مجلس الرجال.. *
اخوان ناصر من جهه جالسين ومعصبين..!
ومن جهه ناصر لحاله.. !
وبصدر المجلس بو مشعل وبو علي وبعض الاعيان..
ناصر وهو يكح/انتم ماتقدرون تجبروني على شي انا مابيه.
منصور واخوه/مب كيفك.. فشلتنا ونزلت روسنا الارض بزواج بنتك من هالخايب
ناصر بضيقه/الخايب انتم وعيالكم..والا عادل يسواكم كلكم
منصور باحتقار/معاد الا هي تقارنا بقليل الشرف
بو مشعل/يا جماعه انتم اهدأوا شوي وخلونا نتفق
ناصر/وش تبون مني..
بوعلي/لازم تخلي زوج بنتك يطلقها بأسرع وقت
ناصر/كذا بهالسهوله!!.البنت أنا زوجتها وراضي بزواجها
منصور/مزوجها واحد قليل شرف ومفتخر!!!
مشعل دخل بهاللحظات وكان لابس مجنده وفيه مسدس لأنه عارف ربعه لازم كل مشكله يهددون بسلاح/ايه يحق له يفتخر..
الكل ألتفت عليه/.!!!
بوعلي/افااا وانا ابوك
مشعل بهدوء/عادل لو أنه خطب وحده من خواتي زوجته بدون تردد..هاللي تتهمونه بقلّة الشرف حافظ لكتاب الله وامام جامع.. مع انه معلم بمدرسه!!..هذا اللي تتهمونه بقلة الشرف،ماعمره باع خمر وشرب خمر ياعمي
بوعلي نزل راسه متفشل/..
مشعل كمل/ماعمره تحايل ع المساكين واخذ جنسياتهم وتاجر بها في سوق الاسهم يا بو مشبب!!
بو مشبب خاف ينفضح/..
مشعل/وما عمره اكل اموال دوله واخذ اراضي منح المواطنين بأبخس ثمن يا بو منصور بن جمعان
منصور ماعلق/...
بو مشعل/يا مشعل انت وش تخربط.. حنا نتكلم عن موضوع البنت
مشعل/حبيت اوضح نقطة الشرف اللي صايره هرجة المجالس بهالديره.. عادل ما راح يطلق زوجته..
ناصر ابتسم لمشعل بإمتنان/رايتك بيضاء يا ولدي ماقصرت
منصور واخوه/بيننا المحاكم اذا هذا قرار الشيخ
رن جوال عزيز.. وطلع يكلم... لحظات ورجع ووشوش بأذن مشعل وكأنه ياخذ رأيه... !!!!
مشعل التفت عليه وهز راسه بالموافقه/روح بسرعه.
/
/
/
/
على عجله من أمرها.. نزلت لوجين ومعها زينه.. وكل وحده لابسه عبايتها وجاهزه..
لوجين وهي تنزل من درجات السلم فتحت جوالها وترسل مسج سريع لـ "مشعل" وتلتفت لزينه/زينه بسرعه تصرفي وخلي عزيز يطلع لنا
زينه/أرسلت الشغاله تناديه وتقول انه وافق
لوجين اتجهت لأم هاجر/خالتي قومي نبي نروح معك لبنتك بنساعدها
ام هاجر وهي تبكي/وش بتسوين يا بنتي اعمامها مانعينها من المستشفى
زينه/لا تخافين يا خاله.. لوجين طالبة طب.. وعندها خبره.. راح تشوف بنتك وبتساعدها
لوجين/خالتي قومي يلا الوقت مو من صالحنا..
ام هاجر تجدد أملها وقامت معهم/الله يوفقك يا بنتي
ام مشعل/اللحين بتروحين كذا بدون راي زوجك
زينه/هذي فزعه،و لو عرف مشعل انها حاله انسانيه ما راح يزعل يمه انتي عارفته
لوجين بدون تعطيها وجه/يلا خلونا نلحق عليها
طلعوا وهم مستعجلين..*
ام مشعل جلست وحطت رجل على رجل،وترطن بمكر/مسويه تستقوي ع الرجال يا لوجيين هاااه! ،مصيرك تنداسين هنا يا راعية الفزعات
/
/
/
/
بالسياره..
عزيز مبسووط انه بيخدم زينه.. خصوصاً انها اول مرّه تطلبه بالأسم!!/يا ترى وش يبون؟!!
اقبلوا البنات وواضح انهم مستعجلات ومعهم ام هاجر، وركبوا..
عزيز عرف ان فيه مشكله/بنات وش فيه صاير شي؟
زينه وهي مستحيه منه/معليه يا عزيز بنكلف عليك.. بس نبيك انت توصلنا لأن السايق ما راح يفيدنا..
عزيز/ماعليكم ..بس وش تبون..
لوجين/رايحين ننقذ وحده تعبانه ..ونبيك توصلنا لبيت الـ..وين البيت يا خاله
ام هاجر بصوت باكي/بيت منصور جمعان
لوجين/ايوه لبيتهم.. وخليك واقف برا لأن نبي اغراض من الصيدليه ..ويمكن نحتاج المستوصف.. لذلك نبيك انت تكون معنا الله يجزاك خير
عزيز حرك السياره بسرعه واتجه للبيت المذكور/ابشروا ..انتي اختي وتامرين علي..
/
/
/
مشعل تذكر انه جته نغمة رساله وفتحها كانت من لوجين وقرأها [أنا وزينه طالعين مع أم هاجر.. بنتها تعبانه ومحتاجه مساعده مضطره اطلع.. اعذرني]
ما رد مشعل وهو راضي عنها..ومقدر اللي سوته.. واصلاً عنده خبر بمشوارهم لأنه هو اللي سمح لعزيز يوديهم لإنشغاله عند الرجال. سكر الجوال والتفت للرجال يكمل اجتماعه معهم..
/
/
/
/
في بيت ال جمعان.. *
عند الباب.. واقفات يرنون الجرس و ينتظرون احد يفتح..
لوجين تناظر ساعتها بتوتر/خالتي انتي متأكده انها هنا
ام هاجر/ايه يا بنتي
لحظات وانفتح الباب وبنت واقفه تخزهم لأنها شافت ام هاجر/نعععم..
ام هاجر/يا جميله تكفين خليني اشوف بنتي
لوجين التفتت على ام هاجر وهي مستغربه/انتي بتترجين هذي علشان تشوفين بنتك.!!
جميله من فوق خشمها/وش فيني ماني عاجبتك! من هذول يا ام هاجر
لوجين وهي تخزها وودها تخنقها لانها معطلتهم/انا لوجين ال عاصم.. وهذي زينه اخت زوجي ممكن تدخلينا والا نوريك الهويات بعد
جميله حقدت عليها من عرفت انها زوجة مشعل/اننتتتي زوجة مشعل!!
لوجين بتملل/يالله بتذبحني هالكريهه
زينه طلعت من طورها ودفتها ودخلت/لوجين تعاالي
لوجين دخلت ولحقتها ام هاجر ودلتهم ع الغرفه بسرعه
زينه ولوجين تجاهلوا النسوان اللي داخل واتجهوا ركض لغرفة هاجر..
