ابد منطاني كلبي هناك اخليها
رجعت اركض واطلع صورتة !
من النار وابوس شمحترك بيها
باهر الجنديل
تدري شلون حالي لمن تروح
مثل حال العراق بلاية بغداد !
ايهاب المالكي
واتحمل دلالك عادي مرخوص
عزيز الكعدة عند الوالدة يصير !
بقلمي انا مليكا الجبوري
لاتنسون التصويت و تعليق بين الفقرات حبيباتي 🦋🦋
___________________________
مريانا :
كاعَدة على الدرج أَيدي على خدي
صافنة على صَوت صياح خالي على أَمي
أَعض بشفتي بلا حيله أَتنفس بهدوء
صَار صوت تكسير زجاج مصحوَب بصياح أَمي
- لا تنسى أَني اختك الجبيره على اي اساس تمنعني أنس !
أنس - خويه تردين ترحين للرجال تحركين الجو عليه و مرته هناك
- حقير أنس ميستاهل يعيش
أنس - يعني الأحسن تقتلي !
- الاحسن أقتله هل خسيس مايستحق يعيش دمرنااا !!!
ضحَكت بقهر وكمت من الدرج
أَصعد باية باية و گلبي يدك سَريع
ابلع بريكي وأَحس الهوى ديخنكني حيل
فتحَت باب غرفتي و سَديتها بهدوء
قفلتها و تقربت مِن مرايتي
أَبتسمت أسرح شعري
:- ستوها عرفَت بي نذل بس من حجيت جنت غلط
نزلتَ دموعي حاره على خدي رجفَت شفايفي
وأَني أتذكر هذَيج الايام بكُل تفاصيلها
كعدت بالكاع حاضنه رجلي على صدري
دموعي تنزل بهدوء تمر على راسي لحظه بلحظه الذكريات السيئه
عضيت شفتي أَكتم شهكاتي
همست بهدوء بيني وبين نفسي
:- وين جنتي من كتلج تحرش أبوي بيه
أيدي بشعري اجره بقوه
بلعت ريكي يرجف جسمي أتذكر ذاك اليوم
مثل اي بنت صغيره تحب الحياة
حياتها ورديه تتراوحَ بين ألعابها و قصصها الطفوليه
حياتي بدَت تتغير و تصير كابوس مستحيل أخلص منه
من بعد مابدت أمي شغليها الجديد
جانَت تتركني وي أبوي وهي تبتسم بوجهي
- رايحه للدوام مرياني لا تخافين بابا يمج
جانَت تطلع متجاهله نظراتَ الخوف يلي تاكل بضلوعَي
بس يختفَي ضلها وأي أثر الها
أنسحب من شعري بقوة لداخل غرفه فارغه
غرفه متروكه يمليَها الغبار لعدم أَستخدامنا الها
يشمَرني لجوه يصيح بيه بخزره تدَب الرعب بداخلي :- أياج يطلع الج حس مريان
أهَز راسي بدونَ صوت مكتفيه بدموعي
يسَد الباب بقوه ويقفلهَا
لملمت نفسَي ورجعتَ لوره أنتجي على الحايط القريب من الشباك
انام على الكاع الباهته من أثرٍ الاتربه
أيدي على شعري انام عليها والم نفسي وأحضنها
حر .. برد .. مطر .. عواصف
ماجَان يهتم
الغرفه صَرت أَعرفها
صَرت أروح لهناك بدون ماحجي شي
أَدخل و يرمقنَي بنفس النظره ويطلع
أَمي من كدَ تعلقها بذاك الرجال جانَت ماتحس
بعمرها ماحسَت بيه ولا بنظراتي حتى ملابسي قبل لا ترجع يغيرهم
ومِن تدخل و تشوفَني تبتسم بوجها
وتحضنه تتشَكر منه :- تعبت نفسك حبيبي أكيد دمرت نفسها
لحد ماتمشي بينَا السنين
وأحنا باقين على هل حَال بدون تغير
يطوَل أبوي مرات اسابيع واشهر يختفي بيها
ومحَد موجود ويسَاعد أمي بتربيتي ويبقى يمي غير صديقتَها
وصديقة طفولتها المُقربه
