အပိုင်း(၄၄၄)
"အဲဒီအဘိုးကြီးက ရုပ်ရှင်ရဲ့ရင်းနှီး မြှုပ်နှံသူ မဟုတ်ရင်တောင် ငါတို့လို အေဂျင်စီသေးသေးက လူတွေကို အနိုင်ကျင့်ဖို့ ခင်ဗျားနဲ့ တစ်ဖွဲ့တည်း ဖြစ်နေတာမလား။ ဘာပဲဖြစ်ဖြစ် ထျန်းနင်ရဲ့ နောက်ကွယ်မှာ ဟိုက်ဟွေ့ ရှိနေတယ်လေ"
ဟိုက်ဟွေ့ဖျော်ဖြေရေးက သူတို့ လိုချင်သည့် ဘာမဆို ဖန်တီး နိုင်ကြောင်း ပိုင်ချိုးရှန့်က လူတိုင်းကို အသိပေးနေသည်။
"ပိုင်ချိုးရှန့်၊ ဟိုက်ဟွေ့ဖျော်ဖြေရေးက အဲဒီလိုသာ လုပ်ရင် ကျွန်မက ဒီနေရာမှာ ရပ်နေပြီး ရှင် စွပ်စွဲတာကို ခံနေပါ့မလား"
"မင်းက အဘိုးကြီးနဲ့ ပလူနေတာကို ငါ ပြောမိလို့ မင်းက ငါ့ကို လုပ်ကြံတာလေ။ မင်း ဒါကို ငြင်းလို့ မရဘူး"
ပိုင်ချိုးရှန့်က ဒေါသတကြီး ငြင်းခုန်သည်။
ပိုင်ချိုးရှန့် နှင့် ထျန်းနင်တို့ ငြင်းခုန်နေသည်ကို စောင့်ကြည့်နေရသော သတင်းထောက်များမှာ အမှန်တရားကို ဝေခွဲရ ခက်ခဲလာသည်။ သို့သော်လည်း သူတို့နှစ်ဦး ငြင်းခုန်နေစဉ် ခန်းမဆောင်၏ တံခါးပေါက် နောက်တစ်ကြိမ် ဖွင့်လာသည်။ ဤတစ်ကြိမ်တွင် တံခါးပေါက်တွင် မတ်တတ်ရပ်နေသူက သက်တော်စောင့် သုံးဦးကို အဖော်ပြုကာ ရှေးဖက်ရှင်ဝတ်စုံကို ဝတ်ဆင်ထားသော အဘိုးအို ဖြစ်သည်။
သူက ဟိုးယခင်လို စုတ်စုတ်ပြတ်ပြတ် ပေတိပေစုတ် မဟုတ်ခဲ့ပေ။ သူက သပ်သပ်ရပ်ရပ် ဝတ်စား ဆင်ယင်ထားသည်။
သူ့မျက်နှာကို လူတိုင်း ရှင်းရှင်းလင်းလင်း မြင်နိုင်သည်။
ထျန်းနင် ကြောင်အမ်းအမ်း ဖြစ်နေရသည်။ အဘိုးအိုက အိုမင်နေသော်လည်း မို့မိသားစု၏ ရုပ်ရည်သွင်ပြင်ကို ခွဲခွဲခြားခြား သိနိုင်သည်။
"ဟေးအကြီးအကဲက ထျန်းနင်ကို အဝတ်လျော် ဟင်းချက်ခိုင်းလို့ ရတဲ့ အကြောင်းအရင်းကို ကျွန်တော် ပြောပြမယ်"
ဝေအန်က မတ်တတ်ထရပ်ပြီး သရော်သည်။ ထို့နောက် သူက အဘိုးအိုကို လူတိုင်းနှင့် မိတ်မဆက် ပေးခင် လက်ဆွဲနှုတ်ဆက်သည်။
"ပိုင်ချိုးရှန့်။ သူ့ကို ဘာလို့ 'ဟေး'အကြီးအကဲလို့ ခေါ်မှန်း မင်း မသိဘူးမလား"
"ဒီလူက ဟိုက်ဟွေ့ဖျော်ဖြေရေးကို တည်ထောင်ခဲ့တဲ့ သူဌေးကြီး။ ထျန်းနင် နဲ့ မို့ထင် ရဲ့အဘိုး မို့ယွမ်ယန်ပဲ"
"မို့အကြီးအကဲက သူ့မြေးချွေးမကို လေ့ကျင့်ပျိုးထောင် ပေးချင်လို့ စိန်ခေါ်ချင်ယောင် ဆောင်ခဲ့တာ။ အဘိုးအတွက် ထမင်းချက် အဝတ်လျော်ပေးတာက မလျော်ကန်တဲ့ အပြုအမူ ဖြစ်သွားလား"
