سبكني الوكت عيب امشي وراحيل
وبعد هذا العسر مااظن وراحيل
يربعي ايام وياكم وراحيل
وتشيلون النعش فد يوم بيه
بقلمي انا ايڤين
( مليكا الجبوري ) ♥️✨
لا تنسون التصويت + التعليق بين الفقرات مُهم يحلوات ♥️✨.
____________________________
دار وجها بحيث شكله صار واضح النا .. رجف جسمي من الصدمه ارجف و النفس يضيك بصدري كُلشي صار وياي كُل المشاكل سببها شخص واحد
درت وجهي على ديغم يلي وجها صار احمر عروك كصته بارزه
رفعت ايدي ترجف اريد الزمه - ديغم عفيه
دفعني ساحب السلاح من خصره دفر الباب بقوه كُلشي بسرعه صار كدامي مثل رمشه العين .. جر مُيتم من ملابسه موجه السلاح عليه .. يصيح
ديغم - انهيك من هل الحياة اخر نفس بحياتك هذا يا ابن امي وابوي
طلعت طلقه من المسدس ممزوج بعياط يانا .. خليت ايدي على اذني منهاره بالكاع ارجف :- كتله كتله ..
اجت عليه يانا تصيح عليه اكوم ..
يانا - كومي كومي نروح
دفعتها انتر بوجها :- وخري عني مالج شغل بيه وخررري
يانا - يا غبيه امشي وياي لا يصير عليج شي
يارا - ابتعديي عني اتررركيني
يانا - لج ياراا
ماكملت كلامها والا اجه ديغم يجرني من كدامها يسحبني للسياره بدون ميحجي شي .. صافنه على طوله دموع بعيوني ماعرف شنو احجي
فتحلي باب السياره ساكت ميحجي شي .. دنكت اصعد عيوني لكدام رافضه اصدُك يلي شافته عيني
صعد ورجع راسه على الكشن لازم الستيرن بقوه .. عضيت شفتي الزم نفسي ابجي خايفه يسوي شي
تنهد بهدوء حاضني بقوه .. خليت ايدي على شعره الناعم احركه واهمس - تهون يا ديغمي
صار جسمه يهتز عرفت بي ديبجي وكاتم نفسه .. صرت امسح على ظهره أطمنه
يارا - لا تسوي بنفسك هيج حبيبي
ديغم - اخوي صخم راسي .. ابن امي وابوي صخم راسي وخزاني خلاني علج بحلوك اليسوه ويلي مايسوه يارا
يارا - حبيبي ..
ديغم - ماجنت ادري بي عنده علاقه وي امج او يحجي وياها
يارا - ديغم ..
ديغم - تمنيت اكتل نفسي بذيج الساعه ولا الشي يلي سمعته اخر بشر انتضره يكسر ظهري هيج هو اخوي ابن امي وابوي يابويه
يارا - لا تلوم نفسك على شي خارج عن سيطرتك مادام انتَ ماعليك لا تضوج صدكني ..
ديغم - احلفي ماضايجه كولي اني ماتاثرت
يارا - ماكدر اجذب عليك ديغم بس ماخلي علاقتي تهتز بيك علمود واحد سخيف مثل مُتيم وامي يلي ماهتمت بيه وباعتني من زمان
ديغم - يارا
ديغم - عيوني انتِ جروح كلبي ودواها
ديغم - يابعد هلعين لو بيدي ماخليت عضيدي يمسج بالأذيه
يارا - مو ذنبك حبيبي كافي لازم نتقبل الامر
ديغم - مارح ارحمه والله اطلع كُلشي من عينه واخلي يتأدب
يارا - امشينا حباب من هل مكان بعد ماتحمل حيل اختنكت
ديغم - اخذج يبعد بيتي اخذج ولا تبقين محتاره والدمعه بهل عين الحلوه
بس حرك السياره درت وجهي عليه اهمس بقهر
يارا - ديغم رايده ابجي
صفنت عليه هز راسه يطمني :- اوكف بمكان واخليج تفرغين كُلشي بكلبج
يارا - خليني يمك بالسياره مرايده انزل باي مكان تعبت من كُلشي
ديغم - بضلوعي التعب كون بضلوعي ولا يمسج التعب
صرت اشهك ادك على صدري اعيط
- نكررتني ول ديغم وهيه تشوفني شون متلوعه عليها وليل ونهار ابجي اكول امي وينهااا
امي جانت كدامي وتخليني اشتغل خداامه وكُلشي ياذي وياخذ الحيل وبعمرها ماحنت ولا حجت شي زين الي .. حاولت اشوف الحُب بعيونها
جنت احس بيها تشبهني اشوف بيها مواصفات امي .. بس من اشوف تصرفاتها اكول لا امي احن منها .. امي لو عايشه راح تخليني اعيش اميره ..
