العُسبَرة

البارت الثاني والعشرين

هلي ..
وشرعني هواكم باب للخطوه الغريبه
وخايرتني اعيونكم
ذل لو چتل ؟؟
وانه والموت التحمنه
ابمايكم ..ساك وحجل
الروح شاخص
والعمر بركه گمر
والموت ظل
اويه كل لمضه زمر گلبي رصاصه
اوويه كل لهبه
اصرخ بدمي
اشتعل
الدنيه من ايشح ضواهه ..
الدم ابكل حيله يهل
هلي ..
او أخر مكاتيبي كتبته الكم
عله الكاع
ابنكم باعته الدنيه
ولا باع

العُسبَرة

***********

تبعناه بخطوات سريعة نحاول نجاري خطواته دخل للمستشفى وهو ما منتبه النا وصعد للطابق الموجودة بيه توبة فتح الباب ودخل ونحنا نمشي وراه دخلنا وراه وچانت ليلى واكفة مدهوشة من وجوده رأسا صارت عيني على توبة وچانت غركانة بنوم عميق هادي ظل برا وما دخل للغرفة

هود ظل واكف بمكانه يتأمل توبة مشيت وصرت كدامه واني اباوعله بقلق حالته چانت ما تبشر بخير وهو حتى مارفع عينه الي چان مركز على توبة بلعت ريگي وكتله بصوت ناصي حتى لا تفز توبة : هود

ما جاوبني بس عيونه اشتدت وحواجبه بدت تنعگد وفكه رجف بعصبية وقبضة ايديه تكورت بغضب هز راسه وعافنة وطلع وسد الباب وراه توبة فزت وقلصت ملامحها بألم وكالت : شكو شصاير

عبق : ما صاير شي حبيبتي ليلى عينچ عليها هسة اجي

طلعت بسرعة ولحكت هود وچان هادي يمشي ويحچي وياه بس هود ما يرد ويمشي سريع ركضت عليه ووكفت كدامه ودفعته من صدره بأيدي حتى اوكفه وكف كدامي وركز نظره علية وبنظرته چان اكو لوم اول كأني مقترفة ذنب

عبق : وين رايح

رد علية بالكوة وهو يحاول يتملك اعصابه ويرسم البرود عليهن : شتريدين

عبق : شنو رح تسوي

هود : كُل شي ما اسوي

احتلتني الصدمة ورديت عليه بأندهاش : نعمم!!!! ماتسوي شييي والشفته قبل شوية وعصبيتك هااااي شنوو

هود : وخري عبق لا تخليني اهيچ بيچ انتِ الثانية

رجعت دفعته من راد يروح وكتله بحدة : شتحچي انتَ واني شعلية اوكففف فهمني شنو ما تسوي شيي ترى النايمة جوة اختتتك اختك الي ما الها احد غيررك يافهيييم

جرني من ايدي وضغط عليها وهو يكز على اسنانه : لاتخلين خبالي يطلع عليچ لا تتدخلين لا يلوحچ طشار مو اختي الي تطعن بية وتغدر وتكسر حچايتي مو اختتتي الي تنزل راسي وتروح تمشي على هواها ضاربة كلامي عرض الحايط مو اختتتتتي

رديت عليه بنفس النبرة واني اجر ايدي منه : اختك وغصب عنك ووغصب عنك دافعلها وتاخذ حقها

هود : هي غلطت وهاي جزاء غلطتها وبعدين كافي دافعليها صرتي مثلها ومثل امچ

بهتت ملامحي بسبب كلامه والي چان مثل السم وانتشر بجسمي بس طلعت من صدمتي من خزره هادي ونتر بيه بغضب

هادي : لاتظل تمضررررط واحجي عدللل

جريت ايده من راد يعوفنا ويروح وصحت بيه بغضب عارم : شكلللللت حضررررررتك اني تكُلي هيييچ

التفتت على الممرضين الي باوعلنا بسبب صوتنا العالي وغمض عيونه وهو يستغفر هل مرة حچة هادي وكال : اهدي عبق وامشو برا نحچي

