العُسبَرة

بارت الثاني والثلاثين

خلك بعيد اليحبك يعتنيك
الماله واهس بيك لا تركض وراه .....

العُسبرَة

-***********

كمت وكفت واني اودعها ابتسمت واني امدلها ايدي : كُلش اشكرچ دكتورة على كُل شي قدمتيه خلال الست اشهر الفاتت

وكفت وياي وسلمت علية وبنفس الابتسامة جاوبتني : اني الاشكرچ چنتي افضل مراجعة عندي

عبق : حقيقة الفترة الفاتت چنت كُلش محتاجتها چانت بمثابة فترة نقاوة الي بفضلچ رجعت انبنيت من جديد للحظة حسيت نفسي انهاريت وكلت مستحيل ارجع مثل قبل بس رجعت ورجعت اقوى هم بفضلچ تغيرت نظرتي وافكاري عن هواي اشياء حتى الاشياء الچنت اشوفها صح اكتشفت انها خطأ

الهام : كُل شخص بينا احيانا يكون متشوش ويحتاج فقط ارشاد وانتِ چنت تحتاجين الشخص اليدليچ على الطريق الصح اتمنى توصلين للي تريدين وتتحقق العدالة ويرجع الحق لاصحابه

هزيت راسي وحچيت بثقة : يرجع صدكيني يرجع شوفي دكتورة اني ابد ما اعوف الجلسات كُل فترة اجي هنا حتى تنظفين تفكيري وتخليني اشوف الطريق الصح

الهام : اني بالخدمة حبيبتي اكون ممنونة اذا تجين دائما كعدتچ ما تنمل

عبق : تسلمين من رخصتچ

الهام : الله وياچ عيني

اخذت جنطتي وطلعت من العيادة دخلت بغرفة الانتظار وابتسمت من شفت ام عبدالله تدخل رحت وسلمت عليها ونزلت لعبدالله وبسته من خدوده وهو يضحكلي

عبق : شلونه يا حلوووو

عبدالله : ماما تكُلي من اخلص علاج رح يصير عندي عضلات قوية مثل عمو ساجر

عبق : اووو اكيد اصلا يصير عندك احلى منهن

ام عبدالله : ست عبق خلصتي جلستچ

عبق : اي اليوم اخر جلسة الحمدلله چانت احسن خطوة اخطيها

ام عبدالله : ست عبق ما اعرف شلون اشكرچ كُل كلمة احسها مقصرة وياچ بفضلچ رجلي بعد ما تقرب مني ولا اذاني حتى بكلمة صح مرات يعصب بس يطلع من البيت يهدأ بعدين يرجع

عبق : اني ما سويت شي انتِ السويتي من ما خفتي واشتكيتي عليه الزلم ما تنطيي عين لازم تقسين وياهم حتى يجرون عدل شفتي شلون خاف من اشتكيتي عليه ومشى عدل عرف بيچ ما تسكُتين ورح ترديه خليچ قوية حتى محد يكدر يتجاوز عليچ

ام عبدالله : حچيچ صحيح چان لازم اسوي هيچ من زمان بفضلچ خليتيني اتشجع واخطي هيچ خطوة

حطيت ايدي على كتفها وابتسمتلها : الفضل لله اني مجرد وسيلة يلا عبدووو روح اجة سراكم

ام عبدالله : يلا حبيبتي من رخصتچ

هزيتلها راسي وهم دخلو للدكتورة واني طلعت من العيادة كُلها وكفت بالباب واستنشقت هوا بكُل حيلي وزفرت اخذت مناظري ولبستهن واتجهت للسيارة شغلتها ورحت للمكان الي چان لازم من زمان اروحله

اتجهت بالسيارة للشركة وصلت بعد فترة طبگت السيارة بالكراج ونزلت الموظفين اول ما شافوني رحبو بية لان يعرفوني

اجتي السكرتيرة تستقبلني : مرحبا ست عبق عاش من شافچ

عبق : مرحبا بيچ عيني هود هنا مو

ردت علية : اي فوك بمكتبه تحبين انطيه خبر

عبق : لا ما يحتاج اني اروحله

عفتها وصعدت فوك لمكتبه بالمصعد انفتح الباب ونزلت من المصعد واتجهت لمكتبه وكفت كدام الباب وفتحته بدون ما ادُگه

وكفت بمكان صابتني الدهشة من الشفته هود كاعد على قنفة وحاني ظهره ليكدام ومستند على كوعه وبأيده جكارة لكن ما چان الاستغراب هنا الاستغراب بنية بصفه كاعدة بشكل قريب كُلش حاطة ايدها على ظهره وتواسي بيه

اول ما فتحت الباب رفع راسه وانصدم من شافتي وكف واردف بدهشة : عبق

هزيت راسي واني اتقدم عليهم البنية هم وكفت من شافتني : اي عبق حضرة المهندس

قبل لا يحچي التفتت على البنية وسألتها : انتِ منو ؟

ردت وهي ترفع بحاجبها بغرور : اني موظفة هنا وصديقة استاذ هود

عبق : صديقة !! زين يا حضرة الصديقة مو عيب تفوتين لمكتب استاذ متزوج وتكعُدين قريبة منه وتحطين ايدچ على ظهره

كالت : لا مو عيب لان احنا اصدقاء

لزمني هود من ايدي من شافني اتقدم عليه واردف بتحذير : عبق

باوعت عليه وكتله : عوف ايدي رجاءً

جريت ايدي منه ورجعت اتقدم بأتجاه البنية وكفت كدامها وصرت كُلش قريبة منها : اصدقاء!! انتِ تعرفين مرته لو لا

قدمت وجها مني وهمسة بصوت ناصي حتى لا يسمعها هود : ما تهمني منو هي لانها غبية عايفة هيچ رجال ما يتفوت بين النسوان الواحد يلكة فرصرة مرة بالعمر وما رح افوت فرصتي

ابتسمت ابتسامة كبيرة مملوءة بالشر ورديت عليها : لانها غبيية !!

جريتها من شعرها حيل وصحت بيها : لچ خاااااايسة منو غبييية تريدين انتفففففچ

اجة علية هود وشالني من خصري حتى اعوفها واني مچلبة بشعرها حيل وهي تصرخ بعلو صوتها واني اصيح واغلط عليها

عبق : لججج قندرررة اليوم اربييييچ امچ ما علمتچ عيب تحطين عييينچ على رجاللل متزووووج ولك هدنييي عليها هدنننني

بالكوة رفعني عنها وخلاني افلت شعرها شالني بعيد وبعده مچلب بخصري الموظفين كُلهم التمو على صوت الصياح وهي وكعت بالكاع تبچي وتصيح وتغلط علية

عبق : انجبببببي حيووووانة لمي شعرچ هذا الفرحانة بيه لا اكصه الچ ادبسززززز والله افكس عيننننچ اذا بعد تحطيها بعييينه امشييي وللللي اخذي غراضچ واطللللعي اكسر رجلج اذا عتبتي باب الشركة بعد

عاط بيهم هود : لا تصفنوننن اخذوها منا

چان بالكوة لازمني كُل شوية اريد اهد عليها اكُتلها اجوي الموظفين ساعدوها توكف واخذوها برا وسدو الباب وراهم جريت نفسي منه حيل وابتعدت واني اخوزر بيه رجعت عطت بيه

عبق : انتتتَ شنوووو من بشررر شلون تقبل تخلي ايدها عللللليك شلوننن تقببببل تخليها قريبببة منننننك

عيونه صارن براسه اجة علية وعاط بصوت ناصي : لاتصيييحييين صوتتتچ لا تعلللليه

دفعته من صدره ورجعت حچيت بحدية : جاوبننني شلون تقبببل بهاي المهززززلة تقبل اني اكعُد بصف واحد هييچ تقبل احد يحط ايده علية هيييچ

هود : لا تجفصصين عبببق قسم بالله اذبحچ انتِ وياااه

عبق : لعد ذبحك حلال انتَ وياااها

هود : ولچ كافي تصيحييين اصلا ما ادري بيها موجودة وين اني وانتِ وين

عبق : ليش انتَ وين اشو هياتك كدامي چنتت كاعد ومسترخي والجكارة بأيدك وست الحسن بصفك شتريد بعد

