دخيلة الشيخ زين العابدين
بقلم اوتار حزينة
البارت العشرون
______________&_____________
نوار
خليت الزيت بالطاوه على الطباخ داسوي عشه
تاليا صرخت گلبي فز بخوف عفت كلشي ورحت
اركض عليها للغرفه مالتي اردد
ااسم الله اسم الله شبيج حبيبتي
شلتها تبجي وتشهك
ااش ااش هياني اجيتج لاتبجين
ياحلوه
هدأت ورة مشوار من ظليت اهز بيها
وافتر اشتميت ريحه دهن محروك صحت
بصوت مكتوم
يبوو الطاوه
خليتها بفراشها ورجعت اركض للمطبخ
فزيت من شفت النار گبت بالطاوه،، واحترگت
من ثولي جبت مي وذبيته بيها كبت
بعد اكثر والدهن تطشر
بكل مكان ووويا لهب نار خفت وكمت اصيح
ياربي شاااسوي
ظليت اركض منا ومنا اريدها تطفى ماكو
كبت بعد اكثر خفت كمت اصيح
اااالحگوني ااحترگنا
طلعت اركض للباب فتحته اصيح
االحكوني راااح نحترك
ولد جاي بسياره نزل بسرعه يمي صاح
خيير شبيج
جريته من ايده بدون وعي واني اصيح
الحكنا عافيه راااح نحترك
طببته للمطبخ شاف النار صاح
خااولي جيبي شي ثخين
جان اكو واحد على الكرسي اخذته
جر من ايدي وراح بسرعه غطه الطاوه
دور بعيونه شاف صينيه على السنك جابها
وذبها فوك الخاولي النار طفت
سمعت صوت تاليا تبجي رحت اركض
عليها شلتها انتبهت اني بدون
حجاب رددت
عزه عزه شصار بيه اليوم
لبست حجاب اميرة وطلعت اني وتاليا
للمطبخ شفته شايل الطاوه
وطلع بيها للكراج
رجع وكال
قدر ولطف بس عبالك ذابه مي بالطاوه
ااي ماعرفت اتصرف خفت كلش
ذبيت مي عبالي تطفى
لا غلط من يصير عندج هيج اغطيها بقبغ
هي تطفى بسرعه
هزيت راسي باي تاليا تبجي
كال
سكتيها لبنتج
هاا مو بنتي هاي بنت اخويه
سكت وكال
اني وسيم ابن حجي مصطفى البيت الي بصفكم
اي شي تحتاجين
احنا بالخدمه
تسلم اخويه ماقصرت
طلع من يمنا سديت الباب ورجعت
للمطبخ كعدت مهدود حيلي من الهبطه اهز
بتاليا
شفتي شسويتي التهيت بيج وردنا نحترك
راح اشدج بظهري شلون الافارقه
حتى اكدر اكمل شغلي
براحتي
صفنت وكلت
هو هذا وسيم بس والله موو مايع
كملت بضحك وي تاليا
ووج هذا اسمر مثل بابا واني عبالي مثل
اخته ام شعر احمر نازك ومايع
مالك اجه وحجيتله الصار
جاوب
قدر ولطف بس مرة اللخ اخذي حذرج
عوفي كلشي اني اجيب من بره لو انتي اطلبي
الي تريدي لااتعبين روحج وانتي
بركبتج تاليا
تمام مالك بس اشكر الولد والله
لوما هو جان احترگ البيت
اي لازم اشكرو خلي نفض العشه
واروح علي
وسيم
كاعد وي اهلي على العشه حجيتلهم
الصار بيت مالك امي ردت
ياساتر يارب همزين مااحترگو
الحمد لله من اجيت انت وشفت البنيه
بالشارع ولو جان احتركو خطيه
بابا رد ليان ساكته ماتحجي شي سالت
ليونه شخبار مشروعج الجديد راح
تبلشين بي موو
اي بس ارتب الرفوف ابلش بي
ماما خاف تتعبين من جيبين سمج وتخلي
بالمشتل هذا شغل اضافي
وانتي تعرفين وضعج
ماماا اني مابيه شي
جاوبت بحزم وكامت من يمنا
باوعنا عليها كلنا امي ردت بقهرها
صايره ماتتحمل حجايه مني
كلنا رباب مو بس انتي
ابويه رد بخنگه حجيت
عوفها براحتها شتريد تسوي خلي تسوي
خلوها ملتهيه باي شي تريد تشتغل بي بلكي
تكدر تنسى ااا
سكتت وبلعت كلامي رددت
حسبي الله حسبي الله ونعم الوكيل
جرس الباب دك كمت ورحت علي
فتحته مالك واكف سلم
الله يساعدك وسيم
هلااا مالك شلونك انت شخبارك
ان شاء الله مرتاح بيتك الجديد
مرتاح والحمد لله
منو اجه
ابويه صاح رديت
مالك بابا
تفضل ابني ليش واكف بره
لاا مايحتاج عم والله اجيت اشكر
وسيم على السواه للاهل
