အပိုင်း(၄၈၂)
ဤတစ်ကြိမ်တွင် ထျန်းနင် တက်ရောက်ရမည့် talk show၏အမည်က 'Superstar Talk'ဖြစ်သည်။
ဤအစီအစဉ်က ရုပ်ရှင်လောကတွင် အဓိက talk showဖြစ်သည်။
ဤတစ်ကြိမ်တွင် ထျန်းနင်က သရုပ်ဆောင်မင်းသမီး တစ်ဦးအနေဖြင့် ပွဲတက်ရောက်ခဲ့၍ ဖုန်းချိုင် ပွဲ တက်ရောက်ခဲ့သည်နှင့် ခြားနားခဲ့သည်။
သူမကို ဆန့်ကျင်သော ပရိသတ်ပြဿနာက ယခုထိတိုင် ရှိနေသေးသည်။ အမေရိကန် ဒါရိုက်တာနှင့် ဆက်သွယ်ခဲ့သည့် သတင်း နှင့် မျက်နှာ နှစ်ဖက်ရှိသော သတင်းက ယခုထိတိုင် လျင်လျင်မြန်မြန် ပျံ့နှံံနေသေးသည်။
ဖျော်ဖြေရေးလောကအတွင်းမှလူအားလုံး စုပေါင်း၍ သူမကို တိုက်ခိုက်ခြင်း ဖြစ်သည်။ သို့သော်လည်း သူတို့အစီအစဉ်ကို ဘေးထိုင်ကြည့်ရန်သာ ထျန်းနင် ဆုံးဖြတ်ထားသည်။
"အစ်မထျန်းနင် ဒါက talk showမှာ မေးမယ့် အချက်အလက်တွေပဲ"
စုန့်ယန်က ထျန်းနင်၏ အိမ်သို့ ရောက်လာပြီး လိုအပ်သော အချက်အလက်များ လာပေးသည်။
"ပေါ်ပေါ်ထင်ထင် မဖြစ်ရအောင် အစ်မရဲ့ဗိုက်ကို ဖုံးကွယ်ပေးနိုင်တဲ့ ဝတ်စုံ ရွေးပေးထားတယ်"
"ကျေးဇူးတင်ပါတယ်"
ထျန်းနင်က အချက်အလက်များကို လက်ခံယူပြီး ခေါင်းညိတ်သည်။ သူမက ရုတ်တရက် တစ်စုံတစ်ရာကို သတိရသွား၍ အချက်အလက်ဖိုင်ကို အောက်ချကာ စုန့်ယန်ရှုဘက် လှည့်လိုက်သည်။
"မင်းက ငါ့ကို ဂရုစိုက်ပေးဖို့ ခဏငှားထားတာဆိုတော့ ငါက ကလေးမွေးပြီးရင် ခဏအနားယူဦးမှာလေ။ မင်း ဘာအလုပ် ဆက်လုပ်မယ် စဉ်းစားထားလဲ"
စုန့်ယန်ရှု သူမ၏စိတ်ကိုယ်သူမ ကြိုတင်ပြင်ဆင်ခဲ့သည်မှာ ကြာပါပြီ။ သူမ၏ခရမ်းရောင် လည်စည်းကို စိတ်ရှုပ်ထွေးဟန် ဆောင့်ဆွဲပြီး ပြုံးသည်။
"မို့သူဌေးက ကျွန်မအတွက် တခြားအလုပ် စီစဉ်ပေးထားပါတယ်"
"ဟမ်"
"မို့သူဌေးက အစ်မမောင်လေးရဲ့ မန်နေဂျာ လုပ်မလား ကမ်းလှမ်းပါတယ်"
စုန့်ယန်ရှု ရှင်းပြသည်။
"ဒီအကြံ မဆိုးပါဘူး"
ထိုစကားသံကို ကြားပြီးနောက် ထျန်းနင် စိတ်ချရသည်။
"ကျင်းရွှမ်က ဖျော်ဖြေရေး လောကကြီးထဲ လိုက်လျောညီထွေ နေနိုင်ပေမဲ့ ငယ်ရွယ်သေးတော့ အမှားနဲ့ မကင်းဘူးလေ။ သူ့ဘေးနား မင်းရှိနေတော့ ငါလည်း ပိုစိတ်အေးရတာပေါ့"
