أكبر من أحلامي أشوفك حيرتي الما يمها حيرة
قانع بكلشي يخصك و أبد ما محتاج خيرة
خشن گلبي و من عرفتك بيّن الطبعك حريره
منين ما تندار أحبك بحر و يحاوط جزيرة
يا طموحاتي الأخيرة و يا معاناتي الچبيرة
المهم حبني إعلى مودك وين تلگة انسان مثلي
حبّك بگلبه و ضميره !
بقلمي أنا مليكا الجبوري 🩷
لاتنسون آلتصويت و تعليقَ بين الفقرَات عيوني 🩷
____________________________
هُجَام - لج يوم هياته أَجه الدكتور
كمتَ على حيلي متلهفهَ گلبي ينبض بسرعه
وكفتَ أَبلع بريكي أَطكطك أَصابعي
- أَكيد أنتوا اهله للمريض
لهيم - اي دكتور شبي ابويه
هُجَام - شصار وياه شوكت نطلع
- للأسف مانكدر نطلعه هسَه نحتاج بعد فحوصات وتقارير
زمرد - بس ليش دكتور مافتهمت شبي
بَاوع علينه واحَد واحَد بشفقة
دنك هَز راسَه ورجَع رفعه لام شفايفَه
::- شاكين ابوكم مريض بالسرطان
وكفَ الزمنَ بيه
لزمَ أَيدي هُجَام و لهيم
جسميَ يرجف أَبلع بريكي أَرمش
هزَ راسه الدكتور متأسَف
- ادري الخبر صعب عليكم بس هذا قضَاء وقدر رب العالمين
زمرد - يتعالج منه ؟
لمَ شفَته يهَز راسة
- مُمكن مُمكن .. تكدرون تبلشون بالكيمياوي
زمرد - نبلش مو مشكله
لهيم - يمه
زمرد - شنو يمه شنو
لهيم - ابوي
زمرد - هسه نروح و نكول اله قابل شبي
وخرتَ اديهم عني أَمثل القوة
- شبيكم قابل شكو .. أَدري أَني بأبوكم حيرجع احسن من قبل
أسيد - دكتور شوكت يبلش بيهن
- كم إجراء يحتاج
وان شاء الله من الاسبوع الجاي او بعد كم يوم بس نتأكد من كم شغله
أسيد - شكرًا دكتور ماقصرت
وخرَتهم عني لازمه عبايتي من الحنَك
رايحة لـ حبيبي و روحي .. فتحَت الباب أَقوي نفسي
بَس دخلت رفعَ راسة علية
ضحك يرفَع أَيده الي :- تعالي سكينتي خوفتَج علية
رحتَ عليه حضنته قوي لاول مرة بحياتي
شدد حضنَه يضحكَ :- شبيك عيني أَنتِ صايَر شي ؟
بَهل الأثناء دخل أَسيد و هُجَام
عدَلت كعدَتي أخلي العباية على راسي أَسحبها
أَبتسم بوجهم بهدوء
- شبيكم بويه صاير شي ؟
أَسيد - يابة نريد نكولك شغلة
خلة أَيده على الفرشه يدَفع نفسه لكدام يعدَل كعدته
- اي يابة خير ان شاء الله
عضَيت شفتي لازمه العباية بأيدي قوي
دنكَ راسة أَسيد مايكدَر يخلي عيونه بعيون أَبوه
::- يابة الدكتور يكول مريض بالسرطان
دَرت وجهي على سميدع
جانتَ ملامحه هادئه ماسوي اي حركه
أَبتسم بهدوء يأَشر الهم يتقربون عليه يريدهم
بَس صاروا بصفَة جرهم بحضنة يطبطب على ظهرهم
- الف الحمدلله والشكر على كل حال
هُجَام - يابه على شنو الف الحمدلله ماتكلي
سميدع - لا ابني ميصير هيج كلام
ميجوز تحجي هيج .. هذَا قضاء وقدر ربنا الكريم
أَني مؤمن و راضي بكُلشي يصير
خلوها ببالكم ماكو شي بهاي الحياة يصير
الأ ورب العالمين كاتبه النه و محدد قدرنا مو بيدنا شي
بس المهم تنتهي حياتنا و احنا مسلمين
مؤمنين بالله و رسوله وبالأئمة الاطهار سلام الله عليهم
الي مكتوب أليه راح يصير
خليكم صبورين و اقوياء هيه هاي الحياة
