အပိုင်း(၄၆၆)
ဤတစ်ကြိမ်တွင် ရှားယွီလင်း ကိုယ်တိုင်ပင် အသိစိတ် လွတ်လုနီးပါး ဖြစ်သွားခဲ့သည်။ ထျန်းရွှမ်က ဤမျှလောက်အထိ ရက်စက်လိမ့်မည်ဟု သူ တစ်ခါလေးမျှ စိတ်ကူးမယဉ်ခဲ့ဖူးပေ။
ထျန်းနင်က သူ့အကြံအစည် အားလုံးကို သိနေခဲ့သော်လည်း သူ့ကို သေမိန့်ပေးမည့် အတွေးမျိုး မရှိခဲ့ပေ။ သို့သော်လည်း လူတချို့က ထျန်းနင် ဘယ်လောက်ပဲ ညှာတာ ထောက်ထားခဲ့သော်လည်း ထျန်းနင်ကို လွှတ်ပေးမည့် အတွေး ရှိမနေခဲ့ပေ။
ရှားယွီလင်း ဒေါသထွက်လွန်း၍ ထိုင်ခုံမှ ထခုန်လုနီးပါး ဖြစ်သွားသော်လည်း ထျန်းအကြီးအကဲက သူမကို ဟန့်တားသည်။
"ဒီကိစ္စကို အဖေ့ တာဝန်ထားပါ။ ရှောင်နင်ကို ထပ်မနာကျင်စေရဘူး"
ရှားယွီလင်းက ထျန်းအကြီးအကဲ၏ လေးနက်သော အကြည့်ကို ကြည့်ပြီး နောက်ဆုံးတော့ သူ့ထိုင်ခုံပေါ်မှာ ပြန်ထိုင်သည်။
ထျန်းအကြီးအကဲက ပြဿနာကို မျှမျှတတ ဖြေရှင်းမလား သူ သိချင်မိသည်။
"သူက ထျန်းမိသားစုဝင် မဟုတ်တော့ပေမဲ့ သူ့ဗိုက်ထဲမှာ ထျန်းမိသားစုရဲ့ ကလေး ရှိနေသေးတယ်။ ကလေးမွေးပြီးရင် မင်းတို့နှစ်ယောက် ကျေနပ်လောက်တဲ့ အဖြေ ပေးပါမယ်"
ထျန်းအကြီးအကဲက ဤနည်းလမ်းကို ကြံရွယ်ခြင်းက အတော်အတန် အကျိုးအကြောင်း သင့်လျော်သည်။ မည်သို့ပင် ဆိုစေကာမူ ကလေး၏ခန္ဓာကိုယ်ထဲ ထျန်းမိသားစု၏ သွေးများ စီးဆင်းနေသည်။ ကလေးကို ကျုံးမိသားစု လက်ထဲ အပ်ခဲ့လျှင် ကလေး ဘယ်လို အဆုံးသတ်မလဲ သေချာ မသိနိုင်ပေ။ အဆိုးရွားဆုံး အနေဖြင့် ထျန်းရွှမ်က ကလေးကို အသုံးချပြီး နောက်တစ်ကြိမ် ထျန်းမိသားစုကို ခြိမ်းခြောက် လာနိုင်သည်။
"အခုကစပြီးတော့ သူ့ကြောင့် နောက်တစ်ကြိမ် မျက်ကန်းတစ္ဆေ မဖြစ်တော့ဘူး"
ထိုစကားသံကို ကြားပြီးနောက် ရှားယွီလင်း လုံးဝ တည်ငြိမ်သွားသည်။ ဤတစ်ကြိမ်တွင် ထျန်းအကြီးအကဲက အလေးအနက် ပြောနေကြောင်းလည်း သူမ သိနေသည်။
သူက ထျန်းရွှမ်ကို အကြိမ်ပေါင်းများစွာ အခွင့်အရေး ပေးခဲ့ဖူးသော်လည်း အချိန်တိုင်း ထျန်းအကြီးအကဲ နာကျင်ခဲ့ရသည်။ ထျန်းရွှမ်က သူ့စိတ် ကျေနပ်မှုအတွက် သူ့ညီမအရင်း၏ သားအိမ်ကို ဖယ်ထုတ်ရန် ကြိုးစားခဲ့သည်။
ထျန်းရွှမ်တွင် လူသားဆန်သော ခံစားချက် အနည်းငယ် ရှိမည်လော။
ရှားယွီလင်းက ထျန်းအကြီးအကဲ၏မျက်ဝန်းကို တည့်တည့်ကြည့်ရှုသည်။ ထိုစဉ်အခိုက်အတန့် အိုမင်နေသော သူ့အကြည့်တွင် ထျန်းရွှမ်ကို မုန်းတီးသော အမုန်းများ တောက်လောင်နေသည်။
...