"အစ်မ စိတ်မပျက်စေရပါဘူး"
စုန့်ယန်ရှုက ရုတ်တရက် မတ်တတ် ထရပ်ပြီး စိတ်ရင်းအတိုင်း ထျန်းနင်ကို ဦးညွှတ်သည်။
"ဒီအတောအတွင်း ကျွန်မကို သင်ကြားပြသ ပေးခဲ့တာတွေအတွက် ကျေးဇူးတင်ပါတယ်"
"ငါ့ကို ဂရုစိုက်ပေးလို့ ကျေးဇူးတင်သင့်တာ ငါပါ"
ထျန်းနင်က သူမ၏လက်ကို ဖမ်းဆုပ်ကာ ပြန်ဖြေသည်။
" 'Superstar Talk'အင်တာဗျူးက အဆင်ပြေပါ့မလား"
"ဒါပေါ့ အဆင်ပြေသွားမှာပါ"
ထျန်းနင် ပြုံးသည်။
စုန့်ယန်ရှုက ထျန်းနင်ကို နှုတ်ဆက်စကား ပြောပြီး ထွက်ခွာသွားသည်။
ထျန်းနင်က စုန့်ယန်ရှု သူ့အမြင်အာရုံမှ ပျောက်ကွယ်သွားသော မြင်ကွင်းကို စောင့်ကြည့်လျက် ဝမ်းနည်းသလို ခံစားရသည်။
...
"နောက်ဆုံးတော့ ထျန်းနင်က talk showပွဲကို တက်ပြီပေါ့။ သူနဲ့ ပတ်သက်တဲ့ အတင်းအဖျင်း သတင်းတွေ ကြားရရုံက လွဲရင် လူလုံးထွက်မပြတာ ကြာပြီပေါ့"
"သတင်းကောင်းကြားရပြီ။ အခက်အခဲတွေ ကျော်လွှားနိုင်ဖို့ မျှော်လင့်ပါတယ်။ ထျန်းနင်ကို မျက်နှာနှစ်ဖက်နဲ့လူကို ပြောတာ ငါ လုံးဝ မယုံကြည်နိုင်ဘူး"
"ဟွန့် ပရိသတ်ဟောင်းတွေက ရွံဖို့ကောင်းလိုက်တာနော်"
"ဟိုးတလောကလည်း သေးနုပ်တဲ့သရုပ်ဆောင်လေးက ငါတို့ထျန်းနင်ကို ဝေဖန်သေးတယ်။ ငါကတော့ ထျန်းနင်ဘက်က ခုခံပြောရမှာပဲ။ ထျန်းနင်အတွက် သူတို့အားလုံးကို အော်ငေါက်ပစ်ချင်တယ်"
"အပေါ်က ကော်မန့် မန့်တဲ့သူရေ မင်းက ထျန်းနင်ကို ဆန့်ကျင်တဲ့ ပရိသတ် ၁၀ယောက်ကို တိုက်ခိုက်မယ်သူလား။ ထျန်းနင်ရဲ့ အကျင့်စရိုက်ကို မဖျက်ဆီးရင် အကောင်းဆုံးပဲ"
the talk showကြော်ငြာ အပိုင်းတိုလေးက ထျန်းနင်၏ နာမည်ကို ရှာဖွေမှု ထိပ်တန်း ရောက်ရှိသွားစေသည်။
The talk showကို ယနေ့ည ၇နာရီတွင် ကျင်းပရန် အချိန်ဇယားဆွဲထားပြီး တိုက်ရိုက် ထုတ်လွှင့်မည့် အစီအစဉ်လည်း ဖြစ်သည်။
ညနေ ၄နာရီ ထျန်းနင်က စတူဒီယို ခန်းမဆောင်သို့ မို့ထင်ကို အဖော်ပြုကာ ရောက်ရှိလာခဲ့သည်။