جميله لحقتهم وامها واخواتها..!
ام هاجر صرخت اول ما شافت بنتها طايحه ع الأرض!!
زينه خااافت وماقدرت تتحمل/مااتت يا لوجين؟
لوجين تعلمت البرود في التعامل مع هالحالات وحاولت تنسى التوتر،اتجهت للبنت اللي طايحه وحطت اصبع على وريد رقبتها و مسكت وريد معصمها تقيس نبضها بسكات،وكأن لون وجهها تغير، تركت يدها وفتحت فمها تشوفه وبعدها فتحت عيونها وفحصتها والتفتت على زينه/ابي عصير برتقال بسرعه او اي عصير بس يكون حالي او بيبسي بسرعه
جميله بدون رحمه/بالله.. هذا انتي الدكتوره اللي يقولون.. مالومهم يوم يمنعونك من البعثه،تشوفينها مغميه عليها وتطلبين عصير!!
لوجين بلعة ريقها من الخوف ومطنشه كلام جميله/تكفوون الله يخليكم اذا ما لحقتوا عليها بتموووت حرام عليكم،عندها انخفاض شديد بالسكر لازم ننعشها قبل نوديها المستوصف.
ام هاجر جلست تبكي وزينه تواسيها..
ام جميله قلبها عورها بس مجبوره تسكت، وناظرت لولدها اللي متعاطف معهم وأومت براسها بالإيجاب وهمست له/روح حبيبي
الولد الصغير بفطرته السليمه خاف وراح يركض بسرعه وجاب عصيرات من الثلاجه وعطاها للوجين..
لوجين اخذتها منه/مشكور حبيبي
والتفتت على هاجر وبدأت ترفع راسها وتحط بفمها عصير وتبلل شفايفها وع لسانها/هاجرر قومي.. هااجر
هاجر بدأت تفتح عيونها بكسل شديد،بس ماتقدر تشيل نفسها.. وطاح راسها بحضن لوجين من شدة التعب
لوجين التفتت على زينه/عندها انخفاض سكر،روحي لعزيز يقرب السياره من الباب بسرعه،وخليه يدخل الحوش علشان يساعدنا. بشيلها ماراح نقدر لحالنا
زينه فزت بسرعه وراحت...
تساعدت لوجين وام هاجر واخذوها لبرا..
ام جميله بدمعة قهر/لوجين وانا امك ترى الرجال مهددينا ما نسعفها وانتي ادررى بهم ما يرحمون
لوجين ما ردت عليها وكملت طريقها /...
/
/
/
قصر الشيخ*
طلعوا اخوان ناصر ..وناصر اخذه مشعل لشقته اللي استاجرها مؤقت بسبب المشكله.. علشان يرتاح لأنه مريض ومافيه حيل، وطمنه ع الوضع..
مجلس الرجال+
بوعلي/عجبك اللي سواه ولدك!!
بو مشعل ساكت ومتردد وهم يحرضونه على وحيده اللي ماطلع من الدنيا بولد غيره رغم زواجه بثنتين غير ام مشعل لكن قد فات الآوان وما عاد فيه أمل يخلف غير وحده جابت بنت وطلقها بعدما ماتت البنت بعد اسبوع من ولادتها../..
بو مشبب/ياخووفي ياخذ الشيخه من بعدك وتروح سلومنا بمهب الريح
بو مشعل وهو يفكر بكلام مشعل بواقعيه/ما سمعتوا الرجال يقول متدين وملتزم وداعيه.. اظن عيب علينا نسب داعيه مشهود له بالتقوى،وامام جامع
بوعلي مب مهتم/افاااا عليك بس.. هالشي مايهم اهم شي الحسب والنسب ومافي توافق نسب بينهم
بو مشبب/عيال مشبب اتجهوا للمحكمه وهناك بيقررون لهم هذا اذا ما وافق الرجال يطلق
بو مشعل سكت وهو متردد وكلام ولده يقنعه اكثر منهم..
/
/
/
/
المستوصف*
عند قسم الطوارئ..
عزيز واقف عند الباب بعيد عنهم وام هاجر واقفه وزينه تواسيها قدام طوارئ النساء..
اقبل مشعل وشاف عزيز عند الباب/بشر يا عزيز
عزيز/وش ابشر بس. لوجين تقول ان البنت طلع عندها انخفاض سكر حاد.. ويمكن تفقد جنينها
مشعل خاف/ليه حامل؟
عزيز/امها تقوله..
مشعل التفت ع زينه وشاف ام هاجر معها واستغرب/عزيز وين لوجين؟
عزيز/وش اقولك بس مالقينا طبيب.. مغير ممرضتين في قسم الطوارئ!!.. ودخلت لوجين،
مشعل/معها رجال
عزيز/اقولك مافيه غير ممرضتين انا تأكدت
مشعل ارتاح واتجه لأم هاجر/لا تخافين يا خاله.. لوجين دكتوره شاطره و ما راح تقصر
زينه التفتت على مشعل مستغرربه كلام اخوها ووصفه للوجين بالدكتوره!! وما علقت ..
،
*بعد ساعتين*
طلعت لوجين وهي تحس انها بتطيح من التعب وشافت مشعل قدامها واستغرربت وجوده!!!
ام هاجر/بشري يا بنتي
لوجين وعينها على مشعل/عطيتها ابرة جلوكوز وانتظرت شوي علشان اشوف استجابتها وقررت ازيد الجرعه مرتين والحمدلله رجع السكر لوضعه الطبيعي.. شكلها ما اكلت من فتره..
ام هاجر/اي والله من فتره اكلها ضعيف،طيب والجنين؟
لوجين ربتت على كتفها/تطمني النونو بخير ،سويت له موجات صوتيه وطلع عايش.. بس يبي لها راحه يومين هنا ..والدكتور يقولون شوي وجاي مدري وينه كل هالمده، واكيد بيهتمون فيها..
ام هاجر ضمتها من فرحتها/الله يجزاك خير يا دكتورتنا ويوفقك ويرزقك الذريه الصالحه
لوجين ابتسمت وحست بشعور حلو رغم انها كانت خايفه لانها باشرت حاله حقيقيه ومو تدريب،ونجحت بالتعامل معها،ماعلقت..
زينه/يلا يا خاله حنا بنروح وانتي خليك هنا
ام هاجر/اخاف تتركوني ويجون اعمامها
مشعل هنا تكلم/لا تخافين يا خاله عزيز بيكون هنا و برسل له من شبابنا واللي فيه خير خليه يقرب منك ومن بنتك..
ام هاجر/مشكوور يا ولدي.. بس ماقلت لي وين ابو هاجر والبنات
مشعل/بو هاجر مرتاح وعند بناتك في شقتهم وماعليهم انتي بس انتبهي لبنتك هذي وهم بكرا بيجونك يزورونك
لوجين اسستغررربت،
ام هاجر/عسى الله يوفقك انت وزوجتك..هالدكتوره الطيبه
مشعل ببتسامه/عن اذنك يا خاله اذا بغيتي شي،هذا عزوةيز عند الباب ..يلا يا بنات مشينا
طلعوا.. *
بالسياره كلن سااكت..