فقد اعصابه وانفعل حيل شال علبة الاقلام من المكتب وركعها بالحياط اجت باللوحة المعلگة وكعت بالكاع وتفلشت فزيت وتراجعت ليورة من عاطت بقهر ويأشر بأيديه علی نفسه : اييي شأررررريد بعددد بس الله ياخذني ويخلصنييي شأرييييد قابل عندي هممم غممم قابل اختي مكتولة وجاي ادور كتالها قابل صار شهور النوم ما شايفة قابل مرتي عافتني وحملتني كُل المسؤولية وشيلتني الذنببب قابل ابوية يوكف ضدي ويا اخواني قابل هذن كُلهن عندي اكيدد لااااا

باوعتله وللحظة انقهرت عليه وردت اواسيه بس اتحاملت علی نفسي وقسيت ويا گلبي واجبرته يقسي وياه : لا تبررر موقففففك السويته خطأاااا لا تخبط هاي بهااااي

هدأت نبرة صوته بس صدره يعلی وينزل تنفسه سريع : اكُلچ اني بيا حال روحي ما متحملها هذا النفس بالكوة جارعه تريدين انتبه لهاي الكاعدة بصفي ثقي بالله حتى اسمها ما اعرفه

صحت بنرفزة كاعدة بصفه وما يعرفها شعدها كاعدة يمه والله احتركت بالغيرة مو بيدي : هودد هوووود لا تعلللب بالناااار وحق الله احركك انتَ وياها

هود : عبببق ترى روحي واصلة لطرف خشممممي لا تزيديهااااا

عبق : ازيييدها ازيدددها ونصصص هممم صارلك 6 شهرررر مختتتتفي وينننننك ما كلت مرتي ماتتت عدلت صخمتتتت ما كلت هاي المهجووومة شصار بيهااااا اجيييك الكة فد وحدة س..... كاعدة بصفك شتريد اصفكلككك لو اكُلك عفية

باوع علية بنظرة خلتني اعيد حسابات ونظرتي للموضوع اردف : اني ما ادري عندچ !! زين انتِ تدرين عني تدرين شچنت اسوي تعرفين وين چنت عايش ميت ماكُل شارب مضروب براسي ماكُل .....

صفنت للحظات بوجهه ورديت عليه : ما ادري ولا اريد ادري لأنك تركتني بوقت اني چنت محتاجتك بيه لا تتوقع مني اجيك واسأل عننك صار 6 شهر اني مريضة واعالج يم دكتور نفسي بسبب اخوانك الله لا يوفقهم تدري بهذا الشي لووو لاااا

تقدم علية وحچة بصوت عالية بتبرير منفعل مخذول : ادري ادري بكُل شي بكُل خطوة چنتي تخطيها ادري حتى النفس التتنفسيه ادري بيه كُل شيييي ادرررري اعرف العلاج التاخذيه واعرف اسم دكتورتچ اعرف وقت الدوا وحتی الاكلللل التاكلييييه اعرففففففه لا عبالچ بعيد عنچ وكُل شي ما ادري اني بعيد بس عيوني وگلبي وروحب يمچ

هدأت وتنفست بعمق ودگات گلبي علنت الحرب وصارت تعزف بصوت عالي طبولها الدمع تجمع بعيني واني اباوعله واشوف كمية الالم والحقيقة بكلامه وعيونه : ليش بس عيونك يمي ليش ما اجيت انتَ تدري بية چنت اريدك يمي ليش ما اجيت ليش عفتني وحدي

طال النظر بعيوني قرا كلام ما ينكال وفهم مشاعر ما تنوصف بضبط نفسي قريت بعيونه اشكال الحوار ومشاعر ما تتفسر لشخص مرات اللسان يعجز عن نطق وتفسير بعض الاشياء تتكفل العيون بشرحها

هز راسه وعافني وراح كعد على القنفة بنفس مكانه وخلى وجهه بين ايديه وتنفس بصوت عالي وجر حسرة من صدره بكثر ما مهمومة اذاني من جرها : ما كدرت ما كدرت كُل ما اتذكر نظراتچ الية والوم بعيونچ ما اتحمل اكره روحي واحس نفسي كتال اختي نظراتهم كُلهم مو مثل نظراتچ چانت تحمل لوم وخذلان كسرة ام بأبنها من رفعت راسه بيه ونزل راسها بعملته لو كايلة الف كلمة ولا نظرة من نظراتچ الشعلن النار بجرحي

هاي الشهور الفاتت ما غمضلي جفن اركض منا ومنا ادور عليهم اريد الكاهم واخذ بثارها اريد ابرد گلبي واريح اختي بكبرها بس ما لكيتهم ما لكيتتتتهم

ضرب راسه ضربات متتالية يلوم نفسه انسحنت روحي بكلامه گلبي انمرد وتخبل عليه ويدفعني اروح والزمه حتى لا يأذي نفسه بس عقلي رفض رفض قاطع اتقرب منه خوفا من ضعفي واستسلامي اله بلعتي ريگي احاول اتمالك نفسي

عبق : لا تضرب راسك حچيك هذا ما يرجع الميت نظرتي وكلامي نفسه انتَ وكُل عائلتك چنتو السبب بموتها

رفع راسه يباوعلي وعيونه حمر قلة نوم وحزن خطوط حمر انرسم بكُل دقة ببياض عيونه يثبتن مدی التعب الدا يمر بيه والسواد المخيف المحتضن اجفان عيونه التعب السهر القهر كُلهن اخذن حيلين منيحله ورسمن خطوطهن على وجهه وبرزن نفسه بشكل واضح

هود : عبق بروح موتاچ لا تزيديها روحي اذا ما عندچ كلمة تواسيني بيها روحيي بعد ما بية اتحمل كلمة خصوصا منچ

عبق : يعني تتحمل من الكُل الا مني ما تتحمل كلمة ؟

باوعلي بنظرة تحمل الكثير من المعاني بين طياتها اختصرت الكثير من الكلمات والانفاس والمشاعر نظرة اختصرت بيها وقت الشهور الفاتت كُلها نظرة شرحت وفسرت وبينت كُل شي راد يحچيه بذيچ اللحظة بس عجز لسانه عن الوصف

هود : كلماتهم تمر مثل الهوا العابر الا كلماتچ ادُگ بالعظم ثكيلة على مسامعي وروحي ما اتحملها اتحمل كُل شي منهم قساوة وحرب واذية بس منچ ما اتحمل الكلمة القاسية التطلع منچ سهم مسوم وتصوب گلبي

حسيت نفسي انهزمت كدام كلامه والجبل الچان يمثل الثبات اعلن الراية البيضة وقرر يتنازل عن موقفه نبضات گلبي صارت دُگ براسي من كد ما قوية ما عرفت شنو ارد ولا شنو اكول بس لكيت نفسي بلا وعي ارد عليه

عبق : كُل شي ممكن يأذيك منهم بس لا تتوقع تجيك اذية مني بقصد او بدون قصد تأكد من شي اني اخاف عليك اكثر من روحي هود

هود : لا تعذبيني عبق

عبق : ما مسوية شي

هود : سوي وارحمي بحالي

عبق : ما اكدر

هود : محتاجچ

عبق : چنت محتاجتك بس ما لكيتك

هود : لا تعوفيني

عبق : مو بيدي صدكني مو بيدي

طلعت بسرعة واني اتنفس بقوة احس الدم صعد لراسي استندت على الحايط ودگات گلبي الف الدمعة وكفت بطرف عيني ليش ليش ما اكدر اعوفه ولا اكدر ابقى وياه واكفة على الصراط طريقي ما بيه رجعة ولا اكدر اكمله برجعتي موت وبتقدمي موت وبالحالتي نهايتي

مشيت ببطئ روحي ثكلت علية ما عاد اكدر اتحملها نزلت ورحت للسيارة ركبت وسندت راسي على الكشن وصفنت افكر بالموقف المريت بيه قبل شوية چان محتاجني رادني اكون وياه بس گلبي تعامل بقساوة وياه رح يظن اني كرهته ودا اسوي هيچ من حقدي ما يدري گلبي حتى وياي يقسي