الحمد لله على سلامتهم وقدر ولطف
الحمد لله عم
حجيت ويا
ياريت تتفضل لان عندي موضوع اريد
احجي بي وياك
مالك
طبيت رحنا للاستقبال كعدت وسيم ضيفني جگليت اخذت وحده امه طبت
سلمت وراحت
شلونها الكعده بالبيت مرتاح يمنا ابني
الحمد لله مرتاح عم والمنطقه حلوة وهادئ
وناسها طيبه
اي كلها خوش ناس
اابو منو انت
الحجي سالني جاوبتو
ابو تاليا عم
الله يخليها الك اسمعها مرات تبجي
ااي هي ام دموع
كلهم هيج ابني
ادحك الهم شكل الحجي تعبان ومو مثل قبل
ووسيم ضعفان ومبين علي الصاير
بيهم سال
ابو تاليا مااعرف يعني انت شنو شغلك
بس عبالك مقاول
اي والله مقاول وعندي مكتب بالمنصور
ها يعني ذني مالاتك المشتملات
اي عم مالاتي اني وشريكي
والله مادام مالاتك اريد اكلك شي
وسيم حجه جابتو
كول وسيم
ابن خالتي يريد واحد اجه مرة وعجبه البناء
وكال بلكي تشوفه اليه
والله هو واحد انباع لدكتور وبقى اللخ الي
بصفي عارضه للبيع
ها خوش حجي
المن لرسول
اي بابا مو تدري بيت خالتي يريدون ياخذوله
مشتمل حتى يزوج بي وشاف هذا
وعجبه وكال شوفه اليه
ماابيها شي ابني علواه يجي ويكعد يمنا
هو احسن من غيره
بيش عارضه ابو تاليا
عيوني راحت للباب فاتت ام شعر الاحمر نزلت
راسي كلتو السعر رد
تمام اكله واردلك خبر
براحتك
امه اجتي جايبه ضيافه خلتها كدامي
وسالتني
الحمد لله على سلامه مرتك وبنتك
وسيم رد
موو مرته ماما اخته
هااا يعني هاي البنيه اختك
اي خاله
مرتك وين ماشفنها
جاوبت بصوت مخنوك
مرتي ماتت من ولدت بنتي
لااحول ولا قوه الا بالله
سمعت الحجي حجه رفعت راسي
عيوني صارت بعيون بنتهم واكفه بنص
الصاله دارت وجهها ومشت
طلعت من يمهم ورة نص ساعه وسيم
اخذ رقمي وكال حتى نتواصل
على مود المشتمل
ليان
عرفت هذا الولد الي تعاركت ويا
وتخربط كدامي مرته ماتت بالولاده سمعته
يحجي لامي شلون ماتت انقهرت
على بنته كلش
لان مااشافت امها ولا هي فرحت بيها جنت
اسمعها تبجي لان غرفتها يم الممرر
الي بينا واني غرفتي قريبه
عليها
فاتحه الشباج اسمعها تبجي
وبنيه تغني الها صوته هو يوصل اليه
ااسكتي بابا لاتبجين عيونج
الحلوه تتاذه
يحجي وياها بحنيه ولطف وهي عبالك
تفتهم عليه تسكت ورة دقائق
اسمع ابويه ووسيم يحمدون بي
ويكولون علي خوش ولد وناجح بشغله
صارت عدهم علاقه ويا،،،، لان نزل من
سعر المشتمل لخاطر بابا واخويه
وباعه بسعر زين لرسول
جنت التقي بي من اطلع للمشتمل او ارجع
انتبهت اله دائما لابس اسود
ماما هم انتبهت وكالت
اكيد لابسه على مرته ابتسمت باستهزاء
ورديت
ماما انتي هم تصدكين اكو رجال
يحزن من ورة مرة
ماما بعد الصار بيه كامت تخاف تناقشني
او تغثني بكلمه ردت
ماادري هيج حسيت
هسه بوكتنا هذا ،،،،،الذكور هوايه بس
الرجال الثقه صارو نادرين يعني عمله نادره وصار
صعب تلكين واحد مايخون ومايغدر
سكتت اشرت على بيته لسيد مالك وكملت
الله يدري هذا شمسوي لمرته
واي ذنب شال حتى يخلي
يلبس اسود
عليها
ماما لاتصيرين متشائمه لو خلت انگلبت
صفنت بوجهها هزيت راسي بلااا
ورديت بوجع
الصار بيه خلاني اعرف اكو وجهين
للبشر واحد يحجي بي وياج حلو على كد المصلحه
ووبس تخلص مصلحته يشوفج الوجه
الثاني ويغدرج باي لحظه
ماردت
عفتها ومشيت للغرفه كعدت هناك صفنت على روحي بالمرايه كلشي تغير بيه حزن ترس
ملامحي غضب تارس صدري
حقد الم وجع خذلان غدر كل الاحاسيس
بيه وكلها تعبت روحي وجسمي
وعقلي بس كاعده
اكابر ادعي القوه حتى محد يكول ليان انكسرت
