အပိုင်း(၅၂၉)
[လောရှင်းက အနုပညာလောကမှ နုတ်ထွက်မည့် သတင်း ကြေညာခြင်း]
"စုန့်ယန်ရှု၊ ဒီကနေ့ သတင်း ဖတ်ပြီးပြီလား။ တကယ့် သတင်းထူးကြီးနော်။ နင်အရင်က ကြီးကြပ်ခဲ့တဲ့ အဆိုတော်လောရှင်းက အနုပညာအလုပ်တွေကို အပြီးတိုင် ရပ်နားလိုက်ပြီတဲ့"
စုန့်ယန်ရှူ၏အနုပညာရှင်က သူ့လက်ထဲမှ ဖုန်းကို လှမ်းပေးကာ လှောင်ရယ်နေသည်။
"ဒီကနေ့ သူ့ရဲ့ဂီတပွဲကို ပရိသတ် တစ်ယောက်တောင် မတက်ဘူးတဲ့။ သူ့လောက် သနားစရာကောင်းတဲ့သူကို တွေ့ကို မတွေ့ဖူးဘူး"
ဤသတင်းကို ကြားပြီးနောက် စုန့်ယန်ရှုက သူ့လက်ထဲမှ မဂ္ဂဇင်းကို အောက်ချထားလိုက်ပြီး တုန်တုန်ရီရီဖြင့် ဖုန်းကို လက်ခံလိုက်သည်။
"မဖြစ်နိုင်ပါဘူး"
"မင်းက ဘာကို ပြောချင်တာလဲ။ သတင်းတိုင်းက ဒါပဲ ထပ်တလဲလဲ တင်နေတာလေ။ ငါက အရင်တည်းက သူ့သီချင်းတွေ ကြိုက်ပါတယ်။ ဒါပေမဲ့ ကြည့်ရတာတော့ လောရှင်းက တော်တော်ကံဆိုးနေပုံပဲ"
ထိုစဉ် စုန့်ယန်ရှုက သူ့စကားသံကို နားမထောင်နိုင်ပေ။ သူ့စိတ် ဟာလာဟင်းလင်း ဖြစ်နေပြီး သူ့နှလုံးသားကို အပ်ပေါင်းများစွာဖြင့် ထိုးနှက်နေသကဲ့သို့ ခံစားရသည်။
သူမက ထျန်းကျင်းရွှမ်အပေါ် ထားရှိသော ခံစားချက် အစစ်အမှန်ကို မဆုံးဖြတ်နိုင်သော်လည်း ထျန်းကျင်းရွှမ် ဂီတလောကထဲမှ နုတ်ထွက်သွားရသည့် အကြောင်းအရင်းက သူမ ပေးခဲ့သော နာကျင်မှုကြောင့် ဖြစ်လိမ့်မည်။
ဤအတွေးကြောင့် စုန့်ယန်ရှုက သူ့ဖုန်းကို ချက်ချင်း ဆွဲထုတ်လိုက်ပြီး ထျန်းကျင်းရွှမ်ကို ဖုန်းခေါ်သည်။ သို့သော်လည်း တစ်ဖက်မှ ဖုန်းမကိုင်ခဲ့ပေ။ ထို့ကြောင့် ထျန်းနင်ကို ဖုန်းခေါ်ကြည့်ရန် ဆုံးဖြတ်ခဲ့သော်လည်း ထျန်းနင်၏ဖုန်းက စက်ပိတ်ထားသည်။
"သူ အဲလို မလုပ်ရဘူး။ အနုပညာအလုပ်တွေကို ရပ်နားပစ်လို့ မဖြစ်ဘူး"
စုန့်ယန်ရှုက သူ့အတွေးထဲ ရေရွတ်နေမိသည်။
"အစ်မစုန့် ဘာဖြစ်လို့လဲ"