زينه راكبه وراء ..ولوجين قدام جنب مشعل..
مشعل كسر حاجز الصمت/جزاك الله خير ع اللي سويتيه
لوجين متنرفزه من كل اللي سمعته اليوم/الطبيب هذي شغلته ع فكره ينقذ الناس يعني ماله داعي تشكرني،
مشعل زعل بس عذرها لأنها ماعندها فكره عنه...
زينه ملاحظه ان الجو متكهرب وساكته/..
/
/
/
/
/
بالليل...
بعد العشاء.. اتجه الكل لغرفهم ..بعد يوم طويل ومُتعب..
*عند جناحهم
دخلوا مشعل ولوجين اللي تفكر بالاحداث اللي تصير ..
لوجين مسكت يده وهي تشوفه متجه لغرفته/مشعل
مشعل استغرب والتفت عليها/نعم
لوجين فكت يدها من يده بسرعه/انا اليوم اقتنعت انه ماعاد لي مفر منك ولا من هالقريه.. و اقتنعت اني هنا للأبد.. عشان كذا..
ترددت وقالتها وهي تتهرب من نظراته/تعال نام بغرفتنا.. وخلنا ننتهي من هالقصه بسرعه، دامها ورانا ورانا..
مشعل ابتسم يخفي همّه/لا تخافين انا مابي منك شيء ولا تحمّلين نفسك همّي وهم هالعلاقه،حتى لو انهم غصبوك علي،مايعني اني افرض نفسي عليك،ارتاحي ماراح ألمسك
لوجين ارتااحت، وتركته واتجهت لغرفتها/..
مشعل دخل غرفته وسكرها بدون يلتفت فيها/..
لوجين مابعد فتحت غرفتها.. ألتفتت عليه وهي تشوفه رايح وتاركها رغم دعوتها له.. دخلت غرفتها وسكرتها بهدوء وبدلت ملابسها ولبست روب نوم حرير ابيض طويل له فتحه طويله وعاري من فوق واخذت لوشن يدين وجلست تدهن يدها وهي جالسه على طرف السرير..
،
بهاللحظات انطق الباب..
لوجين عارفه انه مشعل،بس نست لبسها/ادخل
دخل مشعل وهو لابس تيشرت رمادي ربع وبنطلون اسود..
لوجين شافته متجه لها وخافت.. لكنه تعداها رايح للشوفينرا ،وخاب ظنها، وعرفت انه مستحيل يخل بكلامه مهما صار،
مشعل حط مسدسه بالشوفينرا.. واتجه بعدها للتسريحه واخذ منها بعض اغراضه" الكبكات" وغيرها/اسف ازعجتك
لوجين وهي تراقبه رايح جاي قامت واتجهت للتسريحه ووقفت عنده..
مشعل استغرب قربها منه!!
لوجين مدت يدها وحطت علبة اللوشن عالتسريحه وهي تناظر فيه/منت ناوي تنام؟
مشعل بلع ريقه وهو يشوفها من قريب، بس مابين ربكته/باخذ اغراضي و باطلع
لوجين كانت متعمده تكون قريبه منه، تبي تنهي هالشي الثقيل بصدرها.. لأنها واثقه من انها مستحيل تنفصل عنه/اهااه.
مشعل صد عنها ومشى وولا كأنه تأثر منها،وسكر الباب/..
لوجين اتجهت لسريرها وهي تحلل تصرفاته وتحاول تطنشه وماتفكر فيه ..
/
/
/
مشعل طلع لكن ما راح لغرفته...
طلع لغرفته القديمه.. ودخلها وسكر الباب..واتجه للبلكونه وفتحها ووقف متكي على الجدار ويناظر التلسكوب.. الليله مثل اغلب الليالي ما منه فايده.. لان السماء كلها غيوم.. التفت وهو يحاول يتذكر "أميره" بصورها. اللي يحتفظ فيها بدولابه.. نثرها ع التسريحه واخذ منها وحده وحطها ع المرايه..ورجع البقيه..
تلفت بأنحاء غرفته يبي يشوف لها طيف..مثلما كان يلمح طيوفها كل ليل..لأنه بالفتره الاخيره ما عاد قام يشوفها،..
تذكر يوم فراقها..
والحادث اللي صار لها معه.. وكانوا راجعين من عند اهلها ..انزلقت بهم السياره في المطر .حاول يمسك البريك والفرامل بس ما تشتغل معه.. عرف انها عطلانه طار عقله لان السياره جديده شلون كذا!!
ومع صراخ أميره وقهره وهو يحاول يسوي شي.. انحرفوا عن الخط وصار حادث أليم ..وتوفيت فيه اميره.. وهو يناديها ووجهها ملطخ بالدماء رغم انه تعرض لكسور بس ما فقد وعيه/اميييرره ردي علي.. اميييره.....
*صحى مشعل من هالذكرى الأليمه وهو يشوف طيف اميره يمر من قدامه.. وتطلع من البلكونه وهي تأشر له بيدها وتودعه ببتسامه/
مشعل لحق طيفها لكنه اختفى،تأكد له انه حلم،...
/
/
/
/
اليوم الثاني ..*
طالعه من حمامها توها ماخده شور.. ولابسه ومخلصه بالحمام ووقفت تمسح شعرها عند المرايه.. وهي تفكر بسالم واللي راح يسوي لها
بهاللحظات دخل سالم وناظرها شوي رراح يجلس/السلام عليكم
ساره ما ردت عليه،من زعلها/...
سالم حاول ما يعصب/السلام لله
ساره بدون تهتم به/زين وعليكم السلام..
سالم/ساره خلينا نتكلم بهدوء. احسن
ساره/علّم نفسك، من اللي صرخ على الثاني هااه..
سالم/طيب اسف
ساره خنقتها العبره لأنها مكبووته ومابكت/سالم انا مازعلت لأنك سألتني، بالعكس،انا زعلت من طريقة سؤالك اللي كله اتهام، وكأنك نبي تتهم وبس..
سالم/غيرتي اعمتني
ساره/واقفه مع عزيز بحشمتي ولبسي ومعه غرض لي وسألني عن حالي وبارك لي.. تبيني احقره وأمشي!!!،ما اكلني جاوبته وانتهينا. يعني لو اخوك سلّم علي وهو مار من عندي انا وامك.. اطنشه واحقره!!
سالم/انا معك ..اسلوبي ماكان حكيم معك.. بس
ساره/للحين فيه بسبسه بعد
سالم ابتسم وهو يناظره/صدق بتروحين بيت اهلك
ساره عطته قفاها ومسويه زعلانه/اذا فيه ناس بهالبيت ما يبوني،بروح لبيت أهلي ازين لانهم كلهم يبوني
سالم قرّب منها ومدت يده لكتفها ولفها عليه/وان قلت اني ابيك
ساره/اخاف يتكرر هالشي بيننا، لأن ساعتها ماراح اظل ثانيه وحده.