يلي عاشوا الحلوه قبَل المرة
يلي أَمي ماتحجي وياها وماتصيحها الا بلقب " أسيلي "
جانت أمي تظل ساعاتي بالفراش
تبجي عليه و تحرم نفسها من اي طريق للراحه
من صَبح لحد الليل بالغرفه على نفس الكعده ونفس البجي
تجي أسيل تطبطب على جتفي
تبوس راسي وتهمسَ :- وره كُل عسر يسر مريان
بَس أي يسر ؟
أمي يوم عن يوم وضعها يسوء
صحتها بالنازل و اوضاعها تتدهور
لحد ماحس بيها جدي حبيبي
أخذها بسرعه للمستشفى لان ماعجبه وضعها
وجان توقعه صحيح أمي تضاعف عدها اعراض الربو والخفقان
من دريت بهل موضوع انهاريت
ركضت لجوه الدرج أبجي و أبجي بقهر
بكُل براءة أرفع ايدي لفوك وادعي :- يالله طيب ماما
وبهيج أسيل ظلت مرافقه لامي ماتركتها
صارت تجي أسيل لبيتنا هواي بالوقت يلي موجود بي ابوي
أمي مجانت تحس وتكتفي تبتسم وتحضنها
- شكرًا أسيلي داتعبج وياي صَار حمل البيت عليج اسفه
ضحَكت أمسح دموعي
:- أسيلها يلي خطفت زوجها منها
أَمسح دموعي بطرف أيدي
بعدَني ستوي عمري ميتجاوز 9 سنوات
وأني أشوف صور أسيل و أبوي سويه متقربين من بعض
شفتَ بأكثر من صورة و بأكثر من وضع
مانسى اللحظه يلي شفتَ ذيج الصور ورجفتي
دموعي يلي ملت عيوني وأَني اشوف أبوي وي أعز صديقه لامي
حاولتَ أَحجي وياها وأنبها
بَس خوف الخوف دائمًا يخلينا نتراجع عن هواي امور ..
خوف بنتَ صغيرة ماتعرف شنو تتصرف
شنو مُمكن تكول لامها وهيه دتشوف أبوها ديخون أمها
لحد ما أجه ذاك اليوم
دخل أبوي للغرفه بهدوء الصبح
يمشي على أطراف اصابيعه بلا اي صوت
بالفتره يلي جنت انحبس بيها بالغرفه
صرت اخاف من أقل الاصوات وماكدر انام
لزمني ارق وصار مُزمن وياي مايترركني ابد يسحب نوم من عيني
بسبب يلي عشته نومي صَار خفيف حيل
وابقى بالساعات صافن على الفراغ
بس مو افرغ من داخلي
صَارت كوابيس تلاحكني من مكان لمكان
صَرت أشوف خيال أسود يراقبني
حتى أَصوات غريبه أسمع
دخَل لغرفتَي بهدوء بذاك اليوم المشؤوم
صَار فوكاي يحاول يتحرش بيه
لو ما لطف رب العالمين بيه
وأَمي تكعد من النوم تصيح باسمه
ماعرف شنو مُمكن يصير بذيج البنت المراهقه ..
أمي أنقذت بنتها من ابوها بدون متدري
حسيت برجفته وهو يسمَع صوتها
عافني وطلع بسرعه
كعدت من النوم بسرَعة أول ماطلع
كمت على حيلي أمشي بالغرفه أزلغ بخدودي
صَرت أدك والطم و ابجي وابجي بدون صوت أنتظر يطلع
كعدَت بالباب قفلتها
أسمع كلامهم
صوته وهو يحجي وياها
وأَني بعدني بصدمتي أرمش بعيوني أبجي
صَار صوت مفاتيحه يشيلهم بنفس الطريقه
صوت أمه وهيه تودعه ممزوج بسدة الباب الخارجيه
بَس تاكدت منه طلع من البيت
كمت على حيلي اركض لغرفه أمي
فتحت الباب ودخلت عليها ابجي واشهك
أخترعت وكامتَ عليه تصيح
- شبيج يمه ولج شصاير شبيج
جرتني من أيدي للمطبخ تغسل بوجهي تقره قرآن مخترعه من وضعيتي :- ولج يمه بس بطلي بجي كلبج حيوكف شصاير أحجيلي
باوعتَ بعيونها وشهكت
- بابا ..