عبق : شنحچي هادي شنحچي ما تشوفه شنو يكول هذا كلام واحد عاقل اني يكُلي هيييچ

هادي : هذا طاگة فيوزاته معليچ بيه اني احچي وياه

راد هادي يجره حتى يحچي وياه بس هود دفعه وعافنا وراح يمشي وحده باوعلي هادي بقلة حيلة واني الغضب اعتراني ورجعت للغرفة واحس اريد انفجر دخلت وطبگت الباب حيل واثنينهن فزن چانن كاعدات فتت واني اروح هيچ واجي هيچ اعصابي نار

ليلى : شصار

صحت بأنفعال وداخلي يحترگ : هذا الثاني هم متخببببل يكُلي تستاهل شنووو تستااااهل شنووو هذا الحچييييي هذا صاير احقر من ذولاااك خاف ذولاك هم من كاعدهم جلااب لا هذا بالجديد صاير هيچ اكو واحد يكول علی اخته تستاهلل غلطت وهاي جزاتهااااا من شوكت هود افندي يحچي هيييچ من شوكت هود بهاي العقليييية

توبة : هود چان هنا

انتبهت اله وهدأت نفسي وحسيت بنفسي من جفصت باوعت لليلى اريدها تنقذني من هذا الموقف رفعت اكتافها بعدم معرفة

ورجعت باوعت لتوبة وكتلها واني اتجاهل سؤالها : رجعي نامي حبيبي بعد وكت

توبة : هود چان هنا ؟

غمضت عيوني واني اتنهد وهويت راسي بأيجاب ورجعت فتحت عيوني حتى اشوف رد فعلها كُل الي سوته هزت راسها ودموعها بدت تنساب بهدوء على وجناتها

توبة : فعلا استاهل السويته ومو قليل اني اذيته وما استحق شفقة او رحمه منه

ليلى : لا توبة لا تكولين هيچ

توبة : لا ليلى هذا الكلام صحيح اني فعلا ما استحق اي شي لان عضيت الايد الي انمدت الي لسنين اني غدرته واذيته خذلته وهو چان يشوفني كُل اهله كلامه وموقفه جدا طبيعي واصلا هو متساهل وياي غير واحد اصلا مايجي ويباوع بوجهي

عبق : توبة

ضحكت بسخرية والدموع تنزل بهدوء وهي تكمل كلامها : ههه حرامات بية التعب اني انسانة حقيرة ناكرة للمعروف ما استحق اي شي منه ولا حتى نظرة شفقة

عبق : توبة لاتحچين هيچ

توبة : عمره كُله محد نصفه دائما چان يكُلي اقويچ واتقوى بيچ ما اريدچ تنكسرين حتى لا انكسر وياچ وشوفي اثنينا انكسرنا بس اني اني انكسرت مرتين روحي وگلبي انكسر واستحق كُل الدا يصير استحقه كُل هذا من ايدي

لان چان يحذرني من جواد واني بكُل عين صلفة ارجع واحچي وياه ولا كأن اخوية قبل شوية محذرني منه كالي ابتعدي عنه مايفيدچ توبة عوفيه رح يجرحچ ترى اني اعرف مصلحتچ بس چانت اذن من طين واذن من عجين ما استعمت لكلام اي احد ابوية واخواني وهود كُلهم چان يحچون بس طنشت الكُل وسمعته اله وهو شسوة كسر عيني كدامهم وطلعني نذلة وفعلا اني هيچ لان مشيت وراه بدون علمهم

چانت تبچي وتحچي وتمسح دموعها ويرجعن ينزلن كسرت خاطري وانقهرت عليها حيل تقربت منها ولزمت ايديها وهي كملت كلامها : موقفهم صح واي شخص بمكانهم چان سوة هيچ شنو بنتك تنهزم ويا رجال غريب عنها وتروح تتزوجه وبعد كم يوم تلكاها مشمورة كدام مستشفى مثل الچلب والله شمرني مثل الچلب كدام باب المستشفى

عبق : توببة

قاطعتني وهي تكمل حچيها بشهگة وغصة متشكلة ببلعومها : چان يبچي ؟ على شنو يبچي على سواد وجهه لو على عملته لو على كسري لو على شنو بالضبط اني الچان مفروض ابچي على خساراتي اني الچان مفروض انقهر وانجرح بس هو چان يبچي يسوي عملته ويبچي لييش ليش سوة هيچ لعد مو توسلت بيه مو ترجيته مو كتله لا تسوي هيچ ترى عمري كُله ما رح اسامحك كتله لو تركع على ركبك كدامي ما اغفرلك واظل اطلبك حق عند الله ليش جاي هسة يعتذر ليش يبچي