ومن منو من اختها سمعت بجي
الطفله كمت وكفت يم
الشباج اسمع عمتها نوار تسكت بيها
ثاني يوم بليل طلعت اريد اذب الزبل
بالحاويه وكفت يم بابنا من
سمعت صوته يحجي بصوت مخنوك
جان يم بابه وقريب من
الباب مالتنا
ماجاي اكدر انسى السويته زين تعبان
كلش لميس راحت زعلانه مني من وره سوالفي
المكسره ماتت وخلتني شايل ذنبها
طول العمر شااحجي قهرتها
بالنسوان والشرب قهرتها وقهرت روحي
وياها
الجنت شاكه بي وگلبي حاسه
طلع صدك هو سبب موت مرته من وره
سوالفه الموزينه
سمعت بابهم انسد طلعت ماكو هو
اسمع صوته يحجي بالكراج ذبيت الزبل ورجعت
جوه كرهي زاد اله ودعيت علي
كلت
الله ياخذ حق كل بنيه قهرها واحد مثل هذا
الي مسمي روحه رجال الله ينتقم
منك انت واشكالك
بغرفتي سمعته يحجي وي بنته بحنيه
اهز راسي باستهزاء واردد
ااي عبالك راح تكدر تعوضها عن امها
عبالك بهاي حنيتك عليها راح تكدر تسد
المكان، ،،،،الي انت خليته فارغ من موتت امها
من ورة سوالفك الموزينه
دموعي نزلت وي دموعها تبجي واني
وياها واردد
حسبي الله عليكم على كل واحد مؤذي
وماخاف الله بينا حسبي الله عليكم
وعلى كل واحد كسر قلب
بنيه واذاها
ظليت ادعي علي وعلى ايهم وكل واحد مااخاف
الله بينا على كل واحد وعد وماوفى
بوعده
لم يستوصوا بينا خيرا يارسول الله ،،كسروا القوارير والافئدة
ثاني يوم،،، العصر
طلعت،،داروح للمشتل وكفت يم سيارتي
هو طلع من بيته يحجي
بالجهاز شافني تردد بعدين كال
السلام عليكم
مارديت صعدت سيارتي وطلعت بيها
بالمرايه شفته عكد حواجبه
وصافن عليه
مادرت بال استداريت على الشارع
العام ورحت للمشتل سيارته فاتت من يمي
سمعت اغنيه بجن عيوني
غمضت بقوه من تذكرت ايهم جان يحب يسمع صلاح حسن وخصوصا سحر العيون فتحت مخنوكه وودمعتي ،،،،،بطرف عيوني وكفت يم
اشاره المرور صار بصفي صافن واني
صافنه يسمع واني اسمع الكلمات
انهاريت دموعي
نزلت شلال مسحتهن بسرعه
ولبست المناظر درت وجهي علي
يباوع عليه
شغلت من سمعت هورن حرگت ورحت
للمشتل
مااعرف شلون فتحته ولا شلون طبيت مخنوكه
ابجي بصوت وشهگه الذكريات كلها هاجت
وخلتني انهار ،،،،ايد مدت بطل مي
رفعت راسي شفته هو
حجه
اشربي مي
كمت انداريت منه مسحت دموعي ورديت
بصوت مخنوك
انت شجابك هنا
شفتج تبجين بالسياره ومو على بعضج
كلت امر اشوفج خاف بيج شي
ماابيه شي وتكدر تتفضل بره
انداريت علي صافن عليه خله المي
على الميز وكمل
انت بنت الحجي وجيران يعني اعرف ابوج
واخوج وماايصير اشوفج بهل
الوضع واعوفج
ابتسمت باستهزاء وباوعت علي من
فوك ليجوه
گلبك انكسر عليه بس ماانگسر على مرتك
من قهرتها من ورة سوالفك المو زينه وخليتها
تموت من وره قهرك
وجهه انطعن وصار احمر دم صفن
بوجهي كملت بروده وحقد
الله ياخذ حقها منك ومن كل واحد مثل
شكلك مسمي روحه رجال وهو ذكر
خزرني والغضب ترس ملامحه ودمارت رگبته ظهرت،،،،
لم قبضته بقوه هزها بعنف
وجان يضرب البطل ويشمره لبعيد طلع من
يمشي بسرعه
كعدت اتنفس بقوه وصافنه على الباب
حجيت السمعته منه،،،،،، وجرحته كلش
ويستاهل هالشي لان كرهته من اول مرة
شفته بيها من تعاركت ويا
كلت لا شكل ولا اخلاق وعبالك
مجرم وخريج سجون والسواه بمرته
خلاني اكرهه بعد اكثر
هيله
الشيخ صگبان صممم على سالفتو الرديه اني
وشغل ابويه حولين يله يجوز منو
واذا ماسوه ااي يريدو
يذبو بالحجز
كاعدين يم ابويه وصافنين علي
لازم راسو وامي تفتر يمنا وتفرك بأيدها بخوف