- شبي أبوج مريانا !
- ابوي تحرش بيه ماما والله
سكتت دموعي بلحظتَها على صوت الراشدي والألم يلي أحتلني بوقتهَا
رجعت تضرب بيه أَكثر تلطم على وجها وراسها
- عزا العزاني صخام ولج مريانا يا طايحة الحظ شلون تحجين هيج !
شهكت رافعه أَيدي أحمي نفسي
- ماما والله ماكذبت بحرف والله داحجي صدُك
- اششششش ولا حرف كُله من وره الموبايل يلي تاخذي كلت لأسيل لا تنطيها كبرت وصَار راسها يعرف الامور الطايح حظها
- ماما حبابه
جرتني من شعري لفوك
فتحت باب غرفتي شمرتني لجوه
راحت تدور بغراضي لحتى وصلت للموبايل واخذته
طلعت من الغرفه ووكفت كدام الباب
باوعتلي بنظره أخيره وهمست
- أبقي هنا كم يوم تتربين
فزيَت من صفنتي على صوت الباب
كمت على حيلي مسحت دموعي بطرف ايدي
فتحتها أتصنع الأبتسامه بوجه خالي أنس يلي وكف وياي
دخل للغرفه يبتسم بوجهي بهدوء
حضني يطبطب على ظهري يهمس بحنان أفتقده
- شلونها حبيبة خالها شلونج وي الدراسه
مريانا - زينه ماشي حالها
انس - لا تنسين اذا تحتاجين مساعده تجيني
أبتعدت عنه أبتسم بوجها
- لتخاف خالي اي شي احتاجه بسرعه اجي ماستحي
هَز راسه وكان بحلكه حجي بس ميعرف شيكول
أفتهمت الموضوع وأبتسمت
- خالو تحتاج شي ؟
حك أرنبة أنفه وهمس
- أمج مريانا
نعقج وجهي أرمش بعيوني
- شبيها أمي ؟
بلع ريكه يباوع على الباب ويرجع يباوعلي
كعد على الجربايه بحيث الباب تصير كدامه
- مريانا أمج الأكتئاب راح يدمرها !
نزلت دموعه يبجي بقهر
- والله صعبه عليه أشوف عزيزة عيوني هيج
مريانا - ماتحسنت ؟
أنس - لا مدا تتحسن لاكثر من دكتور رحنا لاكثر مِن مختص بأمراض الأعصاب تواصلت يمكن الخلل براسها
رفع راسه دموع بعيونه يباوعلي
بلعت ريكي خايفه أهمس
- خالو بداعتي ماما شبيها ؟
أنس - عزيزة عيوني من بعد الصدمة يلي عاشتها هواي تاذت هواي تدمرت مريان
مريانا - اني حجيت وي أسيل و ..
أنس - هل موضوع بالذات تنسي مريان
كام على حيله صَافن بوجهي
- لا عبالج نسيت طلعتج وي أسيل بنص الليل
مريانا - بس هيه جبرتني أطلع وياها
أنس - والحادث يلي صَار !
مريانا - خالو والله بالغلط صَار
أنس - لا تقنعيني مريان لو ما لطف رب العالمين جان مات الولد على ايدجن.
مريانا - بس هيه رادت تسَاعد أمي و توضح الي صَار
أنس - وضحة أكثر من مرة ميلا
وضحة وجانَت حجتَها
ضحكت بأستهزاز أردد كلامها
- لكيت بأبوج الحنان يلي مالكيتَه عند غيره
دفَر خالي الطبلة وصَاح
- لا تخلوني أغلط على الساعة الأجة بيها هل خسيس
مريانا - عزااا خالي ماما !
أنس - نامت تلكيها جنت منتظر مفعول المنوم
مريانا - دمرتوها بهل منومات والمهدئات.
