العُسبَرة

البارت الحادي والعشرين

مَا لإعٌتذَارِك بَعدَ هَجْرِكَ قِيمَةٌ
جَفَّ الغَدِِيرُ وَماتَتِ الأشْجَارُ
القَلْبُ أنْتَ مَلَكْتهُ وَكسَرْتهُ
هَجْرًا، أتَجّبُرُ كَسْرَهُ الأعَذَارُ؟

العسبرة

************

چنا كاعدين بالمطبخ نسوي بالغدة نسولف ونضحك وتوبة كُل شوية لازمة بطنها وهي تفز لان تجيها دفرة من بنتها

ريتان : هههههه مبينة بنتچ وگحة شابعتچ كتل من هسة

توبة : ايي عليمن تطلع اذا هود خالها وعبق بنت عمي

ريتان : ليش عبق چانت وگحة

توبة : ومازالت لحد هسة حسرة واحد يحچي وياها ماتتفاهم لو تمد لسانها لو تهجم عليه ُتكتله

ريتان : زين تسوي حتى يخافون منها

توبة : اي والله زين تسوي

ريتان: دخلتي بالسادس انتِ مو

توبة : اي صار يومين

ريتان : يلا ان شاء الله تكومين بالسلامة

ظلينا ندردش بيناتنا لحد ما فجأة كُل شي نگلب وصار صوت صياح ورمي ذبيت الي بأيدي واني اسم بأسم الله وكُل ظني هذا عمي اجة وتوبة المسكينة هم وكفت والخوف تملكها وهي تحتضن بطنها وانخطف لونها

توبة : ريتان الباب الباب اقفليه

هزيت راسي عدة مرات ورحت ركض قفلت البوب ورجعت لتوبة چانت واكفة بالصالة

توبة : ولچ امشي جيبي التلفون خلي اندُگ على واحد منهم

چنت مشدوهة ما اعرف شسوي وبس اسمع كلامها رحت للغرفة جبت التلفون ورجعتلها فتحت التلفون بأيدين ترجف ودگيت على اول اسم وچان عبق بعدني دا احچي وياها وصار ضرب قوي على الباب سمعت عبق تصيح بية حتى نروح للغرفة ونقفلها

بس قبل لا نتحرك انكسر الباب ودخلو 3 زلم مسلحين وعيونهم تنطق شرار جمدت بمكاني وماحسيت على التلفون من وكع التفتت على توبة من نطقت بصوت يرجف

عيسى

ايقنت ان ذول اخوانها وهم ينون الشر تقدم واحد منهم وهمس بفحيح سام

واخيرا وكعتي بأيدي جيبي اليخلصچ مني هسة

وبلحضة مباغتة جرها من شعرها وسحلها صرخت بيه حتى يعوفها بس اندار علية وخزرني بعيونه ورجع على توبة يسحل بيها ويضرب وهي تصرخ متوجعة وحاضنة بطنها حتى لا تتأذى بنتها وكعت بالكاع وصاير يدفر بيها برجله ويرجع يضربها بأيديه ويصرخ بيها وينعتها بأسوء الالفاظ

ما اكتفى بهيچ الولد الي وياه اجو وبعدوه واستلموها هم وواحد ورا الثاني يضرب بيها بدون رحمة هجمت عليهم واني احاول ابعدهم بس ماتلقيت نتيجة غير اندفعت بقوة وحصلت ضربة هم وكعت بالكاع والدموع غرگت خدي التلفون چان بصفي جريته وبسرعة دگيت على اوسيد

اول مافتح الخط صرخت بيه : تعاااال الحگلييي رح يذبحون توبة تعاااال

صاح بفزع ؛ شكوو ولچ شنو هل عياط ريتااان وين انتِ

ماكدرت ارد عليه وذبيت التلفون وكمت بسرعة من شفت واحد منهم سحلها من شعرها ويريد يطلعها برا البيت ركضت عليها وشمرت نفسي فوكها وجلبت بيها ماقبلت اعوفها

واحد منهم يجر بيها وواحد يجر بية يريدني ابتعد عنها يجر بية بقوة بس اني ما اعرف منين جتني القوة وتشبت بيها وماتركتها حتى ضرب ضربني بس ماعفتها وهي تصرخ متوجعة والنزيف اخذها دمها ترس المكان وتصيح

توبة : بنتتتتتي بنتي رح تموووت ولچ يمة لحگيلي ياربيببي

هسة يلا انتبهو اخوانها لبطنها وللنزيف ولكلامها وكفو بصدمة وحچة واحد منهم

حامل ولك داوود طلعت حامل

رد عليه داوود بغضب وهو يهجم عليها مرة ثانية : لا يا ....... يا سا....... يا ...... انعل ابو الجابچ لابو الرباچ لابو امچ ال........ اليوم موتچ على ايدي شايلة ن.... ببطنچ