دمعتها بعيونها تنزل كل ساع وتردد
وش العمل يبو البنات هذا المايخاف
الله يريد هيله
مارد كملت
بنتي صغيره ياحميد وهو جبير بالعمر شلون تروح الو
من كلج راح تروح لها
جاوبها بهدؤ عكس وجهو المطعون
رااح يحجزك يابه
هاله تكلمت بخوف
محد يحجزني يابنت كولو الله وخلوني افكر
شلون اطلع اروحنا من هالمصيبه
يابه كولو لزين خلي يساعدك
خزرت ريمه ابويه رد
ماااحجي ،،،،لاحد ولا اطلب اي فلس لا من
زين ولا غيرو
عجل شلون راح تفك روحك منو شلون يااحميد
امي سالتو بجزع وخوف
سكت مارد هي ظلت تردد
راح ياخذ بنتي بالگوة
ماااااياخذها واااسكتي عااد
صاح بها بغضب الكل سكت وخنس
يابه الله يخليك كول للشيخ شعلان هو يعرف
يتصرف
ريمه حجت بتوسل ودموع رد
بغضب
المن اكول يابنت عمج شعلان مو حزب معه
شتريدين يخلي رحو بهل الشغله
وتعلك بينهم يكع واحد من
عدهم وتصير من وجهي
سكت وكمل باعصاب
لا شيخ شعلان ولا ابنو اريدهم يعرفون
بهل السالفه خلوني انا
ادبر روحي
ساكته وصافنه علي بقهر اعرف الحال
واعرف العندنا ماتكفي يسد نص ربع الخساير دحك
لي وكال
لاتشيلين هم يبعد ابوج ماتصيرين
لها وانا ابوج
مارديت كمت سريت للغرفه سمعتو كمل
بقهر
هونت يااشهم هونت يبن اخويه من مااعقدت
وسديت حلگو عالشايب
كلهم مو بس هوو ياحميد واولهم اخوك
دشيت غرفتي كعدت وخواتي لحكني ساريه
اجتي يمي سالت بخوف
ياهيله راح ترحين لهذا الشايب
لاااا
رديت بتعب وقهر ريمه كعدت اگبالي
تكلمت
شلون واح تفض ماادري
ومافضت بليل هم اجه وتهاوش مع ابويه
وهددو عمي جان موجود من عكب
الشيخ انهد بابويه وكلو
اانطيها الو وفگ روحك
وووش كاعد تحجي انت المن انطي
ولمن بنتي وهي بنت 18لهذا الشايب
وهو اكبر مني بجثير
عجل وش تريد تسوي هااا تريدو يذبك بالحجز
يذبني بالحجز ولااا انطي اظفر من اظفر
هيله
ياابو شهم وش بلاك انت ماتعرف ابنك
يريد بنتي
اني ردت وانهد بها
اااخويه افرض من ااابني والمفروض بنتج
تضحي لابوها وتقبل بها
شكاااعد تحجي انت شبيك ياخويه
ابنك يريد بنتي ومنطي جلمه له ولك
اارجع بها وفك روحك يااحميد وراك كومه
بنات وين يولن هن ووحرمتك اذا
ذبك بالحجز
ماايسويها بس كلام ياخويه ديهدد
حتى انطي هيله
مااتسمع الجلمه يااحميد وراح تجيب البله
لروحك بس اكلك هاا مااريد شهم
يعرف شفتو شسو
وي بن رفيجك الشيخ ويسويها
وي صگبان اذا سمع
محد يكلو تطمن
ابويه جاوبو بنتره عمي طلع يحجي
علي لان ماايقبل يسوي
الي كلو علي
ظلينا هيج عايشين بقلق بخوف خاف صكبان
يسوي الي كال علي ويحجز ابويه
ثاني يوم زين خابر
ابويه وراح له لكأعهم امي تردد
بترجي
بلكي الله يهدي ابوج ويگلو للزين
واكفه يمها اندحك لهم واكفين بكاعهم
ويحجون رديت
يمه ابويه عزيز نفس ومااينزل راسو لاحد
والفلوس جثيرة شلون تريدي
يطلبها منهم
سرت لليجدام ادحك لهم بس ابويه ماطول
يمو عگب علينا امي ضربت ايد بايد وكامت تبجي
رددت
ماگلو يااهيله
دارت روحها وسرت للدارنا تبجي بقهر
ظليت ادحك لابويه يسري بتعب وظهرو مكسور
دخت وتعبت من التفكير وكلت
شراح يصير بيه اني واهلي اذا ظل هذا الردي
مصمم على الي يريدو
كرب دحك لي ماحجه شي ولا انا سالت
سرى للدار عيوني راحت لزين
واكف ويدحك لي من
بعيد
درت وجهي وعگبت لدارنا دشيت اسمع امي
تلوم به ليش ماكل لزين وطلب
منو يساعدو
ابويه انهد بغضب
يااازهيره وش بلاج عقل ماظل براسج
شلون تردني اطلب منو ملاييين شلوون وهنه
مووو شويه كومه فلوس اليطلب مليون
اثنين موو هالمبلغ الي يكسر