စုန့်ယန်ရှု၏ စေ့စေ့စပ်စပ် တွေးတောပေးမှုကို ကျေးဇူးတင်ထိုက်သည်။ ထျန်းနင်က အပြာရင့်ရောင် ကုတ်အင်္ကျီကို ဝတ်ဆင်ပြီး သူမ၏ဝမ်းဗိုက်လေးကို ဖဲပြားခါးစည်းလေးဖြင့် ချည်နှောင်ထားသည်။
သို့သော်လည်း ကုမ္ပဏီ၏ဘန့်ကားထဲမှ ထွက်ထွက်ချင်း ကြက်ဥကိုင်ဆောင်ထားသော လူတစ်စုက မီဒီယာသမားများကို ဘေးတွန်းကာ သူမကို ကြက်ဥဖြင့် လှမ်းပစ်သည်။
မို့ထင်က ထျန်းနင်ကို ချက်ချင်း ကာကွယ်ပေးပြီး တရားခံကို တားဆီးရန် နှင့် လူအုပ်စုကြီးကို ထိန်းချုပ်ရန် ဟန်အမူအရာ ပြသည်။
သက်တော်စောင့် လေးဦးက ချက်ချင်း အရှေ့ထွက်လာပြီး မိန်းမငယ်လေး ငါးယောက်ကို ထိန်းချုပ်ကာ မို့ထင်စီ ခေါ်ဆောင်လာခဲ့သည်။
"မင်းတို့တွေ ရူးနေလား"
"ငါတို့က သူ့ပရိသတ်ဟောင်းတွေပဲ။ ငါတို့ ဒုက္ခရောက်ခဲ့တုန်းက သူ ဘယ်ရောက်နေလဲ။ ထျန်းနင် ငါတို့တွေ ဘာအမှား လုပ်ခဲ့မိလို့လဲ"
"သူစိမ်းကတောင် ငါတို့ကို သနားရကောင်းမှန်း သိသေးတယ်။ နင်ကတော့ သွေးအေးရက်စက် လှချည်းလား"
လူအများစု ဝိုင်းအုံလာခဲ့သည်။
" ငတုံးငအတွေ"
"မင်းတို့အတွက် ဆေးရုံခ ပေးခဲ့တဲ့ သူစိမ်းက ဘယ်သူလဲဆိုတာ ဆေးရုံမှာ သွားစုံစမ်းလိုက်ဦး"
ထိုစကားကို ပြောပြီးနောက် မို့ထင်က ထျန်းနင်ကို ကာကွယ်ပြီး ရုပ်သံဌာနသို့ ထျန်းနင်ကို ခေါ်ဆောင်သွားခဲ့သည်။
သက်တော်စောင့်များက မိန်းကလေးများကို ချက်ချင်း လွှတ်ပေးလိုက်သည်။ မို့ထင် ပြောခဲ့သည့် စကားက သူတို့ကို ဝေခွဲမရ ဖြစ်စေ၍ သူတို့ထဲမှ တစ်ဦးက ဆေးရုံကို တန်းဖုန်းခေါ်ခဲ့ပြီး ဝန်ထမ်းကို မေးမြန်းသည်။
သို့သော်လည်း သူတို့လိုချင်သော အဖြေကို ဆေးရုံဝန်ထမ်း မဖြေခင် မို့ထင်၏သက်တော်စောင့် တစ်ဦးက လက်ပိုက်ဟန် အနေအထားဖြင့် စကားပြောလာသည်။
"ဘာတွေ စုံစမ်းနေဦးမှာလဲ။ မင်းတို့လို ဦးနှောက်မရှိတဲ့ ပရိသတ်တွေရဲ့ လုပ်ရပ်ကို ခွင့်လွှတ်ပေးနိုင်တဲ့သူက ဒီလောကကြီးထဲ တစ်ယောက်တည်းပဲ ရှိတယ်။ အဲဒီလူက ငါတို့မဒမ် ထျန်းနင်ပဲ။ မင်းတို့အားလုံးရဲ့ ဆေးရုံစရိတ်ကို သူ့အိတ်ထဲက ပိုက်ဆံနဲ့ စိုက်ပေးခဲ့တာနော်"