حضنت راسها بين ايدية وصرخت بيه واني ابجي : عوووووفها اللله ينتقم منكم عووووفها

صمت مدوي ملى المكان اثر طلقة انطلقت من مصدر مجهولة بس خرست الكل رفعت راسي وشفت هادي واكف بالباب وموجه سلاحه علی هذول الولد والشرار يشع من عيونه واعصابه كُلها مشدودة وشرايين رگبته تريد تطگ صاح بيهم

هادي : ارجع لا ادفنك بأرضك ياعار ياسگط

رد عليه هذا الاسمه عيسى : لاتتدخل بشي مايعنيك اختنا ونريد نغسل عارها

هادي : محد عار غيرك ويحتاج غسل هاي ايدك المديتها عليها اذا ما كسرتها الك وعلگتها بركبتك ما اتسمى هادي ارجععععععععع

صرخ بيه بصوت افزعني والدمع يتسابق على وجناتي كتله بصوت يرجف : هادي هادي البنية رح تمووت تعال ساعدني خلي نشيلها

نزل نظره الها وظهرت على ملامحه الصدمة بس سرعان ما استبدلت بملامح الغضب واجة عليها ركض حاول واحد منهم يتقرب بس بسرعة هادي صوب سلاحه وضربه برجله صرخ بألم ووكع بالكاع رجع واحد منهم رفع سلاحه بوجه هادي وصرخ بيه

لككك حيووووان شلون تسوي هيچ يا.....

هادي : تاكل ...... وتنجب ياس...... عمرك كُله ماتنظف توبة اشرف منكم كُلكم  وخر مننااا لا اكومك بصف اخوك عاار

رجع يريد يجي عليها بس ركض عليه واحد وجره من قميص وبطحه بالكاع وصرخ بيه : لاتتتتدخلللللل هاااي عااار ولازم تموووت

ضربه هادي بوكس بوجهه ودفعه ونام فوكه وكام يضرب بيه وهو يصرخ حسيت حنجرته تجرحت من كد ما صوته عالي

هادي : ولك قندررررة تروحلها فدوة لشرفها وعفتهااااااا لك هي اشرف منك يانعالللل ابن الوصخة تحچي بالعار وانتَ ساسه لك نسيت خياستك نسيت وصاختك من چنت تنام بالملاهي ولك نسيت من چنت تسكر وابوك يگطع الحزام على ظهرك هذن كُلهن نسيتهن

هذا ما يسكُت ويرد اله والضرب والكلام وبالمثل هادي نفس الشي وهاي البنية النزيف اخذها رفعت عيني على الباب من دخلت عبق وسلاحها بأيديها بهت لونها وهي تشوف الوضع الولد الاجوي  واحد صاوبه هادي واحد يتعارك ويا هادي والثالث دا يساعد اخوه المتصاوب

محد انتبه لعبق اشرتلها تجي اجت ناحيتي وهي تتفقد توبة الي فقدت وعيها واني بس ابجي شهگت وكتله : ولچ البنية رح تموت خلي ناخذها للمستشفى

عبق : كومي كومي شيليها وياي

هستوني ردنا نشيلها ونطلع وصرخ واحد منهم : ولك محممممد رح تاخذها روح عليها

جان المتصاوب الحچة انتبه عليه الچان يساعده والي مدعو بأسم محمد واجة ناحيتنا وعبق بسرعة رفعت سلاحها كدامه

عبق : قسم بالله انهيك هناا ارجع الشرطة على وصول اذا ماخليتكم تعفنون بالسجن

هادي ابتعد عن عيسى والولد واحد صار يباوع للثاني داوود لزم رجله بألم وصاح : امشييي تعال خلي نطلع قبل لاتوصل الشرطة

محمد : ونعوف هاي ال...... عايشة

عيسى بصق الدم من حلگه ووكف على حيله وكاله : ما تعيش اذا مو اليوم باجر تموت وكتلها على ايدي

عبق : صدكني يا عيسى اذا توبة صابها اذى رح تكون الخاسر الوحيد ورح يصيرلك شي بحياتك ماتتخيله

داوود : تعال محمد ساعدني وانتِ مصيرچ مثل مصيرها هم تندفنين بصفها وحدة اخس من الثانية

راد هادي يهجم عليه بس وكفته عبق وهو صرخ بيهم :  لك...... اطلع منا لا اطمس راسك بالخيسة الجلللللب عمرك كُله مايصير براسك حظظظظ ابن القندرة 

طلعو هم وعيسی يتهدد ببتوبة   عبق صاحت لهادي يجي يساعدها ويشيل توبة هو بسرعة اجة وشالها وهي ركضت قبله وطلعت وفتحت باب السيارة واني وكفت وبسرعة لحگتهم بس قبل لا اطلع شلت التلفون وطلعت وراهم صعدت ورا وحطيت توبة بحضني وعبق ليكدام وهادي يسوق بس يسوق بسرعة جنونية بحيث وصلنا للمستشفى بفترة قياسية