دارَ وجها عاكدَ حواجبة
أبتسم أبتسامه جانبية يهز بأيدة
- بيهن او بدونهن أمج ماتطلع هل كلب من راسَها
دنَك يعدَل الطبلة
رفَع نفسه يباوعلي يضحَك
- ها صَح نسيت أَكُلج
هزيَت راسي مستغربه تصرفاتَه
ضحَك متقَرب مني :- راح يطَلع خارج العراق
رفعت حواجبَي بصدمة
فتحت حلكي أَحجي بأستنكار :- شدتحجي على بختك خالو !
أنس - للأسف راح يطفر وحده
مريانا - وحبيبته ؟
دارَ وجها علية عاكَد حواجبه
عضيت شفتي أَرمش بعيوني
أستوعب جفصتي :- يعني قصدي ماعنده حبيبه ؟
ظَلت نظرات خالي تراقبني ممصَدك
هَز راسه يحجي بهدوء مُخيف :- مريانا
مريانا - ها خالو
أنس - أني أتخبل من الجذب
بلعت ريكي أَمثل الأبتسامه
- وأني مامجذبه بشي
أنس - عمران عنده حبيبه لخ مريان ؟
أَخذت نفس مستسلمه
كعدَت على الجربايه وهو كعد بصَفي
- عنده خالو
أنس - شلون عرفتي
رفعتَ راسي عليه أَباوع بعيونه
- أسيل كالت ألي كُلشي
أنس - شكالت بالضبط
مريانا - عمران عنده حبيبه أَسمها يانا قبل
جان يستغلها ويَاخذ فلوس مِن عدها كُل فتره
أنس - شوكت هل حجي
مريانا - مِن زمان حيل لان المره طلعَت جبيره بالعمر
عكدَ حواجبه صَافن بعيوني يحجي بتسائل
- بس أبوج مو ذاك الكبر ؟
مريانا - الي فهمته المرة حبت واحد أصغر منها
أنس - الي فهمته أني المره جانَت تراهق وي أَبوج وهيه جبيرة !
مريانا - خالو مو أبوي حباب
أنس - محسوبه عليه للإسف
خله أيده على لحيته يلعَب بيها
هَز رأسه كان ديفكر بموضوع وديحسبه بعقله
باوعَلي رافع حواجبه
ضحَك بوجهي يهمس :- أَبوج لاعب على كُل الحبال
مريانا - شلون ؟
أنس - يريد يطلع من العراق حتى يخلص من خبال أمج و غيرة أسيل و هوس المرة الجبيرة !
زمرد :
- بعد اتصال حسن صاح السميدع عليه حتى احضر ملابسه ويروح للفاتحه واني احاول بكل قوتي اخليه يبقى لان جان ماخذ جرعه الكيمياوي والمناعه نازله عنده
وكف يلبس ملابسه
وأني وراه أفرك بايدي خايفه عليه
تقربت من عنده وطبطبت على ظهره
- سيد الله يرحمها لخالتي بس
وكف عَن الحركة و دار وجهه عليه
صفن على ملامحي يتأملني بهدوء عكس يلي بداخله
أخذ نفس بعمق يهمس
- ثلاث سنوات حارميني من أمي
زمرد - ادري والله سيد
حضنتَه بسرعة أبجي أحجي بقهر
- والله اخاف عليك مو بيدي ماعندي غيرك
صَار يلعب بشعري بهدوء
حضني بأيدة يستنشق عطري بهيام
- سكينة گلبي
رفعَت راسي عليه صافنة بملامحه :- عيونها و روحها
سميدع - لازم اروح ماكدر
زمرد - لا تروح حباب أبقى هنا يمي سميدع
سميدع - تردين تحرميني من فاتحتها زمُرده ؟
زمرد - لا لا أبد ماريد هيج مو قصدي
روح حبيبي محروس بعلي الله ومحمد و علي وياك
أبتسم بوجهي و أَخذ راسي يبوسه
ابتعد من يمي وطلع لبره يلبس حذائه ديطلع
اخذ مفاتيح السياره وراح
يحاول يمشي الها بدون ما يوكع
درت وجهي على لهيم و أسيد يلي صافنين علينا