سالم وهو يبتسم/مع مرور الأيام بنتعود على بعض وبنصير مرات نضحك ومرات نتهاوش ومرات نزعل مع بعض.. لكن بالنهايه بنكون قريبين من بعض.. ومانقدر نفترق عن بعض حتى لو ودنا.. لأننا وقتها بنكون عايله وحده وصعب الواحد يترك عايلته حتى لو زعلوه.. والا انا غلطان
ساره مستغربه منه/وين هالحكمه من يومين
سالم قرب وطبع بوسه على جبينها/و قت الغضب سهل الواحد يهدم علاقاته..
ساره وهي معجبها حكيه/ودي اصدق
سالم/هذاك اليوم قلتي كلمه خلتني اكره نفسي وافكر كثييير واقعد مع نفسي ،تذكرينها؟
ساره تحاول تتذكر/لا
سالم/لمن قلتي اني اكبر مقلب بحياتك!
ساره مدت بوزها/هذي تستاهلها لانك صدمتني فيك بعد كل هالحب اللي لك.. تسألني وتشكك فيني
سالم/يعني صدق حبيتيني
ساره حاولت تتسحب منه وتتجه للباب وهي تتبسم وكأنها بتهرب/لااا
طلعت من الغرفه ركض....
سالم لحقها/هههه يعني وين بتروحين مني،
/
/
/
/
/
/
/
طلعت لوجين من غرفتها وهي لابسه وجاهزه بس بدون عبايه طقت باب غرفة مشعل كذا مره ولا رد!!
نزلت بهدوءها وهي تفكر(معقوله راح بدون ياخذني معه ازور هاجر! .وهو وعدني!!)
وصلت تحت لقت زينه وأم مشعل جالسين يشربون شاي ويفطرون/السلام عليكم
زينه/وعليكم السلام.حياك لوجين تونا حاطين الفطور
لوجين جلست/زينه شفتي مشعل الصبح؟
زينه/شفته طلع يصلي الفجر وعقب راح للدور الثالث لغرفته
لوجين/غرفته!! اي غرفه.
ام مشعل وهي تخزها/غرفة زوجته الأوليه.. اكيد بيرتاح فيها اكثر من مقابل وجهك النحس.. مدري وش سويتي له وكرّهتيه عيشته!!
قامت ام مشعل وتركتهم/سديتي نفسي عن الاكل.. هفف
لوجين استغربت اكثر،والتفتت على زينه/محد قالي ان مشعل متزوج غيري!
زينه وهي خايفه من ردة فعلها/كان متزوج بس توفيت زوجته من ثلاث اربع سنوات في حادث وهو كان معها بس ربي نجاه منه..
لوجين،وهي تتذكر حركات مشعل وكلامه لها البارح
((لا تخافين انا مابي منك شيء ولا تحمّلين نفسك همّي وهم هالعلاقه،حتى لو انهم غصبوك علي،مايعني اني افرض نفسي عليك،ارتاحي ماراح ألمسك))
عرفت بداخلها وش كان يعني مشعل بهالكلام!! يعني، هو للحين عايشه مع اطلال زوجته المتوفيه!! ،والا ليش ماتزوج كل هالسنين،سألت بعفويه/مبين كان يحبها. صح؟
زينه ترددت/هـ هو كان يحبها حيل الله يرحمها،وكان كلن يحسدها عليه.. لكن اللحين توفيت وصارت ماضي، الحاضر لك اكيد والمستقبل بعد
لوجين وهي تفكر فيه وبكلام زينه(لا والله مو بس ماضي وانتهى.. اللحين عرفت سبب تركه لي، وكأنه فرح اني طلبت هالطلب منه)، التفتت على زينه/ماقلتي لي وش كان اسمها؟
زينه/أميره..
لوجين سكتت وهي تتخيل كيف كان شكل اميره..!!
بهاللحظات اقبل مشعل وجلس/السلام عليكم
الكل/وعليكم السلام..
مشعل/زينه صبي لي قهوه
زينه/ابشر
لوجين تناظر فيه، بنظرات مالها تفسير غير انها بدأت تفكر فيه من ناحيه ثانيه،وتفكر كيف كان مع أميره!!
مشعل قطع تفكيرها/هاه لوجين للحين تبيني اوديك تزورين هاجر والا امشي
لوجين قامت/لا لا تمشي انتظر بروح معك،لحظات ألبس عباتي وانزل
مشعل وهو يشرب قهوته/يلا استعجلي وراي موعد ابي ارجعك للبيت واروح للمؤسسه
لوجين وهي رايحه/اووكي ما راح اتأخر..
/
/
{[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 20-04-2014, 03:35 PM 
©؛°¨غرامي متألق ¨°؛©
رد: من متى والغصن يختار الطيور؟/بقلمي
/
/
/
جــــدّه*
روبين في بيت لمياء وباين عليهم الإحباط وجلستهم ممله..
روبين/انقهرت ع لوجين ليه كذا؟ طيب متى بتجي ونشوفها مره ثانيه؟
لمياء/اظن اخر أمالنا نشوفها اللحين،يا بنت ما كلمتني
روبين/انتي مو ابوك من قبيله بعد، ليش ما منعوك
لمياء/ههههه وانتي ع بالك كل القبايل متسلطه.. بعدين قبيتي غير وقبيلة لوجين غييير.. يختي ناسيه ان المبتعثات فيهم بنات قبايل بعد!! وفيه طبيبات قبيليات بعد وما منعهم دينهم من العمل بالعكس.. هذي اشهر جرّاحه قلب الدكتوره هويدا القثامي،انسانه محترمه من قبل الكل ومحجبه وناجحه بمجالها.. وتجيها طلبيات ودعوات لإلقاء محاضرات بكل مكان
روبين/فعلاً .بس بصراحه ماني فاهمه ايش وضع لولو
لمياء بحسره/اللي قاهرني ان لوجين كان عندها تحدي مع نفسها وكانت تبي تثبت للعالم ان مافي شي صعب مع التحمل والاصرار للوصول للهدف.. لكن كل هذا راح مع ادراج الرياح!!
روبين/تحدي إيش؟!!
لمياء تحاول تغير الموضوع/روبي شرايك ننزل للوالده تحت ونجلس نتقهوى معاها
روبين/يلا.. احسن من هالكآبه
لمياء/هيّا
/
/
/
في المستوصف.. *
ام هاجر وقلبها مكسور/مشكوره ع زيارتك يا بنتي
لوجين ببتسامه/واجبي يا خاله لا تقولين هالكلام.. انتي ماتدرين ان مساعدتي لبنتك هي بحد ذاتها مساعده لي،
هاجر بصوت باكي/لولاك كان مدري وش صار فيني
لوجين/انا ماسويت شي.. الله وحده هو اللي انقذك ووفقني اني اوقف معك يعني محد له فضل غير ربنا سبحانه
ام هاجر/ونعم بالله يا بنتي
لوجين لاحظتهم متضايقين وباين على هاجر باكيه/فيه شي يا جماعه!!.