الظهر
عجل شرااح نسوي كلي شلون راح نتصرف
وهو شاد ويانا ويهددك بالسجن
اذا ماانطيتو هيله
خلو يهدد بنتي ماانطيها اله لو مو سجن الفي
به لو يذبحني هيله ماتروح الو وانا
حميد
امي سكتت تبجي هو كمل
مااريدو يعرف اي شي مااريد زين يعرف الشيخ
صكبان ساومني على بنتي الولد طايش
وسلاحو گريب من ايدو
شفتو شعمل بابن اخويه من ضربها
راد يجتلو وخاف لو سمع
يهد علي ويذبحو
ياحميد زين يحب بنتك ويودها وعلواه تروح
له اشوفو احسن من ولد اخوك واختي
الي هون وخله هالشايب
يلزك بالبنت
واكفه بره اسمع وريمه حدي تسمع تكلمت
امج كاعده تشوف الي انا اشوفو
خزرتها بغضب سكتت دشيت ابويه وامي
سكتو شهم اتصل مرة لجن ماحجيت معه عزه نفسي عگب السواه خلتني مااكدر احجي معه سأل عليه وراح لان جان مستعجل وبعد مااخابر
العشه صار محد اكل الكل صافن ويهوجس بالي راح يصير احنا كاعدين سمعنا
صياح غانم
ياعم حميد وينك
ابويه فز وكام بسرعه طلع واحنا وراه
صفنت علي يبجي ويضرب براسو ابويه
صاح به
وش بلاك ياغانم
دحك لي گلبي هبط وكلت شهم به شي
رد گوة
ياعم الحك بيت اخوك
ابويه لزمه وصاح به
ووش بهم ولك احجي لاتعل گلبي
كعد يگهد بالبجي سمعنا من بعيد عياط جاي من كاعهم امي صاحت
يممه وش بلاها خيتي
رااح شهم يااخاله رااح
اامي عااطت وابويه صرخ بصدمه
ووولك شجاي تحجي انت شهم
وش بلاه
راح خويه ولكم استشهد
رجلي بادن وكعت على رگبتي
ماكدرت اتحرك ولا طلع صوت مني بس
صافنه بذهول واسمع صريخ خالتي ترس
ظلام الليل ابويه ركض
لهم وامي هم
كمت وكعت خواتي اجني عليه كومني
اسري بصعوبه وانا سانده روحي عليهن اسري
واتعثر واكول جذب شهم مامات هذا حلم
انا جاي احلم بس من طبيت
لبيتهم شفت خالتي مخله روحها شكر
يدك على راسو غيث بزوايه
يشهك ويبجي عمي
فاك عيونو ويبجي بصوت مخنوگ
يااخيه فهميني وش صاار شهم شبي
ذبحوو ولدي ولجن زهيره راح ولدي
ذبحوو المايخافون الله
ابويه لزم عمي صاح به
منووو كال ااحجي يبو شهم خاف جذب
ولكم منو كال الكم منوو حجه
شكر جابوو وهو يبجي
خابرونا الوحده مالتو
يااعم كالو طلع بدوريه على الحدود
ومجتولين كلهم
صوتي طلع عطت عيطه طلعت روحي
وياها صرخت
تجذذب شهم ماامات ولكم جذب كاعد
يجذبون عليكم
وولج رااح شهم يااهيله ولدي راح وماشفتو
عريس ولج اانا السبب انا ااي
ماخليتو يفرح بيج
من امدااني
خالتي كامت تضرب على وجهها بقوه لزمنها
نسوان هي وامي ابجي واردد
ماامات ولكم ماات راح يعكب شهم مابه
شي ماينسى عهدو لي
وينوو وينو ابني جيبوو اريد اضمو بحظني
خالتي تخبلت كامت تنفض بروحها وتملخ
بوجهها صاحو بها
كولي يالله اذكري الله ابنج شهيد
ابويه حظن عمي يبجي ويا ويردد
لااله الا الله انا لله وانا اليه راجعون
راح ولدي ياحميد راح وكسر ظهري
صافنه بجمود عليهم اشوفهم يبجون ويعيطون
خالتي ملخت روحها وامي وياها واكول
جذب هسه يعكب
شهم طيب ما مات دموعي تنزل افز كل ساع
واصرخ باسمو
ياااشهم عگب ولااتحرك گلبي عليك
لجن هو عگب ثالث بتابوت
ملفوف بالعلم العراقي ماكشفوه
ولا شفنا كالو ماباقي منو
غير جم لحمه
خالتي نامت على تابوته تنعي وتبجي
واخوته وعمي انا صافنه علي اگبالي لجن مااشوف
جنازه لا اشوفو ذاك شهم الي يحدر
عليه مبتسم واسمع صوتو
شلونج يااملي
غمضت عيوني ابجي واضرب راسي
بالحايط وانعي علي بگلبي
سمعت راح يشيلو
زحفت للتابوت خليت راسي يم راسو
ابجي واردد
عهدي باقي معك ياابن عمي