بمره من المرات تكون الك حلوه .. و بمرة ثانية تضوكك المُر
المهم يا اولادي
ترفعَون أَيدكم لفوك وتكولون
- الف الحمدلله على كل النعم يلي عشنه بيها حياة غيرنا يتمناها
أَيدي على حلكي أَكتم شهكاتي
دار وجها صفَن علية ثواني وراها أَبتسم بهدوء
::- زمُردتي أَنتِ أَنسانة مؤمنة مارح يصيني الأ يلي كتبه رب العالمين
زمرد - أَني متأكدة حترجع زين بعد العلاج
سميدع - الي كاتبه ربج يصير يا زمُرده
أسيد - يابة أَني .. أَني واثق بيك تكدر تكمل حياتك ويانا و تتعالج بأسرع وقت
سميدع - أَن شاء الله أَبني
أسيد - راح أَجي وياك بكُل مراحل علاجك
مارح اعوفك وحدك نجي اني وياك و نرجع اني وياك
سميدع - خير ان شاء الله
عليمن بعد هل بجي و النوح يا عيني مايصلح
خلة أَيده على وجناتي يحركها بهدوء
- هَل العيون الحلوة أَنخلقت حتى تضحك مو حتى يمر عليها الدمع
شهكتَ مبرطمه مثل الطفلة
- والله ماكدَر أَعيش بدونَك صير زين حباب
- يلي ربج كتبه أَلية راح يصير زمُردتي
أُنتِ قوية و أنتِ عكازتي الأسَتنْد عليها خليَج سباعية.
زمرد - بس أَني مو سباعية أَني أَخاف اعيش حياتي بدونك
سميدع - أَتعلمي ياحبيبتي
" خلي الخوف يخاف منج مو أنتِ تخافين
لهيم :
عفتَهم يدَخلون لأبوي و طلعتَ لبرة أَريد أَدخن
أَمشي بالممرات و الشوارَع تايَه
دائمًا براسي سؤال
شنو أَكثر شي ياخذ عقل الأنسان ويسلب راحته ؟
شلون نعيَش مرتاحين
شلون نتعلم الحُب و معنى المشاعر العميقه بداخلنا
أورث الجكاره و أَمشي
أَنفخَ دخَان الجكاير منَ صدري
أَباوع على جمرة الجكاره و توهجها
گلبي مشعوط و يحترك أَكثر منها
لمحتَها منَ بعيد كاعدة على الرصيف تاكلَ
أَبتسمت أَعدل ملابسي .. شمَرت الجكاره بالحاويه ورحت الها
تقَربت منَ عدها بدوَن ماتنتبه عليه
مادري هيه منتبَها و تغلس مترد على أَحد
لهيم - مريانا ؟ شتسوين هنا
رفعتَ راسَها عاكدة حواجبها هزَت أَيدها حلكها مليان أَكل و تحجي
::- اهووو هم انت ؟ شنو ماخلص منك ؟
ضحكتَ عليها و كعدَت بصفَها صافَن على شعرها
- بعد اشتغل لسانها شيسكته
مريانا - فوكااها انت احد دازك عليه ؟ لا لا جديات
لهيم - عوفي هذا الحجي هسه أريد أَسئلج سؤال
باوعتَ علية تاكل وتخزر بيه
- أَسئل غرد
لهيم - خير شعندج هنا شفتج ماتوقعت يعني ..
مريانا - معليك
لهيم - ها ؟
مريانا - معليك لتدخَل
رفعت جتفي لفوك وكمت على حيلي
- بكيفج
عكدَت حواجبها فاتحة حلكها
مريانا - وين رايح ؟
لهيم - واكف على اعصابي وشفتج هنا عبالي تحتاجين شي بس متستاهلين
مريانا - وليي منا لا تخليني اصيح واكول يتحرش بيه واخليهم يسحلوك
لهيم- اذا تكدرين سويها منتظرج هنا اليوم ما اروح
مريانا - اوكي لعد شوف شراح اسوي
كامتَ على حيلها وره ماخلت الاكل بالجيس
صرفنتَ ردانها مستعده تعيط
تقربت عليها لزمت ايدَها
دفعتني تخزر بيه تعيط
- شبيك الووو شبيك شوَ فد مرة
لهيم - يابة حتصيحين وتلمين العالم علينا
مريانا - لعد غير أَنتَ كلت صيحي !