အခန်းအပြင်မှာ ဆရာဝန်လင်း ဖြစ်ပျက်သမျှ အားလုံးကို အသေးစိတ် ရှင်းပြနေခဲ့သည်။ သူ့ကို ခြိမ်းခြောက် ဖိအားပေးခံရသည်ဟု အယူခံဝင်သော်လည်း မို့ထင်က သူ့ကို ညှာတာပေးမည့် အတွေး မရှိခဲ့ပေ။
"ငါ့မိန်းမက ကိုယ်ဝန်ဆောင်လို့ မရဘူးလို့ သတင်းပေါက်ကြားအောင် လုပ်ခဲ့တာ ဘယ်သူလဲ"
"အဲလိုလုပ်ဖို့ ထျန်းရွှမ်က တခြားတစ်ယောက်ကို ရှာခဲ့တာပါ။ တကယ်တမ်း ဒါက ငါနဲ့ ဘာမှ မသက်ဆိုင်ပါဘူး"
ဆရာဝန်လင်းက ထိတ်ထိတ်ပျာပျာ လက်ခါရမ်းသည်။
ချောင်ဆေးရုံအကြီးအကဲက ဆရာဝန်လင်း ဖော်ထုတ်ခဲ့သည့် အဖြစ်အပျက်များကြောင့် တုန်လှုပ်နေရသည်။ သူ့လို အပြင်လူတစ်ယောက်ကပင် ယခုလို အခြေအနေမျိုးကို တည်တည်ငြိမ်ငြိမ် မရင်ဆိုင်နိုင်ပေ။
"မို့သူဌေး၊ မစိုးရိမ်ပါနဲ့။ ဒီပြဿနာအတွက် ခင်ဗျား ကျေနပ်လောက်တဲ့ အဖြေပေးပါ့မယ်။ အခုပြဿနာမှာ ပတ်သက်သူအားလုံး ဆေးပညာလောကမှာ မရှိစေရပါဘူး။ အခုဖြစ်ရပ်က မင်းရဲ့မိန်းမအတွက် ဘယ်လောက်တောင် အန္တရာယ်များလဲ ငါတို့ ကောင်းကောင်း သိပါတယ်။ အချိန်မှီ အမှန်တရားကို စုံစမ်းမိသွားလို့ ကံကောင်းသွားတယ်။ မဟုတ်ရင် ဒီနတ်ဆိုးကောင်တွေ အောင်မြင်သွားလောက်ပြီ"
"ဒါဆိုရင် ခုချက်ချင်း ရဲခေါ်လိုက်ရမလား"
"ရဲခေါ်မယ် ဟုတ်လား။ မလိုအပ်ဘူး"
မို့ထင် ခနဲ့သည်။
"သူတို့ ဘာမှ မလုပ်ရသေးတော့ တရားသူကြီးက သူတို့ကို နှစ်နည်းနည်းလောက် ထောင်ချရုံပဲ အမိန့်ပေးမှာပေါ့။ ရဲလက်အပ်လိုက်ရင် သူတို့ပြစ်ဒဏ်က ပေါ့လွန်းသွားတယ်"
"ဒါပေမဲ့ မို့သူဌေး"
"ကျွန်တော့်မှာ တခြားအစီအစဉ် ရှိသေးလို့ ခင်ဗျားတို့ဆေးရုံကို အပြစ်အတွက် တာဝန် မယူခိုင်းပါဘူး။ ဒါ ကျွန်တော် ပေးနိုင်တဲ့ သဘောတူညီမှုပဲ။ ဒီလူတွေကို အပြစ်ပေးလို့ရတဲ့ နည်းလမ်းပေါင်း ထောင်ချီ ရှိပြီသားပါ။ သူတို့ကို ကျွန်တော်လက်ထဲ ထည့်လိုက်ပါ။ ကျွန်တော်ကိုယ်တိုင် သူတို့ကို စီရင်မယ်"