သူမ၏ မိန်းမောနေသော အပြုအမူကို သတိထားမိပြီးနောက် သူ့အနုပညာရှင်က သူ့ကို ဂရုစိုက်သော လေသံဖြင့် မေးမြန်းသည်။ သို့သော်လည်း စုန့်ယန်ရှုက သူမ၏ဘေးပတ်ဝန်းကျင် အခြေအနေကို ဂရုမစိုက်အား နားနေခန်း အပြင်ဘက်သို့ ပြေးထွက်သွားခဲ့သည်။
သို့သော်လည်း ထျန်းကျင်းရွှမ်၏ ဂီတဖျော်ဖြေပွဲ ကျင်းပသော နေရာသို့ ရောက်ရှိစဉ် ပစ္စည်းသိမ်းဆည်းနေသော ဝန်ထမ်းတချို့ကိုသာ မြင်တွေ့ရသည်။
"လောရှင်း ဘယ်မှာလဲ"
စုန့်ယန်ရှုက ဝန်ထမ်းတစ်ဦး၏လက်ကို လှမ်းဆွဲသည်။
"သူထွက်သွားတာ ကြာပြီလေ။ သူက ဘာလို့ ဒီနေရာမှာ ရှိနေရမလဲ။ ဒီဖျော်ဖြေရေးလောကကြီးက စက်ဆုပ်ဖို့ကောင်းတယ်။ လောရှင်းက အနာဂတ်ကောင်း ရှိတဲ့ လူငယ်။ တစ်စုံတစ်ယောက်က သူ့ကို အသုံးချပြီး နာမည်ကျော်ချင်တာလေ။ အခုတော့ အခြေအနေကို ကြည့်စမ်းပါဦး။ သူ့ဖြူစင် ရိုးသားမှုကို ပြဖို့ ရွေးချယ်စရာ မရှိတဲ့အဆုံး ဒီဖျော်ဖြေရေး လောကထဲက ထွက်သွားတယ်။ အပြောင်းအလဲ မြန်တဲ့ ပရိသတ်တွေကလည်း မနေ့တစ်နေ့က အထိ သူ့ကို စွဲစွဲလန်းလန်း သဘောကျသေးတယ်။ ဒီကနေ့မှ သူ့ကို စက်ဆုပ်ရတာနဲ့။ အဲဒီလူတွေရဲ့ ခံစားချက်ကလည်း အပေါစားဆန်လွန်းတယ်"
သက်လတ်ပိုင်းအမျိုးသားက မကျေမနပ် ရေရွတ်သည်။
ထိုစကားသံကို ကြားပြီးနောက် စုန့်ယန်ရှု၏ခံစားချက်က ယခင်ထက် ပိုဆိုးရွားလာခဲ့သည်။
လောရှင်း အခက်ခဲဆုံး အချိန်များကို ရင်ဆိုင်နေရစဉ် သူ့အလုပ်ကို ခိုးယူခဲ့သော အနုပညာရှင်၏ အလုပ်ကို သူမက စီမံ့ခန့်ခွဲနေရသည်။
ထျန်းကျင်းရွှမ်က သူမကို ပြောခဲ့ဖူးသော စကားတစ်ခွန်းကို ရုတ်တရက် သတိရသွားသည်။ သူမကို သူ့မိန်းကလေး အဖြစ် နေထိုင်မလား သူစိမ်းအနေဖြင့် နေထိုင်မလား မေးမြန်းခဲ့ဖူးသည်။
လောရှင်းက ငယ်ရွယ်သေး၍ အနာဂတ်ကောင်းများကို လက်လွှတ်ရမည်ကို စိုးရိမ်စိတ်ကြောင့် သူတို့နှစ်ဦးကြား ဆက်ဆံရေးကို ပေါ့တန်တန် သဘောထားသည့် ပုံစံဖြင့် တုံ့ပြန်ခဲ့မိသည်။
သူမ၏အပြုအမူက လောရှင်း၏ နှလုံးသားကို အေးစက်စက်ဖြင့် ခွဲခဲ့သည်။ နောက်ကျောကို ဓားနှင့် ထိုးသကဲ့သို့ ဖြစ်သွားလိမ့်မည်ဟု သူမ မမျှော်လင့်ခဲ့ပေ။
"လောရှင်း"
...