لهيم - وانتِ شدعواج خبله بكُلشي تصدكين
مريانا - أَنت واحد سزز فد مره
أَمشي منا أَتركني بحالي شتريد مني اووي
لهيم - وحده مخبله أنتِ صوجي شفتج هنا كاعده بالكاع تاكل
كلت اساعدها قهرتني بس طلع لسانها طويل
مريانا - منوو مخبله احترم نفسك لا الم الحرس كلها عليك
لهيم - مخبله ومخها واكفه بي خانه
مريانا - هاي شبيك !
تعرفَنَي أَعرفك دتحجي وياي بهل طريقه !
لهيم - باوعي مالي خلكج انتي الضاهر قابليه مال حجي اني رايح وهاج هذا رقمي خاف تحتاجين شي اني هنا بالمستشفى
مريانا - تعااال لك زاحف متحرش ترقم بالبنات
لهيم - اوك جيبي الرقم لعد
هزَت جتفَها
رافعه حواجبها تخزر
شمرَته علية كالبة خلقتها
عافتنَي ورجعتَ كعدَت تكمل أَكمل مامهتمه
أَخذت نفسَ و كعدَت مرة ثانية بصفَها
جريت الباكيت أَريد أَورث جكاره الدنيا خانكتني
حجتَ بدون ماتباوَع بوجهي مستمرة بالأكل
- عندي ربو لتدخنَ يمي أَختنك
لهيم - شعجب أنتِ صغيرة على الربو
أَخذت نفس بعمق تحجي بهدوء
- على فكرة الأمراض ماتعرف صغير ولا جبير
لهيم - مادري مبين عليج مرتاحه بحياتج
رفعتَ راسها علية ترمَش بعيونها
عضَت شفتَها لازمه أَيدها بقوة تتنفس بسرعة
بلعت ريكها تحجي و شبه دموع على عيونه
::- أَنت لو مجرب تعيش ثلاث أيام بغرفه فارغه محد يمك جان محجيت هيج ولا حكمت على الناس من المظهر بس
كامتَ على حيلها شايلة غراضهَا
وكفتَ كدامي مُباشرةٍ تباوعلي بنظرات ماعرفَت أَفسرها
مريانا - ها صحَ تذكرت
أَني خالي دكتور بهَل مُستشفى وأَني جاية وياه ليش وشكو ؟ معليك
كمتَ على حيلي أَمشي وراها
أَصيح عليها توكف
- مريانا
مريانا - ولا حرف ماريد احجي وياك
لهيم - بس اوكفي شي أَنساني
وكفت بمكانها ماتحركَت دارت وجها علية تباوعَلي منَ فوك لجوة :- شتريد ؟
لهيم - أَبوي مريانا
رختَ ملامح وجهَا
- شبي عمو
تنهدت بقهر أَهمس
- سرطان الرئة
شهكتَ مخلية أَيدها على حلكها
- عزا أسفة مو قصدي
لهيم - لا لا والله ماصار شي
مريانا - ياربي ماعبالي هيج الموضوع
كول أَكدر أَساعدك بشي ؟
لهيم - أَريد بس يشرحولي وضعية أَبوي لان مدا أَفهم شي من كلامهم
مريانا - ميخالف أَمشي
لزمتَ أَيدي تسحبَني لجوة
تجَر بية بينَ المُمرات تدردم بينهَا وبينَ نفسها
::- أووف منك ننوسي وين رحتَ
وصلنَا لغرفة مكتوبَة على بابَها
الدكتور .....
دكتَ الباب و دخَلت بسرعة بدون ماتنتظر الجواب .. أَول مدخلتَ حجة خالها بأنفعَال
::- هذا أَبوج أَكتلة بأيدي الثنين والله !
جان منطَي النا ظهره بس صاحته مريانا ألتفت علينا عاكد حواجبة
- مريان أكو شي ؟
مريانا - يريد يعرفَ حالة ابوه و شنو مُمكن يسون اله
- أي وأَني بشنو أَكدر أَساعدة حبيبي
مريانا - أَحجي وي الدكتور وأَعرف كُل تفاصيل مرضة حباب خالو
تقَربت علية حضنته
- خالو ساعدة خطية لازم يعرف وضع أبوه
هزَ راسه خالها بتفاهم يبوسها
- تدلل وجه العسل
مريانا - يلا خالو أَستعجل عفيه
تقربَ علية الدكتور يبتسَم بهدوء
ملامحه مُقاربة لملامح مريانا بشَكل واضح
- بشنو أَساعدك أَبني .. شنو أَسم أَبوك
لهيم - شكرًا على مساعدتك
أَسم أبوي سميدع ....