شسوي شنو اسوي اريد احد يكُلي سوي هيچ وهيچ ويدليني لطريق النجاة تعبت واني احاول اجمع افكاري تنفست بعمق واني اكتم بداخلي كُل اهات وحسرات القهر وشغلت السيارة ورجعت للبيت

صفيت السيارة ونزلت دخلت للبيت وصادفني ساجر دا يطلع سألته : وين رايح

ساجر : ويا هادي عدنا شغل

عبق : تتأخر ؟

ساجر : لا فد ساعتين ونرجع

هزيت راسي ودخلت للبيت بيبي كاعدة بالصالة تقرة قرأن رحت يمها وبستها من راسها وصعدت للغرفة اخذت هدومي ورحت للحمام اسبح طلعت واني انشف بشعري مشطت ورحت تمددت على السرير ولابتوب بحضني اشتغل عليه

اشتغل وكل شوية اخطأ وارجع من البداية وانوب ارجع اخطأ شلت الابتوب وشمرته على جهة وخليت وجهي بين ايدية وصحت بضجر

عبق : اووووف

كمت وكفت كلت خلي اغير من نفسيتي رحت لميز التوليت طلعت المكياج كُله وبديت اخلي على وجهي طلعت الكاوية وكمت اسرح بشعري لبست ملابس حلوة وكشخت وكفت كدام المراية الطويلة اتأمل نفسي

عادية طولي شعري لوني ملامحي كُله عادي عدا رموشي الماخذة رقم قياسي بالطول لزمت خصلة شعر بأيدي وكمت العب بيها واني صافنة على نفسي

وظيفة وبيت وسيارة وصحتي الحمدلله تمام بس ليش احس بحزن ليش الفرح معاديني ليش دائما مكتئبة حياة تتمناها كُل بنت بس اني ما مرتاحة بيها بهاي اللحظة تمنيت اني بالريف وبس صوت الهوا والعصافير ينسمع

تذكر هود كلامه ونبرته الكاسيه الحزن والتعب انقهرت عليه وذميت نفسي لان قسيت لازم اكون وياه بس ما اعرف ليش الكة نفسي اجرحه بكلام بكُل مرة جريت نفس وزفرته طريقنا اني وهود مسدود وصعب نكون البعض اذا مو الناس تنمعنا فا الظروف تلعب دورها وتوكف بوجهنا

نزعت هدومي رجعت لبست القديمات ورحت للحمام غسلت وجهي من المكياج رجعت للغرفة شلت شعري بأهمال كعكة ورجعت اشتغل فجأة خرب واهسي بكُل شي

ظليت اشتغل لفترة لحد ما حسيت ظهري كام يوجعني كمت وطلعت من الغرفة نزلت جوة اسمع ساجر يحچي ويا بيبي

ساجر : عزمتها على الغدا باجر

خديجة : زين تسوي يمة

دخلت للصالة وكعدت يمهم وعلامات الاستفسار تدور بملامحي : تعزمون منو

ساجر : سعدية

انتفضت بغضب وصحت : لا والله منو كاللكم تعزموها ممنوع تدخل هذا البيت

ساجر : عببق

عبق : لا تكُلي عبققق هاي مخاوية ابليس عجوزة البييين

ساجر : عببق عيب هاي عمتچ ما يصير تحچين هيچ

وكفت بعصبية وصحت بأنفعال : عمة العماها غمة هاي مو عمة انتَ ما تدري بسوالفها هاي عجوز النار كُل دگة تسويها اكبر من الثانية وبكُل مرة اكول هسة تعقل هسة تتعض هسة تفگ عني بس بكُل مرة تزيد ما تنقص محد يردعها عينها صلففففة

ولك بفاتحة ابوية بالفاتححححة المطبخ متروس نسوان كرايب وغربة تحچي علية كلام ما ينلبس عليه ثووووب تطعن بشرفي كداميييي ووراييية شتريد اسويلها اصفكلها لو اضحكلهااااا

ساجر : عبق اهدي ليش تصيحين اكعُدي خلي افهمچ

عبق : ما ارييد افتهمممم سعدية ما تجي وتدخل هل بيت واذا اجت ما اكعُد بيه ولا ثاني ووجهي بعد ما تشوفوهه

ساجر : عبق دا اكُلچ اكعُدي خلي احچي وياچ

عبق : ساجر لو تحچي للصبح ما اقتنع لا تعب نفسك

باوعلي بنظرة جادة واشرلي اكعُد كعدت بأمتعاض وهو كمل كلامه : اول شي حقچ شتحچين هذا حقچ غلطت عليچ وتجاوزت وتكرهيها هذا الشي راجعلچ بس ما يصير تطرديها من بيت اخوها

عبق : على اساس هي معترفة بأخوها كُل مرة چان يجي تصيحله الديوث هذا عود اخوها

ساجر : عببق خلي اكمل

عبق : كمل

ساجر : عمتچ ما يصير تنطرد من بيت ابوچ خصوصا والحجية عايشة وياچ ومن حقها بنتها تجي وتشوفها

عبق : من الحنية تجي تشوفه امها ساجر والله انتَ مدري وين تحچي ترى هاي سعدية سعدييية مو ام مروان لا تخربط

ساجر : ام مروان لو سعدية مو مهم العزيمة باجر ورح اعزمهم كُلهم وما يصير يبقى زعل

عبق : لا يكون رح تعزم بيت نعمان همممم

ساجر : اكيد لا تريديهم يتذابحون هم وهود وبعدين هو منو باقي من بيت نعمان غيره ولده كُلهم مهزومين

عبق : عبالي چان تبريت منك

ساجر : والله تسويها قوية گلب انتِ

عبق : خديجي شو ساكتة شبيچ

خديجة : شحچي منو يكدرلج صارله ساعة يريد يسكتچ ما تسكتُين

عبق : خوب انتِ بس كادرة علية

خديجة : شكد فقيرة على اساس

عبق : ارجع اتمرض احسن شلون چنتي مداريتني وتهتمين بية

خديجة : عرج ما يطگچ صحيتي وكُل شي ما بيچ وحتى الجلسات خلصتيهن

عبق : اي شفتي يعني اني هسة مخبلة رسمي حتى علاج جنون اخذت هههههه مو بس كلمة تنكال علية صارت كول وفعل

خديجة : هاك استلم حتى هي ما خلصت من لسانها

ساجر : روح البيت عبق خليها تدلل علينا

ملت على بيبي وكتلها : اكُلچ خدوج اني قررت ما اتزوج وابقى هنا يمكم اشو فلوس ودلال وراحة شعندي متزوجة ورايحة لشلعان الگلب

خديجة : اكُلچ قبق اني هم قررت انتف شعراتچ ولچ يا زواج وانتِ مكرهة الولد بعيشته صارلچ شهور ما شايفته ولا حاچية وياه

عبق : لا شفته اليوم وتعاركت وياه

صفكت ايد بأيده وصاحت : هاك استلم

باوعلي ساجر بعتب : عبق ليش تسوين هيچ انتِ تدرين هود ماله علاقة بالصار ليش تحمله ذنب مو ذنبه

عبق : اني ما دا احمله ذنب مو ذنبه هو بالاصل ذنبه واساس الخطأ منه

ساجر : هو شعلييه الرجال حتى ما چان موجود ولحك عليچ بأخر لحظة ونصدم مثلچ

عبق : لا ساجر هود غلط من البداية چان المفروض من اخته تسوي شي غلط ما يوكف ضدها ولا يعاديها چان المفروض يحتويها ويساعدها حتى تصحح الخطأ مالتها بس هو فضل ان يبتعد ويعوفها وحدها بنص الطريق هذا خطأ هود ولو واكف وياها وساندها محد من اخوانه اتجرئ ومسها لتوبة بأذى

ساجر : عبق لا تلحين بالموضوع وياه هو هم خطية الماتت اخته وشابع ضيم صارله شهور يدور على اخوانه وما يلكاهم صيري وياه لا توكفين ضده وتعيدين الخطأ مالته