ايد سحبتني منو ذبيت روحي عليه صوت
ابويه تكلم بخنكه
اذكري الله يابنيتي وخل نشيلو لدارو
شالو جدام عيوني وزفو ربعه فرشه العرس
الجان المفروض يخلوها على فراشنا
صارت على لحده
وره ايام بغرفتي كاعده ابجي وانوح علي والوم
بروحي لان ماامنتو بايد الله من راح ماودعتو
مثل كل مرة جفيت منو عگب السواه
بي
كاافي ياهيله عيونج راحن
راح شهم يااريمه
اذكري بالرحمه
شهگت بالبجي امي دشت تعبانه وباجيه
جثير ريمه سالتها
ها يمه شلونها خالتي
شلونها يايمه مخبله حشه گلبها وكل ساع
تصرخ باسمو
كعدت حدي كملت بقهر
ااسكتي يمه هذا اجلو وانتي مؤمنه وتعرفين
اذا اجه اجل الواحد مايتقدم ولا يتاخر
ثانيه
اعرف الدين واعرف كلنا راح نموت ونفارك
الي نحبهم بس عقلي ماجاي يستوعب
انا بعد مااشوف شهم
رديت بشهكه
يمه شهم راح وبعد مااشوفو
بجت وياي وردت
راح يم رب كريم واكرم منج ومني
بعد مااشوفو يمه موو يعني شهم صدك
مات بعد مايعكب كولي يمه
احجي انا بكابوس
وهساع اكعد منو واشوفو جاي
ومحدر علينا
ابويه صار جدامي يدحك لي بقهر
والحزن تارس ملامحو
اذكري الله يابنتي الدنيا مادامت للنبي
الف الصلاه والسلام عليه تريدها تدوم النا
شهگت بصوت قوي كمل وهو رافع
ايدو للسما
كل من عليها فان ويبقى وجهه ربك ذو الجلال
والاكرام ماايدوم غير وجهه
الكريم
ونيت بصوت مكتوم امي اخذتني لحظنها
ضميت روحي به ابجي علي
وعلى فراگو
زين العابدين
ابويه عگب من مكه وثاني يوم احنا
بالمضيف الصبح زلمه نعرفو دش سلم وكعد
حجه وي ابويه بعد ماشرب
الكهوة
ياشيخ ماعرفت من استشهد
ابويه دحك له وجاوبو
من ياساتر
ولد اخوه لمله حميد
عكدت حواجبي ودحكت لابويه سالو
من شهم
اي ياشيخ البارحه بليل وصلهم خبرو
لاااحول ولا قوه الا بالله وشلون صار هاالشي
مدري ياشيخ يكولن طالع بدوريه على
الحدود وهناك طاكه عليهم عبوه
جاتلتو هو وربعو
اانا لله وانا اليه راجعون الجنازه جابوها لااا
لا اظن باجر يجيبوها
ابويه كام كمت معه والكل ويانا تكلم
ارخصوني يالربع هذا رفيجي وخويه
ولازم اكف معه بهل الشده
مرخوص ياشيخ
ابويه سرى وانا معه تكلم معي
انت ظل هينه بالمضيف انا اروح اعزي حميد
واعگب باجر من تجي الجنازه نطلع معهم
تمام شيخ
هو راح وانا عگبت للمضيف كعدت بمجلسو
اسمع حجي الاودام عنه يحمدون
به وباخلاقو ويتحسفون
على شبابو واحد تكلم
اظن هو خاطب بنت مله حميد
اي شلون فجيعه منا الحنطه تبعهم راحت
بالحريق ومنا اجاهم خبر زلمه
بنتهم
حوار صار ظليت اسمعو وانا ساكت مااعرف
بشنو احس افرح لان راح لو احزن على
شبابو هيله بين عيوني وكلت
راح الجانت رابطه روحها به وتريدو وصارت
حره يعني اكدر وي الوكت اخليها تصير
لي بس تبرد من هالصدمه
ابتسمت بالم
كاعد تحلم يازين هيله مستحيل تصير
لك حتى بالحلم ماتصير
افهم يول البنت تكرهك وتموت منك تشوف
عزرائيل ولا تشوفك
صفنت للبعيد وتذكرت ذاك اليوم
من كلت لها
ياهيله عز الله مااغدر بابن عمج لجن
ادعي من الله الزمن يغدرج به
والوكت يلفى بج
يمي
رددت وي روحي
ااي يازين دعيت والله استجاب دعائك
وراح شهم لجن ماراح يلفي الوكت بها ولا راح
تشوفها حدك
ذبيت حسره كملت بقهر
هساع شحالج بجيتي بجت عيونج نحتي
يااهيله انكسرتي من وليفج راح
وسكن الگبور
نزلت راسي اتنهد بضيم وقهر حبها
كسر غروري كسر كلشي بيه وي الوگت عرفت
انا ماكرهت هيله ابد جان حب
بس انا كابرت وغروري عمى عيوني عن
هذا الشي كلت بصوت مخنوك
ااخ يولي اخاف اضحك اخاف افرح