- تمام خليك هنا أَروح أَعرف شنو السالفه و ارجع أَلكم
مريانا - مو تتأخر خالو
- ماطوَل عليج وجه العسل
عافَنا و طلع من الغرفة
صفكت أَديها تباوعلي بخبثَ
كعدَت على الكرسي وأَشرتلي بأيدها
- أَكعُد ليش واكف خاف تعبت
لهيم - لا شكرًا ست مريانا ما تعبان
مريانا - لا لا خاف تعبان ؟؟
لهيم - من كعدت هنَا أَرتاحيت و راح كل التعب
عوجت حلكها تهَز بأيدها
- عفية زلم شكد تتعايرون
لهيم - شنو سالفة مو جانوا يكولون
النساوين شكد تتعاير ؟ لو هذا تحديث جديد طكم
مريانا - والله عاد يطكنا ميطكنا بكيفنا
هزَت جتفَها لزمتَ موبايلها تكلب بي ممهتمَه لوجودي
عدَلت كعدتي أتحمحم
- مريانا
مريانا - هاا
لهيم - أسئلج سؤال بس لا تتعصبين
عوجتَ حلكها صافنه عليه
- بَس سؤال واحد
مريانا - أسئل
لهيم - شبي أَبوج ؟ ليش يحجون عليه هيج
رفعت راسهَا لفوك مرجعَته على الكرسي تهز رجليها بسرعة
شمرتَ موبايلها على الميز تحاول تتنفس بهدوء
- أَبوي وحش
لهيم - شلون مفتهمت ؟
تقربت بكرسيها وجها مقابل لوجهي
مايفَصل بيناتنا غير الميز الجبير
::- وينَ ماسمعتَ أَسم عمران أَعرف الشيطان قريب منك.
حجتَ على كلمة و كامت على حيلها
صَارت كدامي صافنَة علية ترمش بعيونها بَس
أَبتسمت أَبتسامة جانبيه و طلعت سجينه صغيره من جيب بنطلونها
شمرتهَا على الطبلة يلي جانت بالوسط أَشرت عليها تحجي بهدوء
::- برأيك شوكت تعرفَ نفسَك حياتك غلط بغلط !
شلتَ السجينة من على الطبله أَرد بنفس نبرة صوتها :- شوكت ؟
تقربَت علية وجهَا بوجهي صار
أَنتجت بأيدها على الميز تهمس ببرود
::- من تحتاجهَا بداخَل بيتك بس بالمقابل المفروضَ يكوَن أَكثر مكان مليَان بالأمان
ردَت أَحجي بَس فتح خالها الباب ودخل علينَا
أًبتعدَت عني متجتفهَ :- ها خالو
- الدكتور يكول أَبوك يحتاج عملية حتى يحددون نوع الورم بالمضبوط
لهيم - يعني ؟ شوكت يسوها ؟
- والله صراحه نصيحة اليوم الصبح و ياريت تكول لاهلك حتى يستعجلون
لهيم - ليش يعني اكو شي خطر عليه !
- لا بالعكس العمليه سهله وبعدها مايحتاج بس كيمياوي و راحه بال
لهيم - شكرًا الك دكتور أَخذنا من وقتك هوايَ
مريانا - قصدَك أَخذت من وقته
عكدَت حواجبي صافن عليها ممفتهم
خلة خالها أَيده على جتفي يطبطب يبتسم بوجهي
::- قصد وجه العسل أَنَّ هيه متاخذ من وقتي
لهيم - اها صَح
أَني أعتذر على كلامي لعد
مريانا - همزين حسيت على نفسك لعد
لهيم - من رخصتج ست مريانا
يوم العملية :
اليوم جان موعد العملية
الأجواء متوتره و مشحونة أَخذوه من عدنَا و دخلوه صالة العمليات حتى يعرفون نوع الورم و يحددوه
طوَل هل وقت أَبوي جان يريد أخوانه
ينَام و يكعد بهَل مدة القصيرة يصيح
::- زمُردة ما أَجوا حسن و حسين ؟ لطيفه؟
تكتفي أَمي بأبتسامه لطيفه تهدي بيها تطبطب على ظهرة :- أَكيد ميعرفون بس يعرفون يجون الك
يهزَ راسة بهدَوء و ينَام الدمعة بعيونه
كُل ما أَشوف أَبوي بهَل حالة يغلي دمَي و أَكرهم
أَكرهم كره مو طبيعي بحيَث منتظر أَقرب فرصة ألية حتى أَقتلهم !