ام هاجر بألم/اليوم الصبح جات ورقة طلاق بنتي من زوجها وكان يودعها برساله، ويقول انه ما يقدر يواجه هالناس
لوجين انقهرت/هذا كلّه بسبب الشيخ
ام هاجر/انتي ماقصرتي والشيخ مشعل ماقصر
هاجر وهي تتبسم بدموع/اشكريه بالنيابه عني، لولا ربي خلاه يتدخل كان انا ميته
لوجين عصبت/ومشعل وش سوالك غير الألم؟انتي ناسيه انه سبب تفريقك انتي وزوجك!! انتم كيف تسامحون بسهوله وتنسون!!!
هاجر/صحيح الشيخ أذانا لكن مشعل ماشفنا منه غير الطيبه والشهامه.. مشعل كان هو احد الشهود ع زواجي من عادل. وابوي عزمه لأنه عارفه زين ومن طرف شيوخ القبيله.لو مشعل نيته شينه ماحضر وماعشت بسعاده ثلاث سنوات مع زوجي ..
لوجين مالقت تعليق على هالكلام اللي تسمعه عن مشعل غير ان مكانته بدأت تزيد عندها وتتأكد انه غيرهم.وندمت حيييل ع تصرفها الغبي معه لما هاجمته..
/
/
/
في بيت منصور جمعان*
جميله محروقه اعصابها تفكر وش صار لبنت عمها،اخذت القهوه وراحت تقهوي ابوها/يبه
منصور/خير
جميله مدت له الفنجان/ماقلت لي ايش صار على قضية بنت عمي
منصور بابتسامة انتصار/طلقها زوجها وارتحنا من همّه
جميله استااانست/ززززين تريح رااسك الغالي
منصور/انتي وش قعدك هنا.. وين أمك ؟
جميله/أمي بغرفتها مادري شتسوي
منصور/رووحي قولي لها.. ابو مشبب جاينا الليله.. والا ليش اقولها وانتي موجوده..
جميله استغربت/ايش السالفه يابه
منصور/ابو مشبب جاي الليله يخطبك وانا مواافق،رتبوا انفسكم الليله جاي مع زوجاته وبناته،وبنسوي ملكتك
جميله انصدمت،ماقدرت تعلّق وكأن جاها خرس مؤقت،قامت وهربت لغرفتها ..
منصور وهو يكمل فنجانه/كملت 35سنه وتظن ان فيه عزوبي بيتقدم !!..ماصدقت ان ابو مشبب خطبك،خلّه يشيل همك.. والله يعيني ع الباقي
/
/
/
/
بالسياره ..
مشعل لاحظ سكوت لوجين ونظراتها له بين فتره والثانيه/لوجين فيه شي
لوجين تغيرت نبرتها/لا
مشعل/شكلك سرحانه بشي
لوجين حاولت تغير صوتها وترجعه طبيعي/انا حابه اطلع انا وزينه نتمشى بالمزارع.. تسمح لنا
مشعل ابتسم/اكيد اسمح لكم.. ليش لا.. بس انتبهي
لوجين/فيه ذيابه يعني
مشعل/هههه لا مافيه بس انتبهي من زينه تراها ماتدل شي ان تبعتيها بتوديك بداهيه.. ارجعوا قبل المغرب ازين
لوجين/ههههه، تطمن ماراح تجي صلاة المغرب الا وحنا بالبيت
مشعل/اووكي..
لوجين بفضول/اذا نزلتني وين بتروح؟
مشعل استغرب سؤالها/عندي موعد مهم مع موردين،تبين شي
لوجين ترددت/لا...
مشعل سكت وكمل طريقه..
/
/
/
/
/
بغرفتها منهاره.. تبكي ..
دخلت اختها ساميه تبي تواسيها/جميله..
جميله التفتت عليها وهي معصبه/انقللللعي برااا
ساميه/جميله هدي نفسك
جميله/انتي جايه تشمتين فيني ادرري فيك
ساميه/اعوذ بالله كيف اتشمت فيك وانتي اختي
جميله/انتي جالسه تتشمتين ونظراتك كلها شماته، علشانك متزوجه من واحد مهو شايب ومبسوطه بحياتك
ساميه/جميله،لا تعميك انانيتك وحب ذاتك عن الحقيقه، لا تنسين انك سبب اللي انتي فيه.. ابوي صبر عليك واجد خطبوك شباب وانتي تردينهم!! انتي الوحيده اللي ابوي كان يستشيرك في الخطاب لانك المفضله له.. وانا وبقية خواتي ما سألنا عن رأينا وكنا،ساكتين وراضين بنصيبنا...انتي اللي كنتي تتريقين علينا.. حنا ماعمرنا تتريقنا عليك!!.. ما أدري من كنتي تنتظرين يخطبك.. امير والا شيخ والا ولد تجار!!
جميله اخذت الفازه القريبه منها ورمتها،عليها بعصبيه،بس ما أصابتها/بررررااااااااااا
ساميه طلعت وهي متأسفه على اختها....
/
/
/
الجنوب*
غيم وزخات مطر واجواء نقيه..
لوجين ملتفه بشال كروشيه وواقفه في نص الحوش ومعها زينه تحت المطر/شرايك نطلع المزارع نتمشى
زينه خافت/هالوقت!!
لوجين ببتسامه/ايوا لا يكون هنا ممنوع التمشيه ع البنات بعدد
زينه ترددت/شدعوه ترى انتي فاهمه ديرتنا غلط..وش حلات الديره واهلها ترى عندنا طبايع حلوه بعد
لوجين راحت تدخل وهي متحمسه/اوكي،دام كذا خلينا نصلي العصر وبعدها نطلع نتمشى.
**دخلوا يتوضون ويصلون ..واتفقوا يطلعون**
،
لوجين كانت متحمممسسه ومستعجله عشان تكتشف المكان،
زينه راحت معها وهي متردده/يا عنيده وقفي
لوجين/ههههه ياخوافه اسرعي شوي
راحوا يتمشون ويدوجون بين المزارع وابعدوا شوي..
لوجين مبهوره بالمكان والجو..
زينه خايفه لان المطر يزيد وفيه رعد وبرق/لوجين تكفين خلينا نرجع خلاص،انتي ماتعرفين المطر وش ممكن يسوي بهالمكان الجبلي
لوجين وهي تشوف طريق زراعي ترابي قديم/اذكري الله و بلاش وسوسه وتعالي،فيه هناك مطل يجنن
زينه خافت/لااا تكفين ارجعي هالمكان خطير واجد
لوجين التفتت عليها ووقفت وميلت وقفتها وهي متخصره بيديها/هههههه وانا احب المغامره تعالي انتي من وحنا بالبيت خايفه بطلي خوف يا بنت وانبسطي
زينه عطست وهي مبلوله/بررد
صووت رعد قوووي وبرق..