صحت بيهم أعض بشفتي
- وره أبوكم اويلي لو تعوفوه اخبزكم خبز العباس
ركضوا على صوتي وره أبوهم
أيدي على گلبي أبجي بهَدوء ميته قهر
سودة عليه حبيبي كوه ديمشي من الكيمياوي
نَضراتي بقت عليهم
مادخلت لجوه الأ تأكدت صعدوا وي أبوهم
دار وجها عليه لهيم أبتسم يأشرلي بأيده أدخل لجوه
هَزيت راسي وهمَست بداخلي
- ربي برد گلبه وأنتقم من كُل واحد جان السبب بلي هو بي
سميدع :
حسيت على اثنين يسندوني
ويصعدوني للسياره التفتت لكيت
اسيد ولهيم ساعدوني اصعد وصعدو وياي
أخذت نفس بهدوء درت وجهي عليهم
- وين رايحين؟
أسيد - يابه منعوفك لوحدك هسه ماخذ جرعه
سميدع - خوش لعد بس ابد لا تتمشكلون ويا احد هناك
أَنتبهت عليهم واحد يباوع للثاني
رجعت كررت كلامي بحده :- لا تتمشكلون
لهيم - صَار يابه مانسوي شي
هزيت راسي بتفهم
أجه أسيد بمكاني يسوق السياره
جنت كاعد اراقبْ الطريق و حسره بداخلي
شيصير لو خلوني أَشوفج يوم واحد يايمه
شنو مُمكن أسود شي يصير للانسان
غير أن يسمع خبر وفاة امه
وهو مشايفها سنين
ياريت الظروف جان أحسن
ياريت العالم ماتغيرت وبقوا بنقاء گلوبهم
كُلشي بعد السقوط تغير حتى نفوس العالم
زاد حقدهم
وزاد الحرام و القتل
زادت الجرائم وزاد الخوف بداخلهم
دخلنَا للفرع و فَز گلبي
جني ذاك الطفل الصغير
يلي جان يبيع بهل البسطيه البسيطه
وارجع من الدوام وتتلكاني أمي
بَس هل مرة منو راح يتلكاني وهيه ماكو ؟
معقوله بعد ماكو لمه حنونه
بعد ماكو صوت ضحكتها و كلامها
راحت ومابقت بس الذكرى تجمعنا بيها
وعيت على نفسي من بعد ما وصلنا
فتحت باب السياره بسرعه وأني اشوف تابوتها كدامي
ركضت ألها دموعي تجري
ركضت و بداخلي صوت قوي وألم
انهارت كل قواط وماكدرت رجليه تشيلني
ردت اوَكع على الكاع بسبب تعبي
بَس تلكاني حسين
حضني حسين بقوه يبجي
يتلمس بشعري يوكع بأيده ويزيد بجي
طبطبت على كتفه احاول اخفف من حزنه
أبتسمت أبتسامه جانبيه رددت بأذنه بهدوء
:- اجيت تبجي على جتفي؟
بعد ايش حسين بعد ما ماتت واني محروم منها ثلاث سنين ؟
بَس سمع كلامي حس على نفسه
أبتعد عني مدنك راسه عافني و دخل لجوه
رفعت راسي مقوي نفسي
ضاغط على ايدي اخفي رجفتي
أنتبهت على حسن من بعيد يباوع مصدوم
هزَيت راسي أردد بداخلي
كانوا يكدر يسمع كلامي حسن بدون ماحجي
هذا حالي يا أخويه الهيبه الي جان اذا حجيت الكُل تسكت
شعري وكع وضعفت حيل من اثار الكيمياوي
أدري بيك تريد تجيني
وأني هم أريد أجيك وأحضنك
بَس أكو جروح تلجم وتدك بالعظم حيل
أَخذتني رجلي الها
نايمه مثل الملائكه بهَدوء
ريحة المسك والياسمين تزينها
لملمت نفسي وكعدت بالكاع
لازم التابوت بايدي صافن عليها
حسيت بأيد لهيم و أسيد يسحبوني
دفعتَهم أخزر بيهم
- وخرو من يمي عوفوني احجي ويا امي
أسيد - يابه جانت مصابه بكورونا لا ..