- تالي طلعت امي نفسها يلي شغلتني خدامه وشمرتني بنص العصابات اجيبلها معلومات
ديغم - يارتي الصار صار
ركزت عليه عيوني بعيونه همست ببحه
- الصار كُله بيه ديغم .. اخذ من حيلي مو من حيلها
ديغم - لا تاذين روحج وهيه المرتاحه
شهكت شهكه تشك كلبي اهمس :- سنين ادور ريحة امي متت عليها رايده ارتاح بضلها
ديغم - اني ضلج يول مو عيب عليج تحجين هيج
ضحكت بوسط دموعي اضربه علكيف على ايده
يارا - هسه مو دابجي ليش تضحكني شقد دغنيص
ديغم - اريد هل شفايف الحلوه بس تضحك ماريد الدموع تنزل عليها
يارا - ديغم صراحه طعم دموعي طيب احبه
صفن عليه وطكها بضحكه من كل كلبه .. شحط وصار يكحكح واني ادك على ضهره حمسته حمس
وخر ايدي يعيط :- خرب ذيج الساعه يلي شحطت بيها طلعتي روووحي يول
يارا - شو تصيح عليه ديغم
ديغم - يمعوده غير اجيتي تمووتيني
يارا - ديغم صاير ماتحبني
ديغم - ولج ياعيني غير انتِ حمستي ضهري
يارا - ديغم طلكني
ديغم - ولج يارا لا تخبليني
يارا - ديغم انت لو تحبني تموت علمودي وتكول عادي اضربيني لان شحطت وضليت اكح
ديغم - اجيتي تموتيني
يارا - عادي شنو يعني واذا متت
ديغم - خوش لعد رايح اشمر روحي
يارا - دتعااال تعال واحد ميتشاقه وياك
ديغم - عمي بس ضحكتج تكفيني شسوي بالشقه ماتكليلي
تنهدت لازمه ايده ابتسم
ديغم - لا تضوجين على اشخاص ميستاهلون ضوجتج
يارا - ديغم ليش حبيتني
ديغم - لان انتِ شخص يستاهل الحب
يارا - مافكرت اني ماستحق هل شي
ديغم - تستاهلين افرشلج الدرب ورد يارتي
يارا - لكيت بيك الحنيه يلي فقدتها من طفولتي
ديغم - حلفت اصيرلج عوض يابعد هل العيون
يارا - احلى عوض انتَ ان شاء الله
تكمل فرحتنا بشي ثاني
ديغم - تكمل فرحتنا بشنو مثلًا
ركزت بعيونه ايدي بأيده .. عضيت شفتي السُفلى بحماس اهمس
يارا - طفل
ضحك يحك شعره
ديغم - الله كريم للاطفال يابه
يارا - ديغم اني حامل
فتحت عيونه على وسعها صافن عليه يرمش
ديغم - شنو
يارا - حتصير احلى أب بالدنيا
ديغم - يارا ..
يارا - حامل حبيبي حيجي الطفل يلي تكمل النا سعادتنا
ديغم - يارا ليش ماحجيتي من قبل على الاقل ماخليج ترحين لهل مكان
يارا - رايده بس ابقى يمك وقريبه عليك مايهمني وين اروح وين ماروح
ديغم - لو صاير عليج لو على ابني شي منو يفيدني غير تحجييين اجت طلقه تايهاااا
احس نفسي جنت شارده وضربني على راسي صحاني
همست متردده صافنه بوجها ..
يارا - كتلت اخوج ديغم ؟
عكد حاجبه مركز نضرة يلي تحولت للبرود اليه
ديغم - مو لهل درجه نذل حتى اكتل اخوي مهما جان مسوي وياي
بعدين اني مو من حقي اقتل اي احد واخلي هل شي حلال يمي لان اخوي جان مأذيني قبل ..