لوجين وهي ترفع وجهها للسماء يتبلل بموية المطر ومغمضه/سبحان من سبح الرعد بحمده والملائكه من خيفته.
جلسوا البنات تحت شجره يتفرجون..
/
/
/
/
**
قرروا البنات يرجعون دام ان المطر بدأ ينزل بغزاره والظلام خيّم..
لوجين/يلا زينه خلينا نرجع البيت نصلي المغرب قبل يفوتنا
زينه/اخيرا اقتنعتي هههه
لوجين لاحظت احد يتحرك وراء الاشجار الصغيره/انا حاسه ان فيه احد ملاحقنا
زينه خافت/يممااا
لوجين/ههههه اسرعي.. يا خوافه
زينه/انا خايفه حيييل
لوجين/هههههه
صوت رعد قووي..!!!
زينه صرخت/يمما
لوجين خزتها/بدال ما تسبحين بحمد الله، تصرخين!!
زينه لاحظت واحد يلاحقهم/لوجييين انتي صادقه.. ناظري وراك،فيه احد يلاحقنا
لوجين بلعة ريقها والتفتت،وكأنه هيئته من المتخلفين اللي يجون بالتهريب من الحدود اسود نحيييف وملابسه رثه ومتسخه/بسم الله الله يكفينا شره.. اسرعي يا زينه..
وراحوا يركضوون بسرعه...
زينه بدأت تبكي..
لوجين تركض بسرعه وعينها على زينه/اسرعي يا بنت
الحرامي يلحقهم بسرعه..
وصلوا مكان كله اشجار صغيره وضاعوا بالظلام تحت المطر.. بس ما زالوا يركضون..
لوجين وقفت ترتاح/الحمدلله شكله ضيعنا
زينه/الحمدلله ..خلينا نرجع بسرعه
لوجين تمشي وهي تدعي بقلب صادق/الله اني استودعتك يا من لاتضيع ودائعه استودعك نفسي وعرضي،وحياتي، فاحفظني يا رب
زينه/نزل علينا الظلام وحنا مو بالبيت عز الله بنتبهذل
لوجين وهي تضم كتوفها بيدينها/انا تجممدت.
زينه/اللحين وين بيتنا!!
لوجين تذكرت كلام مشعل عنها/ههههه وراء مزرعتكم يالذكيه
زينه/ووين مزرعتنا!!
لوجين/تستهبلين انتي ههههه،في واحد يضيع بقريته"!!
زينه بجديه/والله اني ضيعت الطريق صدق
لوجين كانت تمشي وتعثرت بحجره كبيره بقووه وطاحت وصرخت صرخه مدويه/آآهه
زينه خافت/لوجييبن!!
لوجين ما تحملت الألم القوي/زينه بليييززز روحي البيت نادي احد
زينه/ وتبيني اتركك هناا،قوومي اساعدك
لوجين وهي تحاول تتصبر/ما اقدرر.. انا ما اتحكم برجلي اكيد مكسوره
زينه بكت عليها/حراااام،تتألمين بقوه ماقدر اخليك
لوجين عصبت عليها لأن الألم شديد/زززينه روووحي ناديلي اااحدد انا بموت من الألم،بسرررعه روحي
زينه وهي تمسح دموعها/طييب بس..
لوجين قاطعتها بصراخ/رووووحي
راحت زينه ركض وتركتها..
،لوجين وهي مبلوله بالكامل بموية المطر قامت تتلفت وهي تبكي/ياربي رحمتك وش جابني هنا بهالوقت،،يا رب يوقف المطر ،تجمدت
سمعت صوت خطوات وراها والتفتت بصراخ وشافته الحرامي اللي كان يلاحقهم/يا رب تكفيني شرّه وأذه..
بدأت تزحف تبي تبعد عنه.. وماقدرت لان الشوك دخل بيدها وسال دمها وبدأت تبكي بخووف ورعب منه/..
اقبل عليها وجلس عندها وقرب اكثر وهو يتبسم بخبث.وتبين اسنانه الصفراء الملتويه..
مد يده لها وما أمداه الا عصا ضخمه تضربه على راسه.. ويطيح على جنبه ...
لوجين برعب رفعت عيونها وتشوف زينه واقفه قدامها ماسكه العصا ومو مصدقه اللي سوته/زينه!!
زينه،كانت مو مصدق انها ضربته ،رمت العصا على جنب وجلست عندها/سمعت صراخك وجيت ركض،وشفته ترددت بس مادري شلون جاتني هالقوه وضربته
لوجين ابتسمت وسط ألمها/اسفه اني صرخت عليك
زينه/ادري انك كنتي تتكلمين بوجع بس والله ضيعت الطريق..
لوجين بكت بصمت وهي تناظر رجلها/...
/
/
/
/
في شقة ناصر جمعان المؤقته...*
ناصر وهو يكح/اعذريني يا بنتي.. ماقدرت اسعدك
هاجر باست راسه/ماقصرت يالغالي.. لا تخاف انا ماني زعلانه اهم شي سلامة راسك.. بس لي طلب يالحبيب
ناصر/سمّي
هاجر/انقلنا من الطايف يبه.. ما اتحمل اسكن هناك ثانيه ناصر/ليه يا بنتي
هاجر/مابي اهل الحاره ينظرون لك نظره دونيه ويفكرونك ضعيف شخصيه.. بيظنون انك السبب وانا ماتحمل اشوفك منكسر بسبب موضوعي
ناصر/الله يرصى عليك.. راح ننقل في حي ثاني وانا افضل ننقل للحويّه ابعد عن حينا القديم شرايكم
ام هاجر/نعم الراي يابو هاجر
هاجر/الله لا يحرمني منكم.. انا رايحه انام مرهقه حيل
راحت .
ناصر/حاس ان البنت فيها شي
ام هاجر/ان شاء الله ماعليها الا العافيه.. لا تشغل بالك
ناصر بحسره/عقب القهر والغبينه اللي صارت لها ماظن انها بخير. .لكن ياشين قلّة الحيله
/
/
/
الساعه8 المساء..
ام مشعل واقفه عند باب الحوش الداخلي وهي خايفه وتراقب المطر اللي متواصل من العصر ما وقف،توترت/يا ربي وين راحوا هالبنات يارب احفظ لي بنتي.
دخل مشعل بهاللحظات/السلام عليكم
ام مشعل تركت البلكونه واتجهت له/وعليكم السلام يا ولدي،
مشعل وهو يفصخ شماغه ويحطها على الطاوله/شفيك يمه مب عادتك تفتحين الشبابيك وقت المطر واليوم عاصفه بعد!!
ام مشعل خافت تقوله ان اخته للحين مب بالبيت/حبيت اغير جو..
مشعل ابتسم/انا رايح غرفتي اغير وراجع..
راح مشعل وبدل ملابسه ولبس تيشرت ازرق غامق كمه طويل وبنطلون اسود...
وبعدها اتجه لغرفة لوجين ..وتردد قبل يفتحها،وقرر يفتحها وما لقاها استغررب!!
