العُسبَرة

البارت الثاني عشر

تسألني تگلي شسوة وكتك بيك
شسولفلك شگلك تكتل الحرگة
ذبني بير بأيده وكال اكلني الذيب
ورسم للذيب صورة وجثتي بحلگه ....

العُسبرَة

***********

اطرافي نشلت والدم جمد بجسمي من صارت عينه علية اريد اتحرك انهزم ماكو رجلية لطشت بالكاع شفته مشى وصار يتقدم علية روح راحت كمت ارجف من الخوف واني اشوف يتقدم علية

حركت نفسي وجبرتها تطلع من صدمتها وجريت رجلية جر حتى اتحرك من المكان درت وجهي ومشيت بسرعة اريد انهزم اطلع ما اريده يلزمني امشي بسرعة ما اريد الفت النظر

الدموع غوشت عيوني والرؤية بدت تقل امشي وانلطخ بالطلاب وردت اوگع على وجهي بس انجرت ايدي ووكفت على حيلي رفعت راسي ببطئ واني اتحسس القبضة الي محاوطة ايدي بقوة رفعت عيوني واني اشوفه واكف كدامي وابتسامة شر مرسومة على محياه

بلعت ريكي بخوف واني اريد افلت نفسي منه وبأيدي احاول افك قبضته عني

سليم : عبالچ ماتوكعين بأيدي غصب عنچ ترجعين واذلچ ذللل حقيرة تنهزمين وتصخمين راسي يا.......

هزيت راسي برفض ما اريد ارجع وياه باوعتله بتوسل وعيوني تترجاه يتركني : الله يوفقك عوفني ما اريدكم عوفوني بحالي ما اريدكم عيشو بعيد عندي قربكم يأذيني ايأذينييي

كز على اسنانه وشدد قبضته على ايدي وهمس بعصبية : تنجبييين لا اهينچ تمشين كدامي مثل الشاطرة لو افضحچ هنا كدام الناس كُلها

التفتت بعيوني بالمكان مليان طلاب واستاذة خفت ينفذ تهديده ويفضحني هنا رعشت شفايفي بخوف واني اهمسله بتوسل يعوفني بس توسولات بأت بالفشل جر ايدي وأشرلي امشي وياه

حاولت قدر المستطاع اسيطر على دموعي وما ابين حتى محد ينتبه علية مشيت وياه وهو يجر بأيدي وروحي رايحة من الخوف والقهر

طلعنا برا الكلية وهو يجر بية واخذني للسيارة فتح الباب وشمرني بداخلها بقسوة ماكدرت اتحمل وانفجرت ابجي بقهر واضرب على وجهي

اجة صعد يمي بالصدر وشغل السيارة وانطلق بيها كمت اصرخ بألم روحي راحت

ريتان : ليييييش بس فهمني ليييييش حرام تشوفني مرتاحةة حرااااااام اني ما اريدكمممم ما اريدكمممممم عوفني يمه عوفونيييييي

انفر وجهي للجهة الثاني بسبب الراشدي اكلته منه بچيت بچي احس نفس انكطع يغلط ويصيح علية يريدني اسكُت واني مستمرة ابچي

وصلنة كدام بيتنا القديم صف السيارة ونزل اجة علية فتح الباب وجرني نزلني وركع الباب فات للبيت وهو يجر بية واني اجلب بالحايط والباب ما اريد يرجعني لذيج الغرفة صرخت ركعت نفسي بالكاع اتوسل بيهم بس ماكو فايدة