فزَيت من صفنتي على أَيد هُجَام على جتفي :- ها شبيك
لهيم - مابية شي
هُجَام - شو غركان بالتفكير
لهيم - مدا أَفكر أَنسى
هُجَام - جم ساعة العملية ؟
- مثل هيج عمليات تطول حيل وتحتاج صبَر و قوة أَيمان
أَلتفتنا على صَوت الدكتور نفسَة خال مريانا
أَبتسم بوجهَي ومَد أَيدة
- نسيت أَعرفكم عن نفسي أَسمي نسيم
هُجَام - أَهلا أَهلا دكتور
بَس يعني والله أَحنا خايفين على أَبونا
- يلي كاتبه الله يصير و العملية ناجحة
لهيم - ليش هلكد واثَق
- لان العمليَة حتكون سهلة على أَنسان مُكافَح مثّل أَبوكم
هُجَام - وأَنتَ شمدريك بأبوي مكافح
يعني أَعتذَر على كلامي وياك بس ماتعرفنا من قبل ولا تعرف ظروفنا
- الأنسَان المُكافَح يبين على وجهة ميحتاج عندَي معرفة قديَمة جدًا بي
لهيم - أَدعيلنا أَبوي يطلع بالسَلامة
طبطبَ على ظهري وهمسَ
- أَدعيلك أَبني
هُجَام - أَنت ليش مو وياهم
ضحكَ الدكتور بهدوء
- كُل شخَص هنا إلة علاقه بوظيفته أَني عندي أَختصاصَي وهمَ بالضبط هيج
لهيم - دكتور سؤال
أَخذته من أَيدة على صفحة أَحك راسي
أَبتسم بوجهَي ملامحة جدًا هادئة
- كول أَبني
لهيم - مريانا بس ردتَ ..
- عدها دوام ماكدَرت تجَي اليوم
بَس أَكيد هية و صتنَي أَعرفَ شنو صَار وأخبَرك أَبني
لهيم - شكرًا الكُم والله ساعدتَوني هواي
- لا أَبني ماكو فرقَ أَنَّ شاء الله
بعدَنا دنحجَي و أَجت أَمي مسوية مداهمه
لزمتَني من أَيده فاتحة عيونها
- شبَي أَبوك
لهيم - شبَي يمه شبَي شصَار
زمرد - شكال ألك الدكتور
لهيم - يمه على بختج هديتَي حيلي
زمرد - قابَل شبيك شسَويت و ضعيتك غريبه عبالي تظم عليه
لهيم - لا يمه صدُك جذب دنحجَي بموضوع عادي
دارت وجهَا على الدكتور رفعت عبايتها تخزر بي :- خوَ ما تجذب
ضحك بوجَها متفاجئ
- لا خاله على شنَو أَجذب عليج
زمرد - اممم صدكتَ كون تطلع صدُك متجذب علية ورجلي بي شي
- لا خالتي أَني ماجذبت عليج و داحجي الحقيقة ألَج
زمرد - الله يكتبها بميزان حسناتك شنو وضعة شراح يصير
- لااا يمه تدللين
وأَنَّ شاء الله كم ساعة ساعتين ويطلع من العمليات
بعدَ مامرتَ ساعة و ثنين و ثلاثة و أَحنا على نار ننتظر
أَيدينا على خدَنا ندعيَ حتى رب العالمين يسهَل اله هل عملية
وره فترة طويله طلع الدكتور من الغرفة و أَجة يحجي ويانا
- انتو اهل المريض ؟
أسيد - اي دكتور تفضل كول اني ابنه
- اول شي الحمد لله على سلامة الوالد
ان شاء الله نجحت العملية وهسه ابوك بصالة الانتظار بس يروح منه البنج وان شاء الله باجر نكتب اله الخروج
أسيد - تسلم دكتور
زمرد - ها يعني زين متاكدين ؟
- أَي حجية الحجي صَا زين و تمام التمام
زمرد - بَس تأخرتوا هواي
- بعد عملية هاي يا أَمي
أسيد - الحمد لله يوم نجحت العملية وباجر ناخذه يعني ؟
- أَكيد تكدرون تاخذوه باجر بسلامه ان شاء الله
عفَتهم ودخلتَ لجوة أَريد أَشوفة
صَار شكد أَنتظرهم يكملون الغرفه ويدخلوه حتى أَروح اله
بس دخلت لكيت السميدع يسبح بايده ويقره ايات من القرآن
شهكتَ أَبجي أَيدي على حلكي
رفعَ راسة أَبتسم بتعب رافع أَيدة
تقربت علية حضنته علكيف أَبجي بقهر