يارا - يمكن فهمتني غلط ديغم
ديغم - فهمت عليج كُلشي زين يارا واني كلامي وضحته الج يلي مسوي اني مو من باب شي وجانت لحضه عصبيه
يارا - الطلقه وين صارت لعد سمعتك طلقت
رفع راسه لفوك صافن مجتف اديه ..
هزيت ايدي اهمس
يارا - ديغم شصار بالطلقه يلي طلعت منك
ديغم - تعلكت بالحايط مو براس اخوي
يارا - ينطيك كلبك تكتله ؟
ديغم - لو جان احقر البشر اني مارح اقتله لان مالي حق ويبقى اخوي
يارا - ليش هيج صار مجاي افهم والله
ديغم - عمته الفلوس يا يار عمته حيل وخلته مايندل دربه وصار يروح يسوي كل هل السوالف حتى يرضي بيها
نفسيته الضعيفه وقلة إيمانه ..
فَي مَكانٍ مَا ...
يايوم اشوف اعتابك
واوقف حزين ببابك
وارجع ازورك يا حيدر .. وارجع ازورك
طوّل علية غيابك
مشتاق اشم ترابك
وارجع ازورك يا حيدر .. وارجع ازورك
آنة الهويتك لا تظن نسيتك
علي وهذا الاسم يسري بشرايين
نبع يالماتمل شوقك رياحيني
عتب وياك عندي يراوح بعيني
يمن فرقاك كدر صفوة سنيني
اريد احجي بصراحة وياك خليني
اخاف مقدرات اجو تنسيني
يابا الحسن ماتدري
صرت اشتريها بعمري
شوفة ضريحك ياحيدر شوفة ضريحك
ايدي على خدي كاعد على الدچه صافن على حركات ابوي شون يسوي الريوك ويسمع القصيده مندمج وياها
ريحة الچاي و الفختيه ممزوج بنسمة النقاء بالهوى وقت الفجر .. اراقب تحركاته بكل دقه بكل تفاصيله ..
يرتب الاكل على الميز ويخلي الكواب بنص الطاسه وبصفها الشكر
يغلي الحليب .. ويحضر البيض وهو بكامل الهدوء
صرفن ردن بلوزته ووكف كدام السنك يفتح المي علكيف يريد يغلس المواعين يلي استخدمها ..
يغسلهم ويحجي وي الرادود .. غمضت عيوني احس جسمي نحلان من الحنين والمشاعر يلي تراقصت بداخلي
صرت اردد وياه بگلبي بدون لا احجي .. اكتفيت اغمض واعيش اللحظات وياه وبس
أتمنى مثل هاليوم جنت هناك .. وأجدد يم ضريحك هالعهد وياك
وأنصب مأتم على مصابك وأنعاك .. وون ون الثكالى لفقدك وفرقاك
لاجن ما نسيتك عايش بذكراك .. ضميري من البعد يا بالحسن ناداك
بين الدمع والحسرة .. أذكر لهيب الطبرة
يصعب مغيبك يا حيدر .. يصعب مغيبك
من عيني تجري العبرة .. وبين الجوانح جمرة
يصعب مغيبك يا حيدر .. يصعب مغيبك
بالهم بجيتك .. لا تظن نسيتك
يا يوم أشوف أعتابك .. أوقف حزين ببابك
وارجع أزورك يا حيدر .. وارجع أزورك
طوّل عليه غيابك .. مشتاق أشم ترابك
وارجع أزورك يا حيدر .. وارجع أزورك
آنه الهويتك .. لا تظن نسيتك
حسيت شي صار كدامي فتحت عيوني على وسعها فاز
جان ابوي كدام عيني .. صفن عليه وكعد بصفي
خله ايده على جتفي يحجي بهدوء
- شسوي كاعد هيج وقت
لهيم - اسمع وياك اللطميه و صوت الحمام
سميدع - بالله فنك تقلد صوت الفختيه شوون
لهيم - سهله اعرررفها
سميدع - اي يلا شوون
لهيم - الفختيه تكول غو غو غو غو
ضحكت على ضحكته واندماجه وياي .. فرحت وحسيت نفسي مسوي انجاز بهاي حياتي
تعال اكعد يمي تعال اكُلك شنو تحجي بشكل صحيح ..
