#Love_Story
#Ep_05
الأحد 1 يناير
الساعة: 6h30
مراكش
نادية: (كاتفيق ايمان) نوضي... سربي.. راني خدامة غدا...
ايمان: (نعسانة) أويلي... يالله نعسنا...
نادية: نوضي.. بحالك ينعس... و لكن مزيان هادشي اللي وقع... باش نرد معاك البال تما...
ايمان: و الله حتى أول مرة....
نادية: اللي كايزعم مرة كايضصر و المرة كاتولي ديما...
¶ ايمان كاتنوض بالنفاخة وكاتبدا توجد...
نادية: دوزتها لك... ولكن خاص عقاب.... (كتجبد التيكي ديال التران و كاتقطعهم)
ايمان: حشومة عليك... واش دابا ما غاتدينيش معاك؟!؟ وقلت لك سمحي ليا و حلفت لك ما نعاودش ندير شي حاجة من وراك.... (كاتبدا تبكي)
نادية: دويت...
ايمان: وعلاش؟!؟
نادية: ما يمكنش ايمان الذهبي اخت نادية الذهبي تمشي لكازا بالتران... ولكن غاتطير لها... (وكاتوريها بييي ديال الطيارة في البورطابل)
ايمان: كاتهضري من نيتك؟!؟ (كاتخط-ف ليها البوطابل من يديها و كاتأكد و هي مامتيقاش) واو... و 1st class....
نادية: على ختك قليلة... هذا كادو ديال راس العام من الحاج الشادلي... ملي فقت لقيتو مسيفطهم ليا...
¶ ايمان كتعنق نادية وكاتوجد بالزربة و هي فرحانة و متحمسة باش تمشي لكازا... 10:30 ديال الصباح كايكونوا في الطيارة وكاتقلع بهم...
ايمان: نادية.. واش غايتلقى لنا شي واحد في المطار؟!!
نادية: لا... غايكونوا مازال ناعسين كاملين... غانشدوا طاكسي من تما...
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الساعة: 10h45
كازا (في دار نجاة)
أم نجاة: (داخلة على نجاة كاتغوت) نوضي يا ديك العوجة... شكون هداك اللي وصلك البارح بالليل؟! دوي...
نجاة: (كاتحل عينيها دايخة بالنعاس) كيفاش شكون هداك اللي وصلني بالليل؟!
ام نجاة: حليمة جارتنا قالت ليا شي واحد بطوموبيل واعرة جابك البارح بالليل... وكنتي حالتك ماشي هي هاديك وحفيانة و بحال ايلا باكية...
نجاة: (وهي كاتكسل) صافي التقويسة وصلت... ما غانطفروش... هداك خدام معيا... ملي حطيتك و رجعت للحفلة تفركعوا ليا الروايض... وحصلت في الطريق... وهو اللي عتقني... وكمارتي كانت مجلخة حيت فاش بقيت بوحدي في داك الليل تخلعت... وبديت كانبكي... و كنت حفيانة حيت ضرني الطالون... صافي.. بردتي؟!؟ وا سيري دابا عطي التقرير لحليمة... باش حتى هي توصلها لگاع الجيران... نهار غانفرقوا هذا الدرب غايجي عندي الزهر كيدردك...
ام نجاة: وفين طوموبيلتك دابا؟!!
نجاة: (كاتنقز من بلاصتها) اوييييييييييييلي ما عيطتش للديباناج... كوراه داوها للفوريان ولا شفروها...
¶ وكاتنوض دغيا تلبس باش تمشي تقلب على طوموبيلتها...
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الساعة: 11h15
¶ ويبا كاتفيق و غير كاتحل عينيها كاتعيط لنجاة... كيبقى يصوني ولكن ما كاتجاوبهاش....
ويبا: اواه تكون زعما باقة ناعسة؟!؟ (كاتعاود تعيط و غير كايتجاوب) ألو يا الحقيرة يا الهرابة... مالك ما كاتجاوبيش؟؟ عارفة راسك شنو دايرة... يلاه عاودي لي اش وقع ليك البارح... سربي سربي...
رشيد: آش غانعاود ليك أ ختي؟!؟ و أشمن حقيرة و لا هرابة؟!؟ أولاً... فيقتيني من النعاس... ثانيا... راك غالطة في النمرة...
ويبا: ما يمكنش نكون غالطة حيت معيطة من آخر مكالمة ليا معاها... و النمرة مدخلاها في التيليفون هادي سنين... واش هادا ماشي البورطابل ديال نجاة؟!؟
رشيد: نجاة؟!؟ شكون نجاة؟!؟ آااااااااه نجاة.. (كايتفكر) مشكلة هادي... La puce ديالها بقات في البورطابل ديالي...
ويبا: (مافاهمة والو) تا آش كاتقول؟!؟
رشيد: سمحي ليا اختي.. دابا البارح في الليل... نجاة كانت معايا و كان طافي ليها البورطابل... ملي بغات تعيط ليك دارت la puce ديالها في بورطابلي.... مع كانا معطلين و الليل و كانت زربانة... نسات ماخداتهاش و بقات عندي..
ويبا: البارح بالليل؟!؟ كانت معاك نجاة؟!؟ نجاة كانت معاك انت.... "راجل"... في ليلة راس العام.. والوقت كان معطل؟!! وا شوووف ليك الحقيرة... مدبرة على راسها و تقول لينا منحوسة... أنا اللي منحوسة على ديك الليلة الزينة اللي دوزت...
رشيد: سمحي ليا.. و لكن أنا اللي مافهمتش آش كتقولي... كايبان ليا فهمتي كلشي غلط... عافاك أختي... ممكن تعطيني شي نمرة فين نقدر نعيط ليها باش ندي ليها la puce ديالها...
ويبا: آااااااودي... شي عطاتو شي زواتو... واخا أ خويا... هاك النمرة ديال الفيكس ديال دارهم...
¶ كاتعطيه النمرة... و غير كاتقطع معاه كاتبغي دغيا تسبقو و كاتعيط هي الاولى لنجاة... كاتلقاها خرجات...
$يُتبع...
∅