#Love_Story
#Ep_20
¶ أمير كايدق على نادية...
نادية: (متفاجئة) مايمكنش!!! أخيرا شي واحد كايدق في الباب.. تفضل...
أمير: (داخل كايفرنس) Re...
نادية: Re... شي حاجة ورا هاد التفرنيسة...
أمير: شحال تعطي على ضوصي سخون...
نادية: دوي ولا سير لخدمتك خليني نخدم...
أمير: غانقوليك... (كايسد الباب و كايجلس)
نادية: واش قلت ليك اجلس؟!؟
أمير: ترخاي شوية... ملي غانقوليك هاد الضوصي غايعجبك الحال...
نادية: يالله دوي نشوف...
أمير: عوادت ليكم نجاة على شي واحد تعرفات عليه في الويكاند سميتو رشيد.. زوين و ظريف و عندو رونج روڤر...
نادية: (باستغراب) أييه.. و لكن كيفاش عرفتي؟!؟
أمير: و ماطاح في بالك تا واحد؟!؟
نادية: من نيتك... جيني نيشان بلاما تبقا دير ليا السوسبانس..
أمير: نادية ركزي.. un jeune سميتو رشيد... زوين... ظريف و كايعرف يهضر و سيغڤيابل و عندو رونج روڤر...
نادية: واش كاين غير رشيد واحد في كازا عندو رونج روڤر؟!؟ تسنا تسنا... كاين واحد... كان كايعاود ليا عليه سفيان... داك اللي كايجيكم من العائلة... لااااااااااا... ماتقولهااااااااااااش...
أمير: لااااااااا... نقولها...
نادية: مايمكنش...
أمير: را كاندوي معاك أ نادية...
نادية: و باش عرفتي انت هادشي... (كايعاود ليها كلشي) دابا اللي فهمت من هادشي كامل... سفيان في راسو و ماقالهاش ليا... و جا سيمو و ماقالهاش ليا... دار معاه يتغداو و ماقالهاش ليا.. وااااااخا أ السي سفيان...
أمير: و لكن بليز.... خليني برا هادشي...
نادية: كون هاني.. غير تهلا ليا في ختي...
أمير: بلاما توصيني عليها... يالله نخليك دابا... (كايمشي)
¶ نادية كاتكعا و كاتمشي عند سفيان.. غير كاتجي و تحل الباب بلاما تدق...
سفيان: نادية على الأقل دقي... ماشي بوحدي...
نادية: اووه ديزولي... مايسحابش ليا... (كاتبدا تشوف في رشيد و كادير راسها كاتحقق فيه) بحال ايلا كانعرفك... آاااااه رشيد ياك؟!؟
رشيد: هو هادا... و لكن سمحي ليا حيت ماعرفتكش...
نادية: غير ماعقلتيش عليا... انا اللي جيت مع سفيان لعرس ختك.. نادية...
سفيان: وي رشيد.. هادي اللي كانت معايا في عرس حفيظة...
رشيد: آااااه نتي البيستي ديال سفيان... و غاتكوني نتي نادية... على سلامتك... كي دايرة مراكش؟!؟
نادية: (مستغربة) مراكش؟!؟ باش عرفتيني كنت في مراكش؟!!
رشيد: (كايرتبك و كايعرف راسو زبلها) أشنو؟!؟ كيفاش باش عرفتها؟!؟ سفيان...
سفيان: (مستغرب) مال سفيان؟!؟
رشيد: سفيان اللي قالها ليا...
سفيان: (متفاجئ) أنا؟!؟
نادية: سفيان اللي قالها ليك؟!؟ (كاتشوف في سفيان) سفيان... باشمن مناسبة قلتيها ليه؟!!
¶ رشيد كايبدا يغمز في سفيان...
سفيان: (شافو كايغمز فيه و بارتباك) دابا هو كان غايجي عندي البارح... قلت ليه لا ماتجيش...