[လောရှင်း၏ ချစ်သူအဖြစ် နာမည်ကျော်ခဲ့သော မိန်းကလေးက လောရှင်း ဖြူစင်မှုကို ရှင်းလင်းပေးခြင်း]
[ကျောက်ချင်းရီ၏ မန်နေဂျာက အတင်းအဖျင်း သတင်း ဖန်တီးခြင်း၊ ကျောက်ချင်းရီက လောရှင်း၏ဖြူစင်မှုကို ပြသရန် ခိုင်မာသော သက်သေ ထုတ်ပြခြင်း]
[ကလေး၏ဖခင်က အာရှစီးပွားရေးလုပ်ငန်းရှင် ဖြစ်သည်။ လောရှင်းနှင့် သက်ဆိုင်မှု မရှိခြင်း]
ထျန်းကျင်းရွှမ်က အနုပညာအလုပ်ကို ရပ်နားကြောင်း ကြေညာပြီး နာရီဝက်ပင် မကြာလိုက် ကျောက်ချင်းရီက လောရှင်း၏ဖြူစင်မှုကို သက်သေပြပေးခဲ့သည်။
ထို့နောက် ကျောက်ချင်းရီက ငိုယိုထားသော မျက်နှာဖြင့် သတင်းသမားများ၏ အင်တာဗျူးကို လက်ခံခဲ့သည်။ သူမ၏ပုံစံကို ကြည့်လိုက်ရုံဖြင့် အလွန်အမင်း စိတ်ဓာတ်ကျနေပုံပင်။
"လောရှင်းကို မကောင်းမြင်နေကြတဲ့ သူတိုင်းကို ဒီကနေပဲ ရှင်းရှင်းလင်းလင်း အသိပေးပါရစေ။ အခု ကျွန်မ ကိုယ်ဝန်ရှိနေတဲ့ သတင်းက လောရှင်းနဲ့ ဘာမှ မသက်ဆိုင်ပါဘူး။ လောရှင်းက ဘာအမှားမှ မကျူးလွန်ထားပါဘူး။ တကယ်တမ်း ပြောရင် ကျွန်မ နဲ့ လောရှင်းက 'WH'ရုပ်ရှင် ပထမဆုံးပြတဲ့ ပွဲမှာပဲ ပထမဆုံးအကြိမ် ဆုံဖူးတာပါ။ ရှင်တို့ မယုံကြည်ရင် ကျွန်မတို့ရဲ့ အချိန်ဇယားတွေကို တိုက်ကြည့်လို့ရပါတယ်"
"ကျွန်မတို့က အခုမှ ဆုံဖူးတာ ချစ်သူတွေ ဖြစ်နိုင်ပါ့မလား။ ကျွန်မက လောရှင်းကို အသုံးချပြီး ကျော်ကြားချင်တဲ့ အတွေးရှိလို့ ခင်မင်ဖို့ ကြိုးစားပေမဲ့ သူက ငြင်းဆန်ခဲ့ပါတယ်။ ဒါကြောင့် အခုနာမည်ကြီးနေတဲ့ အတင်းအဖျင်း သတင်းအားလုံးက နားလည်မှု ကြီးကြီးမား လွဲနေတာပါ"
"လောရှင်းကို အရမ်းနာကျင်စေမယ်လို့ မထင်ထားခဲ့မိဘူး။ စင်ပေါ်မှာ သူပြောခဲ့တဲ့ စကားတွေကို ကြားပြီး ကျွန်မ အပြစ်ရှိသလို ခံစားရတယ်"
"ဒါကြောင့်လည်း ဖြစ်ပျက်သမျှ ကိစ္စတိုင်းကို ရှင်းလင်းဖို့ ဆုံးဖြတ်ခဲ့တာ။ ရှင်တို့တွေက တစ်ယောက်ယောက်ကို အပြစ်တင်ချင်ရင် ကျွန်မကိုပဲ အပြစ်တင်လိုက်ပါ။ ဒီကိစ္စက လောရှင်းနဲ့ လုံးဝ မသက်ဆိုင်ပါဘူး"