وانتي بالخفا تبجين ماينطيني گلبي افرح
وانا اعرف بيج تنوحين علي
ذبيت النفس بقهر وكملت
شحال گلبي يايمه تولع بوحده ماتحبو
انا الي ماانكسر حرمه دكت خشمي
وكسرتني وخلتني انوح من
وجع گلبي
صفنت للبعيد ورددت
هواج ياهيله سچين يجرح ولا يبري
وصدري جرح من عنا الشوگ مابرى
مالك
سمعت الحجته بنت حجي مصطفى عرفت
هي سمعتني من جنت احجي بره
كلامها دك بالعظم وخلاني بذاك اليوم
اختنگ اكثر مو اني مخنوك بشير انتبه
اليه سال
مالك بيك شي
صفنت علي رديت كوة
لا مابيه شي
اذا ماتكدر عوف كلشي اني اكمله
كمت راسي يريد ينفجر من الوجع كتلو
راح اروح للبيت لان راسي يوجعني فد مرة
اكلك ليش ماتروح للدكتور تره وضعك مو
تمام روح شوف ليش هالوجع مستمر
عندك
هزيت راسي باي ومالي خلك اجاوبو طلعت
لسيارتي صعدت حركت ورجعت للبيت
طول الطريق كلامها يدك
براسي بقوه
گلبك انكسر عليه بس ماانگسر على مرتك
من قهرتها من ورة سوالفك المو زينه وخليتها
تموت من وره قهرك
دعت عليه بگلب محروك وتذكرت ام لميس
وخواتها شلون دعن عليه اكثر من مرة
لان جنت مو خوش وياها
روحي اختنگت والنفس ضاك بصدري
وكفت السياره على صفحه سندت راسي ليوره
صافن واحس بالتعب بالقهر
ومحد قهرني غير اني نفسي
بالجنت اسوي بيها
اخذت بطل مي طلعت مسكن شربت اثنين
شغلت السياره ورحت للبيت
وصلت وكفت يم بيتي سيارتها بره
صفنت عليها بجمود رددت
انتي مذبوحه من اقرب الناس الج واني
ااخ مني هم سويت مثلهم وذبحت اقرب الناس
اليه
ذبيت حسره وسيم طلع شافني نزلت
اجه عليه سلم
الله يساعدك مالك
هلا وسيم
صفن عليه كال
خير بيك شي
لاا
جاوبت مختصر رد
بيك شي مالك تره وجهك صاير احمر
دم خاف ضغطك صاعد
مدري هسه اطب اشوفو بالجهاز
شوفه لاتخلي يصعد مو زين عليك
خاف يصير غير شي بعدين لا سامح الله
وخلي هم دكتور يشوفك ليش ديصعد عندك
فرگت رگبتي بتعب رديت
هو هم هيج اترخص منك شويه تعبان
اخذ راحتك ومابيك غير العافيه
مشيت لبيتي طبيت ورحت للمطبخ
مابي احد اسمع نوار تغني لبنتي كاعده بالصاله
شافتني حجت بفرح
هيانه اااجه بابا الحلو
ابتسمت رغم عني شالت بنتي ليفوك
ظلت ادحك عليه وتناغي من اشوفها
تخليني انسى قهري وتعبي وهمي
اخذتها منها خليتها بحظني
بستها ضاجت اختي
حجت بضحك
شلون يعني يلبس قناع بابا حتى ماتضوجين
من شواربه ولاا النوب سوه لحيه
يعني من صدك راح تضوجين
منه
خليتها بحظني ادحك عليه مبتسمه وتناغي
صايره تعرفك
اي كبرت شويه وكامت تعرف
هههه بس مو مثلي يمممه هي تموت عليه
وتعرفني من صوتي موو توته
شالتها من حظني كامت تبوس بيها كالت
ابويه وامي والولد راح يجون على
العشه فهد ومحمود كالو
لاتسوين شي راح نجيب مشاوي ويانا
هلا بيهم
اي كوم اسبح لان هم بالطريق
يالله
هيله
سمعت من ابويه الشيخ شعلان اجه
اخذ،،،،، من خاطرهم وهو تكفل بالفاتحه
مال شهم وماخلاهم يصرفون فلس
امي ظلت تلح علي يگلو
على الصاير بنا وهو مايقبل الشيخ
صگبان مااجه ولا اخذ من خاطر ابويه
لجن لفه وره اسبوع،،،،، واجه وهو مو مخلي
گدر لحزنا ولا للدم الي بحلگنا وكف بره يهدد بابويه اسمعو صوتو يهدر بغضب بالحديقه ويهدد به وگفنا
كلنا يم الشباج وندحك له
هذاااا وابن اخوك الجنت تريدها له
وكلت انت منطي چلمه هي له
راح وسكن الگبور وش المانع هساع ياحميد
المانع كبر سنك يااشيخ
ابويه ردو بغضب ذاك صاح به
اانت مو مله وتعرف هذا ماهوو عيب ولا حرام
حرام وعيب انطي بنتي لواحد بكبر جدها