سميدع - شنو تخافون من الميت يعديكم
أسيد - لا يابه على شنو نخاف من الموت بس ..
سميدع - روح منا أَبني
بقيت اسولف وكأنما كاعده واحجي وياها ساعه اضحك من اتذكر مواقفنا من توفى ابوي وعشنا يم عمي وجنا صغار وساعه ابجي عليها لان بعد مراح اشوفها
حاضنها بكل قوتي كأنما طفل بحضن امه
اباوع عليها وهي نايمه واحجي وادعي بكلبي واقرأ الها قرآن
حسيت بأيد لهيم ترفعني
ماكدرت أقاوم تعبان حيل حيل
لزم أيدي الثانيه أسيد وساعدني أكوم
يمشوني علكيف للسياره
كدرت أسمع صوتهم و همساتهم
سمعتهم وهمه يحسدوني ويكولون
- هنياله كم ولد عنده يسندوه بكبرته
رفعت راسي للسما عيوني مدمعه
حجيت بدَاخلي أشكر ربي :- الحمدلله ربي رزقتني باولاد صالحين يحسدوني عليهم.
صَار الوقت يلي لازم يشيلوها بي
تقربوا لمة من كرايبنا يمثلون الحزن
دنكوا يردون يرفعوها بس ماكدرت اشوف وأسكت
صحت بيهم بسرعه
- عوفوا أمي محد يشيلها منكم أولادي يشيلون
باوعت على لهيم و أسيد
فهموا عليه نظرتي وراحوا بمكانهم
رفعوها وي حسن و حسين بدون الكرايب
محد بيهم جان واكف ويانا
محد جان موجود ووكف بشدتنا
حتى عضيدي ماشفته موجود اليوم وياهم
خلوها على السياره وصعدوا
صحت على لهيم و أسيد أشر الهم
- ماتعوفون بيبيتكم وياها محد يشيلها غيركم وي عمامكم
صعَد أسيد بس بقه لهيم كدامي واكف
وكف بالباب أسيد يصيح
- ولك يلا لهيم اصعد !!
لهيم - اسيد روح انت اني باقي يم ابوي اخاف عليه لا يتخربط ومحد يعرف يداريه روح انت اني باقي يم ابوي
سميدع - لهيم !
دار وجها عليه و حضني يحجي وياي
- ماعوفك يابه وحدك
سميدع - وبيبيتك !
لهيم - وداعتك يابه أسيد مكفي و موفي
هَز راسه أبوي بقلة حيله
صعد بالسياره واخذتَه لبيتنا يرتاح
جان تعبان والتعب ماخذ من حيله هواي
أسيد :
- هزيت راسي بالموافقه مستجيب لكلام أبوي ورحت وياهم حتى نشيعها وناخذها لمثواها الاخير
الطريق كُله عيوني على عمامي
أريد أحضنهم وأحجي وياهم أتقرب منهم
الدم يحن لاهله
وأَني هيج ماكدر بدونهم
خاصه وأَني أشوف نظراتهم عليه
كانوا ديتطمنون عليه بأني بخير ومابيه شي
وصلنا للنجف لأرض أمير المؤمنين
مر الوقت بسرعه وكان الدنيا تذكرنا بكل مره
هذا مصيرنا وهذا قدرنا أشتغلوا على أخرتكم
خلصنا مراسيم التشييع والدفن وجانو اقاربنا تعبانين ويوم كامل بلا اكل
صاح عمي حسين على السايق
حسين - حبيبي ابو كامل شوفلنا مطعم زين خطيه الجماعه ويانا تعبوا وبلا اكل
- يمعود اذكر الله يا اكل منو اله نفس ياكل
خزره عمي ورجع يحجي وي السايق
- ابو فلان مثل مكتلك
جنت ساكت وبس اباوع على الي صار
وجان من ضمن الي رايحين ابن عم ابوي خاطر
مجان يكعد عنده حركات مو قانونيه ديسويها جان دائما يريد يصير بيني وبين عمي حسين اذا تقربنا واحد على الثاني وميخلينا نتقرب
فركت وجهي أستغفر دار وجها عليه عاكد حواجبه
- شبيك
أسيد - شبيه
- لا شو متنكب وجنك معاجبك شي
لزمت أعصابي ماكوم أفلش راسه بالجامه