"နောက်ဆုံးအနေနဲ့ ပြောချင်တာတော့"
"ကျွန်မ တစ်ညလုံး မတင်မကျ ဖြစ်နေတဲ့ ကိစ္စတစ်ခုကို ပြောချင်တယ်"
"လောရှင်းရဲ့ပရိသတ် ဖျော်ဖြေပွဲကို ပေကျင်းမြို့ရဲ့ အကြီးမားဆုံး ဖန်သားပြင်ကနေ ကျွန်မလည်း မြင်ခဲ့ပါတယ်။ အရိုးသားဆုံးပြောရရင် ကျွန်မသာ လောရှင်းဆိုရင်လည်း အရမ်းကို စိတ်ပျက်မိမှာပဲ"
"ပရိသတ်တွေရော ကျွန်မလို မခံစားရဘူးလား"
ထိုစကားကို ပြောပြီးနောက် ကျောက်ချင်းရီက ကင်မရာဘက်လှည့်ကာ ဂါရဝပြုလိုက်ပြီး သူ့လက်ထောက်၏ ကာကွယ်ပေးမှုဖြင့် ထွက်သွားသည်။
"အဲဒီကျောက်ချင်းရီက ဟာသပဲနော်။ ဘာလို့ စောစောစီးစီး ဝန်မခံတာလဲ။ အခုမှ လူရှေ့ထွက် ရှင်းရလား"
သတင်းသမားများက ခနဲ့သည်။
"အနည်းဆုံးတော့ သူ့တာဝန် သူယူသွားတယ်လေ။ ယောက်ျားလေး အနုပညာရှင် တော်တော်များများ ဒီလို ကိစ္စမျိုး ကြုံဖူးကြပေမဲ့ အများစုက နှုတ်ဆိတ်နေကြတာလေ"
တခြားသတင်းထောက်က ဖြည့်စွက် ပြောသည်။
"ငါ ပြောချင်တာတော့ လောရှင်းရဲ့ ပရိသတ်တွေက ဒီတစ်ခေါက်တော့ တရားလွန်သွားပြီ။ ဘာပဲဖြစ်ဖြစ် လောရှင်းက သူတို့ သဘောကျခဲ့ဖူးတဲ့ အနုပညာရှင်ပဲလေ။ ဘာလို့များ သူ့ဖျော်ဖြေပွဲကို တစ်ယောက်မှ မတက်တာလဲ"
"ဒါက ရှားပါးဖြစ်ရပ်မှ မဟုတ်တာလေ။ ဒါပေမဲ့ အခုချိန်မှာ လောရှင်းက ဒါတွေကို ဂရုစိုက်မယ် မထင်ဘူး။ သူက အဆိုတော် မဟုတ်တော့ရင်တောင် သူက ထျန်းမိသားစုရဲ့စတုတ္တသခင်လေးပဲလေ။ သူ့အိမ်ကို ပြန်ပြီး သူ့မိသားစု စီးပွားရေးကို လုပ်ကိုင်လို့ ရတာပဲ"
"ဒီလို စက်ဆုပ်စရာကောင်းတဲ့ ဖျော်ဖြေရေးလောကထဲက ထွက်သွားတာ သူ့အတွက် ကောင်းပါတယ်လေ"
လောရှင်းက အကြောင်းမဲ့သက်သက် သိက္ခာချခံရပြီး ကျောက်ချင်းရီနှင့် ပတ်သက်မှု မရှိခဲ့ပေ။
သို့သော်လည်း အနုပညာလောကထဲမှ သူ နုတ်ထွက်သွားခြင်းက စုန့်ယန်ရှုနှင့် သူ့ပရိသတ်များကို အထိနာစေခဲ့သည်။