نزل بسرعة واجة عليها اخذها من بين ايدية وركض بيها لجوة اخذوها من ايديه ودخلوها للطورائ ومن الطورائ لغرفة العمليات

چنا واكفين بالممر امام غرفة العمليات عبق وهادي رايحين جايين بتوتر والقلق ماليهم واني كُل شي ما اسمع احس صارت وشة بأذني كعدت بالكاع وحطيت ايدية على اذاني اكتم الصوت بس بلا فايدة ونين وشة ما اعرف شنو مصدرها

تلمست شفتي وتحسست الدم اليابس عليها اثر ضربهم الي    صار صوت خطوت بالممر رفعت راسي وشفتهم نفسهم الضربو توبة جاين وبكُل عين صلفة بس مو كُلهم الي تصاوب ما موجود بس محمد وعيسى وواحد ثالث اول مرة اشوفه هادي من شافهم صارت عيونه بگصته راد يهجم عليهم بس عبق وكفته

عبق : مو وكتها هادي احنا بمستشفى عوفهم خلي يولون

تقربو منا وكعدو على الكراسي بأريحية ولا كأنهم مسوين شي ويضحكون بخبث هادي ماكدر يسكت وصاح بيهم : شعدكممم هنااااا تكتلون الكتيل وتمشون بجنازته كومو ولو منا

محمد : وانتَ شعليك مستشفى الخلفك نكعُد بالمكان اليعجبنا وبعدينا اختنا جوة دا ننتظرها تصحى حتى نشوفها ونتطمئن عليها

مشى ناحيتهم هادي وراد يهجم بس ركضت عبق ووكت كدامه ومنعته ورجعت لمكانه وكالتله : اهدى هم يسون هيچ حتى يستفزونك

هادي : شوفي ولد القنادر شلون يضحكون

عبق : معليك بيهم هسة خلي نطمئن على توبة وراها سوي الي تريده

مرت نص ساعة والقلق چان سيد الموقف هذول الجلاب چانو يسولفون ويضحكون بينهم ولا عبالك الي نايمة جاوة حالتها بسببهم تحسبت ودعيت عليهم من كُل گلبي عبق ماكدرت تسكُت اكثر واندارت عليهم وصاحت بيهم

عبق : صمووو حلگكم عااااد شنو هاي الصلافة قسم بالله اصيح الامن هسة اخليهم يسحلوكم برا

رد عليها واحد مهنم :  طالعلچ لسان بنت شهيناز بس تدرين عرج امچ  نفسه بيچ نفس ال،.... اثنينجن

ضحكو كُلهم وهادي عيونه براسه وعبق اشتعلت بنار رفعت اصبعها بتهديد وصاحت :.قاااااسم لاتخليني اطلع خياسك كُلللله منو طلعك من السجن شهر انت تتوسل بالرايح والجاي حتی يطلعك ومحد تفل بمصباحك وساعدك منو طلعك غيرييي هااا يالناكر عمركم كُله وماتنظفون الزبالة تنظف وانتو ماتنظفون

محمد :  لاتتجاوزين وانتَ قاسم كافي عوفها

سكتت عنهم عبق والغضب محتلها ورا فترة انفتح الباب وطلعت ممرضة كبل راحتلها عبق وجرتها على صفحة حچت وياها شوية ودخلت هي والممرضة داخل الغرفة وكفت بأستغراب وهادي نفس الحالة وشصاير عبق وين راحت وتوبة شنو حالتها

صار صوت خطوات لا مو خطوات وانما ركض انداريت وشفته يركض ناحيتنا بخوف اول ما شافني اجة علية بسرعة ولمني لحضنه وهو يبوس براسي ويضغط علية بحضنه حسيت روحي ارتخت هسة يلا حسيت بالامان چنت متشنجة وحسيت حضنه ملجأي ماكدرت اسيطر على نفسي وبجيت بصوت عالي واني بحضنه

هو يمسح على راسي ويبوس بية ويهديني بعدني عنه وهو يتفحص وجهي فتح عيونه على وسعهن وصاح بية : منو سوة هيييچ

شهگت بعبرتي واني ارجع ادفن راسي بصدره : اوسيد توبة توبة رح تموت اخوانها كتلوها كتلوها

رجع بعدني عنه ولزم وجهي بين ايدية وكالي : هم سوو هيچ بيچ

هزيت راسي بأيجاب والدمع بعيني يتجارى عيونه اشتعلت نار وشراينه برزت ابتعد عني وراد يهجم عليهم بس الي اوقف طلعت عبق من الغرفة وملامحها جامدة خالية من المشاعر واعصابها مشدودة  راحلها هادي والقلق ظاهر على وجهه سألها بلهفة عن حال توبة