هو غلط بس الغلط الاكبر مني انيي انييي اني التبعته ومشيت وراه مثل العمية اني الكتله امر وطاعة اني الاتصلت عليه بهاي ايدي هااااااي

رفعت ايدها وهي تحطها كدامي وتشوفنياها ومستمرة تحچي بحرگة : شوفيها بهاي ايدي اتصلت عليه وكتله تعال خلي ننهزم سوة توبة الي تصلي وتصوم الي ما تترك فرض التختم القران كُل اسبوع تنهزم ويا حبيبها علمود تترك ضيم اهلها وظلمهم الها اتجهت للحرام وانهزمت ويا الشخص التحبه بس شنو طلع الي نهزمت وياه حقيرر وغدر بيها تزوجها واخذها عذبها وشمرها وكأنها جزاتي على عملتي السودة وهذا لا شيء من العذاب المنتظرني يم الله لان قهرت اخوية ونهزمت ويا شخص محرم علية

عبق : توبة

رادت تقاطعني مرة ثانية بس ماخليتها وكلت : كافي عادي اسمعيني الله صح شديد العقاب بس بنفس الوقت غفور رحيم دائما الرحمة تسبق العقاب الله يحب عباده ويغفر الهم الذنوب كُلها بس المهم يرجعون اله بروح نظيفة خالية من الشهوات وتوبة نصوحة

ثاني شي وللمرة اللف اكولها الچ انتِ غلطتي وكُل البشر تغلط وچنتي تمرين بضغط نفسي وانتِ تشوفين كُل شي يروح من ايدچ ورح تتورطين بشي لذلك حاولتي تنقذين نفسچ ما ابرر عملتچ واكُلچ صح بالعكس اني كُلش اذم عملتچ لانچ ما واجهتي ونهزمتي وهذا الشي خطأ چان لازم تواجهين وتوكفين بوجه الكُل وتكولين اريده وما اتزوج غيره مو تنهزمين وياه

ماسوت شي بس ضمت وجها بين ايديها وكامت تبچي حضنتها واني اطبطب عليها واهدي بيها مرت كم دقائق امتدت لنص ساعة نامت بيها توبة غطيتها وكمت وكعدت  على الكرسي واجتي ليلى الي چانت واكفة بصمت طول ذيچ الفترة كعدت يمي وطبطبت على كتفي واني بعد ماكدرت اتحمل وبچيت حسيت كُل شي صار فوك طاقتي بعد ما بية اتحمل

هي حضنتني واني كتمت شهگاتي خاف توبة تكعُد كتلها بهمس والقهر مالي گلبي وروحي : لچ متغير متغير والله ما چان هيچ شجاه اكو واحد يعوف اخته بهل محنة لچ ليلى صاير قاسي وحتى نظراته مو مثل قبل صح اجته ضربة قوية بس ليش هيچ لا اني ولا توبة نستحق هيچ اثنينا چنا ضحية اهلنا شنو الي بأيدنة

لچ يكُلي صرتي مثلها ومثل امچ ليش هي شبيها حتى اصير مثلها وبعدين شنو هيچ شايفني ولا شي حتى اصير مثل شهيناز اني صح ادافعلها بس حتى اسكتهم بس ابد ما اقبل بالي تسويه

باستني من راسي وهي تكُلي بمواساة : اشش اهدي انتِ مو مثل احد انتِ عبق الچ مبادئچ وقيمچ الخاصة الكُل تحلف بأخلاقچ الصغير قبل الجبير لاتهتمين بيهم وشنو يحچون اليحچون عليچ يغارون منچ ويرديون يوصلون للي انتِ بيه

عبق : اريد اسافر واروح يم ساجر والله صدُك يفتهم من عافهم كُلهم وهچ وعاش حياته هناك

بعدتني عنها وكالت : شنو حياته وهو بغربة لا اخ لا اخت عبالك مگطوع من شجرة وهو من ضيمه راح هناك

عبق : على اساس لو باقي هنا چان عاش بهناء غير نفس الصخام اشو وجودهم وعدمه واحد على الاقل واحد يبتعد عنهم ويخلص من شرهم واللسانهم