هزيت راسي ورفعت عيني عليه وكتله : الله كريم

كمت وكفت وردت اصعد بس رجعت واشرت بأصبعي عليهم : شوفوو من هسة مو تكولون ما كاللت وحق الله اذا سعدية فتحت حلگها وحچت كلمة بحقي لو بحق امي او توبة اقسم بالله اسحلها سحل وكولو عبق ما كالت

خديجة : دمشيي هو يا مخب يندگ بيچ

عبق : اي احسن لحد يندگ بية

عفتهم وصعدت واسم بيبي دردم من وراية : غضب الله على راسچ شكد وگحة دعقلي هستوچ صحيتي يالعرمة

وساجر يضحك وياها : شرانية من هي وصغيرة ما ترتاح اذا ما تكتل احد

كملت الدرج ودخلت لغرفتي مر باقي اليوم هدوء على غير العادة كملت شغلي ونزلت المغرب سويت عشا ويا بيبي صبيت العشا وصحت ساجر يجي يتعشى

كعدنا كُلنا على ميز الطعام وبدينا ناكُل : اكول ساجر ساندا ما ناوية تجي صار ست اشهر

ساجر : كُل مرة اكُللها تتحجج بشي ما ادري شبيها ما تقبل تجي

عبق : خاف ما تريد تعوف اهلها

ساجر : ما ادري

سكتت وبعد ما حچيت حسيت ما يريد يحچي كملنا العشا وغسلت المواعين وصعدت للغرفة نمت كعدت اصبح غسلت وبدلت ونزلت سويت ريوگ وكعدت اتريك طلعت بيبي من غرفتها صبحت عليها وكملت ريوگ

وكفت اريد اطلع وصحت من الباب اني والبس حذائي : ما ارجع للبيت اليوم لحد ما تروح سعدييية حتی ما اشوف وجها وتنطرد بركة يومي

خديجة : تسوين فضل ما بية حيل عركات

عبق : تری بنتچ التسوي المشاكل اني فقيرة

خديجة : اي عمت عيني عليچ فقيرة

بستها من خدها حيل وطلعت من البيت ركبت السيارة ورحت للمكتب وصلت ووكفت السيارة ونزلت دخلت للمكتب واني انزع النظارة واصيح بحماس : هلووووو زملائي الاعزاااء

كُلهم وكف بدهشة وفرحة اول مرة اجي للهنا من بعد 7 شهور اجت علية دينا وحضنتني وهند هم علي وكف بصفي وهو يبتسم

علي : الحمدلله على السلام عبق خوفتيني عليچ

عبق : الله يسلمك ابو حسين

هند : واخيرا رجعتي والله المكتب اظلم بدونچ

دينا : شوفي شوفي هاي كدامنا وتحچي هيچ

عبق : هههههه والله كُلكم خير وبركة اصلا چان المكتب انسد من زمان بس انتو ناس كفو منكم وكفتولي واشتغلتو كُل شغلي ما انسى وكفتكم

علي : انتِ صديقة واخت اكيد نوكفلچ بوكت عازتچ

دينا : والله كُلش اشتاقينا الچ ان شاء الله ما تنعاد

عبق : تسلمولي حبايب ايي جيبولنا جاي خلي نكعُد نسولف عوفو الشغل شوية شنو رأيكم

علي : سوو جاي رح اجيب كعك من راس الشارع يبيعه كُلش طيب

هند : خوش رح اسويلكم جاي يجنن بطعم الهيل

راحت هند تسوي جاي وعلي طلع يجيب كعك كعدت اني ودينا نسولف وتحچي الاحداث الصارت وراية

دانيا : ما اعرفه منو بس دائما چان يتردد لهنا ويسأل عنچ

عبق : ما عرفتي اسمه

دينا : لا ما كال بس يوصينا اذا اجيتي نكُله حط رقمه يم علي

هزيت راسي وسكتت افكر من هذا اليريد يشوفني ظلينا نسولف لحد ما اجة علي جايب الكعك وهند صبت الجاي وكعدنا كّلنا عبالك عائلة

عبق : عززا بالقران طلعت مشتاقتلكم طلعتو كُلش عزيزين

دينا : هههههه هسة يلا عرفتي

غمست الكعكة بالجاي ورديت عليها : لا انتو من زمان عزيزين علية بس هسة طلعتو عزيزين كُلش

هند : امم ست عبق هسة رح ترجعين للشغل مو

عبق : اول خطوة هاي لازم اسويها

علي : وشنو ناوية تسوين

عبق : بخصوص ؟

علي : ولد عمامچ اكيد ما رح تسكُتيلهم عبق الاعرفها ما تسكُت

عبق : منو كالك اسكُت الفترة الفاتت چانت استراحة مقاتل وخلصت وهسة رح يبدي شغلي

دينا : رح تشتكين عليهم اكيد مو

ابتسم علي وهو يرجع ظهره ليورة واردف بمكاني : عبق الاعرفها تشتغل على الساكت وعلى البارد تخلي خصمها يحتار منين يتلكاها

مثل حركته رجعت ظهري ليورة وابتسمت واني ارد عليه : ظلمتننني اني هيييچ

اني كلت هيچ وكُلهم طگوها ضحكة ضحكت وياهم وكامت هند تلملم بالغراض والاكل كمت وياها اساعدها شالت كوابة الچاي الوصخة وطلعت تذبهن واني مسحت الميز ورتبته وعلي ودينا رجعو لمكاناتهم دخلت هند واجت علية

هند : ست عبق اكو واحد واكف برا يريد يشوفچ

عبق : منو

هند : هو هذيچ الفترة دائما يجي يسأل عليچ وهسة هم اجة

عبق : تمام

مسحت ايدية وطلعت اشوفه منو چان واكف يم سيارة سودة من شافني عدل وكفته رحتله ووكفت كدامه : تفضل رايد تشوفني

كالي : مو اني اريد اشوفچ ابو جابر يريد يشوفچ

اردفت بأندهاش : حسيين !!

كالي : اي ريس حسين

عبق : كول للريس مالتك الي يريدني هو يجي يشوفني اني ما اروح لاحد

كال : تريدين الريس يجيچ !!

عبق : ايي الريس مالتك يجي اني ما اروح لاحد

كلت كلامي وعفته ودخلت للمكتب كعدت وبديت اشوف الشغل الباقي تقريبا ورا ساعة دخلت هند تبلغني : ست عبق الرجال التعاركتي وياه هذيچ المرة يريد يشوفچ

عبق : حسين ؟

هند : اي

عبق : دخليه

راحت هند شوية ودخل حسين ابتسم واردف : الما يجي وياك تعال وياه

ظليت كاعدة بمكاني ورديت عليه : خير حسين شعندك جاي

جر الكرسي وكعد عليه واردف : هاي بدال ما ترحبين بية ترى نيتي حسنة جيت اعزيچ

عبق : ممكن اتوقع من الكُل تكون نيتهم حسنة بس انتَ مستحيل انتَ مخاوي ابليس

حسين : ظلمتيني صدكي چنت جايچ بمعلومات تفيدچ

رجعت ظهري على اكرسي واردفت : غريبب معلومات ومنك وتفيدني هم عجيبب !!