يبوس براسَي ويهمس بتعَب
- كافي يابعد بيتي كافي هل دموع زمُردتي
زمرد - نص حيلي راح بهاي طيحتك يابعد عمري
سميدع - خير ياقلبي خير
زمرد - أَن شاء الله تنذكر وماتنعاد
ياربي ممصدكه داشوفك هيج كدامي زين
سميدع - ما اجو؟
بلعت ريكي تراجعت لوره مدنكه راسي
- الحمد لله على سلامتك
سميدع - يجي يوم يحنون .. لازم يجي هل يوم
أَبتسمت وأَني أَشوف ولدي و عزوتي داخلين بطولهم
- الحمد لله على السلامه يابه
السميدع- الله يسلمكم ولدي
لهيم - ان شاء الله يابه باجر ترجع بحيلك وتنور البيت من جديد
هُجَام - يلا يابه ان شاء الله هانت
سميدع - ان شاء الله
نيار :
طلع الصبح وجنا كلنا منتظرين يجونا من المستشفى
جنت الليل كله منايمه ادعي واصلي لسلامة ابوي أَيدي على خدي وابجي
بسَ بينت ملامح الشمس رحت ركض لغرفة ضِغاب
حتى يروح يجيبهم من هناك
تقربَت من الباب دكيتهَا بهدوء
صَرت أَكل أظافري من التوتر و الأنتظار
فتحتَ الباب مسك أَبتسمت بهدوء
- فوتي نيوره
نيار - أسفة أَجيت بهيج وقت
بس ضِغاب كعد لو بعدة حتى يروح يجيبهم
ضِغاب - كاعد دابدل هسه راح اطلع
نيار- يلاا يمعود بسرعه فضها
ضِغاب - ايي والله خلصت خبصتيني
سَحبته من أَيدة أَجر بي لبرة
- يلا ولك بسرعة تروح لابوي تجيبه و تجي
ضِغاب - يمعودة راح تطيحيني من الدرج
نيار - أَمشي لك بلا حجي زايد
ضِغاب - يمعودة مو علمود شي علمود مرتي شون تربي أَبنها وحدها
وكفَت بنَص الطريقَ فاتحة عيوني على حيلها
درتَ وجهي على مسك يلي دنكتَ راسهَا مستحية مني
نيار - يعني مسك حاملَ؟؟؟
ضِغاب - اي ولج بس مالحكتَ تكول لواحد التهينا
نيار - ياربي الف الحمدلله .. مبروك تستاهلون
ضِغاب - تسمحيلي أَروح ؟
نيار - روح يلا أَمشي
وأنتِ ولج مسوكه أكعدي بمكانج لا تتحركين
مسك - لا يمعوده على بختج شمسويه قابل
نيار - معليج معليج
لخاطر أَبن أخوي الحلو مانريد نتعبج
لهيم :
واكفَ بباب المستشفى أَنتظر ضِغاب يجينا نروح
بصفَي أَبوي و أَمي منتظري واحنا وياهم
رفعتَ أَيدي أَباوع على ساعة أَهز أَيدي
- صدُك جذب وين راح هذا شو طول حيل قابل بالمريخ أحنا
زمرد - أزدحامات أكيد
هُجَام - هااا ولك شوف ذاك وياه شوفه
شلتَ الغراض ورحتَ ركض عليه عاقج وجهي
- لو جاي المغرب أحسن
ضِغاب - لعد شسويلك أَطير خوو ما أَطير
لهيم - بس فضها يمعود اكره المستشفيات وريحتها خلي نرجع بسرعه
ضِغاب - يلا صعد الغراض شكد تولول
صعدَت الغراض بالجنطه و درت وجهي على ضِغاب
ركض على أَبوي يبوس ايده ويحضنه يبجي يتحمد اله على السلامه
سميدع - ترى زودتوها عاد هو سرطان على الرئة شكو هالمبالغه؟
زمرد - أَسم الله الرحمن لا تذكره على لسانك أَنساه فدوه
سميدع - يمعودة زمُردتي يلي كاتبه ربج يصير قابل شكو
زمرد - ونعم بالله بس ذكرى يعل گلبي
سميدع - لا كُلشي ولا كلبج
أَنعل والديه يلي يذكر هل مرض كدام زمُردتي خوش
لهيم - خوش يابه بس أَمشينا خل نروح
سميدع - هاي شبيك لك سرسري مستعجل شو
هُجَام - مستعَجل يريد يلحك على حبيباتَه
لهيم - أكول أَمشي لا أسويك وصلتين