ردت عليها وملامحة متصلبة : توبة بخير بس الطفل مات

وكأن دلو ماء بارد نزل علية بفصل الشتاء الصدمة احتلتني وخلتني اتصلب بمكاني هادي وكف بمكانه للحظات بس الغضب اعتراه بعد سماعه لكلام اخوها من نطق

عيسى : هههههه ديلا هو ن..... ومات

محمد : بلكي امه تلحكه ونخلص من عارها

هجم عليه هادي سگطته تسگطت ما خلى عظم صاحي بيه واوسيد لكة حجة حتى يبرد گلبه لان ضربوني لزم الولد الثاني وهم استلمه دك كتل صار الضرب بفلس هادي لازم اثنين ويُكتل بيهم صياح وعياط وفشار وغلط الناس صارت تطلع من الغرفة وحتى الامن اجوي وسحلوهم وطلعوهم برى الكُل بدون استثناء

الدكتور چان واكف بعصبية وصاح : شنو هل مهزلة يومية متعاركين بالمستشفى ادري حلبة مصارعة ماتكولون اكو مرضى يحتاجون هدوء

ظل يرزل بيهم وبالممرضين لان خلوهم يسون هيچ ورجع دخل للغرفة عبق كعدت على الكرسي وهي صافنة بالارضية وحتى ماترمش
رحت كعدت بصفها وحطيت ايدي على كتفها وحضنتها

وهي كُل شي ماسوت بس غمضت عيونها وسندت راسها على كتفي مسحت على زندها وكلت واني احاول اواسيها : لاتضوجين عبق كُل شي رح يكون تمام توبة قوية واجهت الاقوى منه رح تكدر تجتاز هاي المحنة

ابتعدت عن وباوعتلي وكالت : ماتكدر توبة تعبت كُلش الدا يصير وياها فوك طاقتها كُل ما تستعدل يجي يشي يخليها تضعف منين تتلكاها البنية الكُل نابذها من اهلها لاخوها لرجلها الحقير كُل الي دا يصير بسببه

ريتان : شنو الي بأيدينا ياعبق الشي الدا يصير خارج عن ارادتنا

عبق : لا مو خارج عن ارادتنا كُل الدا يصير بسبب اهلها وعقليتهم المتخلف هاي بدل مايوكفون ويا بنتهم ويدعموها معنويا لا صارو هم والزمن عليها واذا خطأت شنو ارتكبت جريمة كتلت احد وبعدين كُل الدا يصير بسببهم لان هم جبروها تتزوج شخص ماتريده وبدافع حبها راحت وراه

ريتان : اهدي حبيبتي شنسوي هذا المجتمع وهذا تفكيرهم مايرحمون وعدهم البنية اذا غلطت ماكو حل غير الاعدام

انتفضت بغضب وهي تحچي بحرگة : بالقران ترا مللتوني كُل حچاية والثانية هذا مجتمعنا ...... على هيچ مجتمع يظلم البنية ويغبن حقهاااا شسوت هي على اي اساس يحكمون عليها بالموت لانها حبت شخص شنو هل عقلية شنو هل تخلللللف اذا كُل واحد يحچي وكُل بنية تحب تموت چان مابقت ولا بنية عايشة علمود حضرات جنابهم يرضووووووون

ريتان : اهدي اعصابچ حجيچ هذا مارح يسووي شي

عبق : اني اعرف شسوي وشلون اخذ حقها

مسحت وجهاا بغضب وظلت رايحة جاية بالممر واني كاعدة على الكرسي رفعت راسي من سمعت صوت وچان صوت مألوف ركزت بالشخص چانت الحجية الي مرة اجت بالمزرعة بس وياها بنية ورجال ما عرفتهم

خديجة : ولچ عبق شبيها توبة شصاير

وكأنها لكت الشخص الي تنفجر بيه صاحت بصوت حاد وهي تأشر على بيبيتها : احفاچ الجلااااااب الي يرحون فدوة للنعال لزموها كسروها تكسررررر ما ادري شلون عرفوو المكان رايحين كاتلين الحراس وهاجمين على البنية وبنتها ماتت بسببببهم ان شاء الله حوبتها ماتتعداهم وكُل دمعة منها ترجعلهم اضعاف واضعاف الالم وحقها مايضيييع لا واللله بأيدي هاي رح ارجع حقها واشوفكم منو عببببق

الحجية ماكدرت توكف بعد وكعدت على الكرسي اجيت وساعدتها وكعدتها وهي تبجي وتنوح على توبة وتضرب على رجلها بحسافة : اااخ يا يمة عمت عيني عليچ كضيتي عمرچ مشلوعة گلب ماخذة من حظ امچ عمت عيني عليچ يابيبي شفتي من حياتچ

كمت اهدي بيها بس هي بس تبچي وتنوح باوعت لعبق اجتها البنية ووكفت تحچي وياها وهزت راسها وفاتت للغرفة الي بيها توبة استغربت شلون خلوها تفوت والرجال الواكف ظل بعيد وما اجة ليمنا