خزرته وأبتسمت بنفس الوقت
- راح نوصل للمطعم
- اي ادري قابل مارايحين مطاعم
أسيد - حظر نفسك اغاتي دتنزل
بَس شافني هيج هَز أيده وسكت
صَاح السايق على عمي
- يلا وصلنا
نزل عمي وخله العالم الجايه تنزل
دخلنا للمطعم ونزلو الاكل حتى ياكلون
الاقارب
جنت صَافن نفسي مسدوده
مالي نفس للأكل كُلشي ديصير عكسنا
شفت عمي حسين من بعيد جان تعبان حيل
مبين عليه الجوع مخلص وجبته ماكدرت اكل وأني اشوفه هيج
اخذت وجبتي أبتسم
حتى اخليها كدام عمي حسين
بس كمز خاطر من يمه يصيح بنص العالم
سحب الماعون من ايدي ورجعه لمكانه
- لا لا ميريد ميريد
أسيد - شبيك عزيزي اني مو جوعان خلي عمي ياكل
خاطر - لا عمك اكل وشبع اكل انت حتى نروح
صفنت بوجها أرمش بعيوني
عكدَت حواجبي خازره وهو يبتسم بوجهي
حس بالوضع عمي حسن وكام يصيح نكوم
دفعوا الحساب وأَني عيني مانزلت عنه
صعدنا بالسياره بس دمي يغلي
كعد خاطر بصف عمي برجعه
طول الطريق جان يهمس بأذن عمي
بين لحظه وثانية يعقج وجها
يرجع يباوعلي يخزر بيه
دخلنا لبغداد فجأة كام حسين
راح للسايق حجه وياه شي بهمس
هَز راسه السايق وأشرله يزيد الكروه بعد
ماهتميت هواي ورجعت راسي على شباك
أَستغربت من دخلنا لطريق بيتنا
عكدَت حواجبي وهمست
- معقوله ذاب الجليد !
أبتسمت فرحان گلبي يركص
اردد بداخلي بكُل سرور :- رجعوا أخوانك الك يابه
وكفوا كدام باب بيتنا
كام حسين من مكانه فتح الباب
باوع عليه وصاح بصوت عالي يلفت انتباه الناس
- كوم يلا لأهلك روح
لا تنسون أحنا متبرين منكم
عدَلت كعدتي فاتح حلكي مصدوم
أجاني حسين جرني من سياره ينزلني
صَار صوت خاطر يحجي وي العالم يمثل
خاطر - والله خطيه هل حسن و حسين شكد شافوا من اخوهم
درتَ وجهي بسرعه
رحت أريد أضربه أفلش وجهه المعفن
بس لزمني عمي من ايدي ودفعني على باب يصيح بيه
حسين - روح لأهلك لا تلح ومحد يتقرب بعد ممنوع تجون للفاتحه
فتَحت الباب ودخلت لجوه مقهور
أول مره بحياتي أنقهر لهاي الدرجه صدمني
جنت متوقع شي بَس فجأة كُلشي توقعته صَار عكس
دخلت للصاله أمشي علكيفي
جان أبوي نايم مغمض عيونه بهدوء
أمي بصفه و لهيم يدلك رجليه بدون ميحجي شي
رفعَت راسها أمي عليه
- ها يمه الله يساعدك شوكت أجيت
هزيَت راسي وكعدت على القنفه أنزع حذائي :- قبل شويه أمي
سميدع - وبيبيتك
رفعت راسي على أبوي
جان بعده مغمض عيونه بس كاعد
- يابه ماعفتهم لحظه
زمرد - بس تأخرت
أسيد - نزلوا ياكلون
كام أبوي على حيله
بعد لهيم من كدامه و صفن بعيوني
دنكت راسي أخفي ضوجتي ماريد يحس
سميدع - شصاير
أسيد - يابه مصَاير بَس
سميدع - بلا جذب أسيد
أسيد - يابه هذا خاطر الخيخه
وكعدت أسولف أله السالفه
أحجي منا و ملامح أمي تتغير منا
بَس خلصت كلامي خلت أمي ايدها على حلكها
::- شكد مسموم مال أخبزه خبز
سميدع - مايفيد وياه هل سكط خبز
دار وجها أبوي عليه وصَاح
- وأنت مالزمته كتلته بنص العالم طيحة حظة !