ليلى : عبق طول عمرچ قوية ونستمد القوة منچ لا يهزچ كلام عمرچ كُله ما اهتميتي اله

عبق : عمري ما اهتميت لهيچ كلام  لان چان يجي من اشخاص مو مهمين بس من يجي من شخص مهم يأذي حيل

ليلى : عبق انتِ تعرفين هود اكثر منا كُلنا واكيد چان عصبي من حچة هيچ ومو قصده انتِ غالية عليه وطول عمره يدافعلچ وما يقبل احد يحچي عليچ

عبق : هاي قبل ليلى هود تغير كُلش تغير

ليلى : فترة ويرجع مثل قبل كومي يلا مسحي دموعچ واريد اشوف عبق القوية الما يهزها شي

هزيت راسي بقبول وهيچ مرات 3 ايام وكتبت الدكتورة خروج لليلى واصريت اخذها للبيتنا وما ارجعها للمزرعة واشوف منو يكدر يجي ويحچي وياها

وصلنا للبيت ودخلنا توبة للغرفة المجهزيها الها سديت الباب وطلعت بعد ماغطيتها وخليتها ترتاح تلگتني الوجوه شهيناز وليلى وحتى هادي هم وبيبي چانت كاعدة على جهة وساكتة

عبق : هاا خير

هادي : انتِ من كُل عقلچ وين جايبتها هي هناك ما خلصت منهم تجيبيها هنا ما يبعد عنكم غير خمس دقايق

رحت كعدت على التخم وحطيت رجل على رجل وكلت : والله البيه زود ويكون كد الشارب الحاطه بوجهه يجي ويحاول مجرد محاولة يمسها ويشوف شنو يجراله

هز ايديه بأستهزاء وكالي : انتِ هود عداچ من خبالاته ترى ولد عمچ مو صاحين بأي لحظة تطخ بعقلهم يجون يهجمون ويجروها من ايدچ

عبق : اني هم عندي خبالات اخليهم ما يندلون دربهم معليك بيهم خليها علية

هادي : عببق توبة اذا تأذت انتِ رح تكونين مسؤولة

عبق : هاددي انتَ مو احرص مني على توبة هي اختي وصديقتي وبنت عمي مستحيل اجازف بحياتها لو بكد ذرة

جاوبني بحدة ونبرة صوته علت : عبق لاتصيحين واني اكثر منچ تهمني مصلحة توبة مو بس انتِ خايفة عليها

خديجة : بعد كومو تكافشو ليش كاعدين

عبق : ماتسمعيه شيكول عبالك اريد اضرها

هادي : ماكلت تريدين تضريها بس وجودها قريب منهم خطر عليها وانتِ ما موجودة النهار كُله حتى تحميها

عبق : هادي اني جبتها هنا حتى ارد اعتبارها واطب بنص عينهم واشلع عينه اليحچي عليها بكلمة وتوبة احميها بروحي اكيد رح اخذ كُل احتياطاتي حتى احميها لا تتصور اني اسوي شي ما واثقة منه

سكت للحظات وهو يباوعلي وهز راسه بهدوء وكالي : عبق توبة امانة برگبتچ

عبق : اكيد بعيوني احطها

ليلى : واهلها اذا عرفو هي هنا شنو موقفهم

عبق : مو مهم هذول اني اربيهم من جديد واشوفهم شلون يتجرأون ويمدون ايديهم على شخص وهو بحمايتي

شهيناز : شنو تسوين عبق

ابتسمت بشر وكتلهم ؛ خلوها علية

خديجة : ولچ احچي شنو راح تسوين

عبق : كُل خير خديجي كُل خير اكُلك هادي أوسيد وين

هادي : بالمزرعة

عبق ؛ وريتان وين خوما وحدها بعد ماشفتها

هادي : وياه هناك بس يريد يشيل لغير بيت

عبق : ليش شنو ما مرتاح ويانا

هادي : مو شغلة ما مرتاح بس يكول اني هسة تزوجت ولازم بيت وحد ويستقر ويكون عائلته

عبق : حقه عود اني احچي وياه

كلت كلامي وكمت كتلهم : رح اصعد انام لحد يكعدني اكعُد وحدي

عفتهم وصعدت لفوك دخلت ورحت سبحت طلعت مشطت شعري وشمرت نفسي على السرير تغطيت ونمت وما حسيت على نفسي الا الساعة 4 ونص بالكوة سحلت نفسي وكمت غسلت وجهي ونزلت جوة