ပိုင်ချိုးရှန့် ကြောင်တောင်တောင် ဖြစ်နေသည်။
အခြေအနေက ပြောင်းလဲသွားခဲ့သည်။
သူ ပထမဆုံး ကြံစည်ခဲ့သည့် အကြံအစည် ပျက်စီးသွားခဲ့သည်။ အဘိုးအိုတွင် ယခုလို တော်စပ်မှုမျိုး ရှိနေလိမ့်မည်ဟု သူ မမျှော်လင့်ခဲ့ပေ။
ရုတ်ခြည်း ပိုင်ချိုးရှန့် ကြောက်စိတ်မွှန်ထူလာသည်။ မို့အကြီးအကဲကို သူနှင့်အတူတူ ထျန်းနင်ကို ဖယ်ရှားပစ်ရန် ကမ်းလှမ်းခဲ့ဖူးသည်။
"အို။ ဒါဆိုရင်က သူက ဟိုက်ဟွေ့ဖျော်ဖြေရေးရဲ့ တည်ထောင်သူ မို့အကြီးအကဲပေါ့"
"ကောလဟာလ သတင်းတွေ ရှိတယ်။ သူက သရုပ်ဆောင် အရမ်းကောင်းသလို ဘယ်ရောက်နေလဲက အမြဲဆန်းကြယ်တယ်တဲ့။ တစ်ကမ္ဘာလုံးက သူ့ကို အာရှရဲ့ အထူးချွန်ဆုံး သရုပ်ဆောင်မင်းသားလို့ သတ်မှတ် ပေးထားကြတာလေ"
"ဒါဆိုရင် မို့အကြီးအကဲက ရုပ်ရှင်ရိုက်ကွင်းမှာ ပုန်းကွယ်နေပြီး ထျန်းနင်နဲ့ အတူတူ ရုပ်ရှင်မှာ သရုပ်ဆောင်နေတာပဲ"
"မြေးအဘိုးတွေကို လျှောက်ပေးစားရင်း သတင်းလွှင့်ရဲသေးတယ်။ ရယ်စရာ ကောင်းလိုက်တာနော်"
"မြန်မြန် ဓာတ်ပုံရိုက်ကြ။ မို့အကြီးအကဲကို တွေ့ရဖို့ လွယ်ကူတာ မဟုတ်ဘူး"
မို့အကြီးအကဲက ခန်းမဆောင်ကို လှည့်ပတ်ကြည့်ရှုပြီး နောက်ဆုံးတော့ ပိုင်ချိုးရှန့်ဘက် လှည့်သည်။
"ဘာလဲ။ ထျန်းနင်နဲ့ ငါက ဘာမှ မဟုတ်တော့ စိတ်ပျက်သွားတာလား"
အစပိုင်းတွင် မို့အကြီးအကဲက ပြုံးနေသေးသည်။ သို့သော်လည်း သူက ပိုင်ချိုးရှန့်အနား ရုတ်ခြည်း လမ်းလျှောက်သွားပြီး သူ့ဦးခေါင်းပေါ်မှ ပတ်တီးကို ဖြည်လိုက်သည်။
"မင်းရဲ့ခေါင်းက သက်သာသွားပြီမလား။ ဘာလို့ ပတ်တီး စည်းထားရသေးတာလဲ။ မင်းထက် ငါက ဒီလောကကြီးထဲ ရှင်သန်နေတာ ကြာပြီ။ မင်း ဘာတွေးနေလဲ ငါ သိတယ်။ ငါက မင်းရဲ့လှည့်ကွက်ကို မသိစရာ အကြောင်းမရှိဘူး"
ပိုင်ချိုးရှန့်က ကြောက်စိတ် မွှန်ထူသွားပြီး သူ့ဦးခေါင်းကို ဖုံးကွယ်ရန် ကြိုးစားခဲ့သည်။
သို့သော်လည်း မို့အကြီးအကဲက သူ့လက်ကို အလွယ်တကူ ထိန်းချုပ်လိုက်ပြီး ရယ်မောသည်။
"မင်းက ငါ့မြေး မဟုတ်တာ ကံကောင်းသွားတယ်။ ငါ့ဘဝမှာ မင်းလို ယုတ်ညံ့တဲ့ မြေးမျိုး ရှိလို့ကတော့ လူ့ပတ်ဝန်းကျင်ကို ဒုက္ခပေးလို့ မရအောင် မသေရုံတမယ် ခြေထောက် ရိုက်ချိုးပစ်မယ်"
"ပိုင်ချိုးရှန့်ရဲ့ ဒဏ်ရာက အတုဖြစ်နေတာပဲ"
"ရွံစရာကောင်းလိုက်တာနော်။ ဒဏ်ရာ ရချင်ယောင်ဆောင်ပြီး မျက်ရည်ချူသေးတယ်"