حسين : هههههههه على اخر حچي بينا عبالي رح تستقبليني استقبال حافل

باوعت لعلي ودينا : تكدرون تعوفنا وحدنا لو احنا نطلع

وكف علي واشر لدينا : لا ابقي احنا نطلع

طلع علي ودينا واني كمت وكعدت كدامه : اعتقد بأخر مرة حچيت وياك كتلك هاي اخر مرة احچي وياك وما اريد اشوفك بعد شجابك

حسين : جابني الشوگ

عبق : حسيين

تغيرت نبرته وحچة بجدية : البقية بحياتچ اول شي عرفت الصار وياچ وحبيت اساعدچ بما ان عدونا مشترك

عبق : مساعدة ومنك ما اريدها

حسين : لا تظلميني صدكيني جاي اساعدچ

عبق : وشنو مقابل هاي المساعدة؟

حسين : بدون مقابل حبيت اساعدچ بس

عبق : حسييين انتَ ما تقدم شي بدون مقابل احچيها من البداية شتريد

باوعلي وابتسم وهو يرجع ظهره : ابد ما تشبهين ابوچ ماخذة دهاء عمچ

عبق : رجاء لا تشبهني بهيچ واحد

حسين : تمام ما طول كاشفتني خلي اكُلچ شأريد اني عندي معلومات تخصر كللل شي عن عمچ واولاده معلومات انتِ تريديها

عبق : المقابل ؟

حسين : تسوين الي ما اكدر اسويه اني اريدهم يبتعدون عني ويعوفون الشغل كُله الية بس عمچ ما يرضا فا انتِ رح تتولين امرهم واني اساعدچ يعني اجيبلچ الملعومات الي تريديها بالمقابل تسجنيهم حتى ارتاح منهم

عبق : هسة انتَ تريد تقنعني انتَ ما تكدر لنعمان وولده واني رح اكدرله بالمعلومات الي رح تنطيهن الية

حسين : اي

عبق : وليش تاخهم للسجن بمسدس واحد وكم طلقة تكدر تنهي كُل شي

حسين : اكو اشياء عدنا ما تنتهي بطلقة احنا تجار وشي مرتبط بشي عدنا وموت واحد بينا يعني ضرر للكُل بس من يسجن لا تختلف الشغلة

عبق : زين بنفس هاي المعلومات ليش ما تاخذهن بنفسك وتوديهن للشرطة وهم يسجنوهم

حسين : قصدچ اذب نفسي بالسجن

باوعتله بأستفهام وهو كمل يوضحلي : شنو ما تدرين الشرطة دور علية

عبق , اهااا من شوكت وليش

حسين : مو مهم هسة انتِ كُليلي شوكت تحبين اجيبلچ المعلومات

عبق : لا واثق يعني اني اسمع كلامك واخذ المعلومات واحط ايدي بإيدك

حسين : على حسب علمي انتِ محتاجتهن

عبق : واذا اكون محتاجة احط ايدي بأيد مجرم واتعاون واياه حتى احصل ثاري ؟

حسين : هذا الدارج هل فترة مرات الحياة تجبر الواحد يتعاون ويا ناس ما يريدوهم بس يكون الهم غاية حققي غايتچ والسلام وراچ

عبق : الظاهر انتَ فاهمني خطأ لا عبالك اتعاون وياك علمود مصلحتي اني قانون متخيل احط ايدي بأيد مجرم لو على حساب سعادتي ومصلحتي وحتى حياتي

حسين : لا تقررين بسرعة فكري عدل اعرفچ ذكية وتحسبيها عدل

عبق : ما افكر ولا رح افكر غلطت مرة وما اعيدها لاني مرة سألتك عبالك كُل مرة رح يصير هيچ

حسين : عبق كتلچ الحياة تجبر الواحد يسوي اشياء ما يريدها لا تاخذين قرار بأستعجال رح انتظرچ فترة تفكرين بيها لخاطر العلاقة الطيبة الجمعتني ويا ابوچ

عبق : لا تنتظر حسين لا تنتظر عندك شي روح سويه انتَ لا تشمر مصايبك علية العندي كافيني

حسين : اني اسويه واكدر هسة بأتصال اسويه بس اني احب اشتغل ويا اشخاص اذكياء مثلچ

عبق : واني ما اريد اشتغل وياك

حسين : شوفي عبق ابوچ صح ما چان ادمي وچان يسوي هواي اخطاء بس ما يغدر عكس عمچ بأول فرصة يغدرچ ويسحب البساط من جواچ ابوچ العلاقة الچانت بينا طيبة صح اختلفنا مرات بس ڿانت زينة واني لخاطر هاي العلاقة الطيبة رح انتظرچ تفكرين وتاخذين راحتچ بالتفكير واني بأنتظارچ

واذا وافقتي على الطلب وحبيتي تحطين ايدچ بأيدي فا اتمنى تكونين قوية وتتحملين الي رح تعرفيه

عبق : شتقصد

حسين : قصدي واضح رح تتفاجأين من هواي اشياء وتنصدمين هم بيت نعمان مستنقع قذر ما رح تستوعبين الاشياء القذرة المتورطين بيها

عبق : وانتَ شمدريك بكُل هاي الاشياء

حسين : لان وياهم

عبق : ومن انتَ وياهم شكو كلبت عليهم وتريدني اشتغل وياك وادخلهم السجن

حسين : الغدر عبق الغدر يخليچ تراجعين حساباتچ وتغيرين كُل شي

عبق : مع هذا عرضك مرفوض تفضل روح اذا ما عندك شي

كام وكف ووكفت وياه واردف : واني اكُلچ عرضي رح يستمر لفترة وانتِ فكري بهاي الفترة واعرفي شلون تستغلين الوضع

كال كلامه وطلع باوعت لاثره شيقصد هذا من كُل كلامه الكاله اذا قبلت بعرضه رح انصدم من الي اسمعه شنو من اسرار واشياء سرية مسويها بيت نعمان او بشكل اصح شنو من قذارة مسويين حتی رح تصدمني هزيت راسي ودخلو علي ودينا وهند يسألوني شيريد مني

عبق : خلي يولي اخذ المقسوم

علي : عبق اذا يضوجچ بس كولي اني اتعامل وياه

عبق : لا علي شنو السالف منو يكدر يضوجني يلا لا توكفون خلي نشتغل اشغالنا صار فترة متعطلة

رجعنا نشغتل واني اشتغل بكّل شغف صار فترة عايفة الشغل واحس مشتاقتله خلصت بعد وكت طويل كمت واني امدد بعظامي احسهن تشنجن كمت وكفت واني ارتب بالغراض ودنيا وياي رح تطلع

باوعت لعلي بعده يشتغل : علي شغلك مطول

علي : لا اخلص هذا الملف واطلع

عبق : تمام لعد احنا رح نطلع لان خلصنا

علي : الله وياكم حتى هند خلي تطلع اني اقفل المكتب عود

عبق : تمام يلا دينا امشي

طلعنا اني ودينا وهند ويانا كتلهم : امشن اوصلچن

دانيا : اني رافد رح يجي ياخذني خابرني وصل

عبق : امشي هند

هند : شكد قديمة ست عبق غير شتريت سيارة

ضحكت وكتلها : هههه والله كفو احسلچ تعلمي كُله وحدچ لا تعتمدين على احد بأي شي

دانيا : هذا بسمار الي

عبق : هههه يبويي لا انتِ وحد انتِ خطيبچ يغار عليچ شيخلصنا منه

دانيا. : اووف منه

عبق : يلا بنات مع السلامة

ركبت السيارة واتجهت بيها لمكان مشتاقتله كُلش وصلت وطبگت السيارة ونزلت فتحت الباب بالمفتاح ودخلت للبيت ابتسمت واني اسمع قهقهاتها من جوة دخلت من باب المطبخ واني اشوفها كاعدة بكرسيها وتضحك بصوت عالي وتلعب بالاكل دردم ويا نفسها وتتعارك

عبق : ولك الحب مالللي ولك العمر ولك النفس مال اني

من شافتني كامت تصفگ وطلع بنفسها تريد تجيني رحتلها وشلتها واني ابوس بيها واشمها حيل وهي تضحك عبالها ادغدغها اجت سناء من الصالة من سمعت صوتي ابتسمت من شافتني اجت سلمت علية ورحبت بية

عبق : شلونچ هاي النتفة شلونها

سناء : تخبل فدوة لگلبها

عبق : ولچ بربري هاي شمسوية بروحچ ولچ برابررر ولچ اروح فدوة لهل خدوددد والعيون الصفر ولچ اكُلللچ اكُلللچ

اعصر بخدودها وابوس بيها صارت حمرة وانزعجت مني صارت دفع بية ضحكت عليها ورجعتها لكرسيها وجريت كرسي وكعدت بصفها جريت الماعون منها وكمت اوكل بيها