علت صوت الضحكات وجانت مرسومه على وجه السميدع ضحكه هادئة ممزوجه بوجع العمليه وقهر اخوانه الي محد حاول يتواصل وياه ويتطمن على حالته
صعدنا الكل بالسياره ووصلنا البيت
جانت نيار وريماس ومسك ينتضرون بالباب
وبأيدهم الجكليت والورد يردون ينثروه على راس أَبوي
نكفختَ على راسي من وره
درتَ وجهي لكيته ضِغاب فتحت جيس الجكليته واكلته أخزره
- شبيك خوية شبيك جني لابسك
ضِغاب - أَحنا بيا حال وأنتَ تلكط جكليت من الكاع وتاكل؟
لهيم - لعد غير نعمة الله .. الله أَكبر على الظلام
ضِغاب - دسكت أسَكت شوف أَختك
فتحتَ جكليته ثانية مخليها بحلكي أَباع على نيار
شامره نفسهه بحضن ابوي
كطعت روحهَا من البجي حاضنته قوي
- يابه ياريتها عمليتك ومرضك بيه مو بيك ياعمري
سميدع - بنيتي كافي الحمد الله المرض بيه مو بواحد منكم
صحنا بصوت واحد
يابه عساه بينا كلنا وتبقى انت سالم
سميدع - كافي يابه سدو هذا الموضوع
تعالي بنيتي ريماس ليش ما تجيني
ريماس - اخاف بابا لا اطخ العمليه وتوجعك
سميدع - تعالي بويه تعالي يهون الوجع لخاطر عيونج
بعدَه أَبوي واكفَ بره نسلم عليه
والجيران تتحمد اله بالسلامه بنَص البيت
غمزَت لـ هُجَام رحنا أَني وياه نطرد بيهم بس بنزاكه
لهيم - يلا صار لازم أَبوي يرتاح ياعيني
هُجَام - يابة لازم تنام وراك كورس مدري مورس علاج على الاقل تناملك ساعة
سميدع - شنو سالفة ترا ..
لهيم - يابة حبيبي على بختك غير نريد سلامتك
وهذوله الوجوه الطيبه فدوه اروحلهم يردون سلامتك مو بالله
صفنَوا واحد يباوع بوجهَ الثاني
ضحكنَا بوجهم و فتحنَا الباب نودع بيهم
تقربَت مني أَمي كرصتَني من أَيدي تتحلف بيه
لهيم - قابل شسوييييت ؟
زمرد - أدبسزز قليل أدب تطرد بهل عالم مو
لهيم - لعد شسويلهم أَخذ وياهم صوره
زمرد - ولك يا سرسري عيب تطرد العالم هيج شيكولون علينا
لهيم - طُز
شيكولون خل يكولون أَبوي مريض وأريده يرتاح
هُجَام - ترا أبنج السرسري صدُك يحجي
وخرَني و صَار وره الباب سادَها
هزَت أَيدها أمي تعض أَيدها :- هية هاي خلفتَج زمُرده
ضِغاب - حمضوا على الرجال ماخلونا نفتهم منه شي حقهم
زمرد - ومحمد لو يسمعكم أَبوكم يسويكم وصلة مسح والله
واكفين دنحَجي مانحس الا صوت حسن ونهاد
بالباب يصيحون بالشارع
درَت وجهي على أَمي يلي وجها صَار أَصفر
ضربت خدودهَا تهمس :- عزا بعيني لا يسمع أَبوك
فَار الدَم بعروكي وأَني أسمع نهاد الخايس يصيَح
::- اطلعو وينكم خاتلين بالبيت خاتلين بحضن امكم جبناء
فتحَت الباب وطلعتَ بسرعة وراي أَخواني
أمي ختلت وره الباب تعضَ بأيدها تصيح بينا علكيف
::- لا يسمع أَبوكم أدخلوا ولكم عزا بعيني
ماهتميتَ و طلعتَ ألهم عاكد حواجبي
صَار كدامي نهاد وحسن عمَي المحترم العزيز
رافعين سلاح علينا ويهددونا بالقتل
تقربتَ منهم مخايف من أسلحتهم أَصيَح
" شنو جايني بهذَا سلاحك تخوفني بي ولك ؟
نهاد - أَدوس راسَك لك عار
لهيم - لك نهاد أَتكفى شري لا أَخليك تبات بالكسور فد أَسبوع
نهاد - والله عمي أَظاهر عدك سوابَق بالقتَل
غمزَت أله مَطلع سجينه من جيبي
- تعال أَشرح وجهك الخايس شنو رأيك نهادو !