نادية: ايوا...
سفيان: (مرتبك) قلت ليه لا... أنا مع واحد السيدة غانوصلها لدارها يالله جات من مراكش...
نادية: و ايلا كنت معاك.. كيفاش ماسمعتش هاد الحوار؟!؟
سفيان: ماسمعتيهش؟!؟ كيفاش ماسمعتيهش؟!؟ ماسمعتييييييهش حيت... حيت...
نادية: حيت أشنو؟!؟
سفيان: (كاينفاعل) سكتي خليني نفكر... زعمة نتفكر... آاااااه... تفكرت... دوا معايا ملي كنتي نتي و أمير كاتهضروا على برا...عقلتي؟! و أصلا أنا ديما كانهضر عليك... ياك أ رشيد؟!؟
رشيد: (بارتباك و ضحكة مصطنعة) الله ياودي... ديما مصدعني نادية قالت نادية مشات... و ملي كان كايجي عندي لكندا و كانمشيوا لشي بلاصة... كايقول نادية غاتعجبها هاد البلاصة... غير حيت تلاقيتك مرة وحدة ماعقلتش على وجهك مزيان.. و لكن نتي معروفة.. معروفة...
نادية: واخا... ايوا أ السي رشيد الله يسلمك.. و مراكش ديما زوينة... المهم أنا جيت غير على قبل الكونطاكط ديالي...
سفيان: ياك قلتي ليا باغة تمشي مع نجاة... (رشيد كايسمع سمية نجاة كايحدر راسو)
نادية: (شافتو) لا... نجاة مابقاتش مسالية لينا هاد الأيام ماعرفت مالها... المهم عطيني الكونطاكط ديالي...
¶ في هاد اللحظة كايدق شي واحد في الباب...
سفيان: ادخُل...
¶ كاتدخل نجاة مبتسمة و غير كاتشوف نادية كاتلف و تجمع الابتسامة..
نادية: نجاة عمرك طويل.. يالله جبدناك...
نجاة: (مرتبكة) جبدتوني؟!؟ علاش؟!؟ مادرت والو...
سفيان: نجاة مالك؟!؟
نجاة: والو.. جبت غير دوك les bons de commande اللي سولتي عليهم...
سفيان: مازبانش بيهم.. و لكن مزيان.. غير آريهم ليا... (كاتحطهم و كاتبعد)
نادية: سفيان.. عرفتي أشنو... غير خلي عندك الكونطاكط.. مانخايكش حاصل بلا طوموبيل... و لكن غاتوصلني مع الخمسة... و غدا ان شاء الله دوز ليا في الصباح... نخليك دابا مع صاحبك.. رشيد.. (كاتسلم عليه) فرصة سعيدة شفناك تاني... و بلغ سلامي لحفيظة... (كاتخرج)
نجاة: (في خاطرها) كاتعرف رشيد و هو كايعرفها.. ماقالهاش ليا.. و شكون هاد حفيظة؟!!
سفيان: نجاة... باقة شي حاجة أخرى؟!؟
نجاة: شنو؟!؟ لا.. والو.. حتى انا غانمشي... (كاتخرج و كاتجري للبيرو ديالها)
سفيان: (كاينوض يسد الباب) رشيد.. ديالاش هادشي كامل اللي وقع؟!؟ باشعرفتي نادية كانت في مراكش؟!؟ ماقتهاش ليك و ماكان حتى سبب باش نقولها ليك... و علاش خليتيني نكذب عليها؟!!
رشيد: أوكي .. واعدتها مانقوليك والو... و لكن دابا خاصني نعاود ليك...
سفيان: (باستغراب) واعدتيها؟!؟ شكون هادي اللي واعدتيها؟!
رشيد: هانتا اجلس و انا غانعاود ليك كلشي بالتفصيل...
¶ كايعاود ليه رشيد كلشي بالتفاصيل ديال التفاصيل... من نهار تلاقا نجاة حتى خلاها من بعد ماتغداو...