نزل تحت وهو متوقع يلاقيها..
جلس مشعل عند امه/يمه وين لوجين ماني شايفها فوق!
ام مشعل/والله ياولدي مدري شقولك،زوجتك واختك تقول الشغاله من بعد صلاة العصر طلعوا يتمشون في المزرعه بس للحين ما رجعوا
مشعل، وقف على حيله/وشو.!!للحين مارجعوا وليه ما قلتيلي من بدري الساعه اللحين ثمان يمه
ام مشعل/قلت بيرجعون بس للحين ما رجعوا،كله من تحت راس مرتك والا بنتي ما قد تجرأت تطلع لهالوقت، انت لازم تعاقبها شلون تطلع بدون أذنك
مشعل تركها و طلع ركض وهو ينادي اللي يثق فيه/عزييزززز
عزيز ساكن بالملحق طلع ع الصوت/سم يا مشعل
مشعل/تعال معي للمزرعه وهات معك الكشافات والشوزن، زينه و لوجين راحوا يتمشون من العصر بالمزارع وللحين ما رجعوا!! انا خايف لا يكون احد تعرض لهم
عزيز خااف وفز قلبه/قدام..
اخذوا الكشافات والشوزن و اتجهوا للحقول بسرعه...
صاروا يدورون فيها شبر شبر.. ومالقوها..
مشعل طلع برا الحقول/اكيد هم اتجهوا للمطل اكيد خلنا نروح
عزيز /يلا..
اتجهوا لهذاك الطريق ومالقوا احد!!!
مشعل انقهر وصار عقله مشوش/وين راحوا تحت هالمطر
عزيز صار يدور وبباله يسمع صوت زينه اللي يعشقه،ويتذكر عيونها وابتسامتها الطفوليه،سمع صوت والتفت على مشعل/مشعل سمعت اصوات بهالاتجاه
مشعل راح يركض بالاتجاه مع عزيز،وينادي/لووجيييين زيينه ..
،
،
عند البنات..
زينه فز قلبها/لوجين انا جالسه اسمع صوت مشعل ينادي
لوجين والألم،ذابحها/انتي تتوهمين
زينه/ااسسمعي وركزي الصوت كل ماله يقرب
لوجين سمعت صوت مشعل يناديها/اي والله..
زينه وقفت وتنادي/مشششعل انا هناااا
قرب مشعل ومعه عزيز وشافهم وشاف الرجال اللي طايح وما صدق عيونه/
زينه ماعطته فرصه ضمته/اخووي الحمدلله انك جيت تدورنا.. جينا نتمشى وضعنا وهجم هالحرامي على لوجين بس ضربته بالعصا مدري يمكن مات
عزيز يتبسم وهو يصد عنهم/كفو يا بنات و الحمدلله ع سلامتكم خوفتونا
مشعل كانت عينه على لوجين اللي عيونها غرقانه دموع/شغلتوني عليكم لوجين وش فيك؟
زينه عدلت شالها المبلول وتلثمت من عزيز/مشكور عزيز
مشعل اتجه للوجين وهو خايف/لوجين شفيك تبكين.. لا تخافين انا هنا قومي نروح
لوجين بلعة ريقها وجرحها يألمها. ناظرت رجلها وهي ترجف..
زينه/مشعل لوجين تعثرت واظن انكسرت رجلها
مشعل خاف/وشو!! وريني
لوجين ابعدت شعرها عن وجهها بيدها المجروحه/
مشعل لمس رجلها/هنا
لوجين تألمت وصرخت/آهه
مشعل رحمها وقلبه معوره عليها/وبعد يدك مجروحه!!
قام مشعل والتفت على عزيز/انت تصرف مع هالحرامي وتعال وانا باخذ البنات وبرجعهم البيت لازم اشيل لوجين الظاهر رجلها مكسوره
عزيز/ابشر والف سلامه لك يا لوجين..
لوجين ما تقدر تتكلم من الألم والبرد،،
مشعل شالها بين يديه بهدوء ومشوا وهو يهمس لها/سلامتك
لوجين من شدة بردها ضمته تدور الدفا/انا بردااانه
مشعل/شوي ونوصل البيت تحملي.
زينه. تناظرهم وتتبسم/..
،
وصلوا البيت..
ام مشعل فرحت بشوفت بنتها سبقتهم/زينه.. وين رحتي يا بنتي خوفتيني عليك
زينه وهي مبلوله/يمه كنّا نتمشى بس لوجين تعثرت وانكسرت
ام مشعل وهي تناظر لوجين بنص عين من بعيد/زين يا بنتي روحي غيري ملابسك وتدفي لا تمرضين
زينه راحت لانها جد بردانه...
دخل مشعل وهو شايل لوجين بين يديه/السلام عليكم
ام مشعل بحقد/من وين السلام وهالمنفلته ببيتنا
مشعل حاول يخليها تسكت/يمه ماله داعي طلبتك
ام مشعل/كيف ماله داعي واختك عمرها ما طلعت هالطلعه الا يوم جتنا هالمنفلته
لوجين مافيها حيل ترد شدت يدها على كتف مشعل وهي تخبي وجهها الباكي بحضنه،وتخفي تنهيده/...
مشعل، حس بتنهيدتها على صدره وقرر يريحها/عن اذنك يمه انا طالع غرفتي انا وزوجتي.. وبتغير ملابسها وبعدها بنروح المستشفى ويمكن نطول.. سلام
ام مشعل لوت بوزها..
مشعل صعد للغرفه...
،
،
،
في الغرفه..
نزّلها مشعل ع السرير واخذ شالها منها/يلا بدلي ملابسك المبلوله هذي بسرعه
لوجين بصوتها المبحوح من البكي/ما اقدر اتحرك
مشعل/ولا يهمك انا اجيب لك الملابس اللي تبين
لوجين استحت/لا، انت لا
مشعل/اجل من طال عمرك
لوجين/ناد لي الشغاله تساعدني لاني حابه اخذ دش وانت خليك برا
مشعل/طيب بناديها بس عجلي
طلع مشعل مستعجل ونادا الشغاله بسرعه..
واتجهت لغرفة لوجين/نعم مدام
لوجين/تعالي وصلليني الحمام لعند البانيو وهاتي ملابسي والفوطه. وخليك عند الباب برا واقفه انتظريني اذا احتجتك بناديك اوكي
الشغاله/اوكي مدام..
بعد ساعه خلصت لوجين ..
الشغاله/تبين شي تاني مدام
لوجين/نادي مشعل
الشغاله/اوكي
لحظات ودخل مشعل وهو متفاجأ بلبسها برمودا جينز وبلوزه رماديه سيور و مزموم من تحت الصدر بشريطه بنفسجيه غامقه.. وجزمتها فلات..
مشعل/خلصتي؟!
لوجين مدت يدها بجاكيت اسود صغير/تعال وقفني ولبسني هالجاكيت والعبايه
مشعل قرب بهدوءه/طيب
وقفها ولبسها الجاكيت وطلع شعرها من تحت الجاكيت،وسرح....
