وكانت بتجاوب بكل صراحه ومتلهفه شديد وماخايفه نهائي برغم انو المكان وشكل الراجل الدجال مخيفين شديد بس زوبه بطبعها قلبها قوي ولمن تخت فكره الانتقام من شخص مابهما اي شي تاني الشيخ اداها موعد يوم بكره عشان طلب منها حاجات تجيبهم ليهو ومن ضمنهم صوره بس قالت صوره دي تجيبها كيف وهي كانت متواصله مع حاج محمود وفارضه نفسها عليهو وكل شويه تتصل بيهو رغم انو ما متجاوب معاها خالص خشت الفيس فتشت صفحتو لقتو ماخاتي صوره ليهو نهائي فكت الحظر من عزام فتحت صورو وعزام كان متعود ينزل صور اسرتو في الفيس دايما وكل مكان يمشي لازم يتصور وينزل الصور وخاصه مع ابوهو في الشغل لقت في بروفايل عزام صوره ليهو هو وابوهو قصت عزام من الصوره وشالت الصوره طلعتها كرت ومشت بكره لي الشيخ ومواعيدها معاهو كانت الصباح بدري وكان طالب منها مبلغ كبير وقريبتها برضو طلبت منها مبلغ عشان هي الورتها طريق الشيخ زوبه كانت ختت القروش الاداهم ليها عزام في حسابها ف البنك وبتسحب منها كل شويه يعني فاضل فيها كتير سحبتهم واتصلت لي ابوها ف السعوديه حول ليها مبلغ كويس وجابت القروش للشيخ والصوره وباقي حاجات كان طلبهم منها خشت عليهو وادتو الحاجات المطلوبه وبدا في شغلو ينادي بعبارات ما مفهومه ومره يبكي ومره يتوسل وبتكلم وهي ماعارفاه بتكلم مع منو خافت طلعت بره قعدت مسافه كده ناداها وكان بشرح ليها في انها تعمل شنو واداها حاجات وكيس كده ملفوف وقاليها لازم الكيس ده الحبيب يشيلو في يدو حتي لو كان جوا حاجه المهم يشيلو وكان طلب منها صندوق صغير علي شرط يكون وسخان او في مكان نجاسه اوكوشه جابتو ودخل فيهو الصوره معاها حاجات بعرفهم هو وطلب منها انو لازم الصندوق ده يقعد في سطح مقابل النجوم لمده يومين وبعديها تشيلي تدفني في مكان بعيد سوا كان مقابر او خلا طلعت منو وادتو القروش وشكرتو ومشت زوبه طلعت من الشيخ وكل الفي راسها انها تقدر تنفذ كل الطلبو منها
بهناك غرام امها قالت ليها ادي خالد واهلو موعد يوم الجمعه انهم يجونا للخطوبه وقولي ليهو انو ابوي وامي حجزو وجاين مخصوص عشان يقابلوك غرام اتفاجأت من كلام امها وقالت ليها كيف يعني اقوليهو امي وابوي جاين ولو انتي قابلتيهو ابوي منو الحايقابلو فهميني واتكلمي بالمنطق امها قالت ليها اسمعي عشان ما تتعبيني معاك انتي بتعرفي طريق لي ابوك اصلا عشان تكلمي بخطوبتك ولو عاوزه تصارحي خالد بالحقيقه اتاكدي تماما انو ح يخليك ولا يعاين ليك انتي اسمعي كلامي البقولو ليك بس وقوليهو ليهو
يتبع....