عبق ظلت واكفة شوية ودگ تلفونها ردت عليه ونطقت بكلمة وحدة : جاية

اخذت جنطتها وطلعت من المكان وراحت ماعرفت وين ولا شنو سبب طلعتها رجعت للحجية چانت متخربطة وضغطها كُلش صعد راح الولد وصاح لوحدة من الممرضات واخذوها لوحدة من الغرف وقاسو ضغطها وانطوها دوة يلا شوية تحسنت ظليت كاعدة يمها خاف تحتاج شي وعبق بعد مارجعت

***********

شوفي ممنوع تحچين لأي احد قسم بالله والي رفع سماه بغير عمد اذا حرف واحد طلع تلكين نغسچ منهية سمعتتي

حچيت كلامي بتحذير وهي هزت راسها بطاعة رجعت كتلها : وكُل شي بحسابه كُل ما وفيتي وما حچيتي راح يزيد المبلغ والي تريديه يصير

كالت : تمام ما عندي مشكلة

كتلها : خوش هسة تروحيلها وديرين بالچ عليها وما تتركيها لحظة وحدة وفلوسچ توصل ليمچ

هزت راسها بموافقة وراحت جريت نفس قوي وزفرته  وطلعت من المكان الچنت بيه وطلعت للحديقة چانو هادي واوسيد واكفين هناك رحتلهم ووكفت يمهم وهم يدخنون بشراهة ظلو برا كاعدين بعد ماتعاركو ويا ذولاك الچلاب

هادي : هاا شلون صارت

عبق : كُلش متأذية الرحم متضرر وعدها كسر بأيدها ماعدا الجروح السطحية

شدد على قبضته بقوة وكز على اسنانه : كسر بأيد هل عار لو بس يخلوني الزمه

اوسيد : هو انتَ شخليت بيه حتى سنه وكع

هادي : طبه وجع القندرة ابن النعال

اوسيد : يعني هو قندرة وابوه نعال هاي عود دا تثقفه

هادي : ياتثقيف هذا بس ما نعال ودگ لحد ماينكطع النعال

عبق : هادي شلون عرفت  هم  بالمزرعة

هادي : الحارس من ضاربيهم وفايتين للبيت خابرني واني اصلا چنت رايح للمزرعة  وقريب منها

عبق : وانتَ اوسيد شلون عرفت احنا بالمستشفى

اوسيد : ريتان خابرتني وما افتهمت شي منها بس تصرخ رجعت دكيت على هادي وكالي الصار

هزيت راسي بقبول وسكتت ورجعت سألتهم بأستغراب : وبيبي وليلى شلون عرفو

هادي : ليلى دگت علية لان چانت دُگ عليچ وانتِ تلفونچ مغلق  وكتلها

عبق : امم  اكُلكم احد كال لهود

هادي : ما اتصل بية ولا كتله

اوسيد : بس اكيد هسة عرف من اخوانه

عبق : حتى لو عرف مارح يجي ادري الحقد لوين رح يوصلهم حتى هذا هود ما چان هيچ شجاه انچلب

اوسيد : طايح حظ اكو واحد يعوف اخته بهيچ محنة

هادي : هذا هم صاير زمال مدري شبيه توبة چانت روحه من الدنيا حسرة واحد يحچي وياها يگلبها عزة عليه

عبق : ما اكول حقه بس هو انكسر وتعرف هود من يتأذى من شخص ياخذ موقف ومايسامحه بسهولة خصوصا اذا چان الشخص قريب عليه ويعزه يحسها خيانة وغدر

اوسيد : يبقى طايح حظ حتى لو ما يسامحها ما يصير يعوفها وحدها واخوتها القنادر يريدون يأذوها

جريت حسرة وسكتت حچيه صدُك ما يصير يعوفها حتى لو زعلان منها ردت اروح بس وكفني صوت اوسيد : عبق صيحيلي ريتان بلا زحمة

عبق : خوش

رجعت للمستشفى ورحت للبيبي لكيتها متخربطة رأسا صحت لليلى وكتلها : ارجعو وجودكم ماله فايدة

ليلى : لا اني ابقى اشوف حالتها بس خلي عزيز وبيبي يرجعون لان بيبي ماتتحمل

خديجة : لا ابقى گلبي نار عليها

عبق : بيبي لاتعاندين دخيلچ والله مالي خلگ روحي تروحين تتمرضين انوب عليمن التفتت

سكتت مرغمة ورجعت ويا عزيز بس قبل لا يروح كالي : عبق اي شي تحتاجين بس دُگي علية تلكيني يمچ