سفيان: و أشنو خاصني نفهم من هاد الفيلم؟!؟
رشيد: واقيلا كانبغيها...
سفيان: (كايغوت) WHAT؟!! رشيد ماتهبلنيش... ماشي يالله غانعرفك... كانعرف النص في البناات اللي عرفتي.. و كلهم قلتي عليهم كاتبغيهم..
رشيد: لا أ صاحبي... مابقيتش دري صغير... و هادشي اللي حاس بيه مختلف ماشي بحال داكشي الآخر... و ماباغيش نتفلا...
سفيان: واش سمعتي راسك و انت كاتعاود ليا؟!؟ عرفتيها السبت بالليل و اليوم يالله الاثنين... و السبت مامحسوبش أصلا... يومين.. و جاي تقوليا كانبغيها؟!؟ تا كي درتي ليها؟!؟
رشيد: ماعرفتش.. و لكن هادشي باش حسيت ملي شفتها ديك الليلة... واقيلا هادا هو اللي كايقولوا عليه حب من أول نظرة...
سفيان: شوف... غاتوگض معايا...
رشيد: و الله داوي بالصح...
سفيان: واخا... انت كاتبغيها.. و هي؟!؟
رشيد: هي كاتقوليا خلينا أصدقاء...
سفيان: أصدقاء؟!؟ هادو بلانات نادية... و لكن تسنا.. واش نادية عارفة و كنتوا كاتمثلوا عليا؟!؟
رشيد: لا لا... نجاة قالت ليا قبيلا أنها عادوات لصحاباتها عليا... و لكن ماعارفينش شكون نكون... حتى انا ماطاحتش في بالي ان نادية صاحبتها غاتكون هي نادية عشيرتك و جبتيها لعرس ختي...
سفيان: شوف... غاتمشي انت دابا... و نتلاقاو ورا الخدمة... غاينعيط لسيمو... حيت واقيلا حتى هو داير نفس الزبلة ديالك...
رشيد: شكون هاد سيمو؟!؟
سفيان: سيمو ديالنا.. سيمو خضيرة... رجع من أستراليا... نوض انت دابا و أنا غانعيط لسيمو.. نكونفيرمي معاه فين و معاش... و نعيط ليك نعلمك... خاصنا شي جليسة بحال ديال زمان...
رشيد: واخا أخويا... ماغانخرج فين.. غانبقا نتسناك حتى تعيط..
¶ كايخرج رشيد من عند سفيان و كاينزل كايجري من دروج السوكور باش مايتلاقا مع تا واحد...
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
¶ كاتوصل 5.. كايجي سفيان عند نادية للبيرو ديالها ماكايلقاهاش.. كايمشي عند ايمان و امير.. كايلقا غير أمير جالس...
سفيان: فين نادية؟!!
أمير: مشاو مع ويبا.. و نادية قالت ليا نوصل لسك هاد الميساج حرفيا... قالت ليك غدا في الصباح حط الطوموبيل قدام العمارة و عطي الكونطاكط للكونسييرج.. و قبل ماتجيبها دير فيها ليصونص اللي كونسوميتي و انت كاطوطح بيها في الزناقي... و قالت ليك بلاما تحاول طلع عندها للدار.. و ماتسناهاش التحت...
سفيان: و علاش؟!؟
أمير: بانت ليا كاعية مزيان... قالت ليك غير حشمات تاخد ليك الطوموبيل... و لكن عارفة طوموبيلتك خاسرة مابغاتش تخليك بلاش.. أشنو درتي ليها أ عمي؟!!
سفيان: مادرت ليها والو... هاديك جاتها الحالة تاني... المهم دوز قدامي...
¶ و كل واحد كايمشي فاهم الموضوع غلط... من غير وهيبة اللي باقة مافاهمة والو بيناتهم...
$يُتبع...
∅