"အားလုံး ထင်သာ မြင်သာ ရှိသွားပြီမလား။ ပိုင်ချိုးရှန့်က သူကိုယ်တိုင် ဇာတ်လမ်းထွင်ခဲ့တဲ့ သဘောမလား"
"သံသယဝင်ဖို့ လိုအပ်သေးလို့လား။ သူက ဂူရှန်နဲ့ သူရဲ့အချစ်ရေးကို ဗြောင်းငြင်းတုန်းက ထျန်းနင်က သက်သေတွေ ထုတ်ပြပြီး အရှက်ခွဲခဲ့တယ်လေ။ ဝေအန်ကတောင် သူ့ကို ရုပ်ရှင်က ပယ်ထုတ်လိုက်ပြီ။ သူက ဘာများ ပြောနိုင်ဦးမှာ မို့လဲ။ ပိုင်ချိုးရှန့်က လူလိမ်ဆိုတာ လူတိုင်း မျက်ဝါးထင်ထင် မြင်တယ်မလား"
"မင်းတို့မှာ သက်သေ အထောက်အထား မရှိဘဲ ကောက်ချက် မချနဲ့။ ငါက တကယ် မတရားခံရသူပဲ"
ပိုင်ချိုးရှန့်က လုံးဝ အလျှော့မပေးချေ။
"ငါက ဒါတွေအားလုံးကို စီစဉ်ခဲ့တယ်လို့ ဘယ်သူက သက်သေပြနိုင်လို့လဲ။ ငါ မလုပ်ခဲ့တာတွေ အတွက် ငါ ဝန်မခံနိုင်ဘူး"
ဖြန်း
မို့အကြီးအကဲက စိတ်မထိန်းနိုင်သည့် အဆုံး ပိုင်ချိုးရှန့်၏ မျက်နှာကို ဖြန်းခနဲ မြည်အောင် ရိုက်ချလိုက်သည်။ လောကကြီးကို ထိခိုက်နစ်နာစေသော မိစ္ဆာကောင်ကို နှိမ်နင်းပေးသည့် သူတော်ကောင်းကြီးနှင့် တူညီနေသည်။
"မင်းက ဝန်မခံနိုင်သေးဘူးပေါ့ ဟုတ်လား"
"ငါ သေရင်တောင် ဝန်မခံနိုင်ဘူး"
ပိုင်ချိုးရှန့်၏မျက်နှာက အနီရောင် ပြောင်းလဲသွားပြီး စူးစူးဝါးဝါး ထအော်သည်။
ထိုမြင်ကွင်းကြောင့် ပိုင်ချိုးရှန့်၏ မန်နေဂျာက ရှေ့ထွက် ကူညီချင်ပါသော်လည်း မို့အကြီးအကဲက ခန်းမဆောင် တစ်ခန်းလုံးကို ထိန်းချုပ်ထားသည်။ မည်သူကမှ သတိလက်လွှတ် မပြုမူရဲကြပေ။သူက မို့ထင်၏အဘိုး ဖြစ်သည့် အပြင် ဖျော်ဖြေရေးလောက တစ်ခုလုံး၏ တိုးတက်မှုကို မျက်ဝါးထင်ထင် မြင်တွေ့ခဲ့ရသည့် ဟိုက်ဟွေ့ဖျော်ဖြေရေး၏ တည်ထောင်သူ ဖြစ်နေသည်။ သူ၏ အထင်ကြီးလေးစားဖွယ် အကျင့်စာရိတ္တကြောင့် အစိုးရဌာနများကပင် ရိုသေလေးစားကြသည်။
ဖြန်း
ပိုင်ချိုးရှန့်၏မျက်နှာပေါ် နောက်ထပ် လက်ဝါးချက် ကျရောက်လာသည်။ မို့အကြီးအကဲက သူ ရိုက်နှက်နေသူ ဘယ်လို ခံစားရမလဲ ဂရုမစိုက်ပေ။ သူ သိသည့် အချက်က အပြစ်ပေးထိုက်သူကို ကိုယ်စား အပြစ်ပေးနေခြင်း ဖြစ်သည်။
"မင်းက ဝန်မခံချင်တော့လဲ ဝန်ခံအောင် လုပ်ပေးရတာပေါ့"
ထိုစကားကို ပြောပြီးနောက် မို့အကြီးအကဲက သူ့နောက်မှ သက်တော်စောင့်များကို လက်ဟန်အမူအရာ ပြသည်။