سناء كامت تفتر بالمطبخ صبتلي عصير وجابتلي كيك وياه اخذت كرسي وكعدت كدامي

عبق : شلونچ سناء شخبارچ

سناء : بخير الله ما طول هل نعمة وياي

عبق : والله صدكتي عايشة احلى لحظات عمرچ ويا هاي البزونة الصغيرة

سناء : والله مالية البيت علية وفد اضوج من تنام اظل كاعدة وحدي

عبق : يا عمري فدوة شلون كبرانة وصاير عدها خدود شوفي شوفي شلون تتعارك تجر الخاشوكة من ايدي تريد تاكُل وحدها

سناء : اوو هاي يومية اني وياها معارك ما تحب احد يوكلها تريد وحدها من هسة تريد تعتمد على نفسها

بستها من شعرها الاصفر الذهبي الجنه سبرنگات وابتسمت : عفيية اريدها تصير قوية وما تحتاج احد

سناء : عبق اريد اُكلچ شي بس لا تفهميني غلط

عبق : كولي سناء ما بيناتنا هاي السوالف والله اعتبرچ مثل اختي

سناء : الله يسلمچ والله انتِ مثل اختي هم بس يعني شنو رح يصير ببراءة شنو مستقبلها رح تظلين ضامتها عنهم

سكتت افكر بكلامها باوعت لبراءة ورجعت باوعت لسناء وحچيت : ما اكدر اكُللهم عليها هسة لان الوضع مخربط كُلش وما اعرف ردات فعلهم بس براءة رح تطلع وتظهر للناس من اجيب حق امها دم امها النهدر ونسال على الكاع مثل المي يرجع وسنين عمرهم رح تنساب مثل دم توبة ورح يعضون اصابعهم ندم على كُل شي سووه ورح يعرفون ان الله حق

سناء : اني وياچ بكُل شي وان شاء الله يرجع حقها بس ابوها احس من حقه يعرف ان عنده بنية

عبق : لا مو من حقه هو عاف توبة وما اهتم ليش رح يهتم هسة لبنت توبة

سناء : والله اني اكول اذا عرف بالموضوع رح يطالب ببنتها ورح يسوي كُل شي حتى يرجعها

عبق : ياكُل وحل مستحيل انطيه براءة هاي بنتي اني وياچ التعبنا عليها هاي امانة امها مستحيل افرط بيها

سناء : حبيبتي ما اتخيل اكعُد الصبح بدون ما اشوف وجها الحلو

عبق : وانتِ سناء ما غيرتي رأيچ

سناء : بخصوص شنو

عبق : الزواج ترى الدنيا ما توكف على احد ورجلچ راح لدار حقه لا توكفين عمرچ بعدچ صغيرة

جرت تنهيدة عالية وصفنت على الميز وردت علية : الدنيا طلعت من عيني من بعده احلفلچ بالله چنت اشوف الدنيا ظلمة بدون روح اداوم ارجع للبيت وكُل شي بلا طعم ما اعرف شلون جنت عايشة اصلا ما چنت عايشة چان جسمي عايش وروحي ميتة بس من اجيت وشفت هاي الحلوة وربيتها رجعت الحياة الية وهذا يكفيني الله ما رزقني بذرية بس براءة چانت اجمل رزق الله يدزليا

عبق : براءة هم بنتچ وانتِ الدادا مالتها بس يعني انتِ بعدچ صغيرة العمر كدامچ

سناء : عمري انتهى وياه محد يصدك من اكللهم احبه حب بس الله يعلم بيه والله بحياتي ما حابة شخص هيچ بس هو وانتقل لرحمة ربه ما اريد اتزوج اريد انجمع وياه بالجنة

عبق : ان شاء الله حبيبتي يلا اني اروح رح تظلم

نزلت على براءة بستها حيل وبدي ما اعوفها تعلق بيها كُلش حسيتها جزء من روحي كمت وطلعت من البيت واني اوصي بسناء عليها لحد ما وصلت للباب وطلعت ركبت السيارة ورجعت للبيت وانتهى اليوم هيج

***********
خليت المي علی النار انتظرته يفور شوية وخليت عليه نعنان خليته يفور هم وطفيته صفيته بكلاص واخذت كوبي ورحت كعدت بالصالة اگلب بالتلفزيون

مغصتني بطني حيل لزمتها بوجع واني اعصر عيوني بألم كمت على كيفي ورحت للمطبخ اخذت ادويتي الجابهن أوسيد وبلعت اثنين بدل الوحدة من كد ما چنت متأذية رجعت للصالة وتمددت على القنفة واني حاضنة نفسي بوجع

ماكو نص ساعة وحسيت شي انفجر جواية كمت وكفت وجمدت بمكاني من شفت الدم ينزل من بين رجلية باوعت بفزع على الدم

عبالي الدورة بس هاي كُلش هواي والالم مو طبيعي ما كدرت اظل واكفة اكثر وكعت بالكاع واني لازمة بطني واعصر بيها صحت بصوت عالية

ريتان : اوسيييييييد اوسيييييييد

بچيت واني لازمة بطني الالم دمرني ما اكدر اعدل ظهري حانيته ظليت اصيح عليه من يكول يسمعني هو نايم جزعت روحي واني اصيحه اخر شي صحته بروح خالية

ريتان : اوسييييييد رح اموووت تعااااال

ماكدت اظل كاعدة نمت بالكاع والنزف اخذني سمعت صوت الباب ينفتح وخطوات سريعة جاية بأتجاه الصالة  يدور علية صحت بصوت ضعيف ما يشوفني لان القنفة صايرة كدامي

ريتان : اوسيد

انتبه الية واجة علية بخوف وكف بمكانه وهو يباوعلي وعيونه جاحظة بصدمة من حالتي

اوسيد : ريتان هاي شنو شنو هذا الدم انجرحتي

ريتان : اوسييد دا انززززف الحكلي رح اموت

نزل يم راسي يمسح بوجهي ما يعرف شيسوي : شنو يا نزف شبيج شسوي هسة شسوي

ريتان : وديني للدكتورة رح امووت

وكأنه استوعب الموقف كام وكف بسرعة حچة وهو ويطلع من الصالة : اوكفي اجيب السويج حتى اوديچ

راح يركض للغرفة  دقيقتين واجة  بأيده شال وعباية غطاتي بيهن وشالني للسيارة ركض كعدني بالكرسي وداني للمستشفی بنص الطريق وما اكدرت اقاوم اكثر ثكلت اجفاني وشوية شوية سحبني الظلام لعالمه

فتحت عيوني وداهمني بياض ساطع غمضت مرة ثانية ورجعت فتحت ادركت اني بالمستشفى حسيت بأيد تضغط على ايدي التفت للمصدر شفته كاعد كدامي وعيونه بيهن هواي حچي بس فضل السكوت وعدم البوح بيه

حچيت بصوت مبحوح وبتعب : شنو صار

مسح على شعري وكال بحنان : نامي هسة بعدين اسولفلچ

حاولت اعدل كعدتي بس توجعت ورجعت نمت عدلني أوسيد وهو يمنعني من الكومة لزمت ايده وكتله : أوسييد لا تسوي هيچ وتخوفني شنو صار شبية اني

كعد كدامي وقريت بعيونه حزن عرفت الي رح اسمعه ثكيل علية خصوصا من جر حسرة واردف : انتِ جنتي حامل

بهت وجهي واني احاول استوعب كلامه حاولت افرح بالخبر بس كُل شي اتحطم وتكسر فوك راسي من كمل كلام كان اشبه بصاعقة

أوسيد : بس سقطتي الطفل

فتحت عيوني على وسعهن ودگات گلبي زادت حسيت نفسي ضاگ بية دمعت عيني بصدمة مالحگت افرح بيه بنفس اللحظة انسرق الحلم مني دائما چنت اتمنى اصير ام وافرح بأبني او بنتي واربيهم احسن تربية بس فجأة حلمي تبخر بالهوا حلم اختفى قبل لا يتحقق

أوسيد : ريتان حبيبتي لا تبچين هذا امر الله ومالنا قسمة بهل طفل كولي با الله

ريتان : ليش ليش الطفل مات

باوعلي بحزن واردف : من ورا الادوية

ريتان : يعني اني كتلت ابني بأيدي أوسيد اني اني الموته من وراية شلون شلوون كدرت اسوي هيچ شلون