شوف وليدي الحمامه ماتكول غو وأنما يا قوقتي يا قوقتي
خليت ايدي بحلكي صافن على كلمه - اي والله صح الحمامه تكول ياقوقتي يا قوقتي اذن صحيح هيه ماتكول غوو
رفعنا راسنا على خطوات امي كوه مفتحه عيونها تعبانه من وره
عمار ضاله سهرانه وياه
وكفت تخصرت تحجي
زمرد - اجتماعات سريه
سميدع - ههههه لا يابه ماكو اجتماعات بس جان كاعد يسمع وياي القصيده ومندمج على اخر مو صح يبطل
لهيم - صحيح
اجت كعدت على الميز مبتسمه واني واكف بصفها اوزع ابتسامات
ضحكت بوجهي وحضنتني تلعب بشعري
ابتعدت عنها وطلعت للطارمه صافن على السما والغيوم
لحد ما حسيت صارت مواجهه بين جيش ***** وبين الامريكان وجانت اكو قاعدة مال الامريكان قريبه علينا حيل
جانوا يتعاركون والبيت يهتز هز من وراهم بس جنا مانفهم هواي ولا نعرف
لحد ما اجو المقاومة دكو علينا الباب .. طفرت من مكاني اركض لابوي اصيحه يفتح الباب ويشوفهم .. سديت باب المطبخ على امي ورحت بصفه
سميدع - سلام عليكم السلام تفضلوا بشنو اكدر اساعدكم
- اهلًا و سهلًا استاذ عدنا شي واحد وياك اتمنى تكدر تسوي
سميدع - تفضلوا وان شاء الله يلي اكدر عليه اسوي وماقصر
- شوف حجي نريد نصعد فوك السطح مالتكم نريد نضرب هاونات على القاعده مال الامريكان وراح تشاركونا بأجر الجهاد اكيد
ياريت تفسح المجال النا وتخلينا ندخل نقوم بعملنا الواجب علينا
سميدع - انتَ جاي لهنا مقتنع بلي دتكوله خالي
- اكيد اني مقتنع وانتَ راح تقتنع ويانا لازم تقتنع
سميدع - ماكو شي لازم ومفروض عليها مادام عاجبني ماصدك فمو حقكم تجبرون الشخص
واكف صافن على ابوي وعصبيته كدامهم نتر بي الرجال الكدامه
ف جاوبه ابوي وكال اله بالاستفزاز
سميدع - وره مراح تضربون الامريكان مراح يردون عليكم ويقصفون مكانكم الي هو بيتنا وعيالي كلها بي ما فكرتو بحياة الاطفال بهذا البيت والنسوان
انتوا ليش تفكرون بس بمصالحكم الشخصيه والامور هاي كُلها تتغاضون عنها .. ماتكولون كل واحد بهل بيت عنده عزاز
ردوا على القصف مالتكم بقصف ويوكع البيت فوك راسنا ويتهدم على عيالي و انتم مخسرانين شي وبس رضيتوا نفوووسكم و مطامعكم وطلعتوا منها مثل الشعره من العجين
هاي ساحات فارغه كومه هنا اي مكان يعجبكم اطلقو منه وابتعدوا عني وعن بيتي مامسموح احد يتقرب من عنده لو سمحتوا
جان يحجي واني رافع راسي مفتخر بابوي وكلامه :
جاوبه واحد بيهم
- مو حجي انت بيتك عالي ونكدر نحدد الهدف من عنده كلش زين خو ما تخلينا نطلق بساحات فارغه مانسيطر حجي
سميدع - اني ما اسمح الكم تطبون لبيتي وتسوون هاي الشغله ف اخذو هاوناتكم واسلحتكم وروحو منا لا تكلولي جهاد ومدري شنو خلصت المكانات الا بس البيت الي بي عوائل
الله وياكم توكلوا ببيتي وماخليكم تطبون اله
- عمي هسه ليش تتعبنا واحنا مانريد نتعب ونتعبك ويانا
سميدع - روح خالي روح منا الله يسلمك ويسلم الحجي وياك لك بابا انتوا كلامكم تسولفوه للزعطوط يضحك عليكم
جاي عينك عينك للبيت تكول خل نقصف من بيتكم
- ترا مايصير بيكم شي مارح يقصفوكم شدعواك
سميدع - امشي منا خالي ماتدخل للبيت كومه اكو بيوت شوفلك واحد واصعد