"လောရှင်းကို မယုံကြည်ခဲ့မိလို့ ငါ အရမ်းနောင်တရတယ်"
"သူက တကယ် ထွက်သွားပြီပဲ။ ဘာလို့များ အလွယ်တကူ ထွက်သွားရက်တာလဲ"
"သူက ငါတို့ကို စိတ်ပျက်သွားလို့ပဲ ဖြစ်မယ်"
"လောရှင်း တောင်းပန်ပါတယ်။ ငါတို့တွေ တကယ်တောင်းပန်ပါတယ်"
ပရိသတ်များက အွန်လိုင်းပေါ်တွင် တောင်းပန်စာများကို အဆက်မပြတ် တင်ကြသည်။ တချို့ပရိသတ်များက သတင်းစာတွင် ကြော်ငြာထည့်ပြီး သူတို့စိတ်ရင်းကို သက်သေပြကြသည်။ သို့သော်လည်း အရာအားလုံး နောက်ကျသွားခဲ့ပါပြီ။
စုန့်ယန်ရှုက တစ်ညလုံး ထျန်းကျင်းရွှမ်ကို ရှာဖွေခြင်းဖြင့် အလုပ်ရှုပ်နေသည်။ သူမက ထျန်းအိမ်တော်အထိပင် လိုက်သွားခဲ့သည်။ သို့သော်လည်း ထျန်းကျင်းရွှမ်က ထျန်းနင်၏အိမ် သွားရခြင်းကို နှစ်သက်ကြောင်း သူမ သိနေသည်။
စုန့်ယန်ရှုက ထျန်းနင်ကို မျက်နှာချင်းဆိုင်ရန် မဝံ့မရဲ ဖြစ်နေမိသည်။ ထို့ကြောင့် သူမလည်း ရွေးချယ်စရာ မရှိသည့် အဆုံး လက်ဗလာဖြင့် အိမ်ပြန်လာခဲ့သည်။
"အစ်မစုန့် ဘယ်သွားနေတာလဲ။ အစ်မ ရုတ်တရက် ပျောက်သွားတယ်"
စုန့်ယန်ရှုက သူ့အနုပညာရှင်ကို ကြည့်ပြီး မျက်ရည်မထိန်းနိုင်ပေ။
"လှပတဲ့ အခိုက်အတန့်လေးကို ငါ လွဲချော်သွားလို့ပါ"
"အစ်မ ဘာတွေ ပြောနေတာလဲ"
စုန့်ယန်ရှုက သူ့အနုပညာရှင်ကို ကြည့်ပြီး သူ့ခံစားချက်ကို ရုတ်တရက် မထိန်းချုပ်နိုင်ပေ။
"ငါ သူ့ကို အရမ်း တောင်းပန်ချင်ပေမဲ့ သူ အရမ်းကို သွေးအေးသွားမယ်လို့ မထင်ထားခဲ့ဘူး"
"အစ်မစုန့် ဘာတွေများ ဖြစ်လာလို့လဲ"
စုန့်ယန်ရှုက စိတ်တည်ငြိမ်အောင် ကြိုးစားပြီး ခေါင်းခါသည်။ သူမ၏စိတ်ထဲ အတွေးတစ်ခုတည်းသာ ရှိသည်။ သူမက သူ့ကို တွေ့ခွင့် မရနိုင်တော့ခြင်း ဖြစ်သည်။
ထျန်းကျင်းရွှမ်က အဆိုတော် အလုပ်ကို စွန့်လွှတ်သွားခြင်းကြောင့် သို့တည်းမဟုတ် သူမကို နှုတ်မဆက်ဘဲ ကျောခိုင်းသွားခြင်းကြောင့် သူမ စိတ်ထိခိုက်နေခြင်းလော သူမ ကိုယ်တိုင် ဝေခွဲမရပေ။
အပိုင်း(၅၂၉)
ပြီး၏။