ضربت وجهي بس بسرعة لزمني ومنعني جرني لصدره وحضني وقيد حركتي حتى لا أذي نفسي : اشش ريتان انتِ مالچ علاقة شمدريچ انتِ حامل الصوج مني ما اخذتچ للدكتور يفحصچ اني الجبتلچ الأدوية

ريتان : كُله مني اني كتلت ابني بأيدي أوسيييد شلون شللللون كدرت اسوي هييچ شلللون ما حسيت بييه ببطني اني مو خوش اممم مو خووش والله اخذه مني

أوسيد : ريتااان شهل حچي هذا انتِ رح تصيرين احسن واحلى ام بس هذا الطفل مالنا نصيب بيه الله خلى بيها حكمة لا تحچين هيچ ما يجوز

ريتان : أوسيد كتلت ابني بأيدي شنو الحكمة منها

أوسيد : ما ادري يا روح أوسيد بس ربچ يعرف بيه خير واخذه لا تبچين يا روحي دموعچ تفطر كلبي

چانت اسوء لحظات حياتي صعبة كُلش من تكونين السبب بقتل جنينچ مالحگت افرح بخبر حملي اتفاجأ بموت ابني چانت لحظات اعجز عن وصفها استغرق الوضع ايام وليالي وشهور حتى اخرج من اكتئابي واقتنع ان الصار امر الله وما يصير اعترض عليه
فزيت من صفنتي من انفتح باب الصالة ودخل باوعتله هستوه راجع من الشغل كمت واني استقبله

ريتان : الله يساعدك حبيبي

حضني لگلبه وباسني من راسي واردف : يساعد روحچ يا روحي

ريتان : جوعان اصبلك غدة

اوسيد : تغديتي انتِ

ريتان : لا ما اشتهي

اوسيد : ما يصير لازم تاكُلين يلا تعالي وياي خلي اغسل واجيچ

راح للحمام يبدل ويغسل واني فتت للمطبخ احمي الاكل احس بضيق مو طبيعي بصدري مسحت على مكان گلبي بس نفس الشي هل شي ملازمني من ذاك اليوم ولحد هسة مرات اتجاهله بس بأكثر الاحيان يتغلب علية ويخرب كُل يومي تنهدت بتعب من دخل اوسيد اجة بصفي وصار يساعدني ويصب بالاكل حطينا الاكل على السفرة وكعدنا ناكُل

هو ياكُل واني شايلة الخاشوكة واگلب بالاكل وصافنة انتبه علية وهو هم ترك خاشوكته وحاچاني

اوسيد : ارنبتي اكُلي ليش صافنة

تركت الخاشوكة وكتله : ما مشتهية شبعانة

اوسيد : شبيچ شنو المضوجح

رفعت اكتافي بعدم معرفة : ما ادري بس مخنوگة

اوسيد : تريدين نطلع نغير جو

ريتان : لا اريد انام

عاف الاكل وكام جر ايدي وكومني وياه اخذني للغرفة تمدد وجرني بحضنه حطيت راسي على گلبه ودگاته يدُگن براسي نبضه اسمعه بكُُل دگاته غمضت عيونه وهو يمسد على شعري ويسولف بهدوء

أوسيد : تذكرتي هذيچ السالفة وضجتي

هزيت راسي بأي : امم

اوسيد : خلي اسولفلچ چانت امي الربتني اسمعها تسولف سالفة لجيرانها تريدين تسمعيها

ريتان : امم

اوسيد : هاي وحدة من اهل كبل تزوجت والله ما رزقها غير ببنية ورجلها مات بالحرب كبرت هل بنية والام زوجتها وهل بنت ما صار عدها خلفة سنة سنتين ثلاث ماكو راجعت دكاترة وراحت لشيوخ وسادة وما صار عدها

البنية چانت تشوف رجلها وتنقهر عليه صار جبير وماعنده طفل والرجال يموت علی الجهال بس ساكت لخاطرها لانها يتيمة كومي يا المرة وزوجي رجلچ الثانية

كمت على حيلي وباوعتله وصحت : يااااا من كُل عقلها زوجت رجلها

اوسيد : لعد شتسوي تشوف رجلها بلا خلفة انقهرت عليه كامت وزوجته

ريتان : وهو هيچ هانت عليه وقبل يتزوج عليها

جرني ورجع نومني علی صدره : بوياااي ولچ اسمعي خلي اكمل

ريتان : كمل بالله كمل

اوسيد : زوجته ورا العرس بشهر وقبل لا تحمل العروس حملت مرته الاول شوفي رزق ربچ سنين ما عدها خلف ومن زوجت رجلها صار عدها

رجعت كعدت وتخصرت كدامه وقلصت عيوني وباوعتله : اي عيني قصدك ازوجك حتى يصير عندك خلفة

باوعلي بأستغراب : هاي شجابها على هاي

ريتان : هو انتَ دا تحچيلي هاي القصة حتى ازوجك واني اصير حامل

اوسيد : انتِ منيلچ هذا الحچي اني حچيتلچ القصة حتى لا تتكئبين وتفقدين الامل العبرة ان المرة سنين ما عدها اطفال والله رزقها وانتِ هم صار عندچ مرة يصير مرتين وثلاث مو نهاية العالم

ريتان : لا لا انتَ قصدك واضح تريد تتزوج الثانية كُلي كُلي من هاي

اوسيد : دخيللللك ربي واحد يجي يواسيها تگلبها عليه نكد اكُلچ ريتان انتِ امچ متنسية على نكد لو وراثة الشغلة بس كُليلي حتى افهم الوضعية

ريتان : لا تغير الموضوع منو هاي التريد تتزوجها

لطم على وجه وصاح : يبووووه ربيي

كام نزل من السرير وهو يدردم علية : صوجي اني الاثول اجي اواسيچ جاي من الشغل طايح حظي وعايف غداية ومكابلچ كل مرة تگلبين الموضوع علية بس هو صدُگ صوجي شجابني شورطني

ريتان : ها هااا تورطت يعني اني ورطة يعني انتَ ندمان لان تزوجتني احچي احچي طلع بعد شكو بگلبك

طلع من الغرفة وصاح بقهر : ربيببببيبي

ضحكت وكمت وراه لكيته بالمطبخ رجع ياكُل تقدمت عليه وهو كاعد على الكرسي حضنته من ركبته وبسته بخده

ريتان : اوي شبيك بسرعة تتنرفز

اوسيد : شكيتي گلبي يا حبيبتي بنكدچ دخيل ربچ شهل قابلية العندچ

ريتان : اتشاقة وياك شبيك ما تتحمل شقة

جرني عليه وكعدني بحضنه وحاوطي خصري بين انامله الخشنة ولزم حنچي وهزه : كُل شي اتحمل منچ ست نكدية

ريتان : اهوو رح يطلعلي لقب بطل هاي سوالفك

اوسيد : الاكل برد من وراچ كومي سويلي جاي

ريتان : ما دريت غير اني مريضة

لزم وجهي فره منا ومنا وباوع علية : شو بالله وين المرض اريد اشوفه

ريتان : اوسيييد ههههه لاا اوسيد

كام يدغدغ بية حتى اكوم كمت وابتعدت عنه وهو هم كام رحت شلت المواعين وغسلتهن وسويلته جاي واخذته للصالة ليمه

**********

وكفت السيارة ونزلت لبست المناظر الشمس تصگع جريت نفس قوي وقويت نفسي لاول مرة ومن بعد شهور اتجرئ واجي لهنا كُل ذيچ الفترة ما چان عندي وجه اجي لهنا واحچي وياها تأنيب الضمير ما يخليني اخطو هيچ خطوة حملت نفسي وحملتهم ذنب كُل الصار صح چنت اتعالج بس ما اتخطيت الموقف ولا المشهد الصار لحد هسة يدُگ بعقلي تنفست بعمق واخذتني رجلية الها

امشي بين القبور واقرة فلان ابن فلان توفى بفلان سنة اكو بيهم عمرهم ما يتجاوز العشرين سنة وبيهم كبار وبيهم حتى اطفال عمرهم خمسة سنوات او سنتين