لوجين ملاحظه سرحانه/مشعل باقي العبايه
مشعل تذكر واخذ العبايه ولبسها/بتطلعين كذا
لوجين وهي تلف الطرحه وتتحجب،وفاهمه قصده/اجل كيف اطلع؟
مشعل بأدب رفيع وذوق/البسي نقابك
لوجين انسحرت من ادبه/و من قالك اني ما راح البس النقاب..هالمره اعديتك بالاستعجال هههه هاته هذاك هو ..لا تحسب اني بحرجك او اضايقك.. ماعشت ولا كنت.
مشعل/انتي ما تحرجيني ابد.. انا اتشرف بك يا بنت عمي،مهما كان،وكيف ما كنتي،بس الدين اهم صح؟
لوجين وعيونها بعيونه منسحره بطريقة كلامه/نسّيتني رجلي المكسوره بذوقك،اخااف... <<<سكتت
مشعل حاول يغير الموجه،خاف تقولها وهو مو مستعد/والله انا اللي شكلي خايف على رجلك اكثر منك،تعالي نروح المستشفى بسرعه
لوجين/يلا..
،
،
،
بما ان الوقت صار متأخر على مستوصف القريه الصغير اضطر مشعل يروح لأبها/..
لوجين/ع فكره انتم ماعندكم هنا مستوصف زي العالم
مشعل/عندنا مستوصف صغير بس للأسف ما يوفي بالغرض.. ويسكر بدري لان مافيه طبيب طوارئ الا واحد وللأسف الدعوه سايبه في مراكز الهجر الصغيره
لوجين/غريبه!!.. كيف بلدنا فيها هالاشياء الصغيره اللي ممكن تلافيها
مشعل بجديّه/حنا طالبنا بهالشي بس للآن ما وصلنا غير وعود
لوجين/حراام كذا،مادري كيف الاهالي يتعاملون بالاوقات الحرجه، هذاك اليوم تبهذلت في الطوارئ. لولا رحمة ربي كان راحت المريضه من بين يدي
مشعل/عاد اسمعي هالشي ،تدرين اغلب نسوان القريه يولدون ببيوتهم
لوجين انصدمت/معقوله!!
مشعل ببتسامه/وبعضهم بهالطريق
لوجين/الله يعينهم
مشعل/امين... ماقلتي كيف رجلك اللحين
لوجين/تألمني من عند مفصل القدم
مشعل/يا رب مايكون كسر
لوجين/يا رب
/
/
/
بالبيت..
ابومشعل قام يبي يشرب مويه/يا ام مشعل.. وينك
ام مشعل استقعدت/شفيك
ابو مشعل/عطيني مويه
ام مشعل/ززين
ابو مشعل/اليوم ماشفت مشعل من صبح؟متى رجع
ام مشعل رجع الساعه ثمان واخذ،زوجته للمستشفى.. فيها كسر
ابو مشعل/ليش
ام مشعل جلست تقوله القصه......
/
/
/
/
/
/
ابها*
الساعه1 طلعوا من المستشفى..
ولوجين على عربيه ورجلها ملفوفه وصلت السياره/..
مشعل شالها وركبها السياره..وراح يركب..
لوجين ببتسامه/الحمدلله،طلعت كدمه بالمفصل
مشعل/ولا تنسين تمزق العضل بعد
لوجين/اهون بكثيير من الكسر.. ..
مشعل/يبي لك عنايه وراحه.. انتبهي
لوجين وهي تشوف ساعة السياره/مو كأنه تأخرنا ع البيت.
مشعل/لعيونك يا بنت عمي نتأخر كم عندي بنت عم انا
لوجين/وانا ايش دراني كم عندك
مشعل جلس يتذكر/ماعندي احد صدقيني
لوجين/شككتك ههههههههه
مشعل حب ضحكتها الناعمه وسكت وهو يتبسم بهدوءه المعتاد/..
لوجين وقفت ضحك وتذكرت نفسها،خافت من هالهدوء اللي بينهم خصوصا لمن طلعوا من المدينه وصار ظلام،فصخت نقابها، والتفتت عليه/بيزعجك هالشي
مشعل ببتسامه/بالعكس
لوجين ببتسامه/امممم بما ان المسافه طويله شرايك تشغل الأف ام
مشعل شاف وجهها وابتسم ع عفويتها/ماطلبتي شي..بس بشغل سي دي شيلات فهد مطر احسن ،شرايك..
لوجين/اووكي سمّعنا
مشعل مد يده للـDvD وشغله.. وبدأ..صوت فهد مطر..
[[ياسحايب سراة أبها تعـدَّي شمـال
واستعيري دموعي سيِّلي كل وادي
غطَّي أرض الحبيِّب بالنَّدى والجمال
مثل ماهو منـدَّي بالمحبَّـه فـؤادي
أرعدي ياسحابه فوق هاك التـلال
صوِّري له حنيني عقب طول البعـادِ
ولِّعي ياسحابه بالسِّما كـل جـال
مثل ما اشعل فؤادٍ فيه قدح الزِّنـادِ
مير أشوف التسلِّي عن هواه استحال
وقِّفي ياسحابه حِمل الأشـواق زادِ
دوك عيني وقلبي دوك بعض الخيـال
دوك كلِّي تبعتك مابقى لـي قعـادِ ]]
لوجين حبت الكلمات،وانسجمت،وحست ان البنج خدرها وهي اصلا كانت سهرانه ومواصله،نامت بدون ماتحس..
مشعل فقد حركتها والتفت عليها/شكل القصيده اعجبتك؟
شافها نايمه و راسها مايل شوي،اعجبه شكلها وهي نايمه، ابتسم،استغل الوضع ومد يده ومسك يدها القريبه منه وضمها بكفه،..
/
/
/
/
/
في احد بيوت القريه الكبيره..
تترجاه بصوتها الباكي/لا يا مسفر ..طلبتك لا
مسفر/انا قررت ازوج البنت يا منيره وماعاد في مجال للتراجع
منيره طاحت عند رجلينه تترجاه/مسفر تكفى لا تجني على بنتك.. لا تقتل برائتها..البنت توها صغيره
مسفر/انا استر البنت وهذا نصيبها خلاص
منيره/تزوج طفله قااصر!!!وتقول نصيب.. وكأنك ماتقدر ع مصروفها!!. حرام عليك
مسفر ابعدها عنه وقفّى/اتركي عنك هالخرابيط ما راح اتراجع وقفلي ع الموضوع
طلع وتركها تبكي ع الأرض...
منيره دخلت في دوامة بكاء ..وبدأت تتذكر يوم زواجها.. كانت طفله عمرها12سنه عمرها ما راح تنسى اللي صار لها. ..
ماتحملت انه يصير لبنتها نفس اللي صار لها فزعت من الذكرى المرعبه/آآه.. يا ررب ساعدني يااارب فرّج كربتي.. يارب مابي نصيب بنتي يصير نفس نصيبي يا رب.. وش الحيله يا ربي وش الحيله..
،
،
،
،
،
يتبع