သက်တော်စောင့်က ခန်းမဆောင်မှ ထွက်သွားပြီး အမျိုးသား တစ်ဦးနှင့် အတူတူ ပြန်ရောက်လာခဲ့သည်။ ထျန်းနင် စကားပြောခဲ့ဖူးပြီး ပိုင်ချိုးရှန့်ကို တိုက်ခိုက်ခဲ့သည့် တရားခံ ဖြစ်နေသည်။
ပိုင်ချိုးရှန့်၏မျက်နှာက ဖြူဖပ်ဖြူရော် ဖြစ်သွားပြီး မသိစိတ်၏လှုံ့ဆော်မှုကြောင့် ဒယိမ်းဒယိုင် ဖြစ်သွားသည်။
အဘိုးအိုက သူ့အရှေ့ကို တရားခံ တန်းခေါ်လာလိမ့်မည်ဟု မမျှော်လင့်ခဲ့ဖူးပေ။
သတင်းထောက်များက တရားခံကို စိုက်ကြည့်ပြီး ချက်ချင်း ဓာတ်ပုံ ရိုက်ကြသည်။
ထိုမြင်ကွင်းကြောင့် မို့အကြီးအကဲက ထိုလူအနား လမ်းလျှောက်သွားသည်။
"ဒီမှာရှိနေတဲ့ တစ်ယောက်ယောက်က မင်းကို ငွေပေး စေခိုင်းခဲ့တာလား။ ဘယ်သူလဲဆိုတာ မင်းကိုယ်တိုင် လက်ညိုးထိုးပြ"
ထိုလူက ပိုင်ချိုးရှန့်ကို ဖျတ်ခနဲ ကြည့်လိုက်ပြီး ထျန်းနင်ကို စောင်းငဲ့ကြည့်သည်။ ထို့နောက် သူ့ခေါင်းကို ငုံ့ထားသည်။
"ပြောစမ်း"
အဘိုးအို၏ဒေါသများ ပေါက်ကွဲလာသည်။
"ပိုင်...ပိုင် ချိုးရှန့်"
ထိုလူက ဗလုံးဗထွေးဖြင့် ရေရွတ်သည်။
"ပိုင်ချိုးရှန့်က ထျန်းနင်ကို သိက္ခာချဖို့ ကျွန်တော်ကို ငွေပေးပါတယ်။ တကယ်လို့ အောင်မြင်သွားရင် သူက ကျွန်တော့်ကို ဒေါ်လာ တစ်သန်း ပေးမှာပါ"
"သူက ဘာလို့ ဒီလိုလုပ်ခိုင်းတာလဲ"
"ဘာလို့ဆို ထျန်းနင်က သူ နဲ့ ဂူရှန်ရဲ့ ဘဝတက်လမ်းကို လာပိတ်နေလို့ပဲ။ ဒါကြောင့် ထျန်းနင်ကို ရုပ်ရှင်က အတင်းဖယ်ထုတ်လို့ ရတဲ့ နည်းလမ်းကို သုံးတာပါ"
မုတ်ဆိတ်မွေးနှင့် အမျိုးသားက ခေါင်းငုံ့ကာ အမှန်တရားကို ဖွင့်ပြောသည်။
"ပိုင်ချိုးရှန့် ပြောတာတွေ မယုံကြည်နဲ့။ သူ ပြောသမျှက အလိမ်အညာတွေ ချည်းပဲ"
"သူကိုယ်တိုင် လုပ်ကြံဇာတ်ခင်းချင်လို့ ကျွန်တော်တို့ သူငယ်ချင်း အုပ်စုကို ဝိုင်းရိုက်ပေးဖို့ အကူအညီတောင်းတယ်။ အားလုံးကို သူ စီစဉ်ထားတာပါ"
"သူပြောတာ မင်းကြားတယ်နော်။ မင်းက မို့မိသားစုရဲ့ မျိုးဆက် မဟုတ်တာ ကံကောင်းသွားတယ်။ ငါ့မြေးက အဲလောက် အရှက်သိက္ခာ မဲ့နေရင် ငါကိုယ်တိုင် ရိုက်သတ်ပစ်မှာပဲ"
အဘိုးအိုက မကျေမနပ် ပြောဆိုသည်။
အပိုင်း(၄၄၄)
ပြီး၏။
❤️အပိုင်း ၉၀၀အထိ ဝယ်ယူ ဖတ်ရှုနိုင်ပါသည်။ ၁၅ပိုင်းပါ Pdf bookတစ်အုပ်ကို ၃၀၀ကျပ်ပါ ရှင့်❤️
ဝယ်ယူအားပေးချင်တဲ့ စာဖတ် ပရိသတ်များက ဆက်သွယ်ရန်
Telegram acc chothinmarlay
viber acc 09969332009
Kpay 09969332009
Wavepay 09784327525