أسيد - والله خفت لا يجي عليك وتطلع حجاية تضوجك
لهيم - لو رايح جان حفرت كبر ثاني بصفه
زمرد - أَنت أسكت اكرمنا بسكوتك صايرلي مجرم تعلم على السجون
لهيم - غير يستفزون الواحد يطلعوه عن طوره !
أسيد - تمنيت أدوسه بالكوستر بس ماكدرت
لهيم - خاب شو أسكت
اشو أَنت بطولاتك مطلعهن بس علينا الزمه وادوس بمصارينه
أسيد - هو شقصدك بطولاتي شبيه قابل
زمرد - كااافي كاافي خبصتونا كوموا لفوك بسرعه
أسيد - بس ..
خزرتني وصَاحت
- لفوك أبوكم تعبان وانتوا تتناكرون
خلت أَيدها على راسه تلعب بشعره يلي يطيح بأيدها أخذت نفس بهدوء وهمست
- تريد أسويلك جاي ؟
سميدع - خاف تتعبين دنيا ليل
زمرد - لا عادي هو جاي شنو قابل
سميدع - روحي لعد سوي النا اني وياج جاي
وتعالي يمي يابعد هلي نكعد سويه مثل ايام زمان وكعداتنه الحلوه
كمت بهدوء من يمه
دخلت للمطبخ و أَنفجرت أبجي
أطلع صوت بغراض المطبخ أكتم شهكاتي
شغلت الطباخ وخليت القوري على النار
فتحت الباب وطلعت لبره أتنفس
الهوى بارد يداعب وجناتي
أيدي على صدري أحركه مخنوكه
رفعت راسي لفوك :- ربي دخيلك أشرح صدري
عيوني على السماء ينزل دمعها بهدوء
أيدي بعدها على گلبي أستغفر
نزيت على دكة الباب
صفنت على الصوت أرمش بعيوني
بلعت ريكي عاكدَه حواجبي
- منو يجي هيج وقت
صَار صوت سميدع يصيح عليه ادخل
ماهتميت و تقربت من يم الباب خايفه من الدكات
جانت تزيد اكثر واكثر كان احد يستنجد بلعت ريكي أرمش متردده
خليت أيدي على القفل وفتحته
مديت راسي بَس نشل جسمي من يلي شفته
رجفَت شفايفي أرمش بعيوني
- ديغم !
مشه بخطوات بطيئه لجوه
جسمي يرجف وجها بي دم و أيده تنزف
وكف كدامي يباوعلي
شعره نازل على عيونه الجميله
حجه أسمي الممزوج بشهكة هدمت حيلي
::- زمُردة خويه
مديَت أيدي أله أبجي
- ها يبعد أختك أنتَ شبيك
::- هدموا حيلي ياخويه ..
حجه هل كلمه وطاح بالكاع
لا أيد ولا رجل تتحرك ساكن بمكانه ..
... يتبع
___________________________
باقي فقط 3 بارتات ونختم قصتنَا 😔🤏🏻
يوم الاربعاء بارت
يوم السبت بارت
وهيج أَحنا مايفصلنا على البارت الاخير الأ بارتين 🫂
المفروض البارحه ينزل بارت
بس صَار ظرف عند الابطال وماكدروا
شنو توقعاتكم للاحداث الجايه ؟ شنو راح يصير ؟
لا تنسون التصويت و التعليق بين الفقرات 🦋
وخليكم موجودين بالقناة صَار فترة دانزل صور الابطال 😉
يوزر القناة malak_qwn
بارت 4200 كلمه
وكيحات مو تكولن البارت قصير
لان تكملوه على البلوتوث 😂🦋🦋