"ငါတော့ မင်းတို့ကိုယ်စား ရှက်မိတယ်"
ထျန်းနင်၏အမည်ကို ကြားရ၍ ကောင်မလေး အုပ်စု မှင်တက်သွားပြီး ကြောင်အမ်းအမ်း မတ်တတ် ရပ်နေခဲ့သည်။ သက်တော်စောင့် ပြောသည့် စကားကို ယုံကြည်ရမည်လော ဝေခွဲရ ခက်ခဲနေသည်။
"မင်းတို့ရဲ့ဦးနှောက်မရှိတဲ့ လုပ်ရပ်တိုင်းကို ငါတို့ မဒမ်က ဆယ်လီ ဖြစ်နေရုံနဲ့ တာဝန် ယူရမလား။ အခုကစပြီးတော့ သူ့အရှေ့ ထပ်ပေါ် မလာနဲ့တော့"
"မဒမ်က မင်းတို့အတွက် ဆေးရုံစရိတ်ပေးခဲ့တဲ့ အကြောင်း ဟိုက်ဟွေ့ဖျော်ဖြေရေးက တရားဝင် ကြေညာလိမ့်မယ်။ မင်းတို့မှာ အသိစိတ် နည်းနည်းလေး ရှိသေးရင် မင်းတို့အမှားကို ရှေ့ထွက် ဝန်ခံလိုက်လေ"
"ကျေးဇူးကန်းတဲ့ဟာတွေ"
မို့ထင်က သူ့သက်တော်စောင့်ကို စေ့စေ့စပ်စပ် ရွေးချယ်ခဲ့၍ ဖြစ်ကောင်း ဖြစ်နိုင်သည်။ သူတို့က အကြောင်းပြချက် ခိုင်ခိုင်လုံလုံဖြင့် ချေပ ပြောဆိုတတ်သည်။
စူးစမ်းသူများက သက်တော်စောင့် ပြောသော စကားများကို ကြားကြားချင်း အခြေအနေကို သဘောပေါက်ခဲ့သည်။ ထျန်းနင်က ဆေးရုံတက်နေရသည့် ပရိသတ်များကို ဂရုမစိုက်ခဲ့၍ ယခုလို အုတ်အော်သောင်းနင်း အခြေအနေ ဖြစ်ခဲ့ရခြင်း ဖြစ်၏။ ထို့ကြောင့် ဤသည်ကား ဆေးရုံဖြစ်ရပ် နောက်ကွယ်မှာ အမှန်တရားတည်း။
"အို့ မိုက်လှချည်းလား။ ထျန်းနင်က သူတို့ကို လုံးဝ ဂရုမစိုက်ဘူးလို့ ပြောခဲ့တာ မဟုတ်ဘူးလား။ ဆယ်လီတစ်ယောက်က သူ့ပရိသတ်အတွက် ဆေးရုံစရိတ် အကုန်ခံတယ်ဆိုတော့ မိုက်လှချည်းလား"
"အဲဒီငတုံး ပရိသတ်တွေမှာ ဦးနှောက် ရှိသေးရင် ငတုံးငအလို့ ဘယ်ခေါ်ပါ့မလဲ"
"သူတစ်ပါးရဲ့ ကြင်နာသနားမှုကို ကျေးဇူးကန်းရင်း တုံ့ပြန်တာပဲ"
ကောင်မလေးများက ဘေးပတ်ဝန်းကျင်၏ ဆွေးနွေးသံများကို နားစွင့်ပြီး သူတို့မျက်နှာ အနီရောင် ပြောင်းလဲလာခဲ့သည်။ သူတို့ကို ကြင်နာသနားခဲ့သည့် သူစိမ်းက ထျန်းနင် ဖြစ်နေလိမ့်မည်ဟု သူတို့ မမျှော်လင့်ခဲ့ပေ။
ကောင်မလေးများက စိတ်ဓာတ်ကျသော အမူအရာဖြင့် ရုပ်သံရုံမှ ထွက်ခွာသွားခဲ့သည်။
အပိုင်း(၄၈၂)
ပြီး၏။