عبق : ان شاء الله

عزيز : لاتستحين مثل اخوچ اني

عبق : ماتقصر ابو رهف

طلعو هم وانداريت على ريتان : حبيبي اوسيد يصيحچ جوة بالحديقة

هزت راسها ونزلت واني طلعت ورحت لغرفة توبة دخلت وكعدت يمها على الكرسي واني اباوع على ملامحها التعبانة وجها الچان يشع بياض وحمار هسة الصفار كاسيه الشفة الچانت توت صارت بيضة توبة الچانت تشع طاقة وحيوية صارت هزيلة والحزن مرسوم على وجها نبرتها الچانت كُلها سعادة صارت كُلها قهر وغصة

دائما سؤال يدور ببالي لييش ليش نخلقنا بمجتمع يكره الامرأة ويغبن حقها ليش نولدنا بمجتمع ما يحترم المرأة وما يقدر تعبها ولا يقدر ان هي كائن رقيق حساس الورقة تجرحه طبعا مو الكُل اكو اشخاص تحترم المرأة وتحطها على راسها بس هاي قلة قليلة جدا ونادرا ماتشوف هيچ شخص

صفنت بالحايط واخذني التفكير هود اذا عرف اخته صار بيها هيچ ومن اخوانه شنو رد فعله ورح ياخذ حقها لو رح يسكُت رح يتجاهل الموضوع لو رح يگلب عاليها واطيها شنو رح يسوي بس كُل هاي الافكار تبخرت من انفتح الباب ودخلت ليلى وراحت تعاين حالة توبة

توبة ظلت نايمة فترة كُلش طويلة وحل الليل والوقت عبر ال 12 وصارت الساعة بال2 حسيت عليها كامت تتحرك وتون بألم كمت وكفت ورحتلها وهي فتحت عيونها واشرقت الشمس منهن چانت عيونها ذبلان بتعب باوعتلي وهمست بغصة

توبة : بنتي بن بنتي عبق

عبق : اششش اهدي لاتخافين كُل شي تمام زين

توبة : بنتييي بنتي ماتت بنتيي

كامت تبچي وهي تتفحص بطنها الفارغ تقربت عليها ولزمت ايدها : والله اخذلچ حقچ بس اصبريلي وصدكيني بس اوكفي على حيلچ وارجعي لصحتچ ورح تلكين مفاجأة كُلش حلوة تنتظرچ

توبة : شتحچين انتِ اكُلچ بنتي ماتت ماااتت

عبق : توبة دا اكُلچ اهدي وخليها علية ليش ماتفهمين

سكتت وعرفت ماكو فائدة من الكلام وياي دارت وجهه وصارت تبچي بصمت بس صوت بچيها يكسر الگلب هزيت راسي بأسف وطلعت من الغرفة ورحت حتى اصيح ليلى تجي تشوفها

لكيتها نايمة على الكرسي بوضع مو مريح صحت عليها بصوت ناصي وهي رأسا فزت كالت : شكوو

عبق : على كيفچ ماكو شي بس كومي شوفي توبة كعدت

هزت راسها بقبول وكامت وياي ورجعنا صعدنا للطابق الموجودة بيه توبة وصلنا للغرفة ولكيت الباب شوية مفتوح واكو صوت بالغرفة لزمت ايد ليلى واشرتلها ما تطلع حس مديت راسي شوية من الباب وفتحت عيوني بصدمة من شفت جواد واكف كدامها وهي كاعدة ساندة ظهرها على السرير وساكتة ما تبچي

انداريت على ليلى بصدمة وهي هم چانت مصدومة مثلي بس ماحچيت شي وظليت ساكتة استمع الهم اباوعلهم من الفتحة الصغيرة

جواد : ليش ما تباوعيلي

توبة : اكو ناس ماتستحق نظرة منا

جواد : توبة ...

قاطعته بسؤالها : شعندك جاي ؟

جواد : اجيت اطمأن عليچ هذول اخوان ال..... عرفت سوو بيچ هيچ وبسببهم تأذيتي

توبة : محد بسبب اذيتي غيرك لاتذب ذنبك على غيرك محد وصلني لهل حال غيرك

جواد : توبة باوعيلي

ما ردت عليه وظلت دايرة وجها كعد يمها على السرير ولزم وجها بأيده وداره عليه وكاللها بنبرة خافتة : توبتي

دفعت ايده منها وكالت بنبرة حادة مغلفة بنبرة بكاء : اييدك

جواد : توبة ما اعرف شحچي ولا شكول ولا اعرف شلون ابرر موقفي

توبة : ما تكدر لان موقفك ما يتبرر

نزل راسه بخزي وكال بصوت مرتجف : قسم بالله من يوم السويت بيه هذيچ العملة واني ما ضايگ الراحة والله النوم ما شايفه متعذب اكثر من عذابچ صدكيني

ضعفت نبرة صوتها واكتساها البكاء وردت عليه بحرگة : عساك وابو زايد ان شاء الله ماتشوف الراحة ولا النوم عساك بحرگة گلبي عساك بحرگة روحي ياحقير انتَ تدري اليوم خسرت بنتي بسببببك طفلي اول طفل الي اليوم مااات بسبببك من وراك بعد ما اصير ام الله لايوفقك وعساها لا تتعداك

