭﺣﺤﺢ .. ﻭﻣﺎﻗﺪﺭﺕ ﺍﺳﺄﻟﻮ .. ﻻﻧﻮ ﺍﻟﻤﻮﺿﻮﻉ ﺩﻩ ﻫﻮ ﻣﺎ ﺩﺍﺧﻞ ﻓﻴﻬﻮ .. ﻭﻻﻋﺎﺭﻑ ﺍﺑﻌﺎﺩﻩ ..

ﻭﺍﻧﺎ ﺑﻘﻴﺖ ﻣﻘﻠﻖ .. ﻳﺎﺭﺑﻲ ﺳﺎﺭﺓ ﻗﺎﻟﺖ ﻟﻲ ﻧﺎﺩﻳﺔ ﺷﻨﻮ.. ؟ ﻳﺎﺭﺑﻲ ﺍﻗﺘﻨﻌﺖ ﻟﻴﻬﺎ ؟ ﻟﻮ ﺍﻗﺘﻨﻌﺖ ﻫﻲ ﺍﺑﻮﻫﺎ

ﻣﻮﺿﻮﻋﻮ ﻫﻴﻦ.. ﺍﻧﺎ ﺑﻘﺪﺭ ﻋﻠﻴﻪ .. ﻻﻧﻲ ﺍﻧﺎ ﺍﻭﻟﻰ .. ﻭﺍﻟﻠﻪ ﺍﻧﺎ ﻓﻲ ﺍﻟﻠﺤﻈﺔ ﺩﻱ ﻣﺰﻋﺰﻉ ﺯﻋﺰﻋﺔ ﻋﺠﻴﺒﺔ

ﺧﻼﺹ .. ﻣﺎﻓﻲ ﺯﻭﻝ ﺑﻘﺪﺭ ﻳﺤﺲ ﺑﻲ ﺍﻧﺎ ﻋﺎﻣﻞ ﻛﻴﻒ .. ﺍﻻ ﺃﻧﺎ ﺑﺲ ..

ﺍﻟﺼﺒﺎﺡ ﺍﺻﺒﺢ ﻭﺍﻧﺎ ﻭﺍﻟﻠﻪ ﻋﻴﻨﻲ ﻣﺎﻻﻗﺖ ﻟﻠﺼﺒﺎﺡ .. ﻣﺎﻗﺪﺭﺕ ﺍﻧﻮﻡ ﻭﺍﻋﺼﺎﺑﻲ ﻣﻨﻬﺎﺭﺓ .. ﺯﻱ ﺍﻟﺰﻭﻝ ﺍﻟﺼﺎﻳﻢ

ﻭﻣﻤﺘﺤﻦ . ﺣﺎﺳﻲ ﺑﺎﻧﻲ ﻋﻴﺎﻥ ﻋﺪﻳﻞ .. ﻣﻦ ﺍﻟﺼﺒﺎﺡ ﻗﻤﺖ ﺿﺮﺑﺖ ﻟﻲ ﺳﺎﺭﺓ ﻗﺒﻞ ﺍﻟﺸﺮﻗﺔ ..

ﻗﻠﺖ ﻟﻴﻬﺎ ﻳﺎﺑﺖ ؟.. ﻛﻴﻒ ﻳﻌﻨﻲ ﺗﻨﻮﻣﻲ ﻗﺒﻞ ﻣﺎﺗﻘﻮﻟﻲ ﻟﻲ ﺍﻟﺤﺎﺻﻞ ..

ﻗﺎﻟﺖ ﻟﻲ ﺍﻧﺖ ﺑﺘﺠﻲ ﻣﺘﻴﻦ؟ .. ﻗﻠﺖ ﻟﻴﻬﺎ ﻣﺎﻋﺎﺭﻑ ﺍﻻ ﺍﺷﻮﻑ ﺍﺑﻮﻱ .. ﻛﺪﻱ ﺧﻠﻴﻬﺎ ﺍﻟﺠﻴﺔ .. ﻧﺎﺩﻳﺔ ﻗﺎﻟﺖ

ﻟﻴﻚ ﺷﻨﻮ؟ ﺳﺮﻳﻊ ﻗﻮﻟﻲ ..