ဆေးရုံအကြီးအကဲက ဆရာဝန်လင်းကို ကြည့်ပြီး သူမ ကျူးလွန်ခဲ့သော ပြစ်မှုများကို တွေးကာ နောက်ဆုံး ခေါင်းညိတ်လိုက်သည်။
"ကောင်းပြီလေ"
"ခေါင်းဆောင်ရယ် ငါတို့ကို ဟိုက်ဟွေ့လက်ထဲ မအပ်ပါနဲ့။ တောင်းပန်ပါတယ်"
"မင်း မကောင်းမှုလုပ်တဲ့ အချိန်တုန်းက ဒီလိုနေ့မျိုး ကြုံလာမယ်လို့ မျှော်လင့်ခဲ့လို့လား။ မင်း ထိခိုက်နစ်နာအောင် လုပ်ခဲ့တဲ့သူက မို့သူဌေးရဲ့မိန်းမ။ သူ့အချစ်ဆုံးသူ။ တစ်စုံတစ်ယောက်က မင်းရဲ့သားကို ထိခိုက်အောင် လုပ်ရင် မင်းရော ခွင့်လွှတ်မလား"
ထိုစကားသံများကို ကြားပြီးနောက် ဆရာဝန်လင်း ကြောင်အမ်းအမ်း ဖြစ်သွားပြီး ခွန်းတုံ့ပြန်နိုင်ခြင်း မရှိပေ။
"ဒီကနေ့ ဒီအချိန်ကစပြီးတော့ ဒီစာရင်းထဲပါတဲ့ လူအားလုံးက ရာထူးက ဖယ်ရှားတယ်။ မင်းတို့ရဲ့ ဆေးကုလိုင်စင်လည်း သိမ်းမယ်။ မင်းတို့လို လူတွေက ဆရာဝန် ဝတ်စုံ ဝတ်ဖို့ မထိုက်တန်ဘူး"
"မို့သူဌေး။ ဒီလူတွေကို မင်းလက်ထဲ အပ်ပါတယ်။ မင်းစိတ်ကြိုက် လုပ်ချင်ရာ လုပ်နိုင်တယ်"
ဆေးရုံအကြီးအကဲက မတ်တတ်ထရပ်ပြီး ဆရာဝန်လင်းကို စိတ်ပျက်ဟန် ကြည့်သည်။ အဆုံးသတ်မှာ သူလည်း လှည့်ထွက်သွားခဲ့သည်။
ထို့နောက် မို့ထင်က လုချယ်ကို ပင်ပန်းဟန် အကြည့်ဖြင့် ကြည့်သည်။ လုချယ်က သူ ပြောချင်သည့် အဓိပ္ပါယ်ကို ချက်ချင်း သဘောပေါက်လိုက်၍ ထျန်းနင်ကို သွားခေါ်သည်။
တကယ်တမ်း ထျန်းနင်က ကိုယ်ဝန်ရှိပြီး နောက်ပိုင်း ယခုလို တိုက်ပွဲမျိုးတွင် ပါဝင်ချင်သည့် အတွေး မရှိပေ။
"မဒမ်"
ဆရာဝန်လင်းက ထျန်းနင် ခန်းမဆောင်ထဲ ဝင်လာခြင်းကို စောင့်ကြည့်သည်။ သူမက အေးဆေး တည်ငြိမ်၍ သူမကို အသနားခံကြည့်ရန် ကြိုးစားသည်။
"မဒမ်မို့ကို ထိခိုက်ဖို့ မရည်ရွယ်ခဲ့ပါဘူး။ ထျန်းရွှမ် ညွှန်ကြားတဲ့ အတိုင်း လုပ်ခဲ့တာပါ။ ကျွန်မက single motherပါ ကျွန်မကို လွှတ်ပေးပါနော်"