غطت وجها وبچت بألم وهو وكف بصدمة وماعرف شنو يحچي رجع كعد وهو يناديها وهي بس تبچي جر ايديها من وجها وكاللها : شتحچين يا طفل هذا توبة احچي وياچ ياطفل هذا

شهگت بدموعها وصاحت بيه : بنتتتتتتك  ياحقير يا نذذذذذل بنتتتتك صارلها 6 اشهر ببطني حملتها بروحي مو بجسمي وبسبببك اليوم خسرررتهااااا بسبببك

جواد : چنتي حامل ببنتي

توبة : اييي من ذيچ الليلة النحسة حملت الله لايوفقك ان شاء الله الله لا يضوگك الفرح ولا الراحة مثل ما حرمتني منها ومن بنتي

راد يحضنها بس هي دفعته وصرخت بيه : عوفنننننني شعندك هناااا شتريد انتَ شترييييييد مني شترييييد شبقى ما اخذته مو كُل شي سلبته مني اخذت گلبي وروحي اخذت عافيتي اخذت حياتي خسرت اهلي واخوية واخر شي خسرت بنتي ولك كافي عااااد كاااافي عوفني بحالي عوففففني

كامت تبچي بهستيرية واختنگت كُلش ماكدرت اسكت اكثر صحت بليلى حتى تجيب دواها مال ربو ودفعت الباب وفتت هو چان واكف يريد يسكتها وخرته منها وكعدت كدامها وثبتتها كدامي وهي صاير لونها ازرگ من البچي

عبق : اهدي توبة باوعلي اهددي تنفسي تنفسي كُل شي تمام يلا حبيبتي

توبة : ما م ما اكدر اتنفس رح اموت

عبق : كُل شي ما بيچ يلا حبيبي يلا تنفسي يلا

تحاول تجر النفس بس ما تكدر بس الحمدلله فاتت ليلى وبأيديها البخاخ اخذته منها وحطيته بحلگها وضغطت  عليه وهي شوية شوية بدت تتنفس واللون رجع لوجها مددتها على السرير ودموعها توكع بهدوء مسحت وجها من الدمع وهمست بصوت متحدرج من البچي

توبة : خلي يروح ما اريد اشوفه

عبق : هسة اطلعه بس اهدي

غمضت عيونها واني كمت اشرت لليلى تبقى يمها وجريت جواد من ردنه وطلعته لبرا هو چان واكف مصدوم ما اعرف شبيه وبس صافن همست بحده واني الوح بأيدي كدامه

عبق : هيووو وين صافن

جاوبني بشرود : نسيت عدها ربو ما ادري ماقصدي أذيها

دفعته من صدره وصحت بيه بحس ناصي : انتَ مو بس اذيتها انتَ دمرتها بأي عين جاي  ولك شنو هل الصلافة العندك  شنو هل جسارة ما كافي السويته بيها جاي هسة تكمل

رفع راسه والدمع لمع بعينه وجاوبني والعبرة خانگة صوته : ما ردت اسويلها شي بس اجيت اطمأن عليها 

للحظة حسيت بالشفقة عليه بس طردت كُل الافكار هاي من راسي واني اذكر نفسي بسوايته : روح جواد روح توبة الشافته منك هواي وهي هسة نايمة جوة بسببك انتَ

جواد : ادري غلطت وغلطتي ماتغتفر وماكو شي يبرر موقفي بس صدكيني ما چان قصدي أذيها الها چنت اريد اوجع ابوها وانتقم منها

عبق : وانتَ ما انتقمت من ابوها انتقمت من نفسك ومن توبة

جواد : والله متندم متندم بكد شعر راسي قسم بالله روحي دا تحترگ عليها متوجع ضعف وجعها نار مشتعلة بگلبي لان سويت بيها هيچ

عبق : ندمك بيش يفيد هسة بس فهمني شيفيددد ندمممك البنية ضاعت خسرت كُل شي ماضيها وحاضرها ومستقبلهااا شبقيت بيها انتتَ شبقييت خسرت عافيتها وصحتها خسرت اهلها واخوها خسرت الشخص الچانت تحبه واخر شي خسرت بنتها  وكُل هذا بسببك انتَ وبسبب انتقامك وحقدك

كعد على الكرسي وحط وجهه بين ايديه وطلعت من عنده شهگة شگت صدره لانها چانت طالعة من كُل گلبه وكام يبچي بصوت عالي وهو يحچي

جواد : والله ما ردت اسوي هيچ والله احبها احبها اكثر من روحي احبها اكثر من كُل شي  اخاف عليها مثل بنتي ما اعرف شلون طاوعت عقلي وخليته يسوي هيچ بيها شلون كدرت اقسي عليها وهي ارق من الوردة    والله چانت اذا تنخدش تخمش گلبي وياها ما اعرف ما اعرف شلون كدرت وتجرأت وسويت هيچ بيها عساني متت ونكصت ايدي قبل لا اوجعها اخخ ولچ عبق دموعها تحرگني بتيزاب  شسوي شسووي