ﻗﺎﻟﺖ ﻟﻲ ﻻﻻ ﻣﺎﻳﻨﻔﻊ ﺍﻗﻮﻝ ﻟﻴﻚ ﻛﺪﺍ .. ﻻﻧﻮ ﺍﻟﻜﻼﻡ ﻛﺘﻴﺮ ﻭﻓﻴﻬﻮ ﺗﻔﺎﺻﻴﻞ

ﺍﻻ ﺗﺠﻲ .. ﻗﻠﺖ ﻟﻴﻬﺎ ﺑﺲ ﻫﺴﻲ ﺍﺩﻳﻨﻲ ﺍﻟﻤﺨﺘﺼﺮ ؟ ﺍﻗﺘﻨﻌﺖ ﻭﻻ ﻣﺎ ﺍﻗﺘﻨﻌﺖ ؟؟

ﻗﺎﻟﺖ ﻟﻲ ﻣﺎﺑﻘﻮﻝ ﻟﻴﻚ ﻭﺍﻟﻠﻪ ﺍﻱ ﺣﺎﺟﺔ .. ﺍﻻ ﺗﺠﻲ .. ﻗﻠﺖ ﻟﻴﻬﺎ ﻳﺎﺑﺖ ﻭﺍﻟﻠﻪ ﺍﺣﺴﻦ ﻟﻴﻚ ﺗﺘﻜﻠﻤﻲ .. ﻛﻠﻮ

ﻛﻠﻮ ﺍﺑﺖ ﺗﻘﻮﻝ ﻟﻲ ..

ﻗﻠﺖ ﻟﻴﻬﺎ ﻭﺍﻟﻠﻪ ﺍﺟﻲ ﻫﻨﺎﻙ .. ﺍﻭﻝ ﺣﺎﺟﺔ ﺍﻛﻔﺘﻚ ﻓﻮﻕ ﺧﺸﻤﻚ ﺩﻩ .. ﺍﻭﺭﻣﻮ ﻟﻴﻚ .. ﻗﻔﻠﺖ ﺍﻟﺨﻂ ﻭﺍﺑﺖ ﺗﺮﺩ

ﻟﻲ .. ﻟﻜﻦ ﺻﻮﺗﻬﺎ ﻭﺍﻟﻠﻪ ﺍﺑﺪﺍ ﻣﺎ ﻣﻄﻤﻦ ..

ﺍﻧﺎ ﺿﺮﺑﺖ ﻟﻲ ﺍﻟﻄﻴﺐ .. ﻗﻮﻟﺖ ﻟﻴﻬﻮ ﺗﻌﺎﻝ ﺳﺮﻳﻊ ﺍﻧﺎ ﺟﺎﻱ .. ﻗﺎﻝ ﺣﺎﺿﺮ ﻧﺺ ﺳﺎﻋﺔ ﻭﺍﻧﺎ ﻣﻌﺎﻙ

.. ﻭﺍﻟﻮﺍﻟﺪﺓ ﺟﺎﻳﺔ ﻣﻌﺎﻱ ﺟﺎﻳﺒﺔ ﺣﺎﺟﺎﺕ ﻻﺑﻮﻱ ..

ﺍﻫﺎ ﺍﺑﻮﻱ ﺟﺎﻧﻲ ﻣﺎﺭﻕ .. ﻗﺎﻝ ﻟﻲ ﻗﺎﻟﻮ ﺻﺎﻟﺢ ﺑﺪﺍ ﻳﺴﺘﺠﻴﺐ ﻟﻠﻌﻼﺝ .. ﻣﻮﺵ ﺣﻜﺎﻳﺔ ﻏﺮﻳﺒﺔ .. ؟؟

ﻗﻠﺖ ﻟﻴﻬﻮ .. ﻗﻮﻝ ﺍﻟﺤﻤﺪ ﻟﻠﻪ ﻳﺎ ﺍﺑﻮﻱ ﺍﻥ ﺷﺎﺀ ﺍﻟﻠﻪ ﻣﺎﻓﻲ ﺷﻲ ﺑﻌﻴﺪ ﻋﻠﻰ ﺍﻟﻠﻪ .. ﺍﻧﺎ ﻳﺎ ﺍﺑﻮﻱ ﻣﺎﺷﻲ

ﺍﻟﺒﻴﺖ ..ﺣﺎﺳﻲ ﺍﻧﻲ ﻋﻴﺎﻥ ﺍﻟﻄﻴﺐ ﻭﺍﻣﻲ ﺟﺎﻳﻴﻦ ﻋﻠﻴﻨﺎ ..

ﺍﺑﻮﻱ ﻗﺎﻝ ﻟﻲ ﺧﻼﺹ ﺍﻣﺸﻲ .. ﺍﻧﺎ ﻟﻮ ﺍﺣﺘﺠﺖ ﻟﻴﻚ ﺗﺎﻧﻲ ﺑﻀﺮﺏ ﻟﻴﻚ ..

ﻭﻣﺸﻴﺖ ﻋﻠﻰ ﺍﻟﺸﺎﺭﻉ .. ﺟﺎﺭﻱ ﻭﺷﺎﻳﻒ ﺍﻟﺒﻴﺖ ﺩﻩ ﺯﻱ ﺍﻟﻔﻲ ﻛﺎﺩﻭﻗﻠﻲ ..

يتبع....