اتلفت وادور عليها من بين كُل هل قبور وردة اندفنت وياهم بنص هل عالم ماتت وطمتها التراب عمت عين التراب التغطيها شافت من حياتها شسوت جابتها ضيم بضيم ما ارتاحت ابد

وكفت رجلية عن الحركة من وصلت وصرت قريبة من القبرها يبعدني عنها شي خمس او ست امتار وكفت واني اشاهد جلوسه عند قبرها بأنعزال حاط راسه على التراب ويسولف وياها

ظليت واكفة واباوعله بدون ما اسوي شي اتأمل خيبته وندمه اتأمل عذاب الضمير الينهش بروحه هسة فات رجال من يمي وكفته واني اسأله : عفوا عمو بس هذا الولد منو

باوع وين اشرت وهز راسه بحزن : والله هذا الولد يكسر الخاطر صارله فترة طويلة هنا

عبق : ليش

كال : هذا گبر مرته ومن توفت لحد هسة هو يمها كُل ما اجي الكاه على كعدته حاضن گبرها ونايم مرات اسمعه يشكيلها ويبچي مرات يسولف وياها وعلى هل رنة صار فترة طويلة

عبق : هاا تسلم عمو تعبتك

كال : لا بوية ادللي بس انتِ تعرفيه

هزيت راسي بموافقة ورجع كالي : احچي وياه بلكي يسمعچ ويكوم خطية الحياة ما تنتهي ويا شخص

ظليت صافنة عليه ورديت علی الرجال بشرود : الحياة ما تنتهي بموت شخص بس تستمر وهي ميتة بعيونا

كال : شنسوي يا عموو هاي الدنيا

كال كلام وعافني وراح تقدمت من القبر بضع خطوات وصوته صار واضح يوصل لمسامعي رفع راسه ومسح على تراب القبر وحچة بشكوى يشكيلها ضعف حاله

جواد : توبة لو غارزين سهم بنص گلبي وسالبين روحي مني ما اتأذى هيچ توبة الدنيا وراچ ظلمة ليش عفتيني يا توبتي يا سكينتي وراحتي ليش عفتيني يا ذنبي الطاهر شوفي حالي شوفيني ميت اني وداعة عيونچ التشافی من اشوفهت ميت باقي بس النفس بية

رجع يمسح على التراب ودموعه تنزل بحزن وندم : اذوچ يا كسرتي أذوچ يا وجع گلبي ومرهمه كسر بأيدهم هل عارات توبة اني هم اذيتچ هم استاهل الاذية مالي وجه اطلب السماح منچ حتى لو سامحتيني ما اسامح نفسي الصار بيچ كُله من وراية اني الشيطان لعب بعقلي وخلاني العب بيچ

لا تسامحيني خليني اتعذب بالدنيا والاخرى وخلي الله ياخذ حقچ مني عوفيني احترك بنار الدنيا والاخرة بلكي اوفيچ حقچ

مو بس مني من الكُل رح ارجعلچ حقچ اولهم نعمان اجيبلچ حق كُل دمعة وحق كُل صرخة اه وحق كُل الم بگلبچ والم روحچ وجروحچ ابنا الخسرتيه رح ادفعهم ثمنه غالي رح ادفعهم ثمن كُل شي سووه حتى جرح الكلمة ارجعلچ حقه بس اصبريلي كُل شي اسويلچ وكُل شي تريديه توبة بس اريدچ ترتاحين اتأذيتي هواي بالدنيا ما اريدتچ تتأذين بقبرچ هم وعد علية وكلمة زلمة ما ارتاح ولا يهدالي بال وهاي الروح ما تصعد لربها اذا حقچ ما يرجع

عبق : شتسوي هنا

التفت علية متفاجأ من وجودي بس ما اهتم ورجع التفت يحچي ويا توبة متجاهلني تقدمت اكثر وحچيت بعصبية : هيووو مو احچي وياااك شتسوي هنااا

رجع التفت علية وتغضبت ملامحه واردف : انتِ شتسوين هنا ارجعي منين ما اجيتي

عبق : لك انتَ شكد صلف وعينك قوية جاي يم قبرها وتشكي يم راسها تكُتل القتيل وتمشي بجنازته كوممن يمها وجودك يأذيهاااا كوووم

كز على اسنانه ورد : ما أذيهاااا اننني احببببهاا اخوانها كتلوها مو اني مو انننني

عبق : انتَ السبب كُل شي صار بسبببك وجريت الكُل وراك لو ما انتَ ضحكت عليها ووهمتها بالحب وخليتها تتعلق بيك چان ما انهزمت چتن ما طعنت اخوها چان اهلها ما هدرو دمها انتَ السبببب انتَ البديت كُل شيييييييي

انفعتلت وعلى صوتي بدون ما اخس هو هم كام ووكف مقابيلي بعصبية وكام يصيح : الللللف مررررة خطبتتتتتها ما خليت شييييخ ما خلللليت صخاااااام ما جبتتتته اللللهم وما انطونيبببباهاااااا اني ما وهمتتتتها بالحبببب اني احبببببها احببببها اكثر من روحييييييي توبة تجري والنفسسس بالدمممم منتشررررة بييية مثل الممممممرررض احبهااااا

عبق : لا تجذذذب انتَ ما تحبها بس دخلتها بأنتقااامك

جواد : لچ شتحجييين انتتتِ لچ محد يوصل لحبي الها اعرف كُل شي بيها اعرفها من حركاتها اذا ضايجة او لا من نبرتها اعرف شبيها نظرتها اذا انعكست اعرف شنو صاير اعرف رمش رمش بعينها جم شامة بوجها الوحمة البأيدها والاذنها المكروطة الشيبة الوحيدة بشعرها حافظ مكانها اني مو بس احبها اني مجنون بيهااااا اني مجنونننها مجنونهااااااا

عبق : لا تجذذذذذذذب تحبها وسويت هيچ بييييييها لو ما تحبها چان شسوييييت بسببببك خسرت كُل شيييييي شيفيد حبك هسسسسة شيفيييييبد

جواد : ادري خسرت كُل شي بسبببي بس رح ارجعلها حقها كُلللللهم واحد وااااحد رح اخلييييهم يدفعون جزاااااءئهم اجيبببهم لهنننننا واخيلهم يبوسون گبرها ويعتذرون منهاااااا

عبق : هه بهل سهولة هود صارله اشهر يدور عليهم وما لكاهم حضرتك وشلون رح ترجع حقها وهم مكو

جواد : اخذ حقها مكابل وجه بوجه والبيه زود يجي يواجهني ابن امه اليكُلي لا حتى نعمان اجيبه اطيح حظه وكتلهم على ايدي ودمهم حلال وابن عمچ غشيييم ما يعرف الزاغور اليختلون بييه يگرصون ويضمون راسهم بس اني اعرف شلون اطلعهم واجيبهم لهنا

عبق : يعني انتَ ما خايف ومستعد تخسر كُل شي في سبيل تاخذ حقها

باوعلي بثبات وحچة : اكيد

عبق : ما خايف من شي

جواد : الچنت اخاف عليها خسرتها ما بقى شي اخاف عليه

باوعتله واردفت : خوش توبة وثقت بيك مرة وغدرتها وهل مرة اني رح اثق بيك واخلي ايدي بأيدك حتى نرجع حقها لتوبة تقبل تحط ايدك بأيدي

باوعلي وعيونه التهبت بالشر ونار الانتقام اشتعلت : غلطتت مرة وعرفت غلطتي والينعض مرة من جحر ما ينعض مرة ثانية منه ايدي بأيدچ حتی نرجع حقها

ابتسمت وكتله : صار وكت حساب بيت نعمان نفر نفر بدون رحمة ومثل ما اشفقو علی بنتهم اني هم ما رح اشفق عليهم ........

***********

ولنا في الخيال حياة

***********

اتمنى يكون البارت نال اعحابكم انتظروني بالبارت الجاي مليان احداث ومواقف مشوقة كانت وياكم اختكم الماس K.T

******
الى اللقاء.....