محد چان موجود بس بيبي كتلها : هاا خديجي وينهم

خديجة : كُلهم راحو هادي رجع لأهله امه خابرته وليلى اجة رجلها اخذها وامچ بغرفتها وتوبة نايمة

رحت عليها وحضنتها وبستها من راسها وشميتها بقوة وهي طبطبت على ايدي كتلها : مشتاقتلچ خدوج صايرة ما تحبيني

خديجة : والله يا بيبي انتِ ما تنشافين گاضية نهارچ بالشارع من الشغل للمحكمة ترجعين للمشاكل زين اتذكر شكلچ

عبق : اووف لا تذكريني والله تعبانة ما ملحگة احُگ راسي ما يخلون الواحد يجر نفسي مشكلة ورا مشكلة

خديجة : تكضي تكضي ان شاء الله شلونچ انتِ

جريت نفس قوي وزفرته : نكول الحمدلله ماكو كلمة توصف حالنا غيرها

طبطبت على رجلي وردت : يستاهل الحمد

عبق : جوعانة

خديجة : شوكت تشبعين انتِ

عبق : اهوو ترى من الصبح ما مالكة شي

ضحكت وبيت غمازتها الحلوة وكالت : اتشاقة وياچ كومي مسوين فاصوليا وتمن

كمت وكفت وكتلها : انتظري هسة جايتچ بس توبة تغدت لو لا

خديجة : كعدتها غديتها ورجعت نامت

دنگت عليها بستها من خدها حيل وكلت : اوووووف اروح فدوة للحنين

دفعتني عنها وهي تمسح بخدها ودردم علية ضحكت عليها ورحت للمطبخ طلعت صينية جبيرة حطيت بيها جدرية التمن وجدرية الفاصوليا وجبت ماعون طرشي من الثلاجة وشفت زلاطة هم حطيتها بالصينية وجبت خاشوكة وشلت الصينية ورحت للصالة يم بيبي حطيتها بالكاع وتربعت وشلحت عن رداناتي وسميت بأسم الله وبديت اكُل

اباوع لخديجة فاتحة عيونها وتباوعلي بصدمة اشرتلها بأيدي : هااا خدوج شبيچ صافنة

خديجة : يمة خلصن المواعيين جبتي الجدرية تاكُلين بيها

اشرتلها بأيدي بعدم اعجاب وكتلها : لا مو طيب الاكل بالمواعون شحلاته بالجدر طعم الاكل كُله بالجدر امممم شكد طيب

خديجة : عين الباردة يمة عليچ عين الباردة

استمريت اكُل لحد ما انتخمت كُلش كمت شلت الصينية وديتها للمطبخ غسلت المواعين ورجعت الاكل ورحت لغرفة توبة اطمأنيت عليها ورجعت صعدت  فوگ بدلت ملابسي لطلعة ولبست نظاراتي وشلت الجنطة والسويچ ونزلت جوة

خديجة : هاا يا ستار وين رايحة وانتِ والجلد النمر مالتچ

عبق : عندي حساب لازم اصفيه يلا خديجي چاووو

طلعت من البيت وركبت سيارتي طبكت باب السيارة واخذت تلفوني ودگيت على الرقم حسين ما ظنيت بيوم ارجع ادُگ عليه بس للضرورة احكام شوية ورد علية

حسين : الو منو وياي

عبق : المحامية عبق

رد علية بضحكة وكال : هههه يا هلا ما توقعت ترجعين دُگين علية

عبق : مو وكت اخذ وعطا حسين اسألك سؤال واريد تجاوبني

حسين : اسألي

عبق : وين مكان الاسلحة مال نعمان

حسين : اممم شتسوين بيه

رجعت ظهري بأريحية على الكرسي وكتله : اريد اسوي جرة اذن اله

حسين : هههه انتِ بلاء على راسهم بس كفو بيچ سوي الما سويته

عبق : تكول لو لا

حسين : اكول ليش لا الاسلحة موجود بالمعرض جوة الكاع اكو مثل المخزن يحطهن بيه هناك الاسلحة

عبق : امم احد يدري بيه

حسين : لا محد يدري بيه بس ولده

عبق : ولده؟

حسين : ليش ما تدرين ولده يشتغلون وياه

عبق : هسة دريت هود وياهم

رد علية بنبرة ماكرة وكالي : ما ادري يجوز اي ويجوز لا اني الاعرفه بس ولده يشتغلون وياه