رديت عليه بقسوة متجاهلة دموعه ونبرته المكسورة الي تكسر الخاطر  وكتله : شتسوي بعد اكثر من هيييچ البنية دمرررت دمرتها بأفعالللك وبحقدك وبكرهك هي شنو ذنبها كُلي هي شنو ذنبببها ليش دخلتها بأنتقامك لك ما هان عليك ايامك والحب الجمعكممم ما هان عليك ثقتها بيك تضحك بوجها وانتَ تخطط شلون تصيدها وتكسرها حتى تذل ابوهااا لك شهل نفسة شهل قدرة هااااي العنددددك

ضرب على راسه ضربات متتالية وكال : كُله من امي كُله منها هي الچانت تحرضني وتملي براسي بكلمات الانتقام هي الزرعت هذا الحقد بية هي الكرهتني بيهم كُل يوم تكُلي لا تنسى انتقامك ابوك مات بسببهم ابوك خسر كُل شي بسبب نعمان انتقم منه اخذ بنته واكسرها وخليها عبرة الهم  لا تلين ابني لا تلين خلي گلبك حجر وهي بكلامها ما تدري دا تعلقني ببتوبة اكثر يوم بعد يوم حبها يزيد ويكبر بداخلي يوم بعد يوم تعلقت بيها وما اكدر اعوفها مثل البذبرة انزرعت بداخلي  خلتني استعدل وغيرت هواي بية علمتني على الطريق الصح چنت انسان بلا شخصية مسربت ودايح خلتني اصير ادمي رجعتني للطريق الصح طلعتني من المستنقع الچنت بيه وبيش جازيتها بييييش طعنتها واذيتها كسرتها وكسرت روحها البريئة اني غبييي غبيييي

عبق : شنو تريد اكوله الك فوك كلامك  انتَ شنووو مو رجااااال شلون تخلي امك تحرضكك كلام يمشيييك هم حاسب نفسك على الزلم والنسوان تعبي براسك  هسة احسسسللللك  هيييچ خسرت كُل شي من ايدك لا حصلت انتقامك ولا حصلت توبة  وشوفه لنعمان هذذذذاك جبل ميهزه ريح عنده كتل توبة مثل شربة المييي لا عبالك هو رح ينقهر لان بنته صار بيها هيچ نعمان كلللب وما يهمه غير نفسه ومصلحتتتته

جواد : انتِ خليچ بمكاني طفل كُل عمره عشر سنين وكُل يوم ينعاد على مسامعه نفس الكلام ابوك انكتل ابوك مات مغدور ابوك انسلب حقه انتَ الي رح ترجع حق ابوك انتَ الي رح تنتقم لابوك  افكار انزرعت بعقل طفل مو بسهولة تنمحي

هزيت راسي بأسف وكتله : افكار غلط انزرعت بعقلك مع الاسف بالوقت الچان مفروض يعقلون عليك ويمنعوك من التسويه هم چان يشجعوك علی عملتك

جواد : امي هم حقها رجلها العاشرته سنين مات  وچانت تريد حقه

عبق : تاخذ حقك من الشخص الي اذاك توبة ماسوت شي وبالوكت المات ابوك هي چان كُل عمرها سنتين

نزل راسه وكال بصوت ضعيف : كلامچ صح بس هسة  شسوي بس فهميني شسسسوي روحي دا تحترك عليها واني اشوفها متأذية 

تنهدت بقهر وكتله : عوفها وابتعد عنها خليها تعيش ويا ما تبقى من حياتها خليها تلملم شتات نفسها كافي عاد الشافته فوك طاقتها اتركوها بحالها

سكت ومارد علية واني عفته ودخلت جوة يمهن لكيت توبة نايمة وليلى تمسح على شعرها تقرة ايات يم راسها  كعدت على الكرسي وحطيت راسي بين ايدية بتعب ياربي والله هواي هيچ منين الواحد يتلكاها

صبح الصبح وعيني ما غفت كمت وطلعت من الغرفة وليلى يم توبة نزلت جوة ورحت اشتريت چاي وطلعت للحديقة يم هادي  اوسيد اخذ ريتان ورجعو بطلب من هادي البارحة  انطيته كلاص چاي لهادي واني اخذت كلاصي وكعدت يمه بهدوء وهو هم ساكت   رفعت راسي والتفتت لمن صاح هادي بذهول

هوود

************

ولنا في الخيال حياة

-***********

اتمنى يكون البارت نال اعجابكم انتظروني بالبارت الجاي بأحداث مشوقة كانت وياكم اهتكم الماس K.T

*******
الى اللقاء...