ထျန်းနင်က သူ့ကို လျစ်လျူရှုကာ မို့ထင်ဘေးနား လမ်းလျှောက်သွားသည်။
ထျန်းနင်က အေးဆေး တည်ငြိမ်သော်လည်း အကောင်းအဆိုးကို ခွဲခွဲခြားခြား သိသူ ဖြစ်သည်။
"ငါ အရင်တည်းက အကြိမ်ပေါင်းများစွာ ပြောခဲ့ပြီသားပါ။ ငါက ဘယ်သူ့ကိုမှ အရင်ဆုံး မတိုက်ခိုက်ဘူးလို့။ နင်တို့ဘက်က အရင်ရန်ရှာလို့သာ တန်ပြန် တိုက်ခိုက်ခဲ့ရုံပဲ။ ဒါက မျှတပါတယ်"
ထိုစကားကို ပြောပြီးနောက် သူမက ဆရာဝန်ကို စူးစူးရဲရဲ ကြည့်သည်။
"နင်က ငါထိခိုက်အောင် ကြံရွယ်ခဲ့ဖူးတယ်။ ပုံမှန်ဆိုရင် ငါခွင့်လွှတ်ပေးလို့ ရပေမဲ့ ငါ့ကလေး ငါ့ယောက်ျားနဲ့ ပတ်သက်နေတော့ လုံးဝပဲ"
"နင်က တစ်ကိုယ်တည်း ရပ်တည်နေရတဲ့ မိခင်ဆိုတာ ငါသိတယ်။ နင့်ယောက်ျားနဲ့ ကွာရှင်းထားတယ်။ နင့်ယောက်ျားက ဆင်းရဲလို့ ကလေးကို ခေါ်ထားချင်တယ်"
"နင်က ငါ့ကလေး ဆုံးရှုံးရအောင် ကြိုးပမ်းခဲ့တော့ နင်လည်း တန်ပြန် ခံစားရမယ်။ ကလေးက သူ့အဖေနဲ့ နေတာ ပိုကောင်းမှာပါ"
ထျန်းနင်က သူမ၏ကလေးကို ယူသွားမည်ကို ကြားကြားချင်း ဆရာဝန်လင်း ချက်ချင်း ကြောက်စိတ်မွှန်ထူသွားသည်။
"မလုပ်ပါနဲ့။ ငါ တောင်းပန်ပါတယ်။ ငါ့ကလေးက ငါ့ဘဝပါ"
"ငါ့ကလေးကလည်း ငါ့ဘဝပဲလေ"
ထျန်းနင်က လေသံကျယ်ကျယ် မပြောခဲ့သော်လည်း သူ့စကားလုံးတိုင်းက လေးနက်သည်။
"နင့်ကလေးကို အရေးပါတယ်လို့ ခံယူထားရင် အကျင့်ပျက်တဲ့ လုပ်ရပ်မျိုး မလုပ်ခဲ့သင့်ဘူး။ နင်လုပ်ခဲ့တဲ့အမှားအတွက် နင့်ကို အပြစ်ပေးသင့်တယ်"
မို့ထင်က ထျန်းနင်ကိုကြည့်ပြီး သူမ၏လက်ကို ညှစ်ထားသည်။ သူမ လက်စားချေပြီးပြီ ဖြစ်၍ ဒေါသစိတ်ကြောင့် သူမ၏ခန္ဓာကိုယ် မထိခိုက်အောင် သတိပေးခြင်း ဖြစ်သည်။ ထို့နောက် သူက လုချယ်ကို ညွှန်ကြားသည်။
"ရှောင်နင် ဘာပြောလိုက်လဲ မင်းကြားတယ်နော်။ သူ ပြောတဲ့အတိုင်း သွားလုပ်လိုက်တော့"
အပိုင်း(၄၆၆)
ပြီး၏။