عبق : خوش اكو شي بعد ما اعرفه

حسين : حاليا لا

عبق : تمام

حسين : اي شي تحتاجيه احنا بالخدمة

عبق : لا تعتقد احتاجك فد يوم

حسين : ما تدرين هاي دنيا فجأة تلكين نفسچ بمكان ما تريدين تكونين بيه

عبق : اني ما اكون غير بالمكان الاريده مع السلامة

سديته منه وشغلت السيارة وانطلقت بيها لبيت نعمان وكفت السيارة ببابهم ونزلت والنظارات على عيوني والتلفون بأيدي رحت دگيت الباب شوية وفتح الباب قصي ابن داوود عمره تسع سنين ابتسمت بوجهه وكتله : اهلك موجودين جوة

قصي : اي

حركت ايدي بين شعراته واني ابتسمله فتت وهو سد الباب وراية رحت للمطبخ وفتت منه چان الكُل موجود الي توقعته والي ما توقعته
الكُل استغرب من وجودي بس الي محة الاستغراب هي عمة امينة وهي تجي تسلم علية حضنتني وباستني ورحبت بية

امينة : هلا هلا زارتنا البركة فوتي يمة فوتي

عبق : هلا بيچ عمة اليوم الجمعة يمچ شنو المناسبة

باوعتلهم كُلهم يباوعولي بطرف عينيهم وتقريبا چان الكُل موجود حتى سعدية ردت علية عمة امينة : والله يا حبيبتي تدرين شنو صار  قبل يومين وخطية داوود هادي صوبه برجله وابوه سواله عزيمة لسلامته وسلامة الولد

عبق : امم زين منو موجود بالاستقبال

امينة : عمامچ كُلهم بس ابو عمار ماكو

عبق : خوش

ملت براسي وابتسمت بخبث وكلت : لك هلا بأم طه العلم شلونچ خية صار قرن ما سامعين صوتچ شنو مفعول الكتلة بعده بيچ

غمتني بأيده وعافتني وطلعت ضحكت بقوة عليها وامينة دغتني وهي تضحك بخفوت : ولچ كاتلة سعدية

عبق : ياا ما دريتي غير شلعت عفشته الصفرة

امينة : ههههه نزول عليچ

عبق : عمة الي راح يصير جوة لا تتدخلين بيه وخلينا حبايب زين

عگدت حواجبها وردت علية : ليش شنو راح تسوين

عبق : عمة كُل واحد لازم ياخذ جزاءه وما يصير يبقى الحق ضايع كُل شي ما اريد منچ غير ما تتدخلين فدوة لعينچ

هزت راسها بقلة حيلة واني عفتها وطلعت والعيون تلاحگني بكره فتحت باب الاستقبال ودخلت بدون ما اطرقه والانظار كُلها توجهت علية طبعا الي چانو بالمطبخ كُلهم اجو وراية وظلو واكفين بالباب

عبق : يا مرحبا شلونكم عمامي العزيزين

ما انتظرت ردهم وهم اصلا ما ردو ورحت كعدت على واحدة من القنفات وحطيت رجل على رجل والابتسامة مزينة وجهي الانظار كُلها متصوبة علية والنسوان واكفات بالباب ينتظرني احچي

باوعت بالوجوه شفت ولد نعمان وانصدمت من منظرهم كُلهم مضروبين ضرب مال انتقام محمد راسه ملفوف بشاش وعيسى وجه كُله ازرگ وايده مكسورة داوود هو اصلا متصاوب بس هم وجهه مزورك وحتى قاسم هم مضروب

صح هادي واوسيد كتلوهم بس ما اذوهم هيچ كتلوهم بس اكثر الضربات چانت على جسمهم وعلى راسهم بس هسة هذول وجوهم مطعون ما مبينة ملامحهم يا ترى شنو صاير

ما اهتميت وتشمت بيهم الصراحة وحيل وابو زايد وخرت نظري عنهم لمن وجهلي نعمان سؤاله : شعندچ جاية

عبق : اجيت ازور عمي حبيبي الي صرنا شركاء اني وياه

همام. : شلون يعني صرتو شركاء

عبق : ليش عمو ما تدرين مو بابا وعمو نعمان چانو شركاء بالمعرض وحصة بابا انتقلت الية وصرت شريكة عمو نعمان بالمعرض