حسن - كااافي ولكم ادبسززيه ماتحترمون
هُجَام - لعد شيسمووها وكفتك هنا أَستاذ عمنا
حسن - أَسمع لك المخبل
اذا ما يتنازل عن البيت الثاني أَبوك ترا والله والله
صَاح ضِغاب بصوت عالي بيهم
- عمي تعال تفضل جوه ماتسوه صياح بنص الشارع زحمه من العالم وهم ابوي جوه هسه طلعناه من العمليات ليش هذا الصياح
عكدَ حواجبه صَافن علينَا فتحَ حلكه يمتمت
- شنو؟ عملـ عملية مالت شنو ؟
دفعَ نهاد عمي حسن وهَد على ضِغاب
- سد حلكك لك عار انت شنو تكول تعال تفضلوا حراميه منكعد ببيتكم
ضِغاب - شوف لك نهادو
خاف سكتت ألك على يلي سويته بنيار
يابه والله العظيم أَطلع جنازتك من هل فرع ومحمد
لهيم - باوع نعال محد موجه الك حجي سد حلكك وانجب ديحجي ويا عمي واصلا انت شنو حتى تكعد ببيت يشرفك ويشرف ابوك
نهاد - هاي عليمن نعال مو اجي افرك حلكك بالكاع
لهيم - اشو اجيتك اريد اشوف شلون تفرك حلكي اليوم
تناوشت الكرك ورحت هاد عليه
ركضَت عليه أَريد أَطلع حركة دمي بيه اليوم
يلي صَار بـ نيار مجنتَ واعي عليه بس هسهَ كبرت وأَخذ بحقهم
هديَت عليه بالكرك بس هو لازم ساطور بأيدة
تقرَب عليه يهادد بيهَا عباله أَخاف منه
أَجة يمي ضربته كلة طيحته بالكاع
أَلتموا علينا الجيران يردون يفاككونَا بس يخافوَن
كامَ على حيلة خشمه يجرَي دمَ ملابسه صَارت كُله تراب
تقربَ عليه أَكثر راد يضربني بالساطور
مادري شلونَ ربك سترَها وعدتنَي سلامات هل مرة
أَجاني مرة ثانية يريد يضربني
مانطيته مجَال نيمت الكرك براسة بحركة سريعه
هيه ضربة وهيه طيحة بنفس الدقيقه بالكاع
صفَنت عليه غركانَ بدمه مايتحرَك
دفعنَي عمي حسن عنه يدك على راسَه يصيَح
- ولكم ألحكووه ماات نهاد .. لهيم أَبن السميدع كتله !
...يتبع
___________________________
أَحبكم بعد عيني سومرياتي 🦋🌼
طبعًا القصه مابقى الأ القليل و تنختم وصلنَا للنهاية و هواي اشياء حتبدي تتوضح عدكم 🦋
البارت 4500 كلمة ابدًا مو قصير ✨
والي تكول قصير أَخليها تكمل القصه بالبلوتوث 🐍
شكرًا على كُل التصاميم و التفاعل الحلو مثلكم دتخجلوني بي
أَن شاء أَكدر أَفرحكم بس من عندي كُل البنات المُصممات للقصه
أَتمنى أَحضنكم حضنة قوية حيل داعبر عن حُبي الكُم 🌼
التصويت وتعليقات بين الفقرات مُهم كُلش مو تنسون
لا تنسون تنظمون للقناة مالت التليكرام 🌼
https://t.me/malak_qwn