شتريد ياااشيخ انطيك هيله وهي بكبر وحده من بنات ولدك
ووولك لااتخليني ااسوي شي
تحجي بي العرب سنين
وش تريد تسوي تنهب البنت وانت شيخ
ااسويها ياحميد اذا ظل راسك يابس
عيييب عليك هالسالفه الرديه ياصگبان
والزم حدك عاااد بنتي ماتصير
لك لو حزة هالرگبه
شفت ازلامو تقدمو على ابويه طلعت وجريت
گرك من الگاع وصحت بهم
بغضب وقهر
الي يگرب حد ابويه ااجتلو
امي وخواتي طلعن ووكفن يمنا والخوف
تارس ملامحن
الشايب العايب ابتسم گرب عليه
ضربت الگرك گدامو بقوه عگب نفس خلقتو
وتكلم
عيب ولج انا راح اصير زلمتج
تحلم يالهامل تجيس طرف ثوبي
وانا هيله بنت حميد
ابويه صار جدامي هو صاح به
توووكف بوجهي يااحميد تريد تكسر
جلمتي وانا صاحب فضل عليك
ماااصاحب الفضل غير الله هو الي مفضل
عليه بخيرو وانت مالك فضل
عليه
هييج الحجي يول
جاوب ابويه وصرخت به
ااااي
كملت
ماانت صاحب فضل علينا بتعبنا ناكل
والخير الي انت به هم تعبنا
عگب يالردي الي ماتستحي على شيبتك
ازلامو حاوطنا من كل صوب ردت احد يجي
من الزلم الي حوالينا بيت عمي ماكو
محد لفه ولا گرب
امي حجت بتوسل ودموع
ياشيخ ماهي من عمرك بنتي صغيره
الله يخليك شيلها من راسك وارحم ضعف
حالنا
بلحظه صاااح
اااخذوها لهاي انا مو الشيخ صگبان
اذا مااكسرت خشمج انتي وابوج
بسرعه تقدمو عليه امي كامت تعيط ابويه
ضرب واحد گرب عليه ضربت اللخ على ايدو
من تگرب وراد يلزمني
وكع يصيح ابويه صاح بخبال
اااهربي يااهيله روحي يممم خويه
وولج اانهزمي ياابنت
ادحك له يعارك بالزلم وامي معه وخواتي
يتعايطن شكر لفه وتلازم وياهم
عم عزام اجه يركض
هو وغانم يحجون ويهدون بيهم مااكو يريدون
ينهبوني بالگوة ابويه صرخ
روووحي ياهيله للللشيخ شعلان
يااابه شلون ااعوفكم
صاح بغضب وهو يدفع بواحد
ااسررري يااابنت
عگبت ليوره ادحك لهم غانم وابويه وشكر
متلازمين مع الثلاث الي هدو عليه
وامي وريمه واكفات بصدر الشيخ صگبان
ماخلنه يجي عليه سريت بسرعه للمحصر
اسمع صوت عياطهم والردي يحزم
بعصابتو عليه
مااسرجت مهرة صعدت عليها بدون
سرج طلعت بها صار بوجهي واحد راد يلزمها
شديت شعرها رفعت روحها ليفوك
وضربتو برجلها وكع بالارض ،،،،سريت
بها بسرعه
طلعت بها للدار الشيخ شعلان
ابجي واتذكر شهم وعهدي معه اذكر
كلام عمي شلون ،،،،،يكول لابويه
انطيها الو وخلص روحك شهم
ومات المن خالها بعد
اردد بدموع
شلون انسى عهدي معك يااشهم وشلون
يردوني اخذ هل الشايب وهو
اكبر مني
درت راسي شفت سياره تطرد ورايه عفت
الشارع ورحت بالچوله اطرد بها بسرعه اريد اصل ،،،،دار عم شعلان بس اصله محد بعد يكدر يندك بيه اطرد بها وودموعي تسف على خدي
كل ساع ادحك ليوره اشوفهم ورايه
ضوه دارهم لاح من بعيد جيله وزت يم
اذني مهره فزعت لزمتها بگوة
وصرخت بها
ااسري ياامهرة ااسري
سرت بسرعه دحكت لليوره هونو
من گربت يم دار الشيخ شعلان حرس لاحو من
بعيد يم البوابه جريت شيله سوده
خفيفه لافه بيها رگبتي خليتها على وجهي
تلگوني صحت
دخيله الله دخيله عليكم
فتحو الدرب حدرت من مهره ابجي
وانهد واحد سأل
من معج يااخيه
عمي الشيخ وينوو ااريدو
جاوبتو بشهكه
بالمضيف ياخيه اااسري معي
سريت وهو وياي دشيت منزله البوشيه
على وجهي اشهك بصوت شفتو جالس وحدو وظهرو عليه غديت
بسرعه الو شمرت روحي يم رجلو تكلمت
بشهكه
يااشيخ اني دخيله الله ودخيله عندك
وصلتي
ايد رفعت نگابي
شهگت ورجعت ليوره خزرتو بعيوني وصحت
هذاا انت
يتبع
اوتار حزينة