نعمان : لا تظلين تمسلتين كتلچ ابوچ بس المعرض بأسمه واني الدا اشتغل يعني المعرض من حقي صار شهور اشتغل بيه وحدي وين چنتي

عبق : چنت حايرة بمشاكلكم الما تخلص على العموم عمو اشتغلت ولا لا نص المعرض بأسمي وبأسم اخواني

نعمان : يا اخوان ذول هذاك صار سنين ما سامعين شي عنه وليلى تزوجت بعد مالها حصة

عبق : هلوو ومنو قرر هذا الشي

نعمان : اني قررت وكومي روحي منا ما اريد اشوف خلقتچ ببيتي

عبق : يااا عمو ليش تسوي هيچ صدكني ما تلكة احسن مني شريك وبعدين هسة احنا شركاء فوگ الكاع يجوز نصير شركاء جوة الكاع

كلت كلامي وبنهايته رسمت ابتسامة خبيثة على ثغري وياها نظرة قوية مع رفعة حاجب وهو عيونه جحظت بصدمة من افتهم كلامي وكف بغضب وصاح بية

نعمان : انتِ الاخذتي الاوراااااااق

رديت عليه بغباء وكأني ماعرفت عن شنوو يحچي : يا اوراق

رد علية بغضب : لا تغشمين نفسچ بنفس اليوم الجيتي بيه للمعرض الاوراق اختفن ماكو غيرچ اخذهن

عبق : يااا واني شمدريني عن يا اوراق تحچي

نعمان : عببببق لا تلعبين بالناااار قسم بالله انهيچ وين وديتي الاوراق

عبق : هاي شبيك عمو غير تفهمني يا اوراق هاي

نعمان : الي رادهن حسييييين

وكفت كدامه ويبعد بينا مترة ونص : هاا الاوراق الي رادهن حسين من خطفني وساومك بين الاوراق وبيني وانتَ طبعا ابو الغير اختاريت الاوراق وعفت بنت اخوك بين ايدين مجرم ما يرحم

وكف عمي همام وكال : يا خطف هذا ياحسيين شتحچون انتو

عبق : ليش عموو ما تدرين اني چنت مخطوفة وحضرة اخوك الموقر ضحى بية علمود مصلحته ما تتضرر

همام : نعماان هذا الحچي صح

نعمان : ايي صح وهاي بنعال ما انطي ببدالها لو كاتلها ومخلصنا من شراها چان سوة فضل

عبق : انتَ هم حاسب نفسك عم لو كُل العمام مثلك خلي تطم روحها بخيسة

راد يهجم علية بس ابتعدت عنه وصحت بيه واني ارفع اصبعي بوجهه : ايااااااك قسم بالله انهييييك

همام : نعمان ارجع ليورة وخلي نفتهم السالفة

نعمان : يا سالفة هاااي ماكو سالفة وانتِ امشي اطلعي خلقتچ الزفرة ما اريد اشوفها

عبق : تؤؤ ماحزرت عندي كومة حچي واريد الكُل يسمع

انتفض محمد بغضب وهو صارله ساعة ساكت ومتحمل وهسة رح ينفجر : امشييي اطلعيييي ما نريد نسمع كلمة منچ

عبق : واني اصلا ما جاي احچي وياك لا تتدخل خلي الكبار تحچي

راد يهجم علية بس همام صاح بيه ورجع لمكانه التفتت علية همام وكالي : عبق بدون مشاكل شعندچ

عبق : افااا اني ما يجي مني المشاكل كُل خير يجي مني

اجة علية نعمان وجرني زندي حيل وكالي وهو يكز على اسنانه : تمشين توليييين منااا لا اجنزچ

جريت ايدي منه بنترة واحتدت ملامحي وحچيت بنبرة عالية  : كاااافي عندي كلام احچي واروح لا عبالكم عاجبني اگابل خلقتكم ترى بالكوة جابرة نفسي

همام : عبق احچي عدلللل كولي الي تريديه وروحي بدون مشاكل

هزيت راسي وكلت : الكُل هنا يسمعني كُلكم تعرفون هذول الانذال قبل كم يوم شنو سوو

صاح عيسى واجة يتقدم علية بس وكفه ابوه : اكُلي ....... يا ...... امشي اطلعي

عبق : اكيد ما ارد عليك بمثل هاي الالفاظ لان اخلاقي اكبر من هيچ فاااا الي ما يعرف رح اكُله هذول الذكور صارلهم شهور يدورون على اختهم حتى يكتلوها ويغسلون عارها وطبعا محد عار غيرهم