- بيتكم الوحيد العالي و نكدر نسيطر بعملنا
سميدع - الله وياكم
- يصير خير حجي يصير خير في امان الله
سد الباب بوجهم و خله ايده على جتفي يدخلني لجوه وياه
زمرد - شصار منو ذوله
سميدع - ناس ماريد احجي عليهم بس يفكرون بمصالحهم الشخصيه
زمرد - والله خفت صارلكم شكد تحجون بالباب
سميدع - يردون يقصفون الأمريكان من بيتنا
لطمت على صدري اصيح :
عزاا بعيني يقصفون ومن بيتنا شبيهم ذوله
سميدع - ميفكرون بالعالم الا بمصالحهم
زمرد - اووف والله الدنيا تغيرت
سميدع - هواي تغيرت الدنيا يلزمرد
زمرد - خايفه عليهم من هل الدنيا
سميدع - ربج موجود والحارس الله لتخافين بحرس الرحمن همه
زمرد - گلبي ناغزني على شهرزاد شوو
سميدع - ليش حبيبتي شصاير كولي يالله
زمرد - مادري شو اليوم مامرت عليه
سميدع - تلكين التهت وي بناتها تصير
زمرد - يمكن والله مادري خل اكوم اكمل شغلي
سميدع - فد كوب جاي من ايدج الحلوه زمرده
زمرد ‐ بقيت اصب جاي للسميدع ولهيم وكعدنا نتريك بكل هدوء بس جان كلبي ممرتاح
اخذتني الذكريات واني اتذكر ابوي من جان يفتر علينا نفر نفر يصحينا من النوم حتى نلتم على سفره وحده وضحكاتنا العاليه وسوالف ملهم وميتم ومناكرهم الي ميخلص وانترست عيوني بالدمع...
صحيت على صوت السميدع ينادي بأسمي ويكلي شبيها زمردتي عيونها تدمع
جاوبته لا ماكو شي بس رجعت بالذكريات لبيتنا ولمتنا الي فلشها الزمن
سميدع ‐ زمردتي حضريلي ملابسي اريد اطلع لبيت حسن مشتاقله
ومشتاق لامي صار هواي مشايفهم تروحين وياي
زمرد ‐ لا ماكدر احس تعبانه شويه ومنايمه عدل علمود عموري روح انت و غير مره اروح وياكم
سميدع ‐ راح اروح لعد ديري بالج على نفسج
لهيم - بابا اروح وياك حبااااب خللل اروووح
سميدع - اي عادي بابا تعال عادي
زمرد لا هذا عوفه كدام عيني هذا ابو الكوارث ماكدر اعوفه لا يسويله شو سالفه تعبانه
هجام - صباح الخير بابا وماما
سميدع وزمرد بصوت واحد - صباح النور
لهيم - لعد واني متكلي صباح الخير شنو ماكل عشاك لا والحمس من صباحيات الله
هجام - ماشفتك وجه البومه
سميدع بضحكه - ولكم عيب بابا مو انتو اخوان
يلا اني رايح لحسن محتاجين شي ؟
هجام - بابا اروح وياك
اسيد - اني هم بابا اروح وياكم
سميدع - اسم الله انت منين طلعت
اسيد - من جوى الكاع هههه
سميدع يلا لعد امشونا نسلم على بيبيتكم ونرجع
زمرد - وصلتهم للباب بس جان كلبي ممرتاح حيل اليوم تعوذت الشيطان وقريت اية الكرسي لسلامتهم ورجعت للغرفه
فتحت شعري وغيرت دشداشته رايده انام .. نفضت فراشي وصليت على النبي وتمددت
صارت عيني تغفى وتاخذ النوم
بين النايمه والصاحيه
فزيت مخترعه على انفجار قوي داخل البيت ..
... يتبع
___________________________
سنه سعيده و كُل عام وانتوا بالف خير يعمريي 💕💕💕
اعتذر اذا جان البارت قصير مرتين كتبته وينحذف ونزلته هسه استسلمت .. ان شاء الله اذا صارلي مجال اعدل على البارت واضيف احداث بحيل الله 💕💕.
وهم غلسوا اذا شفتوا اخطاء املائيه من صدُك حيل تعبانه بس ماريد اخليكم تنتضرون 🦋❄️
اقروا هذا اليوم واني اعتذر مره ثانيه من صدُك مقهوره مرتين ينحذف وارجع اكتبه من جديد
احبكم سومرياتي 🦋❄️.