همام : عبببببق لسانننچ

ما اهتمت لكلامه وكملت : ومن لكو مكانها وطبعا چانت يمي بحمايتي وحماية هادي استغلو عدم وجودنا وكتلو الحرس وهجمو على البيت ولزمو توبة جنزوها وهم مفتخرين بعملتهم الوصخة بأخر لحظات لحگ عليها هادي ونقلناها للمستشفى البنية خسرت طفلها
اي نعم طفلها توبة چانت حامل والطفل مو ابن حرام لان توبة متزوجة

ما اشرح الصدمة الي احتلت وجوه الكُل واولهم ابوها بس رأسا نكر الحدث وكال : لا تجذبييين هي نهزمت ويا ذاك ال...... وابنها ابن حرام

عبق : ابن حلال وتوبة ما سوت شي خطأ وهي متزوجة على سنة الله وروسوله والدكتورة كتبت تقرير بحالتها وانو هي متعرضة لعنف والتقرير يمي اضافة لذلك اكو تصوير لحظة هجوم ولدك على الحراس وكذلك الحراس متأذين وبكلمة مني يروحون يشتكون على ولدك ويطيح حظهم بالسجن ولا تنسى

ابتسمت بمكر واني اباوع للعمي نعمان وكملت كلامي : لا تنسى شراكتنا جوة الكاع توديك ورا الشمس يا عموو انتَ وولدك

صاح داوود بعصبية : شتقصدييين

عبق : اقصد الي فهمتوه كلامي تهديد واضح واكُللكم توبة يمي بالبيت ببيتنا الي يبعد عنكم خمس دقايق الزلمة والطالع من ظهر زلمة وشاربه عليه يروحلها ويمس شعرة منها قسم بعزة الله والي رفع سماه لليل ما تبقون واخليكم تعفنون بالسجن ولا يشفعلكم واسطة لو فلوس اخليكم تخيسون بالسجن

هل مرة انتفض عيسى وعيونه حمرة دم من العصبية : لچ حيوانةةةةةة هاي تالي عمرنا زعطوط يجي يهددد اذا مالحكتچ بيها بنفس الكبر ادفنچن اثنينچن

باوعلت لعمي نعمان الي عيونه چانت تنطق الغضب بصمت ووجه صار احمر قاتم بس ما حچة شي ابتسمت والتفتت لعيسى وكتله : لاتظل تهوز وظل كاعد بمكانك دير بالك على زوجتك واطفالك لادخل نفسك بمشاكل انتَ مو كدهاا

الكُل هناااا يسمعننني الصغير قبل الجبيرر الي يمس توبة بكلمة وحدها كدامها او وراها قسم بالله انهييه كُلكم هناااا قذارتكم ووصاختكم كُلها يمي والله بكلمة وحدة اوديكم ورا الشمس ومحد يعرف عنكم شي اتچفو شررري واياكمممم تمسوني او توبة او حتى امي بكلمة وحدةةةة رح تشوفون وجه بحياتكم ماشايفيه

التفتت على النسوان واشرت عليهن : خصوصا انتننن لسانچن طويل وما ينضم بحلوگچن حچاية الي اسمعها حاچية كلمة وحدة بحق توبة ينگص لسانها سمعتو

القيت نظرة اخيرة عليهم كُلهم من الجبير للصغير والنسوان الي چانت واكفة بالباب وصافنة واكو بيهم يباوعلي بغضب واكو بيهن ما مهتمات وبس ماخذات دور المشاهد درت وجهي اريد اطلع بس رجعت ووكفت بمكاني والابتسامة تغزو وجهي وكتلهم

عبق : لاتظنون صارلي شهرين مختفية وما اشوفكم خلصتو مني لا تنسون اني عبق الما تسُكت عن حقها وحق كُل مظلوم اختفت فترة حتى ارجعلكم بحيلي واطلع خياستكم كُلها واحد واحد

************

ولنا في الخيال حياة

************

اتمنى يكون البارت نال اعجابكم انتظروني بالبارت الجاي كانت وياكم اختكم الماس K.T

******
الى اللقاء .....